Kotou Fakaovi Ki Te ʼAtua

ʼE Ina Loto Ke Tou Maʼuli Fīmālie

Sosue 1:6-9

KO TE ʼu mātuʼa ʼofa ʼe natou fakaʼamu ke fua lelei ia te maʼuli ʼo tanatou fānau, ke ʼaoga pea mo fīmālie. ʼE fēia mo Sehova, tatatou Tamai ʼaē ʼe ʼi selō, ʼe ina loto ke maʼuli fīmālie tana fānau ʼaē ʼi te kele. ʼE fakahā mai e Sehova ia tona ʼofa, ʼo ina fakahā mai peʼe feafeaʼi hatatou maʼu ia he maʼuli fīmālie. Tou vakaʼi age muʼa ia te ʼu palalau ʼaē neʼe fai e te ʼAtua kiā Sosue, ʼaē ʼe tuʼu iā Sosue 1:6-9.

Tou fakakaukauʼi age muʼa ia te meʼa ʼaē neʼe hoko: ʼI te ʼosi mate a Moisese, ʼe ko Sosue ia te takitaki foʼou ʼo Iselaele, pea ko te kaugamālie ʼo Iselaele neʼe ko te toko lauʼi miliona. Kua nonofo teuteu ia te kau Iselaele ke natou hū ki te fenua ʼaē neʼe fakapapauʼi age e te ʼAtua ki tanatou ʼu kui. Neʼe foaki e te ʼAtua ia te ʼu tokoni kiā Sosue. Kapau ʼe mulimuli kiai, pea ʼe tokoni anai ki ai ke fua lelei kiā ia. Kae ko te tokoni ʼaia, neʼe mole gata pē tona fua lelei kiā Sosue. Kapau ʼe tou maʼuliʼi ia te ʼu tokoni ʼaia, pea ʼe toe fua lelei pē kiā tātou.—Loma 15:4.

Neʼe ʼui e Sehova kiā Sosue ʼe tonu ke lototoʼa pea mo mālohi—ʼo mole ina ʼui age tuʼa tahi pē kae tuʼa tolu. (Vaega 6, 7, 9) ʼE mahino ia, ʼe ʼaoga anai kiā Sosue ke lototoʼa pea mo mālohi ke feala hana takitaki fakalelei ia te kau Iselaele ki te Kele ʼo Te Fakapapau. Neʼe lava maʼu feafeaʼi e Sosue ia he lototoʼa pea mo he mālohi?

Neʼe feala ke lototoʼa pea mo mālohi ia Sosue ʼaki te ʼu tohi ʼa te ʼAtua. ʼE ʼui fēnei e Sehova: “Ke ke tokaga ʼo fai fuli te meʼa ʼi te lao ʼaē neʼe fakatotonu atu e Moisese, taku kaugana.” (Vaega 7) ʼI te temi ʼaia, lagi neʼe heʼeki lahi he ʼu tohi Fakatohi-tapu neʼe maʼu e Sosue. a Kae ʼe mole gata ʼaki pē hakotou maʼu ia te Folafola ʼo te ʼAtua ke ʼui ai kua kotou maʼu ia te maʼuli fīmālie. Ke fua lelei te ʼu tohi ʼaia kiā Sosue, neʼe tonu ke ina fai te ʼu faʼahi ʼaenī e lua.

ʼUluaki, neʼe tonu kiā Sosue ke ina fakafonu tuʼumaʼu tona loto ʼaki te folafola ʼa te ʼAtua. ʼE ʼui fēnei e Sehova: “ ʼE tonu anai ke ke lau leʼo veliveli ʼi te ʼaho mo te pō.” (Vaega 8) ʼE ʼui fēnei ʼi te tohi: “Neʼe fakatotonu e te ʼAtua kiā Sosue ke ina manatuʼi Tana Lao, ʼaki hana ‘metitāsioʼi,’ peʼe ina ‘fakakaukauʼi.’ ” Ko te lau pea mo te metitāsioʼi ʼo te Folafola ʼa te ʼAtua ʼi te ʼaho fuli, ʼe tokoni anai kiā Sosue ke ina fakatokatoka ia te ʼu fihifihia ʼaē kā hoko anai ki te kau Iselaele.

Lua, neʼe tonu kiā Sosue ke ina maʼuliʼi ia te ʼu meʼa ʼaē ʼe ina ako mai te Folafola ʼa te ʼAtua. ʼE ʼui fēnei e Sehova ki ai: “Ke feala hau tokaga ʼo fai ʼo mulimuli kiā meʼa fuli ʼaē ʼe tohi ai; heʼe feala ai leva ke ke fakatupu manūʼia anai ki tou ala.” (Vaega 8) ʼE pipiki ia te maʼuli fīmālie ʼa Sosue ki tana fai ia te finegalo ʼo tona ʼAtua. ʼE ko te puleʼaki pē ʼaia ke maʼuli fīmālie ai Sosue. ʼE fua lelei tuʼumaʼu ia te finegalo ʼo te ʼAtua.—Isaia 55:10, 11.

Ko Sosue neʼe ina taupau ia te tokoni a Sehova. Koia, neʼe ina maʼu ai ia te maʼuli fīmālie pea mo ʼaoga ʼi tona ʼuhiga tagata ʼatolasio agatonu ʼaē kiā Sehova.—Sosue 23:14; 24:15.

ʼE kotou loto koa ke kotou māʼuʼuli fīmālie ohagē ko Sosue? Ko Sehova ʼe loto ke kotou maʼuli fīmālie. Kae ʼe mole gata ʼaki pē ia te maʼu ʼo tana Folafola, te Tohi-Tapu. Koʼenī te tokoni ʼa te tehina agatonu kua fualoa ʼi te moʼoni: “Tou lau te Tohi-Tapu pea mo maʼuliʼi ʼaki totatou loto kātoa ia te ʼu meʼa ʼaē ʼe tou lau.” Kapau ʼe kotou fafaga tuʼumaʼu tokotou loto ʼaki te folafola ʼa ʼAtua pea mo kotou maʼuliʼi ia te ʼu meʼa ʼaē neʼe kotou ako, pea ohagē ko Sosue, ʼe “fakatupu manūʼia anai ki [tokotou] ala.”

[Nota]