Koteā ʼAē ʼe Hā ʼo ʼUhiga Mo Koutou Mokā Kotou Faikole?

“Ê Ia koe ʼaē ʼe fagono ki te faikole, ʼio, ʼe ʼolo atu anai kiā te koe ia te hahaʼi ʼo te kakano fuli pē.”—PES. 65:2.

1, 2. He koʼē ʼe feala ki te ʼu kaugana ʼa Sehova ke natou loto falala mokā natou faikole kiā te ia?

 KO SEHOVA ʼe fakalogo tuʼumaʼu pē ki te ʼu faikole ʼo tana ʼu kaugana agatonu. ʼE tou lava falala ʼe fakalogo mai kiā tātou. Tatau aipē peʼe faikole ia te ʼu toko lauʼi miliona kau Fakamoʼoni ʼa Sehova ki te ʼAtua ʼi he moʼi temi pē e tahi, kae ʼe feala pē hana fakalogo kiā tātou takitokotahi.

² ʼI tana falala ʼaē ʼe fakalogo ia te ʼAtua ki tana ʼu kolekole, neʼe hiva fēnei ai ia te tagata fai pesalemo ko Tavite: “Ê Ia koe ʼaē ʼe fagono ki te faikole, ʼio, ʼe ʼolo atu anai kiā te koe ia te hahaʼi ʼo te kakano fuli pē.” (Pes. 65:2) Neʼe tali e te ʼAtua ia te ʼu faikole ʼa Tavite he neʼe ʼatolasio agatonu age ia kiā te ia. ʼE tonu ke tou fai e tātou takitokotahi ia te ʼu fehuʼi ʼaenī: ‘ ʼE hā koa ʼi taku ʼu faikole ʼe au falala kiā Sehova pea mo au fakamuʼamuʼa tāfito ia te tauhi maʼa? Koteā ʼaē ʼe hā ʼo ʼuhiga mo au mokā au faikole?’

Tou Fakaovi Kiā Sehova ʼAki He Agavaivai

3, 4. (a) ʼE tonu ke tou feafeaʼi mokā tou fakaovi ki te ʼAtua ʼi te faikole? (b) Koteā ʼaē ʼe tonu ke tou fai mo kapau ʼe tou hoha ʼuhi ko he “ ʼu manatu . . . ʼe ʼepu” he neʼe tou agahala mamafa?

³ Kapau ʼe tou loto ke tali e te ʼAtua ia tatatou ʼu kole, pea ʼe tonu ke tou fakaovi kiā te ia ʼaki he agavaivai. (Pes. 138:6) ʼE tonu ke tou kole kiā Sehova ke ina vakavakaʼi ia tātou, ohagē ko Tavite ʼi tana ʼui ʼaenī: “Sivisivi au, Ê ʼAtua, pea ke ke ʼiloʼi toku loto. Vakavakaʼi ia au, pea ke ke ʼiloʼi taku ʼu manatu ʼaē ʼe ʼepu, mo ke sio peʼe ʼi ai he ala fakatupu mamahi iā te au, pea mo taki au ʼi te ala ʼo te ʼu temi ʼaē ʼe mole hona gataʼaga.” (Pes. 139:23, 24) ʼE mole gata pē ki tatatou kole ʼaē ke vakavakaʼi tātou e Sehova, kae ʼe tonu foki ke tou tali ke ina vakavakaʼi tātou pea mo tou fakalogo ki te tokoni ʼo tana Folafola. ʼE feala ke taki tātou e Sehova ki “te ala ʼo te ʼu temi ʼaē ʼe mole hona gataʼaga,” ʼaki hana tokoni mai ke tou haga haʼele ʼi te ala ʼaē ʼe ina taki tātou ki te maʼuli heʼegata.

