Ko He ʼu Palalau Lelei ʼe Lagolago Ki He ʼu Felōgoi Lelei

“Kotou fai ke lelei tuʼumaʼu takotou ʼu palalau.”—KOL. 4:6.

1, 2. Koteā te fua lelei neʼe hoko he neʼe palalau lelei ia te tehina?

 ʼE FAKAMATALA fēnei e te tehina: “ ʼI taku lolotoga fai fakamafola ʼi te ʼu ʼapi, neʼe au felāveʼi mo te tagata, pea ʼi te lahi ʼaupitō ʼo tona ʼita, neʼe tetetete tona ʼu laugutu pea mo tona sino kātoa. ʼAki he aga fakatokatoka, neʼe au faiga ke au fakakaukauʼi mo ia he ʼu vaega Tohi-Tapu, kae neʼe toe ʼāsili age tona ʼita. Neʼe toe manukiʼi au e tona ʼohoana pea mo tana fānau, pea neʼe mahino ai kiā au neʼe tonu ke au mavae. Neʼe au fakahā lelei age ki te fāmili neʼe au haʼu ʼi te tokalelei pea ʼe au fia mavae pē ʼi te tokalelei. Neʼe au fakahā age kiā nātou ia Kalate 5:22 pea mo te vaega 23, ʼaē ʼe talanoa ai ki te ʼofa, mo te agamalū, mo te loto lolomi, pea mo te tokalelei. Pea neʼe au mavae ai leva.

² “Ki muli age, ʼi taku lolotoga fai te ʼu ʼapi ʼo te ala ʼaia, neʼe au sio ki te fāmili ʼaia ʼe natou heheka ʼi te ʼu tuʼuga ʼi tonatou muʼa fale. Neʼe natou pāui mai. Neʼe au fakakaukauʼi fēnei: ‘Koteā nei kā natou fai mai?’ Neʼe tuʼu te tagata mo te meʼa ʼinu pea neʼe ina fakaafe mai au ke au ʼinu hoku moʼi vai momoko. Neʼe faifakalelei mai ʼo ʼuhiga mo tana palalau kovi pea mo fakamālo mai ki taku tui mālohi. Neʼe matou māvete lelei.”

 3. He koʼē ʼe mole tonu ke tou ʼiʼita ʼuhi ko te aga ʼa ʼihi?

³ Iā ʼaho nei, ʼi he mālama ʼe lahi ai te ʼu faigataʼaʼia, ʼe kua tou māhani ʼi te felāveʼi mo te hahaʼi ʼe ʼiʼita, māʼia ʼi tatatou minisitelio. Kā hoko te faʼahi ʼaia, ʼe maʼuhiga ke tou maʼu ia “he agamalū pea mo he fakaʼapaʼapa lahi.” (1 Pet. 3:15) Kanapau lā ko te tehina ʼaē neʼe tou talanoa ki ai, neʼe ʼita ʼi tona munaʼi ʼaē e te tagata pea mo tana palalau kovi age, ʼe mahino ia neʼe mole malū ifo age anai te aga ʼa te tagata, ohagē ko te meʼa ʼaē neʼe hoko; neʼe lagi ʼāsili age anai ia tona ʼita. Mai tona ʼaluʼaga ʼaē neʼe lolomi e te tehina ia tona ʼita pea mo ina fai he ʼu palalau lelei, neʼe fua lelei ai.

Koteā ʼAē Kā Tokoni Mai Ke Tou Fai He ʼu Palalau ʼe Lelei?

 4. He koʼē ʼe maʼuhiga ke tou fai he ʼu palalau ʼe lelei?

⁴ Peʼe tou felōgoi mo nātou ʼaē ʼi tuʼa peʼe ʼi te loto kōkelekāsio, tatau aipē mo totatou fāmili, ʼe maʼuhiga ke tou mulimuli ki te tokoni ʼaenī ʼa te ʼapositolo ko Paulo: “Kotou fai ke lelei tuʼumaʼu takotou ʼu palalau pea ke konakonaʼi ʼaki te māsima.” (Kol. 4:6) Ko he ʼu palalau lelei ʼe maʼuhiga ke maʼu ai he felōgoi lelei pea mo he tokalelei.

