Ke Maʼuhiga Kiā Koutou Takotou Gāue ʼi Te Kōkelekāsio

“Neʼe faʼu e te ʼAtua ia te ʼu koga kehekehe ʼi te sino, ʼo tahi faʼu ʼo mulimuli ki tona loto.”—1 KO. 12:18.

1, 2. (a) Koteā ʼaē ʼe hā mai ai ko te hahaʼi fuli pē ʼi te kōkelekāsio ʼe feala ke maʼuhiga kiā nātou te gāue ʼaē ʼe natou fai? (b) Koteā te ʼu fehuʼi ʼaē kā tou vakaʼi anai ʼi te ʼalatike ʼaenī?

 TALU mai te temi ʼo Iselaele, neʼe fakaʼaogaʼi e Sehova ia te kōkelekāsio moʼo fafaga tana hahaʼi ʼi te faʼahi fakalaumālie pea mo takitaki nātou. Ohagē lā, ʼi te kua ʼosi fakaʼauha e te kau Iselaele ia te kolo ʼo Ai, ko Sosue neʼe ina “lau leʼolahi te ʼu folafola fuli ʼo te lao, te tapuakina pea mo te malaʼia, ʼo mulimuli kiā meʼa fuli ʼaē neʼe tohi ʼi te tohi ʼo te lao . . . iā muʼa ʼo te kōkelekāsio kātoa ʼo Iselaele.”—Sos. 8:34, 35.

² ʼI te ʼuluaki sēkulō ʼo totatou temi, neʼe ʼui e te ʼapositolo ko Paulo ki te tagata ʼāfea Kilisitiano ko Timoteo, ko te kōkelekāsio neʼe ko “te fale ʼo te ʼAtua” pea ko “he pou pea mo he lagolago ki te moʼoni.” (1 Tim. 3:15) Ko te “fale” ʼo te ʼAtua iā ʼaho nei ʼe ko te fale tautēhina fakamālamanei ʼo te kau Kilisitiano moʼoni. ʼI te kāpite 12 ʼo tana ʼuluaki tohi ki te kau Kolonito, ʼaki te takitaki ʼa te laumālie, neʼe fakatatau e Paulo ia te kōkelekāsio ki he sino. ʼE ina ʼui, tatau aipē peʼe ko te ʼu koga takitahi ʼo te sino ʼe kehekehe tanatou ʼu gāue, kae ʼe natou ʼaoga fuli. ʼE tohi fēnei e Paulo: “Neʼe faʼu e te ʼAtua ia te ʼu koga kehekehe ʼi te sino, ʼo tahi faʼu ʼo mulimuli ki tona loto.” ʼE ina toe fakahā ko “te ʼu koga ʼo te sino ʼaē ʼe tou manatu ʼe mole faʼa maʼuhiga, ko nātou ʼaia ʼaē ʼe tou fakamaʼuhiga lahi age.” (1 Ko. 12:18, 23) Koia, ko te gāue ʼaē ʼe fai e he tahi ʼe faitotonu ʼi te fale ʼo te ʼAtua, ʼe mole ʼui anai ʼe lelei age ia peʼe kovi age ia, ʼi he gāue ʼe fai e  he tahi Kilisitiano agatonu. ʼE kehekehe pē ia tanā gāue. Koia, ʼe lava feafeaʼi hatatou maʼu hatatou gāue ʼi te fakatuʼutuʼu ʼa te ʼAtua pea ke maʼuhiga kiā tātou? Ko te ʼu ʼaluʼaga fea ʼaē ʼe feala ai ke kehekehe ia tatatou gāue ʼaē ʼe tou fai ʼi te kōkelekāsio? Pea ʼe lava feafeaʼi ke ‘ ʼiloga ki te hahaʼi fuli tatatou hikihiki ki muʼa’?—1 Tim. 4:15.

ʼE Lava Maʼuhiga Feafeaʼi Kiā Tātou Ia Te ʼu Gāue ʼAē ʼe Tou Fai ʼi Te Kōkelekāsio?

 3. Ko te faʼahi fea ʼe feala ke tou fai ke ʼi ai hotatou ʼaoga ʼi te kōkelekāsio pea mo tou fakahā ʼe maʼuhiga kiā tātou?

