ʼE Fia ʼIloʼi e Te Kau Lautohi . . .

ʼE Tonu Koa Ke Kotou Tui Ki Te Tahitolu Ke Fakahigoa Ai Koutou Ko He Kilisitiano?

▪ Ko te tohi (World Religions in Denmark) ʼa te ʼu faleako lalahi ʼaē neʼe tā ʼi te taʼu 2007, neʼe ʼui ai ko te kau Fakamoʼoni ʼa Sehova ʼe ko he ʼu Kilisitiano ʼe tokosiʼi ʼe natou mulimuli fakalelei ki te Tohi-Tapu. ʼI tona fakahagatonu, ko te kau Fakamoʼoni ʼa Sehova ʼe ko te Lotu Fakakilisitiano ʼe tuʼulaga tolu ʼi Tanemaka.

Kae ko te ʼēpikopō ʼo te ’Ēkelesia Fakafenua ʼo Tanemaka, neʼe palalau kovi ki te talanoa ʼa te fafine ʼaē neʼe ina fai ia te tohi ʼaia, ʼo ʼuhiga mo te kau Fakamoʼoni ʼa Sehova. Koteā tona tupuʼaga? Neʼe ʼui fēnei e te ʼēpikopō: “Neʼe mole heʼeki au felāveʼi mo he tagata teolosia ʼe ina ʼui ko [te kau Fakamoʼoni ʼa Sehova] ʼe ko he kau Kilisitiano. ʼE mole tui ia te kau Fakamoʼoni ki te Tahitolu, ʼaē ko te akonaki tāfito ʼaia ʼo te lotu Fakakilisitiano.”

Ko Annika Hvithamar ʼaē neʼe ina fai ia te tohi, te fafine ʼe ina ako ia te ʼu lotu, neʼe ina fakahā mokā fakafehuʼi ia te hahaʼi pe koʼē ʼi tanatou manatu ʼe ko nātou ko he kau Kilisitiano, ʼe tahitahiga tanatou tali ʼe natou Kilisitiano heʼe natou tui ko te ʼAtua ʼe ko he Tahitolu. Tahi ʼaē, ʼi te tohi ʼaē neʼe fai e te fafine, ʼe ʼi ai te kupu tāfito ʼaenī: “Ko Koe Koa Ko He Kilisitiano?” pea ʼe ʼui fēnei ai: “Ko te akonaki ʼo te Tahitolu ʼe kau ʼi te ʼu fihifihia faigataʼa ʼaupitō ʼo te teolosia Fakakilisitiano.” ʼE toe ʼui fēnei: “ ʼI te temi fuli pē, neʼe faigataʼa ia te fakamahino ki te kau Kilisitiano ʼaē neʼe mole fai hanatou ako fakateolosia, pe koʼē ko te ʼAtua ʼo te kau Kilisitiano ʼe ko he ʼatua pē e tahi kae mole ko he ʼu ʼatua e tolu.”

Ko te ʼu manatu ʼaē ʼe akoʼi mai ʼi te Tohi-Tapu ʼo ʼuhiga mo te ʼAtua pea mo Sesu ʼe faigafua. ʼE mole faigataʼa te mahino kiai. ʼE mole maʼu ʼi te Folafola ʼa te ʼAtua ia te kupu “Tahitolu” peʼe ko te akonaki ʼaia. ʼE ʼui fakalelei ʼi te Tohi-Tapu ko Sesu Kilisito ʼe ko te ʼAlo ʼulutokotahi ʼo te ʼAtua. (Kolose 1:15) ʼE toe talanoa kiā Sesu ohagē ko te “tagata fakafelōgoi ʼi te ʼAtua pea mo te tagata.” (1 Timoteo 2:5) ʼO ʼuhiga mo te Tamai, ʼe ʼui fēnei ʼi te Tohi-Tapu: “Ko koe, ʼaē ko tou huafa ko Sehova, ko koe tokotahi pē, te Māʼoluga ʼAupitō ʼi te kele kātoa.”—Pesalemo 83:18.

ʼE tui e te kau Fakamoʼoni ʼa Sehova ʼe maʼuhiga ia te tui ʼaē kiā Sesu. (Soane 3:16) Koia lā ʼaē ʼe natou mulimuli fakalelei ai ki te fakatotonu ʼaenī ʼa Sesu: “[ʼE] tohi fēnei: ‘Ko Sehova, tou ʼAtua, ʼaē ʼe maʼua ke ke ʼatolasio ki ai, pea ʼe ko ia tokotahi pē ʼaē ʼe maʼua ke ke tauhi ki ai ʼaki he tauhi tapu.’ ” (Mateo 4:10) ʼE mahino papau ia, ko he tahi ʼe faiga ke mulimuli ki te ʼu fakatotonu ʼa Sesu ʼe feala ke fakahigoaʼi ko he Kilisitiano.

[Fakamatala ʼo te pasina 18]

“Ko te akonaki ʼo te Tahitolu ʼe kau ʼi te ʼu fihifihia faigataʼa ʼaupitō ʼo te teolosia Fakakilisitiano”