 5. Koteā te fakaʼuhiga ʼo he felōgoi ʼe lelei? Kotou tuku mai he faʼifaʼitaki.

⁵ Ko he felōgoi lelei ʼe mole fakaʼuhiga ke kotou fakahā ʼi te moʼi temi pē ʼaia takotou ʼu manatu pea mo te ʼu meʼa ʼaē ʼi tokotou loto, tāfito mokā kotou ʼiʼita. ʼE fakahā ʼi te Tohi-Tapu, ko he tahi ʼe mole matatāʼofi tana ʼu palalau ʼita ʼe ko he tahi ʼe vaivai, kae mole mālohi. (Lau ia Tāʼaga Lea 25:28; 29:11.) ʼI te tahi lakaga, ko Moisese, ʼaē neʼe “agavaivai lahi age” ʼi te ʼu tagata fuli ʼaē neʼe māʼuʼuli ʼi te temi ʼaia, neʼe mole kei ina lava tātāʼofi tona ʼita pea neʼe mole ina fakakolōliaʼi ia te ʼAtua ʼuhi ko te agatuʼu ʼo te puleʼaga ʼo Iselaele. Neʼe fakahā lelei e Moisese te ʼu meʼa ʼaē neʼe ʼi tona loto, kae neʼe mole leleiʼia e Sehova. Hili taʼu e 40 ʼo tana takitaki ia te kau Iselaele, neʼe mole maʼu e Moisese te pilivilēsio ʼaē ke ina fakahū nātou ki te Kele ʼo Te Fakapapau.—Fkau. 12:3; 20:10, 12; Pes. 106:32.

 6. Koteā te fakaʼuhiga ʼo tatatou fakasiosio poto mokā tou palalau?

⁶ ʼE vikiʼi ʼi te Tohi-Tapu tatatou lava tātāʼofi hotatou ʼita pea mo maʼu he fakasiosio poto mokā tou palalau. “ ʼI te mahu ʼo te ʼu palalau ʼe mole  masiva ai te agahala, kae ko ʼaē ʼe ina tāʼofi tona ʼu laugutu ʼe poto ia.” (Taag. 10:19; 17:27) Kae ko te fakasiosio poto ʼe mole fakaʼuhiga leva ke tou nonofo fakalogologo. ʼE fakaʼuhiga ke tou palalau “lelei,” ʼo tou fakaʼaogaʼi totatou ʼalelo moʼo fakamālōlō kae mole tou fakaʼaogaʼi ke lavea ai he tahi.—Lau ia Tāʼaga Lea 12:18; 18:21.

“Te Temi Moʼo Fakalogologo Pea Mo Te Temi Moʼo Palalau”

 7. Koteā te ʼu meʼa ʼaē ʼe mole tonu ke tou fakahā ʼi tatatou ʼu palalau, pea koteā tona tupuʼaga?

⁷ Ohagē pē ko te maʼua ʼaē ke tou palalau lelei pea mo loto lolomi mokā tou palalau ki he ʼu kaugā gāue peʼe ki te ʼu hahaʼi ʼi te minisitelio, ʼe toe maʼua ke tou fai fēia ʼi te kōkelekāsio pea ʼi te loto fale. Kapau ʼe tou fai pē tātou he ʼu palalau ke puli ai totatou ʼita, peʼe tou fai he ʼu meʼa ʼaki te ʼita, ʼo mole tou tokagaʼi ia tona ʼu fua kovi, ʼe feala ke fakatupu tuʼutāmaki ai kiā tātou ʼi te faʼahi fakalaumālie, ʼi totatou loto pea mo tou mahaki ai, ʼo fēia ai mo ʼihi atu. (Taag. 18:6, 7) ʼE tonu ke tou lolomi te ʼu meʼa kovi ʼaē ʼe tou logoʼi, ʼaē ʼe tupu ʼuhi ko totatou ʼuhiga agahala. Ko he ʼu palalau kovi, mo fakalainoa, mo heʼe fakaʼapaʼapa, pea mo te ʼita ʼe ko he ʼu meʼa ʼe kovi. (Kol. 3:8; Sake 1:20) ʼE feala ke fetokakoviʼaki ai te ʼu hahaʼi pea mo tou tokakovi ai mo Sehova. Neʼe akoʼi fēnei e Sesu: “Ko ʼaē ʼe nofo mo hona ʼita ki tona tehina, ʼe ʼave anai ia ki te fakamāu; pea ko ʼaē ʼe ina ʼui age ki tona tehina he kupuʼi palalau kovi moʼo manuki, ʼe ʼave anai ia ki te Fakamāu Lahi; kae ko ʼaē ʼe ina ʼui fēnei: ‘Faha!’ ʼe ʼaoga anai ia ki te Seʼeni ʼo te afi.”—Mat. 5:22.

