Koteā Te Manatu ʼa Te ʼAtua Ki Te Kava?

KO TOTATOU Tupuʼaga, ʼe ina ʼiloʼi te meʼa ʼaē ʼe lelei kiā tātou; ʼe mole ina tapuʼi ia te ʼinu fakapotopoto ʼo te kava. a Neʼe ina foaki ki te tagata “he vino moʼo fakafiafia ia [ia], he lolo moʼo fakamālōlō ia [ia], he pane ke [ina] maʼu ai he mālohi.” (Pesalemo 104:15, Bible en français courant) Ko te tahi ʼaluʼaga, neʼe tokoni ia Sesu Kilisito ki te fakafiafia ʼo te fai ʼohoana, ʼo ina fakaliliu te vai “ko he vino ʼe lelei age ia.”—Soane 2:3-10, Bible de Jérusalem.

ʼE fakapotopoto ia te manatu ʼaē ko te Tupuʼaga ʼe ina ʼiloʼi lelei te ʼu fua kovi ʼo te kava ki te sino pea mo te ʼuto. ʼI te Tohi-Tapu, ko totatou Tamai ʼaē ʼe ʼi selō ‘ ʼe ina akoʼi tātou ke fua lelei kiā tātou,’ pea ʼe ina fakatokaga mālohi mai kiā tātou ke mole tou ʼinu fakavalevale ia te kava ʼaē ʼe mālohi. (Isaia 48:17) Tou vakaʼi te ʼu fakatokaga fakahagatonu ʼaenī:

“ ʼAua naʼa kotou kōnahihia ʼi te vino, ʼaē ʼe maʼu ai te aga fakalialia.” (Efesi 5:18) “Ko te hahaʼi kōnahihia . . . ʼe mole natou maʼu tofiʼa anai ia te Puleʼaga ʼo te ʼAtua.” (1 Kolonito 6:9-11, Bible de Jérusalem) Ko te Folafola ʼa te ʼAtua ʼe ina tauteaʼi ia “te konahia, te ʼu fakafiafia fakavalevale, pea mo te ʼu meʼa ʼe hagē pē ko te ʼu meʼa ʼaenī.”—Kalate 5:19-21, Bible Segond Révisée.

Tou vakaʼi age muʼa te ʼu fua kovi ʼo te ʼinu kava fakavalevale.

Te ʼu Fua Kovi ʼo Te ʼInu Kava Fakavalevale

Logolā ko te kava ʼe feala ke lelei ki te sino, kae neʼe gaohi ʼaki te ʼu kiʼi faʼahiga meʼa mālohi kehekehe ʼe feala ke ina fetogi te agaaga ʼo te ʼatamai pea mo te sino. Ko te ʼinu kava fakavalevale ʼe feala ke tupu ai ia te fihifihia ʼaenī:

Ko te lahi fau ʼo te ʼinu, ʼe ina fakasiʼisiʼi ai ia te fakakaukau ʼo ia ʼaē ʼe ʼinu kava, heʼe mole kei ‘tāsilo lelei tana fakakaukau.’ (Tāʼaga Lea 23:33) ʼI te tahi ʼalatike neʼe tou palalau kiā Allen, ia te tagata ʼaē neʼe lahi faʼu tana ʼinu, ʼe ina ʼui fēnei: “Ko te ʼinu kava fakavalevale ʼe mole ko he mahaki pē ia ʼo te sino, kae ko te mahaki ʼo te ʼatamai pea mo te ʼu aga ʼo he tahi. ʼE mole kei kotou ʼiloʼi ia te mamahi ʼaē ʼe kotou fai ki ʼihi.”

 Ko te ʼinu kava fakavalevale ʼe feala foki ke puli ai te ʼu aga ʼaē e lelei. ʼE fakatokaga fēnei mai ʼi te Tohi-Tapu: “[Ko] te vino pea mo te vino mālie, [koʼenā te ʼu meʼa] ʼaē ʼe natou pulihi ia te ʼu manatu lelei.” (Osea 4:11) ʼE hoko feafeaʼi ia te faʼahi ʼaia? Kā kua konahia he tahi, ko te ʼu manatu pea mo te ʼu holi ʼaē ʼe tou tekeʼi māhani ʼe feala ke liliu ʼi te temi ʼaia ko he meʼa kua tou tali gafua—kapau ko he ʼahiʼahi kiā tātou. ʼE feala ke lotovaivai ai ia tatatou fakatotonu ʼaē ke tou fai te meʼa ʼaē ʼe totonu. ʼE feala ki te kava ke ina fakavaivaiʼi tatatou tekeʼi ʼaē ia te ʼu aga ʼe kovi, ʼo iku ai mo hotatou tuʼutāmaki ʼi te faʼahi fakalaumālie.

Ohagē lā, ko John neʼe kē mo tona ʼohoana pea ʼalu ʼita ki te fale kava. Neʼe kua lahi ia te ʼu ʼipu kava ʼaē neʼe ina ʼinu moʼo fakamalū tona ʼita ʼi te temi ʼaē neʼe fakaovi age ai te fafine kiā ia. ʼI tana kua ʼosi ʼinu te tahi age ʼu kiʼi ʼipu kava, neʼe ʼalu ai leva ia John mo te fafine pea neʼe nā tono. ʼOsi ʼaia, neʼe fakahemala ʼaupitō ia John ʼi tana fai te aga ʼaia, he neʼe hoko te faʼahi ʼaia ʼuhi ko te kava.

