Kotou Haga Tuputupu ʼi Tokotou ʼOfa Fakatautēhina

“Kotou haga haʼele ʼi te ʼofa, ohagē pē ko te ʼofa ʼa Kilisito kiā koutou.”—EFE. 5:2.

 1. Koteā te faʼahi maʼuhiga ʼaē neʼe ʼui e Sesu ke ʼiloʼi ai tana ʼu tisipulo?

 ʼE ʼILOʼI te kau Fakamoʼoni ʼa Sehova, ʼi tanatou fakamafola ia te logo lelei ʼo te Puleʼaga ʼo te ʼAtua ʼi te ʼu ʼapi. Kae neʼe filifili e Kilisito Sesu he faʼahi makehe ʼo te Lotu Fakakilisitiano, ke ʼiloʼi ai ia tana ʼu tisipulo moʼoni. Neʼe ina ʼui fēnei: “ ʼE au foaki atu kiā koutou te fakatotonu foʼou, ke kotou feʼofaʼofani; ohagē ko taku ʼofa ʼaē kiā koutou, ke toe fēia foki mo koutou, ke kotou feʼofaʼofani. ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.”—Soa. 13:34, 35.

2, 3. ʼE malave feafeaʼi ia totatou ʼofa fakatautēhina kiā nātou ʼaē ʼe ʼomai ki tatatou ʼu fono?

² Ko te ʼofa fale tautēhina Fakakilisitiano moʼoni ʼe mole maʼu ʼi he tahi age faʼahi ʼo te mālamanei. Ohagē pē ko te pipiki ʼa te ukamea ki te manete, ʼo toe fēia mo te ʼofa ʼe ina fakatahiʼi te ʼu kaugana ʼa Sehova ʼi te logotahi pea mo taki mai ia te hahaʼi loto fakamālotoloto ki te tauhi moʼoni. Ohagē lā ko Marcelino, ko he tagata ʼo Cameroun neʼe liliu ʼo kivi ʼi tana gāue. Hili te meʼa ʼaia neʼe hoko kiā ia, neʼe mafola te logo ʼaē neʼe kivi ia Marcelino ʼuhi he neʼe ko he tagata gaohi meʼa fakatemonio. Mole ʼui ki tana pasitea pea mo ʼihi ʼo tana lotu ke natou fakafīmālieʼi ia ia, kae neʼe natou haga nātou ʼo kapu ia ia. Pea ʼi te temi leva ʼaē neʼe fakaafe ai ia ia e te tahi Fakamoʼoni ʼa Sehova ki te fono, neʼe lotolotolua ia Marcelino. Neʼe mole loto ia ke toe tali koviʼi fēia ia ia.

³ Neʼe punamaʼuli ia Marcelino ki te ʼu meʼa ʼaē neʼe hoko ʼi te Fale ʼo Te Puleʼaga. Neʼe fakatalitali lelei ia ia e te kōkelekāsio, pea neʼe lotofīmālie ʼi te  ʼu akonaki Fakatohi-tapu ʼaē neʼe logo kiai. Neʼe kamata kau ki te ʼu fono fuli, mo tuputupu ʼi tana ako Tohi-Tapu, pea neʼe papitema ʼi te taʼu 2006. ʼI te temi nei, ʼe ina vaevae ia te moʼoni ki tona fāmili pea mo tona tatau pea neʼe ina kamata ia te ʼu tuʼuga ako Tohi-Tapu. ʼE loto e Marcelino ke logoʼi e te hahaʼi ʼaē ʼe ako mo ia te Tohi-Tapu, ia te ʼofa ʼaē neʼe ina logoʼi ʼi te lotolotoiga ʼo te hahaʼi ʼa te ʼAtua.

