Te ʼu Fehuʼi ʼa Te Kau Lautohi
Te ʼu Fehuʼi ʼa Te Kau Lautohi
Ko te ʼu ʼaluʼaga fea ʼe feala ai ki he tahi ke toe papitema?
ʼI ʼihi ʼaluʼaga, ʼe lagi feʼekeʼaki anai e he tahi kua papitema, pe neʼe tali tona papitema pea ʼe lagi ʼi tana manatu ʼe tonu ke toe papitema. Ohagē lā ʼi te temi ʼo tona papitema, ʼe lagi neʼe mole ʼalutahi tona maʼuli mo te moʼoni, pe neʼe ina fai he aga neʼe feala pē ke tupu ʼaki ai hona fakamavae mo kanapau lā kua papitema. ʼI te ʼu taʼi ʼaluʼaga ʼaia, neʼe feala ʼapē koa ke ina foaki tona maʼuli ki te ʼAtua? Ko he tahi neʼe maʼuli fēia, neʼe hoki feala pē hana foaki ia tona maʼuli kiā Sehova mo kapau neʼe kua ina tuku tana ʼu aga ʼaē ʼe fakafeagai ki te Tohi-Tapu. Koia, ko he tahi kua papitema kae neʼe tau mo he fihifihia fēia, ʼe lagi ina feʼekeʼaki anai peʼe tonu ke toe fai tona papitema.
ʼE feafeaʼi ki he tahi neʼe mole maʼuli ʼi te agahala ʼi te temi ʼaē neʼe papitema ai, kae ʼi tona ʼosi papitema neʼe ina fai he agahala ʼe fakamaʼua ki ai he komitē faifakamāu? Kotou fakakaukauʼi age muʼa, ʼi te moʼi temi ʼaia ʼe ina ʼui ai neʼe mole mahino lelei ki te aga ʼaē neʼe ina lolotoga fai ʼi te temi ʼaē neʼe papitema ai, pea mo ina ʼui neʼe mole tali ia tona papitema ʼaē neʼe fai kiā ia ʼi te temi ʼaia. ʼI te temi ʼaē ʼe felōgoi ai te ʼu tagata ʼāfea pea mo he tahi neʼe agahala, ʼe mole tonu anai ke natou fakafihiʼi tona papitema pea mole tonu ke natou fehuʼi age peʼe ʼi tana manatu neʼe tali koa ia te foaki ʼo tona maʼuli pea mo tona papitema. ʼI tona fakahagatonu, neʼe logo ki te akonaki Fakatohi-tapu ʼe fakamahino ai ia te ʼuhiga ʼaē ʼo te papitema. Neʼe tali fakalelei ki te ʼu fehuʼi ʼo ʼuhiga mo te foaki ʼo tona maʼuli pea mo tona papitema. Pea neʼe ina fetogi tona ʼu mutuʼi meʼa, pea mo uku kātoa ai tona sino ki te vai. Koia, ʼe tuha ai ke ʼui neʼe mahino lelei ia ki te maʼuhiga ʼo te faʼahi ʼaē neʼe ina fakahoko. Pea ko te ʼu tagata ʼāfea ʼe natou fakaʼuhigaʼi anai ia ia ko he tahi kua papitema.
Kapau ko he tahi ʼe ina feʼekeʼaki ʼo ʼuhiga mo tona papitema, pea ʼe feala ki te ʼu tagata ʼāfea ke natou fakahā age kiā ia ia te ʼu manatu ʼaē ʼe tuʼu ʼi Te Tule Leʼo (Fakafalani) ʼaho 1 ʼo Fepualio 1961, ʼi te pāsina 47 pea mo Te Tule Leʼo (Fakafalani) ʼaho 15 ʼo Sepetepeli 1964, ʼi te pāsina 565 ki te 570, ʼaē neʼe fakamahino fakalelei ai ia te toe papitemaʼi ʼo he tahi. Koia, ko te ʼu tupuʼaga ʼaē ʼe feala ai ki he tahi ke toe fia papitema (ohagē ko he tahi neʼe papitemaʼi kae neʼe mole heʼeki mahino lelei ki te Tohi-Tapu) ʼe ko he faʼahi ia ʼe tahi fakalogo pē.
Ko te ʼu faʼahi fea ʼaē ʼe tonu ki te kau Kilisitiano ke natou fakakaukauʼi mokā ʼe tonu ke natou kaugā ʼapi mo niʼihi?
ʼE ʼaoga kiā tātou fuli ke tou maʼu hotatou nofoʼaga. Kae iā ʼaho nei, e tokolahi te hahaʼi ʼe mole maʼu honatou nofoʼaga. Ko he tahi ʼe fihifihia ʼi te ʼu faʼahi fakaekonomika, peʼe mahaki, peʼe ko ʼihi atu ʼaluʼaga, ʼe lagi ʼaoga anai ke kaugā ʼapi mo tona ʼu fāmili, ʼaē ko hona ʼu kāiga, ke natou māʼuʼuli fakatahi. ʼI ʼihi fenua ʼo te mālamanei, ʼe feala ki he ʼu fāmili ʼe natou fakaʼapiʼapi ʼi he kiʼi koga fale pē e tahi, ʼo mole natou maʼu ai honatou maʼuli takitokotahi.
