Koteā ʼAē Kā Kotou Foaki Anai Ke Kotou Maʼu Ai Ia Te Maʼuli Heʼegata?

“Koteā anai he meʼa kā foaki e he tagata moʼo fetogi ʼaki ʼo tona nefesi?”—MAT. 16:26.

 1. He koʼē neʼe mālohi te tali ʼa Sesu ki te ʼu palalau ʼaē neʼe fai e Petelo?

 NEʼE faigataʼa ki te ʼapositolo ko Petelo hana tui ki te meʼa ʼaenī neʼe logo kiai. Ko tona Tagata Takitaki ʼofaina ko Sesu Kilisito, neʼe ina ʼui “fakahagatonu” ʼe ʼamanaki ke tau mo he mamahi pea ʼe matehi anai! Moʼo tali kiai, neʼe ʼui fēnei age e Petelo kiā Sesu, ʼaki he manatu ʼe lelei: “Agalelei kiā te koe, ʼAliki; kailoa, ʼe mole hoko anai kiā te koe he [meʼa] fēia.” Neʼe lītuʼa Sesu kiā Petelo pea ina sioʼi tana tahi kau tisipulo. Neʼe lagi maʼu mo nātou ia te taʼi manatu hala ʼaia. Pea neʼe ina ʼui fēnei leva kiā Petelo: “Haʼu ʼi ʼoku tuʼa, Satana! ʼE ko koe ko te maka fakatupu tūkia kiā te au, heʼe mole ke manatu ʼaki te ʼu manatu ʼa te ʼAtua, kae ʼaki te ʼu manatu ʼa te tagata.”—Mko. 8:32, 33; Mat. 16:21-23.

 2. Neʼe fakamahino feafeaʼi e Sesu ia te ʼu maʼua ʼaē ʼe tonu ke fakahoko e he tisipulo moʼoni?

² Neʼe feala ki te ʼu palalau ʼaē neʼe fai e Sesu ke tokoni ai kiā Petelo ke mahino ki te tupuʼaga ʼo tana tali mālohi ki tana ʼu palalau. Ko Sesu “neʼe ina pāui ai kiā te ia te hahaʼi pea mo ʼana tisipulo” pea mo ʼui māʼana: “Kapau ʼe fia muli mai he tahi iā te au, ke fakafisi ia kiā ia totonu pea ke ina toʼo tona pou fakamamahi pea ke muli tuʼumaʼu iā te au. He ko ʼaē ʼe ina fia haofaki tona nefesi ʼe ina pulihi anai ia; kae ko ʼaē ʼe ina pulihi tona nefesi ʼuhi ko au pea mo te logo lelei, ʼe ina haofaki anai ia.” (Mko. 8:34, 35) Neʼe fakaʼaogaʼi e Sesu ʼi henī ia te kupu “nefesi” ʼaē ʼe fakaʼuhiga ki te “maʼuli.” ʼE hā lelei mai, neʼe mole gata pē ʼi tana haga ʼaē ʼo sākilifisioʼi ia tona maʼuli kae neʼe ina toe ʼamanaki pē foki ko nātou ʼaē ʼe muli anai iā te ia ke natou toe sākilifisioʼi mo nātou tonatou maʼuli ʼi tanatou tauhi ʼaē ki te ʼAtua. Kapau ʼe natou fai fēia, ʼe natou maʼu ai anai he fakapale lahi.—Lau ia Mateo 16:27.

 3. (a) Koteā te ʼu fehuʼi ʼaē neʼe fai e Sesu kiā nātou ʼaē neʼe fakalogo age kiā te ia? (b) Koteā ʼaē neʼe lagi manatuʼi e te hahaʼi fakalogo ʼi te lua fehuʼi ʼaē neʼe fai e Sesu?

