ʼE Kotou Tuku Koa He Faʼifaʼitaki ʼo ʼUhiga Mo Te Fakahā ʼAē ʼo Te Fakaʼapaʼapa?

“ ʼO ʼuhiga mo takotou fefakaʼapaʼapaʼaki, kotou tuku he faʼifaʼitaki.”—LOMA 12:10.

 1. Ko te aga fea ʼaē kua puli ʼi te ʼu fenua e lahi ʼo te mālamanei?

 ʼI ʼIHI fenua ʼo te mālamanei, ʼe ko he agaʼi fenua ki te fānau ʼaē ʼe kei liliki ke natou fakaʼapaʼapa kiā nātou ʼaē kua lalahi, ʼo natou tuʼutuli fakaʼapaʼapa mokā natou fakatahi mo nātou. ʼI tanatou tuʼutuli ʼaia, ʼe mole feala ai hanatou māʼoluga age iā nātou ʼaē kua matuʼatuʼa. ʼI te ʼu fenua ʼaia, kā situʼa he tamasiʼi ki he tahi kua matuʼatuʼa pea ʼe toe fakaʼuhiga ki he aga ʼe mole fakaʼapaʼapa. Logolā ʼe tahi ʼalu pē te fakahā ʼo te fakaʼapaʼapa pea mo tona agaʼi fenua, kae ko te ʼu aga fakaʼapaʼapa ʼaia ʼe ina fakamanatuʼi mai ia te Lao ʼa Moisese. Neʼe kau kiai ia te fakatotonu ʼaenī: “ ʼE ke tuʼu ake anai ki ʼoluga iā muʼa ʼo te ʼu ʼulu hina, pea ʼe tonu anai ke ke fakaʼapaʼapa ki te tagata matuʼa.” (Lev. 19:32) Kae ʼe lahi ia te ʼu fenua kua puli ia te fakaʼapaʼapa ki ʼihi. ʼI tona fakahagatonu, ʼe mole kei fakamaʼuhigaʼi ʼi totatou temi ia te aga fakaʼapaʼapa.

 2. ʼI te Folafola ʼa te ʼAtua, ko ai ʼaē ʼe tonu ke tou fakaʼapaʼapa ki ai?

² Ko te Folafola ʼa te ʼAtua ʼe ina fakamaʼuhigaʼi ʼaupitō ia te fakahā ʼo te fakaʼapaʼapa. ʼE ina ʼui mai ke tou fakaʼapaʼapa kiā Sehova pea mo Sesu. (Soa. 5:23) ʼE toe fakatotonu mai ke tou fefakaʼapaʼapaʼaki ʼi totatou fāmili, ʼi totatou ʼu tehina, pea ʼi te hahaʼi ʼi tuʼa atu ʼo te kōkelekāsio. (Loma 12:10; Efe. 6:1, 2; 1 Pet. 2:17) Ko te ʼu ʼaluʼaga fea ʼaē ʼe tou fakahā ai tatatou fakaʼapaʼapa kiā Sehova? ʼE tou fakahā feafeaʼi tatatou fakaʼapaʼapa ʼaē ki totatou ʼu tehina mo tuagaʼane fakalaumālie? Tou vakaʼi age muʼa te ʼu ʼaluʼaga ʼaia pea mo te ʼu fehuʼi ʼaē ʼe pipiki kiai.

