Kau Tūpulaga Ke Mālohi Age Takotou Fia Tauhi ʼAē Kiā Sehova
Kau Tūpulaga Ke Mālohi Age Takotou Fia Tauhi ʼAē Kiā Sehova
“Koia, ke ke manatuʼi tou Tupuʼaga Lahi ʼi te ʼu ʼaho ʼo tou temi tūpulaga.”—TNK. 12:1.
1. Koteā te fakaafe ʼaē neʼe toe fai ki te ʼu tamaliki ʼo Iselaele?
KUA hili kiai taʼu e 3 500, ko Moisese, te polofetā ʼa Sehova, neʼe ina fakatotonu fēnei ki te kau pelepitelō pea mo te ʼu tagata ʼāfea ʼo Iselaele: “Fakatahiʼi te hahaʼi, te hahaʼi tagata mo fafine pea mo nātou liliki . . . ke natou fakalogo pea ke natou ako, heʼe tonu ke natou manavasiʼi kiā Sehova tokotou ʼAtua pea mo tōkakaga ʼo maʼuliʼi te ʼu folafola fuli ʼo te lao ʼaenī.” (Teu. 31:12) Kotou tokagaʼi pe ko ai ʼaē neʼe fakatotonu ki ai ke fakatahitahi ki te tauhi: te hahaʼi tagata mo fafine pea mo nātou liliki. ʼEī, māʼia mo te kau tūpulaga neʼe natou kau iā nātou ʼaē neʼe tonu ke fakalogo, mo ako pea mo mulimuli ki te takitaki ʼa Sehova.
2. Neʼe fakahā feafeaʼi e Sehova tana tokaga ki te kau tūpulaga ʼi te kōkelekāsio Fakakilisitiano ʼi te ʼuluaki sēkulō?
2 ʼI te ʼuluaki sēkulō, neʼe toe fakahā aipē e Sehova ia tana tokaga ki te kau tūpulaga ʼaē ʼe pipiki ki te ʼAtua. Ohagē lā, neʼe ina takitaki ia te ʼapositolo ko Paulo ke ina fai he ʼu fakatotonu maʼa te kau tūpulaga tāfito, ʼi ʼihi ʼo tana ʼu tohi ʼaē neʼe momoli ki te ʼu kōkelekāsio. (Lau ia Efesi 6:1; Kolose 3:20.) Ko te kau tūpulaga Kilisitiano ʼaē neʼe natou mulimuli ki te ʼu tokoni ʼaia, neʼe tuputupu ia tanatou leleiʼia ia tanatou Tamai ʼofa ʼaē ʼi selō pea neʼe ina tapuakina nātou.
3. ʼE fakahā feafeaʼi iā ʼaho nei e te kau tūpulaga ia tanatou fia tauhi ʼaē ki te ʼAtua?
3 ʼE fakaafe koa iā ʼaho nei ia te kau tūpulaga ke natou fakatahi moʼo tauhi kiā Sehova? ʼE mahino ia! Koia ʼe fakatupu fiafia maʼa te hahaʼi fuli ʼa te ʼAtua tanatou sisio ki te ʼu kaugana tūpulaga tokolahi ʼa te ʼAtua ʼi te mālamanei, ʼe natou mulimuli ki te tokoni ʼaenī neʼe fai e Paulo: “Tou fetokagaʼaki ke tou uga ia tātou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohagē ko te agamāhani ʼa ʼihi, kae ke tou fefakalotomālohiʼaki, tāfito lā heʼe kua kotou sio ki te fakaovi mai ʼo te ʼaho.” (Hep. 10:24, 25) Tahi ʼaē meʼa, tokolahi te ʼu tūpulaga kua natou kau mo tanatou ʼu mātuʼa ki te fakamafola ʼo te logo lelei ʼo te Puleʼaga ʼo te ʼAtua. (Mat. 24:14) Pea moʼo fakahā ia tonatou ʼofa ʼaē kiā Sehova ʼaki tonatou loto kātoa, ko te ʼu lauʼi afe tūpulaga ʼi te taʼu fuli ʼe natou papitema pea mo natou maʼu ia te ʼu tapuakina ʼi tanatou kua liliu ko he ʼu tisipulo ʼa Kilisito.—Mat. 16:24; Mko. 10:29, 30.