³ Ko te faʼahi ʼe feala ke tou fai ke ʼi ai hotatou ʼaoga ʼi te kōkelekāsio pea mo tou fakahā ʼe maʼuhiga kiā tātou, ʼe ko hatatou lagolago kātoa ki “te tagata kaugana agatonu mo poto” pea mo te Kolesi Pule ʼaē ʼe ina fakafofoga ia ia. (Lau ia Mateo 24:45-47.) ʼE tonu ke tou vakavakaʼi peʼe feafeaʼi tatatou tali ia te takitaki ʼaē ʼe haʼu mai te kalasi ʼo te tagata kaugana. Ohagē lā, talu mai fualoa, neʼe foaki mai he ʼu tokoni ʼo ʼuhiga mo te ʼu mutuʼi meʼa pea mo te faʼu ʼo totatou lauʼulu, mo te ʼu fakafiafia, pea mo te fakaʼaogaʼi kovi ʼo te Neti. ʼE kei tou fakalogo koa ki te ʼu tokoni lelei ʼaia ke feala ai hotatou puipui ʼi te faʼahi fakalaumālie? ʼE feafeaʼi ki te tokoni ʼaē ke fai tuʼumaʼu ia te tauhi fakafāmili? Neʼe tou tali koa ʼaki totatou loto kātoa ia te tokoni ʼaia pea mo taupau he afiafi ki te faʼahi ʼaia? Kapau ʼe tou selipatea, ʼe tou fakaʼaogaʼi koa he temi ki te ako tokotahi ʼo te Tohi-Tapu? ʼE tapuakina anai e Sehova ia tātou takitokotahi pea mo totatou fāmili, mo kapau ʼe tou mulimuli ki te takitaki ʼa te kalasi ʼa te tagata kaugana.

 4. Kā tou filifili he ʼu meʼa ʼa tātou takitokotahi, koteā ʼaē ʼe tonu ke tou tokagaʼi?

⁴ ʼE lagi ʼi te manatu ʼa ʼihi, ko te ʼu faʼahi ohagē lā ko te ʼu fakafiafia, mo te ʼu mutuʼi meʼa pea mo te faʼu ʼo te lauʼulu ʼe fakalogo pē ia kiā tātou takitokotahi. Kae maʼa te Kilisitiano ʼaē kua papitema, ʼaē ʼe maʼuhiga kiā ia tana gāue ʼi te kōkelekāsio, ko te ʼu tonu ʼaē ʼe ina fai ʼe mole tonu ke mulimuli pē ki te ʼu meʼa ʼaē ʼe ina leleiʼia. ʼE tonu ke tou tokagaʼi tāfito ia te manatu ʼa Sehova ohagē ko tona fakahā ʼi tana Folafola, te Tohi-Tapu. Ko te logo ʼaē ʼe tuʼu ʼi te Tohi-Tapu, ʼe tonu ke liliu ko ‘he mālama taki ki totatou ʼu vaʼe pea mo he mālama ki totatou ʼu ala.’ (Pes. 119:105) ʼE tou toe aga fakapotopoto foki mokā tou fakakaukauʼi peʼe malave feafeaʼi ia te ʼu meʼa ʼaē ʼe tou filifili ki tatatou minisitelio pea mo te kōkelekāsio pea mo nātou ʼaē ʼi te mālama.—Lau ia 2 Kolonito 6:3, 4.

 5. He koʼē ʼe tonu ke tou tōkakaga naʼa tuputupu ʼi totatou loto ia te fia talagataʼa?

⁵ Ko “te laumālie ʼaē ʼe gāue ʼi te temi nei ki te ʼu foha ʼo te talagataʼa” ʼe kua mafola lahi ohagē pē ko te ʼaele ʼaē ʼe tou mānava kiai. (Efe. 2:2) Ko te laumālie ʼaia, ʼe feala ke ina uga tātou ke tou manatu ʼe mole ʼaoga kiā tātou ia te takitaki ʼa te kautahi ʼa Sehova. ʼE mahino ia ʼe mole tou fia hagē ko Tiotefeso, ʼaē neʼe mole ina ‘tali fakaʼapaʼapa he meʼa mai te ʼapositolo ko Soane.’ (3 Soa. 9, 10) ʼE tonu ke tou tōkakaga naʼa tuputupu ʼi totatou loto ia te fia talagataʼa. ʼOfa pē ke mole tou fai he ʼu palalau peʼe ko he ʼu aga ʼe fakahā ai ia tatatou mole fakaʼapaʼapa ki te kautahi ʼaē ʼe fakaʼaogaʼi iā ʼaho nei e Sehova. (Fkau. 16:1-3) Kae ʼe tonu ke tou fakamaʼuhigaʼi ia tatatou pilivilēsio ʼaē ke tou gāue tahi mo te kalasi ʼo te tagata kaugana. Pea ʼe mole tonu koa ke tou faiga ʼo fakalogo pea mo talagafua kiā nātou ʼaē ʼe natou takitaki tātou ʼi te kōkelekāsio?—Lau ia Hepeleo 13:7, 17.

