ʼE Sio Ifo Mai Sehova Ke Tokoni Mai Kiā Tātou

“Ko [te] ʼu mata [ʼo Sehova] ʼe taka ʼi te kele kātoa, ke ina fakahā tona mālohi kiā nātou ʼaē ʼe kātoa tonatou loto kiā te ia.”—2 FKMA. 16:9.

 1. He koʼē ʼe sivisivi tātou e Sehova?

 KO SEHOVA ʼe ko te Tamai haohaoa. ʼE ina ʼiloʼi lelei tātou koia ʼaē ʼe mahino ai ki ‘te faleleʼaga ʼo totatou ʼu fakakaukau.’ (1 Fkma. 28:9) Kae ʼe mole ina sivisivi pē tātou ke ina maʼu ni ʼatatou hala. (Pes. 11:4; 130:3) ʼAki tona ʼofa, ʼe ina fia puipui tātou mai he ʼu meʼa ʼe fakatupu kovi anai ki tatatou ʼu felōgoi ʼaē mo ia peʼe fakatupu tuʼutāmaki ki tatatou ʼamanaki ʼaē ke tou maʼu ia te maʼuli heʼegata.—Pes. 25:8-10, 12, 13.

 2. Ko ai ʼaē ʼe fakahā ki ai e Sehova ia tona mālohi?

² Ko Sehova ʼe māfimāfi pea mo sio kiā meʼa fuli. Koia ʼaē, ʼe feala ai ke tokoni ki tana ʼu kaugana agatonu ʼi te temi fuli pē ʼaē ʼe natou fetapa age kiā te ia, pea ʼe tokoni mai kiā nātou ʼi tonatou ʼu temi mamahi. ʼE ʼui fēnei iā 2 Fakamatala. 16:9: “Ko [te] ʼu mata [ʼo Sehova] ʼe taka ʼi te kele kātoa, ke ina fakahā tona mālohi kiā nātou ʼaē ʼe kātoa tonatou loto kiā te ia.” Kotou fakatokagaʼi ko Sehova ʼe ina fakaʼaogaʼi tona mālohi moʼo tokoni kiā nātou ʼaē ʼe tauhi age kiā te ia ʼaki he loto ʼe kātoa, ia he loto ʼe maʼa pea mo fakamālotoloto. ʼE mole tokaga fēia ia kiā nātou ʼaē ʼe natou aga fakakākā peʼe natou mālualoi.—Sos. 7:1, 20, 21, 25; Taag. 1:23-33.

Tou Haʼele Mo Te ʼAtua

3, 4. Koteā te fakaʼuhiga ke tou ‘haʼele mo te ʼAtua,’ pea ko te ʼu faʼifaʼitaki fea ʼi te Tohi-Tapu ʼe tokoni mai ke tou mahino ki te faʼahi ʼaia?

³ ʼI te manatu ʼa te tokolahi, ʼe mole feala ia ki te Tupuʼaga ʼo totatou ʼatulaulau ke ina fakafealagia  ki te hahaʼi ke natou haʼele mo ia ʼi te faʼahi fakalaumālie. Kae ko te faʼahi ʼaia ʼaē ʼe loto tāfito e Sehova ke tou fai. ʼI te temi muʼa, ko Enoke pea mo Noe neʼe nā ‘haʼele mo te ʼAtua.’ (Sen. 5:24; 6:9) Ko Moisese neʼe “nofo mālohi ia ohagē . . . ʼe sio kiā Ia ʼaē ʼe fakapulipuli.” (Hep. 11:27) Ko te Hau ko Tavite neʼe agavaivai ʼo haʼele mo tana Tamai ʼaē ʼe ʼi selō. Neʼe ina ʼui fēnei: “ ʼE mole au tūkia anai, heʼe nofo [ia Sehova] ʼi toku toʼomataʼu.”—Pes. 16:8.

