“Kotou Tōkakaga”

“Ko te fakaʼosi ʼo te ʼu meʼa fuli kua ovi mai. . . . Kotou tōkakaga ʼo faikole.”—1 PET. 4:7.

 1. Neʼe koteā ia te kupu tāfito ʼo te faiakonaki ʼa Sesu?

 ʼI TE kei maʼuli ʼa Sesu Kilisito ʼi te kele, ko te kupu tāfito ʼo tana faiakonaki neʼe ko te Puleʼaga ʼo te ʼAtua. ʼAki ia te Puleʼaga ʼaia, ʼe fakalakatonuʼi anai e Sehova ia tona pule faʼitaliha ʼi te ʼatulaulau pea mo fakatapuhā ia tona huafa. Koia neʼe akoʼi ai e Sesu ia tana ʼu tisipulo ke natou faikole fēnei ki te ʼAtua: “Ke hoko mai tou puleʼaga. Ke fai tou finegalo ʼi te kele, ohagē ko selō.” (Mat. 4:17; 6:9, 10) Ko te Puleʼaga ʼaia kua vave pē tana fakaʼauha ia te mālama ʼa Satana pea mo tokaga ki te fakahoko ʼo te finegalo ʼo te ʼAtua ʼi te kele kātoa. Ohagē ko tona fakakikite e Taniela, ko te Puleʼaga ʼo te ʼAtua “ ʼe ina laliki anai pea mo fakagata anai te ʼu puleʼaga fuli ʼaia [ʼo totatou temi], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.”—Tan. 2:44.

 2. (a) ʼE ʼiloʼi feafeaʼi anai e te ʼu tisipulo ʼa Sesu ia tana ʼi henī ʼi tona Puleʼaga mālohi? (b) Koteā ʼaē ʼe toe fakahā anai ʼaki te fakaʼiloga?

² Mai tona ʼaluʼaga ʼaē neʼe maʼuhiga ʼaupitō maʼa te ʼu tisipulo ʼa Sesu ia te hoko mai ʼo te Puleʼaga ʼo te ʼAtua, koia neʼe natou fehuʼi fēnei age kiā ia: “Koteā anai te fakaʼiloga ʼo tau ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī?” (Mat. 24:3) ʼE ʼi ai anai ia te fakaʼiloga ʼe lava sisio kiai ia te hahaʼi, ʼuhi heʼe ko te ʼi henī ʼa Kilisito ʼi tona Puleʼaga mālohi ʼe fakapulipuli anai ki te hahaʼi ʼi te kele. Ko te fakaʼiloga ʼaia ʼe ko ʼona ʼu agaaga kehekehe pea neʼe fakakikite ʼi te Tohi-Tapu. Koia, ko te ʼu tisipulo ʼa Sesu ʼaē kā māʼuʼuli ʼi te temi ʼaia, ʼe feala anai hanatou ʼiloʼi kua kamata ia tana pule ʼi selō. ʼE toe kamata ai mo te temi ʼaē ʼe fakahigoa ʼi te Tohi-Tapu, ko “te ʼu ʼaho fakamuli” ʼo te tuʼu agakovi ʼaenī ʼaē ʼe hoko nei ʼi te kele.—2 Tim. 3:1-5, 13; Mat. 24:7-14.

Kotou Tōkakaga ʼi Te ʼu ʼAho Fakamuli

 3. He koʼē ʼe ʼaoga anai ke tōkakaga ia te kau Kilisitiano?

³ Neʼe tohi fēnei e te ʼapositolo ko Petelo: “Ko te fakaʼosi ʼo te ʼu meʼa fuli kua ovi mai. Koia kotou aga fakapotopoto pea mo kotou tōkakaga ʼo faikole.” (1 Pet. 4:7) ʼE tonu anai ke tōkakaga ia te ʼu  tisipulo ʼa Sesu, ʼo natou lamalama ia te ʼu meʼa ʼaē ʼe hoko ʼi te mālamanei heʼe ʼiloga ai ia tana kua ʼi henī ʼi tona Puleʼaga mālohi. Pea ko tanatou tōkakaga ʼaia, ʼe tuputupu anai ʼi te ovi mai ʼo te fakaʼosi ʼo te tuʼu agakovi ʼaenī. Neʼe ʼui fēnei e Sesu ki tana ʼu tisipulo: “Ke kotou nonofo fakaonoono, heʼe mole kotou ʼiloʼi pe ko te temi fea ʼaē kā haʼu ai te pule ʼo te ʼapi [moʼo fakahoko ia te fakamāu ki te mālama ʼa Satana].”—Mko. 13:35, 36.

