Ko Te Tali ʼa Sehova Ki Te Faikole Fakamālotoloto

“Ke natou ʼiloʼi ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.”—PES. 83:18.

1, 2. Koteā ʼaē neʼe kua hoko ki te tokolahi, pea koteā te ʼu fehuʼi ʼaē ʼe feala ke lagaʼi kiai?

 KUA hili nei kiai te ʼu taʼu, neʼe lotohoha ʼaupitō ia te fafine ʼuhi ko te meʼa neʼe hoko ʼi te kolo ʼaē neʼe nofo ai. Mai tona ʼaluʼaga ʼaē neʼe tupu ake ʼi te fāmili Loma ʼe lotu Katolika, koia neʼe ʼalu ai ʼo kumi tokoni ki te pātele ʼo tona kolo, kae neʼe mole loto pē lā e te pātele ke fai palalau mo ia. Koia neʼe faikole ai leva ia ki te ʼAtua, ʼo ina ʼui fēnei: “ ʼE mole au ʼiloʼi tou huafa . . . , kae ʼe au ʼiloʼi ʼe ke fakalogo mai. Tokoni mai ke au ʼiloʼi koe!” Mole faʼa fualoa ki muli age, pea ʼolo age ia te ʼu Fakamoʼoni ʼa Sehova pea neʼe nā foaki age te fakalotofīmālie pea mo fakamahino age ia te ʼAtua ʼaē neʼe ina kumi. Neʼe nā akoʼi age te ʼu tuʼuga meʼa, ohagē lā ko te ʼAtua ʼe ʼi ai tona huafa, ko Sehova. ʼI tana mahino ki te faʼahi ʼaia, neʼe loto fiafia ʼaupitō ai. Neʼe ina ʼui fēnei: “Neʼe ko te ʼAtua lā ʼaenī ʼaē neʼe au fia mahino ki ai talu mai taku kei veliveli!”

² Tokolahi neʼe kua hoko kiā nātou he meʼa fēia. ʼI te agamāhani, neʼe natou ʼuluaki sisio ki te huafa ʼo Sehova ʼi tanatou lau ʼi te Tohi-Tapu ia te koga tohi ʼo Pesalemo 83:18. ʼI te Traduction du monde nouveau, ʼe ʼui fēnei ʼi te vaega ʼaia: “Ke natou ʼiloʼi ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.” Kae neʼe heʼeki kotou feʼekeʼaki koa pe koʼē neʼe tohi ia te Pesalemo 83? Koteā te ʼu meʼa ʼaē neʼe hoko ʼaē kā tupu ai te fakamoʼoni ʼa te hahaʼi ko Sehova ʼe ko te ʼAtua moʼoni pē e tahi? Koteā ia te ako ʼe tou maʼu iā ʼaho nei mai te pesalemo ʼaia? ʼE tou vakaʼi anai ia te ʼu fehuʼi ʼaia ʼi te ʼalatike ʼaenī. a

Ko He Fonofono Moʼo Fakafeagai Ki Te Hahaʼi ʼa Sehova

3, 4. Ko ai ʼaē neʼe ina tohi ia te Pesalemo 83, pea koteā ia te tuʼutāmaki ʼaē ʼe talanoa kiai ia te tagata fai pesalemo?

³ ʼE fakahā ʼi te ʼu palalau ʼaē ʼe tuʼu ʼi ʼoluga ʼo te Pesalemo 83, ʼe ko “he hiva ʼa Asafe.” Ko te tagata ʼaē neʼe ina tohi te pesalemo, neʼe lagi ko he tahi ʼo te hōloga ʼo te Levite ko Asafe, neʼe ko he tagata fai māholo logona lolotoga te temi ʼafio ʼo te Hau ko Tavite. ʼI te pesalemo, ʼe kolekole e te tagata fai pesalemo kiā Sehova ke tokaga mai ʼo fakalakatonuʼi Tona ʼuhiga pule faʼitaliha pea mo fakahā Tona huafa. Lagi neʼe fai ia te pesalemo hili pē he kiʼi temi ki te mate ʼo Salomone. Koteā tona tupuʼaga? Koteʼuhi ʼi te ʼu temi hau ʼo Tavite pea mo Salomone, ko te hau ʼo Tile neʼe mole fakafeagai ki Iselaele. ʼI te temi ʼaē neʼe tohi ai ia te Pesalemo 83, ko te hahaʼi ʼo Tile neʼe natou fakafeagai ki Iselaele pea neʼe natou fakatahi mo te ʼu fili ʼo Iselaele.