Kotou Tali Ia Te Fakaafe, ʼi Te Temi Nei
4. Ko te temi fea ʼaē ʼe feala ai ke tali e te kau tūpulaga ia te fakaafe ʼa te ʼAtua ke natou tauhi kiā te ia?
4 ʼE ʼui fēnei iā Tagata Tānaki 12:1: “Koia, ke ke manatuʼi tou Tupuʼaga Lahi ʼi te ʼu ʼaho ʼo tou temi tūpulaga.” Kau tūpulaga, ʼe tonu koa ke kotou taʼu fia ke feala ai hakotou tali ia te fakaafe ʼofa ʼaē ke kotou ʼatolasio pea mo tauhi kiā Sehova? ʼE mole fakahā ʼi te Tohi-Tapu ia he taʼu. Koia, ʼaua naʼa kotou holomuli, ʼo kotou manatu kei tonu ke kotou lalahi ake ke feala ai hakotou fakalogo kiā Sehova pea mo tauhi kiā te ia. Tatau aipē peʼe kotou taʼu fia, kae ʼe fakalotomālohiʼi koutou ke ʼaua naʼa kotou fakatuatuai ʼi te tali ki te fakaafe ʼaē ʼe fai atu.
5. ʼE lava tokoniʼi feafeaʼi e te ʼu mātuʼa ia tanatou fānau ke natou tuputupu ʼi te faʼahi fakalaumālie?
5 Tokolahi iā koutou neʼe tokoni atu he tahi ʼi takotou ʼu mātuʼa peʼe ko nāua tokolua ke kotou tuputupu ʼi te faʼahi fakalaumālie. ʼI te faʼahi ʼaia, ʼe kotou hagē ko te tūpulaga ko Timoteo ʼaē ʼe talanoa kiai ʼi te Tohi-Tapu. ʼI tana kei tamasiʼi, neʼe akoʼi age te ʼu tohi taputapu e tana faʼē, ia Enise, pea mo tana kui fafine, ko Loise. (2 Tim. 3:14, 15) ʼE lagi akoʼi fēia mo koutou e takotou ʼu mātuʼa, ʼo natou ako ia te Tohi-Tapu mo koutou, ʼo kotou faikole fakatahi, mo kotou ʼolo mo nātou ki te ʼu fono pea mo te ʼu fakatahi lalahi ʼa te hahaʼi ʼa te ʼAtua, pea mo kotou kau fakatahi ki te minisitelio. ʼE moʼoni, ko te akoʼi atu ia te ʼu ala ʼo te ʼAtua, ʼe ko he maʼua maʼuhiga ʼaupitō neʼe foaki e Sehova totonu ki takotou ʼu mātuʼa. ʼE kotou fakafetaʼi koa ki tonatou ʼofa pea mo tanatou tōkakaga kiā koutou?—Taag. 23:22.
6. (a) Ohagē ko tona ʼui iā Pesalemo 110:3, ko te tauhi fea ʼaē ʼe leleiʼia e Sehova? (b) Koteā ʼaē kā tou vakaʼi anai?
6 Kae ʼi takotou lahilahi ake, ʼu tūpulaga, ʼe loto e Sehova ke kotou “ ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa,” ohagē pē ko tona fai e Timoteo. (Loma 12:2) Kapau ʼe kotou fai ia te faʼahi ʼaia, pea ʼe kotou kau anai ki te ʼu gāue kehekehe ʼo te kōkelekāsio, mole ʼuhi ko te loto ʼaia ʼo takotou ʼu mātuʼa, kae ʼuhi kua kotou fia fai te finegalo ʼo te ʼAtua. Kapau ʼe kotou tauhi kiā Sehova ʼaki he lotolelei, pea ʼe fiafia ai anai. (Pes. 110:3) ʼE kotou lava fakahā feafeaʼi ʼe kotou loto ke mālohi age takotou fia fakalogo kiā Sehova pea mo mulimuli ki tana takitaki? ʼE tou vakaʼi anai ia faʼahi maʼuhiga e tolu ʼe feala ke kotou fai ai ia te faʼahi ʼaia. ʼE tou vakaʼi tāfito anai ia te ako, mo te faikole, pea mo te aga. Tou vakaʼi takitahi ia te ʼu faʼahi ʼaia.
