Koteā ʼAē Neʼe Akoʼi e Sesu ʼo ʼUhiga Mo Te ʼIfeli?

Neʼe ʼui fēnei e Sesu: “Kapau ʼe fakatupu tūkia kiā koe tou mata, liʼaki. ʼE lelei age tau hū ʼaki he mata e tahi ki te puleʼaga ʼo te ʼAtua, ʼi hau maʼu tou ʼu mata e lua pea lī koe ki te ʼifeli. ʼE mole mamate ai te ʼu ʼugaga, pea ʼe tutu tuʼumaʼu ai te afi.”—MALEKO 9:47, 48, Contemporary English Version.

ʼI te tahi lakaga, neʼe talanoa Sesu ʼo ʼuhiga mo te temi fakamāu mokā ina ʼui fēnei anai ki te kau agakovi: “Kotou mavae atu iā te au, koutou kau malaʼia, kotou ʼolo ki te afi heʼegata, ʼaē neʼe teuteuʼi maʼa te tēvolo pea mo tana kau ʼāselo.” Pea neʼe ina toe ʼui kiā nātou ʼaia ke natou “ ʼolo . . . ki te tautea heʼegata.”—MATEO 25:41, 46, Bible de Crampon.

KĀ TOU ʼuluaki lau ia te ʼu palalau ʼa Sesu ʼi ʼoluga, pea ʼe hagē ia neʼe lagolago ki te akonaki ʼo te ʼifeli. ʼE mahino ia, neʼe mole loto e Sesu ke ina fakafifihi ia te Folafola ʼa te ʼAtua, ʼaē ʼe ʼui fakalelei ai: “ ’Ko te kau mate ʼe mole kei natou ʼiloʼi he meʼa.”—Tagata Tānaki 9:5, La Sainte Bible Révisée.

Pea koteā lā ʼaē neʼe manatu kiai Sesu ʼi tana ʼui ke lī he tahi “ki te ʼifeli”? Ko “te afi heʼegata” ʼaē neʼe talanoa kiai Sesu, ʼe moʼoni koa peʼe ko he afi fakatā? Koteā te fakaʼuhiga ʼo te “ ʼolo . . . ki te tautea heʼegata”? Tou vakaʼi ia te ʼu fehuʼi takitahi ʼaia.

Koteā ʼaē neʼe manatu kiai Sesu ʼi tana ʼui ʼaē ke lī he tahi “ki te ʼifeli”? Ko te kupu Fakakeleka ʼaē neʼe fakaliliu ʼaki te kupu “ ʼifeli” iā Maleko 9:47 ʼe ko te kupu Géénna. Ko te kupu ʼaia ʼe haʼu mai te kupu Fakahepeleo Gé Hinnom, ʼaē ko tona fakaʼuhiga “Mafa ʼo Hinome.” Neʼe tuʼu ia te Mafa ʼo Hinome ʼi te tuʼa kolo ʼāfea ʼo Selusalemi. ʼI te temi ʼo te ʼu hau Iselaele, neʼe sākilifisioʼi ai te ʼu tamaliki—ko he aga fakalialia neʼe fakatūʼā e te ʼAtua. Neʼe ʼui e te ʼAtua ʼe ina matehi anai ia nātou ʼaē ʼe natou fai ia te taʼi aga ʼaia ʼo te tauhi hala. Neʼe fakahigoa ai ia te Mafa ʼo Hinome ko “te mafa ʼo te fakapō,” ʼaē neʼe mole tanu ai ia “te ʼu sino mate ʼo te hahaʼi ʼaia.” (Selemia 7:30-34, La Sainte Bible) Koia neʼe fakakikite ai e Sehova, ko te Mafa ʼo Hinome ʼe liliu anai ko he koga meʼa ʼe mole fakamamahiʼi ai te hahaʼi ʼaē kei māʼuʼuli, kae ʼe lī anai kiai te ʼu sino mate.

ʼI te temi ʼo Sesu, ko te hahaʼi ʼo Selusalemi neʼe natou fakaʼaogaʼi ia te Mafa ʼo Hinome moʼo laku kiai ia te ʼu ʼotaʼota. Neʼe natou laku kiai te ʼu sino ʼo ʼihi hahaʼi fai fakapō pea neʼe ko he koga meʼa neʼe kakaha tuʼumaʼu ai te afi moʼo tutu ia te ʼu ʼotaʼota pea mo te ʼu sino mate.