⁴ ʼE mahino ia, ʼe mole tou puke ia te nima ʼo Sehova pea mo haʼele mo ia. Kae ʼe feala ke tou fai ia te faʼahi ʼaia ʼi hona ʼaluʼaga fakatātā. ʼO feafeaʼi? ʼE tohi fēnei e te tagata fai pesalemo ko Asafe: “ ʼE au nofo tuʼumaʼu mo koe, neʼe ke puke toku nima mataʼu. ʼE ke taki anai au ʼaki tau tokoni.” (Pes. 73:23, 24) Koia, ʼe tou haʼele mo Sehova mokā ʼe tou fakalogo lelei ki tana ʼu tokoni, ʼaē ʼe tou maʼu ʼuluaki ʼi tana Folafola pea mai “te tagata kaugana agatonu mo poto.”—Mat. 24:45; 2 Tim. 3:16.

 5. Ohagē ko he tamai ʼofa, ʼe sio feafeaʼi ia Sehova ki tana ʼu kaugana agatonu, pea ʼe tonu ke tou feafeaʼi ʼo ʼuhiga mo ia?

⁵ Mai tona ʼaluʼaga ʼaē ʼe ʼofa ia Sehova kiā nātou ʼaē ʼe haʼele mo ia, koia ʼe sio mai kiā nātou ʼaia ohagē ko he tamai ʼofa, ʼo tokaga kiā nātou, ʼo puipui nātou, pea mo akoʼi nātou. ʼE ʼui fēnei e te ʼAtua: “ ʼE au fakaliliu anai koe ke ke fakasiosio poto pea mo au akoʼi anai koe ʼi te ala ʼaē ʼe tonu ke ke haʼele ai. ʼE au foaki atu anai he ʼu tokoni, ʼo au leʼoleʼo koe.” (Pes. 32:8) Kotou fai ia te ʼu fehuʼi ʼaenī kiā koutou totonu: ‘ ʼE hagē koa kiā au ʼe au puke ia te nima ʼo Sehova pea mo au haʼele mo ia, ʼo au fakalogo ki tona poto, pea mo au ʼiloʼi ko tona ʼu mata ʼofa ʼe sio mai kiā te au? Ko taku mahino ʼaē ʼe tokaga mai, ʼe malave ai koa ki taku fakakaukau, taku ʼu palalau pea mo taku aga? Pea kā ʼe au fai he meʼa ʼe kovi, ʼe au sio koa kiā Sehova ohagē ko he ʼAtua ʼe nofo mamaʼo pea mo ʼita, peʼe ʼe au sio ki ai ohagē ko he Tamai ʼofa pea mo manavaʼofa, ʼe fia tokoni mai ki tana hahaʼi fakahemala ʼaē ʼe fia fakaovi age kiā te ia?’—Pes. 51:17.

 6. Koteā ia te fealagia ʼe maʼu e Sehova kae mole maʼu e te ʼu mātuʼa fakakelekele?

⁶ ʼI ʼihi temi, ʼe feala kiā Sehova ke tokoni mai ʼi muʼa ʼo hatatou fai ia he aga ʼe kovi. Ohagē lā, ʼe lagi ina tokagaʼi ko totatou loto ʼaē ʼe kākā, kua kamata holi ia ki he ʼu meʼa heʼemaʼa. (Sel. 17:9) ʼI te ʼu ʼaluʼaga ʼaia, ʼe feala ke foimo tokoni mai, ʼi muʼa atu lā ia ʼo hona fai e he ʼu mātuʼa fakakelekele, koteʼuhi ko tona “ ʼu mata gigila” ʼe feala ke sio ki ʼotatou loto, ke ina sivisivi tatatou ʼu manatu loloto. (Pes. 11:4; 139:4; Sel. 17:10) Tou vakaʼi age muʼa ia te meʼa neʼe fai e te ʼAtua ki te ʼaluʼaga neʼe hoko ʼi te maʼuli ʼo Paluke, ia te sīkalaipe pea mo te kaumeʼa lelei ʼa te polofetā ko Selemia.

 Neʼe Ko He Tamai ʼOfa Kiā Paluke

7, 8. (a) Neʼe ko ai ia Paluke, pea koteā te ʼu manatu heʼemaʼa ʼaē neʼe lagi kua kamata tuputupu ʼi tona loto? (b) Neʼe fakahā feafeaʼi e Sehova ia tana tokaga ʼaē kiā Paluke ohagē ko he tamai ʼofa?

