Te ʼu Fehuʼi ʼa Te Kau Lautohi

Ko Te ʼu Faigataʼaʼia ʼo Te Maʼuli ʼe Ko He Tautea Koa Mai Te ʼAtua?

ʼE ʼi ai koa he ʼaluʼaga fakamataku neʼe hoko ʼi tokotou maʼuli, ʼo kotou feʼekeʼaki ai, pe neʼe mole ko te ʼAtua koa ʼaē neʼe ina fakamamahiʼi koutou? Ko he mahaki fakapunamaʼuli, mo he tuʼutāmaki fakamataku neʼe palalisia ai he koga ʼo tona sino, peʼe ko he mate fakafokifā ʼi te fāmili ʼe lagi tou manatu ai ʼe ko he tautea mai te ʼAtua.

ʼAua naʼa tou maʼu he ʼu manatu fēia, kae ʼe tonu ke tou lotofīmālie heʼe loto e te ʼAtua ke maʼuli fiafia ia te hahaʼi pea mo ʼāteaina mai te kovi. Neʼe tou sio ki te faʼahi ʼaia, ʼi te temi ʼaē neʼe fakatupu ai e te ʼAtua ia te ʼuluaki taumātuʼa, neʼe ina tuku nāua ki “te ʼōloto ʼo Eteni,” te palatiso, ʼaē ʼe mole maʼu ai anai he meʼa ʼe kovi.—Senesi 2:15.

Meʼa fakaʼofaʼofa foki, he neʼe filifili e te ʼuluaki taumātuʼa ke nā liʼaki ia tanā ʼamanaki fakaofoofo pea ke nā talagataʼa ki te ʼAtua. Ko te fua kovi ʼo tanā talagataʼa, neʼe mole gata pē iā nāua kae neʼe toe fua kovi ki tonā hōloga, ʼo kau ai mo tātou. Koteā tona tupuʼaga? Ko te ʼaluʼaga ʼaia ʼe feala ke fakatatau ki he ʼu fua kovi ʼo te mole huʼi fakalelei e te pule fāmili ia tona ʼapi—ʼe kapu anai ia tona fāmili kātoa mai tonatou ʼapi pea ʼe natou tau anai mo he ʼu fihifihia pea mo he ʼu mamahi. ʼO toe fēia mo te mālamanei, kua felāveʼi ia te hahaʼi mo te ʼu faigataʼaʼia talu mai te ʼuluaki talagataʼa. (Loma 5:12) Hili ni ʼu taʼu kiai, neʼe tagi ia te tagata faitotonu ko Sopo heʼe kapau ko tona lotomamahi pea mo tana mamahi neʼe feala ke “hili ki he meʼa fua,” ʼe “mamafa age ia ʼi te ʼone ʼo te tai.”—Sopo 6:2, 3.

Ko te tahi tupuʼaga ʼo te ʼu faigataʼaʼia heʼe mole kātoa ia tatatou fakasiosio poto. Ohagē lā, kotou fakakaukauʼi age muʼa, he tahi ʼe laga fale pea mo fakatau fale ʼi he ʼu koga meʼa ʼe hoko tuʼumaʼu aipē he ʼu manunu. ʼI takotou mole ʼiloʼi te ʼu ʼaluʼaga ʼaia, ʼe kotou toʼo anai hokotou ʼapi ʼi te ʼu ʼapi ʼaia pea mo kotou nonofo ai. Ko koutou totonu pea mo tokotou fāmili, ʼe mole kotou tau anai koa mo he fihifihia lahi? Ko te ʼu faigataʼaʼia fuli ʼaenī ʼe lolotoga hoko, ʼe feala koa ke ʼui ko he tautea mai te ʼAtua? ʼE tou maʼu ia te moʼoni ʼo ʼuhiga mo te ʼu faʼahi ʼaia, ʼi te Tohi-Tapu: “Ko ʼaē ʼe mole heʼeki fakapotopoto ʼe tui ki te ʼu palalau fuli, kae ko ʼaē ʼe fakasiosio poto ʼe tokaga ki tana haʼele.”—Tāʼaga Lea 14:15.

Kae ʼe tou lotofīmālie ʼi tatatou ʼiloʼi ʼaē, logolā ko tātou fuli ʼe tou tau mo te ʼu faigataʼaʼia, kae neʼe fakatuʼutuʼu e te ʼAtua kua vave pē anai ia tana fakaʼāteaina ia te hahaʼi mai te faʼahi ʼaia. Kā hoko mai anai ia te temi ʼaia, ʼe mole kotou toe tau anai mo te ʼu faigataʼaʼia pea mo toe sisio kiai, peʼe kotou logo kiai. Ko te lotomamahi, mo te mamahi, mo te mate, pea mo te putu, ʼe “puli” anai ia. (Fakahā 21:4) Ko te tahi meʼa ʼe fakalotofīmālie, ʼe ko te fakapapau ʼaē ʼe mole toe laga anai e te hahaʼi ni ʼu ʼapi pea mo tō ni ʼu fuʼu ʼakau kai ke maumauʼi e te tau peʼe ko te ʼu tuʼutāmaki fakanātulā. Ko te ʼu gāue ʼaē ʼe natou fai ʼaki ʼonatou nima, ʼe natou “fakaʼaogaʼi kātoa anai” maʼa nātou totonu.—Isaia 65:21-25.

Logolā ʼe kei kotou fakaʼatalitali nei ki te temi ʼaē kā haga ai te ʼAtua ʼo pulihi kātoa ia te ʼu faigataʼaʼia, kae koteā ʼaē ʼe kotou lava fai ʼi te temi nei ke mole lahi fau tokotou ʼu fihifihia? ʼUluaki pea mo maʼuhiga tāfito, ʼe fakatokaga tātou ʼi te Tohi-Tapu, ke “ ʼaua naʼa [tou] falala ki [totatou] ʼatamai totonu” kae ke tou “falala kiā Sehova ʼaki [totatou] loto kātoa.” (Tāʼaga Lea 3:5) Tou haga kiā te ia ke ina takitaki pea mo fakalotofīmālieʼi tātou. Tou tōkakaga ʼo fakaʼaogaʼi ia te poto ʼo te ʼAtua, ʼaē ʼe haʼu mai te Tohi-Tapu. ʼE tokoni atu anai kiā koutou, ke kotou fai ia he ʼu tonu ʼe fakapotopoto pea mo puipui ia koutou mai te ʼu faigataʼaʼia ʼaia ʼe kotou lava hola mai ai.—Tāʼaga Lea 22:3.