ʼI te palalau ʼa Sesu ʼo ʼuhiga mo te ʼu ʼugaga pea mo te afi ʼaē ʼe mole mate, ʼe hā mai neʼe manatu ia ki te ʼu palalau ʼaē iā Isaia 66:24. ʼO ʼuhiga mo “te ʼu sino mate ʼo te ʼu tagata ʼaē  neʼe agatuʼu [ki te ʼAtua],” ʼe ʼui e Isaia “ ʼe mole mate anai tanatou ʼugaga, pea ʼe mole mate anai tanatou afi.” (La Sainte Bible) Ko Sesu pea mo te hahaʼi ʼaē neʼe fakalogo, neʼe natou ʼiloʼi ko te ʼu palalau ʼaia iā Isaia neʼe fakaʼuhiga ki te faʼahiga gaohi ʼaia ʼo te ʼu sino mate ʼo nātou ʼaē ʼe mole tuha ke tanu ʼonatou sino.

Koia, neʼe talanoa ai Sesu ki te Mafa ʼo Hinome, peʼe ko te Seʼeni moʼo fakatā lelei ia te faʼahiga mate ʼaē ʼe mole toe feala ai ke fakatuʼuake he tahi. Neʼe ina fakahā lelei ia te puani ʼaia, ʼi tana fai ia te fakatokaga ʼaē ko te ʼAtua “ ʼe feala ke ina pulihi ia te nefesi pea mo te sino ʼi te seʼeni.” (Mateo 10:28, Bible de Crampon) Ko te Seʼeni ʼe ko te fakatā ʼo te mate heʼegata, kae ʼe mole ko he fakamamahiʼi heʼegata ʼo he tahi.

Ko “te afi heʼegata” ʼaē neʼe talanoa kiai Sesu, ʼe ko he afi moʼoni koa peʼe ko he afi fakatā? Kotou tokagaʼi ko “te afi heʼegata” ʼaē neʼe talanoa kiai Sesu pea mo tuʼu iā Mateo 25: 41, neʼe teuteuʼi “maʼa te Tēvolo pea mo tana kau ʼāselo.” ʼE kotou manatu koa ko he afi moʼoni ʼe feala ke ina tutu he ʼu laumālie? Pe neʼe fakaʼaogaʼi koa e Sesu ia te kupu “afi” moʼo fakatā kiai he meʼa? ʼE mahino ia ko “te ʼu ovi” pea mo “te ʼu tao” ʼaē neʼe talanoa kiai Sesu ʼi tana akonaki ʼaia ʼe mole ko he ʼu faga manu moʼoni; ʼe natou fakatā ia te ʼu faʼahiga hahaʼi e lua. (Mateo 25:32, 33) Ko te afi heʼegata ʼaē neʼe ʼui e Sesu ʼe ina tutu kātoa ia te kau agakovi ʼe ko he afi fakatā.

Koteā te fakaʼuhiga ʼo ‘te ʼolo ʼa te hahaʼi agakovi ki te tautea heʼegata’? Logolā ʼe lahi ia te ʼu Tohi-Tapu ʼe natou fakaʼaogaʼi ia te kupu “tautea” ʼaē iā Mateo 25:46, kae ko te kupu Fakakeleka kolasin ʼe fakaʼuhiga ʼuluaki ki te “tuʼusi ʼo te ʼu vaʼa ʼaē ʼe homo ake ʼi te ʼu fuʼu ʼakau,” peʼe ko te pakimaga, peʼe ko te tuʼusi ʼo te ʼu vaʼa ʼaē ʼe mole ʼaoga. Koia ko te hahaʼi ʼaē ʼe hagē ni ʼu ovi ʼe natou maʼu ia te maʼuli heʼegata, kae ko te hahaʼi ʼaē ʼe hagē ni ʼu tao ʼaē ʼe mole fakahemala ʼe ‘tautea anai ʼo heʼegata,’ peʼe tuʼusi anai tonatou maʼuli.

Koteā Takotou Manatu?

Neʼe mole he temi neʼe akoʼi ai e Sesu ʼe ʼi ai he nefesi tuputupua ʼo te hahaʼi. Kae neʼe ina akoʼi tuʼumaʼu pē ia te fakatuʼuake ʼo te kau mate. (Luka 14:13, 14; Soane 5:25-29; 11:25) Koteā anai te tupuʼaga ʼo te talanoa ʼa Sesu ʼe fakatuʼuake anai te kau mate mo kanapau lā neʼe tui ia ʼe mole mate ʼonatou nefesi?

Neʼe mole akoʼi e Sesu ʼe agakovi ia te ʼAtua ʼo ina fakamamahiʼi ʼo talu ai ia te hahaʼi agakovi. Kae neʼe ʼui fēnei e Sesu: “Neʼe ʼofa lahi te ʼAtua ki te mālamanei, ʼo ina foaki ai tona ʼAlo ʼulu tokotahi, ke feala kiā ia ʼaē kā tui kiā te ia ke mole mate, kae ke ina maʼu ia te maʼuli  heʼegata.” (Soane 3:16, Bible de Crampon) He koʼē neʼe ʼui e Sesu ko nātou ʼaē ʼe mole tui anai kiā te ia, ʼe natou mamate anai? Kanapau lā neʼe ʼui e Sesu ʼe natou māʼuʼuli anai ʼo heʼegata, ʼo natou maʼuli mamahi ʼi he ʼifeli kakaha, neʼe ina fai anai koa ia te ʼu palalau ʼaia?

