Tou Faʼifaʼitakiʼi Ia Sesu, ʼo Tou Fai Fakamafola ʼAki He Lototoʼa

“Neʼe matou maʼu ia te lototoʼa . . . ke matou tala atu kiā koutou ia te logo lelei.” —1 TES. 2:2.

 1. He koʼē ko te logo lelei ʼo ʼuhiga mo te Puleʼaga ʼe fakatupu fiafia?

 ʼE KO he meʼa lelei mokā tou logo ki he ʼu logo ʼe lelei! Pea ko te logo lelei ʼi te ʼu logo fuli, ʼe ko ʼaē ʼo ʼuhiga mo te Puleʼaga ʼo te ʼAtua. Ko te logo lelei ʼaia ʼe ina fakapapau mai, ʼe fakagata anai ia te maʼuli mamahi, mo te mahaki, mo te lotomamahi, mo te agakovi pea mo te mate. Ko te logo lelei, ʼe ina foaki mai ia te ʼamanaki ki te maʼuli heʼegata, mo ina fakahā mai te fakatuʼutuʼu ʼa te ʼAtua, pea ʼe ina fakahā peʼe feafeaʼi hatatou maʼu ia he felōgoi ʼofa mo te ʼAtua. ʼI takotou manatu, ko te hahaʼi fuli ʼe natou fiafia anai ʼi tanatou logo ʼaē ki te logo ʼaia neʼe fakahā e Sesu ki te mālamanei. Kae neʼe mole hoko he meʼa fēia.

 2. Kotou fakamahino te palalau ʼaenī ʼa Sesu: “Neʼe au haʼu ʼo fakatupu te [maveuveu].”

² Neʼe ʼui fēnei e Sesu ki tana ʼu tisipulo: “ ʼAua naʼa kotou manatu neʼe au haʼu ʼo ʼaumai te tokalelei ki te kele; neʼe mole au haʼu ʼo ʼaumai te tokalelei, kae ko te heletā. He neʼe au haʼu ʼo fakatupu te [maveuveu], ʼe fakafeagai anai te tagata ki tana  tamai, te taʼahine ki tana faʼē, te fafine ʼohoana kei finemui ki te faʼē ʼo tona ʼohoana. ʼIo, ko te ʼu fili anai ʼo te tagata ʼe ko nātou totonu pē ʼaē ʼo tona loto fale.” (Mat. 10:34-36) Ko te hahaʼi neʼe mole natou tali lelei te logo lelei, kae tokolahi iā nātou neʼe natou fakafisi kiai. Ko ʼihi logolā ko ʼonatou kāiga ʼaē ʼe natou fakamafola age te logo lelei, kae neʼe natou liliu ko ʼonatou fili.

 3. Koteā ʼaē ʼe ʼaoga kiā tātou ke tou hoko atu ia tatatou fai fakamafola?

³ ʼE ko te ʼu moʼoni pē ʼaē neʼe fakamafola e Sesu ʼaē ʼe tou toe fakamafola pē ki te hahaʼi. Pea ko nātou ʼaē ʼe logo kiai ʼi te temi nei, ʼe hagē pē tanatou aga ko te tokolahi ʼaē ʼi te temi ʼo Sesu ʼo ʼuhiga mo tana fai fagonogono. Ko he faʼahi ʼe tonu ke hoko kiā tātou. Neʼe ʼui fēnei e Sesu ki tana ʼu tisipulo: “Ko he tagata kaugana ʼe mole lahi ake ia ʼi tona pule. Kapau neʼe natou fakatagaʼi au, pea ʼe natou fakatagaʼi anai mo koutou.” (Soa. 15:20) ʼE lahi te ʼu fenua, ʼe mole fakatagaʼi ai tātou ʼi te faʼahi fakasino, kae ʼe fehiʼaʼinaʼi ai tātou pea mole fia logo te hahaʼi ki tatatou fai fakamafola. Koia ʼe tonu ai ke tou tui pea mo lototoʼa moʼo hoko atu ia tatatou fakamafola te logo lelei.—Lau ia 2 Petelo 1:5-8.