⁴ ʼE feafeaʼi mo kapau ʼe tou hoha ʼuhi ko he “ ʼu manatu . . . ʼe ʼepu” he neʼe tou agahala mamafa? (Lau ia Pesalemo 32:1-5.) Kapau ʼe mole tou tokagaʼi ia te tukugākoviʼi ʼaē ʼo kita e totatou leʼo ʼo loto, pea ʼe feala anai ke tou vaivavai ohagē ko he fuʼu ʼakau ʼe magemage ʼi te temi ʼaē ʼe vevela kovi ai. Neʼe mole kei fiafia ia Tavite pea neʼe lagi mahaki ʼuhi ko tana agahala. Kae neʼe ina maʼu ia he toe lotofīmālie lahi ʼi tana vetevete ʼaē ki te ʼAtua ia tana agahala! Kotou fakakaukauʼi age muʼa ia te fiafia ʼaē neʼe maʼu e Tavite ʼi tana logoʼi ʼaē ko ‘tana talagataʼa neʼe kua fakatokatoka’ pea kua fakamolemole e Sehova kiā ia. Kā vetevete e he tahi ia tana agahala ki te ʼAtua ʼe ina maʼu ai he lotofīmālie, pea ʼe toe ʼaoga pē mo te tokoni ʼa te kau tagata ʼāfea Kilisitiano kiā ia ʼaē neʼe hehē, ke toe felōgoi lelei ai mo Sehova.—Taag. 28:13; Sake 5:13-16.

Tou Kole Mamahi Ki Te ʼAtua Pea Mo Tou Fakafetaʼi Kiā Te Ia

 5. Koteā te fakaʼuhiga ʼo te kole mamahi kiā Sehova?

⁵ Kapau ʼe lahi fau ia tatatou loto tuʼania, pea ʼe tonu ke tou mulimuli ki te tokoni ʼaenī ʼa Paulo: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole.” (Filp. 4:6) ʼE fakaʼuhiga ia he “kole mamahi” ʼa he tahi, ki hana “fai ʼo he kolekole agavaivai.” Tāfito lā ʼi te temi tuʼutāmaki peʼe ko te fakataga, ʼe tonu ai ke tou kole mamahi kiā Sehova ke tokoni mai pea mo ina takitaki tātou.

6, 7. Ko te ʼu faʼahi fea ʼaē ʼe tonu ke tou fakafetaʼi kiai mokā tou faikole?

⁶ Kae kapau ʼe tou faikole pē tātou ʼi te temi ʼaē ʼe tou loto ai ki he meʼa, koteā ʼaē ʼe hā ai ʼo ʼuhiga mo tatatou ʼu felōgoi mo Sehova? Neʼe ʼui e Paulo  ʼe tonu ke tou fakahā ki te ʼAtua tatatou ʼu faikole ‘ ʼaki he loto fakafetaʼi.’ ʼE mahino ia ʼe ʼi ai te ʼu faʼahi ʼe feala ke tou fakafetaʼi kiai, ohagē ko Tavite, ʼaē neʼe ina ʼui fēnei: “ ʼA koe, Ê Sehova, te māʼoluga, mo te mālohi, mo te taulekaleka, mo te takimuʼa, pea mo te ʼalikisia; he ko meʼa fuli ʼi te lagi pea mo te kele ʼe ʼa koe. ʼE ʼa koe te puleʼaga, Ê Sehova, ia Ia ʼaē ʼe ke toe hikihiki koe ko he pule kiā meʼa fuli. . . . Ê tomatou ʼAtua, ʼe matou fakafetaʼi kiā te koe pea mo matou fakavikiviki ki tou huafa taulekaleka.”—1 Fkma. 29:11-13.

⁷ Neʼe fakafetaʼi Sesu ki te ʼAtua ʼo ʼuhiga mo te meʼa kai, mo te pane pea mo te vino ʼaē neʼe fakaʼaogaʼi ʼi te Taumafa ʼo te ʼAliki. (Mat. 15:36; Mko. 14:22, 23) ʼO hilifaki ki tatatou fakamālo ʼo ʼuhiga mo te ʼu meʼa ʼaia, ʼe tonu ke tou “fakafetaʼi kiā Sehova” ʼuhi ko “tana ʼu gāue fakaofoofo maʼa te ʼu foha ʼo te tagata,” ʼuhi ko tana “ ʼu tonu fakamāu faitotonu” pea mo tana folafola, peʼe ko tana logo, ʼaē ʼe tou lava maʼu ʼi te temi nei ʼi te Tohi-Tapu.—Pes. 107:15; 119:62, 105.

Tou Hūfakiʼi ʼIhi

8, 9. He koʼē ʼe tonu ke tou faikole maʼa totatou ʼu tehina mo tuagaʼane?