 ³ ʼI te lakaga pē ʼaia, neʼe fai e Sesu te ʼu fehuʼi ʼaenī ʼe lua ke tupu ai hanatou fakakaukau: “He koteā anai hona ʼaoga ki he tagata ʼo hana maʼu te mālamanei kātoa kae ʼe ina totogi ʼaki tona nefesi?” pea: “ ʼIo ʼe koteā anai he meʼa kā foaki e he tagata moʼo fetogi ʼaki ʼo tona nefesi?” (Mko. 8:36, 37) ʼE mahino lelei pē ki he tagata ia te tali ʼaē ki te ʼuluaki fehuʼi. ʼE mole he ʼaoga ki he tagata ke ina maʼu ia te mālamanei kātoa kae ina totogi ʼaki tona maʼuli, peʼe ko tona nefesi. ʼE hoki ʼaoga ia te ʼu koloa mo kapau foki ʼe maʼuli he tahi mo ʼona fakaʼaogaʼi. Ko te lua fehuʼi ʼa Sesu: “ ʼIo ʼe koteā anai he meʼa kā foaki e he tagata moʼo fetogi ʼaki ʼo tona nefesi,” neʼe lagi manatuʼi ai e nātou ʼaē neʼe fakalogo ki te ʼu meʼa ʼaē neʼe lau e Satana ʼi te temi ʼo Sopo, ʼaē neʼe ina ʼui fēnei: “Ko meʼa fuli ʼaē ʼe maʼu e te tagata, ʼe ina foaki anai ia moʼo haofaki tona maʼuli.” (Sopo 2:4) ʼE lagi moʼoni te ʼu palalau ʼaē neʼe fai e Satana kiā nātou ʼaē ʼe mole tauhi kiā Sehova. Tokolahi te hahaʼi ʼe natou fai anai ia meʼa fuli pē, ʼo natou maumauʼi mo te ʼu pelesepeto, ke haofaki tonatou maʼuli. Kae ʼe mole manatu fēia ia te kau Kilisitiano.

 4. He koʼē ʼe maʼuhiga ʼaupitō ki te kau Kilisitiano ia te ʼu fehuʼi ʼaē neʼe fai e Sesu?

⁴ ʼE tou ʼiloʼi neʼe mole haʼu Sesu ki te kele moʼo foaki mai he maʼuli fīmālie, mo koloaʼia, pea mo tologa ʼi te mālama ʼaenī. Neʼe haʼu ia moʼo foaki mai ia te fealagia ʼaē ke tou māʼuʼuli ʼo heʼegata ʼi te mālama foʼou, pea ko te ʼamanaki ki te maʼuli ʼaia ʼe ko he meʼa ia ʼe maʼuhiga ʼaupitō kiā tātou. (Soa. 3:16) ʼE ʼiloʼi lelei pē anai e he Kilisitiano te fakaʼuhiga ʼo te ʼuluaki fehuʼi ʼaē neʼe fai e Sesu, “He koteā anai hona ʼaoga ki he tagata ʼo hana maʼu te mālamanei kātoa kae ʼe ina totogi ʼaki tona ʼamanaki ʼaē ki te maʼuli heʼegata?” ʼE mole ʼi ai anai he ʼaoga ki he tahi hana maʼu ia te mālamanei kae ina totogi ʼaki tona nefesi. (1 Soa. 2:15-17) Moʼo tokoni mai ke tou tali ki te lua fehuʼi ʼa Sesu, ʼe lelei ke tou fai kiā tātou ia te fehuʼi ʼaenī: ‘Koteā ʼaē kā au tali ke au sākilifisioʼi ʼi te temi nei ke au maʼu moʼoni ia te maʼuli heʼegata ʼi te mālama foʼou?’ Ko tatatou tali ki te fehuʼi ʼaia, ʼaē ʼe ʼiloga ʼi totatou faʼahiga maʼuli, ʼe hā ai ia te mālohi ʼo te ʼamanaki ʼaia ʼi totatou loto.—Vakaʼi ia Soane 12:25.

 5. ʼE tou lava maʼu feafeaʼi ia te meʼa ʼofa ʼaē ko te maʼuli heʼegata?