Kotou ʼIloʼi Ia Te ʼUlugaaga ʼo Sehova
7. Koteā te faʼifaʼitaki neʼe tuku e Sesu ʼo ʼuhiga mo te ako ʼo te Tohi-Tapu, pea koteā ʼaē neʼe tokoni kiā ia ke ina fai fēia?
7 Ko te ʼuluaki faʼahi ʼaē ʼe kotou fakahā ai ʼe kotou loto ke mālohi age takotou fia tauhi kiā Sehova, ʼe ko te lau ʼo te Tohi-Tapu ʼi te ʼaho fuli. ʼI takotou lau tuʼumaʼu ia te Folafola ʼa te ʼAtua, ʼe kotou maʼu ai te ʼu meʼa ʼe ʼaoga kiā koutou ʼi te faʼahi fakalaumālie pea mo te ʼatamai mālama maʼuhiga ʼo te Tohi-Tapu. (Mat. 5:3) Neʼe tuku mai e Sesu ia te faʼifaʼitaki. ʼI te tahi lakaga, ʼi tona taʼu 12, neʼe maʼu atu ia ia e tana ʼu mātuʼa ki te fale lotu, “ ʼe heka ʼi te lotolotoiga ʼo te kau tagata faiako ʼo fagono kiā nātou pea mo faifehuʼi kiā nātou.” (Luka 2:44-46) ʼI tana kei tamasiʼi, neʼe kua fia mahino ia Sesu ki te Tohi-Tapu pea mo mālama lelei kiai. Koteā ʼaē neʼe tokoni kiā ia ke ina fai fēia? ʼE mahino ia neʼe maʼuhiga ia te gāue ʼaē neʼe fai e tana faʼē, ia Malia pea mo tana tamai tauhi, ia Sosefo. Neʼe nā kaugana ki te ʼAtua pea mo nā akoʼi kiā Sesu pe ko ai te ʼAtua talu mai tana kei veliveli.—Mat. 1:18-20; Luka 2:41, 51.
8. (a) Ko te temi fea ʼaē ʼe tonu ai ke kamata akoʼi e te ʼu mātuʼa ki tanatou fānau ia te ʼofa ki te Folafola ʼa te ʼAtua? (b) Kotou fakamatala he faʼifaʼitaki ʼe fakamoʼoni ai te ʼaoga ʼaē ke akoʼi ia te fānau talu mai tanatou kei liliki.
8 ʼO toe fēia iā ʼaho nei, ko te ʼu mātuʼa ʼaē ʼe manavasiʼi ki te ʼAtua ʼe natou ʼiloʼi ia te maʼuhiga ʼo te akoʼi ki te loto ʼo tanatou fānau ia te ʼofa ki te ʼu moʼoni ʼo te Tohi-Tapu talu mai tanatou kei liliki. (Teu. 6:6-9) Ko te meʼa ʼaia neʼe fai e te tuagaʼane ko Rubi, ʼi te kua tupu ake ʼo tana ʼuluaki tama, ko Sosefo. ʼI te ʼaho fuli, neʼe ina fai age tana lautohi ʼaki Te Tohi ʼo Te ʼu Hisitolia Faka Tohi-Tapu. ʼI tana lahilahi ake, neʼe tokoni ia Rubi ke maʼu loto e tana tama ia he ʼu vaega ʼo te Tohi-Tapu. Neʼe fua lelei koa kiā Sosefo ia tona faʼahiga akoʼi ʼaia? Logolā neʼe mole heʼeki faʼa poto lelei ʼi te palalau, kae neʼe feala ke ina toe fakamatala ia te ʼu hisitolia Fakatohi-tapu kehekehe. Pea ʼi tona taʼu nima, neʼe ina fai ia tana ʼuluaki akonaki ʼi te Ako Fakateokalatike.