 4. He koʼē ʼe tonu ke maʼuhiga kiā tātou ia te tokoni ʼa Paulo ke tou “haga haʼele [ai] ʼi te ʼofa”?

⁴ Ko totatou ʼofa fakatautēhina ʼe ina taki mai te hahaʼi, pea ʼe tonu ke tou faiga fuli, ʼo taupau ia te ʼofa ʼaia. Kotou fakakaukauʼi age muʼa he afi ʼe tutu moʼo fakamoho kiai ia he meʼa kai. Kapau ʼe tou loto ke moho ia te meʼa kai, pea ʼe tonu ke mū tuʼumaʼu ia te afi. ʼO toe fēia, ko te noʼo ʼo te ʼofa fakatalakitupua ʼaē ʼi te loto kōkelekāsio ʼe mole feala anai ke puli, mo kapau ko tātou, kau Kilisitiano takitokotahi, ʼe tou gāue moʼo taupau maʼu ia tona mālohi. Koteā ʼaē ʼe tou lava fai ki te faʼahi ʼaia? ʼE tali fēnei e te ʼapositolo ko Paulo: “Ke kotou haga haʼele ʼi te ʼofa, ohagē pē ko te ʼofa ʼa Kilisito kiā koutou pea mo ina foaki ia ia totonu maʼa koutou ohagē ko he mōlaga pea mo he sākilifisio ki te ʼAtua ʼe ʼaele magoni.” (Efe. 5:2) ʼE lelei anai ke tou vakaʼi ia te fehuʼi ʼaenī: ‘Ko te ʼu faʼahi fea ʼaē ʼe feala ai ke au haga haʼele ai ʼi te ʼofa?’

“Mo Koutou Foki, Kotou Fakafālahi Ia Koutou”

5, 6. He koʼē neʼe uga e Paulo ia te kau Kilisitiano ʼo Kolonito ke natou “fakafālahi” ia tonatou ʼofa?

⁵ Ki te kau Kilisitiano ʼi Kolonito ʼo te temi muʼa, neʼe faitohi fēnei ia te ʼapositolo ko Paulo: “Ko ʼomatou gutu neʼe ava atu kiā koutou, ʼu Kolonito, ko tomatou loto neʼe fakafālahi. ʼE mole kotou fāveliveli iā mātou, kae ʼe kotou fāveliveli ʼi takotou ʼu ʼofa mamahi. Koia moʼo fetogi pea ʼe ko he fakapale—ʼe au palalau atu ohagē ko haku ʼu fānau— mo koutou foki, kotou fakafālahi ia koutou.” (2 Ko. 6:11-13) He koʼē neʼe uga e Paulo ia te kau Kolonito ke natou fakafālahi ia tonatou ʼofa?

⁶ Tou vakaʼi age muʼa pe neʼe kamata feafeaʼi ia te kōkelekāsio ʼo Kolonito ʼo te temi muʼa. Neʼe haʼu ia Paulo ki Kolonito ʼi te fakaʼosi ʼo te taʼu 50 ʼo totatou temi. Logolā neʼe faigataʼa te kamata ʼo tana gāue fai fakamafola ʼaē ʼi ai kae neʼe mole lotovaivai ai ia te ʼapositolo. Mole tuai, tokolahi te hahaʼi ʼi te kolo ʼaia neʼe natou tui ki te logo lelei. Lolotoga “he taʼu e tahi pea mo māhina e ono,” neʼe fakaʼaogaʼi tāfito e Paulo ia tona temi moʼo faiakonaki pea mo fakalotomālohiʼi ia te kōkelekāsio foʼou ʼaia. ʼE hā lelei mai, neʼe ʼofa ʼaupitō Paulo ki te kau Kilisitiano ʼo Kolonito. (Gāue 18:5, 6, 9-11) Neʼe lahi te ʼu tupuʼaga ke natou toe ʼoʼofa pea mo fakaʼapaʼapa mo nātou kiā ia. Kae ko ʼihi ʼi te kōkelekāsio neʼe mole natou fia fakatahi mo ia. Neʼe lagi mole leleiʼia e ʼihi ia tana faitokoni fakahagatonu. (1 Ko. 5:1-5; 6:1-10) Ko ʼihi atu neʼe lagi natou tui ki te ʼu laukovi neʼe fai e te ʼu “ ʼapositolo makehe.” (2 Ko. 11:5, 6) Neʼe loto e Paulo ke ʼoʼofa fakamālotoloto age ia te ʼu tehina pea mo te ʼu tuagaʼane fuli kiā te ia. Koia neʼe ina kole mamahi ai kiā nātou ke natou “fakafālahi” ia tonatou ʼofa, ʼo natou fakaovi age kiā te ia pea mo te tahi atu ʼu Kilisitiano.