Tou Fakaʼapaʼapa Kiā Sehova Pea Mo Tona Huafa

 3. Koteā he faʼahi maʼuhiga ke tou fakaʼapaʼapa ai kiā Sehova?

³ Ko he faʼahi maʼuhiga ke tou fakaʼapaʼapa ai kiā Sehova, ʼe ko hatatou fakahā ia te fakaʼapaʼapa ʼaē ʼe tuha mo tona huafa. ʼI tona fakahagatonu, ko tātou ko “he hahaʼi ki tona huafa.” (Gāue 15:14) ʼE tou fiameʼameʼa ʼaupitō ʼi tatatou fua ia te huafa ʼo te ʼAtua māfimāfi, ko Sehova. Neʼe ʼui fēnei e te polofetā ko Mikea: “Ko te hahaʼi fuli ʼe natou tahi haʼele anai ʼi te huafa ʼo tona ʼatua, kae kiā tātou, ʼe tou haʼele anai ʼi te huafa ʼo Sehova totatou ʼAtua ʼo aʼu ki he ʼu temi ʼe mole ʼiloʼi hona gataʼaga, ʼeī, ʼo talu ai.” (Mik. 4:5) ʼE tou “haʼele . . . ʼi te huafa ʼo Sehova” mo kapau ʼi te ʼaho fuli ʼe tou faigaʼi ke ʼaua naʼa moamoagaʼi ia te huafa ʼaia ʼuhi ko tatatou aga. Ohagē ko tona fakamanatuʼi e Paulo ki te kau Kilisitiano ʼo Loma, kapau ʼe mole ʼalutahi totatou maʼuli mo te logo lelei ʼaē ʼe tou fakamafola, ko te huafa ʼo te ʼAtua ʼe “moamoagaʼi” anai pea ʼe ʼulihi anai mo tona matagafua.—Loma 2:21-24.

 4. ʼE kotou fakaʼuhiga feafeaʼi ia te pilivilēsio ʼaē ko te fai fakamafola ʼo ʼuhiga mo Sehova?

⁴ ʼE tou toe fakaʼapaʼapa foki kiā Sehova ʼi tatatou gāue fai fakamafola. ʼI te temi muʼa, neʼe fakaafe e Sehova ia te kau Iselaele ke natou liliu ko hana kau fakamoʼoni, kae neʼe mole natou fakahoko ia te faʼahi ʼaia. (Isa. 43:1-12) ʼI te temi fuli pē neʼe natou agatuʼu kiā Sehova pea mo “fakalotomamahiʼi ia te Māʼoniʼoni ʼo Iselaele.” (Pes. 78:40, 41) Ki muli age, neʼe mole kei maʼu leva e te puleʼaga ʼo Iselaele ia te ʼofa ʼaē ʼo Sehova. Kae iā ʼaho nei, ʼe tou loto fakafetaʼi ki te pilivilēsio ʼaē ʼe tou maʼu ke tou fai fakamafola ʼo ʼuhiga mo Sehova pea mo fakaʼiloʼilo tona huafa. ʼE tou fai te faʼahi ʼaia heʼe tou ʼofa kiā te ia pea ʼe tou fia fakatapuhā ia tona huafa. Kā kua tou ʼiloʼi ia te moʼoni ʼo ʼuhiga mo tatatou Tamai ʼaē ʼe ʼi selō pea mo tana ʼu fakatuʼutuʼu, ʼe mole feala hatatou nonofo fakalogologo. ʼE tou hagē ko te ʼapositolo ko Paulo, ʼi te temi ʼaē neʼe ina ʼui fēnei ai: “Neʼe tuku mai kiā te au te maʼua. ʼEī, malaʼia kiā te au mo kapau ʼe mole au tala te logo lelei!”—1 Ko. 9:16.

 5. He koʼē ko te tui ʼaē kiā Sehova ʼe pipiki ki tatatou fakaʼapaʼapa ʼaē kiā te ia?

 ⁵ Neʼe ʼui fēnei e te tagata fai pesalemo ko Tavite: “Ko nātou ʼaē ʼe natou ʼiloʼi tou huafa ʼe natou falala anai kiā te koe, heʼe mole ke lītuʼa anai kiā nātou ʼaē ʼe natou kumi koe, Ê Sehova!” (Pes. 9:10) Kapau ʼe tou ʼiloʼi moʼoni ia Sehova pea mo tou fakaʼapaʼapa ki te fakaʼuhiga ʼo tona huafa, ʼe tou falala anai kiā te ia ohagē ko tona fai e tana ʼu kaugana agatonu ʼo te temi muʼa. Kapau ʼe tou maʼu ia te taʼi falala ʼaia pea mo tui kiā Sehova, pea ʼe ko he tahi ʼaia faʼahi ke tou fakaʼapaʼapa ai kiā te ia. Kotou fakatokagaʼi peʼe fakapipiki feafeaʼi e te Folafola ʼa te ʼAtua ia te falala ʼaē kiā Sehova pea mo te fakaʼapaʼapa ʼaē kiā te ia. ʼI te temi ʼaē neʼe mole kei falala ai Iselaele kiā te Ia, neʼe fehuʼi fēnei e Sehova kiā Moisese: “ ʼE aʼu anai ki ʼāfea te mole fakaʼapaʼapa mai ʼa te hahaʼi nei kiā te au pea ʼe aʼu anai koa ki ʼāfea tanatou mole tui mai kiā te au, logopē te ʼu fakaʼiloga fuli ʼaē neʼe au fai ʼi te lotolotoiga ʼo nātou?” (Fkau. 14:11) Koia kana neʼe natou fakaʼapaʼapa lā kiā Sehova, neʼe natou toe falala pē foki kiā te ia. ʼI te ʼu temi faigataʼaʼia ʼaē ʼe tou falala ai kiā Sehova ke ina puipui pea mo tokoni mai kiā tātou, ʼe tou fakahā ai ʼe tou fakaʼapaʼapa kiā te ia.