⁷ Ko Paluke neʼe ko he sīkalaipe kua poto gāue pea neʼe kaugā gāue agatonu mo Selemia moʼo fakahoko ia he gāue neʼe liliu ʼo faigataʼa tona fai—ko te fakamafola ʼo te ʼu logo fakamāu ʼa Sehova ki Suta. (Sel. 1:18, 19) Ki muli age, ko Paluke ʼaē neʼe lagi kau ki he fāmili maʼu koloa, neʼe ina kamata kumi ia “te ʼu meʼa lalahi” maʼa ia totonu. Neʼe lagi kua kamata tuputupu iā te ia he ʼu fakaʼamu peʼe ko he ʼu holi ke maʼu koloa. ʼE mole tou ʼiloʼi papau ia te meʼa ʼaē neʼe hoko, kae neʼe sio ia Sehova ki te manatu fakatupu tuʼutāmaki ʼaē neʼe kua tuputupu ʼi te loto ʼo Paluke. ʼAki ia Selemia, neʼe foimo palalauʼi e Sehova ia te faʼahi ʼaia kiā Paluke, ʼo ina ʼui fēnei ki ai: “Neʼe ke ʼui: ‘Malaʼia kiā te au, heʼe ko Sehova neʼe ina hilifaki mai te lotomamahi ki toku mamahi! Kua au fiu ʼi te toʼetoʼe, pea mole kei au maʼu hoku fīmālie.’ ” Pea neʼe ʼui e te ʼAtua: “Ko koe, ʼe ke haga kumi te ʼu meʼa lalahi maʼa koe. ʼAua naʼa ke haga kumi.”—Sel. 45:1-5.

⁸ Logolā tana palalau fakahagatonu ʼaē kiā Paluke, kae neʼe fai e Sehova ia te faʼahi ʼaia ki ai ohagē ko he tamai ʼofa, neʼe mole ʼita ia. ʼE mahino ia, logolā neʼe sio ia te ʼAtua ki te ʼu holi ʼaē neʼe kua maʼu ʼi te loto ʼo te tagata ʼaia, kae neʼe mole ko he tagata neʼe kovi tona loto. Neʼe toe ʼiloʼi e Sehova ko Selusalemi pea mo Suta neʼe kua ʼamanaki fakaʼauha, pea neʼe mole loto ia ke higa ia Paluke ʼi te ʼu temi faigataʼa ʼaia. Koia, ke ʼaua naʼa galo ki tana kaugana ia te faʼahi ʼaia, neʼe fakamanatuʼi age e te ʼAtua ki ai, ʼe Ina ʼamanaki “fakahoko anai he tuʼutāmaki ki te tagata fuapē,” ʼo ina fakahā age kiā Paluke, kapau ʼe ina fai ia te tonu ʼaē ʼe lelei, pea ʼe hao anai. (Sel. 45:5) ʼE hagē pē neʼe ʼui age fēnei e te ʼAtua: ‘ ʼAua naʼa galo kiā koe Paluke ia te fakaʼauha ʼaē kā ʼamanaki hoko mai ki Suta pea mo Selusalemi ʼuhi ko tanatou ʼu agahala. Tokaga ʼo nofo agatonu pea ʼe ke maʼuli anai! ʼE au puipui anai koe.’ ʼE mahino ia, neʼe malave ia te palalau ʼa Sehova ki te loto ʼo Paluke, he neʼe fetogi ai leva tana fakakaukau pea neʼe hao mai te fakaʼauha ʼo Selusalemi, ʼaē neʼe hoko iā taʼu e 17 ki muli age.

 9. Koteā anai ia takotou tali ki te ʼu fehuʼi ʼaē ʼe lagaʼi ʼi te palakalafe?

⁹ ʼI takotou metitāsioʼi ia te hisitolia ʼo Paluke, kotou fakatokagaʼi ia te ʼu fehuʼi pea mo te ʼu vaega Tohi-Tapu ʼaenī: Koteā ʼaē ʼe hā mai ʼo ʼuhiga mo te ʼAtua pea mo tana ʼu manatu ʼo ʼuhiga mo tana ʼu kaugana ʼi te ʼu faʼahiga felōgoi ʼaē ʼa Sehova mo Paluke? (Lau ia Hepeleo 12:9.) Mai tona ʼaluʼaga ʼaē, ʼe tou māʼuʼuli nei ʼi te ʼu temi faigataʼa, koteā te ako ʼe tou maʼu mai te tokoni ʼaē neʼe fai e te ʼAtua kiā Paluke pea mo te tali ʼaē neʼe fai e Paluke? (Lau ia Luka 21:34-36.) ʼO mulimuli ki te faʼifaʼitaki ʼa Selemia, ʼe lava feafeaʼi ki te kau tagata ʼāfea hanatou fakahā ia te tokaga ʼa Sehova ʼaē ki Tana ʼu kaugana?—Lau ia Kalate 6:1.