 7. ʼE lava feafeaʼi hatatou “fakafālahi” ʼi tatatou fakahā totatou ʼofa fakatautēhina?

⁷ ʼE feafeaʼi ʼo ʼuhiga mo tātou? ʼI tatatou fakahā ia totatou ʼofa fakatautēhina, ʼe lava feafeaʼi hatatou “fakafālahi” ia te faʼahi ʼaia? ʼI te agamāhani, ko nātou ʼaē ʼe taʼu tahi peʼe natou fenua tahi, ʼe faigafua kiā nātou ʼaia hanatou feʼofaniʼaki. Pea ʼi te agamāhani, ko nātou ʼaē ʼe tāu te ʼu faʼahiga fakafiafia ʼe natou leleiʼia, ʼe natou fakatahitahi tuʼumaʼu. Kae kapau ko te ʼu meʼa ʼaē ʼe tou leleiʼia tona fai mo ʼihi Kilisitiano ʼe ina fakamavetevete ai tātou pea mo ʼihi age Kilisitiano, pea ʼe tonu ke tou “fakafālahi” atu ia totatou ʼofa ki niʼihi. ʼE ko he meʼa lelei anai hatatou fai kiā tātou totonu ia te ʼu fehuʼi ʼaenī: ‘ ʼE tahitahiga koa taku fai fakamafola peʼe ko haku fakatahi mo te ʼu tehina mo tuagaʼane ʼaē ʼe mole au feʼiloʼiʼaki lelei mo nātou? ʼI te Fale ʼo Te Puleʼaga, ʼe siʼisiʼi koa taku fai palalau mo nātou ʼaē ʼe foʼofoʼou mai, heʼe ʼi taku ia manatu, ʼe tonu muʼa ke natou fuafualoa ʼi te moʼoni ke feala ai hanatou liliu ko hoku ʼu kaumeʼa? ʼE au ʼalofa koa ki te hahaʼi mātutuʼa pea mo te kau tūpulaga ʼi te kōkelekāsio?’

8, 9. ʼE lava ʼaoga feafeaʼi kiā tātou ia te tokoni ʼaē ʼa Paulo iā Loma 15:7, ke tou feʼalofaʼaki moʼo fakatuputupu iā tātou ia totatou ʼofa fakatautēhina?

⁸ ʼO ʼuhiga mo tatatou feʼalofaʼaki, ko te ʼu palalau ʼa Paulo ki te kau Loma ʼe feala ke tokoni mai ke tou maʼu ia te manatu ʼaē ʼe lelei ʼo ʼuhiga mo totatou ʼu tehina mo tuagaʼane. (Lau ia Loma 15:7.) Ko te kupu Fakakeleka ʼaē neʼe fakaliliu ʼaki te kupu  “tali,” ʼe fakaʼuhiga ki te “fakatalitali ʼo he tahi ʼaki he agalelei peʼe ko he tali kāiga lelei, te tali lelei ʼo he tahi ʼi he sōsiete pea ʼi he fakakaumeʼa.” ʼI te temi muʼa, kā tali e he tahi hona ʼu kaumeʼa ki tona ʼapi, neʼe ina fakahā age kiā nātou ia tana fiafia lahi ʼaē ʼo tana sio kiā nātou. ʼI hona ʼaluʼaga fakatā, neʼe tali fēia tātou e Kilisito, pea ʼe fakalotomālohi tātou ke tou faʼifaʼitakiʼi ia ia ʼo tali totatou ʼu tehina mo tuagaʼane.

