Tou Faʼifaʼitakiʼi Ia Sesu, ʼo Akoʼi Te Hahaʼi ʼAki Te ʼOfa

“ ʼE mole heʼeki ʼi ai he tahi age tagata kua palalau fēia.”—SOA. 7:46.

 1. Neʼe feafeaʼi te hahaʼi ʼi te faʼahiga faiakonaki ʼaē ʼa Sesu?

 KOTOU fakakaukauʼi age muʼa ki te fiafia ʼaē ʼe lagi kotou maʼu anai, mo kanapau lā neʼe kotou logo tonu ki te faiakonaki ʼa Sesu! ʼE fakahā mai ʼi te Tohi-Tapu ia te malave ʼo te aga ʼa Sesu ki te hahaʼi ʼaē neʼe felāveʼi mo ia. Ohagē lā, ko te tagata faitohi Evaselio ko Luka, neʼe ina fakamatala ko te hahaʼi ʼo te kolo ʼaē neʼe lahilahi ake ai Sesu, neʼe “natou ōfo ʼi te ʼu lea mālie ʼaē neʼe haʼu mai tona gutu.” ʼE ʼui e Mateo, ko nātou ʼaē neʼe fakalogo kiā Sesu ʼi tana faiakonaki ʼi te Akonaki ʼi te Moʼuga, ‘neʼe natou ōfo ʼi tana faʼahiga faiakonaki.’ Pea ʼui e Soane, ko te ʼu tagata ʼaē neʼe fekauʼi ke natou ʼolo ʼo puke ia Sesu, neʼe natou toe liliu ʼātea, ʼo natou ʼui fēnei: “ ʼE mole heʼeki ʼi ai he tahi age tagata kua palalau fēia.”—Luka 4:22; Mat. 7:28; Soa. 7:46.

 2. Neʼe feafeaʼi te faʼahiga faiakonaki ʼa Sesu?

² Neʼe mole faihala te ʼu tagata faifekau ʼaia. ʼE mahino papau ia, ko Sesu neʼe ko te Tagata Faiako lahi tokotahi ʼo te ʼu temi fuli. Ko tana faiakonaki neʼe tāsilo, mo mahino gafua pea neʼe mole feala hona fakafihiʼi. Neʼe poto ʼi te fakaʼaogaʼi ʼo te ʼu lea fakatātā pea mo te ʼu fehuʼi. Neʼe ina fakaʼalutahi ia tana ʼu faiakonaki mo te ʼu ʼaluʼaga ʼaē neʼe tau mo te hahaʼi ʼaē neʼe palalau ki ai, peʼe natou maʼu tuʼulaga peʼe kailoa. Neʼe ina akoʼi ia te ʼu moʼoni neʼe mahino gafua ki te hahaʼi kae neʼe loloto ʼaupitō. Kae neʼe mole gata pē ʼi tana ʼu faiakonaki ʼaē neʼe liliu ai ia Sesu ko te Tagata Faiako lahi tokotahi.

Ko Te ʼOfa ʼe Ko Te Kalitātē Maʼuhiga Tāfito

 3. ʼI tona ʼuhiga tagata faiako, koteā ʼaē neʼe kehekehe ai ia Sesu mo te kau takitaki lotu ʼo tona temi?