 4. He koʼē neʼe ʼaoga kiā Paulo ke ina “maʼu ia te lototoʼa” moʼo hoko atu tana fai fakamafola?

⁴ Lagi ʼi ʼihi temi, ʼe faigataʼa hakotou kau ki te minisitelio, peʼe ko he ʼu ʼaluʼaga ʼe lagi feala ke kotou tuʼaniaʼi. Kapau koia, ʼaua naʼa galo kiā koutou, tokolahi te kau fai fakamafola ʼe fēia mo nātou. Ko te ʼapositolo ko Paulo, neʼe ko he tagata fai fakamafola lototoʼa pea mole fula pea neʼe mahino lelei ia ki te moʼoni, kae ʼihi temi neʼe faigataʼa pē kiā ia hana ʼalu ʼo fai fakamafola. Ki te kau Kilisitiano ʼo Tesalonika, neʼe ʼui fēnei age e Paulo: “ ʼI te hili ʼo tamatou tali mamahi pea mo laukoviʼi ʼi Filipe, neʼe matou maʼu ia te lototoʼa ʼuhi ko te ʼAtua, ke matou tala atu kiā koutou ia te logo lelei ʼo ʼuhiga mo te ʼAtua, ʼi te lotolotoiga ʼo te ʼu fakafeagai.” (1 Tes. 2:2) Ko te kau takitaki ʼo te kolo ʼo Filipe neʼe natou haha ia Paulo pea mo tona kaumeʼa ko Silasi ʼaki te kauʼi ʼakau, mo pilisoniʼi nāua, pea neʼe haʼi ʼonā vaʼe ki te ʼu koga ʼakau. (Gāue 16:16-24) Kae neʼe ‘maʼu aipē ia te lototoʼa’ e Paulo mo Silasi ke nā hoko atu ia tanā fai fakamafola. ʼE tou lava faʼifaʼitaki feafeaʼi nāua? Moʼo tali kiai, tou vakaʼi age muʼa peʼe koteā ʼaē neʼe tokoni ki te ʼu kaugana ʼa te ʼAtua ʼo te temi muʼa ke natou lototoʼa ʼo fakahā te moʼoni ʼo ʼuhiga mo Sehova, pea mo tou ako peʼe feafeaʼi hatatou lava faʼifaʼitakiʼi nātou.

Neʼe ʼAoga Kiā Nātou ʼo Te Temi Muʼa Ke Natou Lototoʼa

 5. He koʼē neʼe ʼaoga ke lototoʼa tuʼumaʼu ia nātou ʼaē ʼe agatonu kiā Sehova?

⁵ ʼE mahino ia, ko te faʼifaʼitaki māʼoluga pē e tahi ʼo te lototoʼa neʼe ko Sesu Kilisito. Talu mai te kamataʼaga ʼo te mālamanei, neʼe ʼaoga tuʼumaʼu aipē kiā nātou fuli ʼaē ʼe agatonu kiā Sehova, ke natou lototoʼa. Koteā tona tupuʼaga? ʼI te ʼosi ʼo te fakafeagai ʼaē neʼe hoko ʼi Eteni, neʼe fakakikite e Sehova ʼe hoko anai te fehiʼa iā nātou ʼaē ʼe tauhi ki te ʼAtua pea mo nātou ʼaē ʼe tauhi kiā Satana. (Sen. 3:15) Neʼe mole tuai pea hā te fehiʼa ʼaia ʼi te temi ʼaē neʼe fakapōgi ai te tagata agatonu ko Apele e tona tehina. Ki muli age, neʼe fehiʼaʼinaʼi Enoke, te tahi tagata agatonu neʼe maʼuli ʼi muʼa mamaʼo atu ʼo te tō ʼo te Tulivio. Neʼe ina fakakikite ko te ʼAtua ʼe haʼu anai mo Tana ʼu miliate ʼāselo māʼoniʼoni moʼo tauteaʼi te hahaʼi aga heʼe lotu. (Suta 14, 15) Tokolahi te hahaʼi neʼe mole natou leleiʼia te logo ʼaia. Ko te hahaʼi neʼe natou fēhihiʼa kiā Enoke, pea ʼe mahino ia mo kanapau lā neʼe mole foimo toʼo e Sehova ia tana tagata agatonu ʼaia, neʼe lagi natou haga ʼo matehi. Neʼe lototoʼa moʼoni ia Enoke.—Sen. 5:21-24.

