Te Laumālie Māʼoniʼoni—Ko He Mālohi ʼe ʼAoga Kiā Koutou ʼi Tokotou Maʼuli

“AUA naʼa ke liʼaki au ʼi ʼou muʼa; pea ko tou laumālie māʼoniʼoni! ʼAua naʼa ke toʼo iā te au.” (Pesalemo 51:11) Neʼe ko te faikole fakamālotoloto ʼaia ʼa te Hau ko Tavite ʼi tana ʼosi fai ʼo tana agahala pea mo tana mole kei maʼu ʼaē ia te ʼofa ʼo te ʼAtua.

Neʼe sio tuʼa lahi ia Tavite ki te mālohi ʼo te laumālie māʼoniʼoni ʼi tona maʼuli. ʼI tana kei tūpulaga, neʼe feala, ʼaki ia te laumālie māʼoniʼoni, ke ina matehi ia te toe tagata sōlia fakamataku ko Koliate. (1 Samuele 17:45-50) Neʼe toe fakamālohiʼi ia ia e te laumālie māʼoniʼoni ke ina tohi ia te ʼu pesalemo taulekaleka neʼe heʼeki tohi e hina tahi. Neʼe fakamahino fēnei e Tavite: “Ko te laumālie ʼo Sehova neʼe palalau ʼi au, pea ko tana folafola neʼe ʼi toku ʼalelo.”—2 Samuele 23:2.

Neʼe fakamoʼoni e Sesu Kilisito totonu ia te gāue ʼa te laumālie māʼoniʼoni ʼi te maʼuli ʼo Tavite. ʼI te tahi lakaga, neʼe ʼui fēnei e Sesu ki te nofoʼaki: “Ko Tavite totonu ʼaē neʼe ina ʼui ʼaki te laumālie māʼoniʼoni, ‘neʼe folafola ia Sehova ki toku ʼAliki: “Heka ia koe ʼi toku toʼomataʼu ʼo kaku ki taku tuku tou ʼu fili ki ʼou lalo vaʼe.” ’ ” (Maleko 12:36; Pesalemo 110:1) Neʼe ʼiloʼi e Sesu ʼi te temi ʼaē neʼe tohi ai e Tavite tana pesalemo, neʼe takitaki ia ia e te laumālie māʼoniʼoni. ʼE ko te laumālie māʼoniʼoni pē koa ʼaia ʼaē ʼe feala ke toe tokoni mai kiā tātou?

“Kotou Haga Kole, Pea ʼe Foaki Atu Anai Kiā Koutou”

Neʼe lagi mole heʼeki kotou tohi ia he pesalemo. Kae ʼe feala ke kotou tauʼi he ʼu faigataʼaʼia lahi ʼe natou hagē ko te toe foʼi tagata lahi ko  Koliate. Ohagē ko te meʼa ʼaenī neʼe hoko kiā Isabel. a Neʼe liʼaki ia ia e tona ʼohoana kae ʼalu mo te tahi fafine ʼe kei finemui age. Neʼe ina tuku ia ia mo he toe maʼua lahi ke huʼi, pea neʼe mole ina foaki age he falā moʼo tokoni ki tana taupau ʼaē ia tanā ʼu taʼahine e lua neʼe kei liliki. ʼE ʼui fēnei e Isabel: “Neʼe hagē pē neʼe ina kākāʼi au pea mo ina meʼa noaʼi au. Kae talu mai te temi ʼaē neʼe ina liʼaki ai au, neʼe au logoʼi ʼi toku maʼuli ia te tokoni mai ʼaē ʼa te laumālie māʼoniʼoni ʼo te ʼAtua.”

Neʼe manatu koa e Isabel ʼe ina maʼu fakafuanoa fēia pē ia te laumālie māʼoniʼoni? Kailoa, kae neʼe ina kole mamahi ki te ʼAtua ʼi te ʼaho fuli ke ina foaki age ia tona laumālie. Neʼe ʼiloʼi e Isabel neʼe ʼaoga kiā ia ia te mālohi ʼo te ʼAtua moʼo tokoni kiā ia ke ina sio ki te kā haʼu ʼaki he lototoʼa, moʼo taupau fakalelei ia tana ʼu tamaliki, pea ke ina toe maʼu he fakaʼapaʼapa kiā ia totonu. Neʼe fakalogo lelei ia ki te ʼu palalau ʼaenī ʼa Sesu: “Kotou haga kole, pea ʼe foaki atu anai kiā koutou; kotou haga kumi, pea ʼe kotou maʼu anai; kotou haga fisifisi, pea ʼe ʼavahi atu anai kiā koutou.”—Mateo 7:7.