 6. He koʼē ʼe tonu ke tou fakakaukauʼi ia totatou ʼu ʼaluʼaga takitokotahi?

⁶ Ko te tahi faʼahi moʼo fakahā ʼe maʼuhiga kiā tātou tatatou gāue ʼi te kōkelekāsio, ʼe ko tatatou vakavakaʼi fakalelei ia totatou ʼaluʼaga pea mo tou fai ia meʼa fuli ʼe tou lavaʼi moʼo ‘fakakolōliaʼi ia tatatou minisitelio’ pea mo fakamaʼuhigaʼi ia Sehova. (Loma 11:13) ʼE maʼu e ʼihi ia te fealagia ʼaē ke natou pioniē kātoa. Ko ʼihi ʼe natou kau ki te ʼu selevisi makehe temi kātoa, ʼo nātou misionea, mo taupau feʼoloʼaki, pea mo kau ki te ʼu fāmili ʼo te Petele ʼi te mālamanei kātoa. Tokolahi te ʼu tehina mo tuagaʼane ʼe natou tokoni ki te ʼu laga ʼo te ʼu Fale ʼo te Puleʼaga. Ko te tokolahi ʼi te hahaʼi ʼa Sehova ʼe natou faiga lahi ke natou tōkakaga ki tonatou ʼu fāmili ʼi te faʼahi fakalaumālie pea natou kau lahi ki te minisitelio ʼi te vāhaʼa fuli. (Lau ia Kolose 3:23, 24.) ʼE feala hatatou falala, kapau ʼe tou foaki ia kita totonu ʼaki he lotolelei moʼo tauhi ki te ʼAtua pea mo tou faiga mālohi ke tou tauhi kiā te ia ʼaki totatou nefesi kātoa, ʼe ʼi ai pē anai he gāue maʼa tātou ʼi tana fakatuʼutuʼu.

 Te ʼu ʼAluʼaga ʼAē ʼe Kehekehe Ai Tatatou Gāue ʼAē ʼi Te Kōkelekāsio

 7. Kotou fakamahino peʼe lava feafeaʼi ke kehekehe ia tatatou ʼu gāue ʼi te kōkelekāsio ʼuhi ko totatou ʼu ʼaluʼaga.

⁷ ʼE maʼuhiga ke tou vakavakaʼi fakalelei ia totatou ʼu ʼaluʼaga, heʼe fakalogo kiai ia te ʼu gāue ʼaē ʼe feala ke tou fai ʼi te kōkelekāsio. Ohagē lā, ko te ʼu gāue ʼaē ʼe maʼu e he tehina ʼi te kōkelekāsio ʼe mole tatau anai ia mo ʼihi gāue kā fai anai e he tuagaʼane. Ko totatou taʼu, mo totatou mālohi, pea mo ʼihi atu ʼu ʼaluʼaga ʼe toe malave ki te meʼa ʼaē ʼe tou lava fai ʼi te tauhi kiā Sehova. ʼE ʼui fēnei iā Tāʼaga Lea 20:29: “Ko te matalelei ʼa te hahaʼi tūpulaga, ko tonatou mālohi, pea ko te taulekaleka ʼa te hahaʼi mātutuʼa, ko tonatou ʼu lauʼulu hina.” Ko te kau tūpulaga ʼo te kōkelekāsio ʼe feala ke lahi age te ʼu meʼa ʼaē ʼe natou fai heʼe natou maʼu ia te mālohi ʼo te temi tūpulaga, kae ko te hahaʼi mātutuʼa ʼe ʼi ai tonatou ʼaoga lahi ʼi te kōkelekāsio ʼuhi ko tanatou kua aga fakapotopoto pea kua lahi mo te ʼu meʼa kua natou mahino kiai neʼe hoko ʼi tonatou maʼuli. ʼE toe ʼaoga ke tou manatuʼi ko meʼa fuli pē ʼaē ʼe tou lava fai ʼi te kautahi ʼa Sehova ʼe fakalogo ki te ʼofa makehe ʼo te ʼAtua.—Gāue 14:26; Loma 12:6-8.