 4. Kotou fakatatau ia te aga ʼa te hahaʼi ʼaē ʼe kau ki te mālama ʼa Satana pea mo te aga ʼaē ʼa te ʼu kaugana ʼa Sehova. (Vakaʼi mo te fakamatala ʼaē ʼe ʼātakai.)

⁴ Ko te teitei mālama kātoa ʼaē ʼe puleʼi e Satana, pea ko te hahaʼi ʼe mole natou nonofo fakaonoono ki te fakaʼuhiga ʼo te ʼu meʼa ʼaē ʼe hoko ʼi te mālamanei. ʼE mole natou tokagaʼi ia te ʼi henī ʼa Kilisito ʼi tona Puleʼaga mālohi. Kae ko te kau tisipulo moʼoni ʼa Kilisito ʼe natou tōkakaga pea mo mahino kiā nātou ia te fakaʼuhiga moʼoni ʼo te ʼu meʼa ʼaē neʼe hoko ʼi te sēkulō ʼaenī kua hili. Talu mai ia te taʼu 1925, neʼe mahino ki te kau Fakamoʼoni ʼa Sehova ko te ʼUluaki Tau Fakamālamanei pea mo te ʼu meʼa ʼaē neʼe hoko ki muli age, ko te fakamoʼoni ʼaia neʼe kamata ʼi te taʼu 1914 ia te ʼi henī ʼa Kilisito ʼi tona Puleʼaga mālohi ʼi selō. Koia, kua kamata ia te ʼu ʼaho fakamuli ʼo te tuʼu agakovi ʼaenī ʼaē ʼe puleʼi e Satana. Tokolahi ia te hahaʼi ʼaē ʼe natou mamata ki te ʼu meʼa ʼaia ʼe hoko, ʼe mole natou ʼiloʼi tona fakaʼuhiga, kae ʼe natou fakamoʼoni ki te kua kehekehe ʼaupitō ʼo te temi ʼaē ʼi muʼa ʼo te ʼUluaki Tau Fakamālamanei pea mo te temi talu mai ai.—Vakaʼi ia te fakamatala ʼaē ʼe ʼātakai “Neʼe Kamata Te Temi Maveuveu.”

 5. He koʼē ʼe maʼuhiga ke tou haga tōkakaga?

⁵ ʼI te ʼu teitei taʼu e teau ʼaenī kua hili, ko te ʼu meʼa fakalialia ʼaē ʼe hoko ʼi te mālamanei kātoa ʼe fakamoʼoni ʼaki kua tou māʼuʼuli nei ʼi te ʼu ʼaho fakamuli. Kei toe ia te kiʼi temi nounou ʼi muʼa ʼo te fakatotonu e Sehova kiā Kilisito ke ina takitaki ia te ʼu kautau ʼāselo mālolohi moʼo tauʼi ia te mālama ʼa Satana. (Fakh. 19:11-21) ʼE fakatotonu ki te kau Kilisitiano moʼoni ke natou haga nonofo fakaonoono. Koia ʼe maʼuhiga ke tou haga fai fēia ʼi tatatou fakatalitali ki te fakaʼosi ʼo te tuʼu ʼaenī. (Mat. 24:42) ʼE tonu ke tou nonofo fakaonoono, pea ʼi te takitaki ʼa Kilisito, ʼe tonu ke tou fakahoko ia te gāue ʼi te kele kātoa.

 Ko He Gāue ʼi Te Kele Kātoa

6, 7. Neʼe tuputupu feafeaʼi ia te gāue fakamafola ʼo te Puleʼaga ʼi te ʼu ʼaho fakamuli?