 6. Koteā ʼaē ʼe ina uga tātou ke tou fakaʼapaʼapa lahi kiā Sehova?

⁶ Neʼe fakahā e Sesu ko te fakaʼapaʼapa ʼaē kiā Sehova ʼe tonu ke haʼu mai totatou loto. ʼO ʼuhiga mo nātou ʼaē ʼe tauhi kiā Sehova kae neʼe mole natou fakamālotoloto, neʼe talanoa Sesu ki te ʼu palalau neʼe fai e Sehova, ʼo ʼui māʼana: “Ko te hahaʼi nei ʼe natou fakamaʼuhiga au ʼaki ʼonatou laugutu, kae mamaʼo ʼaupitō tonatou loto iā te au.” (Mat. 15:8) Ko te fakaʼapaʼapa fakamālotoloto ʼaē kiā Sehova ʼe haʼu ia mai he ʼofa moʼoni kiā te ia. (1 Soa. 5:3) Pea ʼe tonu foki ke tou manatuʼi ia te fakapapau ʼaenī ʼa Sehova: “Ko nātou ʼaē ʼe fakaʼapaʼapa kiā te au ʼe au fakaʼapaʼapa anai kiā nātou.”—1 Sam. 2:30.

Ko Te ʼu Taupau ʼo Te Kōkelekāsio ʼe Natou Tuku He Faʼifaʼitaki ʼo ʼUhiga Mo Te Fakaʼapaʼapa ʼAē Ki ʼIhi

 7. (a) He koʼē ko te ʼu tehina ʼaē ʼe natou takitaki ʼi te kōkelekāsio ʼe tonu ke natou fakaʼapaʼapa kiā nātou ʼaē ʼe natou takitaki ki ai? (b) Neʼe fakahā feafeaʼi e Paulo ia tana fakaʼapaʼapa ʼaē ki tona ʼu tehina?

⁷ Neʼe tokoniʼi fēnei e te ʼapositolo ko Paulo ia tona ʼu tehina: “ ʼO ʼuhiga mo takotou fefakaʼapaʼapaʼaki, kotou tuku he faʼifaʼitaki.” (Loma 12:10) Ko te ʼu tehina ʼaē ʼe natou takitaki ʼi te kōkelekāsio, ʼe tonu anai ke natou “tuku he faʼifaʼitaki,” ʼo natou fakaʼapaʼapa kiā nātou ʼaē ʼe natou takitaki ki ai. Ki te faʼahi ʼaia, ko nātou ʼaē ʼe natou fakahoko ia te ʼu maʼua mamafa, ʼe lelei anai ke natou mulimuli ki te faʼifaʼitaki ʼaē neʼe tuku mai e Paulo. (Lau ia 1 Tesalonika 2:7, 8.) Ko te ʼu tehina ʼo te ʼu kōkelekāsio ʼaē neʼe ʼaʼahi e Paulo, neʼe natou ʼiloʼi ʼe mole ina kole age anai ke natou fai he meʼa ʼe mole ina fai anai e ia totonu. Neʼe fakaʼapaʼapa Paulo ki tona ʼu tehina, ʼo tupu ai tanatou toe fakaʼapaʼapa kiā te ia. ʼI te ʼui ʼaē e Paulo: “Koia ʼe au kolekole atu, kotou faʼifaʼitakiʼi au,” ʼe tou tui papau neʼe tokolahi ia nātou ʼaē neʼe natou lotolelei ke natou fai ia te faʼahi ʼaia koteʼuhi ko te faʼifaʼitaki lelei ʼaē neʼe ina tuku age kiā nātou.—1 Ko. 4:16.