⁴ Neʼe talanoa te tagata fai pesalemo ki te ʼu puleʼaga e hogofulu ʼaē neʼe natou fonofono ke natou fakaʼauha ia te hahaʼi ʼa te ʼAtua. Neʼe nonofo ia te ʼu fili ʼaia ʼi te ʼu tafaʼaki ʼo Iselaele pea ʼe fakahā fēnei mai tonatou ʼu higoa ʼi te Tohi-Tapu: “Ko te ʼu falela ʼo Etome pea mo te kau Isimaele, mo Moape pea mo te kau Akite, mo Kepale, mo Amone pea mo Amaleke, mo Filisitini mo te hahaʼi ʼo Tile. Mo Asilia foki neʼe fakatahi kiā nātou.” (Pes. 83:6-8) Koteā te meʼa ʼaē neʼe hoko ʼe fakamatala ʼi te pesalemo? Ko ʼihi ʼe natou ʼui ʼe talanoa ia te pesalemo ki te ʼohofiʼi ʼo Iselaele ʼi te temi ʼo Sosafate e te ʼu puleʼaga ʼaē neʼe natou fakatahitahi ʼo Amone, mo Moape, pea mo te hahaʼi ʼo te Moʼuga ʼo Seile. (2 Fkma. 20:1-26) ʼI te manatu ʼa ʼihi, ʼe talanoa ia te pesalemo ki te ʼu fakafeagai fuli ʼaē neʼe hoko ki Iselaele mai iā nātou ʼaē ʼe nonofo ʼi tona ʼu tafaʼaki.

 5. ʼE tokoni feafeaʼi ia te Pesalemo 83 ki te kau Kilisitiano iā ʼaho nei?

⁵ Tatau aipē pe koteā te meʼa ʼaē neʼe hoko, kae ʼe mahino ia neʼe takitaki e Sehova ia te tohi ʼo te pesalemo ʼaia ʼi te temi ʼaē neʼe ʼamanaki tuʼutāmaki ai tona puleʼaga. ʼE toe foaki e te pesalemo ia te fakalotomālohi ki te ʼu kaugana ʼa te ʼAtua iā ʼaho nei, ʼaē neʼe ʼohofiʼi lolotoga te temi e te ʼu fili kua  natou fakatotonu ke natou fakaʼauha nātou. Pea ʼe mahino ia, ʼe ina fakalotomālohiʼi anai tātou ʼi te temi kā haʼu mokā fakatahi anai e Koke mo Makoke tona ʼu kautau mālohi ʼi tana faiga fakaʼosi ʼaē ke ina fakaʼauha ia nātou fuli ʼaē ʼe natou tauhi ki te ʼAtua ʼaki te laumālie pea mo te moʼoni.—Lau ia Esekiele 38:2, 8, 9, 16.

Te Meʼa ʼAē Neʼe Maʼuhiga Tāfito Ki Te Tagata Fai Pesalemo

6, 7. (a) Koteā ʼaē neʼe faikole kiai ia te tagata fai pesalemo ʼi te kamataʼaga ʼo te Pesalemo 83? (b) Koteā ʼaē neʼe maʼuhiga tāfito ki te tagata fai pesalemo?

⁶ Kotou fakatokagaʼi te ʼu palalau ʼaenī neʼe fai e te tagata fai pesalemo ʼi tana faikole ʼo fakahā ia te ʼu meʼa ʼaē ʼi tona loto: “Ê ʼAtua, ʼaua tau nofo fakalogologo; ʼaua naʼa ke fakaheʼeheʼe gū, pea ʼaua naʼa ke nofo noa, Ê Māfimāfi! He koʼenī tou ʼu fili ʼe natou gatutu; pea kua lagaʼi ake te ʼulu ʼo nātou ʼaē ʼe fehiʼa mālohi kiā te koe. ʼO fakafeagai ki tau hahaʼi ʼe natou tālaga fakakākā. . . . Heʼe ʼaki tonatou loto neʼe natou feʼāveʼaki fakatahi te ʼu tokoni; ʼo fakafeagai kiā te koe neʼe natou fai he fuakava.”—Pes. 83:1-3, 5.