 6. He koʼē neʼe ʼaoga kiā Moisese ke lototoʼa ʼi tana ʼalu ʼaē ʼo palalau kiā Falaone?

⁶ Kotou toe fakakaukauʼi age muʼa, ia te lototoʼa ʼaē neʼe maʼu e Moisese ʼi tana palalau ʼaē kiā Falaone, te hau ʼaē neʼe ina fakafofoga te ʼu ʼatua, kae mo ia totonu pē neʼe ʼatua, he neʼe ko te foha ʼo Râ te ʼatua laʼā. ʼE lagi neʼe hagē ko ʼihi Falaone, neʼe tauhi pē ia kiā ia totonu. Ko te folafola ʼa Falaone neʼe ko he lao; neʼe ina tohi te ʼu lao, koia ko Falaone ʼaē neʼe ina maʼu te mālohi, mo fiatuʼu pea mole fia fakalogo, neʼe mole māhani ke fakatotonu age e he tahi ia te meʼa ʼaē ʼe tonu ke ina fai. Neʼe ko te tagata lā ʼaia neʼe ʼalu liuliuga ki ai Moisese, he tauhi ovi agavaivai, ʼaē neʼe mole fakaafe e te Falaone ke ʼalu age pea neʼe mole fai ki ai he fakatalitali lelei. Pea koteā ʼaē neʼe fakakikite age e Moisese? Neʼe ina fakakikite age te ʼu malaʼia fakamataku. Pea koteā ʼaē neʼe loto kiai Moisese? Ke fakagafua e Falaone ki te ʼu kaugana e lauʼi miliona ke natou mavae mai te fenua! Neʼe ʼaoga koa kiā Moisese ke lototoʼa? ʼEī!—Fkau. 12:3; Hep. 11:27.

7, 8. (a) Koteā te ʼu ʼahiʼahi neʼe hoko ki te ʼu kaugana agatonu ʼo te temi muʼa? (b) Koteā ʼaē neʼe feala ai kiā nātou ʼo te temi muʼa ke natou lototoʼa ʼo lagolago pea mo puipui te tauhi maʼa?

 ⁷ ʼI te ʼu sēkulō ki muli age, ko te ʼu polofetā pea mo ʼihi kaugana agatonu ʼa te ʼAtua neʼe natou lototoʼa aipē moʼo puipui te tauhi maʼa. Neʼe mole agalelei ia te mālama ʼa Satana kiā nātou. ʼE ʼui fēnei e Paulo: “Neʼe tuki makaʼi nātou, neʼe ʼahiʼahiʼi nātou, neʼe tuʼusi nātou ʼaki te tutuʼu, neʼe natou mamate ʼi te heletā, neʼe natou feʼoloʼaki mo he ʼu kiliʼi ʼakeno, he ʼu kiliʼi tao, kae neʼe natou fakaʼofaʼofa, ʼi te fakataga, pea neʼe gaohi koviʼi nātou.” (Hep. 11:37) Koteā ʼaē neʼe tokoni ki te ʼu kaugana agatonu ʼaia ʼa te ʼAtua ke natou taupau maʼu tanatou tui? ʼI te ʼu vaega ki muʼa atu, neʼe fakahā e Paulo te tupuʼaga ʼaē neʼe faʼa kātaki ai ia Apele, mo Apalahamo, mo Sala pea mo ʼihi atu. Neʼe ina ʼui fēnei: “Neʼe mole heʼeki natou maʼu te fakahoko ʼo te ʼu fakapapau, kae [ʼaki te tui] neʼe natou sio mamaʼo kiai pea neʼe natou tali.” (Hep 11:13) ʼE mahino ia, ko te ʼu polofetā ohagē lā ko Elia, mo Selemia, pea mo ʼihi kaugana agatonu ʼo te temi muʼa ʼaē neʼe lototoʼa ʼo lagolago ki te tauhi moʼoni, lagi ko te meʼa ʼaē neʼe tokoni kiā nātou ke natou faʼa kātaki, ko tanatou haga sio tuʼumaʼu ki te ʼu fakapapau ʼa Sehova.—Tito 1:2.