³ ʼI te kau sekelipa pea mo te kau Faliseo, neʼe lagi ʼi ai pē ni ʼu tagata popoto neʼe natou maʼu te ʼatamai mālama pea mo te ʼu fealagia ʼaē moʼo akoʼi ki te hahaʼi ia te ʼatamai mālama ʼaia. Kae koteā ʼaē neʼe kehekehe ai ia te faʼahiga faiakonaki ʼa Sesu pea mo te faʼahiga faiakonaki ʼa nātou ʼaia? Koteʼuhi neʼe mole maʼu e te kau takitaki lotu ʼo te temi ʼaia ia te ʼofa ʼaē ki te hahaʼi. Neʼe natou meʼa noaʼi te hahaʼi, ʼo natou fakaʼuhiga nātou “ko te kau malaʼia.” (Soa. 7:49) Kae ko Sesu neʼe ʼofa ia kiā nātou, he neʼe “natou ʼāhua pea mo mavetevete, ohagē ko he faga ovi ʼe mole honatou tagata tauhi.” (Mat. 9:36) Neʼe lotoʼofa, mo manavaʼofa pea mo agalelei. Tahi ʼaē, neʼe mole ʼoʼofa moʼoni ia te kau takitaki lotu ki te ʼAtua. (Soa. 5:42) Kae ko Sesu neʼe ʼofa ia ki tana Tamai pea neʼe fiafia ʼi te fai ʼo tona finegalo. Neʼe fakaʼuhiga hala e te kau takitaki lotu ia te ʼu folafola ʼa te ʼAtua ke tupu ʼaki ai ia he mole ʼiloʼi ʼo tanatou ʼu kākā, kae ko Sesu neʼe manako ia ki “te folafola ʼa te ʼAtua,” he neʼe ina akoʼi ia te folafola, mo ina fakamahino, mo ina  fakahā tona moʼoni, pea mo ina maʼuliʼi. (Luka 11:28) Koia neʼe takitaki e te ʼofa ia te maʼuli kātoa ʼo Kilisito, ʼo hā ʼi tana ʼu akonaki, mo tana ʼu felōgoi ʼaē mo te hahaʼi, pea mo tana faʼahiga akoʼi ʼaē ʼo nātou.

4, 5. (a) He koʼē ʼe maʼuhiga ke tou akoʼi te hahaʼi ʼaki te ʼofa? (b) ʼI te faiako, he koʼē ʼe maʼuhiga ia te ʼatamai mālama pea mo te poto?

⁴ ʼE feafeaʼi ʼo ʼuhiga mo tātou? ʼI totatou ʼuhiga tisipulo ʼa Kilisito, ʼe tou fia faʼifaʼitakiʼi ia ia ʼi tatatou minisitelio pea ʼi totatou maʼuli. (1 Pet. 2:21) Koia, ʼe mole tou fakatuʼutuʼu pē ke tou fakahā ia te ʼatamai mālama ʼo ʼuhiga mo te Tohi-Tapu kae ke tou toe fakahā mo te ʼu kalitātē ʼo Sehova, tāfito lā ia tona ʼofa. Peʼe lahi peʼe veliveli ia te ʼu meʼa ʼaē ʼe tou ʼiloʼi, peʼe lahi peʼe veliveli totatou poto faiako, kae ko te ʼofa ʼaē kā tou fakahā anai, ʼe tokoni mai anai kiā tātou, ke malave ʼatatou ʼu palalau ki te loto ʼo nātou ʼaē ʼe tou fai fakamafola ki ai. Ke fua lelei tatatou gāue ʼaē ko te fai ʼo ni ʼu tisipulo, ʼe tonu ke tou faʼifaʼitakiʼi ia Sesu, ʼo tou akoʼi te hahaʼi ʼaki te ʼofa.

⁵ ʼE mahino ia, ke tou liliu ko he kau faiako lelei, ʼe tonu ke tou mahino lelei ki te ʼu meʼa ʼaē ʼe tou palalau kiai pea mo tou popoto ʼi tona fakahā ki niʼihi. Neʼe tokoniʼi e Sesu ia tana ʼu tisipulo ke natou maʼu ia te ʼu faʼahi ʼaia e lua, pea ko Sehova ʼaki tana kautahi, ʼe tokoni mai ke tou fakahoko ia te faʼahi ʼaia iā ʼaho nei. (Lau ia Isaia 54:13; Luka 12:42.) Kae, ʼe tonu ke tou fakatuʼutuʼu ke tou akoʼi te hahaʼi ʼaki totatou loto kātoa kae ʼaua naʼa tou fai ʼaki pē totatou poto. Kapau ʼe tou maʼu ia te ʼatamai mālama, pea mo tou popoto ʼi tona akoʼi pea mo fai ʼaki te ʼofa, ʼe lahi anai totatou fiafia ʼi te ʼu fua kā tou maʼu. Ko te ʼu ʼaluʼaga fea ʼaē ʼe feala ai ke tou fakahā te ʼofa mokā tou faiako? Neʼe feafeaʼi tona fakahā e Sesu mo tana ʼu tisipulo ia te faʼahi ʼaia? Tou vakaʼi age muʼa te ʼu faʼahi ʼaia.

