2 Kotou Maʼu Ia Te ʼAtamai Mālama Totonu ʼo ʼUhiga Mo Te ʼAtua

“Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi.”—Soane 17:3.

KOTEĀ TE FAKAFIFIHI? ʼE ʼui e ʼihi ʼe mole maʼuli ia he ʼAtua. ʼE tui ʼihi ko te ʼAtua ʼe ko he mālohi ʼe nofo ʼi te ʼu potu fuli pē. Ko nātou ʼaē ʼe natou tui ʼe ʼi ai te ʼAtua, ʼe natou akoʼi ia he ʼu akonaki ʼe mole ʼalutahi mo te ʼuhiga moʼoni ʼa te ʼAtua pea mo tona ʼu kalitātē.

ʼE KOTOU LAVA TAUʼI FEAFEAʼI TE FAKAFIFIHI ʼAIA? Ke kotou maʼu ia te ʼatamai mālama ʼo ʼuhiga mo te ʼAtua ʼe feala hakotou mamata ki te ʼu meʼa ʼaē neʼe ina fakatupu. Neʼe ʼui fēnei e te ʼapositolo ko Paulo: “Ko [te] ʼu kalitātē fakapulipuli [ʼo te ʼAtua] ʼe ʼiloga lelei ia talu mai te fakatupu ʼo te mālamanei, koteʼuhi ʼe mahino kiai ʼaki te ʼu meʼa ʼaē kua faʼu, ʼio, tona mālohi heʼegata pea mo tona ʼuhiga ʼAtua.” (Loma 1:20) Kapau ʼe kotou vakavakaʼi fakalelei ia te ʼu meʼa ʼaē neʼe fakatupu, ʼe kotou ako  lahi ai ʼo ʼuhiga mo te poto pea mo te mālohi ʼo totatou Tupuʼaga.—Pesalemo 104:24; Isaia 40:26.

Kae, ke maʼu e te hahaʼi takitokotahi ia te ʼatamai mālama totonu ʼo te ʼulugaaga ʼo te ʼAtua, ʼe tonu ke natou ʼavahi te Folafola ʼa te ʼAtua, ia te Tohi-Tapu, pea mo natou vakavakaʼi takitokotahi. ʼAua naʼa kotou tuku ke kotou mulimuli ki te ʼu manatu ʼa ʼihi. Kae kotou mulimuli ki te tokoni ʼaenī ʼa te Tohi-Tapu: “Kotou fakagata takotou muliʼi te tuʼu ʼo te ʼu faʼahiga meʼa ʼaenī, kae ke kotou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:2) Ohagē lā, kotou tokagaʼi ia te ʼu moʼoni ʼaenī ʼo ʼuhiga mo te ʼAtua ʼe fakahā ʼi te Tohi-Tapu.

ʼE ʼi ai te huafa ʼo te ʼAtua. ʼI te kamataʼaga, ko te huafa ʼo te ʼAtua neʼe hā tuʼa lauʼi afe ʼi te Tohi-Tapu kātoa. ʼE lahi te ʼu fakaliliu ʼo te Tohi-Tapu ʼe natou tohi ia te huafa ʼaia iā Pesalemo 83:18, ʼaē ʼe ʼui fēnei: “Ke natou ʼiloʼi ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.”

ʼE malave ki te loto ʼo Sehova ʼAtua ia te ʼu aga ʼaē ʼe fai e te tagata. Hili te fakaʼāteaina e Sehova ia te hahaʼi ʼo Iselaele mai tonatou maʼuli pōpula ʼi Esipito, neʼe natou tautau lītuʼa ki tana tokoni poto. ʼI tanatou agatuʼu ʼaia neʼe “lotomamahi ai.” Ko tanatou aga neʼe ina “fakalotomamahi ia te Māʼoniʼoni ʼo Iselaele.”—Pesalemo 78:40, 41.

ʼE tokaga ia Sehova kiā tātou takitokotahi. ʼI tana palalau ki tana kau tisipulo, neʼe ʼui fēnei e Sesu: “ ʼE mole koa lā fakatau he ʼu pasele e lua ki he foʼi piesi paʼaga e tahi ʼe mole faʼa maʼuhiga? Kae mole he tahi iā nātou ʼe tō ki te kele kā mole ʼiloʼi e takotou Tamai. Kae māʼia mo te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau. Koia, ʼaua naʼa kotou manavasiʼi: ʼE kotou maʼuhiga lahi ake koutou ʼi he tuʼuga pasele.”—Mateo 10:29-31.

ʼE mole fakapalatahi te ʼAtua. Neʼe ʼui e te ʼapositolo ko Paulo ki te kau Keleka ʼi Atena, ko te ʼAtua “ ʼaki te tagata e tahi neʼe ina fakatupu ʼaki te ʼu puleʼaga tagata fuli pē ke nonofo ʼi te fuga kele kātoa.” Neʼe ina toe ʼui ko te ʼAtua “ ʼe mole mamaʼo ia iā tātou takitokotahi.” (Gāue 17:26, 27) Neʼe ʼui fēnei e te ʼapositolo ko Petelo: “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gāue 10:34, 35.

KOTEĀ TE ʼU LELEI ʼE MAʼU? Ko ʼihi ʼe natou “tauhi fakamālotoloto ki te ʼAtua, kae mole natou fai ʼaki te ʼatamai mālama totonu.” (Loma 10:2) Kapau ʼe kotou ʼiloʼi pe koteā ʼaē ʼe akoʼi moʼoni mai ʼi te Tohi-Tapu ʼo ʼuhiga mo te ʼAtua, ʼe mole kākāʼi anai koutou pea ʼe feala anai hakotou “fakaovi ki te ʼAtua.”—Sake 4:8.

Kapau ʼe kotou fia maʼu he tahi ʼu fakamahino, vakaʼi ia te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼi te kāpite 1, ko tona kupu tāfito: “Koteā Te Moʼoni ʼo ʼUhiga Mo Te ʼAtua?” a

[Nota]

[Paki ʼo te pasina 6]

Ke kotou maʼu ia te ʼatamai mālama ʼo ʼuhiga mo te ʼAtua ʼe feala hakotou mamata ki te ʼu meʼa ʼaē neʼe ina fakatupu