 8. (a) Koteā he faʼahi maʼuhiga neʼe fakahā ai e Sesu ia te fakaʼapaʼapa ki tana ʼu tisipulo? (b) ʼE feafeaʼi ki te kau taupau iā ʼaho nei hanatou muliʼi ia te faʼifaʼitaki ʼa Sesu?

⁸ Ko te tahi faʼahi ʼaē ʼe fakahā ai e he tagata ʼāfea tana fakaʼapaʼapa kiā nātou ʼaē ʼe takitaki ki ai, ko tana fakamahino age kiā nātou ia te ʼu tupuʼaga ʼo te ʼu meʼa ʼaē ʼe ina kole age peʼe ko te ʼu tokoni ʼaē ʼe ina foaki age kiā nātou. Kapau ʼe ina fai ia te faʼahi ʼaia, ʼe ina muliʼi anai ia te faʼifaʼitaki ʼa Sesu. Ohagē lā, ʼi tana ʼui age ʼaē ki tana ʼu tisipulo ke natou kole ke lahi age he kau gāue ke fekauʼi ki te taʼukai, neʼe fakamahino age e Sesu pe koteā tona tupuʼaga. Neʼe ina ʼui fēnei: “Ko te taʼukai ʼe lahi, kae ʼe tokosiʼi te kau gāue. Koia, kotou faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.” (Mat. 9:37, 38) ʼO toe fēia pē, ʼi tana ʼui ʼaē ki tana u tisipulo ke natou “nonofo ʼalaʼala,” neʼe ina fakahā age kiā nātou tona tupuʼaga. Neʼe ina ʼui fēnei: “Heʼe mole kotou ʼiloʼi pe ko te ʼaho fea ʼaē ʼe haʼu ai tokotou ʼAliki.” (Mat. 24:42) ʼI te temi fuli pē, neʼe fakahā e Sesu ki tana ʼu tisipulo te meʼa ʼaē neʼe tonu ke natou fai pea mo te tupuʼaga ʼaē ke natou fai ai ia te meʼa ʼaia. ʼI tana taʼi fai ʼaia, neʼe ina fakahā ai kiā nātou ia tana fakaʼapaʼapa pea mo tana fakamaʼuhigaʼi nātou. ʼI faʼifaʼitaki lelei ki te kau taupau ʼo te temi nei ke natou mulimuli kiai!

 Tou Fakaʼapaʼapa Ki Te Kōkelekāsio ʼa Sehova Pea Mo Tana Takitaki

 9. Ko ai ʼaē ʼe tou fakaʼapaʼapa ki ai mokā tou fakaʼapaʼapa ki te kōkelekāsio fakamālamanei pea mo tana hahaʼi fakafofoga? Kotou fakamahino.

⁹ Ke tou fakaʼapaʼapa kiā Sehova, ʼe tonu foki ke tou fakaʼapaʼapa ki te kōkelekāsio fakamālamanei ʼa te kau Kilisitiano, pea mo tana hahaʼi fakafofoga. Kā tou fakalogo ki te ʼu tokoni Fakatohi-tapu ʼaē ʼe haʼu mai te tagata kaugana agatonu mo poto, pea ʼe tou fakaʼapaʼapa ki te fakatuʼutuʼu ʼa Sehova. ʼI te kōkelekāsio ʼo te ʼuluaki sēkulō, neʼe sio ia te ʼapositolo ko Soane ki te maʼuhiga ʼaē ke fakatonutonuʼi ia nātou ʼaē neʼe mole natou fakaʼapaʼapa kiā nātou ʼaē neʼe hinoʼi ke takitaki ʼi te kōkelekāsio. (Lau ia 3 Soane 9-11.) ʼE hā mai ʼi te ʼu palalau ʼa Soane neʼe mole fakaʼapaʼapaʼi te kau taupau, ʼo toe fēia mo tanatou ʼu faiakonaki pea mo tanatou takitaki. Kae meʼa lelei, he neʼe mole fēia leva ia te kau Kilisitiano fuli. ʼI te kei māʼuʼuli ʼa te kau ʼapositolo, neʼe kei fakaʼapaʼapa ia te faletautēhina kātoa kiā nātou ʼaē neʼe takitaki ia te kōkelekāsio.—Filp. 2:12.

10, 11. ʼAki te Tohi-Tapu, kotou fakamahino pe koʼē neʼe ko he fakatuʼutuʼu lelei ke takitaki ia te kōkelekāsio e niʼihi.