ʼE Tonu Ke Tou ʼOfa Kiā Sehova

 6. ʼE feafeaʼi hatatou palalau ʼo ʼuhiga mo he tahi ʼe tou ʼoʼofa ai?

⁶ ʼE tou fiafia ʼi te palalau ki he ʼu meʼa ʼe maʼuhiga kiā kita, pea kā tou talanoa kiai, ʼe feala pē ki te hahaʼi ke natou tokagaʼi totatou fiafia. Pea ʼe moʼoni te faʼahi ʼaia, tāfito lā mokā tou talanoa ʼo ʼuhiga mo he tahi ʼe tou ʼoʼofa ai. ʼI te agamāhani, ʼe tou fiafia ʼi te fakahā ki te hahaʼi ia te ʼu puani ʼaē ʼe tou ʼiloʼi ʼo ʼuhiga mo ia. ʼE tou vikiʼi ia ia, mo fakamaʼuhigaʼi, pea mo lagolago ki ai mokā ʼe tukugākoviʼi. ʼE tou fai te faʼahi ʼaia heʼe tou loto ke leleiʼia ia ia e te hahaʼi pea mo tona ʼu kalitātē.

 7. ʼAki te ʼofa ʼaē ʼo Sesu ki te ʼAtua, neʼe ina uga ai ia ia ke ina fai teā?

⁷ ʼI muʼa ʼo hatatou fakatupu ʼi te loto ʼo te hahaʼi ia te ʼofa ʼaē kiā Sehova, ʼe tonu muʼa ke tou feʼiloʼiʼaki mo nātou pea mo tou ʼoʼofa kiā nātou, heʼe ko te tauhi moʼoni ʼe fakatafito ki totatou ʼofa ʼaē ki te ʼAtua. (Mat. 22:36-38) Neʼe tuku mai e Sesu ia he faʼifaʼitaki lelei. Neʼe ʼofa ia kiā Sehova mo tona loto kātoa, mo tona ʼatamai kātoa, mo tona nefesi kātoa pea mo tona mālohi kātoa. ʼI tana maʼuli fakatahi ʼaē ʼi selō mo tana Tamai lolotoga ni ʼu taʼu e lauʼi miliale, neʼe feʼiloʼiʼaki lelei ai Sesu mo tana Tamai. Neʼe koteā tona fua? Neʼe ʼui fēnei e Sesu: “E au ʼofa ki te Tamai.” (Soa. 14:31) Neʼe hā ia te ʼofa ʼaia ʼo Sesu ʼi tana ʼu palalau fuli pea mo te ʼu meʼa fuli ʼaē neʼe ina fai. Pea neʼe ko he kalitātē neʼe ina uga ia ia ke ina fai tuʼumaʼu te ʼu meʼa ʼaē ʼe leleiʼia e te ʼAtua. (Soa. 8:29) Ko tona ʼofa ʼaē neʼe ina uga ia ia ke ina tala ia te aga fakakākā ʼa te kau takitaki lotu, ʼaē neʼe natou ʼui ʼe natou fakafofoga ia te ʼAtua kae ko te kau mālualoi. Ko tona ʼofa ʼaē neʼe ina toe uga ai ia ia, ke palalau ʼo ʼuhiga mo Sehova pea mo tokoni ki te hahaʼi ke natou ʼiloʼi te ʼAtua pea mo natou ʼoʼofa ki ai.

 8. ʼI tonatou ʼoʼofa ʼaē ki te ʼAtua, koteā ʼaē neʼe fai ai e te ʼu tisipulo ʼa Sesu?