⁸ Neʼe ʼamanaki te ʼu kaugana agatonu ʼaia ʼo te temi muʼa ki he kā haʼu lelei pea mo fiafia. Kā fakatuʼuake anai nātou, ʼe natou maʼu anai te maʼuli haohaoa pea ʼe “fakaʼāteaina anai nātou mai te pōpula ki te meʼa ʼaē ʼe popo” ʼaki te ʼu gāue fakapelepitelō ʼa Kilisito Sesu pea mo tona ʼu kaugā pelepitelō e toko 144 000. (Loma 8:21) Tahi ʼaē, ko Selemia pea mo ʼihi kaugana agatonu ʼa te ʼAtua ʼo te temi muʼa neʼe natou lototoʼa, ʼuhi ko te fakapapau ʼaenī ʼa Sehova neʼe ina fai kiā Selemia: “ ʼE mahino papau ʼe natou tauʼi anai koe, kae ʼe mole natou mālo anai iā koe, koteʼuhi ‘ ʼe au nofo mo koe moʼou haofaki,’ ko te tala ʼaia ʼa Sehova.” (Sel. 1:19) Iā ʼaho nei, mokā tou metitāsioʼi te ʼu fakapapau ʼa te ʼAtua ki te kā haʼu pea mo tana fakapapau ʼaē ke ina puipui tātou mai te ʼu fakahala ʼaē ʼe fakatupu kovi ki tatatou ʼu felōgoi ʼaē mo ia, pea ʼe mahino ia ʼe tou lotomālohi ai anai.—Taag. 2:7; lau ia 2 Kolonito 4:17, 18.

Ko Te ʼOfa ʼAē Neʼe Ina Uga Sesu Ke Fai Fakamafola ʼAki He Lototoʼa

9, 10. Neʼe fakahā feafeaʼi e Sesu tana lototoʼa ʼi muʼa ʼo (a) te kau takitaki lotu, (b) te kau sōlia, (c) te pelepitelō lahi, (d) Pilato?

⁹ Ko totatou Faʼifaʼitakiʼaga ko Sesu neʼe ina fakahā tana lototoʼa ʼi te ʼu ʼaluʼaga kehekehe. Ohagē lā, logolā te fehiʼaʼinaʼi ʼo Sesu e nātou ʼaē ʼe maʼu tuʼulaga mo maʼu koloa, kae neʼe mole ina fakahā fakakoga pē te logo ʼaē neʼe loto e te ʼAtua ke ʼiloʼi e te hahaʼi. Neʼe mole fula ʼi te tala ʼo te aga heʼe faitotonu ʼa te kau takitaki lotu logona, ʼo fēia ki te loi ʼaē ʼo tanatou ʼu faiakonaki. Neʼe fakahagatonu te ʼu palalau ʼa Sesu pea mo moʼoni, ʼi tana tauteaʼi te ʼu tagata ʼaia. ʼI te tahi ʼaluʼaga, neʼe ina ʼui fēnei: “Malaʼia kiā koutou, kau sekelipa mo koutou kau Faliseo, kau mālualoi! koteʼuhi heʼe kotou hagē ko he ʼu falemaka kua pena hina, ʼaia ʼe hagē mai ʼe matamatalelei ʼi tuʼa, kae ʼi loto ʼe fonu ko te hui ʼo te hahaʼi mate pea mo te faʼahiga meʼa heʼemaʼa kehekehe. ʼE toe fēia pē foki mo koutou, ʼi tuʼa ʼe kotou mata faitotonu ki te tagata, kae ʼi loto ʼe kotou fonu ʼi te mālualoi mo te manuki ki te lao.”—Mat. 23:27, 28.