⁷ Koteā ʼaē neʼe maʼuhiga tāfito ki te tagata fai pesalemo? ʼE mahino ia, neʼe lagi ina tuʼaniaʼi tona maʼuli pea mo ʼaē ʼo tona fāmili. Kae ko te tupuʼaga ʼo tana faikole, ʼe ko te moamoagaʼi ʼaē kā hoko anai ki te huafa ʼo Sehova pea mo te tuʼutāmaki ʼaē ʼe ʼamanaki hoko anai ki te puleʼaga ʼaē ʼe ina fua tona huafa. ʼOfa pē ke toe fēia mo tatatou manatu, ke tou maʼu he manatu fakapotopoto ʼi te temi ʼaē ʼe tou ʼūtakiʼi ai te ʼu ʼaho faigataʼa fakamuli ʼo te tuʼu ʼāfea ʼaenī.—Lau ia Mateo 6:9, 10.

 8. Koteā ʼaē neʼe fakatuʼutuʼu kiai ia te ʼu puleʼaga ʼi tanatou fonofono ʼaē ʼo ʼuhiga mo Iselaele?

⁸ ʼE talanoa ia te tagata fai pesalemo ʼo ʼuhiga mo te ʼu palalau ʼaenī neʼe fai e te ʼu fili ʼo Iselaele: “Kotou ʼomai pea ke tou fakaʼauha ia nātou ke ʼaua naʼa toe ʼui ko he puleʼaga, ke mole toe manatuʼi te higoa ʼo Iselaele.” (Pes. 83:4) ʼI toe fehiʼa neʼe maʼu e te ʼu puleʼaga ʼaia ki te hahaʼi ʼaē neʼe fili e te ʼAtua! Kae neʼe toe ʼi ai te tahi tupuʼaga ʼo tanatou fonofono ʼaē moʼo fakafeagai ki Iselaele. Neʼe natou fia maʼu ia te fenua ʼo Iselaele pea neʼe natou palalau nekenekea fēnei: “Tou toʼo maʼa tātou ia te ʼu nofoʼaga ʼo te ʼAtua.” (Pes. 83:12) Neʼe hoko koa he meʼa fēia ʼi totatou temi? ʼEī!

“Tou Nofoʼaga Tapu”

9, 10. (a) ʼI te temi muʼa, neʼe koteā ia te nofoʼaga tapu ʼo te ʼAtua? (b) Koteā te ʼu tapuakina ʼaē ʼe maʼu iā ʼaho nei e te toe ʼo te kau fakanofo pea mo te “tahi ʼu ovi”?

⁹ ʼI te temi muʼa, neʼe fakahigoaʼi ia te Kele ʼo Te Fakapapau ko te nofoʼaga tapu ʼo te ʼAtua. Kotou manatuʼi ia te hiva mālo ʼaē neʼe hivaʼi e te kau Iselaele ʼi tonatou ʼosi fakaʼāteaina mai Esipito: “ ʼI tou lotoʼofa neʼe ke taki te hahaʼi ʼaenī ʼaē neʼe ke haofaki. ʼIo, ʼi tou mālohi ʼe ke taki anai nātou ki tou nofoʼaga tapu.” (Eke. 15:13) Ki muli age, ʼi te “nofoʼaga” ʼaia neʼe ʼi ai te fale lotu mo tona kau pelepitelō pea mo te kolo hau, ia Selusalemi, mo te hōloga ʼo te ʼu hau ʼaē neʼe hifo mai iā Tavite pea neʼe natou heheka ʼi te hekaʼaga hau ʼo Sehova. (1 Fkma. 29:23) Koia lā ʼaē neʼe fakahigoaʼi ai e Sesu ia Selusalemi ko “te kolo ʼo te Tuʼi lahi.”—Mat. 5:35.

