Kotou Fakaovi Ki Te ʼAtua

“Kotou Liliu Ko He Kau Faʼifaʼitaki ʼo Te ʼAtua”

Efesi 4:32–5:2

KO TE agalelei, mo te manavaʼofa, mo te loto fakamolemole pea mo te ʼofa, ʼe ko he ʼu kalitātē kua tahitahiga tona maʼuliʼi e te hahaʼi iā ʼaho nei. ʼE feafeaʼi kiā koutou? Kua kotou fakatokagaʼi koa logolā takotou ʼu faiga ʼaē moʼo fakatuputupu ia te ʼu taʼi kalitātē ʼaia kae ʼe mole kotou lavaʼi? Ko he tahi ʼe ina tukugākoviʼi pē ia ia, ʼe lagi tui papau ia ʼe mole ina lava fakatuputupu ia te ʼu kalitātē ʼaia ʼuhi ko he ʼu agamāhani ʼe kovi peʼe ko he ʼu meʼa ʼāfea neʼe hoko ʼi tona maʼuli. Kae ʼe akoʼi mai ʼi te Tohi-Tapu ia te moʼoni fakalotofīmālie ʼaenī—ko totatou Tupuʼaga ʼe ina ʼiloʼi ʼe tou maʼu ʼi totatou loto ia te fealagia ʼaē ke tou fakatuputupu iā tātou ia te ʼu kalitātē ʼaia.

ʼI te Folafola ʼa te ʼAtua, ʼe fakalotomālohiʼi fēnei ia te kau Kilisitiano moʼoni: “Koia, kotou liliu ko he kau faʼifaʼitaki ʼo te ʼAtua, ohagē ko he fānau ʼofaina.” (Efesi 5:1) ʼE hā mai ʼi te ʼu palalau ʼaia, ia te falala ʼaē ʼa te ʼAtua ki tana kau ʼatolasio. ʼO feafeaʼi? Neʼe fakatupu e Sehova ʼAtua ia te tagata ki Tona pāki, ohagē pē ko ia. (Senesi 1:26, 27) Koia neʼe fakatupu e te ʼAtua ia te tagata ʼaki te ʼu kalitātē ʼe tatau mo ia. a Kā fakalotomālohiʼi ʼi te Tohi-Tapu ia te kau Kilisitiano ke natou “liliu ko he kau faʼifaʼitaki ʼo te ʼAtua,” ʼe hagē pē ʼe ʼui fēnei e Sehova kiā nātou: ‘ ʼE au falala kiā koutou. ʼE au ʼiloʼi logolā tokotou ʼuhiga heʼe haohaoa, kae ʼe kotou maʼu ia te fealagia ʼaē ke kotou hagē ko au.’

Ko te ʼu kalitātē fea ʼo te ʼAtua ʼaē ʼe tou lava faʼifaʼitakiʼi? ʼE tali kiai ia te ʼu vaega ki muʼa atu. Kotou fakatokagaʼi neʼe kamata e Paulo ia te tokoni ʼaē ke faʼifaʼitakiʼi te ʼAtua ʼaki te kupu “koia.” Ko te kupu ʼaia ʼe fakapipiki ki te vaega ki muʼa atu, ʼaē ʼe talanoa ai ki te agalelei, te manavaʼofa, pea mo te loto fakamolemole. (Efesi 4:32; 5:1) Pea ʼi te vaega ʼaē ʼe hoa mai ki te tokoni ʼaē ʼa Paulo ke faʼifaʼitakiʼi ia te ʼAtua, ʼe ʼui e Paulo ki te kau Kilisitiano ke natou haga mulimuli ki he faʼahiga maʼuli ʼe fakatafito ki te ʼofa moʼoni. (Efesi 5:2) ʼE mahino ia, kapau ʼe tonu ke kita fakahā ia te agalelei, te manavaʼofa fakamālotoloto, te loto fakamolemole ki niʼihi, pea mo te fakahā ʼo te ʼofa, ʼe tou maʼu ia te faʼifaʼitaki lahi tokotahi ʼaē ke tou muliʼi—ia Sehova ʼAtua.

He koʼē ʼe tonu ke tou faʼifaʼitakiʼi ia te ʼAtua? Kotou fakatokagaʼi ia te fakalotomālohi ʼaē ʼe tou maʼu ʼi te palalau ʼaenī ʼa Paulo: “Kotou liliu ko he kau faʼifaʼitaki ʼo te ʼAtua, ohagē ko he fānau ʼofaina.” ʼE mole koa lā ko he manatu fakamalave loto ʼaia? ʼE sio Sehova ki tana kau ʼatolasio ohagē ko he ʼu fānau ʼe ʼofa mamahi ki ai. Ohagē pē ko he kiʼi tama ʼe faiga ke ina faʼifaʼitakiʼi ia tana tamai, ʼe toe fēia mo te kau Kilisitiano moʼoni, ʼe natou faiga fakamālotoloto ke natou faʼifaʼitakiʼi ia tanatou Tamai ʼaē ʼe ʼi selō.

ʼE mole fakakinauʼi e Sehova ia te hahaʼi ke natou faʼifaʼitakiʼi ia ia. ʼE fakaʼapaʼapa ia kiā tātou ʼaki tana foaki mai ia te loto faʼitaliha, koia ʼe fakalogo kiā tātou peʼe tou faʼifaʼitakiʼi anai ia te ʼAtua peʼe kailoa. (Teutalonome 30:19, 20) Kae ʼaua naʼa galo kiā koutou, ʼe kotou maʼu ʼi tokotou loto ia te fealagia ʼaē ke kotou fakatuputupu ia te ʼu kalitātē fakaʼatua. ʼE mahino ia, ʼe tonu ke kotou ako tona ʼu kalitātē pea mo tana ʼu lao mo kapau ʼe kotou fia faʼifaʼitakiʼi te ʼAtua. ʼE feala ke tokoni atu ia te Tohi-Tapu ke kotou ako ia meʼa fuli ʼo ʼuhiga mo te ʼu kalitātē pea mo te ʼu lao ʼa te ʼAtua, pea ko tona ʼulugaaga taulekaleka ʼaē neʼe ina fakafealagia ki te ʼu toko lauʼi miliona ke natou liliu ko hona ʼu faʼifaʼitaki.

[Nota]