Neʼe toe mahino kiā Roberto ia te ʼaoga ʼaē ke ina maʼu ia te laumālie ʼo te ʼAtua moʼo tauʼi te tahi age ʼu faigataʼaʼia. Neʼe suluka pea mo toloke tuʼumaʼu pē. Lolotoga taʼu e lua neʼe faiga ke ina tuku ia te toloke, kae neʼe tuʼa lahi tana mole lavaʼi. ʼE fakamahino fēnei e Roberto: “ ʼE kotou hoha ʼaupitō mokā ʼe mole kei kotou fakaʼaogaʼi ia te toloke. ʼI te ʼaho fuli pē, ʼe holi mālohi ia tokotou sino ke kotou fakaʼaogaʼi ia te toloke.”

ʼE toe ʼui fēnei e Roberto: “Kae neʼe au fakatotonu ke au fetogi toku maʼuli ke feala ai ki te ʼAtua ke ina tali taku tauhi. Neʼe au faiga ke au fafaga toku ʼatamai ʼaki pē ia he ʼu manatu ʼe lelei mai te Tohi-Tapu. Neʼe au faikole fakamālotoloto ʼi te ʼaho fuli, ʼo au kole ki te ʼAtua ke ina foaki mai ia te mālohi moʼo fakamaʼa ia toku maʼuli. Neʼe au ʼiloʼi neʼe mole feala ke au mālo ʼaki pē toku mālohi tokotahi. Pea neʼe au sio ki te tali ʼaē e Sehova ia taku ʼu faikole, tāfito lā ʼi te ʼu temi ʼaē neʼe au lotovaivai ai he neʼe au toe higa ki toku vaivaiʼaga ʼaia. ʼE au tui ko te laumālie māʼoniʼoni ʼo te ʼAtua neʼe ina foaki mai he mālohi foʼou; kapau neʼe mole au maʼu ia tona laumālie neʼe mole feala ia ʼi he temi ke au tuku ia te toloke.”—Filipe 4:6-8.

ʼE Kotou Mahiki Ake “ ʼAki He ʼu Kapakau, Ohagē Ko Te ʼu ʼAkūila”

Ohagē ko Isabel pea mo Roberto, ko te ʼu toko lauʼi miliona kau Fakamoʼoni ʼa Sehova neʼe natou logoʼi ia te mālohi ʼo te laumālie māʼoniʼoni ʼi tonatou maʼuli. Ko te mālohi gāue ʼo Sehova, te mālohi ʼaē neʼe ina fakaʼaogaʼi moʼo fakatupu ia te ʼatulaulau, ʼe feala ke kotou maʼu mo kapau ʼe kotou loto kiai. ʼE lotolelei moʼoni e te ʼAtua ke ina foaki atu ia tona laumālie mo kapau ʼe kotou kole fakamālotoloto. Kae ke tou maʼu ia te laumālie ʼaia, ʼe loto e te ʼAtua ke tou ako ia te moʼoni ʼo ʼuhiga mo ia pea mo tou kumi fakamālotoloto ke tou fai ia tona finegalo.—Isaia 55:6; Hepeleo 11:6.

ʼAki te mālohi ʼaē ʼe kotou maʼu mai te laumālie māʼoniʼoni, ʼe kotou maʼu ai ia te mālohi ke kotou lava tauhi ai ki te ʼAtua pea mo tauʼi ia te ʼu faigataʼaʼia ʼaē ʼe feala ke hoko ʼi tokotou maʼuli. Koʼenī te fakapapau ʼaē ʼe fai mai kiā tātou ʼi te Tohi-Tapu: “[Ko Sehova] ʼe ina foaki te mālohi kiā ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi. . . . Kiā nātou ʼaē ʼe natou falala kiā Sehova ʼe natou toe mālolohi anai. ʼE natou mahiki ake anai ʼaki he ʼu kapakau, ohagē ko te ʼu ʼakūila. ʼE natou feleleʼi anai pea ʼe mole natou vaivavai anai; ʼe natou haʼele anai pea ʼe mole natou gaʼegagaʼe anai.”—Isaia 40:28-31.