 8. Ko te temi fea ʼaē ʼe tonu ke tou palalau ai ki te ʼu meʼa ʼaē ʼe tou logoʼi, kae ʼe tonu ke feafeaʼi tatatou palalau kiai?

⁸ Kae ʼe ʼi ai te ʼu faʼahi ʼe lagi tou manatu ʼe lelei age ke tou palalau kiai. Kapau ko he tehina neʼe ina ʼui atu he meʼa pe neʼe ina fai he meʼa neʼe kotou lotomamahi lahi ai, ʼo mole feala hakotou loto fakamolemole ki ai, ʼaua naʼa kotou tuku ke tuputupu ʼi tokotou loto ia he loto fehiʼa. (Taag. 19:11) Kapau ʼe kotou ʼita ki he tahi, kotou lolomi te ʼu meʼa ʼaē ʼi tokotou loto pea kotou fai te ʼu fakatuʼutuʼu ʼaē ʼe ʼaoga moʼo fakatokatoka te ʼaluʼaga ʼaia. Neʼe tohi fēnei e Paulo: “Ke ʼaua naʼa tō te laʼā ki tokotou ʼita.” Mai tona ʼaluʼaga ʼaē ʼe kotou lotohoha ʼuhi ko te fihifihia ʼaia, koia kotou filifili te temi ʼaē ʼe lelei ai ke kotou palalau ki te ʼu faʼahi  ʼaia ʼaki he agalelei. (Lau ia Efesi 4:26, 27, 31, 32.) Kotou palalau ki tokotou tehina ʼo ʼuhiga mo te faʼahi ʼaia, ʼo fai fakahagatonu kae ʼaki he ʼu palalau lelei, ʼaki te fakatuʼutuʼu ʼaē ke kolua fakatokatoka.—Lev. 19:17; Mat. 18:15.

 9. He koʼē ʼe tonu ke tou tātāʼofi te ʼu meʼa ʼaē ʼi totatou loto ʼi muʼa ʼo hatatou palalau ki ʼihi?

⁹ ʼE mahino ia, ʼe tonu ke kotou tōkakaga ʼo filifili ia te temi ʼaē ʼe lelei. ʼE ʼi ai “te temi moʼo fakalogologo pea mo te temi moʼo palalau.” (Tnk. 3:1, 7) Tahi ʼaē meʼa, “ko te loto ʼo ia ʼaē ʼe faitotonu ʼe metitāsio ʼi muʼa ʼo tana tali.” (Taag. 15:28) ʼE lagi tonu anai ke kotou fakatalitali ke kotou palalau ki te ʼu fihifihia. Ko te palalau ki te ʼu fihifihia mokā kei ʼita lahi he tahi ʼe feala ke kovi age ia; kae ʼe mole lelei foki ke tou fakatalitali fualoa fau leva.