 8. ʼE malave feafeaʼi te ʼu meʼa ʼaē ʼe tou holi kiai ki te ʼu meʼa ʼaē ʼe tou fai ʼi te kōkelekāsio?

⁸ Ko te faʼifaʼitaki ʼa te tautēhina kei finemui ʼe fakahā lelei ai ia te tahi faʼahi ʼe feala ke kehekehe ai ia te ʼu gāue ʼaē kā tou maʼu anai ʼi te kōkelekāsio. Ko nāua toko lua neʼe nā maʼu pepa ʼi te ʼu kalasi lalahi. Neʼe tatau tonā ʼu ʼaluʼaga. Ko tanā ʼu mātuʼa neʼe nā tokaga tuʼumaʼu ʼo fakalotomālohiʼi ia nāua toko lua ke nā pioniē kātoa mokā kua maʼu tonā ʼu pepa ʼaē ʼi te faleako. ʼI tanā ʼosi maʼu tonā ʼu pepa, neʼe toʼo e te tahi te selevisi pioniē kae ko te tahi neʼe kamata gāue temi kātoa ʼi te mālama. Neʼe koteā ʼaē neʼe nā kehekehe ai? Neʼe ko te meʼa ʼaē neʼe nā holi kiai. Ki muli age, neʼe nā tahi fai te meʼa ʼaē neʼe nā loto kiai. ʼE mole fēia koa mo te tokolahi iā tātou? ʼE tonu ke tou fakakaukauʼi lelei ia te ʼu gāue ʼaē ʼe tou fia fai ʼi tatatou tauhi ʼaē ki te ʼAtua. ʼE feala koa ke lahi age tatatou ʼu gāue fakalaumālie, tatau aipē peʼe tonu ke tou fai he ʼu fetogi ʼi totatou maʼuli?—2 Ko. 9:7.

9, 10. Koteā ʼaē ʼe tonu ke tou fai mo kapau ʼe mole lahi tatatou fia gāue ʼaē ʼi te tauhi kiā Sehova?

⁹ ʼE feafeaʼi mo kapau ʼe tou fakaʼauʼauganoa pē tātou ke mole lahi ia tatatou gāue ʼaē ʼi te tauhi kiā Sehova pea mo fakatuʼakoi pē tatatou ʼu gāue ki te ʼu meʼa ʼaē kua hinoʼi mai pē ʼi te kōkelekāsio? ʼI tana tohi ki te kau Filipe, ʼe ʼui fēnei e Paulo: “Ko te ʼAtua ʼi tona lotolelei, ʼe gāue ʼi ʼokotou ʼu loto koteʼuhi ke kotou fia fai pea mo kotou gāue ai.” ʼEī, ʼe feala ke gāue Sehova ʼi ʼokotou loto pea mo uga tokotou loto kiai, peʼe ko tokotou ʼu holi.—Filp. 2:13; 4:13.