¹⁰ ʼE feafeaʼi ʼi totatou temi? ʼI te taʼu 33 ʼo totatou temi, neʼe tupu ia te puleʼaga foʼou, ko “te Iselaele ʼo te ʼAtua.” (Kal. 6:16) Pea ʼe faʼufaʼu te puleʼaga ʼaia e te ʼu tehina fakanofo ʼo Sesu Kilisito, ʼe natou fai ia te ʼu gāue neʼe tōtō ai te kau Iselaele ʼo te kakano, ʼaē ke natou liliu ko he ʼu fakamoʼoni ʼo te huafa ʼo te ʼAtua. (Isa. 43:10; 1 Pet. 2:9) Kiā nātou, neʼe toe fai e Sehova ia te fakapapau ʼaē neʼe ina fai ki te Iselaele ʼāfea: “ ʼE au liliu anai ko tonatou ʼAtua, pea ʼe natou liliu anai ko taku hahaʼi.” (2 Ko. 6:16; Lev. 26:12) ʼI te taʼu 1919, neʼe foaki e Sehova ki te toe ʼo te kau fakanofo ʼo “te Iselaele ʼo te ʼAtua” ia te tuʼulaga makehe, pea ʼi te temi ʼaia, neʼe natou māʼuʼuli ai ʼi te “fenua,” ko he nofoʼaga fakalaumālie ʼe natou maʼu ai ia te palatiso fakalaumālie. (Isa. 66:8) Talu mai te ʼu taʼu 1930, kua fakatahiʼi atu kiā  nātou ia te toko lauʼi miliona “tahi ʼu ovi.” (Soa. 10:16) Ko te fiafia pea mo te mahu fakalaumālie ʼa te kau Kilisitiano ʼaia ʼi te temi nei, ʼe ko he fakamoʼoni lahi ʼaia ʼo te faitotonu ʼo te pule faʼitaliha ʼa Sehova. (Lau ia Pesalemo 91:1, 2.) ʼE ko he meʼa fakatupu ʼita kiā Satana!

11. Koteā ia te fakatuʼutuʼu tāfito ʼaē ʼe loto tuʼumaʼu kiai e te ʼu fili ʼo te ʼAtua?

¹¹ Lolotoga te temi fakaʼosi, ʼe uga e Satana tana kau gāue ʼaē ʼi te kele ke natou fakafeagai ki te toe ʼo te kau fakanofo pea mo tonatou ʼu tehina ʼaē ʼe kau ki te tahi ʼu ovi. Neʼe hoko ia te meʼa ʼaia ʼi te Potu ʼUesitē ʼo Eulopa ʼi te temi pule ʼa te kau Nasi pea ʼi te Potu ʼEsitē ʼo Eulopa ʼi te temi pule ʼa te puleʼaga Kominisi Lusia. Neʼe hoko foki te fakafeagai ʼi te tahi atu ʼu fenua ʼe lahi, pea ʼe hoko atu pē anai, tāfito lā lolotoga te ʼohofi fakaʼosi ʼa Koke mo Makoke. ʼI te ʼohofi ʼaia, ʼe lagi toʼo e te hahaʼi fakafeagai ia te ʼu koloa pea mo te ʼu lelei ʼa te hahaʼi ʼa Sehova, ohagē pē ko tona fai e te ʼu fili ʼi te temi muʼa. Kae ko te fakatuʼutuʼu tāfito ʼaē ʼe loto tuʼumaʼu pē kiai e Satana, ke ina maumauʼi ia te kau Fakamoʼoni fuli ʼa Sehova ke mole toe manatuʼi e he tahi ia te huafa ʼaia. Koteā ʼaē ʼe fai e Sehova ki te taʼi fakafifihi ʼaia ʼo ʼuhiga mo tana pule faʼitaliha? Tou toe vakaʼi age muʼa ia te ʼu palalau ʼaē neʼe fai e te tagata fai pesalemo.

Ko He Faʼifaʼitaki ʼo Te Mālo ʼa Sehova

12-14. Ko te ʼu mālo fea e lua ʼo te hisitolia neʼe hoko ovi ki te kolo ʼo Mekito ʼaē neʼe manatuʼi e te tagata fai pesalemo?

¹² Kotou fakatokagaʼi ia te tui mālohi ʼa te tagata fai pesalemo ki te fealagia ʼaē ʼe maʼu e Sehova moʼo tāʼofi ia te ʼu fakatuʼutuʼu ʼa te ʼu puleʼaga ʼaē ʼe fakafeagai age kiā te ia. ʼE talanoa ia ki te ʼu mālo lahi e lua ʼa Iselaele ʼi tona ʼu fili, neʼe hoko ʼo ovi ki te kolo ʼāfea ko Mekito, ʼaē neʼe tuʼu ʼi te mafa ʼe toe higoa pē ko Mekito. Lolotoga te fasigā taʼu māfana, ʼe feala ke tou sio ʼi te mafa ʼaia ki te kua magemage ʼo te Vaitafe ʼo Kisoni. ʼI te kua ʼosi tō ʼo he ʼua, ʼe tatafe ia te vaitafe ʼi te matāfaga. ʼE lagi ko te tupuʼaga lā ʼaia ʼo tona toe fakahigoaʼi ko “te ʼu vai ʼo Mekito.”—Ktf. 4:13; 5:19.