Ko te ʼinu kava fakavalevale ʼe feala foki ke mole toe maʼu he loto tāʼofi ʼi te ʼu palalau pea mo te aga. ʼE ʼui fēnei ʼi te Tohi-Tapu: “Ko ai ʼaē ʼe maʼuli mamahi pea mo fakahemala. Ko ai ʼaē ʼe faʼa kē pea mo lāuga tuʼumaʼu. . . . Ko te tagata ʼaē ʼe nofo fualoa ʼo ʼinu te vino, pea mo faiga tuʼumaʼu ke ina ʼahiʼahi he ʼu kava foʼou.” (Tāʼaga Lea 23:29, 30, Bible en français courant) Ko te ʼinu kava fakavalevale ʼe feala ke ke “hagē anai ʼe ke nofo ʼi te tai, ʼe lū koe ʼi te tumutumu ʼo te fana ʼo te vaka.” (Tāʼaga Lea 23:34, Bible en français courant) Ko te tagata ʼaē neʼe ʼinu kava fakavalevale ʼe feala ke ʼala ake neʼe “tā [ia ia], . . . kae neʼe mole [ina] ʼiloʼi!”—Tāʼaga Lea 23:35, Bible Second Révisée.

Ko te ʼinu kava fakavalevale ʼe fakatupu mahaki. “[Ki muli age ko te kava] ʼe ina ʼuʼusi [tātou] ohagē he gata, ʼo ina ʼuʼusi ohagē ko he gata kafokona.” (Tāʼaga Lea 23:32, Bible de Jérusalem) Neʼe fakamoʼoni ia te kau tōketā ki te fakapotopoto ʼo te tāʼaga lea ʼāfea ʼaia. Ko te ʼinu lahi ʼo te kava ʼe feala ai ke fakatupu kovi ki te sino heʼe feala ai ke maʼu he ʼu kōsea kehekehe: Te mahaki ʼo te hépatite B, te mahaki ʼate, te mahaki ʼo te ʼatepili, te suka, te fakatupu ʼo he toe māʼimoa, pea mo te mahaki mafu—ʼe kei lahi age mo ʼihi mahaki. Pea ko he ʼinu kava fakavalevale pē ʼe tuʼa tahi peʼe ko he kai fakavale ʼe feala ke iku ki te koma peʼe ki te mate. Kae ko te ʼu fua kovi tāfito ʼo te ʼinu kava fakavalevale, ʼe mole fakahāhā ia ʼi te ʼu tohi fakatōketā.

Ko he tuʼutāmaki lahi. Logolā ʼe mole konahia he tahi, kae ko te ʼinu fakavalevale ʼo te kava ʼe feala ke fakatupu he ʼu tuʼutāmaki ʼi te faʼahi fakalaumālie. ʼE ʼui fakalelei mai ʼi te Tohi-Tapu: “Malaʼia kiā nātou ʼaē ʼe natou ʼaʼala kei ʼuhuʼuhu moʼo kumi he ʼu meʼa ʼinu ʼe fakatupu konahia, ʼaē ʼe natou fakatuatuai ʼo aʼu ki te tō ʼo te afiafi, ʼo  tutu ai nātou e te vino!” Koteā tona tupuʼaga? ʼE fakamahino mai e Isaia ia te ʼu fua kovi ʼi te faʼahi fakalaumālie ʼo te mole ʼinu kava fakapotopoto: “Ki te gāue ʼa Sehova ʼe mole natou sioʼi, pea neʼe mole natou sio ki te gāue ʼoʼona ʼu nima.”—Isaia 5:11, 12.

ʼE tokoni mai ia te Folafola ʼa te ʼAtua ke mole tou “nofo ʼi te lotolotoiga ʼo te hahaʼi ʼinu vino.” (Tāʼaga Lea 23:20) ʼE fakatokaga ki te kau finemātuʼa ke ʼaua naʼa natou “pōpula ki te ʼinu lahi ʼo te vino.” (Tito 2:3) Koteā tona tupuʼaga? ʼAki pē te temi, ʼo mole natou ʼiloʼi ʼi te agamāhani, ko te hahaʼi ʼe natou kamakamata fakaʼaogaʼi ʼo lahi age ia te kava, ʼo natou fai putuputu. Ki muli age, ko ia ʼaē ʼe ʼinu kava fakavalevale ʼe lagi ina ʼui anai “Ko ʼāfea ʼaē kā au ʼala ake anai? . . . ʼE au toe kole anai haku meʼa ʼinu!” (Tāʼaga Lea 23:35, Bible en français courant) Ko te hahaʼi ʼaē ʼe ʼinu kava fakavalevale, ʼe natou ʼaʼala ake ʼi te ʼuhu kua ʼāsili age tanatou fia ʼinu he moʼi kava ke tupu ʼaki ai hanatou mālolohi.

ʼE fakatokaga mai ʼi te Tohi-Tapu ko nātou ʼaē ʼe natou ‘fakavalevale ʼi te vino, ʼi te ʼu fakafiafia fakavalevale, ʼi te ʼu kōnahihia ʼe fakamāuʼi anai nātou e ia ʼaē kā ina ʼamanaki fakamāu ia te maʼuli mo te mate.’ (1 Petelo 4:3, 5) Pea ʼo ʼuhiga mo te ʼu temi maʼuhiga ʼaē ʼe tou lolotoga māʼuʼuli nei ʼi ai, neʼe fakatokagaʼi fēnei tātou e Sesu: “Ke kotou tokaga kiā koutou totonu, naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pē kua hoko fakapunamaʼuli mai kiā koutou te ʼaho ʼaia ohagē ko he hele.”—Luka 21:34, 35.

Koteā ʼaē ʼe feala ke fai e te hahaʼi ʼinu kava fakavalevale ke ʼaua naʼa natou ‘mamafa ʼi te lahi fau ʼo te ʼinu’?

[Nota]

[Paki ʼo te pasina 4]

Ko te ʼinu kava fakavalevale ʼe feala ai ke tupu ai he ʼu tuʼuga fihifihia