¹⁰ ʼI te temi ʼaē neʼe ʼomai ai te kau sōlia ʼo puke ia Sesu ʼi te ʼōloto ʼo Setesemane, neʼe ina hinoʼi fakahagatonu age ia ia totonu. (Soa. 18:3-8) Ki muli age, neʼe ʼave leva ia ia ki muʼa ʼo te Sanetualio pea neʼe fakafehuʼi ai e te pelepitelō lahi. Neʼe ina ʼiloʼi lelei pē te kumikumi ʼaē e te pelepitelō lahi he  takuʼaki moʼona matehi, kae neʼe fakahā fakalelei age pē e Sesu, ko ia ko Kilisito pea ko ia te ʼAlo ʼo te ʼAtua. Neʼe ina toe ʼui age, ʼe natou sio anai kiā ia ʼe “heka ʼi te toʼomataʼu ʼo te mālohi pea mo tana haʼu mo te ʼu ʼao ʼo te lagi.” (Mko. 14:53, 57-65) Ki muli age, neʼe tuʼu Sesu iā muʼa ʼo Pilato, ʼaē neʼe feala pē hana fakaʼāteaina ia ia. Kae neʼe tuʼu fakalogologo Sesu ki te ʼu tukugākovi ʼaē neʼe fai ʼo ʼuhiga mo ia. (Mko. 15:1-5) Pea ki te ʼu ʼaluʼaga fuli ʼaia, neʼe ʼaoga ki ai ke lototoʼa.

11. Koteā te pikipikiga ʼo te lototoʼa pea mo te ʼofa?

¹¹ Neʼe ʼui fēnei e Sesu kiā Pilato: “Neʼe au tupu ʼuhi ko te potu ʼaenī, pea neʼe au haʼu ki te mālamanei ʼuhi ko te potu ʼaenī: ko te fakamoʼoni ki te moʼoni.” (Soa. 18:37) Neʼe fakatotonu e Sehova kiā Sesu ke ina fakamafola ia te logo lelei, pea neʼe fiafia Sesu ʼi tona fakahoko koteʼuhi neʼe ʼofa ia ki tana Tamai ʼaē ʼe ʼi selō. (Luka 4:18, 19) Neʼe toe ʼofa Sesu ki te hahaʼi. Neʼe ina ʼiloʼi te faigataʼaʼia ʼaē ʼo tonatou maʼuli. Pea ʼe toe fēia mo tātou, ʼe tou lototoʼa ʼo fagonogono heʼe tou ʼofa ki te ʼAtua pea mo totatou kāiga.—Mat. 22:36-40.

ʼE Uga Tātou e Te Laumālie Māʼoniʼoni Ke Tou Fai Fakamafola ʼAki He Lototoʼa

12. Koteā ʼaē neʼe tupu ai te fiafia ʼa te kau tisipulo ʼo te ʼuluaki sēkulō?

¹² ʼI te ʼu vāhaʼa ʼaē neʼe hoa mai ki te mate ʼo Sesu, neʼe fiafia te kau tisipulo ʼi tanatou sisio ʼaē neʼe toe hilifaki e Sehova ia te ʼu tisipulo foʼou kiā nātou. Koia ʼi te ʼaho pē e tahi, neʼe papitemaʼi ia te toko 3 000 Sutea pea mo poloselite mai te ʼu fenua kehekehe ʼaē neʼe ʼomai ki Selusalemi ki te Penikositē! Neʼe lagi mafola te logo ʼaia ʼi Selusalemi kātoa! ʼE ʼui fēnei ʼi te Tohi-Tapu: “Neʼe hifo te mataku ʼi te nefesi fuapē; pea neʼe hoko te ʼu fakamelomelo pea mo te ʼu fakaʼiloga ʼaki te kau ʼapositolo.”—Gāue 2:41, 43.