¹⁰ Koia ʼaē ʼe tonu ai ke tou kole kiā Sehova ke gāue ki totatou loto ke tou fia fai ia tona finegalo. Neʼe fai e te Hau ʼo Iselaele ko Tavite ia te kole ʼaia. Neʼe faikole fēnei: “Fakahā mai kiā te au tou ʼu ala, Ê Sehova! Akoʼi mai kiā te au tou ʼu haʼeleʼaga. Fakahaʼele au ʼi tau moʼoni pea ke ke akoʼi au, he ko koe ko toku ʼAtua ʼo te haofaki. Pea neʼe au falala aipē kiā te koe ʼi te ʼaho kātoa.” (Pes. 25:4, 5) ʼE feala mo tātou ke tou fai ia te kole ʼaia, ke gāue Sehova ki totatou loto ke tou fia fai ia te meʼa ʼaē ʼe ina leleiʼia. Kā tou fakakaukauʼi peʼe feafeaʼi te loto ʼo Sehova ʼAtua pea mo tona ʼAlo ki te ʼu meʼa ʼaē ʼe tou fai moʼo tokaga ki tonā ʼu koloa, ʼe tou fonu ai ʼi te loto fakafetaʼi kiā nāua. (Mat. 26:6-10; Luka 21:1-4) Ko te loto fakafetaʼi ʼaia ʼe feala ke ina uga tātou ke tou kole mamahi kiā Sehova ke gāue ki totatou loto ke lahi age te ʼu gāue ʼaē ʼe tou fia fakahoko maʼa ia. Neʼe tuku mai e te polofetā ko Isaia ia he faʼifaʼitaki ʼo ʼuhiga mo te aga ʼaē ʼe tonu ke tou maʼu. ʼI tana logo ki te leʼo ʼo Sehova ʼe ina fehuʼi fēnei: “Ko ai anai kā au fekauʼi pea mo ʼalu anai maʼa tātou?” neʼe tali fēnei e te polofetā: “Koʼenī au! Fekauʼi au.”—Isa. 6:8.

ʼE Feafeaʼi Hatatou Hikihiki Ki Muʼa?

11. (a) He koʼē ʼe ʼaoga ki te ʼu tehina ke natou fakahoko ia te ʼu maʼua ʼaē ʼi te kautahi? (b) ʼE lava maʼu feafeaʼi e he tehina ia he ʼu pilivilēsio gāue ʼi te kōkelekāsio?

¹¹ ʼAki te hahaʼi ʼe toko 289 678 ʼaē neʼe papitema ʼi te mālamanei kātoa lolotoga te taʼu gāue 2008, ʼe hā lelei mai ia te ʼaoga lahi ʼaē ʼo he ʼu tehina moʼo takitaki te gāue. Koteā ʼaē ʼe tonu ke fai e he tehina moʼo tali ki te faʼahi ʼaia? Moʼo fakanounou tona tali, ʼe tonu ke faiga ke mulimuli ki te ʼu fakamaʼua ʼaē ke liliu ko he tagata faifekau fakaminisitelio pea mo tagata ʼāfea ohagē ko tona ʼui ʼi te Tohi-Tapu. (1 Tim. 3:1-10, 12, 13; Tito 1:5-9) ʼE feafeaʼi ki he tehina hana faiga ke mulimuli ki te ʼu fakamaʼua ʼaē ʼe tuʼu ʼi te Tohi-Tapu? ʼO kau lahi ki  te minisitelio, ʼo ina fakahoko fakalelei tana ʼu gāue ʼi te kōkelekāsio, ʼo gāue mālohi moʼo hikihiki te lelei ʼo tana ʼu tali ʼi te ʼu fono, pea mo tokaga lelei ki te ʼu tehina mo tuagaʼane. ʼE ina fakahā ai ʼe maʼuhiga kiā ia tana kau ʼaē ki te kōkelekāsio.

12. ʼE lava fakahā feafeaʼi e te kau tūpulaga tanatou faʼafai maʼa te moʼoni?

¹² Koteā ʼaē ʼe feala ke fai e te ʼu tehina tūpulaga, tāfito ia nātou ʼaē kei ako, moʼo hikihiki ki muʼa ʼi te kōkelekāsio? ʼE feala ke natou faiga lahi ʼo tuputupu ʼi “te poto pea mo te mahino fakalaumālie” ʼaki tanatou ako ʼaē ke natou ʼiloʼi lelei ia te Tohi-Tapu. (Kol. 1:9) ʼE natou lava fakahoko ia te faʼahi ʼaia, mo kapau ʼe natou ako lahi ia te Folafola ʼa te ʼAtua pea mo natou fai hanatou ʼu tali ʼi te ʼu fono. Ko te hahaʼi tagata ʼaē kei tūpulaga ʼe toe feala foki ke natou fakahoko te faʼahi ʼaia, ʼaki hanatou gāue ke feala hanatou hū ʼi te “matapā lahi ki te gāue” ʼi te ʼu faʼahi kehekehe ʼo te selevisi temi kātoa. (1 Ko. 16:9) Ko te fia tuputupu ʼaē ʼi te tauhi kiā Sehova ʼe ko te maʼuli fakafiafia moʼoni ʼaia pea ʼe iku ia ki he ʼu tapuakina lahi.—Lau ia Tagata Tānaki 12:1.