¹⁰ Neʼe manatu ʼihi, kapau ko Sesu neʼe ina ʼui age ki tana ʼu tisipulo “ ʼe kotou tautēhina fuli” pea ʼe mole tonu ia ke ʼi ai niʼihi ʼe natou takitaki ʼi te loto kōkelekāsio. (Mat. 23:8) Kae ʼi te ʼu Tohi Fakahepeleo pea mo Fakakeleka ʼe lahi te ʼu faʼifaʼitaki ʼo te ʼu tagata neʼe foaki age kiā nātou e te ʼAtua ia te tuʼulaga pule. Ko te hisitolia ʼo te kau pāteliaka, te kau tuʼi fakamāu, pea mo te ʼu hau ʼi te temi ʼo te kau Hepeleo, ʼe ko he fakamoʼoni lelei ko Sehova ʼe ina foaki te takitaki ki tana ʼu hahaʼi fakafofoga. ʼI te temi ʼaē neʼe mole fakaʼapaʼapa ai te hahaʼi ki te ʼu tagata ʼaē neʼe hinoʼi e te ʼAtua, pea neʼe fakatotonuʼi nātou e Sehova.—2 Hau 1:2-17; 2:19, 23, 24.

¹¹ ʼO toe fēia ki te kau Kilisitiano ʼo te ʼuluaki sēkulō, neʼe natou fakamoʼoni ki te pule ʼa te kau ʼapositolo. (Gāue 2:42) Ohagē lā, ko Paulo neʼe ina takitaki tona ʼu tehina. (1 Ko. 16:1; 1 Tes. 4:2) Kae neʼe toe fakalogo lelei mo ia kiā nātou ʼaē neʼe pule kiā te ia. (Gāue 15:22; Kal. 2:9, 10) ʼIo, neʼe maʼu e Paulo ia te manatu lelei ʼo ʼuhiga mo te pule ʼaē neʼe fakatuʼu ʼi te kōkelekāsio.

12. Koteā ia te ʼu koga e lua ʼo te ako ʼaē ʼe tou maʼu mai te ʼu faʼifaʼitaki Fakatohi-tapu ʼo ʼuhiga mo te pule?

¹² ʼE koga lua ia te ako ʼaē ʼe tou maʼu mai ai. ʼUluaki, ʼe fakatafito ki te Tohi-Tapu ia te hinoʼi ʼaē e te “tagata kaugana agatonu mo poto” mo tona Kolesi Pule ia te ʼu tagata ki he ʼu gāue ʼi te loto kōkelekāsio, pea neʼe hinoʼi ʼihi ke natou pule ki ʼihi tagata neʼe hinoʼi. (Mat. 24:45-47; 1 Pet. 5:1-3) Lua, ko tātou fuli, ʼo kau ai mo te ʼu tehina ʼaē neʼe hinoʼi, ʼe tonu ke tou fakaʼapaʼapa kiā nātou ʼaē neʼe hinoʼi ke pule kiā tātou. Ko te ʼu ʼaluʼaga fea ʼaē ʼe feala ai ke tou fakaʼapaʼapa kiā nātou ʼaē ʼe natou takitaki ʼi te ʼu kōkelekāsio fakamālamanei ʼo te kau Kilisitiano?

Tou Fakaʼapaʼapa Ki Te Kau Taupau Feʼoloʼaki

13. ʼE feafeaʼi hatatou fakaʼapaʼapa kiā nātou ʼaē ʼe natou fakafofoga te kōkelekāsio iā ʼaho nei?

¹³ Neʼe ʼui fēnei e Paulo: “ ʼE matou kole atu ʼu tehina, ke kotou aga fakaʼapaʼapa kiā nātou ʼaē ʼe gāue kinakina iā koutou, pea ʼe natou takitaki koutou ʼi te ʼAliki, pea ʼe natou fakatokaga koutou; pea ke kotou fakamaʼuhigaʼi lahi age nātou ʼi te ʼofa, ʼuhi ko tanatou gāue. Kotou fetokaleleiʼaki.” (1 Tes. 5:12, 13) ʼE mahino ia, ʼe kau ia te kau taupau feʼoloʼaki iā “nātou ʼaē ʼe gāue kinakina.” Koia, tou foaki kiā nātou ‘he fakamaʼuhiga ʼe lahi age.’ Ke tou  fakahā ia te faʼahi ʼaia, tou fakalogo ʼaki he loto kātoa ki tanatou ʼu tokoni pea mo tanatou ʼu fakalotomālohi. Kā foaki mai e he taupau fēia te takitaki ʼaē mai te “tagata kaugana agatonu mo poto,” pea ko te “poto mai ʼoluga” ʼe ina uga anai tātou ke tou “fia fakalogo” kiā nātou.—Sake 3:17.