9. He koʼē ʼe maʼuhiga ke kotou lau ia te Tohi-Tapu pea mo metitāsio kiai?
9 Kau tūpulaga, ke lahi age takotou tuputupu ʼi te faʼahi fakalaumālie, ʼe tonu ke liliu ko hakotou agamāhani te lau ʼo te Tohi-Tapu ʼi te ʼaho fuli ʼi tokotou temi tūpulaga pea mokā kotou lalahi ake anai. (Pes. 71:17) He koʼē ʼe tokoni atu anai ia te lau ʼo te Tohi-Tapu ke kotou tuputupu? Kotou tokagaʼi pe koteā ʼaē neʼe ʼui e Sesu ʼi tana faikole fēnei ki tana Tamai: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi.” (Soa. 17:3) Koia, kapau ʼe lahi age takotou ʼiloʼi ia Sehova, pea ʼe liliu anai maʼa koutou ko he Tahi ʼe maʼuli moʼoni pea ʼe toe loloto anai mo tokotou ʼofa kiā te ia. (Hep. 11:27) Koia, ʼi te temi fuli pē ʼaē ʼe kotou lau ai he koga ʼo te Tohi-Tapu, kotou fakaʼaogaʼi ia te faigamālie ʼaia moʼo ako he tahi age meʼa foʼou ʼo ʼuhiga mo Sehova. Kotou fai kiā koutou ia te ʼu fehuʼi ʼaenī: ‘Koteā ʼaē ʼe akoʼi mai ʼi te fakamatala ʼaenī ʼo ʼuhiga mo te ʼulugaaga ʼo Sehova? ʼE fakahā feafeaʼi ʼi te vaega Tohi-Tapu ʼaenī ia te ʼofa ʼa te ʼAtua pea mo tana tokaga mai kiā au?’ Kotou toʼo he temi ke kotou metitāsio ki te ʼu taʼi fehuʼi ʼaia, pea ʼe tokoni atu anai ke kotou ʼiloʼi pe koteā te manatu ʼa Sehova pea koteā ʼaē ʼe ina fakamaʼua atu. (Lau ia Tāʼaga Lea 2:1-5.) Ohagē ko te tūpulaga ko Timoteo, ʼe ‘fakalotoʼi anai koutou ke kotou tui’ ki te ʼu meʼa ʼaē ʼe kotou ako ʼi te Tohi-Tapu, pea ʼe uga anai koutou ke kotou tauhi kiā Sehova ʼaki he loto ʼe lelei.—2 Tim. 3:14.
Ko Te Faikole ʼe Ko He Tokoni Ke Mālohi Age Takotou ʼOfa Kiā Sehova
10, 11. ʼE tokoni feafeaʼi te faikole ke mālohi age takotou fia tauhi ki te ʼAtua?
10 Ko te lua faʼahi ʼaē ʼe feala ai ke mālohi age takotou fia tauhi kiā Sehova ʼaki tokotou loto kātoa, ʼe ko te faikole. Iā Pesalemo 65:2, ʼe tou lau fēnei: “Ê Ia koe ʼaē ʼe fagono ki te faikole, ʼio, ʼo ʼolo atu anai kiā te koe ia te hahaʼi ʼo te kakano fuli pē.” Neʼe feala pē ke fakaovi kiā Sehova ia te kau matāpule ʼaē neʼe ʼomai ki te fale lotu, logolā ʼi te temi ʼaia, neʼe ko Iselaele te hahaʼi ʼaē neʼe fai e Sehova ia te fuakava mo nātou. (1 Hau 8:41, 42) ʼE mole fakapalatahi ia te ʼAtua, pea ko nātou ʼaē ʼe fakalogo ki tana ʼu fakatotonu ʼe natou ʼiloʼi papau, ʼe fagono anai kiā nātou. (Taag. 15:8) ʼE mahino ia, ʼe kotou toe kau foki ʼi “te hahaʼi ʼo te kakano fuli pē,” ia koutou tūpulaga.