⁶ Ko te gāue ʼaē ʼe tonu ke fai e te ʼu kaugana ʼa Sehova neʼe fakakikite ohagē ko he koga ʼo te fakaʼiloga ʼaē kā fakahā ai kua tou māʼuʼuli nei ʼi te ʼu ʼaho fakamuli ʼo te tuʼu agakovi ʼaenī. Neʼe fakamatala e Sesu ia te gāue ʼaia ʼi te kele kātoa ʼi tana talanoa ki te ʼu meʼa kehekehe ʼaē kā hoko anai ʼi te temi fakaʼosi. Neʼe kau ki tana lea fakapolofetā ia te ʼu palalau maʼuhiga ʼaenī: “Ko te logo lelei ʼaenī ʼo te puleʼaga ʼe fakamafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.”—Mat. 24:14.

⁷ Kotou fakakaukauʼi age muʼa he ʼu ʼaluʼaga ʼe fakaʼuhiga ki te faʼahi ʼaia ʼo te lea fakapolofetā ʼa Sesu. Ko te hahaʼi ʼaē ʼe natou fakamafola ia te logo lelei neʼe natou tokosiʼi ʼaupitō ʼi te kamata ʼo te ʼu ʼaho fakamuli ʼi te taʼu 1914. Kae ʼi te temi nei ko te hahaʼi ʼaia kua tuputupu ʼi hona ʼaluʼaga fakatalakitupua. Ko te toko 7 000 000 tupu kau Fakamoʼoni ʼa Sehova ʼe natou fai fakamafola ʼi te kele kātoa, pea natou fakatuʼutuʼu iā kōkelekāsio e 100 000 tupu. Ko te tahi hahaʼi e toko 10 000 000 neʼe natou fakatahi mo te kau Fakamoʼoni ʼa Sehova ʼi te taʼu 2008 ʼi te ʼAho Fakamanatu ʼo te mate ʼo Kilisito. Neʼe ko te tuputupu maʼuhiga ʼaia ʼo te hahaʼi ʼaē neʼe kau ki te ʼaho ʼaia, ʼo laka age iā nātou ʼaē neʼe kau ʼi te taʼu ʼaenī kua hili.

 8. He koʼē ʼe mole tāʼofi e te fakafeagai ia te fua lelei ʼaē ʼo tatatou fai fakamafola?

⁸ ʼE ko he fakamoʼoni lahi neʼe fai ʼo ʼuhiga mo te Puleʼaga ʼo te ʼAtua ki te ʼu fenua fuli pē ʼi muʼa ʼo te hoko mai ʼo te fakaʼosi ʼo te tuʼu ʼaenī! ʼE hoko ia te gāue ʼaia logolā ko Satana ʼe ko “te ʼatua ʼo te tuʼu ʼo te ʼu faʼahiga meʼa ʼaenī.” (2 Ko. 4:4) ʼE ina fakaneke ia te ʼu faʼahi fakapolitike, fakalotu pea mo faifakatau fuli ʼo te mālamanei, ʼo fēia ki te ʼu meʼa ʼaē ʼe natou tala logo. Koia koteā te tupuʼaga ʼo te fua lelei fakaofoofo ʼaia ʼo te gāue fai fakamafola? Heʼe tokoni kiai ia Sehova. Koia ʼe hoko atu pē ia te gāue fai fakamafola ʼo te Puleʼaga ʼi hona ʼaluʼaga fakatalakitupua, logolā ia te ʼu faiga ʼaē ʼa Satana ke ina tāʼofi.

 9. He koʼē ʼe feala ke tou ʼui ko tatatou tuputupu fakalaumālie ʼe ko he milakulo?

⁹ Ko te fua lelei ʼo te gāue fai fakamafola ʼo te Puleʼaga pea mo te tuputupu fakalaumālie ʼa te hahaʼi ʼa Sehova ʼe feala ke ʼui ʼe ko he milakulo. Kapau mole tokoni te ʼAtua, ʼaki tana takitaki pea  mo tana puipui ia tana hahaʼi, pea ʼe mole feala anai ke fakahoko ia te gāue fai fakamafola. (Lau ia Mateo 19:26.) ʼE feala hatatou tui papau, ʼaki te gāue ʼaē ʼo te laumālie māʼoniʼoni ʼo te ʼAtua ki te loto ʼo te hahaʼi ʼaē ʼe tōkakaga mo fia tauhi ki ai, ko te gāue fai fakamafola ʼaia ʼe fakahoko anai ʼo kaku ki hona fakaʼosi ʼe fua lelei, “pea hoko mai ai leva te fakaʼosi.” ʼE fakaovi fakavilivili mai ia te temi ʼaia.