⁹ Kā tou ʼalofa mo ʼotatou tehina ʼi te Fale ʼo Te Puleʼaga peʼe ʼi he tahi age koga meʼa, ʼe feala ke tou toʼo hotatou temi ke tou fai palalau mo nātou ʼaē kua fuafualoa tatatou mole heʼeki fesioʼaki mo nātou, peʼe kua fualoa hatatou mole heʼeki fai palalau mo nātou. ʼE lagi lelei hatatou faifai palalau muʼa mo nātou? ʼI te fono ʼaē kā haʼu, ʼe feala ke tou toe fai fēia mo niʼihi age. Pea faifai pē, kua tou fai palalau lelei anai mo te ʼu lagi tehina mo tuagaʼane fuli. ʼE mole tonu ke tou tuʼania mo kapau neʼe mole tou lava fai palalau mo nātou fuli ʼi te ʼaho pē e tahi. ʼE mole tonu ke ʼita he tahi mo kapau ʼe mole feala hatatou ʼalofa ki ai ʼi te ʼu fono fuli.

10. Koteā te faigamālie maʼuhiga ʼaē ʼe tou maʼu fuli ʼi te kōkelekāsio, pea ʼe lava feafeaʼi hatatou fakaʼaogaʼi kātoa ia te faigamālie ʼaia?

¹⁰ Ko te fakaʼalofa ki te hahaʼi, ʼe ko te ʼuluaki meʼa ʼaia ʼe tonu ke tou fai mokā tou fakatalitali nātou. ʼE feala ke tupu ai he ʼu fai palalau fakafiafia pea mo he ʼu fakakaumeʼa ʼe fualoa. Ohagē lā ʼi te ʼu fakatahi lalahi, kā feʼiloʼiʼaki ai niʼihi pea mo natou kamata fai palalau ai, pea ʼe natou fakaʼamu lā ke natou toe felāveʼi. Ko te kau gāue moʼo laga te ʼu Fale ʼo Te Puleʼaga ʼo fēia mo nātou ʼaē ʼe kau ki te ʼu gāue tokoni mokā hoko he tuʼutāmaki, ʼi te agamāhani ʼe natou liliu ʼo kaumeʼa lelei, koteʼuhi kua natou feʼiloʼiʼaki lelei ʼaki te ʼu gāue tokoni ʼaē neʼe kua natou fai haʼele. ʼE lahi ʼaupitō ʼi te kautahi ʼa Sehova ia te ʼu faigamālie ke tou maʼu hotatou ʼu kaumeʼa ʼe fualoa anai. Kapau ʼe tou “fakafālahi” ia totatou ʼofa, pea ʼe lahi ai anai ia totatou ʼu kaumeʼa ʼaē kā tou maʼu, ʼo mālohi ai te ʼofa ʼaē ʼe ina fakatahiʼi tātou ʼi te tauhi moʼoni.

Ke Faigafua Ki Te Hahaʼi Tanatou Fakaovi Mai ʼAē Kiā Tātou

11. Ohagē ko tona fakahā iā Maleko 10:13-16, koteā te faʼifaʼitaki ʼaē neʼe tuku mai e Sesu?

¹¹ Ohagē ko Sesu, ʼe feala ki te kau Kilisitiano fuli ke natou fakafaigafua ia te fakaovi ʼa niʼihi kiā nātou. Kotou tokagaʼi te tali ʼaē neʼe fai e Sesu ʼi te temi ʼaē neʼe tāʼofi ai e tana ʼu tisipulo ia te ʼu mātuʼa ʼi tanatou ʼaumai ʼaē ʼo tanatou ʼu tamaliki kiā te ia. Neʼe ina ʼui fēnei: “Kotou tukunoaʼi te ʼu kiʼi tamaliki ke ʼomai kiā te au; pea ʼaua naʼa kotou faigaʼi ke kotou tāʼofi ia nātou, heʼe ko te puleʼaga ʼo te ʼAtua ʼe ʼa nātou ʼaē ʼe tatau mo nātou.” Pea “neʼe ina toʼo te ʼu tamaliki ʼi ʼona nima pea ina tapuakina ia nātou, ʼo ina hilifaki ʼona nima kiā nātou.” (Mko. 10:13-16) Kotou fakakaukauʼi age ia te toe fiafia lahi ʼaē neʼe maʼu e te ʼu tamaliki ʼaia, ʼi te tokaga ʼofa age ʼa te Tagata Faiako Lahi kiā nātou!