⁸ Ohagē ko Sesu, ko tana ʼu tisipulo ʼo te ʼuluaki sēkulō neʼe natou ʼoʼofa kiā Sehova, pea ko te ʼofa ʼaia neʼe ina uga ai nātou ke natou fakamafola ia te logo lelei ʼaki he lototoʼa pea mo faʼafai ʼi te gāue ʼaia. Neʼe natou fakafonu ia Selusalemi ʼaki tanatou faiakonaki, logolā ia te fakafeagai ʼaē ʼa te kau takitaki lotu maʼu tuʼulaga kiā nātou. Neʼe mole feala ki te kau tisipulo ke natou tuku ia tanatou palalau ki te ʼu meʼa ʼaē neʼe kua natou sisio pea mo logo kiai. (Gāue 4:20; 5:28) Neʼe natou ʼiloʼi ko Sehova neʼe nofo mo nātou pea mo ina tapuakiʼi anai nātou, pea neʼe hoko moʼoni ia te faʼahi ʼaia. ʼI tona fakahagatonu, iā teitei taʼu e 30 ʼi te kua ʼosi mate ʼa Sesu, neʼe feala ke ʼui e te ʼapositolo ko Paulo, ko te logo lelei neʼe kua fakamafola ‘ki te tagata fuli ʼi te lalo lagi.’—Kol. 1:23.

 9. Koteā ʼaē ʼe tou lava fai ke tuputupu ai totatou ʼofa ki te ʼAtua?

⁹ Kapau ʼe tou fia maʼu he ʼu fua lelei ʼi tatatou faiako, ʼe tonu foki ke tou toe tōkakaga ʼo haga fakatuputupu  ia totatou ʼofa ʼaē ki te ʼAtua. ʼE feafeaʼi hatatou lava fai ia te faʼahi ʼaia? ʼI te fai māhani ʼe tou felōgoi mo te ʼAtua ʼaki te faikole. ʼE tou toe fakamālohiʼi totatou ʼofa ki te ʼAtua mokā tou ako tana Folafola, mokā tou lau te ʼu tohi Fakatohi-tapu, pea mokā tou kau ki te ʼu fono. ʼI te tuputupu ʼo tatatou ʼatamai mālama ʼo ʼuhiga mo te ʼAtua, ʼe toe lahi ʼaupitō ai anai ia totatou ʼofa ʼaē kiā te ia. Koia, kapau ʼe tou fakahā totatou ʼofa ʼaē ki te ʼAtua ʼi tatatou ʼu palalau pea mo te ʼu meʼa ʼaē ʼe tou fai, pea ʼe sio kiai anai te hahaʼi pea ʼe feala ai anai ke natou fakaovi mai kiā Sehova.—Lau ia Pesalemo 104:33, 34.

ʼE Tonu Ke Maʼuhiga Kiā Tātou Te ʼu Meʼa ʼAē ʼe Tou Akoʼi Ki Te Hahaʼi

10. ʼE ʼiloʼi feafeaʼi he tahi ʼe faiako lelei?

¹⁰ ʼE ʼiloʼi ia he tahi ʼe faiako lelei, ʼi te maʼuhiga ʼaē ki ai ia te ʼu meʼa ʼaē ʼe ina akoʼi ki te hahaʼi. ʼE tonu ki ai ke tui ʼe moʼoni ia tana ʼu akonaki, pea mo maʼuhiga ʼaupitō, pea mo ʼaoga ki te hahaʼi. Kapau ko he tahi ʼe faiako ʼe maʼuhiga ki ai te ʼu akonaki ʼaē ʼe ina akoʼi ki te hahaʼi, pea ʼe tokagaʼi pē anai e te hahaʼi ia tana fiafia, ʼo malave mālohi ai kiā nātou ʼaē ʼe ina akoʼi ia te moʼoni. Tahi ʼaē, kapau ʼe mole maʼuhiga kiā ia ʼaē ʼe faiako ia te ʼu akonaki ʼaē ʼe ina akoʼi ki te hahaʼi, pea ʼe feafeaʼi anai hana ʼamanaki ʼe leleiʼia anai e tana kau ako ia te ʼu meʼa ʼaē ʼe natou logo kiai? Kotou manatuʼi tuʼumaʼu, ʼe maʼuhiga ia te faʼifaʼitaki ʼaē ʼe kotou tuku ʼi tokotou ʼuhiga faiako ʼo te Folafola ʼa te ʼAtua. Neʼe ʼui fēnei e Sesu: “Ko te kau ako fuli ʼaē neʼe akoʼi lelei, ʼe natou hagē pē anai ko tonatou tagata faiako.”—Luka 6:40, The New Berkeley Version in Modern English.