[Nota]

[Fakamatala ʼo te pasina 8]

‘Neʼe au faikole fakamālotoloto ʼi te ʼaho fuli, ʼo au kole ki te ʼAtua ke ina foaki mai ia te mālohi. Neʼe au ʼiloʼi neʼe mole feala ke au mālo ʼaki pē toku mālohi tokotahi. Pea neʼe au sio ki te tali ʼaē e Sehova ia taku ʼu faikole’

 [Talanoa ʼo te pasina 7]

TE ʼU GĀUE ʼO TE LAUMĀLIE MĀʼONIʼONI

Neʼe fakaʼaogaʼi e te ʼAtua ia te laumālie māʼoniʼoni moʼo fakatupu ia te kele pea mo te ʼu meʼa fuli ʼi te ʼatulaulau. Neʼe ʼui fēnei e te tagata fai pesalemo: “ ʼE lahi tau ʼu gāue Ê Sehova! Neʼe ke fai tau ʼu gāue fuli ʼaia ʼaki te poto. ʼE mahu tou ʼu koloa ʼi te kele. Kapau ʼe ke foaki tou laumālie pea ʼe ke fakatupu ia nātou.”—Pesalemo 104:24, 30; Senesi 1:2; Sopo 33:4.

Ko te laumālie māʼoniʼoni neʼe ina takitaki ia te ʼu tagata ʼaē neʼe aga fakalotu, ke natou tohi ia te Tohi-Tapu. Neʼe tohi fēnei e te ʼapositolo ko Paulo: “Ko te Tohi-Tapu kātoa ʼe haʼu mai te ʼAtua pea ʼe ʼaoga.” (2 Timoteo 3:16) Ko te kupu “haʼu” ʼe koʼenī ia tona fakaʼuhiga fakahagatonu: “Ko te mānava ʼa te ʼAtua.” Ko te mānava ʼa Sehova, peʼe ko tona laumālie, neʼe ina takitaki ia te ʼu manatu ʼa te ʼu tagata ʼaē neʼe natou tohi ia te Tohi-Tapu, ʼo natou tohi ai “te folafola ʼa te ʼAtua.”—1 Tesalonika 2:13.

Ko te laumālie māʼoniʼoni neʼe ina foaki ia te mālohi ki te ʼu kaugana ʼa te ʼAtua, ke natou fakakikite ia te kā haʼu ʼi hona ʼaluʼaga ʼe totonu. Neʼe fakamahino fēnei e te ʼapositolo ko Petelo: “ ʼE mole he lea fakapolofetā ʼo te Tohi-Tapu neʼe haʼu mai he faʼahiga fakamatala fakatagata. He neʼe mole heʼeki ʼaumai he lea fakapolofetā ʼaki te finegalo ʼo te tagata, kae neʼe palalau ni ʼu tagata ʼaki te fakatotonu ʼa te ʼAtua, he neʼe taki nātou e te laumālie māʼoniʼoni.”—2 Petelo 1:20, 21; Soele 2:28.

Ko te laumālie māʼoniʼoni neʼe tokoni kiā Sesu pea mo te tahi ʼu tagata tui, ke natou fakamafola ia te logo lelei ʼo te Puleʼaga ʼo te ʼAtua pea mo fai he ʼu milakulo. Neʼe ʼui fēnei e Sesu: “Ko te laumālie ʼo Sehova ʼe iā te au, koteʼuhi kua ina fakanofo au ke au fakahā te logo lelei ki te kau māsisiva, neʼe ina fekauʼi au ke au fakamafola te ʼāteaina kiā nātou ʼe pōpula pea ki te kau kivi ke natou toe sisio.”—Luka 4:18; Mateo 12:28.

 [Talanoa ʼo te pasina 9]

TE ʼU ʼALUʼAGA ʼAĒ ʼE FEALA KE TOKONI ATU IA TE LAUMĀLIE MĀʼONIʼONI

Ko te laumālie māʼoniʼoni ʼe feala ke ina foaki atu te mālohi moʼo tekeʼi ia te ʼu fakahala pea mo tauʼi he ʼu agamāhani ʼe kovi. Neʼe ʼui fēnei e te ʼapositolo ko Paulo: “Ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe kotou lava tali, kae ʼaki te fakahala ʼe ina toe foaki atu anai mo he faigamālie ke kotou hao ai.”—1 Kolonito 10:13.

Ko te laumālie māʼoniʼoni ʼe feala ke tokoni atu ke kotou maʼu te ʼu kalitātē ʼo te ʼAtua. “Ko te fua ʼo te laumālie ʼe ko te ʼofa, te fiafia, te tokalelei, te kātaki fualoa, te lotoʼofa, te agalelei, te tui, te agamalū, te loto lolomi.”—Kalate 5:22, 23.

Ko te laumālie māʼoniʼoni ʼe feala ke ina foaki atu te mālohi moʼo kātakiʼi ia te ʼu ʼahiʼahi. “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.”—Filipe 4:13.