Ko He ʼu Gāue Lelei ʼe Lagolago Ki He ʼu Felōgoi Lelei

10. Ko te fai ʼo he ʼu gāue ʼe lelei ʼe hikihiki feafeaʼi ai te lelei ʼo te ʼu felōgoi?

¹⁰ Ko he ʼu palalau lelei pea mo he fai palalau ʼe lelei, ʼe ʼaoga moʼo fakahoko pea mo taupau he ʼu felōgoi tokalelei. ʼI tona fakahagatonu, ko tatatou faiga lahi ʼaē ke hikihiki ke lelei tatatou ʼu felōgoi mo ʼihi ʼe feala ke hikihiki ai mo te lelei ʼo tatatou ʼu fai palalau ʼaē mo nātou. ʼE feala ke faigafua he fai palalau faʼitaliha mokā ʼe tou fai fakamālotoloto maʼa ʼihi ia he ʼu gāue ʼe lelei, ohagē ko hatatou tokoni kiā nātou, mo foaki age he meʼa ʼofa, mo fakahā kiā nātou te tali kāiga. ʼE feala pē foki ke “hili he ʼu mamala kakaha” ki he tahi pea mo ina fakahā ai he ʼu kalitātē, ʼo faigafua ai te palalau ki he ʼu fihifihia pea mo fakatokatoka.—Loma 12:20, 21.

11. Koteā ʼaē neʼe fai e Sakopo ke toe felōgoi lelei ai mo Esau, pea neʼe koteā tona fua?

¹¹ Neʼe mahino ki te pāteliaka ko Sakopo ia te faʼahi ʼaia. Ko tona māhaga, ia Esau, ʼi te lahi fau ʼaē ʼo tona ʼita kiā ia, neʼe maʼua ai ke hola Sakopo naʼa matehi ia ia e Esau. Hili ni ʼu taʼu, neʼe toe liliu age ia Sakopo. Neʼe haʼu ia Esau ʼo fakafetaulaki mo ia, mo tana ʼu tagata e toko 400. Neʼe kole e Sakopo ke tokoni age Sehova kiā ia. Pea neʼe ina ʼave fakatomuʼa maʼa Esau ia he toe meʼa ʼofa lahi ko he ʼu faga manu. Neʼe fua lelei ia te foaki meʼa ʼofa ʼaia. ʼI tanā felāveʼi, neʼe kua malū ifo ia te loto ʼo Esau, pea neʼe lele ʼo fāʼufua kiā Sakopo.—Sen. 27:41-44; 32:6, 11, 13-15; 33:4, 10.

Tou Fakalotomālohiʼi ʼIhi ʼAki He ʼu Palalau ʼe Lelei

12. He koʼē ʼe tonu ke tou fai he ʼu palalau ʼe lelei ki totatou ʼu tehina?

¹² ʼE tauhi te kau Kilisitiano ki te ʼAtua kae mole ki he tahi age ʼu tagata. Kae ʼe tou loto fuli ke  leleiʼia tātou e ʼihi atu. ʼE feala ʼaki tatatou ʼu palalau lelei ke tou fakamaʼamaʼa ai te ʼu tuʼania, mo te ʼu hoha ʼo totatou ʼu tehina mo tuagaʼane. Kae ko te fai fatufatu ʼe ina fakamamafa age ia te ʼu faʼahi ʼaia pea feala ke feʼekeʼaki ai e ʼihi peʼe kei ʼofa Sehova kiā nātou. Koia, tou fai fakamālotoloto he ʼu palalau fakalotomālohi ki niʼihi, “ko he ʼu lea ʼe lelei moʼo laga mokā ʼe ʼaoga, ke feala hona ʼaoga kiā nātou ʼaē ʼe fagono kiai.”—Efe. 4:29.

13. Koteā ʼaē ʼe tonu ke manatuʼi e te ʼu tagata ʼāfea (a) mokā natou fai tokoni? (b) mokā natou faitohi ki he tahi?

¹³ ʼE tonu tāfito ki te ʼu tagata ʼāfea ke natou “agamalū” pea mo ʼoʼofa ki te faga ovi. (1 Tes. 2:7, 8) Kā foaki e te ʼu tagata ʼāfea he ʼu tokoni, ʼe natou fakatuʼutuʼu ke natou fai “ ʼaki he agamalū,” māʼia mokā natou palalau mo nātou ʼaē “ ʼe mole nonofo mo he ʼu fakatuʼutuʼu lelei.” (2 Tim. 2:24, 25) ʼE toe maʼua ki te ʼu tagata ʼāfea, ke natou fakaʼaogaʼi he ʼu kupu ʼe lelei mokā ʼe tonu ke natou faitohi ki he tahi komitē ʼo te ʼu tagata ʼāfea peʼe ki te filiale. ʼE tonu ke natou agalelei pea mo fakaʼeteʼete, ʼo mulimuli ki te manatu ʼaē ʼe tou lau iā Mateo 7:12.