11 ʼE kotou ʼiloʼi ko te tafitoʼaga lelei ʼo he fakakaumeʼa moʼoni ʼe ko he felōgoi lelei. Koia, ʼe lagi kotou leleiʼia te fakahā ki hokotou kaumeʼa lelei takotou ʼu manatu, mo te ʼu meʼa ʼaē ʼe kotou tuʼania ai, pea mo te ʼu meʼa ʼaē ʼi tokotou loto. ʼO toe fēia aipē, kā kotou faikole fakamālotoloto, pea ʼe kotou fai palalau ai mo takotou Tupuʼaga Lahi. (Filp. 4:6, 7) Kotou palalau kiā Sehova ohagē ko hakotou ʼavahi tokotou loto ki he tamai ʼofa peʼe ki he kaumeʼa lelei. ʼI tona fakahagatonu, ʼe ʼi ai te pikipikiga maʼuhiga ʼo te loloto ʼo takotou ʼu faikole pea mo te mālohi ʼo takotou ʼofa kiā Sehova. ʼE kotou tokagaʼi anai, ʼi te mālohi age ʼo takotou fakakaumeʼa mo Sehova, ʼe toe loloto anai takotou ʼu faikole kiā Ia.
12. (a) He koʼē ʼe mole tonu pē ke lahi takotou ʼu palalau ke hā ai te loloto ʼo takotou faikole? (b) Koteā ʼaē ʼe tokoni atu anai kiā koutou ke kotou mahino ai ko Sehova ʼe ovi atu kiā koutou?
12 Kae kotou manatuʼi, ʼe mole tonu pē ke lahi takotou ʼu palalau ke hā lelei ai te loloto ʼo takotou faikole. ʼE maʼua ke kotou fakahā te ʼu meʼa ʼaē ʼe kotou logoʼi ʼi tokotou loto. ʼI takotou ʼu faikole, kotou fakahā tokotou ʼofa lahi, mo takotou fakaʼapaʼapa lahi, pea mo takotou falala kātoa kiā Sehova. ʼI te temi ʼaē ʼe kotou ʼiloʼi ai kua tali e Sehova ki takotou ʼu faikole, pea hoki mahino ai anai kiā koutou “ ʼe ovi ia Sehova kiā nātou fuli ʼaē ʼe fetapa kiā te ia.” (Pes. 145:18) ʼEī, ʼe fakaovi anai Sehova kiā koutou, ʼo ina foaki atu ia te mālohi ke kotou fakafeagai ki te Tēvolo pea mo kotou fai he ʼu tonu ʼe lelei ʼi tokotou maʼuli.—Lau ia Sake 4:7, 8.
13. (a) Neʼe tokoni feafeaʼi ki he tuagaʼane tana fakakaumeʼa ʼaē mo te ʼAtua? (b) Ko takotou fakakaumeʼa mo te ʼAtua ʼe tokoni feafeaʼi atu ke kotou tauʼi ia te ʼu fakaneke ʼo takotou ʼu kaugā ako?
13 Kotou tokagaʼi pe neʼe maʼu feafeaʼi e Cherie te mālohi ʼaki tana ʼu felōgoi lelei mo Sehova. ʼI tana aʼu ki te ʼu faleako lalahi, neʼe ina maʼu ia te ʼu fakapale he neʼe poto ʼi te ako pea mo mālohi ʼi te faigaoʼi. ʼI te ʼosi ʼo tana ako, neʼe fia foaki age e te puleʼaga hana paʼaga ke feala ke hoko atu tana ako. ʼE ʼui fēnei e Cherie: “Neʼe au fia ʼio kiai pea ko te kau faiako faigaoʼi pea mo te ʼu kaugā ako neʼe natou fakaneke au ke au tali.” Kae neʼe mahino kiā ia, kapau neʼe hoko atu tana ako pea ʼe maʼua anai ke lahi age tona temi ki te ako pea mo te faigaoʼi, kae veliveli age anai tona temi moʼo tauhi kiā Sehova. Koteā ʼaē neʼe fai e Cherie? ʼE ina ʼui fēnei: “ ʼI taku ʼosi faikole kiā Sehova, neʼe au fakafisi ia te paʼaga ʼo te puleʼaga pea neʼe au kamata fai ia taku selevisi pioniē kātoa.” Kua taʼu nima nei ia tana gāue pioniē. ʼE ina ʼui fēnei: “ ʼE mole au fakahemala. ʼE au fiafia ʼi taku ʼiloʼi ʼaē neʼe au fai ia te tonu ʼaē ʼe fakafiafia ai Sehova. ʼE moʼoni, kapau ʼe kotou fakamuʼamuʼa ia te Puleʼaga ʼo te ʼAtua, pea ko te tahi age ʼu meʼa fuli ʼe hilifaki atu anai kiā koutou.”—Mat. 6:33.
