“Ko He Tahi Kiʼi ʼIpu Kava Pē e Tahi”
“Ko He Tahi Kiʼi ʼIpu Kava Pē e Tahi”
NEʼE kamata ʼinu kava fakavalevale ia Allen ʼi tona taʼu 11. * Ko ia pea mo tona ʼu kaumeʼa neʼe natou gaoʼi ʼi te vao matuʼa, ʼo natou faʼifaʼitakiʼi te ʼu hahaʼi ʼaē neʼe natou sioʼi ʼi te ʼu ʼata. Ko te ʼu hahaʼi ʼaia, ʼaē neʼe natou faʼifaʼitakiʼi ʼe mole natou ʼinu kava fakamālotoloto, kae ko te kava ʼaē neʼe ʼinu e Allen pea mo tona ʼu kaumeʼa ko te ʼu foʼi kava moʼoni ia.
Neʼe ko te taʼu 40 ʼo Tony ʼi te temi ʼaē neʼe kua fakahaʼuhaʼu ai te lahi ʼo tana ʼinu, mai te ʼipu kava e tahi peʼe lua ʼi te pō fuli, kua aʼu tana ʼinu kiā ʼipu kava e nima peʼe ono. Ki muli age, neʼe mole kei ina ʼiloʼi peʼe ko te ʼu ʼipu kava ʼe fia ʼaē neʼe ina ʼinu ʼi te ʼaho.
Neʼe kumi tokoni ia Allen ki tona fihifihia ʼo ʼuhiga mo te kava. Kae ko Tony ia neʼe mole ina tali ia te tokoni ʼofa ʼaē neʼe foaki age e tona fāmili pea mo tona ʼu kaumeʼa. ʼE kei maʼuli nei Allen moʼo fakamatala ia tona hisitolia; kae kua mate Tony ia kua hili nei kiai te ʼu taʼu he neʼe fakaʼī ʼi te lahi fau ʼo tana ʼinu kava.
Tatau aipē peʼe ʼinu kava tokotahi he tahi, kae ko te ʼu fua ʼo tana ʼinu kava fakavalevale ʼe fakatupu kovi ki ʼihi hahaʼi, pea ʼi te agamāhani ʼe ʼi ai tona ʼu ikuʼaga kovi. * Ko te ʼinu kava fakavalevale ʼe fakatupu tuʼumaʼu aipē ia te ʼu tokakovi ʼi te ʼu palalau ʼaē ʼe fai pea mo te faʼahi fakasino, mo te ʼu agamālohi pea mo te ʼu fai fakapō, mo te ʼu tuʼutāmaki ʼi te ala, mo te ʼu tuʼutāmaki ʼi te gāue, ʼo toe fēia pē mo te ʼu tuʼuga mahaki ʼaē ʼe maʼu mai te ʼinu. ʼI te taʼu fuli, ko te lauʼi miliale falā ʼaē ʼe totogi e te puleʼaga ʼuhi ko te ʼinu kava fakavalevale ʼa te hahaʼi, ʼo mole tou tānaki mai kiai mo te ʼu mamahi ʼaē ʼe tau mo nātou ʼaia, ʼo fēia ki ʼonatou fāmili pea mo ʼanatou fānau.
Neʼe ʼui e te kautahi (U.S. National Institutes of Health), logolā “peʼe mole ʼinu kava tuʼumaʼu he tahi kae ʼe ʼi ai tona fihifihia mo te kava, kae ʼe mole ko te hahaʼi fuli ʼaē ʼe tau mo te fihifihia ʼaia ʼi te ʼaho fuli.” Tokolahi ʼe mole natou ʼinu kava tuʼumaʼu kua liliu ko hanatou agamāhani ia te ʼinu kava kae mole natou ʼiloʼi. Ko ʼihi ʼe tahitahiga tanatou ʼinu kava kae ʼe feala pē ke natou ʼiʼinu he ʼu ʼipu kava ʼe nima ʼi he moʼi temi pē e tahi.
Kapau ʼe kotou fakatotonu ke kotou ʼinu hakotou moʼi kava, ʼe feafeaʼi hakotou ʼiloʼi kua lahi fau takotou ʼinu kava? ʼE kotou lava ʼiloʼi feafeaʼi te temi ʼaē kua ‘fakalaka takotou ʼinu’? (Tāʼaga Lea 23:29, 30) ʼI te ʼu ʼalatike ʼaē kā hoa mai, e tou vakaʼi ai anai he ʼu tokoni lelei ʼo ʼuhiga mo te faʼahi ʼaia.
[ʼU nota]
^ Neʼe fetogi ʼihi higoa.
^ Mai tona ʼaluʼaga ʼaē ko te hahaʼi tagata ʼe lagi lahi age tanatou ʼinu kava ʼi te hahaʼi fafine, koia ʼaē ʼi te ʼu ʼalatike ʼe fakaʼaogaʼi tāfito ai te hahaʼi tagata, kae ʼe fakaʼaogaʼi tatau pē ki te hahaʼi tagata pea mo te hahaʼi fafine.