¹³ Iā kilometā e 15 ʼi te mafa mai Mekito, ʼe tuʼu ai te sia ʼo Mole pea ʼi te temi ʼo te Tuʼi Fakamāu ko Seteone, neʼe fakatahitahi ai te ʼu kautau ʼa te kau Matianite, mo te kau Amalekite, pea mo te hahaʼi ʼo te Potu ʼEsitē ke natou tau. (Ktf. 7:1, 12) Ko te kihiʼi kautau ʼa Seteone neʼe ko te toko 300 tagata tau, kae ʼaki te tokoni ʼa Sehova, neʼe natou mālo ʼi te foʼi kautau ʼo tonatou ʼu fili. ʼO feafeaʼi? ʼO mulimuli ki te takitaki ʼa te ʼAtua, neʼe natou ʼātakai ʼi te poʼuli ia te nofoʼaga ʼo tonatou ʼu fili ʼaki te ʼu foʼi ʼipu maka ʼi ʼonatou nima ʼe fufū ai te ʼu mālama ulo. ʼI te temi ʼaē neʼe fakahā ai e Seteone ia te fakaʼiloga, ko tana ʼu tagata tau neʼe natou foaʼi te ʼu foʼi ʼipu maka pea ko te ʼu mālama ʼaē neʼe fufū ai neʼe hā fakapunamaʼuli. ʼI te moʼi temi pē ʼaia, neʼe natou pupuhi tanatou ʼu fakatagi pupuhi pea mo kalaga fēnei: “Ko te heletā ʼa Sehova pea mo Seteone!” Neʼe tupu ai te maveuveu ʼo tonatou ʼu fili, pea neʼe natou fematematehiʼaki pē iā nātou; ko nātou ʼaē neʼe hao neʼe natou feholaki ki te tahi kauvai ʼo te Vaitafe ʼo Solotane. ʼI te temi ʼaia, neʼe lahi age ia te kau Iselaele ʼaē neʼe natou tuli ia te ʼu fili. ʼO fakatahiʼi, ko te kau sōlia ʼa te ʼu fili e toko 120 000 ʼaē neʼe mamate.—Ktf. 7:19-25; 8:10.

¹⁴ Iā teitei kilometa e ono ki ʼoluga atu ʼo te sia ʼo Mole, ʼi te tahi faʼahi ʼo te mafa mai Mekito, ʼe tuʼu ai te Moʼuga ʼo Tapole. ʼI te moʼuga ʼaia, ko te Tuʼi Fakamāu ko Palake neʼe ina fakatahiʼi ai ki muʼa atu ia te ʼu kautau e toko 10 000 Iselaele moʼo tauʼi ia te kautau ʼa Sapini, te hau kanaane ʼo Asole, pea neʼe takitaki nātou e te pule sōlia ko Sisela. Ko te foʼi kautau Kanaane ʼaia neʼe ko tana ʼu sāliote tau e 900, neʼe pipiki ai te ʼu hele ukamea loloa neʼe takafolifoli ʼi te ʼu teka ʼo te sāliote. Ko te ʼu kautau ʼo Iselaele ʼaē neʼe mole lahi tanatou ʼu mahafu tau, neʼe natou fakatahitahi ʼi te Moʼuga ʼo Tapole, kae tuʼu te foʼi kautau ʼa Sisela ʼi te mafa. Pea “neʼe kamata fakamaveuveu e Sehova ia Sisela pea mo tana ʼu sāliote tau fuli pea mo nātou fuli ʼaē ʼi te nofoʼaga.” Lagi neʼe tō fakapunamaʼuli ia he ʼua, ʼo tupu ai te heheke ʼa te ʼu sāliote ʼi te pela he neʼe tatafe ia te Vaitafe ʼo Kisoni. Ko te foʼi kautau kātoa neʼe matehi e te kau Iselaele.—Ktf. 4:13-16; 5:19-21.

15. (a) Koteā ia te faikole ʼa te tagata fai pesalemo ʼo ʼuhiga mo te meʼa kā fai anai e Sehova? (b) Koteā ʼaē ʼe tou manatuʼi ʼi te higoa ʼo te tau fakaʼosi ʼa te ʼAtua?