⁸ ʼE mahino ia ʼe tou hūfakiʼi ia tātou totonu, kae ʼe tonu ke tou toe hūfakiʼi mo ʼihi, māʼiapē lā mo te kau Kilisitiano ʼaē ʼe mole feʼiloʼiʼaki mo tātou. Logolā neʼe lagi mole feʼiloʼiʼaki ia te ʼapositolo ko Paulo mo te hahaʼi tui fuli ʼaē ʼi Kolose, kae neʼe ina tohi fēnei: “ ʼE mā fakamālo tuʼumaʼu ki te ʼAtua ia te Tamai ʼo totatou ʼAliki ko Sesu Kilisito mokā mā faikole maʼa koutou, talu mai tamā logo ki takotou tui ʼo ʼuhiga mo Kilisito Sesu pea mo te ʼofa ʼaē ʼe kotou maʼu maʼa te kau māʼoniʼoni fuli.” (Kol. 1:3, 4) Neʼe toe hūfakiʼi e Paulo mo te kau Kilisitiano ʼi Tesalonika. (2 Tes. 1:11, 12) Ko te taʼi faʼahiga faikole ʼaia, ʼe feala ai ke lahi ia te ʼu meʼa ʼaē ʼe hā ʼo ʼuhiga mo tātou totonu pea mo tatatou manatu ʼo ʼuhiga mo totatou ʼu tehina mo tuagaʼane ʼi te tui.

⁹ Ko tatatou ʼu faikole maʼa te kau Kilisitiano fakanofo pea mo tonatou ʼu kaumeʼa ia te “tahi ʼu ovi,” ʼe ko he fakamoʼoni ʼe tou manatuʼi ia te kautahi ʼa te ʼAtua. (Soa. 10:16) Neʼe kole e Paulo ki tona ʼu tehina ke natou faikole ke ina ‘maʼu ia te poto palalau ke feala ai hana fakahā ia te meʼa fakalilo ʼo te logo lelei.’ (Efe. 6:17-20) ʼE tou faikole fēia koa maʼa ʼihi tehina mo tuagaʼane?

10. Ko te hūfakiʼi ʼaē ʼo ʼihi ʼe feala ke malave feafeaʼi kiā tātou?

¹⁰ Ko tatatou hūfakiʼi ʼaē ʼo ʼihi ʼe feala ai ke fetogi ia tatatou aga kiā nātou. Kapau ko he tahi ʼe mole tou faʼa ʼofa ai kae tou hūfakiʼi, pea ʼe feala aipē ke fetogi ia tatatou aga ʼaē kiā te ia. (1 Soa. 4:20, 21) Ko te ʼu taʼi faikole ʼaia ʼe fakatupu lotomālohi pea mo lagolago ki te logotahi ʼaē mo ʼotatou tehina. Tahi ʼaē meʼa, ko te ʼu faikole ʼaia ʼe fakahā ai ʼe tou maʼu ia te ʼofa ʼaē neʼe maʼu e Kilisito. (Soa. 13:34, 35) Ko te kalitātē ʼaia ʼe kau ki te fua ʼo te laumālie ʼo te ʼAtua. ʼE tou faikole takitokotahi koa ke tou maʼu ia te laumālie māʼoniʼoni, ʼo tou kole kiā Sehova ke tokoni mai ke tou fakahā ia tona fua ʼaē ko te ʼofa, te fiafia, te tokalelei, te kātaki fualoa, te lotoʼofa, te agalelei, te tui, te agamalū, te loto lolomi? (Luka 11:13; Kal. 5:22, 23) Kapau koia, ʼe fakahā anai ʼi tatatou ʼu palalau pea mo tatatou aga ʼe tou haʼele pea mo māʼuʼuli ʼaki ia te laumālie.—Lau ia Kalate 5:16, 25.