11. He koʼē neʼe manako Sesu ki te ʼu akonaki ʼaē neʼe ina akoʼi ki te hahaʼi?

¹¹ Neʼe maʼuhiga kiā Sesu ia te ʼu akonaki ʼaē neʼe ina akoʼi ki te hahaʼi. Neʼe mahino kiā Sesu, neʼe nofo ia mo te ʼu koloa maʼuhiga neʼe tonu ke ina vaevae mo te hahaʼi, ia te moʼoni ʼo ʼuhiga mo tana Tamai ʼaē ʼe ʼi selō, mo “te ʼu folafola ʼa te ʼAtua” pea mo “te ʼu folafola ʼo te maʼuli heʼegata.” (Soa. 3:34; 6:68) Ohagē ko he mālama ʼe mū, ko te ʼu moʼoni ʼaē neʼe akoʼi e Sesu neʼe ʼasi ai ia te ʼu meʼa ʼaē ʼe kovi pea mo hā lelei ai ia te ʼu meʼa ʼaē ʼe lelei. ʼAki te ʼu moʼoni ʼaia, ʼe maʼu ai he ʼamanaki pea mo he fakafīmālie e te hahaʼi agavaivai ʼaē neʼe kākāʼi e te kau takitaki lotu hala pea mo fakamamahiʼi e te Tēvolo. (Gāue 10:38) Ko te manako ʼaē ʼa Sesu ki te moʼoni, neʼe hā ʼi tana ʼu faiakonaki pea neʼe toe ʼasi ʼi tana ʼu gāue fuli ʼaē neʼe ina fai.

12. Neʼe koteā te manatu ʼa te ʼapositolo ko Paulo ʼo ʼuhiga mo te logo lelei?

¹² Ohagē ko Sesu, neʼe manako pea mo leleiʼia e tana ʼu tisipulo ia te ʼu moʼoni ʼo ʼuhiga mo Sehova pea mo Kilisito, ʼo mole feala lā ki te kau fakafeagai ke natou fakalotovaivaiʼi nātou ʼi tanatou palalau ki te hahaʼi. Neʼe faitohi fēnei e Paulo ki te kau Kilisitiano ʼi Loma: “ ʼE au . . . lotomālohi . . . ke au fakahā . . . te logo lelei. . . . Heʼe mole au ufiufi ki te logo lelei; heʼe ko te mālohi ia ʼo te ʼAtua ʼo ʼuhiga mo te fakamaʼuli ʼo te tagata fuli pē ʼaē ʼe tui.” (Loma 1:15, 16) Neʼe ko he toe pilivilēsio kiā Paulo ia te tala ʼo te moʼoni. Neʼe ina tohi fēnei: “Kiā au, . . . neʼe foaki mai ia te ʼofa makehe ʼaia, ke au tala ki te ʼu puleʼaga ia te logo lelei ʼo ʼuhiga mo te koloa lahi ʼo Kilisito.” (Efe. 3:8) ʼE tou mahino vave pē ki te fiafia ʼaē neʼe maʼu e Paulo ʼi tana akoʼi te hahaʼi ʼo ʼuhiga mo Sehova pea mo Tana ʼu fakatuʼutuʼu.