13. He koʼē neʼe faikole ia te ʼu tehina ke natou lototoʼa, pea neʼe koteā tona fua?

¹³ ʼI te ʼitaʼita ʼo te kau takitaki lotu, neʼe natou puke Petelo mo Soane, ʼo pilisoniʼi nāua ʼi te pō kātoa, pea mo fakatotonu age ke tuku tanā toe palalau ʼo ʼuhiga mo Sesu. ʼI tonā ʼosi fakaʼāteaina, neʼe nā fakahā ki te ʼu tehina ia te ʼu meʼa ʼaē neʼe hoko, pea neʼe natou hūfakiʼi fuli te fakataga ʼaē neʼe hoko kiā nātou, ʼo natou faikole fēnei: “Sehova, . . . fakafealagia ki tau ʼu kaugana ke natou haga tala tau folafola ʼaki he lototoʼa kātoa.” Koteā tona fua? “Neʼe natou fonu fuli ʼi te laumālie māʼoniʼoni pea natou talanoa ai ki te folafola ʼa te ʼAtua ʼaki he lototoʼa.”—Gāue 4:24-31.

14. ʼE tokoni feafeaʼi mai te laumālie māʼoniʼoni ki tatatou fai fakamafola?

¹⁴ Kotou fakatokagaʼi, neʼe ko te mālohi ʼo te laumālie māʼoniʼoni ʼo Sehova ʼaē neʼe tokoni ki te ʼu tisipulo ke natou tala te Folafola ʼa te ʼAtua ʼaki he lototoʼa. Ko te lototoʼa ʼo ʼuhiga mo te fakahā ʼaē ʼo te moʼoni ki niʼihi, ʼo kau aipē lā mo nātou ʼaē ʼe fakafeagai ki te logo lelei, ʼe mole ko he lototoʼa ia ʼe fakalogo kiā tātou kae ʼe fakalogo ki te mālohi ʼaē ʼe haʼu mai iā Sehova. ʼE feala kiā Sehova ke ina foaki mai tona laumālie māʼoniʼoni mo kapau ʼe tou kole age, pea ʼe ina foaki mai anai. ʼAki te tokoni ʼa Sehova, ʼe feala foki ke tou fakahā ia te lototoʼa ʼaē ʼe ʼaoga moʼo mālo ʼi te tauʼi ʼo te fakafeagai.—Lau ia Pesalemo 138:3.

Ko Te Kau Kilisitiano ʼo Te Temi Nei ʼe Natou Fai Fakamafola ʼAki He Lototoʼa

15. ʼE feafeaʼi te fakamavetevete ʼo te hahaʼi iā ʼaho e te moʼoni?

¹⁵ Iā ʼaho nei, ohagē pē ko te temi muʼa, ko te moʼoni ʼe kei ina fakamavetevete aipē ia te hahaʼi. Ko ʼihi ʼe natou tali lelei, kae ki ʼihi ʼe mole natou mahino kiai pea ʼe mole natou leleiʼia tatatou faʼahiga tauhi. Ko ʼihi ʼe natou palalau kovi ʼo ʼuhiga mo tātou, mo fakalainoaʼi tātou peʼe fēhihiʼa kiā tātou ohagē ko tona fakakikite e Sesu. (Mat. 10:22)  ʼI ʼihi temi, ʼe fai te ʼu fakamatala loi ʼo ʼuhiga mo tātou, ʼi te ʼu tala logo. (Pes. 109:1-3) Kae logolā te ʼu faʼahi fuli ʼaia, ʼi te kele kātoa ko te hahaʼi ʼa Sehova ʼe natou tala ia te logo lelei ʼaki he lototoʼa.

