He Koʼē ʼe Foaki e Te ʼAtua Ki Te Tagata Ia Te Meʼa ʼOfa ʼAē Ko Te Maʼuli Heʼegata?
ʼE Fia ʼIloʼi e Te Kau Lautohi . . .
He Koʼē ʼe Foaki e Te ʼAtua Ki Te Tagata Ia Te Meʼa ʼOfa ʼAē Ko Te Maʼuli Heʼegata?
▪ ʼE ʼui ʼi te Tohi-Tapu ko te ʼAtua neʼe ina fakapapau mai ʼe feala ke tou maʼu ia te “maʼuli heʼegata.” (Soane 6:40) Koteā ʼaē neʼe ina uga ai ia te ʼAtua ke ina foaki mai te fakatuʼutuʼu ʼaia? ʼE ko hana fia fakahā mai koa ia tana faitotonu?
ʼE fakaʼuhiga ia te faitotonu ke fakamāu ia te hahaʼi ʼo mulimuli ki he ʼu lēkula ʼe faitotonu pea mo totonu. ʼE tuha moʼoni koa mo tātou ke tou maʼuli? Kailoa ia. ʼE ʼui fēnei ʼi te Tohi-Tapu: “[ʼE] mole he tagata agatonu ʼi te kele ʼe ina fai tuʼumaʼu te meʼa ʼaē ʼe lelei pea ʼe mole agahala.” (Tagata Tānaki 7:20) ʼE i ai te fakatūʼā ki te agahala. Neʼe fakatokaga e te ʼAtua ki te ʼuluaki tagata, ko Atama, ko te ʼaho ʼaē ʼe agahala ai ʼe mate moʼoni anai ia. (Senesi 2:17) Ki muli age, neʼe takitaki e te ʼAtua ia te ʼapositolo ko Paulo ke ina tohi fēnei: “Ko te totogi ʼaē ʼe foaki e te agahala, ko te mate.” (Loma 6:23) Kapau ko te hōloga fuli ʼo Atama ʼe tuha mo nātou ia te mate, he koʼē ʼe foaki mai e te ʼAtua ia te fealagia ʼaē ke maʼu ia te maʼuli heʼegata?
Ko te maʼuli heʼegata ʼe “ko he meʼa ʼofa ʼe mole totogi.” ʼE ko he fakahā ʼaia ʼo te māʼoluga mo te lahi ʼo te ʼofa ʼo te ʼAtua pea mo tona ʼofa makehe. ʼE ʼui fēnei ʼi te Tohi-Tapu: “Ko tātou fuli neʼe tou agahala pea mole tou aʼu ki te kolōlia ʼo te ʼAtua, pea ʼe ko he meʼa ʼofa ʼe mole totogi ʼaē ʼe tala ai ko nātou ko te kau faitotonu ʼaki tona ʼofa makehe, ʼuhi ko te fakaʼāteaina ʼaē neʼe totogi e Kilisito Sesu.”—Loma 3:23, 24.
Logolā ʼe tuha mo tātou fuli te mate, kae ʼe fakatotonu e te ʼAtua ke ina foaki mai ia te maʼuli heʼegata kiā nātou ʼaē ʼe ʼoʼofa kiā te ia. ʼE mata tonu koa ia te faʼahi ʼaia? ʼE ʼui fēnei ʼi te Tohi-Tapu: “Koia, koteā ʼaē kā tou ʼui anai? ʼE maʼu koa te heʼe faitotonu ʼi te ʼAtua? Ke mole hoko he meʼa fēia! He neʼe ina ʼui fēnei kiā Moisese: ‘ ʼE au ʼofa mamahi anai kiā ia ʼaē ʼe au ʼofa mamahi ki ai, pea ʼe au manavaʼofa anai kiā ia ʼaē ʼe au manavaʼofa ki ai.’ . . . ʼE ko ai koe ke ke tali palalau ki te ʼAtua?”—Loma 9:14-20.
ʼI ʼihi koga meʼa ʼo te mālamanei, ʼe feala ki he tagata lahi ʼo te puleʼaga peʼe ko he tuʼi fakamāu ke ina fakamolemole ki he tagata fai fakapō neʼe tau mo ia he fakatūʼā mamafa. Kapau neʼe mulimuli lelei ia te tagata fai fakapō ki te tūʼā ʼaē neʼe tuku age e te tuʼi fakamāu pea mo fakahā ia he ʼu fetogi ʼi tana aga, ʼe feala pē ki he tuʼi fakamāu peʼe ko te pelesitā ke ina fakatotonu ke fakamolemole ki ai, ʼo fakamaʼamaʼa tona tūʼā peʼe ke fakamolemole kātoa kiai. Ko te taʼi fakatuʼutuʼu ʼaia ʼe fakahā ʼaki ai ia he ʼofa makehe.
ʼE toe fēia pē kiā Sehova, ʼe feala ke ina fakatuʼutuʼu ke mole fakamaʼua ki te hahaʼi agahala fuli he fakatūʼā ʼe lagi tāu mo nātou. Kae ʼaki te ʼofa ʼe feala ke ina foaki te maʼuli heʼegata kiā nātou ʼaē ʼe ʼofa kiā te ia pea mo maʼuliʼi tana ʼu pelesepeto. ʼE ʼui fēnei ʼi te Tohi-Tapu: “Ko te ʼAtua ʼe mole fakapalatahi, kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gāue 10:34, 35.
Ko te faʼahi tāfito ʼaē neʼe fakahā ai e Sehova ia tona ʼofa ʼaē kiā tātou, ʼe ko tana fekauʼi ifo tona ʼAlo ke haʼu ʼo tali mamahi pea mo mate maʼa tātou. Neʼe ʼui fēnei e Sesu ki tana Tamai: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.”—Soane 3:16.
Ko nātou fuli ʼaē ʼe ʼoʼofa anai kiā Sehova pea mo fai ia tona finegalo, ʼe toe tali lelei mo nātou e te ʼAtua, ʼo mole lauʼia tonatou haʼuʼaga. Koia, ko te ʼamanaki ʼaē ki te maʼuli heʼegata ʼe ko he fakahā tāfito ʼaia ʼo te ʼofa makehe, ko he toe ʼofa lahi ʼaupitō ʼo te ʼAtua.
[Paki ʼo te pasina 25]
ʼE ko he fakahā tāfito ʼaia ʼo te ʼofa makehe, ko he toe ʼofa lahi ʼaupitō ʼo te ʼAtua