⁵ ʼE mahino ia, neʼe mole ʼui e Sesu ko te maʼuli heʼegata ʼe ko he totogi. Ko te maʼuli, māʼia mo totatou maʼuli nounou ʼi te tuʼu ʼaenī, ʼe ko he meʼa ʼofa ia. ʼE mole feala ke tou foaki he falā moʼo totogi ʼaki te maʼuli peʼe tou fai he meʼa ke tou maʼu ai ia te maʼuli ʼaia. ʼE feala ke tou maʼu ia te meʼa ʼofa ʼaē ko te maʼuli heʼegata gata pē mo kapau ʼe tou “tui kiā Kilisito Sesu” pea mo Sehova, ia “ia ʼaē ʼe ina fakapale ia nātou ʼaē ʼe natou kumi moʼoni ia ia.” (Kal. 2:16; Hep. 11:6) Kae ʼe tonu ke hā tatatou tui ʼaki he ʼu gāue, heʼe ko “te tui ʼe mate, mo kapau ʼe mole hana ʼu gāue.” (Sake 2:26) Koia, kā tou metitāsioʼi loloto ia te fehuʼi ʼa Sesu, pea ʼe lelei ke tou vakavakaʼi fakalelei peʼe koteā ʼaē kā tou lotolelei anai ʼo liʼaki ʼi te tuʼu ʼaenī pea koteā ʼaē kā tou lotolelei anai ʼo fai ʼi te tauhi ʼaē kiā Sehova moʼo fakahā ʼe maʼuli moʼoni tatatou tui.

 “Ko Kilisito Neʼe Mole Nofo ʼAki Pē Te Meʼa ʼAē ʼe Ina Leleiʼia”

 6. Koteā ʼaē neʼe fakamuʼamuʼa e Sesu?

⁶ Neʼe mole tuʼu te sio ʼa Sesu ki te ʼu koloa ʼaē neʼe maʼu ʼi te mālama ʼo tona temi, kae neʼe tokaga tāfito ia ki te ʼu meʼa maʼuhiga pea mo ina tauʼi te fakahala ʼaē ke ina maʼu he maʼuli koloaʼia. Ko tona maʼuli neʼe ko he maʼuli fakasākilifisio pea mo fakalogo ki te ʼAtua. Neʼe mole ina kumi te ʼu meʼa ʼaē neʼe ina leleiʼia, kae neʼe ina ʼui fēnei: “[ʼE] au fai tuʼumaʼu te ʼu meʼa ʼaē ʼe . . . leleiʼia [e te ʼAtua].” (Soa. 8:29) Koteā ʼaē neʼe lotolelei e Sesu ke ina fai moʼo fakafiafia ia te ʼAtua?

7, 8. (a) Koteā te sākilifisio ʼaē neʼe fai e Sesu, pea neʼe feafeaʼi tona fakapale? (b) Ko te fehuʼi fea ʼaē ʼe tonu ke tou fai kiā tātou totonu?

⁷ ʼI te tahi lakaga, neʼe ʼui fēnei e Sesu ki tana kau tisipulo: “Ko te Foha ʼo te tagata, neʼe mole haʼu ke tauhi ia ia, kae ke ina tauhi pea mo ina foaki tona nefesi moʼo totogi ʼaki ʼo te tokolahi.” (Mat. 20:28) Ki muʼa atu, ʼi te fakatokagaʼi e Sesu ki tana kau tisipulo ia te kua ovi mai ʼo te temi ʼaē ʼe tonu ai ke ina “foaki tona nefesi,” neʼe fakalotomālohiʼi ia ia e Petelo ke agalelei kiā ia totonu pē. Kae neʼe mole lotovaivai ai Sesu. Neʼe ina tali lelei ke ina foaki ia tona nefesi, ia tona maʼuli haohaoa, maʼa te mālamanei. Neʼe kua tuku pau ia te kā haʼu ʼo Sesu ʼuhi he neʼe mole manatu pē kiā ia totonu ʼi tona maʼuli kātoa. Neʼe fakatuʼuake pea mo “hiki ia ia ki te toʼomataʼu ʼo te ʼAtua.” (Gāue 2:32, 33) Neʼe liliu ai ia Sesu ko he faʼifaʼitaki fakaofoofo maʼa tātou.

⁸ Neʼe tokoni ia te ʼapositolo ko Paulo ki te kau Kilisitiano ʼi Loma ke “ ʼaua naʼa [natou] nonofo ʼaki pē te meʼa ʼaē ʼe [natou] leleiʼia” pea mo ina fakamanatuʼi age kiā nātou “[māʼiapē lā mo] Kilisito neʼe mole nofo ʼaki pē [ʼi] te meʼa ʼaē ʼe ina leleiʼia.” (Loma 15:1-3) Koia ʼe feafeaʼi anai hatatou mulimuli ki te tokoni ʼaia ʼa te ʼapositolo pea koteā ʼaē ʼe tou lotolelei anai ke tou sākilifisioʼi moʼo faʼifaʼitakiʼi ia Kilisito?