¹⁵ Neʼe kolekole e te tagata fai pesalemo kiā Sehova ke ina fai he meʼa fēia ki te ʼu puleʼaga ʼaē neʼe natou ʼamanaki ʼohofiʼi ia Iselaele ʼi tona temi. Neʼe faikole fēnei: “Fai kiā nātou ohagē ko Matiane, ohagē ko Sisela, ohagē ko Sapine ʼi te vaitafae ʼo Kisoni. Neʼe fakaʼauha nātou ʼi Eni-tole; kua natou liliu ko he meʼa fakagako kele.” (Pes. 83:9, 10) Tou tokagaʼi  te faʼahi ʼaenī, ko te tau fakaʼosi ʼaē kā fai e te ʼAtua ki te mālama ʼa Satana ʼe higoa ko Halamaketone (ko tona fakaʼuhiga “Moʼuga ʼo Mekito”), peʼe ko Alamaketone. ʼAki te higoa ʼaia, ʼe tou manatuʼi ia te ʼu tau fakamataku ʼaē neʼe hoko ovi ki Mekito. Ko te mālo ʼa Sehova ʼi te ʼu tau ʼaia ʼi te temi muʼa, ʼe ina fakalotomālohiʼi tātou ʼo ʼuhiga mo tana mālo moʼoni anai ʼi te tau ʼo Halamaketone.—Fakh. 16:13-16.

ʼE Tonu Ke Tou Faikole ʼo ʼUhiga Mo Te Lagavaka ʼo Te Pule Faʼitaliha ʼa Sehova

16. Neʼe feafeaʼi ia te ‘fakafonu ʼaki te ufiufi’ iā ʼaho nei ia te ʼu fofoga ʼo te kau fakafeagai?

¹⁶ ʼI “te ʼu ʼaho fakamuli” ʼaenī, ʼe tāʼofi e Sehova ia te ʼu faiga fuli ʼaē moʼo fakaʼauha ia tana hahaʼi. (2 Tim. 3:1) Koia, kua ufiufi te kau fakafeagai. Iā Pesalemo 83:16 neʼe fakakikite ai te meʼa ʼaia, heʼe ʼui fēnei: “Fakafonu ʼonatou fofoga ʼaki te ufiufi, ke kumi ia tou huafa, Ê Sehova!” ʼI te ʼu fenua fuli, neʼe ʼalunoa ia te ʼu faiga ʼaē ʼa te kau fakafeagai ke natou fakaʼauha ia te kau Fakamoʼoni ʼa Sehova. ʼI te ʼu fenua ʼaia, ko te agatonu pea mo te faʼa kātaki ʼa te kau ʼatolasio ʼo te ʼAtua moʼoni pē e tahi neʼe liliu ko he fakamoʼoni maʼa te hahaʼi agatonu, pea tokolahi neʼe natou ‘kumi ia te huafa ʼo Sehova.’ ʼE lahi ia te ʼu fenua neʼe fakatagaʼi mālohi ai ia te kau Fakamoʼoni ʼa Sehova, kua maʼu ai te hahaʼi tokolahi e lauʼi hogofulu afe ʼi te temi nei, peʼe lauʼi teau afe, ʼe natou fakavikiviki fakafiafia kiā Sehova. ʼE ko he toe mālo lahi ʼa Sehova! Pea ʼe ko he meʼa fakatupu ufiufi ki tona ʼu fili!—Lau ia Selemia 1:19.

17. Koteā ia te ʼaluʼaga fakamataku ʼe tau nei mo te mālamanei, pea ko te ʼu palalau fea ʼaē kā tou vave manatuʼi anai?

¹⁷ Kae ʼe tou ʼiloʼi lelei pē ʼe hoko atu totatou fakatagaʼi e totatou ʼu fili. Pea ʼe tou hoko atu pē ia te fakamafola ʼo te logo lelei—māʼiapē lā kiā nātou ʼaē ʼe fakafeagai mai kiā tātou. (Mat. 24:14, 21) Kae ʼi te temi nei ʼi muʼa ʼo te fakaʼosi, ʼe maʼu ia te faigamālie e nātou ʼaia kau fakafeagai ke natou fakahemala pea ke natou maʼu ia te maʼuli. Ko te fakatapuhā ʼo te huafa ʼo Sehova ʼe maʼuhiga age ia ʼi te maʼuli ʼo te hahaʼi. (Lau ia Esekiele 38:23.) ʼI te temi ʼaē kā fakatahitahi ai te ʼu puleʼaga ʼo te kele ke natou faigaʼi ke natou fakaʼauha ia te hahaʼi ʼa te ʼAtua, ʼe tou manatuʼi anai ia te ʼu palalau ʼo te faikole ʼa te tagata fai Pesalemo ʼaenī: “Ke natou ufiufi pea mo maveuveu ʼo talu ai, ke natou mātataku pea ke natou mamate.”—Pes. 83:17.