12. Koteā ʼaē ʼe feala ke fakatupu faigataʼa kiā tātou hatatou fai palalau mo niʼihi?

¹² ʼE tonu ke fai e te kau Kilisitiano takitokotahi ia te fehuʼi ʼaenī: ‘ ʼE faigafua koa te fakaovi mai ʼa te hahaʼi kiā au, peʼe hagē ia ʼe natou sio mai ʼe mole maʼu hoku temi ke au tokaga age kiā nātou?’ ʼI ʼihi temi, ko he ʼu aga ʼe tou fai māhani, ʼe mole ko he ʼu aga ʼe kovi kae ʼe feala ke fakatupu faigataʼa ki he fai palalau. Kapau, ʼi te ʼu temi ʼaē ʼe tou fakatahitahi ai mo niʼihi, ʼe tou fakaʼaogaʼi tuʼumaʼu pē tātou ia tatatou kiʼi telefoni feʼāveʼaki peʼe tou fakalogo he ʼu meʼa neʼe puke ki te kiʼi telefoni ʼaia, ʼe feala pē anai ke tou fakahā kiā nātou, ʼe mole tou  leleiʼia tatatou nonofo ʼaē mo nātou. Kapau ʼe sio mai ʼihi ʼe tou tōkakaga tuʼumaʼu pē tātou ki tatatou olotinatea, pea ʼe feala ke natou manatu ʼe mole tou fia palalau mo nātou. ʼE moʼoni, ʼe ʼi ai “te temi moʼo fakalogologo.” Kae kā tou fakatahitahi mo te hahaʼi, ʼi te agamāhani ʼe ko he ‘temi ʼaia ke tou palalau ai.’ (Tnk. 3:7) ʼE feala ke ʼui fēnei e ʼihi: “ ʼE au leleiʼia age taku taupau maʼa ʼaku taku ʼu manatu” peʼe natou ʼui “ ʼE mole au faʼa leleiʼia te palalau ʼi te ʼuhu.” Logolā te ʼu faʼahi ʼaia, ko he fai palalau fakalelei mo niʼihi tatau aipē peʼe mole tou loto kiai, ʼe tou fakahā ai ia te ʼofa ʼaē “ ʼe mole ina kumi pē te meʼa ʼaē ʼe ʼaoga kiā te ia.”—1 Ko. 13:5.

13. Neʼe fakalotomālohiʼi e Paulo ia Timoteo ke feafeaʼi tana manatu ʼo ʼuhiga mo te ʼu tehina mo tuagaʼane Kilisitiano?

¹³ Neʼe fakalotomālohiʼi e Paulo ia te tūpulaga ko Timoteo ke fakaʼapaʼapa ki te hahaʼi kātoa ʼo te kōkelekāsio. (Lau ia 1 Timoteo 5:1, 2.) Mo tātou foki, ʼe tonu ke hagē kiā tātou ia te kau Kilisitiano ʼaē kua mātutuʼa ko hatatou faʼē pea mo tamai, pea ko te kau tūpulaga ohagē ko hotatou ʼu tehina mo tuagaʼane, ko tona fakaʼuhiga ko he ʼu fānau ʼo tatatou ʼu mātuʼa totonu. Kapau ʼe tou fai fēia, ʼe mole he tahi anai ʼi totatou ʼu tehina mo tuagaʼane ʼofaina ʼe manatu anai ʼe ko he matāpule mokā fakatahi mo tātou.