Ko te akonaki ʼaē ʼe ʼui ko te ʼifeli ʼe ko he koga meʼa ʼe fakamamahiʼi ai te hahaʼi, ʼe mole fakatafito ia ki te Tohi-Tapu. Kae ʼe ko he akonaki pagani ia neʼe fakaliliu ko he akonaki Fakakilisitiano. (Vakaʼi ia te fakamatala ʼaē ʼe ʼātakai, ko tona kupu tāfito “He Fakamatala Nounou ʼo ʼUhiga Mo Te ʼIfeli,” ʼi te pāsina 6.) ʼE mole fakamamahiʼi ʼo heʼegata e te ʼAtua ia te hahaʼi ʼi he ʼifeli. ʼI takotou ʼiloʼi ia te moʼoni ʼo ʼuhiga mo te ʼifeli, ʼe malave feafeaʼi ki takotou aga ʼaē ki te ʼAtua?

[Fakamatala ʼo te pasina 6]

HE FAKAMATALA NOUNOU ʼO ʼUHIGA MO TE ʼIFELI

ʼE HAʼU IA MAI TE ʼU AKONAKI PAGANI: Neʼe tui ia te kau Esipito ʼo te temi muʼa ki te ʼifeli. Ko te tohi (The Book Amuat) neʼe fai ʼi te taʼu 1375 ʼi muʼa ʼo totatou temi, ʼe talanoa ʼo ʼuhiga mo nātou ʼaē “ ʼe lī anai ki te ʼu luo ʼo te afi; pea . . . ʼe mole natou mavae anai mai ai, pea . . . ʼe mole feala ke natou hao anai mai te ulo ʼo te afi.” Ko te tagata filosofia Keleka ko Plutarque (ʼi te lagi taʼu 46 ki te taʼu 120 ʼo totatou temi) neʼe ina tohi ʼo ʼuhiga mo nātou ʼaē ʼi te lalo kele: “[Neʼe natou] kalaga ʼi tanatou tau mo te ʼu toe fakamamahi fakamataku pea mo fakatūʼā lahi pea mo kovi ʼaupitō.”

NEʼE HŪ KI TE LOTU FAKASUTEA: Ko te tagata hisitolia ko Josèphe (ʼi te taʼu 37 ki te lagi taʼu 100 ʼo totatou temi) neʼe ina ʼui ko te kau Esenio, ia te magaʼi lotu Sutea, neʼe natou tui ko “te ʼu nefesi ʼe tuputupua, pea mo hoko atu tonatou maʼuli ʼo talu ai.” Neʼe ina toe ʼui fēnei: “Neʼe hagē ia te manatu ʼaia ko te manatu ʼa te kau Keleka. . . . Neʼe natou manatu ko te ʼu nefesi agakovi neʼe lī ki he koga meʼa fakapōʼuli pea mo fakamataku, pea neʼe tauteaʼi hoholo aipē ia te hahaʼi.”

NEʼE HŪ KI TE “LOTU FAKAKILISITIANO”: ʼI te lua sēkulō ʼo totatou temi, neʼe ʼui fēnei ʼi te tohi ʼe mole ko he tohi ʼe haʼu moʼoni mai te ʼAtua (Apocalypse de Pierre) ʼo ʼuhiga mo te kau agakovi: “Maʼa nātou, ʼe tutu ia he afi ʼe kakaha tuʼumaʼu pē.” ʼE toe ʼui fēnei ai: “Ko Eselaele, te ʼāselo ʼo te hauhau, ʼe ina toʼo ia te hahaʼi tagata mo fafine ʼaē neʼe mole vela kātoa ʼonatou sino pea ina lī nātou ki he koga meʼa fakapōʼuli, te ʼifeli ʼo te hahaʼi; pea ko te laumālie ʼo te hauhau ʼe ina fakamamahiʼi ai nātou.” ʼI te temi ʼaia, ko te tagata faitohi ko Théophile ʼo Atiokia ʼe talanoa ki te ʼu palalau neʼe fai e te fafine polofetā Keleka ko Sibyl, neʼe ina fakakikite ʼo ʼuhiga mo te ʼu tautea ʼo te kau agakovi: “ ʼE tonu anai ke hoko mai he afi kiā koutou, pea ʼe tutu anai koutou ʼi te ʼaho kātoa ʼi te ulo ʼo talu ai.” ʼE kau te ʼu palalau ʼaia ʼi te ʼu palalau ʼaē ʼe ʼui e Théophile ʼe “moʼoni, mo ʼaoga, mo totonu, pea mo fua lelei ki te hahaʼi fuli pē.”