14. ʼE fakahā feafeaʼi e te kōkelekāsio ia he fakamoʼoni ʼo tana fakaʼapaʼapa fakamālotoloto ʼaē ki te kau taupau feʼoloʼaki, pea koteā tona ʼu fua?

¹⁴ ʼE feafeaʼi anai mo kapau ʼe fakatotonu mai ke tou fai he ʼu meʼa ʼe mole tatau mo te ʼu meʼa ʼaē ʼe tou fai māhani? Kapau ʼe tou fia fakaʼapaʼapa ki tanatou faʼahiga takitaki, ʼe lagi maʼua ʼi ʼihi temi ke tou tekeʼi te taʼi manatu ʼaenī: “ ʼE mole matou fai fēia ʼi henī” peʼe “Ko te gāue ʼaia ʼe lagi ʼi ai tona fua ʼi te tahi atu ʼu kōkelekāsio kae ʼe mole fēia ia ʼi tamatou kōkelekāsio.” ʼAua naʼa tou manatu fēia, kae ke tou kātaki pē ʼo fakalogo ki tanatou takitaki. ʼAua naʼa galo kiā tātou, ko te kōkelekāsio ʼe ʼa Sehova pea ko Sesu tona Pule, ʼe tokoni mai anai ke tou fakalogo. Kapau ʼe tali fakafiafia pea mo fakalogo lelei te kōkelekāsio ki te takitaki ʼa he taupau feʼaluʼaki, pea ʼe ko he fakamoʼoni ʼaia ʼo te maʼu ʼo te fakaʼapaʼapa fakamālotoloto. Neʼe vikiʼi e te ʼapositolo ko Paulo te ʼu tehina ʼo Kolonito ki tanatou fakalogo fakaʼapaʼapa ʼaē ki te takitaki ʼa te tagata ʼāfea matāpule ko Tito. (2 Ko. 7:13-16) Iā ʼaho nei, ʼe lagi feala ke tou tui papau ko tatatou fakalogo ʼaki he lotolelei ki te takitaki ʼa te ʼu taupau feʼoloʼaki, ʼe lagolago tāfito ki te fiafia ʼaē ʼe tou maʼu ʼi te gāue fai fakamafola.—Lau ia 2 Kolonito 13:11.

Tou “Fakaʼapaʼapa Ki Te ʼu Faʼahiga Tagata Kehekehe”

15. Koteā ʼihi ʼaluʼaga ʼaē ʼe tou fakahā ai tatatou fakaʼapaʼapa ki totatou ʼu tehina?

¹⁵ Neʼe tohi fēnei e Paulo: “ ʼAua naʼa ke fatufatuʼi kovi he tagata kua matuʼa. Kae fakakolekole ki ai ohagē ko he tamai, ko te hahaʼi tūpulaga ohagē ko he ʼu tehina, ko te ʼu fafine fotufotuʼa ohagē ko he ʼu faʼē, ko te kau finemui ohagē ko he ʼu tuagaʼane, ʼaki he aga maʼa kātoa. Fakaʼapaʼapa ki te ʼu fafine vītua, ia nātou ʼaē ko te ʼu vītua moʼoni.” (1 Tim. 5:1-3) ʼEī, ko te Folafola ʼa te ʼAtua ʼe ina fakalotomālohiʼi tātou ke tou fakaʼapaʼapa ki te hahaʼi fuli ʼo te kōkelekāsio. Kae ʼe feafeaʼi age lā mo kapau ʼe mole kotou felōgoi mo hokotou tehina peʼe ko hokotou tuagaʼane? ʼE ina tāʼofi ai anai koa takotou fakaʼapaʼapa ʼaē ki tokotou tehina ʼaia? Peʼe tonu anai koa ke kotou fetogi takotou aga, ʼo kotou sioʼi tāfito ia te ʼu kalitātē fakalaumālie ʼo te kaugana ʼaia ʼa te ʼAtua? Ko nātou ʼaē ko te kau takitaki, ʼe tonu tāfito ke natou fakaʼapaʼapa ki ʼonatou tehina—ʼo mole natou ‘pule ʼaki he loto fefeka ki te faga ovi.’ (1 Pet. 5:3) Koia, ʼi te kōkelekāsio, ʼaē ʼe hā tāfito ai ia te ʼofa moʼoni ʼa te ʼu tehina mo tuagaʼane, ʼe tou maʼu ai ia te ʼu faigamālie ke tou fefakaʼapaʼapaʼaki—Lau ia Soane 13:34, 35.