ʼE Loto e Sehova Ke Tou Foaki Age Ia Te Meʼa ʼAē ʼe Lelei ʼAupitō

 9. Koteā ʼaē ʼe fai moʼoni e he Kilisitiano ʼi te temi ʼaē ʼe ina foaki ai tona maʼuli ki te ʼAtua?

⁹ ʼI te Iselaele ʼo te temi muʼa, neʼe fakatotonu ʼi te Lao ʼa Moisese, ko te ʼu kaugana Hepeleo neʼe feala hanatou ʼāteaina ʼi te fitu taʼu ʼo tanatou nonofo kaugana peʼe ʼi te taʼu ʼo te Supileo. Kae neʼe ʼi ai te tahi faʼahi neʼe feala ke natou filifili. Kapau neʼe ʼofa he kaugana ki tona pule, neʼe feala pē ke hoko atu tana nofo kaugana ki te loto fale ʼaia ʼi tona maʼuli kātoa. (Lau ia Teutalonome 15:12, 16, 17.) ʼE tou fai mo tātou ia te tonu ʼaia mokā tou foaki totatou maʼuli ki te ʼAtua. ʼE tou tali ʼaki he lotolelei ke tou fai ia te finegalo ʼo te ʼAtua, kae ʼe mole tou mulimuli ki te ʼu meʼa ʼaē ʼe tou loto kiai. ʼI tatatou fai fēia, ʼe tou fakahā ai he ʼofa loloto kiā Sehova pea mo tatatou loto ʼaē ke tou tauhi kiā te ia ʼo talu ai.

10. ʼE liliu feafeaʼi te ʼAtua ko totatou Pule, pea ʼe malave feafeaʼi ia te faʼahi ʼaia ki tatatou ʼu manatu pea mo tatatou ʼu gāue?

¹⁰ Kapau ʼe kotou ako nei ia te Tohi-Tapu mo te kau Fakamoʼoni ʼa Sehova, mo kau ki te fai fakamafola ʼo te logo lelei, pea mo kau ki te ʼu fono, ʼe matou vikiʼi ai koutou. ʼE matou fakaʼamu ʼe kotou logoʼi vave anai ʼi tokotou loto takotou fia foaki ia tokotou maʼuli ʼaē kiā Sehova pea mo fai ia te fehuʼi ʼaē neʼe fai e te tagata Etiopea kiā Filipe: “Koteā ʼaē ʼe ina tāʼofi toku papitema?” (Gāue 8:35, 36) ʼE hagē pē anai takotou felōgoi ʼaē mo te ʼAtua ko te kau Kilisitiano ʼaē neʼe faitohi fēnei ki ai ia Paulo: “ ʼE mole kei kotou fakalogo kiā koutou, he neʼe totogi koutou ʼaki he totogi.” (1 Ko. 6:19, 20) Peʼe tou ʼamanaki ke tou māʼuʼuli ʼi selō peʼe ʼi te kele, kapau kua tou foaki totatou maʼuli kiā Sehova, pea kua liliu ia ko totatou Pule. Koia ʼe maʼuhiga ai ke tou tekeʼi ia te ʼu holi ʼaē ko te manatu pē kiā tātou totonu pea “ ʼaua naʼa [tou] toe fakaliliu [tātou] ko he ʼu kaugana ʼa te tagata”! (1 Ko. 7:23) ʼE ko he pilivilēsio hata liliu ko he kaugana agatonu ʼe fakaʼaogaʼi e Sehova ki te meʼa ʼaē ʼe loto kiai!

11. Koteā te sākilifisio ʼaē ʼe ina fakalotomālohiʼi te kau Kilisitiano ke natou momoli, pea koteā tona fakaʼuhiga moʼoni, ohagē ko tona fakatā e te ʼu sākilifisio ʼaē neʼe fai ʼi te Lao ʼa Moisese?