13, 14. Ko te ʼu faʼahi fea ʼaē ʼe feala ai ke fakahā e he ʼu tuagaʼane ʼe maʼuhiga kiā nātou ia tanatou ʼu gāue ʼi te kōkelekāsio?

¹³ Ko te ʼu tuagaʼane ʼe toe feala foki ke natou fakahā ʼe maʼuhiga kiā nātou ia tanatou pilivilēsio ʼaē ke natou fakahoko ia te Pesalemo 68:11. ʼE tou lau fēnei ai: “ ʼE fakahā totonu e Sehova te folafola; ko nātou fafine ʼaē ʼe natou fagonogono te logo lelei ko he foʼi kautau lahi.” Ko te faʼahi maʼuhiga ʼe lava fakahā ai e te ʼu tuagaʼane ia tanatou loto fakafetaʼi ʼaē ʼi tanatou kau ki te kōkelekāsio, ʼe ko tanatou lagolago ki te gāue ʼo te fai ʼo he ʼu tisipulo. (Mat. 28:19, 20) Koia, ko tanatou lagolago mālohi ki te minisitelio pea mo natou lotolelei ʼo fai he ʼu sākilifisio maʼa te gāue ʼaia, ʼe fakamoʼoni ai e te ʼu tuagaʼane ʼe maʼuhiga kiā nātou ia tanatou gāue ʼaē ʼi te kōkelekāsio.

¹⁴ ʼI tana faitohi kiā Tito, neʼe ʼui fēnei e Paulo: “[Ko] te kau finemātuʼa, ke natou fai he aga ʼo he ʼu hahaʼi ʼe natou fakaʼapaʼapa ki te ʼAtua, . . . ʼe natou akoʼi ki ʼihi te meʼa ʼaē ʼe lelei; koteʼuhi ke natou toe taki mai te ʼu fafine finemui ʼo fakapotopoto, ke natou ʼoʼofa ki tonatou ʼu ʼohoana, ʼoʼofa ki tanatou ʼu fānau, ke natou aga fakapoipoi, aga maʼa, ko he ʼu fafine faʼa gāue ʼi te loto fale, agalelei, ke natou fakalogo ki ʼonatou ʼohoana, ke ʼaua naʼa fai he palalau ʼe kovi ki te folafola ʼa te ʼAtua.” (Tito 2:3-5) ʼE feala ki te ʼu tuagaʼane ʼaē kua fotufotuʼa fakalaumālie ke natou fakalotomālohiʼi te kōkelekāsio ki he ʼu gāue ʼe lelei. ʼAki tanatou fakaʼapaʼapa ki te ʼu tehina ʼaē ʼe natou takitaki pea mo tanatou fai he ʼu tonu fakapotopoto ʼi te ʼu faʼahi ʼo te maʼuli ohagē ko te ʼu mutuʼi meʼa pea mo te faʼu ʼo te lauʼulu pea mo te ʼu fakafiafia, ʼe natou tuku ai he faʼifaʼitaki lelei ki ʼihi, pea mo natou fakamaʼuhigaʼi ai tanatou kau ʼaē ki te kōkelekāsio.