“Te Mamahi Lahi”

10. Neʼe fakamatala feafeaʼi e Sesu ia te hoko mai ʼo te mamahi lahi?

¹⁰ Ko te fakaʼosi ʼo te tuʼu agakovi ʼaenī ʼe hoko mai anai ʼaki “te mamahi lahi.” (Fakh. 7:14) ʼE mole ʼui mai ʼi te Tohi-Tapu tona loaloaga, kae neʼe ʼui fēnei e Sesu: “[ʼE] ʼi ai anai te mamahi lahi, ʼe mole hona tatau kua hoko talu mai te kamataʼaga ʼo te mālamanei ʼo kaku mai ki te temi nei, kailoa, pea ʼe mole toe hoko anai he tahi mamahi fēia.” (Mat. 24:21) Kā tou tokagaʼi ia te ʼu mamahi ʼaē kua ʼosi hoko ʼi te mālamanei, ohagē ko ʼaē neʼe hoko ʼi te Lua Tau Fakamālamanei, neʼe ʼui ko te toko 50 ki te 60 miliona hahaʼi neʼe mamate, pea ʼe toe kovi age anai ia te mamahi lahi ʼaē kā ʼamanaki hoko mai. ʼE iku anai ia ki te tau ʼaē ko Halamaketone. Ko te temi ʼaia ʼaē kā tuku mai ai anai e Sehova ia tana ʼu kautau mālohi ke natou fakaʼauha ia te ʼu faʼahi fuli pē ʼo te tuʼu ʼa Satana ʼi te kele.—Fakh. 16:14, 16.

11, 12. Koteā te ʼu meʼa kā hoko ʼe ko he fakaʼiloga ʼaia ʼo te kamataʼaga ʼo te mamahi lahi?

¹¹ ʼE mole fakahā ʼi te lea fakapolofetā ʼi te Tohi-Tapu, ia te ʼaho kā kamata ai ia te ʼuluaki koga ʼo te mamahi lahi, kae ʼe ina fakahā mai pē ia te meʼa fakatalakitupua ʼaē kā fakaʼiloga ai anai tona kamataʼaga. Ko te meʼa ʼaia kā hoko, ʼe ko te fakaʼauha e te ʼu mālohi fakapolitike ia te ʼu lotu hala fuli pē. ʼI te ʼu lea fakapolofetā ʼo te Tohi-Tapu ʼaē iā Fakahā ʼi te ʼu kāpite 17 pea mo te 18, ʼe fakatatau ia te ʼu lotu hala ki he fafine paomutu ʼe ina fai he ʼu felāveʼi fakasino heʼeʼaoga mo te ʼu tuʼu fakapolitike ʼo te kele. Iā Fakahā 17:16, ʼe ʼui ai kua ovi mai ia te temi ʼaē ko te ʼu faʼahi fakapolitike ʼe natou “fehihiʼa anai ki te fafine paomutu pea ʼe natou fakaʼauha pea mo fakatelefua anai, ʼo natou kai anai tona kakano pea mo natou tutu kātoa anai ia ia ʼi te afi.”

¹² Kā hoko mai anai ia te temi ʼaia, ko te ʼAtua “[ʼe] ina ʼai [anai] . . . ki tonatou loto [ʼa te kau takitaki politike], ke natou fakahoko tana manatu” ke fakaʼauha ia te ʼu lotu hala fuli. (Fakh. 17:17) Koia ʼe feala ai ke tou ʼui, ko te fakaʼauha ʼaia ʼe haʼu ia mai te ʼAtua. Ko tana fakamāu ʼaia ki te ʼu lotu mālualoi ʼaē kua fualoa ia tanatou akoʼi ia te ʼu akonaki ʼe fakafeagai ki te finegalo ʼo te ʼAtua pea mo natou fakatagaʼi ia tana ʼu kaugana. Ko te hahaʼi tokolahi ʼe mole natou ʼamanaki ki te fakaʼauha ʼaia ʼo te ʼu lotu hala. Kae kua nofo teuteu pē ia te ʼu kaugana agatonu ʼa Sehova ki te faʼahi ʼaia. Pea ʼi te ʼu ʼaho fakamuli ʼaenī, ʼe natou tala ki te hahaʼi ia te faʼahi ʼaia.