Ko Te Aga ʼAē ʼe Lelei ʼe Ina Fakahā ʼe ‘Maʼa Tokotou Loto’
14. He koʼē ʼe maʼuhiga ke lelei takotou aga iā mata ʼo Sehova?
14 Ko te tolu faʼahi ʼaē ʼe feala ai ke kotou fakahā ʼe kotou tauhi kiā Sehova ʼaki he loto ʼe lelei ʼe ko takotou aga. ʼE tapuakina e Sehova ia te ʼu tūpulaga ʼaē ʼe nonofo maʼa ʼi tanatou ʼu aga. (Lau ia Pesalemo 24:3-5.) Ko te tūpulaga ko Samuele neʼe fakafisi ke ina faʼifaʼitakiʼi ia te aga heʼeʼaoga ʼo te ʼu foha ʼo te Pelepitelō Lahi ko Elia. Neʼe tokagaʼi ia te aga ʼaē ʼe lelei ʼa Samuele. ʼE ʼui fēnei ʼi te Tohi-Tapu: “Lolotoga te temi ʼaia, ko te kiʼi tama ko Samuele neʼe lahilahi ake pea mo liliu ʼo ʼofainaʼi ʼaupitō, iā mata ʼo Sehova pea mo iā mata ʼo te tagata.”—1 Sam. 2:26.
15. Koteā he ʼu tupuʼaga ke kotou taupau he aga ʼe lelei?
15 ʼE tou māʼuʼuli ʼi he mālama ʼe fonu ai te hahaʼi ʼe natou ʼoʼofa pē kiā nātou, fiatuʼu, talagataʼa ki te ʼu mātuʼa, maʼuli galo, heʼe agatonu, fekai, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua, ʼe ko ʼihi agaaga ʼaia ʼo te hahaʼi ʼaē neʼe talanoa kiai e Paulo. (2 Tim. 3:1-5) Koia ʼe lagi faigataʼa ʼaupitō kiā koutou hakotou taupau he aga ʼe lelei, kae kotou nonofo ʼi te lotolotoiga ʼo te hahaʼi agakovi ʼo te mālama ʼaenī. Kae ʼi te temi fuli pē ʼaē ʼe kotou fai ai te meʼa ʼaē ʼe totonu pea mo kotou fakafisi ke kotou fai he aga ʼe kovi, ʼe kotou fakamoʼoni ai ʼe kotou lagolago kiā Sehova ʼi te fakafifihi neʼe fai ki tona ʼuhiga pule faʼitaliha ʼo te ʼatulaulau. (Sopo 2:3, 4) ʼE kotou toe fiafia heʼe kotou ʼiloʼi ʼe kotou tali ki te kole mamahi atu fēnei ʼa Sehova: “Ke ke fakapotopoto ê toku foha, pea mo ke fakafiafia toku loto, ke feala haku tali kiā ia ʼaē ʼe fakalaga fihi mai kiā te au.” (Taag. 27:11) Pea tahi ʼaē meʼa, ʼi takotou ʼiloʼi ʼaē ʼe ʼofa Sehova kiā koutou, pea ʼe toe mālohi anai ʼi tokotou loto ia takotou fia tauhi ʼaē kiā te ia.