¹¹ Neʼe fakatotonu fēnei e Paulo ki tona ʼu tehina: “Kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi tapu ʼaki tokotou ʼatamai.” (Loma 12:1) Ko te ʼu palalau ʼaia neʼe lagi fakamanatuʼi ai ki te kau Kilisitiano Sutea ia te ʼu sākilifisio ʼaē neʼe fai ʼi tanatou tauhi ʼi muʼa ʼo tanatou liliu ko he ʼu tisipulo ʼa Sesu. Neʼe kua natou ʼiloʼi ʼi te Lao ʼa Moisese, ko te ʼu manu ʼaē neʼe momoli ʼi te ʼaletale ʼa Sehova neʼe tonu ko he ʼu manu neʼe lelei ʼaupitō. Neʼe mole tali he manu neʼe ʼi ai hona mele. (Mala. 1:8, 13) ʼE toe tatau mokā tou momoli totatou sino ko ‘he  sākilifisio maʼuli.’ ʼE tou foaki kiā Sehova ia te meʼa ʼaē ʼe lelei ʼaupitō, kae ʼe mole tou ʼuluaki fai muʼa te meʼa ʼaē ʼe tou loto kiai, pea hoki tou tokaga leva ki te ʼAtua ki muli age. ʼI te temi ʼaē neʼe tou foaki ai ia totatou maʼuli ki te ʼAtua, neʼe tou foaki ai kiā te ia totatou “nefesi” kātoa peʼe ko totatou maʼuli kātoa, ko tona fakaʼuhiga ko totatou mālohi, totatou ʼu koloa, pea mo totatou ʼu fealagia. (Kol. 3:23) ʼE hā feafeaʼi te ʼu faʼahi ʼaia ʼi totatou maʼuli?

Kotou Fakaʼaogaʼi Fakapotopoto Tokotou Temi

12, 13. Koteā ʼaē ʼe feala ke tou fai ke tou foaki ai ia te meʼa ʼaē ʼe lelei ʼaupitō kiā Sehova?

¹² ʼE tou foaki kiā Sehova ia te meʼa ʼaē ʼe lelei ʼaupitō mokā tou fakaʼaogaʼi fakapotopoto totatou temi. (Lau ia Efesi 5:15, 16.) ʼE fakamaʼua ai ki te faʼahi ʼaia ke tou loto lolomi. Ko te ʼu fakaneke mai te mālama pea mo totatou ʼuhiga heʼe haohaoa ʼe nā uga tātou ke tou fakaʼaogaʼi pē totatou temi ki te ʼu fakafiafia peʼe ki te ʼu meʼa ʼaē ʼe tou loto kiai. ʼE moʼoni, “kiā meʼa fuli ʼe ʼi ai tona temi kua fakakatofa,” ʼo kau kiai te temi fakafiafia pea mo te gāue ke feala ai hatatou fakahoko ia totatou ʼu maʼua Fakakilisitiano. (Tnk. 3:11) Kae ko he Kilisitiano kua foaki tona maʼuli kiā Sehova, ʼe tonu ke ina fakafuafua lelei tana ʼu gāue pea mo fakaʼaogaʼi fakapotopoto ia tona temi.

¹³ ʼI te ʼaʼahi ʼaē e Paulo ia Ateni, neʼe ina tokagaʼi “ko te kau Ateni fuli pea mo te kau matāpule ʼaē neʼe nonofo ʼi ai neʼe natou fakaʼaogaʼi pē ia tonatou temi mālōlō ki te fai palalau pea mo te fakalogo ki he meʼa foʼou.” (Gāue 17:21) Iā ʼaho nei, tokolahi ʼe toe pulinoa fēia ia tonatou temi. Ko te ʼu fakafiafia ʼo te temi nei, ohagē lā ko te sioʼi ʼo te televisio, te ʼu gaoʼi viteo, pea mo te Itineti. Kua ʼāsili age ia te ʼu meʼa ʼaē ʼe feala ke tou maʼumaʼua kiai pea mo pulinoa ai totatou temi. Kapau ʼe tou fakaʼaogaʼi totatou temi ki te ʼu meʼa ʼaia, pea ʼe lagi mole kei tou tōkakaga anai ki te ʼu meʼa ʼaē ʼe ʼaoga kiā tātou ʼi te faʼahi fakalaumālie. ʼE feala aipē ke tou ʼui kua tou maʼumaʼua fau moʼo fakahoko ia “te ʼu meʼa ʼaē ʼe maʼuhiga tāfito”—te ʼu gāue ʼo ʼuhiga mo tatatou tauhi kiā Sehova.—Filp. 1:9, 10.