13. Koteā ʼaē ʼe ina fakahā ko te fakaʼosi ʼo te ʼu lotu hala ʼe hoko fakavilivili anai?

¹³ ʼE punamaʼuli ʼaupitō anai ia te hahaʼi ʼi tanatou sisio ki te fakaʼauha ʼo te ʼu lotu hala. ʼE fakahā ʼi te lea fakapolofetā, māʼiapē lā mo ʼihi ʼi “te ʼu hau ʼo te kele” ʼe natou tala anai ʼo ʼuhiga mo te fakaʼauha ʼaia: “ ʼI meʼa fakaʼofaʼofa, ʼi meʼa fakaʼofaʼofa, . . . heʼe kua hoko mai tou fakamāu ʼi te hola e tahi!” (Fakh. 18:9, 10, 16, 19) Ko te fakaʼaogaʼi ʼi te Tohi-Tapu ʼo te ʼu kupu “hola e tahi” ʼe fakahā ai ko te fakaʼauha ʼaia ʼe hoko fakavilivili anai.

14. Kā ʼohofiʼi leva e te ʼu fili ʼa Sehova ia tana ʼu kaugana, ʼe feafeaʼi anai ia te tali ʼa te ʼAtua kiai?

¹⁴ Kua tou mahino, ʼi te kua ʼosi fakaʼauha ʼo te ʼu lotu hala, ʼe ʼohofiʼi anai ia te ʼu kaugana ʼa Sehova, ʼaē ʼe natou tala ia tana ʼu logo fakamāu. (Esk. 38:14-16) Kā kamata ia te ʼohofi ʼaia, pea ko te kau fakafeagai ʼaia ʼe natou tauʼi anai ia Sehova,  ʼaē ʼe ina fakapapau ʼe ina puipui anai tana hahaʼi agatonu. ʼE ʼui fēnei e Sehova: “ ʼI te kakaha ʼo toku loto, ʼi te kakaha ʼo toku hauhau, ʼe tonu anai ke au palalau. . . . Pea ʼe tonu anai ke natou ʼiloʼi ko au ia Sehova.” (Lau ia Esekiele 38:18-23.) ʼE ʼui fēnei e te ʼAtua ʼi tana Folafola: “Ko ʼaē ʼe ala kiā koutou [tana ʼu kaugana agatonu] ʼe ala ia ki toku kanoʼi mata.” (Sakl. 2:8) Koia kā kamata ʼohofiʼi e te ʼu fili ʼaia ia tana ʼu kaugana fuli, pea ʼe fai anai e Sehova ia hana tali kiai. ʼE kamata gāue anai, ʼo iku ai anai ki te koga fakaʼosi ʼo te mamahi lahi—ia Halamaketone. ʼI te takitaki ʼa Kilisito, ʼe fakahoko anai e te ʼu kautau ʼāselo mālolohi ia te ʼu fakamāu ʼa Sehova ki te mālama ʼa Satana.

ʼE Malave Feafeaʼi Kiā Tātou?

15. ʼE tonu ke malave feafeaʼi kiā tātou ia tatatou ʼiloʼi ʼaē kua ovi mai ia te fakaʼosi ʼo te tuʼu ʼaenī?