18, 19. (a) Koteā ʼaē kā ʼamanaki hoko ki te ʼu fili ʼo te pule faʼitaliha ʼa Sehova? (b) ʼE malave feafeaʼi kiā koutou ia te lagavaka fakaʼosi ʼo te pule faʼitaliha ʼa Sehova ʼaē kua ovi mai?

¹⁸ Ko te fakaʼosi fakaufiufi ʼe ʼamanaki hoko kiā nātou ʼaē kua natou fakatotonu mālohi ke natou fakafeagai ki te pule faʼitaliha ʼa Sehova. ʼE fakahā mai ʼi te Folafola ʼa te ʼAtua ko nātou ʼaē ʼe “mole fakalogo ki te logo lelei” ʼe tauteaʼi anai nātou ʼi Halamaketone, pea ʼe natou mamahi anai ʼi te “fakaʼauha heʼegata.” (2 Tes. 1:7-9) Ko tonatou fakaʼauha pea mo te haofaki ʼo nātou ʼaē ʼe tauhi kiā Sehova ʼaki te moʼoni, ʼe fakamoʼoni ai anai ko Sehova ʼe ko te ʼAtua moʼoni pē e tahi. ʼI te mālama foʼou, ko te mālo lahi ʼaia ʼe mole galoʼi anai. Ko nātou ʼaē kā māʼuʼuli ake anai ʼi te “fakatuʼuake ʼo te kau faitotonu pea mo te kau heʼe faitotonu” ʼe fakahā age anai kiā nātou ia te gāue lahi ʼaia neʼe fai e Sehova. (Gāue 24:15) ʼI te mālama foʼou, ʼe natou tui papau anai ki te fakapotopo ʼaē ke natou fakalogo ki te pule faʼitaliha ʼa Sehova. Pea ko te hahaʼi agavaivai iā nātou ʼaia ʼe vave anai tanatou fakatokagaʼi ko Sehova ʼe ko te ʼAtua moʼoni pē e tahi.

¹⁹ ʼI kā haʼu taulekaleka neʼe teuteuʼi e tatatou Tamai ʼe ʼi selō maʼa tana kau ʼatolasio agatonu! ʼE mole ko he faʼahi koa ʼe ina uga ai koutou ke kotou faikole ke foaki vave mai e Sehova he tali fakaʼosi ki te faikole ʼa te tagata fai pesalemo kiā Sehova: “Ke natou mātataku [tou ʼu fili] pea ke natou mamate; ke natou ʼiloʼi ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa”?—Pes. 83:17, 18.

[Nota]

ʼE Feala Koa Hakotou Fakamahino?

• Koteā te ʼaluʼaga ʼaē neʼe tau mo Iselaele ʼi te temi ʼaē neʼe tohi ai ia te Pesalemo 83?

• Koteā ʼaē neʼe maʼuhiga tāfito ki te tagata faitohi ʼo te Pesalemo 83?

• Ko ai ʼaē neʼe fakahagahaga tāfito ki ai ia te fehiʼa ʼo Satana iā ʼaho nei?

• ʼE tali fakaʼosi feafeaʼi anai e Sehova ki te faikole ʼaē neʼe fai ʼi te Pesalemo 83:18?

[ʼU fehuʼi ʼo te ako]

[Paki ʼo te pasina 18]

Koteā ia te pikipikiga ʼo te ʼu tau ʼaē neʼe fai ʼo ovi ki Mekito ʼāfea mo totatou kā haʼu?

[Mape]

(Vakaʼi te nusipepa)

Vaitafe ʼo Kisoni

Asoleti

Moʼuga ʼo Kalemeli

Mafa ʼo Sisele

Mekito

Taanake

Moʼuga ʼo Kilipoa

Vai Keli ʼo Alote

Mole

Eni-tole

Moʼuga ʼo Tapole

Tai ʼo Kalilea

Vaitafe ʼo Solotane