13. Ko te ʼu ʼaluʼaga fea ʼaē ʼe tupu ai tatatou leleiʼia te logo lelei?

¹³ Ko te logo lelei ʼaē ʼe tou maʼu ʼi te Folafola ʼa te ʼAtua, ʼe ina fakafealagia mai hatatou ʼiloʼi ia te Tupuʼaga pea mo tou maʼu he ʼu felōgoi ʼofa mo ia. Ko te logo lelei ʼaia, ʼe tali ki te ʼu fehuʼi maʼuhiga ʼo te maʼuli pea ʼe mālohi ia moʼo fetogi totatou maʼuli, moʼo fakahū ki ʼotatou loto ia he ʼamanaki, pea mo fakamālohiʼi tātou ʼi te ʼu temi faigataʼa. Tahi ʼaē, ko te logo lelei ʼe ina hinoʼi mai ia te ala ʼaē ki he maʼuli ʼe ʼaoga ʼo talu ai. ʼE mole ʼi ai he tahi age ʼatamai mālama ʼe maʼuhiga ʼaupitō age ʼi te logo lelei. ʼE ko he meʼa ʼofa maʼuhiga ʼaē neʼe foaki mai kiā tātou, ʼo tou maʼu ai te fiafia lahi. Pea ʼe tou toe fiafia mokā tou vaevae ia te meʼa ʼofa ʼaia ki te hahaʼi.—Gāue 20:35.

14. ʼE feafeaʼi hatatou fakatuputupu tatatou manako ʼaē ki te ʼu akonaki ʼe tou akoʼi ki te hahaʼi?

¹⁴ Koteā ʼaē ʼe feala ke kotou fai ke tuputupu ai takotou leleiʼia te logo lelei? Kā kotou lau ia te Folafola ʼa te ʼAtua, kotou tuʼu ʼi ʼihi temi ʼi takotou lautohi ʼo kotou fakakaukauʼi te ʼu puani ʼaē ʼe kotou lau. Ohagē lā, kotou fakakaukauʼi age muʼa ʼe kotou kaugā ʼolo mo Sesu lolotoga tana minisitelio ʼaē ʼi te kele peʼe kotou fagona mo te ʼapositolo ko Paulo. ʼE kotou nonofo ʼi te mālama foʼou, pea mo mamata ki te kehekehe anai ʼo te maʼuli. Kotou  metitāsioʼi ia te ʼu tapuakina ʼaē neʼe kotou maʼu ʼi takotou fakalogo ki te logo lelei. Kapau ʼe kotou taupau maʼu ia takotou leleiʼia te logo lelei ke mālohi, pea ʼe logoʼi anai ia tokotou ʼofa ʼaia e nātou ʼaē ʼe kotou akoʼi. Koia, ʼuhi ko te ʼu ʼaluʼaga lelei ʼaia, ʼe tonu ke tou fakakaukauʼi fakalelei ia te ʼu akonaki ʼaē kua tou ako pea mo tou tokaga lelei ki te ʼu meʼa ʼaē ʼe tou akoʼi ki te hahaʼi.—Lau ia 1 Timoteo 4:15, 16.

ʼE Tonu Ke Tou ʼOfa Ki Te Hahaʼi

15. He koʼē ʼe tonu ki ʼaē ʼe faiako ke ʼofa ki tana kau ako?

¹⁵ Ko he tahi ʼe faiako lelei, ʼe ina fai ni ʼu palalau fakalotofīmālie ki tana kau ako, ke tupu ʼaki ai hanatou fia mahino ki te ʼu puani ʼaē ʼe natou lolotoga ako pea mo fiafia ʼi te palalau faʼifaʼitaliha. Ko he faiako ʼofa ʼe ina fakahā te ʼatamai mālama heʼe ʼofa moʼoni ki tana kau ako. ʼE ina fakaʼalutahi tana faiakonaki mo te ʼu meʼa ʼaē ʼe ʼaoga kiā nātou, pea mo te ʼu meʼa ʼaē ʼe natou lava mahino kiai. ʼE lotomahino ki te ʼu fealagia pea mo te ʼu ʼaluʼaga ʼaē ʼe tau mo tana kau ako. Kā maʼu e te kau faiako ia te taʼi ʼofa ʼaia, pea ʼe tokagaʼi anai e te kau ako, ʼo maʼu tatau te fiafia e ia ʼaē ʼe ina fai te ako pea mo ia ʼaē ʼe ako.