11. Kiā koutou, he koʼē ʼe lelei ke tou kole ki niʼihi ke natou hūfakiʼi tātou?

¹¹ Kapau ʼe tou ʼiloʼi neʼe fia kākā ia tatatou fānau ʼi te ʼu sivi ʼaē neʼe fai ʼi te faleako, pea ʼe tonu ke tou hūfakiʼi nātou pea mo tou fakaʼaogaʼi foki ia te Tohi-Tapu moʼo tokoniʼi nātou, ke feala ai hanatou aga fakahagatonu pea ke mole natou fai ia he meʼa ʼe kovi. Neʼe ʼui fēnei e Paulo ki te kau Kilisitiano ʼaē ʼi Kolonito: “ ʼE matou faikole ki te ʼAtua ke ʼaua naʼa kotou fai he meʼa ʼe kovi.” (2 Ko. 13:7) Ko te ʼu taʼi faikole ʼaia ʼe fai ʼaki te agavaivai, ʼe leleiʼia e Sehova pea ʼe hā ai ia te ʼu meʼa lelei ʼo ʼuhiga mo tātou. (Lau ia Tāʼaga Lea 15:8.) ʼE feala ke tou kole ke hūfakiʼi tātou e niʼihi, ohagē ko tona fai e te ʼapositolo ko Paulo. Neʼe ina tohi fēnei: “Ke hoholo atu takotou faikole maʼa mātou, heʼe matou ʼiloʼi papau ʼe aga fakahagatonu tomatou leʼo ʼo loto, ʼe matou loto ke matou aga fakahagatonu iā meʼa fuli pē.”—Hep. 13:18.

Te Tahi Age ʼu Meʼa ʼe Hā ʼo ʼUhiga Mo Tātou ʼi Tatatou ʼu Faikole

12. Koteā te ʼu faʼahi maʼuhiga ʼaē ʼe tonu ke tou talanoa kiai ʼi tatatou ʼu faikole?

¹² ʼE hā koa ʼi tatatou ʼu faikole, ko tātou ko he kau Fakamoʼoni ʼa Sehova ʼe fiafia pea mo faʼafai?  ʼI tatatou ʼu kole mamahi ʼe tou talanoa tāfito koa ki tatatou fakalogo ʼaē ki te finegalo ʼo te ʼAtua, mo te fakamafola ʼo te logo ʼo te Puleʼaga, mo te lagavaka ʼo te pule faʼitaliha ʼo Sehova, pea mo te tapuhā ʼo tona huafa? ʼE ko te ʼu faʼahi maʼuhiga ʼaia ʼe tonu ke tou talanoa kiai ʼi tatatou ʼu faikole, ohagē ko tona hā ʼi te faikole faʼifaʼitaki ʼaē neʼe akoʼi mai e Sesu, ʼaē ʼe kamata fēnei: “Ko tamatou Tamai ʼe ʼi selō, ke tapuhā tou huafa. Ke hoko mai tou puleʼaga. Ke fai tou finegalo ʼi te kele, ohagē ko selō.”—Mat. 6:9, 10.

13, 14. Koteā ʼaē ʼe hā ʼo ʼuhiga mo tātou mokā tou faikole?

¹³ Ko tatatou faikole ʼaē ki te ʼAtua ʼe hā ʼaki ai ia te ʼu meʼa ʼaē ʼi totatou loto, mo te ʼu meʼa ʼaē ʼe tou tōkakaga tāfito kiai pea mo totatou ʼu holi. ʼE ʼiloʼi e Sehova te ʼu meʼa ʼaē ʼi totatou loto. ʼE ʼui fēnei iā Tāʼaga Lea 17:3: “Ko te kulo haka ukamea maʼa te siliva pea ko te gutuʼumu maʼa te ʼaulo, kae ko Sehova ʼe ko ia ʼaē ʼe ina sivisivi te ʼu loto.” ʼE sio ia te ʼAtua ki te ʼu meʼa ʼaē ʼi totatou loto. (1 Sam. 16:7) ʼE ina ʼiloʼi ia tatatou ʼu manatu ʼo ʼuhiga mo tatatou ʼu fono, mo tatatou minisitelio, pea mo totatou ʼu tehina mo tuagaʼane. ʼE ʼiloʼi e Sehova tatatou manatu ʼo ʼuhiga mo te “ ʼu tehina” ʼo Kilisito. (Mat. 25:40) ʼE ina ʼiloʼi peʼe tou loto moʼoni ki te ʼu meʼa ʼaē ʼe tou faikole kiai peʼe tou haga lau pē tātou he ʼu meʼa. Neʼe ʼui fēnei e Sesu: “Kā kotou faikole, ʼaua naʼa kotou lau ʼo liuliuga ʼakotou ʼu palalau ohagē ko te hahaʼi ʼo te ʼu puleʼaga, heʼe natou manatu [hala] ʼe fakalogo anai nātou ʼi he lahi ʼo hanatou ʼu palalau.”—Mat. 6:7.