16. Koteā ʼaē neʼe hoko, ʼo hā mai ai ko te lototoʼa ʼe feala ke ina fetogi te manatu ʼo nātou ʼaē ʼe tou fai fagonogono ki ai?

¹⁶ ʼAki tatatou lototoʼa, ʼe feala ai ki te hahaʼi ke fetogi tanatou manatu ʼo ʼuhiga mo te logo ʼo te Puleʼaga. Ko te tuagaʼane ʼi Kirghizistan, ʼe ina fakamatala fēnei: “ ʼI taku fai fakamafola, neʼe ʼui fēnei mai e te tagata: ‘ ʼE au tui ki te ʼAtua kae mole au tui au ki te ʼAtua ʼo te kau Kilisitiano. Kapau ʼe kotou toe liliu mai, ʼe au fakatotonu anai ki taku kulī ke ina kai koutou!’ Neʼe tuʼu mai ʼi muli ʼo te tagata ia te toe kulī neʼe haʼi. Kae ʼi te tufa ʼo te pepa lotu Te ʼu Logo ʼo Te Puleʼaga N° 37 ‘Kua Vave Fakaʼauha Te ʼu Lotu Hala!,’ neʼe au fakatuʼutuʼu ke au toe liliu ki te ʼapi ʼo te tagata ke tupu ʼaki ai haku felāveʼi mo he tahi age ʼo te fāmili. Kae neʼe ko te tagata pē ʼaē neʼe ina toe ʼavahi mai te matapā. Neʼe au fetapa fakavilivili kiā Sehova pea mo au ʼui fēnei age: ‘Mālo, ʼe au manatuʼi tata fai palalau kua hili nei kiai ʼaho e tolu, pea ʼe kei au manatuʼi pē mo tau palalau mai ʼaē ʼo ʼuhiga mo tau kulī. Kae neʼe mole feala haku fakalaka ʼi tou ʼapi kae mole au tuku atu hau pepa lotu, koteʼuhi ʼe au hagē pē ko koe, ʼe au tui ki te ʼAtua moʼoni pē e tahi. Kua vave tauteaʼi e te ʼAtua ia te ʼu lotu ʼaē ʼe natou pātapāta age kiā te ia. ʼE feala ke lahi age he ʼu meʼa ʼe ke ako ki te faʼahi ʼaia, ʼaki tau lau te pepa lotu ʼaenī.’ Pea neʼe au punamaʼuli, he neʼe tali e te tagata te pepa lotu. ʼOsi ʼaia, pea au hiki ki te tahi ʼapi. Hili kiai te ʼu kiʼi minuta, pea neʼe lele mai te tagata mo te pepa lotu ʼi tona nima. ʼO ina ʼui fēnei mai: ‘Neʼe au lau te pepa. Koteā ʼaē ʼe tonu ke au fai ke mole hoko kiā au te hauhau ʼo te ʼAtua?’ ” Neʼe kamata atu aipē te ako mo te tagata, pea neʼe haʼu aipē ki te ʼu fono.

17. Neʼe feafeaʼi ki te lototoʼa ʼa te tuagaʼane hana fakalotomālohiʼi he tahi ʼe ina ako te Tohi-Tapu, kae ina tuʼaniaʼi ia te tagata?