Ko Te ʼAlo ʼe Ina Faʼifaʼitakiʼi Ia Te ʼOfa ʼo Te Tamai

10. Koteā ʼaē kua maʼu e Sesu moʼo fakahoko ia tona ʼuhiga Pule ʼi te kōkelekāsio?

¹⁰ ʼI muʼa ʼo te temi ʼo te kau Kilisitiano, neʼe hā ia te ʼofa ʼo Sehova ki tana hahaʼi ʼi tana ʼu polofetā pea mo ʼihi age kaugana agatonu. ʼI te temi nei, ʼe tou sio tāfito ki tona ʼofa ʼaia iā Sesu Kilisito, te Pule ʼo te kōkelekāsio. (Efe. 1:22, 23) Koia ʼi te tohi ʼo Fakahā, ʼe talanoa kiā Sesu ko he ʼakeno mo tona “ ʼu mata e fitu, pea ko te ʼu mata ʼaia ʼe natou fakatātā ia te ʼu laumālie e fitu ʼo te ʼAtua ʼaē neʼe fekauʼi mai ki te kele kātoa.” (Fakh. 5:6) ʼEī, ʼi te kua fonu ʼa Sesu ʼi te laumālie māʼoniʼoni ʼo te ʼAtua, kua ina maʼu ia te fakasiosio tonu ʼe kātoa. ʼE toe sio foki mo ia ki te ʼu meʼa ʼaē ʼi totatou loto, pea ʼe mole he meʼa ʼe pulipuli kiā te ia.

11. Koteā ia te gāue ʼaē ʼe fai e Kilisito, pea koteā ia te aga ʼaē ʼe ina fai kiā tātou ʼe hā ai ia te aga ʼo tana Tamai?

¹¹ Kae ohagē pē ko Sehova, ko Sesu ʼe mole ko he polisi. ʼE ina sivisivi tātou ʼaki te ʼofa. Ko te tahi higoa fakatuʼulaga ʼo Sesu, ʼe ko “Tamai Heʼegata,” pea ʼe tou manatuʼi ai te gāue ʼaē ʼe ina fai ke feala ai ki te hahaʼi fuli ʼaē kā natou tui kiā te ia ke natou maʼu ia te maʼuli heʼegata. (Isa. 9:6) Tahi ʼaē, ʼi tona ʼuhiga Pule ʼo te kōkelekāsio, ʼe feala pē kiā Kilisito ke ina uga ia te kau Kilisitiano ʼaē kua fotufotuʼa ʼi te faʼahi fakalaumālie, tāfito lā ia  te kau tagata ʼāfea, ke natou fakafīmālie peʼe ke natou tokoni kiā nātou ʼaē ʼe ʼaoga ki ai te faʼahi ʼaia.—1 Tes. 5:14; 2 Tim. 4:1, 2.

12. (a) Koteā ʼaē ʼe hā mai ʼo ʼuhiga mo Sesu ʼi te ʼu tohi ki te ʼu kōkelekāsio e fitu ʼo Asia Veliveli? (b) ʼE fakahā feafeaʼi e te ʼu tagata ʼāfea ia te aga ʼaē ʼa Kilisito ki te faga ovi ʼa te ʼAtua?

