ʼE Tou ʼIloʼi Feafeaʼi ʼe Tokaga Moʼoni Mai Te ʼAtua Kiā Tātou?

KO HE fehuʼi kua fualoa kae ʼe maʼuhiga, ko he fehuʼi neʼe fai e te hahaʼi iā taʼu e afe: Kapau ko te ʼAtua ʼe ʼofa kiā tātou, pea he koʼē ʼe lahi ʼaupitō te mamahi? ʼE lagi kotou fakamoʼoni mo kapau ʼe kotou ʼofa ki he tahi, pea ʼe mole kotou loto ke maʼuli mamahi, pea kapau ʼe faigataʼaʼia, ʼe kotou faiga anai ke kotou tokoni ki ai. Koia ʼaē ʼe tokolahi ʼe natou manatu, ʼi te lahi ʼaupitō ʼo te mamahi ʼi te mālamanei, ʼe mole feala ia ke ʼui ko te ʼAtua ʼe tokaga mai kiā tātou. Koia ʼaē ʼe maʼuhiga ai, ke tou vakaʼi muʼa ia te fakamoʼoni ʼaē ko te ʼAtua ʼe ʼofa moʼoni kiā tātou, pea ʼe tokaga mai ia kiā tātou.

ʼE Fakamoʼoni e Te ʼu Meʼa ʼAē Neʼe Fakatupu Ki Te ʼOfa ʼo Te ʼAtua

Ko Sehova ʼAtua ʼaē “neʼe [Ina] fakatupu ia te lagi pea mo te kele pea mo te tai pea mo te ʼu meʼa fuli ʼe maʼu ʼi ai.” (Gāue 4:24) Kā tou sio ki te ʼu meʼa ʼaē neʼe fakatupu e Sehova, pea ʼe tou fakamoʼoni ʼe tokaga mai kiā tātou. Ohagē lā, kotou fakakaukauʼi age muʼa ki te ʼu meʼa ʼaē ʼe kotou fakafiafia ai pea mo leleiʼia. ʼE kotou leleiʼia koa ia te ʼu meʼa kai kano lelei? Neʼe feala pē kiā Sehova ke ina foaki mai ia he faʼahiga meʼa kai pē e tahi kiā tātou. Kae neʼe ina fakatupu ia te ʼu tuʼuga meʼa kai kehekehe ke kano lelei ki totatou gutu. Neʼe toe teuteuʼi e Sehova ia te kele ʼaki he ʼu faʼahiga ʼakau kehekehe, mo he ʼu fisiʼi teu kehekehe, pea mo he ʼu fenua kehekehe, ke fakafiafia ai totatou maʼuli pea mo ʼaoga kiā tātou.

Tou toe fakaukauʼi age muʼa mo totatou faʼahiga faʼu. ʼE lagi mole faʼa ʼaoga tāfito ki totatou maʼuli ia te ʼu faʼahi ʼaeni: Tatatou aga fakahuahua, tatatou lava logo ki te musika, pea mo tatatou lava leleiʼia te ʼu meʼa matalelei, kae ko te ʼu meʼa ʼofa fuli ʼaia mai te ʼAtua moʼo fakafiafiaʼi totatou maʼuli. Pea kotou toe fakakaukauʼi mo takotou ʼu felōgoi ʼaē mo niʼihi. Ko ai ʼapē ʼe mole fiafia ki hona ʼu kaumeʼa lelei peʼe mole fiafia ʼi hana faʼōfua he tahi ʼe ʼofa mamahi ai? Ko te fealagia ʼaē ke tou ʼofa, ʼe ko he meʼa ʼofa ia mai te ʼAtua ʼe ʼofa! Mai tona ʼaluʼaga ʼaē neʼe fakatupu e te ʼAtua ʼi te loto ʼo te tagata ia te fealagia ʼaē ke ʼofa, ko te kalitātē ʼaia ʼe kau ki te ʼulugaaga ʼo te ʼAtua.

ʼE Fakamoʼoni Mai ʼi Te Tohi-Tapu Ia Te ʼOfa ʼo Te ʼAtua Kiā Tātou

ʼE ʼui mai ʼi te Tohi-Tapu, ko te ʼAtua ʼe ʼofa. (1 Soane 4:8) ʼE mole gata pē te hā ʼo tona ʼofa ʼi te ʼu meʼa ʼaē neʼe ina fakatupu, kae ʼe toe hā lelei ʼi tana Folafola, te Tohi-Tapu. Ohagē lā, ʼe  foaki mai ʼi te Tohi-Tapu ia te ʼu tokoni ʼe ʼaoga ki te puipui ʼo totatou maʼuli fakasino, ʼe tokoni mai ke tou fakapotopoto ʼi te ʼu meʼa fuli, pea ʼe ina fakatokaga tātou ki te ʼinu kava fakavale pea mo te kai fakavale.—1 Kolonito 6:9, 10.

ʼE toe foaki mai ʼi te Tohi-Tapu ia te ʼu tokoni fakapotopoto ʼo ʼuhiga mo te ʼu felōgoi mo niʼihi, mo te ʼu tokoni moʼo fakalotomālohiʼi ʼo tātou ke tou feʼofaʼofani pea mo tou fefakaʼapaʼapa ki ʼihi, pea mo agalelei kiā nātou. (Mateo 7:12) ʼE ina tauteaʼi ia te ʼu aga ʼaē ʼe fakatupu ʼaki ai ia te lotomamahi: Te ʼu aga ohagē lā ko te loto mānumānu, mo te fai fatufatu, mo te tono, pea mo te fai fakapō. Kapau ʼe tou faiga fuli ke tou maʼuliʼi ia te ʼu tokoni fakapotopoto ʼaē ʼi te Tohi-Tapu, pea ʼe mahino ia ʼe fakasiʼisiʼi ai anai ia te ʼu mamahi ʼaē ʼi te mālamanei.

Kae ko te ʼofa lahi ʼo te ʼAtua, neʼe ko tana foaki mai ia tona ʼAlo ko Sesu, moʼo totogi ʼaki te mālamanei. ʼE ʼui fēnei iā Soane 3:16: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” Koia, neʼe kua fai e Sehova ia te fakatuʼutuʼu moʼo fakagata ʼosi ia te mate pea mo te ʼu faʼahiga mamahi kehekehe.—1 Soane 3:8.

ʼE hā mai, ʼe lahi ʼaupitō ia te ʼu fakamoʼoni ko Sehova ʼe ʼofa kiā tātou. Koia ʼe tou mahino lelei ai, ko te ʼAtua ʼe mole ina loto ke tou maʼuli mamahi. ʼE ina fakagata anai te mamahi. ʼE mole tonu ke tou fekumi ia te faʼahi ʼaia, ʼe fakahā lelei mai ʼi te Tohi-Tapu, peʼe feafeaʼi anai te haga ʼa te ʼAtua ʼo pulihi ia te mamahi.

[Paki ʼo te pasina 4]

Ko te fealagia ʼaē ke tou ʼofa ʼe ko he ʼofa mai te ʼAtua ʼe ʼofa