¹⁵ ʼE tonu ke malave feafeaʼi kiā tātou ia tatatou ʼiloʼi ʼaē kua vave hoko mai ia te fakaʼosi ʼo te tuʼu agakovi ʼaenī? Neʼe tohi fēnei e te ʼapositolo ko Petelo: “Mai tona ʼuhiga ʼaē ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te aga fakamāʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua.” (2 Pet. 3:11) ʼE fakahā lelei e te ʼu palalau ʼaia ia te ʼaoga ʼaē ke tou haga nonofo fakaonoono, ke ʼalutahi ia tatatou aga mo te ʼu fakamaʼua ʼa te ʼAtua pea ke tou fai ʼi totatou maʼuli ia te ʼu gāue ʼaē ʼe hā ai ia tatatou pipiki ki te ʼAtua pea mo tatatou ʼofa kiā Sehova. ʼE kau ki te ʼu gāue ʼaia ia tatatou faiga lahi ʼaē ʼi te fakamafola ʼo te logo lelei ʼo te Puleʼaga ʼi muʼa ʼo te hoko mai ʼo te fakaʼosi. Neʼe toe tohi fēnei e Petelo: “Ko te fakaʼosi ʼo te ʼu meʼa fuli kua ovi mai. . . . Kotou tōkakaga ʼo faikole.” (1 Pet. 4:7) ʼE tou fakaovi kiā Sehova pea mo fakahā ia totatou ʼofa ʼaē kiā te ia ʼi tatatou faikole tuʼumaʼu kiā te ia, ʼo tou kole ke ina takitaki tātou ʼaki tona laumālie māʼoniʼoni pea mo tana kōkelekāsio fakamālamanei.

16. He koʼē ʼe ʼaoga ke tou mulimuli fakalelei ki te tokoni ʼa te ʼAtua?

¹⁶ ʼI te ʼu temi fakamataku ʼaenī, ʼe tonu ke tou mulimuli fakalelei ki te tokoni ʼaenī ʼa te Folafola ʼa te ʼAtua: “Ke kotou tōkakaga fakalelei ki takotou faʼahiga haʼele: ke ʼaua naʼa hagē ko he kau vavale, kae ke hagē ko ni kau popoto, ʼo kotou totogi maʼa koutou te temi faigamālie, koteʼuhi ʼe kovi te ʼu ʼaho.” (Efe. 5:15, 16) Kua lahi age ia te agakovi iā ʼaho nei ʼi te temi muʼa. Neʼe fakatupu e Satana ia te ʼu tuʼuga meʼa moʼo tāʼofi ia te hahaʼi ke mole natou fai ia te finegalo ʼo Sehova peʼe moʼo fakaleluʼi nātou. Mai tona ʼaluʼaga ʼaē ko tātou ko te ʼu kaugana ʼa te ʼAtua, ʼe tou ʼiloʼi ia te faʼahi ʼaia, pea ʼe mole tou loto ke tou tuku ia he meʼa pē ke ina fakasiʼisiʼi ia tatatou nonofo agatonu ʼaē ki te ʼAtua. ʼE tou toe ʼiloʼi pe koteā ʼaē kā vave hoko mai, pea ʼe tou falala kiā Sehova pea mo tana ʼu fakatuʼutuʼu.—Lau ia 1 Soane 2:15-17.

17. Kotou fakamatala pe feafeaʼi anai ia nātou ʼaē kā hao ʼi Halamaketone mokā hoko anai ia te fakatuʼuake.

¹⁷ ʼE hoko anai ia te fakapapau fakatalakitupua ʼaē neʼe fai e te ʼAtua ke ina fakatuʼuake ia te kau mate, heʼe “ ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gāue 24:15) Kotou tokagaʼi ia te hoko moʼoni ʼo te fakapapau ʼaia, heʼe ʼui fēnei: “ ʼE ʼi ai anai he fakatuʼuake”! ʼE hoko moʼoni anai, heʼe ko te fakapapau ʼaia neʼe fai e Sehova! ʼE fakapapau fēnei iā Isaia 26:19: “ ʼE māʼuʼuli anai tau kau mate. . . . Kotou ʼaʼala pea mo kalaga fakafiafia, ia koutou ʼe nonofo ʼi te efu! . . . ʼE tō anai [peʼe fānauʼi anai] mai te kele, māʼia mo nātou ʼaē ʼe mole natou mālolohi ʼi te mate.” Neʼe ʼuluaki hoko ia te ʼu palalau ʼaia ʼi te toe liliu ʼa te hahaʼi ʼa te ʼAtua ʼi te temi muʼa ki tonatou fenua, ʼo foaki mai ai he falala ki tona hoko moʼoni anai ʼi te mālama foʼou. ʼI toe fiafia lahi mokā fakatahiʼi anai ia nātou ʼaē kā fakatuʼuake pea mo te hahaʼi ʼaē ʼe ʼoʼofa kiā nātou! ʼEī, kua ovi mai ia te fakaʼosi ʼo te mālama ʼa Satana, pea kua vave fakatuʼu ia te mālama foʼou ʼa te ʼAtua. Koia ʼe maʼuhiga ai ke tou nonofo tōkakaga!