15. Koteā ʼaē ʼe feala ke fai e he tuagaʼane moʼo tauʼi ia tana maʼuli tokotahi?

¹⁵ ʼI ʼihi temi, ʼe lagi faigataʼa ki he tuagaʼane mole heʼeki ʼohoana hana kau ki te kōkelekāsio. Ko te tuagaʼane neʼe hoko kiā ia te meʼa ʼaia, neʼe ina ʼui fēnei: “Ko te maʼuli selipatea ʼe feala ʼi ʼihi temi ke kotou logoʼi ʼe kotou maʼuli tokotahi.” ʼI te fehuʼi age ʼaē peʼe feafeaʼi tana tauʼi ia te ʼaluʼaga ʼaia, neʼe ina ʼui fēnei: “Ko te faikole pea mo te ako neʼe tokoni mai ke au toe logoʼi ia taku ʼaoga ʼi te kōkelekāsio. ʼE au ako ke au mahino peʼe koteā ia te manatu ʼa Sehova ʼo ʼuhiga mo au. Pea ʼe au faiga ke au tokoni ki niʼihi ʼi te kōkelekāsio. Ko he faʼahi ʼe tokoni mai kiā au ke mole au manatu pē kiā au totonu.” ʼO mulimuli kiā Pesalemo 32:8, neʼe ʼui fēnei e Sehova kiā Tavite: “ ʼE au foaki atu anai he ʼu tokoni, ʼo au leʼoleʼo koe.” ʼEī, ʼe tokaga ia Sehova totonu ki tana ʼu kaugana fuli, ʼo kau ai mo te ʼu tuagaʼane selipatea, pea ʼe tokoni anai kiā nātou fuli ʼaia ke natou mahino ki tonatou maʼuhiga ʼaē ʼi te kōkelekāsio.

 Kotou Haga Fai Takotou ʼu Gāue ʼAē ʼi Te Kōkelekāsio!

16, 17. (a) He koʼē ko tatatou tali ia te fakaafe ʼa Sehova ke tou kau ki tana kautahi, neʼe ko te tonu lelei pē ʼaia ʼe tahi neʼe tou fai? (b) ʼE tou lava hoko atu feafeaʼi ia tatatou ʼu gāue ʼi te kautahi ʼa Sehova?

¹⁶ Ko Sehova, ʼi tona ʼofa, neʼe ina taki mai kiā te ia tana ʼu kaugana takitokotahi ke natou felōgoi lelei mo ia. Neʼe ʼui fēnei e Sesu: “ ʼE mole he tahi ʼe feala ke haʼu kiā te au, mo kapau ko te Tamai ʼaē neʼe ina fekauʼi mai au ʼe mole ina taki mai ia ia.” (Soa. 6:44) ʼI te lauʼi miliale hahaʼi fuli ʼaē ʼi te kele, neʼe fai mai e Sehova ia te fakaafe kiā tātou takitokotahi ke tou kau ki tana kōkelekāsio iā ʼaho nei. ʼI tatatou tali ia te fakaafe ʼaia, neʼe tou fakahā ai ʼe ko he tonu lelei ʼaia neʼe tou fai. Kua ina foaki ki totatou maʼuli hona ʼaoga pea mo hona ʼuhiga. Pea ʼe tou fiafia lahi heʼe ʼi ai totatou ʼaoga ʼi te kōkelekāsio.

¹⁷ Neʼe ʼui fēnei e te tagata fai pesalemo: “Sehova, ʼe au manako ki te nofoʼaga ʼo tou ʼapi. . . . ʼE tuʼu anai ia toku vaʼe ʼi he koga meʼa lafalafa; ʼe au fakavikiviki anai kiā Sehova ʼi te lotolotoiga ʼo te hahaʼi ʼaē ʼe fakatahitahi.” (Pes. 26:8, 12) Ko te ʼAtua moʼoni ʼe ina foaki mai kiā tātou takitokotahi ia tatatou gāue ʼi tana kautahi. Kapau ʼe tou haga mulimuli ki te takitaki fakateokalatike pea mo nonofo maʼumaʼua ʼi te gāue maʼa te ʼAtua, pea ʼe tou lava hoko atu anai tatatou ʼu gāue ʼaē ʼi te fakatuʼutuʼu ʼa Sehova.

ʼE Kei Kotou Manatuʼi Koa?

• He koʼē ʼe fakapotopoto te ʼui ʼaē, ko te kau Kilisitiano fuli ʼi te kōkelekāsio ʼe ʼi ai tanatou gāue?

• ʼE tou lava fakahā feafeaʼi ʼe maʼuhiga kiā tātou tatatou ʼu gāue ʼaē ʼi te kautahi ʼa te ʼAtua?

• Ko te ʼu ʼaluʼaga fea ʼaē ʼe feala ai ke kehekehe tatatou ʼu gāue ʼaē ʼe tou fai ʼi te kōkelekāsio?

• ʼE lava fakahā feafeaʼi e te kau Kilisitiano tūpulaga pea mo nātou kua lalahi, ʼe maʼuhiga kiā nātou tanatou ʼu gāue ʼaē ʼi te fakatuʼutuʼu ʼa te ʼAtua?

[ʼU fehuʼi ʼo te ako]