Ko He Fihifihia Fakamālamanei, Ko He Puleʼaki Fakamālamanei

ʼE TOU sio ki te mamahi ʼi te ʼu potu fuli pē, pea tokolahi te hahaʼi ʼe natou foaki he tokoni ʼofa kiā nātou ʼaē ʼe maʼuli mamahi. Ohagē lā, ko te hahaʼi fai faifaitoʼo ʼe natou gāue lolotoga ni ʼu hola ʼi te ʼu lōpitali moʼo tokoni kiā nātou ʼaē ʼe māhahaki peʼe lāvevea. Ko te kau gāue tamate afi, te kau polisi, te kau tuʼi fakamāu, pea mo te hahaʼi gāue haofaki, ʼe natou faiga ke natou fakafīmālieʼi te ʼu mamahi ʼo te hahaʼi, peʼe natou tōkakaga ke mole hoko he tuʼutāmaki ki niʼihi. ʼE maʼuhiga ʼaupitō te ʼu taʼi faiga takitokotahi ʼaia moʼo tokoni ki te hahaʼi, kae ʼe mole feala ki he tahi peʼe ko he kautahi ke natou fai te ʼu taʼi tokoni ʼaia moʼo pulihi ia te mamahi ʼi te kele kātoa. Kae ko te ʼAtua ia, ʼe ina lava fai ia te faʼahi ʼaia pea ʼe ina fai anai he puleʼaki maʼa te mālamanei kātoa.

ʼE maʼu ia te fakapapau ʼaia ʼi te tohi fakaʼosi ʼo te Tohi-Tapu: “[Ko te ʼAtua] ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.” (Fakahā 21:4) Kotou fakakaukauʼi age muʼa, ia te kaugamālie ʼaē kā malave anai ki ai ia te fakapapau ʼaia. ʼE ina fakanounou mai pē ia te fakatuʼutuʼu ʼa te ʼAtua ʼaē kā ina fakagata ia te ʼu mamahi fuli pē. ʼE ina fakahoko anai te faʼahi ʼaia, ʼaki hana pulihi ʼi te kele ia te tau, te pakupaku, te mahaki, pea mo te heʼe faitotonu, ʼo fēia ki te hahaʼi agakovi fuli. ʼE mole he tagata ʼe ina lava fakahoko te faʼahi ʼaia.

Te Gāue ʼAē Kā Fai Anai e Te Puleʼaga ʼo Te ʼAtua

Ko te ʼAtua ʼe ina fakahoko anai tana ʼu fakapapau ʼaki te lua tagata ʼaē ʼe maʼuhiga ʼaupitō ʼi te ʼatulaulau: Ia Sesu Kilisito ʼaē kua fakatuʼuake mai te mate. Kua hoko mai te temi ʼaē kā  fakahoko ai anai e Sesu ia tana pule mālohi ki te kele kātoa ʼi tona ʼuhiga Hau ʼaē ʼe mole feala hona fakafihiʼi . ʼE mole toe puleʼi anai te kele e ni ʼu hau fakatagata, peʼe ko he ʼu pelesitā peʼe ko he kau fai politike. Kae ʼe takitaki anai nātou e te Hau e tahi pea mo te puleʼaga e tahi: Te Puleʼaga ʼo te ʼAtua.

ʼE fakaʼauha anai e te Puleʼaga ʼaia ia te ʼu puleʼaga fakatagata fuli. Kua fualoa kiai, neʼe fakakikite fēnei ʼi te Tohi-Tapu: “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Taniela 2:44) ʼE logotahi anai ia te hahaʼi ʼo te kele kātoa ʼi te takitaki ʼa te puleʼaga faitotonu e tahi: Te Puleʼaga ʼo te ʼAtua.

ʼI tana maʼuli ʼi te kele ʼi tona ʼuhiga tagata, neʼe tuʼa lahi te palalau ʼa Sesu ʼo ʼuhiga mo te Puleʼaga ʼaia. Neʼe talanoa ki te Puleʼaga ʼi te faikole faʼifaʼitaki ʼaē neʼe ina fakahā ai ki tana ʼu tisipulo, ʼo ina fakatotonu age kiā nātou ʼe tonu ke natou faikole fēnei: “Ke hoko mai tou puleʼaga. Ke fai tou finegalo ʼi te kele, ohagē ko selō.” (Mateo 6:10) Kotou fakatokagaʼi neʼe ʼui fēnei e Sesu, ko te Puleʼaga ʼaia ʼe pipiki ki te finegalo ʼo te ʼAtua ʼaē ʼe tonu ke fai ki te kele, pea ʼe ko te finegalo ʼo te ʼAtua ke ina pulihi te mamahi ʼi te kele kātoa.

Ko te puleʼaga faitotonu ʼa te ʼAtua ʼe ina foaki mai anai ia te ʼu tapuakina, ʼaē neʼe mole lava foaki mai e he puleʼaga fakatagata. Kotou manatuʼi ko Sehova neʼe ina foaki mai tona ʼAlo ko he totogi, ke feala ai ki te tagata fuli ke natou maʼu ia te maʼuli heʼegata. ʼI te takitaki ʼofa ʼa te Puleʼaga, ʼe maʼu māmālie anai e te hahaʼi ia te maʼuli haohaoa. Koteā anai tona fua? Ko Sehova “ ʼe ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pē.”—Isaia 25:8.