¹² Ko te tokaga lahi ʼa Kilisito ki te faga ovi ʼe hā ʼi te ʼu tohi ki te kau tagata ʼāfea ʼo te ʼu kōkelekāsio e fitu ʼi Asia Veliveli. (Fakh. 2:1–3:22) ʼI te ʼu tohi ʼaia, neʼe fakahā ai e Sesu ia tana ʼiloʼi lelei ia te ʼu meʼa ʼaē ʼe lolotoga hoko ʼi te ʼu kōkelekāsio takitahi pea mo tana tokaga lahi ʼaē ki tana ʼu tisipulo. ʼE toe fēia pē iā ʼaho nei—ʼaē kua lahi age te ʼu kōkelekāsio—mai tona ʼaluʼaga ʼaē ko te meʼa ʼaē neʼe hā ʼi te Fakahā ʼe hoko lolotoga “te ʼAho ʼo te ʼAliki.” a (Fakh. 1:10) ʼI te agamāhani, ʼe hā ia te ʼofa ʼo Kilisito ʼi te ʼu tagata ʼāfea, ʼaē ʼe natou gāue ko te ʼu tauhi ovi fakalaumālie ʼo te kōkelekāsio. ʼE feala ke ina uga ia ‘te ʼu meʼa ʼofa ʼo te ʼu tagata’ ʼaia ke natou foaki he fakalotofakafīmālie, he fakalotomālohi, peʼe ko he tokoni mokā ʼe ʼaoga ki te faga ovi. (Efe. 4:8; Gāue 20:28; lau ia Isaia 32:1, 2.) ʼE kotou fakaʼuhiga koa ia tanatou ʼu faiga ohagē ko he fakahā ʼaia ʼo te tokaga ʼa Kilisito kiā koutou takitokotahi?

Ko He Tokoni ʼe Foaki ʼi Tona Temi Totonu

13-15. ʼE tali feafeaʼi mai e te ʼAtua ia tatatou ʼu faikole? Tuku mai he ʼu faʼifaʼitaki.

¹³ Neʼe kua kotou kole fakamālotoloto koa ia he tokoni pea neʼe kotou maʼu ia he tali kiai ʼaki he tehina kua fakapotopoto ʼi te faʼahi fakalaumālie neʼe ina fakalotomālohiʼi koutou? (Sake 5:14-16) Pe neʼe kotou maʼu ia te tokoni ʼaia ʼi he akonaki ʼi he fono peʼe ʼi he nusipepa peʼe ʼi he tohi Fakatohi-tapu. ʼI te agamāhani, ko te ʼu ʼaluʼaga ʼaia ʼaē ʼe tali mai ai e Sehova tatatou ʼu faikole. Ohagē lā, ʼi te ʼosi ʼo te akonaki, neʼe fakaovi age ia te tuagaʼane ki te tagata ʼāfea, ʼaē ʼi te ʼu vāhaʼa ki muʼa atu ʼo te akonaki neʼe hoko ki ai ia te aga heʼe faitotonu. Neʼe mole meo age ia te tuagaʼane ki tona fihifihia, kae neʼe ina fakahā age ki te tehina ia tona loto fakafetaʼi lahi ʼo ʼuhiga mo te ʼu puani Fakatohi-tapu ʼaē neʼe talanoa kiai ʼi tana akonaki. Neʼe ʼalutahi ia te ʼu puani ʼaia mo tona fihifihia pea neʼe fīmālie lahi ai. ʼI meʼa fakafiafia ki te tuagaʼane ʼi tana kau ki te fono ʼo te ʼaho ʼaia!

¹⁴ ʼO ʼuhiga mo te tokoni ʼaē ʼe maʼu ʼi te faikole, tou vakaʼi age muʼa ia te faʼifaʼitaki ʼo te ʼu tagata pilisoni e toko tolu neʼe natou maʼu ia te moʼoni ʼo te Tohi-Tapu ʼi tonatou pilisoniʼi pea neʼe natou liliu ʼo kaugā fagona. ʼUhi he neʼe hoko ia te agamālohi ʼi te fale pilisoni, neʼe fai ai leva ia te fakatūʼā lahi ki te kau pilisoni fuli, pea neʼe tupu ai ia te fakafeagai ʼa te kau pilisoni ʼi te fale pilisoni. Neʼe fakatuʼutuʼu ia te kau pilisoni mokā ʼosi tanatou ʼinu kafe ʼi te ʼuhu ake, ke ʼaua naʼa natou ʼavage tanatou ʼu pā, moʼo fakahā ai ia tonatou ʼita. Neʼe ko he ʼaluʼaga faigataʼa ki te ʼu kaugā fagona e toko tolu. Kapau ʼe natou kau ki te fakafeagai, pea ʼe natou maumauʼi anai ia te tokoni ʼa Sehova ʼaē iā Loma 13:1. Pea kapau ʼe mole natou lagolago kiai, pea ʼe feala pē anai ke hoko he tuʼutāmaki kiā nātou mai te kau pilisoni ʼiʼita ʼaia.