14. Ko te ʼu fehuʼi fea ʼaē ʼe tonu ke kotou fakakaukauʼi fakalelei?

¹⁴ Koia, ʼi tokotou ʼuhiga kaugana ʼa Sehova, kotou fai ia te ʼu fehuʼi ʼaenī kiā koutou totonu: ‘ ʼI taku polokalama ʼi te ʼaho fuli, ʼe ʼi ai koa he temi kua au tuku ki te lau ʼo te Tohi-Tapu, mo te metitāsio, pea mo te faikole?’ (Pes. 77:12; 119:97; 1 Tes. 5:17) ‘ ʼE au fakaʼaogaʼi koa he temi moʼo teuteuʼi ai taku ʼu fono? ʼE au fakalotomālohiʼi koa ʼihi ʼaki te ʼu tali ʼaē ʼe au fai ʼi te ʼu fono?’ (Pes. 122:1; Hep. 2:12) ʼE ʼui ʼi te Folafola ʼa te ʼAtua, ko Paulo pea mo Palenapasi neʼe nā fakaʼaogaʼi “he temi loaloaga, ʼo [nā] palalau ʼaki he lototoʼa ʼi te mālohi ʼo Sehova.” (Gāue 14:3) ʼE feala koa ke kotou fetogi takotou ʼu fakatuʼutuʼu ke lahi age tokotou temi, peʼe ke “loaloaga” age tokotou temi ʼi te gāue fai fakamafola, ʼo lagi kotou pioniē?—Lau ia Hepeleo 13:15.

15. ʼE feafeaʼi te fakaʼaogaʼi fakapotopoto e te kau tagata ʼāfea ia tonatou temi?

¹⁵ ʼI te ʼaʼahi e te ʼapositolo ko Paulo pea mo Palenapasi ia te kōkelekāsio ʼi Atiokia, “neʼe mole [nā] nonofo mo te ʼu tisipulo ʼi he kiʼi temi nounou pē” moʼo fakalotomālohiʼi nātou. (Gāue 14:28) Iā ʼaho nei, ko te ʼu tagata ʼāfea ʼofa ʼe natou toe fakaʼaogaʼi tonatou temi lahi moʼo fakalotomālohiʼi ʼihi atu. ʼO hilifaki ki tanatou minisitelio, ʼe toe gāue kinakina ia te kau tagata ʼāfea moʼo fafaga ia te faga ovi, moʼo kumi te ovi ʼaē kua hehē, moʼo tokoni kiā ia ʼaē ʼe mahaki, pea mo fakahoko te tahi ʼu tuʼuga maʼua ʼi te kōkelekāsio. ʼU tehina, ʼe fakagafua koa e tokotou ʼaluʼaga ke kotou maʼu ia te ʼu pilivilēsio gāue ʼaia?

16. Ko te ʼu gāue fea ʼaē ʼe feala ai ke tou “fai te meʼa ʼaē ʼe lelei . . . kiā nātou ʼaē ko ʼotatou ʼu kāiga ʼi te tui”?

 ¹⁶ Tokolahi ʼe natou fiafia ʼi te tokoni kiā nātou ʼaē ʼe tuʼutāmakiʼia ʼuhi ko he maumau neʼe fakahoko e te tagata peʼe ko te nātulā. Ohagē lā, ko te tuagaʼane ʼe taʼu 60 ʼe gāue ʼi te Petele, neʼe tuʼa lahi tana folau mamaʼo moʼo tokoni kiā nātou ʼaē neʼe hoko ki ai he tuʼutāmaki. He koʼē neʼe ina fakaʼaogaʼi fēia ia tona temi mālōlō? ʼE ina ʼui fēnei: “Logolā neʼe mole au poto gāue, kae neʼe ko he pilivilēsio haku fai he meʼa ʼe ʼaoga. Neʼe fakalotomālohiʼi lahi au ʼi taku sio ki te tui mālohi ʼo toku ʼu tehina mo tuagaʼane ʼaē neʼe puli fuli tonatou ʼu koloa.” Tahi ʼaē meʼa, ko te lauʼi afe ʼi te mālamanei ʼe natou tokoni ki te laga ʼo te ʼu Fale ʼo Te Puleʼaga pea mo te ʼu Fale Fakatahi. Kapau ʼe tou kau ki te ʼu taʼi gāue ʼaia, ʼe tou “fai te meʼa ʼaē ʼe lelei . . . kiā nātou ʼaē ko ʼotatou ʼu kāiga ʼi te tui” ʼo mole tou manatu kiā tātou totonu pē.—Kal. 6:10.