¹⁴ Ko tatatou ʼu palalau mokā tou faikole ʼe toe hā ai peʼe tou falala lahi ki te ʼAtua. Neʼe ʼui fēnei e Tavite: “[Sehova] neʼe ke liliu ko he nonoʼaga maʼa ʼaku, he tule mālohi iā muʼa ʼo te fili. ʼE au fia nofo ʼi tou fale fehikitaki ki he ʼu temi ʼe mole ʼiloʼi hona gataʼaga; ʼe au fia nono ʼi lalo ʼo tou ʼu kapakau.” (Pes. 61:3, 4) ʼI hona ʼaluʼaga fakatātā, kā ‘folahi mai e te ʼAtua kiā tātou ia tona fale fehikitaki,’ ko tona fakaʼuhiga ʼe tou māʼuʼuli ʼi te fīmālie pea ʼe ina puipui tātou. (Fakh. 7:15) ʼI meʼa fakalotofīmālie hatatou fakaovi kiā Sehova ʼi te faikole, ʼaki tatatou ʼiloʼi papau ʼaē ʼe nofo ia ʼi ‘ ʼotatou tafa’ ʼi te ʼu temi fuli pē ʼaē ʼe ʼahiʼahiʼi ai ia tatatou tui!—Lau ia Pesalemo 118:5-9.

15, 16. ʼAki te faikole, koteā ʼaē kā tou mahino kiai ʼo ʼuhiga mo tatatou fakaʼamu ki he ʼu pilivilēsio ʼi te kōkelekāsio?

¹⁵ Kā tou faikole fakamālotoloto kiā Sehova ʼo ʼuhiga mo te ʼu meʼa ʼaē ʼi totatou loto, pea ʼe lava tokoni mai ke tou ʼiloʼi ia te ʼuhiga moʼoni ʼo totatou loto. Ohagē lā, ko hatatou lotomālohi ʼaē ki he gāue fakataupau ʼi te hahaʼi ʼa te ʼAtua, ʼe ko he fakaʼamu agavaivai moʼoni koa heʼe tou fia tokoni pea mo tou fia gāue lahi ki te fakatuputupu ʼo te ʼu gāue ʼo te Puleʼaga? Peʼe lagi ko hatatou fia maʼu he “tuʼulaga māʼoluga” peʼe tou holi ke tou “pule” ki niʼihi? ʼE mole fēia ia te hahaʼi ʼa Sehova. (Lau ia 3 Soane 9, 10; Luka 22:24-27.) Kapau ʼe kovi ia te ʼu meʼa ʼaē ʼe tou fakaʼamu kiai, pea ʼe feala ke hā te ʼu faʼahi ʼaia mokā tou faikole ʼaki he loto moʼoni kiā Sehova ʼAtua pea ʼe tokoni mai ke tou fetogi naʼa liliu ia te ʼu holi ʼaia ʼo mālohi age iā tātou.

¹⁶ Ko te ʼu fafine ʼohoana Kilisitiano ʼe lagi natou loto ʼaupitō ke liliu ʼonatou ʼohoana ko he ʼu tagata faifekau fakaminisitelio pea lagi ki muli age ke natou liliu ko he ʼu taupau ʼi te kōkelekāsio, peʼe ko he ʼu tagata ʼāfea. Ko te ʼu tuagaʼane ʼaia ʼe feala ke natou mulimuli ki te ʼu meʼa ʼaē ʼe natou talanoa kiai ʼi tanatou ʼu faikole, ʼo natou faiga ke natou tuku he faʼifaʼitaki lelei ʼi tanatou ʼu aga. ʼE maʼuhiga ia te faʼahi ʼaia, heʼe ko te ʼu palalau pea mo te aga ʼo te fāmili ʼo te tehina ʼe feala ke malave ki te manatu ʼa te kōkelekāsio ʼo ʼuhiga mo te tehina ʼaia.