¹⁵ Neʼe mole feala hanatou felōgoi fakatahi ki te faʼahi ʼaia, kae ko te ʼu tagata ʼaia e toko tolu neʼe natou faikole ke natou fai he tonu ʼe fakapotopoto. ʼI te ʼuhu ake, ko nātou toko tolu neʼe natou maʼu fuli pē ia te manatu e tahi—ʼe mole natou ʼinu kafe anai. ʼI te temi ʼaē neʼe ʼomai ai ia te ʼu tagata leʼoleʼo ʼo tae ia te ʼu pā, neʼe mole ʼi ai he ʼu pā ʼo te ʼu tagata e toko tolu ʼaia. Neʼe natou  fiafia ʼi tanatou sio ‘ko Ia ʼaē ʼe fagono ki te faikole’ neʼe ovi age kiā nātou!—Pes. 65:2.

Tou Sio Ki Te Kā Haʼu Mo He Loto Falala

16. ʼE hā feafeaʼi ʼi te gāue fai fakamafola ia te tokaga ʼa Sehova ki te hahaʼi ʼe hagē ko ni ʼu ovi?

¹⁶ Ko te fai fakamafola ʼi te mālamanei ʼe ko he tahi fakamoʼoni ʼo te tokaga ʼa Sehova ki te hahaʼi fakamālotoloto, ʼi he faʼahi pē ʼe natou māʼuʼuli ai. (Sen. 18:25) ʼI te agamāhani, ko Sehova ʼaki tana kau ʼāselo ʼe feala ke ina taki tana ʼu kaugana ki ni hahaʼi ʼe hagē ko ni ʼu ovi—tatau aipē mo kapau ʼe natou nonofo ʼi he ʼu koga meʼa ʼe mole heʼeki aʼu kiai ia te fakamafola ʼo te logo lelei. (Fakh. 14:6, 7) Ohagē lā, ʼaki he ʼāselo, neʼe taki e te ʼAtua ia Filipo, ko he tagata fakamafola evaselio ʼo te ʼuluaki sēkulō, ke ʼalu ʼo fakafetaulaki ki te tagata Etiopea pea ke ina fakamahino age ia te Folafola kiā te ia. Koteā tona fua? Neʼe tali e te tagata ia te logo lelei pea neʼe papitema ʼo liliu ai ko te tisipulo ʼa Sesu. b—Soa. 10:14; Gāue 8:26-39.

17. He koʼē ʼe mole tonu ke tou hoha fau ʼo ʼuhiga mo te kā haʼu?

¹⁷ ʼI te kua vave puli ʼo te ʼu faʼahiga meʼa ʼo te tuʼu ʼaenī, ko “te ʼu mamahi” ʼaē neʼe fakakikite ʼe hoholo atu pē anai. (Mat. 24:8) Ohagē lā, ko te totogi ʼo te ʼu meʼa maʼuli, ʼe lagi totogi kovi age anai ʼuhi ko te tuputupu ʼo te hahaʼi ʼaē ʼe ʼaoga kiā nātou te ʼu meʼa maʼuli, peʼe ko te ʼu maumau fakanātulā, peʼe ko te ʼu faigataʼaʼia fakaekonomika. ʼE feala ke faigataʼa ia te maʼu gāue, pea ko te kau gāue ʼe tuputupu age tanatou lotohoha ʼuhi ko tanatou ʼu gāue fakalaka. Pe koteā pē anai he meʼa ʼe feala ke hoko, ko nātou fuli ʼaē ʼe natou fakamuʼamuʼa ia te ʼu gāue fakalaumālie pea mo taupau ia he ‘mata ʼe lelei’ ʼe mole natou hoha fau anai. ʼE natou ʼiloʼi ko te ʼAtua ʼe ʼofa kiā nātou pea mo tokaga anai kiā nātou. (Mat. 6:22-34) Ohagē lā, kotou fakatokagaʼi pe neʼe tokoni feafeaʼi ia Sehova kiā Selemia ʼi te temi fakaʼosi fakamataku ʼo Selusalemi ʼi te taʼu 607 ʼi muʼa ʼo totatou temi.