ʼE lagi ko ʼihi ʼe natou feʼekeʼaki anai: ‘He koʼē neʼe heʼeki fai e te ʼAtua ia he puleʼaki ʼo aʼu mai ki te temi nei? Koteā ʼaē ʼe fakatalitali kiai?’ Neʼe kua fualoa pē he lava toʼo e Sehova ia te ʼu mamahi fuli peʼe ke ina tāʼofi ke mole hoko. Kae neʼe ina tuku ke hoholo, mole ʼuhi he neʼe manatu pē kiā ia totonu, kailoa ia, kae ko te fiafia heʼegata ʼo tana ʼu fānau ʼaē ʼi te kele ʼaē neʼe ina manatuʼi. Ko he ʼu mātuʼa ʼofa ʼe nā tuku anai hanā tamasiʼi ke tau mo he ʼaluʼaga faigataʼa mo kapau ʼe nā ʼiloʼi ko te faʼahi ʼaia ʼe feala ai anai hana maʼu ia hona ʼu lelei fualoa. ʼO toe fēia, ʼe lahi te ʼu tupuʼaga ʼaē ʼe tuku ai e Sehova ia te hahaʼi ke natou mamahi fakatemi, pea ko te ʼu tupuʼaga ʼaia ʼe fakamahino mai ʼi te Tohi-Tapu. ʼE kau ki te ʼu tupuʼaga ʼaia, ia te loto faʼitaliha, te agahala, pea mo te fehuʼi ʼo ʼuhiga mo te matatonu ʼaē ia te takitaki ʼa Sehova. ʼE toe fakamahino ʼi te Tohi-Tapu, neʼe fakagafua fakatemi ki te laumālie agakovi ke ina puleʼi ia te mālamanei. a

ʼE mole feala hatatou vakaʼi te ʼu tupuʼaga fuli ʼi te ʼalatike ʼaenī, kae ko faʼahi e lua ʼe feala ke ina foaki mai te ʼamanaki pea mo te fakalotomālohi. ʼUluaki: ʼE lahi age anai totatou tapuakina e Sehova ʼi te ʼu mamahi ʼaē ʼe feala ke tau mo tātou. Pea tahi, ʼe fakapapau fēnei mai e te ʼAtua: “ ʼE mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto.” (Isaia 65:17) ʼE fakaʼauha kātoa anai pea mo talu ai e te ʼAtua ia te malaʼia pea mo te mamahi, ʼaē ko te ʼu fua ʼaia ʼo te fakagafua fakatemi ʼo te agakovi.

Lua: Neʼe kua fakakatofa e te ʼAtua ia te temi moʼo fakagata ai ia te mamahi. Kotou manatuʼi te polofetā ko Hapakuke ʼaē neʼe ina fehuʼi, peʼe ko temi ʼe fia ʼe kei toe ke fakagafua ai e Sehova ia te agamālohi pea mo te ʼu tokakovi. Neʼe tali fēnei age e Sehova: “Ko te meʼa ʼaē neʼe hā ʼe kei tuku ia ki te temi ʼaē neʼe fakakatofa kiai. . . . ʼE mole tauhala anai ia.” (Hapakuke 2:3) ʼE tou vakaʼi anai ʼi te ʼalatike kā hoa mai, ko te “temi ʼaē neʼe fakakatofa kiai” kua ovi mai.

[Nota]

 [Talanoa ʼo te pasina 7]

ʼE Fakahā Mai ʼi Te Tohi-Tapu Ia Te Kā Haʼu Fīmālie

ʼE MOLE TOE ʼI ANAI HE ʼU TAU:

“Kotou ʼomai, ʼo kotou mamata ki te ʼu gāue ʼa Sehova, peʼe feafeaʼi tana fakahoko te ʼu meʼa fakaofoofo ʼi te kele. Neʼe ina fakagata te ʼu tau ʼo aʼu ki te potu taupotu ʼo te kele.”—Pesalemo 46:8, 9.

ʼE TOE FAKATUʼUAKE NĀTOU NEʼE TOU ʼOʼOFA AI:

“ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.”—Gāue 24:15.

ʼE MAʼU TE MEʼA KAI MAʼA TE HAHAʼI FULI:

“ ʼE mahu anai te pulapula ʼi te kele; ʼe tapuke anai ʼi te tumutumu ʼo te ʼu moʼuga.”—Pesalemo 72:16.

ʼE MOLE ʼI AI ANAI TE MAHAKI:

“ ʼE mole he tahi ʼe ina ʼui anai: ‘ ʼE au mahaki.’ ”—Isaia 33:24.

ʼE FAKAʼAUHA ANAI TE HAHAʼI AGAKOVI:

“ ʼO ʼuhiga mo te hahaʼi agakovi, ʼe toʼo anai ia nātou ʼi te kele; pea ki te hahaʼi kākā ʼe taʼaki anai nātou mai ai.”—Tāʼaga Lea 2:22.

ʼE TUʼU ANAI TE FAITOTONU:

“Koʼenī! ʼE pule anai he hau [ko Kilisito Sesu] maʼa te faitotonu; pea ki te kau tama ʼaliki, ʼe natou pule anai ohagē ko he ʼu tama ʼaliki maʼa te faitotonu.”—Isaia 32:1.

[Paki ʼo te pasina 7]

Ko te Puleʼaga ʼo te ʼAtua ʼe ina fakatokatoka anai te ʼu mamahi fuli ʼaē ʼe tau mo tātou