ʼE Fia ʼIloʼi e Te Kau Lautohi . . .

Ko Sesu Koa Ia Te ʼAlekaselo ʼAē Ko Mikaele?

▪ ʼE feala ke tou tali fakanounou, ʼeī ko Sesu ia te ʼalekaselo ko Mikaele. ʼE lahi te ʼu agaʼi fenua, pea ko he agamāhani hanatou fakatoʼo ki he tahi ia he ʼu higoa. ʼE tatau ia te ʼaluʼaga ʼaia pea mo te ʼu higoa ʼe tou maʼu ʼi te Tohi-Tapu. Ohagē lā, ko te pāteliaka ko Sakopo neʼe toe fakahigoaʼi foki ko Iselaele. (Senesi 35:10) Ko te ʼapositolo ko Petelo neʼe fakatoʼo ki ai te ʼu higoa e nima—ko Simeone, Simone, Petelo, Sefasi, pea mo te higoa ʼaē ko Simone Petelo. (Mateo 10:2; 16:16; Soane 1:42; Gāue 15:7, 14) ʼE feafeaʼi hatatou ʼiloʼi papau ko Mikaele ʼe ko he tahi pē ʼaia higoa neʼe fakatoʼo kiā Sesu? Tou vakaʼi age muʼa ia te fakamoʼoni Fakatohi-tapu ʼaenī:

ʼI te Tohi-Tapu, ʼe tuʼa nima ia te talanoa ʼaē ʼo ʼuhiga mo te laumālie mālohi ʼaia ko Mikaele. Ko ʼaluʼaga e tolu ʼi te tohi ʼa Taniela, ʼe tou maʼu ai ia te higoa ʼaia. Iā Taniela 10:13, 21 ʼe tou lau ai ko te ʼāselo neʼe fekauʼi mai neʼe lagolago ki ai ia Mikaele, pea ʼe fakahigoaʼi ‘ko te tama ʼaliki lahi ʼi te ʼu tama ʼaliki’ peʼe ko ‘te tama ʼaliki.’ Iā Taniela 12:1, ʼe tou ako ai ʼi te ʼaho fakaʼosi “ ʼe tuʼu ake anai ia Mikaele, te tama ʼaliki lahi ʼaē ʼe tuʼu ai moʼo haofaki te ʼu foha ʼo te hahaʼi.”

Pea iā Fakahā 12:7, ʼe talanoa ai “ko Mikaele mo tana kau ʼāselo” ʼe natou kau ki te tau maʼuhiga, ʼo iku ai ki te kapu ifo ʼo Satana te Tēvolo pea mo tana kau ʼāselo agakovi mai te lagi.

ʼE kotou fakatokagaʼi ʼi te ʼu koga tohi ʼaenī neʼe tou vakaʼi, ʼe talanoa ʼo ʼuhiga mo Mikaele, ko he ʼāselo ʼe tau maʼa te hahaʼi ʼa te ʼAtua pea ʼe ina puipui te hahaʼi ʼa te ʼAtua, logolā peʼe tonu ke ina tauʼi te fili lahi ʼo Sehova, ʼaē ko Satana.

ʼI te vaega 9 ʼo te tohi ʼo Suta ʼe fakahigoaʼi ai ia Mikaele ko “te ʼalekaselo.” ʼI te Tohi-Tapu ko te kupu “ ʼalekaselo” ʼe mole fakatoʼo ki he tokolahi. Ko te vaega pē ʼaē ʼo 1 Tesalonika 4:16 ʼe fakaʼaogaʼi ai te kupu ʼalekaselo, ʼaē ʼe talanoa ai Paulo ʼo ʼuhiga mo Sesu kua fakatuʼuake, ʼo ina ʼui fēnei: “Ko te ʼAliki [ko Sesu] totonu, ʼaki he pāui fakapule, ʼaki he leʼo fakaʼalekaselo pea mo te puhi fakatagi ʼa te ʼAtua, ʼe hifo anai mai te lagi.” ʼE fakahā mai ʼi te vaega ʼaenī, ko Sesu Kilisito totonu ko te ʼalekaselo, peʼe ko te ʼāselo pule.

ʼAki te ʼu faʼahi ʼaē neʼe kua tou vakaʼi, koteā te tali ʼe feala ke tou fai ki te fehuʼi ʼaē neʼe tou lagaʼi ʼi te kamataʼaga? Ko Sesu Kilisito ʼe ko Mikaele te ʼalekaselo. Ko Mikaele (ko tona fakaʼuhiga: “Ko Ai ʼAē ʼe Tatau Mo Te ʼAtua”) pea ko Sesu (ko tona fakaʼuhiga: “Ko Sehova ʼe Ina Haofaki”), pea ko te ʼu higoa ʼaia e lua ʼe fakaʼuhiga tāfito ki tana gāue ʼaē kā ina fai moʼo fakalakatonuʼi te pule faʼitaliha ʼa te ʼAtua. Iā Filipe 2:9 ʼe ʼui fēnei: “[Neʼe] hikihiki [ia ia] e te ʼAtua [ko Sesu ʼaē kua fakakolōliaʼi] ki he tuʼulaga māʼoluga pea mo ina tali fakalelei ke ina foaki age kiā te ia te higoa ʼaē ʼe māʼoluga age ʼi te ʼu higoa fuli pē.”

ʼE kotou fakatokagaʼi ʼi te tupu tagata ʼa Sesu ʼi te kele neʼe mole ko te kamataʼaga ʼaia ʼo tona maʼuli. I muʼa ʼo te tupu tagata ʼa Sesu ʼi te kele, neʼe ʼaʼahi Malia e te ʼāselo, ʼo ina tala age ki ai ʼe ina fuafatuʼi anai he kiʼi tamasiʼi ʼaki te laumālie māʼoniʼoni pea ʼe ina fakahigoaʼi anai te kiʼi tamasiʼi ʼaia ko Sesu. (Luka 1:31) Lolotoga tana minisitelio, neʼe palalau tuʼumaʼu ia Sesu ki tona maʼuli ʼaē ʼi selō.—Soane 3:13; 8:23, 58.

Koia ko Mikaele te ʼalekaselo ʼe ko Sesu ʼi tona maʼuli ʼaē ʼi selō ʼi muʼa ʼo tana haʼu ʼo tupu tagata ʼi te kele. ʼI tona ʼosi fakatuʼuake pea kua toe liliu ia ki te lagi, kua toe hoko atu pē e Sesu tana gāue ʼaki tona higoa ʼaē ko Mikaele, te pule ʼo te kau ʼāselo, “ki te kolōlia ʼo te ʼAtua te Tamai.”—Filipe 2:1.