Kotou Fakaovi Ki Te ʼAtua

ʼE Ina Tokagaʼi Totatou ʼu Tuʼakoi

Levitike 5:2-11

“NEʼE au faiga moʼoni, kae neʼe hagē aipē ia neʼe mole au feʼaugaʼia.” Ko te ʼui ʼaia e te fafine ʼo ʼuhiga mo tana ʼu faiga ʼaē ke ina fakafiafiaʼi te ʼAtua. ʼE tali leleiʼi koa e Sehova ʼAtua ia te ʼu faiga mālohi ʼa tana kau ʼatolasio? ʼE ina tokagaʼi koa ia tonatou ʼu fealagia pea mo tonatou ʼu ʼaluʼaga ʼaē ʼe feala ke fakatuʼakoi ai ia te meʼa ʼaē ʼe natou lava fai? Moʼo tali ki te ʼu fehuʼi ʼaia, ʼe ʼaoga anai ke tokagaʼi ia te meʼa ʼaē ʼe ʼui ʼi te Lao ʼa Moisese ʼo ʼuhiga mo ʼihi mōlaga, ʼaē ʼe tou maʼu iā Levitike 5:2-11.

ʼI te Lao, neʼe fakamaʼua e te ʼAtua ia te ʼu sākilifisio kehekehe moʼo fakamolemole ia te ʼu agahala. ʼI te ʼu ʼaluʼaga ʼaē ʼe talanoa kiai ia Levitike 5:2-11, ko he tahi neʼe agahala kae neʼe mole fakatuʼutuʼu kiai pe neʼe mole fakakaukau kiai. (Vaega 2-4) ʼI te temi leva ʼaē neʼe mahino ai ki tana agahala, neʼe tonu ke ina fakahā tana agahala pea mo ina foaki ia te sākilifisio ʼo te lakahala—“he ʼakeno fafine peʼe ko he tao fafine mui.” (Vaega 5, 6) Kae ʼe feafeaʼi anai mo kapau ʼe masiva pea ʼe mole ʼi ai hana ʼakeno peʼe ko hana tao ke ina foaki? Neʼe fakamaʼua koa e te Lao ke ina toʼo maʼua ia te taʼi manu ʼaia, ʼo liu tuʼu maʼua ai? Neʼe tonu koa ke gāue ʼo kaku pē ki te feala ʼo hana foaki ia he meʼa, ʼo feala ai ke fakatuai ia te fakamolemole ʼo tana ʼu agahala?

ʼI te ʼiloga ʼo te loto tokaga fakalelei ʼa Sehova, neʼe ʼui fēnei ʼi te Lao: “Kae kapau ʼe mole ina lavaʼi ia he ʼakeno tagata, pea ʼe tonu anai ke ina ʼaumai kiā Sehova, ʼo ʼuhiga mo tana sākilifisio ʼo te lakahala ʼo ʼuhiga mo te agahala ʼaē neʼe ina fakahoko, ia he taluaʼi kulukulu peʼe ko he taluaʼi lupe kei mui.” (Vaega 7) Kapau ko he tagata Iselaele neʼe masiva ʼaupitō ʼo mole feala ke ina foaki ia he ʼakeno tagata, ʼi te temi leva ʼaia, neʼe tali fakafiafia aipē e te ʼAtua ia te meʼa ʼaē neʼe fealagia e ia ʼaē neʼe tonu ke ina foaki tana mōlaga—peʼe ko he taluaʼi kulukulu peʼe ko he taluaʼi lupe kei mui.

ʼE feafeaʼi age mo kapau ko he tahi ʼe mole feala pē lā hana foaki māʼiapē lā mo te ʼu manulele ʼaia e lua? Neʼe fakatotonu fēnei ʼi te Lao: “Pea ʼe tonu anai ke ina ʼaumai ia, ʼo ʼuhiga mo tona mōlaga ki te agahala ʼaē neʼe ina fakahoko, ia te vaega hogofulu efa falena [ko ʼipu e valu peʼe hiva] maʼa te sākilifisio ki te agahala.” (Vaega 11) Kiā ia ʼaē ʼe masiva ʼaupitō, neʼe filifili e Sehova ke ina fakafīmālie pea mo ina fakafealagia ke foaki ia he mōlaga ʼo ʼuhiga mo te agahala, ʼe mole ʼi ai he toto. a ʼI Iselaele, ko te maʼuli masiva ʼo he tahi neʼe mole ina tāʼofi ia te fakamolemole peʼe ko te fealagia ʼaē ke fakatokatoka mo te ʼAtua.

Koteā te ako ʼe tou lava tāʼofi ʼo ʼuhiga mo Sehova mai te lao ʼo ʼuhiga mo te sākilifisio ʼo te lakahala? ʼE manavaʼofa pea mo lotomahino ia te ʼAtua ʼo ina tokagaʼi ia te ʼu tuʼakoi ʼo tana kau ʼatolasio. (Pesalemo 103:14) ʼE ina loto ke tou fakaovi age kiā te ia pea mo maʼu ia he ʼu felōgoi lelei pea mo ia tatau aipē peʼe faigataʼa totatou ʼu ʼaluʼaga, ohagē ko te mātutuʼa, mo te mahamahaki, peʼe ko te ʼu maʼua fakafāmili peʼe ko ʼihi atu ʼu maʼua. ʼE tou lava maʼu ia te fīmālie ʼi tatatou ʼiloʼi ko Sehova ʼAtua ʼe fiafia mokā tou foaki ia meʼa fuli ʼe tou fealagia tona foaki.

[Nota]