Kei Kotou Manatuʼi Koa?

• Neʼe koteā ia te kupu tāfito ʼo te faiakonaki ʼa Sesu?

• Kua feafeaʼi iā ʼaho nei ia te tuputupu ʼo te gāue fai fakamafola ʼo te Puleʼaga?

• He koʼē ʼe maʼuhiga ke tou tōkakaga?

• Kiā koutou, koteā te fakalotomālohi ʼe kotou maʼu ʼi te fakapapau ʼaē iā Gāue 24:15?

[ʼU fehuʼi ʼo te ako]

[Talanoa ʼo te pasina 16]

Neʼe Kamata Te Temi Maveuveu

Ko te tohi ʼa Alan Greenspan ʼo te taʼu 2007, neʼe ko tona kupu tāfito: The Age of Turbulence: Adventures in a New World (Te Temi Maveuveu: Ko Te ʼu Meʼa ʼAē ʼe Hoko ʼi Te Mālama Foʼou). Iā teitei taʼu e 20, ko te tagata ʼaia neʼe pelesitā ʼi te Réserve fédérale ʼo Amelika, ʼaē ʼe leʼoleʼo ki te gāue kātoa ʼo te fale paʼaga tāfito ʼo te puleʼaga. ʼE fakahā lelei ʼe Greenspan ia te kehekehe ʼaupitō ʼo te ʼaluʼaga ʼo te mālamanei ʼi muʼa ʼo te taʼu 1914 pea mo te ʼu meʼa ʼaē neʼe hoko ki muli age:

“ ʼAki te ʼu fakamatala fuli ʼaē neʼe fai, ko te mālama ʼi muʼa ʼo te taʼu 1914 neʼe hagē ia neʼe tonu ke hikihiki age ia te fefakaʼapaʼapaʼaki ʼa te hahaʼi pea mo fai ia te ʼu fakatuʼutuʼu ʼi te ʼu fenua ke lelei age ia te maʼuli; pea neʼe hagē ʼi te ʼu gāue ʼaē neʼe fai e te tagata, ʼe mole ʼi ai anai he faʼahi ʼe kovi. ʼI te hogofulu-mā-hiva sēkulō neʼe fakagata ai ia te fakatau fakavale ʼa te hahaʼi ʼaē neʼe fakakauganaʼi. Neʼe hagē kua fakahaʼuhaʼu ʼo puli ia te ʼu agamālohi fakamataku. . . . Neʼe haʼele ki muʼa ia te ʼu meʼa ʼaē neʼe faʼu e te tagata ʼi te hogofulu-mā-hiva sēkulō, he neʼe faʼu ai ia te ʼu ala ki te ʼu sāliote afi, fai mo te telefoni, te hila, te sēnimā, te motokā, pea mo te ʼu naunau kehekehe ʼo he loto fale ʼaē ʼe lahi fau anai ia tona ʼu meʼa ʼaē ke tou talanoa kiai. Ko te poto ʼo te tagata ʼi te faʼahi fakatōketā, mo te kua lelei age ʼo te meʼa kai, pea mo te tufa lahi ʼo te vai lelei neʼe hikihiki ʼaupitō ai ia te maʼuli ʼo te hahaʼi. . . . ʼI te manatu ʼa te hahaʼi fuli, ʼe hoko atu pē anai ia te ʼu gāue lelei ʼaia.”