Tou Fai He ʼu Palalau Lelei ʼi Te Loto Fale

14. Koteā te tokoni ʼe fai e Paulo ki te ʼu tagata ʼohoana, pea koteā tona tupuʼaga?

¹⁴ ʼE faigafua pē hatatou meʼa noaʼi te malave ʼo tatatou ʼu palalau ʼaē ki ʼihi, mo te agaaga ʼo totatou fofoga pea mo totatou sino. Ohagē lā, ko ʼihi tagata ʼe lagi mole natou mahino kātoa ki te malave loloto ʼo tanatou ʼu palalau ki ʼonatou ʼohoana. Neʼe ʼui fēnei e te tuagaʼane: “Neʼe au mataku mokā leʼo lahi mai toku ʼohoana ʼi tona ʼita.” Ko he ʼu kupu ʼe fefeka ʼe feala ke malave lahi age ki he fafine ʼi he tagata, pea ʼe feala ke ina manatuʼi fualoa ki ʼamuli. (Luka 2:19) ʼE moʼoni te faʼahi ʼaia tāfito mokā ko he ʼu palalau ʼe fai age e he tahi ʼe ʼofa ai te fafine ʼohoana pea mo loto ke fakaʼapaʼapaʼi. Neʼe fai e Paulo ia te tokoni ʼaenī ki te ʼu tagata ʼohoana: “Kotou haga ʼoʼofa ki ʼokotou ʼohoana pea ke ʼaua naʼa kotou ʼiʼita kiā nātou.”—Kol. 3:19.

15. Kotou tuku mai he fakatā ʼo ʼuhiga mo te tupuʼaga ʼaē ke agalelei te tagata ki tona ʼohoana.

¹⁵ ʼI te faʼahi ʼaia, ko te tehina kua ʼohoana talu mai fualoa neʼe ina fai he fakatā moʼo fakahā te tupuʼaga ʼaē ke agalelei te tagata ki tona ʼohoana, ohagē ko “he ʼipu ʼe vaivai age.” Neʼe ina ʼui fēnei: “Kā kotou toʼo he ʼipu maʼuhiga pea mo pelepelegesi, ʼe mole tonu ke kotou puke mālohi fau, heʼe feala ke makafaʼafaʼa. Tatau aipē peʼe toe gaohi, kae ʼe ʼasi pē te ʼu faʼahi ʼaē neʼe makafaʼafaʼa. Kapau ʼe fakaʼaogaʼi e he tagata ʼohoana he ʼu palalau ʼe mālohi fau ki tona ʼohoana, ʼe feala ke lavea ai. ʼE feala ke mole kei nā felōgoi ai lolotoga he temi fualoa.”—Lau ia 1 Petelo 3:7.

16. ʼE lava feafeaʼi ki he fafine ʼohoana ke ina laga tona fāmili?

¹⁶ ʼE toe feala foki ki te ʼu tagata ke natou lotomālohi peʼe ke natou lotovaivai ʼaki he ʼu palalau ʼe fai age e niʼihi, ʼo kau ai mo te ʼu palalau ʼaē ʼo tonatou ʼohoana. Ko “he fafine ʼohoana poto,” ʼaē ʼe feala ke “falala” moʼoni ki ai tona ʼohoana, ʼe ina tokagaʼi te loto ʼo tona ʼohoana, ohagē pē ko tona loto ʼaē ke ina tokagaʼi ia ia totonu. (Taag. 19:14; 31:11) Koia ʼe feala ai ki te aga ʼa he fafine ʼohoana ke fua lelei ki tona fāmili, peʼe ke fua kovi. “Ko te fafine ʼaē ʼe poto moʼoni neʼe ina laga tona fale, kae ko ia ʼaē ʼe vale ʼe ina holoʼi ʼaki ʼona ʼu nima.”—Taag. 14:1.