16. Ko te ʼu faʼahi fea ʼaē neʼe fakahā ai e Sesu tona ʼofa ki te hahaʼi?

¹⁶ Neʼe maʼu e Sesu ia te taʼi ʼofa ʼaia. Ko te toe ʼofa lahi ʼaupitō ʼo Sesu, neʼe tonu ke ina sākilifisio tona maʼuli haohaoa ke tupu ʼaki ai ia he haofaki ʼo te hahaʼi. (Soa. 15:13) Lolotoga tana minisitelio, neʼe tokaga tuʼumaʼu aipē Sesu ki te tokoni ki te hahaʼi pea mo te akoʼi ʼo nātou, ke natou ʼiloʼi tana Tamai. Neʼe mole fakatalitali ia ke ʼomai te hahaʼi kiā te ia, kae neʼe fagona lalo ʼi ni ʼu lauʼi kilometa moʼo fakahā te logo lelei ki te hahaʼi. (Mat. 4:23-25; Luka 8:1) Neʼe faʼa kātaki pea mo lotomahino. ʼI te ʼu temi ʼaē neʼe tonu ai ke ina fakatonutonuʼi tana ʼu tisipulo, neʼe ina fai ʼaki pē te ʼofa. (Mko. 9:33-37) Neʼe ina fakalotomālohiʼi nātou ʼaki tana fakahā tana falala ʼaē ki tanatou lava liliu ko he kau fai fakamafola faiva ʼo te logo lelei. Neʼe mole he tagata neʼe laka age tana faiako ʼaki te ʼofa iā Sesu. Ko te ʼofa ʼaē neʼe ina fakahā ki tana ʼu tisipulo neʼe ina uga ai nātou ke natou ʼoʼofa kiā te ia pea mo taupau maʼu ia tana ʼu fakatotonu.—Lau ia Soane 14:15.

17. Neʼe fakahā feafeaʼi e te ʼu tisipulo ʼa Sesu ia tonatou ʼofa ʼaē ki te hahaʼi?

¹⁷ Ohagē ko Sesu, neʼe fakahā e tana ʼu tisipulo ia he toe ʼofa lahi kiā nātou ʼaē neʼe natou fai fakamafola ki ai. Logolā te fakataga pea mo te mate, kae neʼe natou tauhi ki te hahaʼi pea mo fua lelei tanatou fakamafola ia te logo lelei. Neʼe natou ʼoʼofa ʼaupitō ki te hahaʼi ʼaē neʼe natou tokoniʼi ʼi te faʼahi fakalaumālie! Koia neʼe hā ʼi te ʼu palalau ʼa Paulo ia tona ʼofa, ʼaē neʼe ina ʼui fēnei: “Neʼe matou agamalū ʼi te lotolotoiga ʼo koutou, ohagē ko he faʼē ʼe tokaga fakalelei ki tana fānau ʼaē ʼe ina fafaga. Koia, ʼi tamatou ʼofa ʼaē kiā koutou, ko tamatou fiafia neʼe mole gata ʼaki pē ʼi tamatou fakahā atu te logo lelei ʼa te ʼAtua, kae neʼe toe kau ai mo tomatou ʼu nefesi totonu, koteʼuhi kua kotou liliu maʼa mātou ko he kau ʼofaina.”—1 Tes. 2:7, 8.

18, 19. (a) He koʼē ʼe tou lotolelei ke tou fai he ʼu sākilifisio moʼo fakahoko te gāue fai fakamafola? (b) Kotou tuku mai he faʼifaʼitaki ʼe fakahā ai ko te ʼofa ʼaē ʼe tou fakahā ʼe tokagaʼi e te hahaʼi.