NEʼE FAKAʼAOGAʼI IA TE AFI ʼO TE ʼIFELI MOʼO TAKUʼAKI IA TE AGAMĀLOHI ʼAĒ NEʼE HOKO ʼI TE NIMA SĒKULŌ KI TE HOGOFULU-MĀ-NIMA SĒKULŌ: Ko te fineʼaliki ʼo Pilitānia ko Malia ʼUluaki (Marie 1ère, neʼe fineʼaliki mai te taʼu 1553 ki te taʼu 1558), pea neʼe logona ʼaki te higoa ʼaē ko “Marie la Sanglante” (Malia ligitoto), he neʼe ina tutu ia teitei hahaʼi Polotesitā e toko 300 ʼi te afi, neʼe ʼui neʼe ina fai ia te ʼu palalau ʼaenī: “Ohagē pē ko te tutu ʼo te ʼu nefesi ʼo te kau heletiko ʼi te ʼifeli ʼo heʼegata ʼi he tahi age mālama, ʼe mole he tahi age meʼa ʼe lelei age kiā au ʼi haku faʼifaʼitakiʼi ia te lagavaka ʼa te ʼAtua ʼo au tutu nātou ʼi te kele.”

KO HE FAKAMAHINO FOʼOU: ʼI te ʼu taʼu pē ʼaenī, ko ʼihi kautahi lotu neʼe natou toe vakaʼi ia tanatou akonaki ʼo ʼuhiga mo te ʼifeli. Ohagē lā, ko te Komitē ʼo te ʼu Akonaki ʼo te ’Ēkelesia ʼo Pilitānia neʼe ina ʼui fēnei ʼi te taʼu 1995: “Ko te ʼifeli ʼe mole ko he fakamamahi heʼegata, kae ko te ʼaluʼaga ʼaia ʼo te maʼuli ʼo he tahi ʼe ina filifili ke fakafeagai mālohi ki te ʼAtua, ʼo iku ai mo tona mate.”

[Fakamatala ʼo te pasina 7]

KOTEĀ IA “TE ʼANO ʼO TE AFI”?

ʼE ʼui iā Fakahā 20:10 ko te Tēvolo ʼe lī anai ki “te ʼano ʼo te afi” pea ʼe “fakamamahiʼi anai ʼi te ʼaho mo te pō ʼi he ʼu sēkulō mo te ʼu sēkulō.” (TOB) Kapau neʼe tonu ke fakamamahiʼi ia te Tēvolo ki te heʼegata, pea ʼe tonu anai ke mole matehi ia ia e te ʼAtua, kae ʼe ʼui ʼi te Tohi-Tapu ko Sesu ʼe ina ‘moloki ia ia.’ (Hepeleo 2:14, La Sainte Bible) Ko te ʼano kakaha ʼe ina fakatā ia “te lua mate.” (Fakahā 21:8) ʼE mole ko te ʼuluaki mate ʼaē ʼe talanoa kiai ia te Tohi-Tapu—te mate ʼaē ʼe tupu mai te agahala ʼa Atama—ko te mate ʼaia ʼe feala ke fakatuʼuake he tahi mai ai. (1 Kolonito 15:21, 22) ʼUhi ʼaē ʼe mole ʼui ʼi te Tohi-Tapu ko “te ʼano ʼo te afi” ʼe ina fakaʼāteaina ia nātou ʼaē ʼe lī kiai, ko “te lua mate” ʼe fakaʼuhiga ki te tahi faʼahiga mate, ʼe ko te mate ʼo talu ai.

Koteā te fakaʼuhiga ʼo te fakamamahiʼi ʼo heʼegata ʼo nātou ʼaē ʼi “te ʼano ʼo te afi”? ʼI ʼihi temi, ko te “fakamamahiʼi” ʼo he tahi ʼe feala ke fakaʼuhiga ko hona “pilisoniʼi.” ʼI te tahi lakaga ʼaē neʼe tauʼi ai e Sesu ia te ʼu temonio, neʼe natou kalaga fēnei: “Neʼe ke haʼu koa ki henī ke ke fakamamahiʼi mātou [tāʼofi mātou ʼi te vanu] ʼi muʼa ʼo tona temi?” (Mateo 8:29, Luka 8:30, 31; La Sainte Bible) Koia ko nātou fuli ʼaē ʼi “te ʼano” ʼe “fakamamahiʼi” nātou ʼi tonatou pilisoniʼi ʼo heʼegata, peʼe ko “te lua mate.”