17. (a) ʼE tonu ke palalau feafeaʼi te kau tūpulaga ki tanatou ʼu mātuʼa? (b) ʼE tonu ke palalau feafeaʼi te hahaʼi lalahi ki te kau tūpulaga, pea koteā tona tupuʼaga?

¹⁷ Ko te ʼu mātuʼa ʼo fēia mo te fānau ʼe tonu ke natou fepalalauʼaki lelei. (Mat. 15:4) Kā tou fai palalau mo nātou tūpulaga, pea ko tatatou tokagaʼi tonatou ʼaluʼaga ʼe tokoni mai anai ke mole tou fai he ʼu palalau ʼe ‘fakafiu’ kiā nātou peʼe ‘fakatupu ʼita kiā nātou.’ (Kol. 3:21; Efe. 6:4, kiʼi nota) Tatau aipē peʼe tonu ke fakatonutonuʼi te fānau, kae ʼe tonu aipē ki te ʼu mātuʼa mo te ʼu tagata ʼāfea ke natou palalau fakaʼapaʼapa kiā nātou. Kapau ʼe fēia te aga ʼa te hahaʼi lalahi, pea ʼe faigafua ai ki te kau tūpulaga ke natou fetogi tanatou aga pea mo taupau maʼu tanatou ʼu felōgoi ʼaē mo te ʼAtua. ʼE lelei age te taʼi aga ʼaia ʼi hatatou tuku ke natou manatu ʼe mole kei tou ʼiloʼi he puleʼaki moʼo tokoni kiā nātou, ʼo feala ai ke natou toe manatu fēia ʼo ʼuhiga mo nātou. Ko te kau tūpulaga ʼe lagi mole natou manatuʼi anai ia te ʼu tokoni fuli ʼaē neʼe fai age kiā nātou, kae ʼe natou manatuʼi anai te faʼahiga palalau ʼaē neʼe fai age e ʼihi kiā nātou.

 Tou Palalau Ki Te ʼu Meʼa Lelei ʼAki Totatou Loto

18. ʼE feafeaʼi hatatou lava toʼo te ʼu manatu ʼaē ʼe kovi ʼi totatou loto?

¹⁸ Ko te faiga ʼaē ke tātāʼofi te ʼita, ʼe mole gata pē ʼi totatou fofoga, ke hagē ʼe ʼasi ʼe tou tokalelei. ʼE mole tou loto pē ke tou lolomi ia te ʼu meʼa ʼaē ʼi totatou loto, heʼe kapau ʼe tou fēia pea ʼe tou nofo hoha ʼaupitō anai ʼi tatatou faiga ʼaē ke ʼasi ʼi ʼotatou fofoga ʼe tou tokalelei kae tou fonu tātou ʼi te ʼita. ʼE hagē pē ʼi te moʼi temi ʼe tahi ʼe tou lomiʼi te meʼa tāʼofi ʼo te motokā pea mo te meʼa ʼaē ʼe ina fakagaholo. ʼE mole lelei ki te motokā pea ʼe feala aipē ke maumau. Koia ʼaua naʼa tou taupau ia te ʼita iā tātou pea ki ʼamuli age leva, ʼe tou tuku fuli mai ki tuʼa. Kotou faikole ke tokoni atu Sehova ke ina toʼo ʼi tokotou loto te ʼu manatu ʼaē ʼe kovi. Kotou tuku ia te laumālie ʼo Sehova ke ina fetogi ia takotou manatu pea mo tokotou loto ke ʼalutahi mo tona finegalo.—Lau ia Loma 12:2; Efesi 4:23, 24.