¹⁷ Ko tatatou lototoʼa, ʼe feala ai ke tou toe fakalotomālohiʼi niʼihi ke natou lototoʼa. Ko te tuagaʼane ʼi Lusia neʼe heka ʼi te kā, pea neʼe ʼamanaki ke ina foaki age ia te nusipepa ki te tahi fafine neʼe heka ʼi te kā. ʼI te moʼi temi pē ʼaia, neʼe mafuta mai te tagata mai tona hekaʼaga, ʼo toʼo te nusipepa ʼi te ʼu nima ʼo te tuagaʼane, ʼo numinumi pea mo lī ki lalo. Neʼe leakovi ʼo leʼo lahi ki te tuagaʼane, pea mo ina ʼui age ke ina foaki age nei tona tuʼasila pea mo fakatokaga age ki ai ke tuku tana fai fakamafola ʼi te kolo. Neʼe faikole te tuagaʼane kiā Sehova ke tokoni age pea neʼe ina manatuʼi te ʼu palalau ʼaenī ʼa Sesu: “ ʼAua naʼa kotou manavasiʼi kiā nātou ʼaē ʼe natou tāmateʼi te sino.” (Mat. 10:28) ʼAki he loto fakatokatoka, neʼe tuʼu ake te tuagaʼane pea mo ina ʼui fēnei age ki te tagata: “ ʼE mole au foaki atu anai toku tuʼasila, pea ʼe hoko atu pē anai taku fai fakamafola ʼi te kolo.” ʼOsi ʼaia pea hifo te tuagaʼane ʼi te kā. Neʼe mole ʼiloʼi e te tuagaʼane, neʼe heka pē ʼi te kā ʼaia ia te fafine neʼe ako mo ia te Tohi-Tapu. Ko te fafine ʼaia neʼe mole feala hana kau ki te ʼu fono he neʼe lahi fau tana tuʼaniaʼi te hahaʼi. Kae ʼi tana sio leva ʼaē ki te lototoʼa ʼo totatou tuagaʼane, neʼe ina fakatotonu ai ke ʼalu ki te ʼu fono.

18. Koteā ʼaē kā tokoni atu anai ke kotou fai fakamafola ohagē ko Sesu ʼaki he lototoʼa?

¹⁸ ʼI te mālama agakovi ʼaenī, ʼe tonu ke kita lototoʼa ohagē ko Sesu moʼo fakamafola te logo lelei. Koteā ʼaē kā tokoni atu anai kiā koutou? Kotou sisio ki te kā haʼu. Kotou taupau maʼu tokotou ʼofa ʼaē ki te ʼAtua pea mo te kāiga, ke mālohi. Kotou faikole kiā Sehova ke kotou maʼu ia te lototoʼa. Kotou manatuʼi tuʼumaʼu, ʼaua naʼa kotou falala fau kiā koutou totonu pē, heʼe ko Sesu ʼe nofo mo koutou. (Mat. 28:20) Ko te laumālie māʼoniʼoni ʼe ina fakalotomālohiʼi anai koutou. Pea ko Sehova ʼe ina tapuakina anai koutou pea mo tokoni atu. Koia, ʼofa pē ke kotou lototoʼa pea mo ʼui fēnei: “Ko Sehova ʼe ko toku tokoni, ʼe mole au mataku anai. Koteā ʼaē ʼe lava fai mai e he tagata?”—Hep. 13:6.

ʼE Kotou Tali Feafeaʼi Anai?

• He koʼē ʼe ʼaoga ia te lototoʼa ki te ʼu kaugana ʼa te ʼAtua?

• ʼO ʼuhiga mo te lototoʼa, koteā te ako ʼe tou maʼu mai . . .

te ʼu kaugana agatonu ʼaē neʼe māʼuʼuli ʼi muʼa ʼo te temi ʼo Kilisito?

iā Sesu Kilisito?

te kau ʼuluaki Kilisitiano?

totatou ʼu tehina mo tuagaʼane ʼo te temi nei?

[ʼU fehuʼi ʼo te ako]

[Paki ʼo te pasina 25]

Neʼe mole fula Sesu ʼi te fakahā ʼo te aga fakakākā ʼa te kau takitaki lotu

[Paki ʼo te pasina 26]

ʼE foaki mai e Sehova ia te lototoʼa ki te fai fakamafola