“ ʼO Aʼu Anai Ki ʼĀfea . . . ʼE Tonu Ai Anai Ke Au Kalaga Ke Ke Haofaki Au?”

Neʼe tagi fēnei ia Jayne: “ ʼE au loto ke fakagata lā te mamahi!” Neʼe ina maʼu ia te kōsea, pea neʼe kua mafola te mahaki ʼi tona sino kātoa. Neʼe fakaʼamu age lā e tona fāmili pea mo tona ʼu kaumeʼa mo kanapau lā ko he meʼa ʼe feala, ke natou pulihi ia tona mahaki pea mo tona ʼu mamahi! Neʼe natou faikole ki te ʼAtua ke tokoni age ki ai. Neʼe ina logoʼi ʼapē tanatou faikole pea mo tokagaʼi?

ʼE ʼILOʼI e te ʼAtua ia te ʼaluʼaga ʼaē ʼe tau nei mo te mālamanei kātoa. ʼE ʼui fēnei ʼi tana Folafola, te Tohi-Tapu: “Ko te ʼu meʼa fuli ʼaē neʼe fakatupu, ʼe natou haga lāuga fakatahi pea mo mamahi fakatahi.” (Loma 8:22) ʼE ʼiloʼi e te ʼAtua, ko te ʼu toko lauʼi miliona hahaʼi ohagē pē ko Jayne, ʼe natou mamahi ʼi te ʼaho fuli pē, ʼi te faʼahi fakasino, ʼi ʼonatou loto, peʼe ko ʼonatou ʼatamai. Ko te ʼAtua ʼe sio ki te toko 800 miliona hahaʼi ʼe natou momoe pakupaku ʼi te pō fuli, pea ʼe sio ki te tahi atu ʼu toko miliona ʼe gaohi koviʼi nātou ʼi ʼonatou loto fale, pea ʼe sio ki te ʼu mātuʼa e tokolahi ʼe natou tuʼania ki te kā haʼu pea mo te maʼuli fīmālie ʼo tanatou fānau. Neʼe kua kotou feʼekeʼaki peʼe fakatokatoka anai koa e te ʼAtua ia te ʼu fihifihia fuli ʼaia? Kapau ʼe tou fia tokoni kiā nātou ʼaē ʼe tou ʼoʼofa ai, pea ʼe feafeaʼi age lā ki te ʼAtua, ʼe mole koa lā fia tokoni mo ia ki te mālamanei kātoa, ia tana hahaʼi ʼaē neʼe ina fakatupu?

Kapau neʼe kua kotou fai ia te ʼu fehuʼi ʼaenī, pea ʼe mole ko koutou tokotahi pē. Kua hili nei kiai taʼu e 2 600 tupu, ko te tagata agatonu ko Hapakuke, neʼe lotomamahi pē ia ohagē ko te tokolahi ʼo totatou temi, pea neʼe ina fehuʼi fēnei ki te ʼAtua: “ ʼO aʼu anai ki ʼāfea Ê Sehova, ʼe tonu ai anai ke au kalaga ke ke haofaki au, kae mole ke logo mai? ʼO aʼu anai koa ki ʼāfea ʼo taku kole tokoni ʼatu ʼuhi ko te agamālohi, kae mole ke haofaki au? He koʼē ʼe ke fakamamata mai kiā te au te meʼa ʼaē ʼe kovi pea mo ke haga sioʼi te maveuveu? Pea he koʼē ʼe tuʼu ʼi ʼoku muʼa ia te kaihaʼa ʼo te ʼu koloa pea mo te agamālohi, pea he koʼē ʼe ʼi ai te ʼu kē, pea he koʼē ʼe mālo te kē?” (Hapakuke 1:2, 3) Ko Hapakuke ko he polofetā Hepeleo, neʼe sio mata ki te ʼu agavale fakatupu lotomamahi pea mo te ʼu agamālohi ʼaē neʼe hoko ʼi tona temi. Iā ʼaho nei, ko te ʼu aga ʼaia ʼe ko he ʼu logo ʼi te ʼaho fuli, pea ʼe fakalialia kiai ia te hahaʼi manavaʼofa.

Neʼe meʼa noaʼi koa e te ʼAtua te ʼu tuʼania ʼa Hapakuke? Kailoa ia. Neʼe fakalogo ia ki te ʼu fehuʼi fakamālotoloto ʼaē neʼe fai age e Hapakuke, pea neʼe ina fakafīmālieʼi, pea mo fakalotomālohiʼi te tagata lotomamahi ʼaia. Neʼe fakamālohiʼi e Sehova ʼAtua ia te tui ʼa Hapakuke, ʼo ina fakapapau age ʼe Ina fakagata anai te mamahi. Ko te logo ʼa te ʼAtua ʼo ʼuhiga mo he ʼamanaki, ʼe ina lava toe fakalotofīmālieʼi koutou, ohagē pē ko tana fakafīmālieʼi ʼaē ia Jayne pea mo tona fāmili. Ko te ʼu ʼalatike ʼaē kā hoa mai, ʼe tali anai ki te ʼu fehuʼi ʼaenī: ʼE tou ʼiloʼi papau feafeaʼi ko te ʼAtua ʼe tokaga moʼoni kiā tātou? Koteā anai kā fai e te ʼAtua moʼo fakagata ia te mamahi, pea ʼe ina fai anai ʼāfea?