Kā Tou Fakafofoga Niʼihi ʼi Te Faikole

17. He koʼē ʼe lelei ke tou tō ʼāteaina mokā tou faikole tokotahi?

¹⁷ ʼI ʼihi temi neʼe fakamamaʼo Sesu mai te toe hahaʼi tokolahi ke feala hana faikole tokotahi ki tana Tamai. (Mat. 14:13; Luka 5:16; 6:12) ʼE toe ʼaoga foki mo tātou ke tou tō ʼāteaina. Ko he faikole ʼe fai ʼi he temi ʼe gona ai pea mo tokalelei, ʼe feala ai ke tou fai ia he ʼu tonu ʼe leleiʼia e Sehova pea mo tokoni mai ke tou nonofo mālohi ʼi te faʼahi fakalaumālie. Kae neʼe toe faikole foki Sesu iā muʼa ʼo te hahaʼi, pea ʼe lelei hatatou vakaʼi peʼe feafeaʼi ia te fai fakalelei ʼo te faʼahi ʼaia.

18. Koteā he ʼu puani ʼe tonu ke manatuʼi e te ʼu tehina mokā natou fakafofoga ia te kōkelekāsio ʼi te faikole?

¹⁸ ʼI tatatou ʼu fono, ko te ʼu tagata agatonu ʼe  natou fakafofoga ia te kōkelekāsio ʼi te faikole. (1 Tim. 2:8) ʼE tonu ki te ʼu tehina mo tuagaʼane ke natou lava ʼui “ameni” ʼi te ʼosi ʼo te ʼu faikole ʼaia, ko tona fakaʼuhiga ʼaē “ke fai pē kiai.” Kae ke feala hanatou fai ia te faʼahi ʼaia, ʼe tonu ke natou lototahi mo te ʼu meʼa ʼaē neʼe ʼui ʼi te faikole. ʼE mole he meʼa ʼi te faikole faʼifaʼitaki ʼaē neʼe akoʼi mai e Sesu, ʼe fakatupu tūkia peʼe heʼe fakaʼapaʼapa. (Luka 11:2-4) Tahi ʼaē, neʼe mole ina lau fuli leva ia te ʼu meʼa ʼaē ʼe ʼaoga ki te hahaʼi takitokotahi ʼaē ʼi te nofoʼaki peʼe ko tonatou ʼu fihifihia. Ko te ʼu fihifihia takitokotahi, ʼe lelei pē ke tou talanoa kiai mokā tou faikole tokotahi, kae mole iā muʼa ʼo te hahaʼi. Pea kā tou fakafofoga he kūtuga ʼi te faikole, ʼe mole tonu ke tou talanoa ki he ʼu meʼa fakalilo.

19. ʼE tonu ke feafeaʼi ia tatatou aga ʼi te temi ʼaē ʼe fakafofoga ai tātou fuli e he tahi ʼi te faikole?

¹⁹ Kā fakafofoga tātou e he tahi ʼi te faikole, ʼe tonu ke tou fakahā ia he ‘manavasiʼi ʼe fakaʼapaʼapa ki te ʼAtua.’ (1 Pet. 2:17) Ko ʼihi ʼu aga ʼe lagi ʼaoga anai tona fai ʼi he tahi age temi pea ʼi he tahi age faʼahi, heʼe mole tuha anai ke fai ia te ʼu aga ʼaia ʼi te fale fono. (Tnk. 3:1) Ohagē lā, kapau ʼe loto e he tahi ke tāpiki he kūtuga ʼonatou nima lolotoga te ʼu faikole ʼaia, ko he ʼaluʼaga ʼe feala ke fakapunamaʼuli ki ʼihi peʼe fakaleluʼi tanatou fakalogo ki te faikole, ʼo kau kiai te hahaʼi ʼaē ʼe foʼofoʼou mai pea ʼe mole natou lotu tahi mo tātou. Ko he taumātuʼa ʼe lagi nā tōkakaga anai ki te temi ʼaē ʼe tāpiki ai ʼonā nima ke mole tokagaʼi fau, kae kapau ʼe nā fefāʼufuaʼaki ʼi te temi ʼaē ʼe fakafofoga ai tātou fuli e he tahi ʼi te faikole, pea ko nātou ʼaē ʼe natou sisio ki te taʼi aga ʼaia, ʼe feala ke natou tūkia ai. ʼE feala anai ke natou manatu ʼe maʼuhiga age ki te taumātuʼa ia tanā femanakoʼaki ʼi hanā aga fakaʼapaʼapa kiā Sehova. Koia ʼe mole gata pē ʼi tatatou fakaʼapaʼapa lahi ʼaē kiā te ia, kae ke tou toe ‘fai ia meʼa fuli moʼo fakakolōliaʼi ʼo te ʼAtua’ pea mo tou tōkakaga ke mole liliu tatatou aga ʼo fakalelu ki te fakalogo ʼaē ʼa te nofoʼaki ki te fono, peʼe natou tūkia ai.—1 Ko. 10:31, 32; 2 Ko. 6:3.