“ ʼE Au Nofo Mo Koutou ʼi Te ʼAho Fuli Pē”

17. Koteā ʼaē kā kotou foaki anai moʼo fetogi ʼaki ia te maʼuli heʼegata?

¹⁷ Ko te sōsiete fakatagata ʼaē ʼe mamaʼo mai te ʼAtua ʼe ʼamanaki ke pulihi. ʼE mole tou ʼiloʼi te temi totonu ʼaē kā hoko ai. Kae ʼe tou ʼiloʼi “kua nounou te temi” pea “ko te ʼaluʼaga ʼo te mālama ʼaenī ʼe fetogi.” (Lau ia 1 Kolonito 7:29-31.) ʼE liliu ai ʼo maʼuhiga ia te fehuʼi ʼaenī neʼe fai e Sesu: “ ʼIo ʼe koteā anai he meʼa kā foaki e he tagata moʼo fetogi ʼaki tona nefesi?” ʼE mahino ia, ʼe tou fai anai ia te ʼu sākilifisio ʼaē kā kole mai e Sehova ke tou fai ke tou maʼu ai ia “te maʼuli moʼoni.” (1 Tim. 6:19) Koia, ʼe maʼuhiga ke tou tokagaʼi ia te tokoni ʼa Sesu ke tou ‘muli tuʼumaʼu iā te ia’ pea mo ‘kumi muʼa ia te puleʼaga.’—Mat. 6:31-33; 24:13.

18. Koteā ʼaē ʼe tou falala kiai, pea koteā tona tupuʼaga?

¹⁸ ʼE moʼoni, ʼe mole faigafua tuʼumaʼu ia te mulimuli ʼaē iā Sesu, pea ohagē pē ko tana fakatokaga mai, neʼe mamate ʼihi ʼi te tuʼu ʼaenī. Kae ohagē pē ko Sesu, ʼe mole tou tō anai ki te fakahala ʼaē ke tou ‘agalelei mo tātou.’ ʼE tou tui ki te fakapapau ʼaenī neʼe ina fai ki tana kau tisipulo fakanofo ʼi te ʼuluaki sēkulō: “ ʼE au nofo mo koutou ʼi te ʼaho fuli pē, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 28:20) Koia, tou fakaʼaogaʼi lahi totatou temi pea mo totatou ʼu fealagia ki te tauhi taputapu. ʼI tatatou fai fēia, ʼe tou fakahā ai ia tatatou falala ʼaē ko Sehova ʼe ina taupau anai tātou ʼi te mamahi lahi peʼe ina fakatuʼuake anai tātou ki te maʼuli ʼi te mālama foʼou. (Hep. 6:10) ʼE tou fakahā ai anai ia te maʼuhiga ʼaē kiā tātou ʼo te meʼa ʼofa ʼaē ko te maʼuli.

Koteā Takotou ʼu Tali?

• Neʼe fakahā feafeaʼi e Sesu tana fia tauhi lahi ʼaē ki te ʼAtua pea mo te tagata?

• He koʼē ʼe tonu ke fakafisi he tahi kiā ia totonu, pea ʼe ina fakahoko feafeaʼi te faʼahi ʼaia?

• ʼI Iselaele ʼi te temi muʼa, neʼe gata pē ki te faʼahiga sākilifisio fea ʼaē neʼe tali e Sehova, pea ʼe ʼaoga feafeaʼi te faʼahi ʼaia kiā tātou iā ʼaho nei?

• ʼE feafeaʼi hatatou fakaʼaogaʼi fakapotopoto ia totatou temi?

[ʼU fehuʼi ʼo te ako]

[Paki ʼo te pasina 26]

Neʼe fai tuʼumaʼu e Sesu ia te ʼu meʼa ʼaē ʼe leleiʼia e te ʼAtua

[Paki ʼo te pasina 28]

Ko te kau Iselaele loto fakafetaʼi neʼe natou foaki ia te meʼa lelei ʼaupitō ʼaē neʼe natou maʼu moʼo lagolago ki te tauhi moʼoni

[Paki ʼo te pasina 29]

ʼE tou fakafiafia ia te ʼAtua ʼi tatatou fakaʼaogaʼi fakapotopoto ia totatou temi