Kae . . . “ ʼi te ʼUluaki Tau Fakamālamanei, ko te maumau ʼaē neʼe hoko ki te fefakaʼapaʼapaʼaki ʼa te hahaʼi pea mo te fai ia te ʼu fakatuʼutuʼu ʼi te ʼu fenua ke lelei age ia te maʼuli, neʼe kovi age ia ʼi te ʼu mamahi fakasino ʼaē neʼe lahi age ʼi te Lua Tau Fakamālamanei: heʼe ko te ʼuluaki tau neʼe ina maumauʼi ia te fakatuʼutuʼu ʼaē neʼe maʼu e te hahaʼi fuli ʼo te temi ʼaia. ʼE mole feala haku pulihi ia te manatu ʼa nātou ʼaē neʼe māʼuʼuli ʼi muʼa atu ʼo te ʼUluaki Tau Fakamālamanei, ia te temi ʼaia ʼaē neʼe hagē ai ia te kā haʼu ʼo te mālamanei ʼe lelei age anai tana ʼu gāue pea mo tana ʼu fakatuʼutuʼu. Iā ʼaho nei, ʼe mole kei tatau ia tatatou manatu mo te manatu ʼa te hahaʼi ʼo te sēkulō ʼaenī kua hili, kae ʼe lagi ʼalutahi ia tatatou manatu ʼo te temi ʼaenī pea mo te ʼu meʼa ʼaē ʼe hoko moʼoni. ʼAki te mataku, mo te kua māfana age ʼo te kele, peʼe ko te meo ʼa te hahaʼi, ʼe liliu anai koa ia te temi ʼaenī ʼaē kua hikihiki ai ia te maʼuli ʼo te hahaʼi fuli ohagē ko te meʼa ʼaē neʼe hoko ʼi te temi muʼa ʼaki te ʼUluaki Tau Fakamālamanei? ʼE mole he tahi ʼe feala ke ina maʼu ia he tali kiai.”

Neʼe manatuʼi e Greenspan ʼi te temi ʼaē neʼe kei ako ai ʼi te univelesitē, neʼe fai e te Polofesea ʼo te Ekonomika ko Benjamin M. Anderson (1886-1949) ia te ʼu palalau ʼaenī: “Ko nātou ʼaē kua mātutuʼa ʼaē ʼe natou manatuʼi pea mo mahino pe neʼe feafeaʼi ia te mālamanei ʼi muʼa ʼo te ʼUluaki Tau Fakamālamanei, ʼe natou manatuʼi ia te temi ʼaia ʼaki ia he fakaʼamu. Neʼe maʼu ʼi te temi ʼaia ia he faʼahiga maʼuli fīmālie neʼe mole heʼeki maʼu talu mai te temi ʼaia.”—Economics and the Public Welfare.

ʼE toe maʼu ia te manatu ʼaia ʼi te tohi neʼe fai e G. J. Meyer ʼi te taʼu 2006 (A World Undone). ʼE tou lau fēnei ai: “Neʼe tautau ʼui, ko te ʼu meʼa ʼaē ʼe hoko ʼi te hisitolia ʼe natou ‘fetogi ia meʼa fuli pē.’ Neʼe moʼoni ia te ʼu palalau ʼaia ʼo ʼuhiga mo te Tau Lahi [1914-1918]. Ko te tau ʼaia neʼe ina fetogi moʼoni ia meʼa fuli pē: neʼe mole fetogi pē ia te ʼu tuʼakoi ʼo te ʼu fenua, mo te ʼu puleʼaga, pea mo te ʼu meʼa ʼaē neʼe hoko ki te ʼu fenua, kae talu mai ai neʼe ina fetogi mo te faʼahiga sio ʼa te hahaʼi ki te mālamanei pea mo tanatou faʼahiga sio ʼaē kiā nātou totonu. ʼAki te temi, neʼe liliu ia te mālamanei ohagē ko he falemaka, ʼo mole kei tatau ia te mālamanei ʼi te hili ʼo te tau pea mo te ʼu meʼa fuli ʼaē ʼi muʼa atu.”

[Paki ʼo te pasina 18]

ʼI Halamaketone, ʼe tuku mai anai e Sehova ia tana ʼu kautau ʼāselo mālolohi