Koteā ʼAē ʼe Tou Ako Mai Iā Sesu?

ʼO ʼUhiga Mo Te Tauhi Moʼoni

ʼE tali koa e te ʼAtua ia te ʼu tauhi fuli?

▪ Neʼe ʼofa mamahi ia Sesu ki te hahaʼi ʼaē neʼe kākāʼi e te lotu hala. Neʼe ina fakatokagaʼi tātou ʼo ʼuhiga mo te “kau polofetā loi ʼaē ʼe ʼomai . . . ʼaki te ʼu kofu fakaovi, kae ʼi loto ko te ʼu lupo fekai.” (Mateo 7:15) Kua kotou fakatokagaʼi koa ko te hahaʼi ʼe natou fakaʼaogaʼi ia te lotu ke tupu ʼaki hanatou fai he ʼu aga ʼe kovi?

Neʼe ʼui fēnei e Sesu ʼi tana faikole ki te ʼAtua: “Ko tau folafola ʼe moʼoni.” (Soane 17:17) Koia ʼe mole tali ai e te ʼAtua ia te tauhi ʼaē ʼe mole ʼalutahi mo te moʼoni ʼo te Tohi-Tapu. Koia, neʼe fakaʼuhiga ai e Sesu ki ʼihi kau takitaki lotu mālualoi ia te ʼu palalau ʼaenī ʼa te ʼAtua: “ ʼE ko he maumau noa pē ʼo tanatou haga fai mai kiā te au he tauhi, heʼe natou akonakiʼi te ʼu akonaki ʼe ko he ʼu fakatotonu fakatagata pē.”—Mateo 15:9.

ʼE ʼi ai koa he lotu moʼoni?

▪ ʼI te fetaulaki ʼa Sesu mo te fafine Samalitana ʼaē neʼe kākāʼi e te lotu hala, neʼe ina ʼui fēnei kiā te ia: “ ʼE kotou ʼatolasio koutou ki te meʼa ʼaē ʼe mole kotou ʼiloʼi . . . [heʼe] ʼatolasio . . . anai te kau ʼatolasio moʼoni ki te Tamai ʼaki te laumālie pea mo te moʼoni, heʼe ko te Tamai ʼe ina kumi te taʼi kau ʼatolasio ʼaia.” (Soane 4:22, 23) ʼE mahino papau ia, ʼe ʼi ai te tauhi ʼe moʼoni.

Neʼe ʼui fēnei e Sesu: “ ʼE mole au fai he meʼa ʼaki toku loto faʼitaliha; kae ohagē pē ko tona akoʼi mai e te Tamai kiā te au, ʼe au tala te ʼu meʼa ʼaia.” Neʼe ʼiloʼi e Sesu ko te lotu ʼaē neʼe ina akoʼi ʼe ko te tauhi moʼoni pē ʼaia e tahi. (Soane 8:28) Koia, neʼe ina ʼui fēnei: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soane 14:6) Kapau ko te kau ʼatolasio moʼoni ʼe natou logotahi ʼi tanatou fakaovi ʼaē ki te Tamai, pea ʼe tonu ke natou logotahi ʼi te lotu moʼoni e tahi.

 ʼE feafeaʼi hakotou ʼiloʼi ia te kau ʼatolasio moʼoni?

▪ Ko he Kilisitiano ʼe ko he tahi ʼe ina muliʼi ia Sesu Kilisito. Tou vakaʼi te ʼu puani e fā ʼaē ʼe fakahā ai kā tou mulimuli ki te faʼifaʼitaki ʼa Sesu pea ʼe ʼiloga lelei ai ko tātou ko tana ʼu tisipulo.

 1. Neʼe ʼui fēnei e Sesu Kilisito i tana faikole kiā Sehova: “Neʼe au fakaʼilo . . . tou huafa.” (Soane 17:26) ʼE kei fai pē e te kau Kilisitiano moʼoni ia te faʼahi ʼaia.

 2. Neʼe fakamafola e Sesu ia te Puleʼaga ʼo Sehova pea neʼe ina fekauʼi tana ʼu tisipulo ke natou toe fakamafola mo nātou ia te logo ʼaia ʼi te ʼu ʼapi. Neʼe ina ʼui fēnei: “ ʼI he kolo lahi, pe ko he kolo veliveli ʼe kotou hū kiai, kotou kumi pe ko ai ʼaē ʼe tāu mo ia.” Ki muli age, neʼe ina ʼui fēnei ki tana ʼu tisipulo: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē.” (Mateo 10:7, 11; 28:19) Iā ʼaho nei, ʼe feala hakotou ʼiloʼi gafua ia te kau Kilisitiano moʼoni heʼe kei natou fai pē ia te gāue ʼaia.

 3. Neʼe fakafisi ia Sesu ki hana kau ki he ʼu gāue fakapolitike. Koia, neʼe ina ʼui fēnei ʼo ʼuhiga mo tana ʼu tisipulo: “ ʼE mole natou kau ʼi te mālamanei, ohagē pē ko au, ʼe mole au kau ʼi te mālamanei.” (Soane 17:14) ʼE tonu ke ʼiloʼi ia te kau ʼatolasio moʼoni ʼi tanatou mole kau ʼaē ki te ʼu meʼa fakapolitike.

 4. Neʼe teuteu Sesu ke ina sākilifisioʼi tona maʼuli ʼi tona ʼofa ʼaē ki te hahaʼi. Neʼe ina ʼui fēnei: “ ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soane 13:35) ʼE fetokoniʼaki ia te kau Kilisitiano moʼoni pea ʼe mole natou kau ki te ʼu tau.

ʼE fua lelei feafeaʼi kiā koutou ia te tauhi moʼoni?

▪ Ko te maʼuliʼi ʼo te tauhi moʼoni, ʼe ʼaoga muʼa ke kotou ʼiloʼi lelei ia Sehova. Ko te ʼatamai mālama ʼo te ʼAtua ʼe tokoni atu anai ke kotou taupau ia te maʼuli ʼaē ʼe lelei age pea ʼe ina fakafonu anai tokotou loto ʼaki tokotou ʼofa ki te ʼAtua. Neʼe fakapapau mai e Sehova ia te maʼuli heʼegata kiā nātou ʼaē ʼe ʼoʼofa kiā te ia. Koia neʼe ʼui fēnei e Sesu: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi.”—Soane 17:3.

Kapau ʼe kotou fia maʼu he tahi ʼu fakamahino, vakaʼi te kāpite 15 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.

[Paki ʼo te pasina 8]

“Kotou nofo tokaga ki te kau polofetā loi ʼaē ʼe ʼomai kiā koutou ʼaki te ʼu kofu fakaovi, kae ʼi loto ko te ʼu lupo fekai.”—Mateo 7:15