16, 17. (a) He koʼē ʼe maʼuhiga ke tou fakaʼapaʼapa kiā nātou ʼaē ʼe tou fakamafola ki ai pea mo nātou ʼaē ʼe fakafeagai mai kiā tātou? (b) ʼE feafeaʼi hatatou “fakaʼapaʼapa ki te ʼu faʼahiga tagata kehekehe”?

 ¹⁶ Kae ʼe mole tou fakatuʼakoi pē tatatou fakaʼapaʼapa kiā nātou ʼaē ʼe kau ki te kōkelekāsio Fakakilisitiano. Neʼe tohi e Paulo ki te kau Kilisitiano ʼo tona temi: “ ʼI te temi fuli pē ʼaē ʼe tou maʼu ai hotatou temi faigamālie, tou fai te meʼa ʼaē ʼe lelei ki te hahaʼi fuli pē.” (Kal. 6:10) ʼE mahino ia, ko te maʼuliʼi ʼo te pelesepeto ʼaia ʼe feala ke mata faigataʼa mo kapau ko he kaugā gāue peʼe ko he kaugā ako ʼe mole agalelei mai kiā kita. ʼI te ʼu taʼi lakaga ʼaia, ʼe ʼaoga anai ke tou manatuʼi te ʼu palalau ʼaenī: “ ʼAua naʼa ke ʼita ʼuhi ko te kau agakovi.” (Pes. 37:1) Kapau ʼe tou maʼuliʼi te tokoni ʼaenī, pea ʼe tou aga fakaʼapaʼapa aipē kiā nātou ʼaē ʼe fakafeagai mai kiā tātou. ʼO toe fēia pē mokā tou kau ki te gāue fai fakamafola, kapau ʼe tou agavaivai pea ʼe feala ai anai ke tou tali ʼaki “he agamalū pea mo fakaʼapaʼapa lahi” ki te hahaʼi. (1 Pet. 3:15) ʼE tou toe fakahā ʼi totatou faʼahiga teu ʼe tou fakaʼapaʼapa kiā nātou ʼaē ʼe tou fai fakamafola ki ai.

¹⁷ Koia, kapau ʼe tou felōgoi mo totatou ʼu tehina mo tuagaʼane peʼe ko nātou ʼaē ʼi tuʼa atu ʼo te kōkelekāsio, ʼe tou faiga anai ke tou maʼuliʼi te tokoni ʼaenī: “Kotou fakaʼapaʼapa ki te ʼu faʼahiga tagata kehekehe, kotou ʼoʼofa ki te fāmili kātoa ʼo te ʼu tehina, kotou manavasiʼi ki te ʼAtua, kotou fakaʼapaʼapa ki te hau.”—1 Pet. 2:17.

ʼE Kotou Tali Feafeaʼi Anai?

ʼE feafeaʼi hakotou fakaʼapaʼapa:

• Kiā Sehova?

• Ki te kau tagata ʼāfea ʼo te kōkelekāsio pea mo te kau taupau feʼoloʼaki?

• Ki te hahaʼi fuli ʼo te kōkelekāsio?

• Kiā nātou ʼaē ʼe kotou fakamafola ki ai?

[ʼU fehuʼi ʼo te ako]

[Paki ʼo te pasina 23]

Ko te kau Kilisitiano ʼo te ʼuluaki sēkulō neʼe natou fakaʼapaʼapa ki te takitaki ʼa te kolesi pule

[Paki ʼo te pasina 24]

ʼI te ʼu fenua kehekehe, ko te kau tagata ʼāfea ʼe natou fakaʼapaʼapa ki te kau taupau feʼoloʼaki, ʼaē neʼe hinoʼi e te Kolesi Pule