14. Koteā te ʼu fua lelei ʼe maʼu ʼi te fai palalau mo niʼihi ki he ʼu manatu fakalotomālohi?

¹⁴ Kā tou fai palalau mo te hahaʼi ki he ʼu manatu fakalotomālohi, ʼe tou tokoni ai kiā nātou ke natou mālolohi ʼi te faʼahi fakalaumālie pea mo tonatou loto. Ko te tehina ʼe gāue ʼi te filiale ʼe ina manatuʼi, ʼaki he loto ʼe fonu ʼi te ʼofa, ʼi tana kamata gāue ʼaē ʼi te Petele, tokolahi ia te ʼu Petelite mātutuʼa neʼe natou maʼu tuʼumaʼu pē tonatou temi ke natou fai palalau ai mo ia. Ko tanatou ʼu palalau fakalotomālohi neʼe tokoni kiā ia ke ina logoʼi neʼe kau moʼoni ki te fāmili ʼo te Petele. ʼI te temi nei, ʼe faiga ke ina faʼifaʼitakiʼi ia nātou ʼaia, ʼo fai palalau mo tona ʼu tehina ʼaē ʼi te Petele.

Ko Te Agavaivai ʼe Tokoni Mai Ke Tou Fai He Fakatokatoka

15. Koteā ʼaē ʼe hā ʼai e feala ke tou fetokakoviʼaki?

¹⁵ Ko Evoti pea mo Sinitisi, te ʼu tuagaʼane Kilisitiano ʼi te kolo ʼāfea ko Filipe, neʼe faigataʼa tanā fakatokatoka te fihifihia neʼe hoko iā nāua. (Filp. 4:2, 3) Neʼe hoko ia te toe fetalanoaʼaki iā Paulo pea mo Palenapasi, ʼo ʼiloʼi e te kaugamālie pea neʼe tupu ai tanā tahi māvete lolotoga he temi. (Gāue 15:37-39) Ko te ʼu fakamatala ʼaia ʼe fakahā mai ko te kau ʼatolasio moʼoni ʼe feala ke natou fetokakoviʼaki. ʼE foaki mai e Sehova ia te tokoni ʼaē moʼo tou fakatokatoka ia te ʼu fihi pea mo tou toe kaumeʼa. Kae ʼe ʼi ai te faʼahi ʼe fakamaʼua mai kiā tātou.

16, 17. (a) He koʼē ʼe maʼuhiga ia te agavaivai moʼo fakatokatoka he ʼu fihi? (b) Ko te fakamatala ʼo ʼuhiga mo te fakaovi ʼaē ʼa Sakopo kiā Esau, ʼe ina fakahā feafeaʼi ia te maʼuhiga ʼaē ke tou agavaivai?

¹⁶ Kotou fakakaukauʼi age muʼa, ko koutou mo hokotou kaumeʼa ʼe kolua fagona fakatahi ʼi he motokā. ʼI muʼa ʼo te kamata ʼo tokolua fagona, ʼe tonu ke ʼai te kalavī ke tupu ai he haʼele ʼo te motokā. Ko te meʼa ʼaē ʼe tonu ke tou fai moʼo fakatokatoka he ʼu fihifihia ʼe toe kamata foki ʼaki he kalavī. Ko te kalavī ʼaia ko te agavaivai. (Lau ia Sake 4:10.) Ohagē ko tona fakahā ʼi te faʼifaʼitaki Fakatohi-tapu ʼaenī kā hoa mai, ko te kalavī ʼaia ʼe fakafealagia ai kiā nātou ʼaē ʼe fetokakoviʼaki, ke natou kamata maʼuliʼi ia te ʼu pelesepeto ʼo te Tohi-Tapu.