16. Koteā ʼaē neʼe fai e te tuagaʼane moʼo fakafiafia ia te loto ʼo Sehova?
16 Ko te tuagaʼane ʼe higoa ko Carol, neʼe pipiki ki te ʼu pelesepeto ʼo te Tohi-Tapu ʼi te faleako ʼi te temi ʼaē neʼe kei finemui ai, pea neʼe tokagaʼi ia tana aga ʼaē ʼe lelei. Koteā ʼaē neʼe hoko? Neʼe manukiʼi ia Carol e tona ʼu kaugā ako he neʼe mole fia kau ki te ʼu ʼaho lalahi pea mo te ʼu toʼotoʼoga fakapolitike, he neʼe mulimuli ia ki tona leʼo ʼo loto neʼe akoʼi e te Tohi-Tapu. ʼI te ʼu lakaga ʼaia, neʼe ina maʼu ʼi ʼihi temi ia te faigamālie ke ina fakamahino ki ʼihi te ʼu akonaki ʼaē neʼe tui kiai. Hili kiai ni ʼu taʼu, neʼe maʼu e Carol ia te tohi neʼe fai e te taʼahine neʼe nā kalasi tahi, pea neʼe tohi fēnei: “Neʼe au fakaʼamu tuʼumaʼu pē ke tā toe felāveʼi pea ke au fakamālo atu. Neʼe au tokagaʼi ia tau aga ʼaē neʼe lelei pea mo tau faʼifaʼitaki ʼi tou ʼuhiga Kilisitiano tūpulaga, pea mo tau nofo agatonu ʼaki he lototoʼa ʼo ʼuhiga mo te ʼu ʼaho lalahi. Neʼe ko koe ia te ʼuluaki Fakamoʼoni ʼa Sehova ʼaē neʼe au felāveʼi mo ia.” Ko te faʼifaʼitaki ʼo Carol neʼe malave lahi ki tana kaugā ako, ʼo tupu ai tana kamata ako ia te Tohi-Tapu ki muli age. ʼI tana faitohi kiā Carol, neʼe ina fakahā ai ko ia ko he Fakamoʼoni kua papitema talu mai taʼu e 40! Ohagē ko Carol, ko koutou kau tūpulaga iā ʼaho nei ʼaē ʼe kotou nonofo agatonu ʼaki he lototoʼa ki te ʼu pelesepeto ʼo te Tohi-Tapu, ʼe feala ke kotou uga he ʼu hahaʼi ʼe fakamālotoloto ke natou ʼiloʼi ia Sehova.
Ko Te Kau Tūpulaga ʼe Natou Vikiʼi Ia Sehova
17, 18. (a) Koteā takotou manatu ʼo ʼuhiga mo te kau tūpulaga ʼo takotou kōkelekāsio? (b) Koteā te kā haʼu ʼaē kā maʼu e te kau tūpulaga ʼaē ʼe manavasiʼi ki te ʼAtua?
17 Ko tātou fuli ʼi te kautahi fakamālamanei ʼa Sehova, ʼe tou fiafia ʼi te sio ki te ʼu lauʼi afe tūpulaga faʼafai ʼe natou kau ki te tauhi moʼoni! Ko te kau tūpulaga ʼaia ʼe natou fai ke mālohi age tanatou fia tauhi kiā Sehova ʼo natou lau ia te Tohi-Tapuʼi te ʼaho fuli, mo natou faikole, pea mo natou fakaʼalutahi tanatou aga pea mo te finegalo ʼo te ʼAtua. Ko te kau tūpulaga ʼaia ʼaē ʼe natou tuku he faʼifaʼitaki lelei, ʼe natou fakatupu fiafia ki tanatou ʼu mātuʼa pea mo te hahaʼi fuli ʼa Sehova.—Taag. 23:24, 25.
18 ʼI te temi kā haʼu, ko te kau tūpulaga agatonu ʼe natou kau anai iā nātou ʼaē kā hao ʼo maʼuli anai ʼi te mālama foʼou ʼaē ʼe fakapapau mai e te ʼAtua. (Fakh. 7:9, 14) ʼI te mālama ʼaia, ʼe natou maʼu anai te ʼu tapuakina taulekaleka ʼi tanatou haga fakaloloto tanatou fakafetaʼi kiā Sehova, pea ʼe feala anai hanatou fakavikiviki kiā te ia ʼo heʼegata.—Pes. 148:12, 13.
ʼE Feala Koa Hakotou Fakamahino?
• ʼE lava kau feafeaʼi ia te kau tūpulaga ʼi te tauhi moʼoni iā ʼaho nei?
• Ke fua lelei kiā koutou ia te lau ʼo te Tohi-Tapu, he koʼē ʼe maʼuhiga ia te metitāsio?
• ʼE tokoni feafeaʼi kiā koutou ia te faikole ke kotou fakaovi kiā Sehova?
• Koteā ʼaē ʼe feala ke hoko mokā ʼe lelei te aga ʼa he Kilisitiano?
[ʼU fehuʼi ʼo te ako]
[Paki ʼo te pasina 15]
Ko te lau ʼo te Tohi-Tapu ʼi te ʼaho fuli, ko he meʼa kua kotou fai māhani koa?