¹⁸ ʼO toe fēia mo totatou temi, ko te kau Fakamoʼoni  ʼa Sehova ʼe natou fai fakamafola ʼi te mālamanei kātoa moʼo kumi ʼo nātou ʼaē ʼe natou fia ʼiloʼi te ʼAtua pea mo tauhi ki ai. ʼI tona fakahagatonu, ʼi te ʼu taʼu e 17 ʼaenī kua hili, neʼe tou fai hola e tahi miliale ʼi te taʼu fuli ki te fai fakamafola pea mo te fai ʼo ni ʼu tisipulo, pea ʼe kei tou hoko atu pē nei ia te fai ʼo te gāue ʼaia. ʼE tou fai te gāue ʼaia ʼaki he lotolelei, logolā ko te gāue fai fakamafola ʼe ina fakamaʼua ke tou sākilifisioʼi totatou temi, totatou mālohi pea mo totatou ʼu koloa. Ohagē ko Sesu, ʼe tou mahino ko tatatou Tamai ʼofa ʼaē ʼe ʼi selō, ʼe ina loto ke maʼu e te hahaʼi ia te ʼatamai mālama ʼaē ʼe ina taki ki te maʼuli heʼegata. (Soa. 17:3; 1 Tim. 2:3, 4) Ko te ʼofa ʼe ina uga tātou ke tou tokoni ki te hahaʼi ʼaē ʼe natou fia kumi moʼoni ke natou ʼiloʼi ia Sehova pea mo ʼofa ki ai, ohagē ko tātou.

¹⁹ ʼE tokagaʼi e te hahaʼi ia te ʼofa ʼaē ʼe tou fakahā. Ohagē lā, ko te tuagaʼane pioniē ʼi Amelika ʼe faitohi moʼo fakalotofīmālieʼi ʼo nātou ʼaē neʼe mate honatou kāiga neʼe natou ʼoʼofa ki ai. Neʼe tali fēnei age e te tagata ki tana tahi tohi: “ ʼI te kamata neʼe au punamaʼuli ʼi taku sio ʼaē neʼe faiga fēia he tahi, ke faitohi mai kae mole mā feʼiloʼiʼaki, ʼo tokoni mai ke au kātakiʼi toku mamahi. ʼI taku mahino ʼaē ki tau aga ʼaia, ʼe lahi ʼaupitō pē ia tou ʼofa ʼaē ki tou tatau pea mo te ʼAtua ʼaē ʼe ina taki te hahaʼi ki te ala ʼo te maʼuli.”

20. He koʼē ʼe maʼuhiga ke tou akoʼi te hahaʼi ʼaki te ʼofa?

²⁰ Kapau ʼe kotou maʼu ia te ʼofa pea mo te poto, pea ʼe kotou fai anai he gāue ʼe lelei ʼaupitō. ʼI te ʼu faiako ʼaē ʼe tou fai, ʼe tou faiga ke tou tokoni ki te hahaʼi ke natou ʼiloʼi ia Sehova pea ke natou ʼoʼofa kiā te ia. ʼEī, ke tou liliu ko he kau faiako ʼe fua lelei moʼoni tatatou gāue, ʼe maʼua ke tou ʼoʼofa ki te ʼAtua, mo te moʼoni pea mo te hahaʼi. Kapau ʼe tou fakatuputupu ia te taʼi ʼofa ʼaia pea mo fakahā ki te hahaʼi ʼi tatatou minisitelio, pea ʼe tou fiafia ʼi tata foaki pea mo tou toe fiafia ʼi tata ʼiloʼi ʼaē ʼe tou faʼifaʼitakiʼi ia Sesu pea mo fakafiafia te loto ʼo Sehova.

ʼE Kotou Tali Feafeaʼi Anai?

• ʼI tatatou akoʼi ki te hahaʼi ia te logo lelei, he koʼē ʼe maʼuhiga ke tou . . .

ʼofa ki te ʼAtua?

leleiʼia te ʼu meʼa ʼaē ʼe tou akoʼi ki te hahaʼi?

ʼofa ki tatatou kau ako?

[ʼU fehuʼi ʼo te ako]

[Paki ʼo te pasina 19]

Koteā ʼaē neʼe kehekehe ai te faʼahiga faiakonaki ʼa Sesu pea mo ʼaē ʼa te kau sekelipa pea mo te kau Faliseo?

[Paki ʼo te pasina 22]

Ko he tahi ʼe faiako lelei ʼe ina maʼu ia te ʼatamai mālama, mo te poto kae tāfito ia te ʼofa