¹⁷ Kua hili taʼu e ʼuafulu ki te temi ʼaē neʼe ʼita kovi ai ia Esau, ʼi tana foaki ʼo tona tofiʼa ʼuluaki tupu ki tona māhaga ko Sakopo, pea neʼe ina fia matehi ia ia. Neʼe ʼamanaki ke toe felāveʼi ia te māhaga hili kiai ia te toe temi loaloaga, “pea ko Sakopo  neʼe mataku ʼaupitō pea mo hoha lahi.” ʼI tana manatu neʼe feala pē kiā Esau ke ina ʼohofi ia ia. Kae ʼi tanā felāveʼi, neʼe fai e Sakopo te meʼa neʼe mole ʼamanaki kiai ia Esau. Neʼe “tulolo . . . ki te kele” ʼi tana fakaovi ʼaē ki tona tehina. Koteā ʼaē neʼe hoko ki muli age? “Neʼe lele Esau ʼo felāveʼi mo ia, pea neʼe ina fāʼufua, mo tāpiki ki tona kia pea mo fekita ki ai; pea neʼe nā fetāgihi.” Neʼe mole hoko ai he tau. Ko te agavaivai ʼa Sakopo neʼe tokoni ke tāʼofi te meʼa neʼe lagi feala ke hoko ʼuhi ko te fehiʼa ʼaē ʼa Esau.—Sen. 27:41; 32:3-8; 33:3, 4.

18, 19. (a) Kā hoko he ʼu fihi, he koʼē ʼe maʼuhiga ke tou foimo maʼuliʼi ia te ʼu tokoni Fakatohi-tapu? (b) Tatau aipē peʼe ʼi te kamata ʼe mole loto e ia ʼaē ʼe tou tokakovi mo ia ke fai he fakatokatoka, kae he koʼē ʼe tonu ke tou falala tuʼumaʼu pē ʼe hoko anai ia te faʼahi ʼaia?

¹⁸ ʼE maʼu ʼi te Tohi-Tapu ia te ʼu tokoni lelei ʼaupitō moʼo fakatokatoka he ʼu fihi. (Mat. 5:23, 24; 18:15-17; Efe. 4:26, 27) a Kapau ʼe mole tou maʼuliʼi ʼaki he agavaivai ia te ʼu tokoni ʼaia, ʼe faigataʼa anai ia te fai ʼo he fakatokatoka. ʼE mole ko he puleʼaki lelei hatatou fakatalitali ke ʼuluaki agavaivai mai muʼa ia ia ʼaē ʼe tou tokakovi mo ia, kae ʼe tonu ke tou toe agavaivai mo tātou.

¹⁹ Kapau ʼe mole he fua ʼo tatatou ʼuluaki faiga ʼaē ke tou fakatokatoka, ʼe tonu ke tou falala tuʼumaʼu pē ʼe hoko anai he fakatokatoka. ʼE lagi ʼaoga kiā ia ʼaē ʼe tou tokakovi mo ia he temi moʼo fakatokatoka tana ʼu manatu. Ko te ʼu tehina ʼo Sosefo neʼe natou fai te aga fakakākā kiā Sosefo. Neʼe hili ia te toe temi loaloaga ʼi muʼa ʼo hanatou toe sisio ki ai pea ʼi te temi ʼaia neʼe ko te ʼuluaki minisi ʼo Esipito. Kae neʼe kua fetogi tonatou loto pea mo natou kole kiā Sosefo ke fakamolemole age. Neʼe fakamolemole Sosefo kiā nātou, pea neʼe liliu te ʼu foha ʼo Sakopo ko he puleʼaga neʼe natou maʼu ia te pilivilēsio ke natou fua ia te huafa ʼo Sehova. (Sen. 50:15-21) Kapau ʼe tou tokalelei mo totatou ʼu tehina mo tuagaʼane, pea ʼe tou lagolago ki te logotahi pea mo te fiafia ʼo te kōkelekāsio.—Lau ia Kolose 3:12-14.

Ke Tou ʼOʼofa “ ʼAki He ʼu Gāue Pea Mo Te Moʼoni”

20, 21. Koteā te ako ʼe tou lava tāʼofi mai te fufulu ʼaē e Sesu ia te ʼu vaʼe ʼo tana kau ʼapositolo?