ʼE mole ko he maʼua ʼo te kautahi ʼa Sehova ke ina foaki mai he ʼu lēkula kiā nātou fuli ʼaē ʼi te ʼu kōkelekāsio fakamālamanei, ʼo ʼuhiga mo te maʼuli ʼaē ʼi te ʼu loto fale. ʼE fakalotomalohiʼi ia te kau Kilisitiano ke natou manatuʼi te ʼu
pelesepeto ʼo te Tohi-Tapu ke natou ʼiloʼi ai peʼe ko tonatou faʼahiga maʼuli ʼe leleiʼia e te ʼAtua peʼe kailoa. Koteā te ʼu pelesepeto ʼaia?ʼUluaki, ʼe malave feafeaʼi anai kiā tātou pea mo totatou maʼuli fakalaumālie mokā tou kaugā ʼapi mo niʼihi? Ko ai koa ia te hahaʼi ʼaia? ʼE natou ʼatolasio koa kiā Sehova? ʼE natou maʼuliʼi koa ia te ʼu lēkula Fakatohi-tapu? Neʼe tohi fēnei e te ʼapositolo ko Paulo: “ ʼAua naʼa kotou faihala. Ko te ʼu fakakaugā kovi, ʼe natou maumauʼi te ʼu agamāhani ʼaoga.”—1 Ko. 15:33.
ʼE fakamahino ʼi te Tohi-Tapu ʼe tauteaʼi e Sehova ia te folonikāsio pea mo te tono. (Hep. 13:4) ʼE mole tali anai e te ʼAtua ia te ʼu fakatuʼutuʼu ʼaē ʼe feala ai ki he tagata pea mo he fafine ke nā momoe ohagē ko he taumātuʼa kae ʼe mole heʼeki nā ʼohoana. ʼE mole loto anai e he Kilisitiano ke maʼuli ʼi he loto fale ʼe fakagafua ai ia te aga heʼeʼaoga.
Tahi ʼaē meʼa, ʼe fakalotomālohiʼi tātou ʼi te Tohi-Tapu, ko nātou fuli ʼaē fia maʼu ia te ʼofa ʼo te ʼAtua ke “[natou] hola mai te fai folonikāsio.” (1 Ko. 6:18) Koia, ʼe ko he aga fakapotopoto anai ki te kau Kilisitiano ke natou fakafisi ki te ʼu fakatuʼutuʼu ʼaē ʼe feala ai hanatou tō ki te fakahala, ʼo tupu ʼaki ai hanatou fai ia he aga heʼeʼaoga. Ohagē lā, ko he ʼu Kilisitiano ʼe natou momoe fuli ʼi he ʼapi e tahi. Ko te taʼi ʼaluʼaga ʼaia, ʼe feala ai koa ke hoko he ʼu fakahala? Pea ʼe feafeaʼi age, mo kapau ko he tagata mo he fafine ʼe mole heʼeki nā ʼohoana ʼe nā tō toko lua ʼi te loto fale he neʼe pupuli te hahaʼi ʼo te ʼapi? ʼE toe fēia pē, ki te kau selipatea ʼaē ʼe femanakoʼaki mokā ʼe natou māʼuʼuli fakatahi ʼi he loto fale. ʼE fakapotopoto age he tekeʼi ʼo te ʼu ʼaluʼaga ʼaia.
ʼO toe fēia pē, ki he taumātuʼa kua māvete ʼe mole lelei anai hanā hoko atu ia tanā māʼuʼuli fakatahi ʼaē ʼi he ʼapi e tahi. Heʼe feala anai ki tanā ʼu agamāhani ʼaē neʼe nā femaʼuʼaki ʼi tanā kei ʼohoana ke fakatupu ʼaki ai hanā tō ki he aga heʼeʼaoga.—Taag. 22:3.
Ko te tahi manatu maʼuhiga ʼe tonu ke vakaʼi, peʼe koteā te manatu ʼa te hahaʼi ʼo ʼuhiga mo te taʼi faʼahiga maʼuli fakatahi ʼaia. ʼE feala ki he Kilisitiano ke ina tali te ʼu taʼi fakatuʼutuʼu ʼaia kae lagi fakatupu tūkia ki te hahaʼi, koia ʼe tonu ai ke tokagaʼi ia te faʼahi ʼaia. ʼE mole tou loto ʼi he temi ke ʼulihi ia te huafa ʼo Sehova ʼaki tatatou aga. Neʼe ʼui fēnei e Paulo: “Ke kotou tōkakaga naʼa kotou liliu ko he ʼu meʼa fakatupu tūkia ki te kau Sutea pea mo te kau Keleka pea mo te kōkelekāsio ʼa te ʼAtua, ohagē ko au totonu, ʼe leleiʼia au e te hahaʼi fuli ʼi te meʼa fuli, ʼi taku mole kumi lelei kae au kumi te lelei ʼo te tokolahi, koteʼuhi ke haofaki ia nātou.”—1 Ko. 10:32, 33.
ʼE lagi faigataʼa anai ki te kau Kilisitiano ʼaē ʼe fia lagolago ki te ʼu lēkula faitotonu ʼa Sehova hanatou maʼu he ʼu nofoʼaga ke natou māʼuʼuli fakatahi ai mo niʼihi. Kae ʼe tonu ki te kau Kilisitiano “ke [natou] haga vakaʼi te meʼa ʼaē ʼe lelei ki te ʼAliki.” ʼE tonu ke natou ʼiloʼi papau ʼe mole he aga heʼeʼaoga ʼe fai ʼi tonatou loto fale. (Efe. 5:5, 10) Ko he faʼahi ʼe fakamaʼua ai ki te ʼu Kilisitiano ke natou kole ia te takitaki ʼa te ʼAtua pea ke natou fai ia meʼa fuli ʼe natou lavaʼi moʼo puipui nātou ʼi te faʼahi fakasino mo te aga ʼaē ʼe tonu ke fai, pea ke ʼaua naʼa tou ʼulihi ia te huafa ʼo Sehova.