Koteā ʼAē ʼe Feala Ke Tou Palalau Kiai ʼi Tatatou ʼu Faikole?

20. ʼE kotou fakamahino feafeaʼi anai ia te manatu ʼaē iā Loma 8:26, 27?

²⁰ ʼI ʼihi temi, ʼe lagi mole tou faʼa ʼiloʼi peʼe koteā ʼaē ke tou palalau kiai ʼi tatatou ʼu faikole takitokotahi. Neʼe tohi fēnei e Paulo: “Ko te meʼa ʼaē ʼe faigataʼa: ko te meʼa ʼaē ʼe tonu ke tou kole pea ʼe ʼaoga kiā tātou, ʼe mole tou ʼiloʼi, kae ko te laumālie [māʼoniʼoni] ʼe ina kole totonu maʼa tātou ʼaki he ʼu goʼegoʼe ʼe mole fai ʼaki he palalau. Kae ko ia ʼaē ʼe ina vakaʼi te ʼu loto [ia te ʼAtua] ʼe ina ʼiloʼi te manatu ʼo te laumālie.” (Loma 8:26, 27) Neʼe tokaga ia Sehova ke tohi ia te ʼu tuʼuga faikole ʼi te Tohi-Tapu. ʼE ina tali ia te ʼu faikole ʼaia neʼe tohi ʼaki tana takitaki, ohagē pē ko he ʼu kole ʼe tou fai age kiā te ia pea ʼe ina fakahoko. Ko te ʼAtua ʼe ina ʼiloʼi ia tātou pea mo te fakaʼuhiga ʼo te ʼu meʼa ʼaē neʼe ina uga ke fakahā e tona laumālie ki te ʼu tagata ʼaē neʼe natou tohi ia te Tohi-Tapu. ʼE tali e Sehova ia tatatou ʼu kole mamahi mokā ko te laumālie ʼaē ʼe ina “kole” maʼa tātou. Kae kā lahi age ia tatatou mahino ʼaē ki te Folafola ʼa te ʼAtua, pea ʼe faigafua age anai ia tatatou ʼiloʼi ia te ʼu meʼa ʼaē ʼe tonu ke tou kole.

21. Koteā ʼaē kā tou vakaʼi anai ʼi te ʼalatike ʼaē kā hoa mai?

²¹ Ohagē ko te ʼu manatu ʼaē neʼe kua tou vakaʼi, ʼe lahi te ʼu meʼa ʼe feala ke hā ʼo ʼuhiga mo tātou mokā tou faikole. Ohagē lā, ʼe feala ke hā ai peʼe tou felōgoi lelei mo Sehova pea mo ʼiloga ai ia tatatou ʼiloʼi lelei ʼaē ia tana Folafola. (Sake 4:8) ʼI te ʼalatike ʼaē kā hoa mai, ʼe tou vakaʼi ai anai he ʼu faikole pea mo he ʼu kupuʼi palalau ʼi te ʼu faikole ʼaē kua tohi ʼi te Tohi-Tapu. Ko tatatou ako ʼaia ʼo te Tohi-Tapu, ʼe tonu ke malave feafeaʼi ki tatatou fakaovi ʼaē ki te ʼAtua ʼi te faikole?

ʼE Kotou Tali Feafeaʼi Anai?

• ʼE tonu ke tou feafeaʼi mokā tou fakaovi kiā Sehova ʼi te faikole?

• He koʼē ʼe tonu ke tou hūfakiʼi totatou ʼu tehina mo tuagaʼane?

• Kā tou faikole, koteā ʼaē ʼe feala ke hā ai ʼo ʼuhiga mo tātou pea mo te ʼu meʼa ʼaē ʼi totatou loto?

• ʼE tonu ke feafeaʼi ia tatatou aga ʼi te temi ʼaē ʼe fakafofoga ai tātou fuli e he tahi ʼi te faikole?

[ʼU fehuʼi ʼo te ako]