²⁰ ʼI muʼa ʼo tana mate, neʼe ʼui fēnei e Sesu ki tana ʼu ʼapositolo: “Neʼe au tuku atu kiā koutou te faʼifaʼitaki, ke kotou toe fai fēia mo koutou ohagē ko te meʼa ʼaē neʼe au fai kiā koutou.” (Soa. 13:15) Neʼe hoki ʼosi age pē tana fufulu ia te ʼu vaʼe ʼa te toko 12 kau ʼapositolo. Ko te meʼa ʼaē neʼe fai e Sesu neʼe mole ko hana fia mulimuli pē ki he agaʼi fenua peʼe ke ina fakahā ia tana agalelei. ʼI muʼa ʼo tana fakamatala ia te fufulu ʼaia ʼo te ʼu vaʼe, neʼe tohi fēnei e Soane: “Ko Sesu ʼi tona ʼofa kiā nātou ʼaē ʼaʼana ʼi te mālamanei, neʼe ʼofa ia kiā nātou ʼo aʼu ki te fakaʼosi.” (Soa. 13:1) Neʼe ko tona ʼofa ki te ʼu tisipulo ʼaē neʼe ina uga ai ia Sesu ke ina fai ia te gāue ʼaia, ʼaē ʼi te agamāhani neʼe fai e he tagata kaugana. ʼI te temi leva ʼaia neʼe tonu ke natou agavaivai, ʼo natou fetokoniʼaki ʼi te ʼofa. ʼE mahino ia, ko te ʼofa fakatautēhina moʼoni ʼe tonu ke ina uga tātou ke tou fakahā ia tatatou tōkakaga ʼaē ki ʼotatou tehina mo tuagaʼane Kilisitiano fuli.

²¹ Ko te ʼapositolo ko Petelo, ʼaē neʼe fufulu tona ʼu vaʼe e te ʼAlo ʼo te ʼAtua, neʼe mahino ki te fakaʼuhiga ʼo te meʼa ʼaē neʼe fai e Sesu. Neʼe ina tohi fēnei: “ ʼI takotou kua ʼosi fakamaʼa ʼokotou ʼu nefesi ʼaki takotou talagafua ʼaē ki te moʼoni, ʼo tupu ai he ʼofa fakatautēhina ʼe mole mālualoi, kotou feʼofamamahiʼaki, ʼaki te loto.” (1 Pet. 1:22) Ko te ʼapositolo ko Soane, ʼaē neʼe toe fufulu mo tona ʼu vaʼe e te ʼAliki, neʼe ina tohi fēnei: “ ʼU kiʼi fānau, ʼaua naʼa tou ʼofa ʼaki pē te palalau mo te ʼalelo, kae tou ʼofa ʼaki he ʼu gāue pea mo te moʼoni.” (1 Soa. 3:18) ʼOfa pē ke uga tātou e totatou loto ke tou fakamoʼoni ia totatou ʼofa fakatautēhina ʼaki he ʼu gāue.

[Nota]

ʼE Kei Kotou Manatuʼi Koa?

• Ko te ʼu faʼahi fea ʼaē ʼe feala ai ke tou “fakafālahi” ia tatatou feʼofaniʼaki?

• Koteā ʼaē kā tokoni mai ke faigafua ai ki te hahaʼi hanatou fakaovi mai kiā tātou?

• Koteā te ʼaoga ʼo te agavaivai moʼo fai he fakatokatoka?

• Koteā ʼaē ʼe tonu ke ina uga tātou ke tou tōkakaga ki totatou ʼu tehina mo tuagaʼane?

[ʼU fehuʼi ʼo te ako]

[Paki ʼo te pasina 25]

Tou fakatalitali ʼaki te ʼofa ia totatou ʼu tehina mo tuagaʼane

[Paki ʼo te pasina 26]

Tou fakaʼaogaʼi ia te ʼu faigamālie fuli ke faigafua ai ki te hahaʼi hanatou fakaovi mai kiā tātou