18. Neʼe fakahā feafeaʼi e Sehova ia tona ʼofa kiā Selemia ʼi te temi ʼaē neʼe ʼātakai ai Selusalemi?

¹⁸ Lolotoga te koga fakamuli ʼo te ʼātakai ʼo Selusalemi e te kau Papiloni, neʼe pilisoniʼi ia Selemia ʼi te Malaʼe ʼo te kau Tagata Leʼo. ʼE feafeaʼi anai hana maʼu ʼo hana meʼa kai? Kanapau lā neʼe ʼāteaina, neʼe feala pē ke ʼalu ʼo kumi mai hana meʼa kai. Kae neʼe fakalogo kātoa ia tona maʼuli kiā nātou ʼaē ʼi ʼona tafaʼaki, pea tokolahi ia nātou ʼaia neʼe fehiʼa kiā te ia! Koia neʼe mole falala ai ia Selemia ki te tagata kae ki te ʼAtua pē, ʼaē neʼe ina fakapapau age ʼe tokaga anai ia kiā te ia. Neʼe fakahoko koa e Sehova tana ʼu palalau ʼaia? ʼEī! Neʼe tokaga ke maʼu e Selemia tana meʼa kai ʼi te ʼaho fuli, ko “he moʼi pane . . . ʼo aʼu ki te ʼosi ʼo te pane ʼo te kolo.” (Sel. 37:21) Ko Selemia, mo Paluke, mo Epeti-Meleki, pea mo ʼihi neʼe puipui nātou mai te temi hoge ʼaia, mo te mahaki, pea mo te mate.—Sel. 38:2; 39:15-18.

19. ʼI tatatou haga ki te kā haʼu, koteā ʼaē ʼe tonu ke tou faiga mālohi kiai?

¹⁹ ʼE “sio te ʼu mata ʼo Sehova ki te hahaʼi agatonu, pea ʼe fagono tona ʼu taliga ki tanatou ʼu kolekole.” (1 Pet. 3:12) ʼE kotou fiafia koa ki te sio mai ʼaē ʼo takotou Tamai ʼe ʼi selō kiā koutou? ʼE kotou logoʼi koa he fīmālie pea mo he tokalelei ʼi takotou ʼiloʼi ʼaē ko tona ʼu mata ʼe sio ifo mai kiā koutou heʼe loto ki te meʼa ʼaē ʼe lelei kiā koutou? Koia kotou faiga mālohi ke kotou haga haʼele mo te ʼAtua—tatau aipē peʼe koteā ʼaē kā ʼamanaki hoko mai. ʼE tou tui papau ʼe sio ifo tuʼumaʼu mai pē ia Sehova kiā tātou, ohagē ko he tamai ʼofa ʼe sio ki tana ʼu kaugana agatonu fuli.—Pes. 32:8; lau ia Isaia 41:13.

[ʼU nota]

ʼE Feala Koa Hakotou Fakamahino?

• ʼE feafeaʼi hatatou fakahā ʼe tou ‘haʼele mo te ʼAtua’?

• Neʼe fakahā feafeaʼi e Sehova ia tona ʼofa ʼaē kiā Paluke?

• ʼI tona ʼuhiga Pule ʼo te kōkelekāsio, ʼe fakahā feafeaʼi e Sesu ia te ʼu kalitātē ʼo tana Tamai?

• Ko te ʼu ʼaluʼaga fea ʼaē ʼe feala ai ke tou fakahā ʼe tou falala ki te ʼAtua lolotoga te ʼu temi faigataʼa ʼaenī?

[ʼU fehuʼi ʼo te ako]

[Paki ʼo te pasina 13]

Ohagē ko Selemia mo Paluke, ko te kau tagata ʼāfea ʼo te temi nei ʼe natou fakahā ia te tokaga ʼa Sehova

[Paki ʼo te pasina 15]

ʼE foaki feafeaʼi e Sehova ia te tokoni ʼi tona temi totonu?