19. Koteā te ʼu fakatuʼutuʼu ʼe lava tokoni mai ke tou tekeʼi te ʼu ʼaluʼaga ʼaē ʼe feala ke tou ʼiʼita ai?

¹⁹ Kotou mulimuli ki te ʼu fakatuʼutuʼu ʼaē kā tokoni atu ke kotou toʼo te ʼu manatu ʼaē ʼe kovi ʼi tokotou loto. Kapau ʼe kotou tokagaʼi ʼe ʼamanaki hoko he fihifihia pea mo kotou logoʼi ʼe hake age ʼi tokotou loto te ʼita, ʼe lagi lelei ke kotou mavae ʼi te temi ʼaia, ke kotou maʼu ai he temi moʼo fakafīmālieʼi tokotou loto. (Taag. 17:14) Kapau ko ia ʼaē ʼe kotou palalau mo ia ʼe kamata ʼita, kotou faiga mālohi ke kotou fai he ʼu palalau ʼe lelei. Kotou manatuʼi: “Mokā malū he tali, pea ʼe ina tekeʼi te ʼita, kae ko he palalau fakatupu lotomamahi, ʼe ina fakahake te ʼita.” (Taag. 15:1) Ko he ʼu palalau ʼe fakatupu lotomamahi peʼe kovi, ʼe fakaʼāʼāsili ai anai ia te ʼita, tatau aipē peʼe fai ʼaki he leʼo malū. (Taag. 26:21) Koia kā hoko he ʼaluʼaga ʼe faigataʼa ai hakotou loto lolomi, kotou “tuai ʼi te palalau, tuai ʼi te ʼita.” Kotou kole te laumālie ʼo Sehova ke tokoni atu ke kotou fai he ʼu palalau ʼe lelei, kae mole ko he ʼu palalau kovi.—Sake 1:19.

Tou Fakamolemole ʼAki Totatou Loto Kātoa

20, 21. Koteā ʼaē ʼe feala ke tokoni mai ke tou fakamolemole ki ʼihi, pea he koʼē ʼe tonu ke tou fai ia te faʼahi ʼaia?

²⁰ Meʼa fakaʼofaʼofa foki, heʼe mole he tahi iā tātou ʼe ina lava puleʼi kātoa ia tona ʼalelo. (Sake 3:2) Logolā tanatou faiga fakamālotoloto, kae ʼi ʼihi temi, ko nātou ʼo te fāmili peʼe ko totatou ʼu tehina mo tuagaʼane fakalaumālie ʼe feala ke natou fai he ʼu palalau ʼe tou lotomamahi ai. ʼAua naʼa tou foimo ʼita atu aipē, kae tou vakavakaʼi māmālie te tupuʼaga ʼo tanatou ʼu palalau. (Lau ia Tagata Tānaki 7:8, 9.) Neʼe lahi fau koa tonatou hoha, pe ko tanatou mataku, pe neʼe natou logologo kovi koa ʼi te temi ʼaia, pe lagi natou tau mo he ʼu fihifihia ʼi te loto fale peʼe mai tuʼa atu?

²¹ Ko te ʼu faʼahi ʼaia ʼe mole tonu ke liliu ko he takuʼaki moʼo fai he ʼu palalau kovi. Kae ko tatatou ʼiloʼi ia te ʼu ʼaluʼaga kehekehe, ʼe lava tokoni mai ke tou mahino pe koʼē ʼi ʼihi temi, ko te hahaʼi ʼe natou fai he ʼu palalau peʼe ko he ʼu aga neʼe mole tonu ke natou fai pea mo uga ai tātou ke tou fakamolemole. Ko tātou fuli ʼe tou fai he ʼu palalau peʼe ko he aga ʼe lotomamahi ai ʼihi, pea ʼe tou fakaʼamu ke natou lotolelei ʼo fakamolemole mai. (Tnk. 7:21, 22) Neʼe ʼui e Sesu ke feala ki te ʼAtua ke ina fakamolemole mai, ʼe tonu ke tou fakamolemole ki te hahaʼi. (Mat. 6:14, 15; 18:21, 22, 35) Koia, ʼe tonu ke tou foimo faifakalelei pea mo foimo fakamolemole, ʼo tou taupau aipē te ʼofa, te “noʼo haohaoa ʼo te logotahi,” ʼi te loto fāmili pea ʼi te loto kōkelekāsio.—Kol. 3:14.

22. He koʼē ʼe fua lelei hatatou faiga ke tou fai he ʼu palalau ʼe lelei?

²² ʼE ʼāʼāsili age anai te faigataʼa ʼaē ʼo te taupau ʼo tatatou fiafia pea mo tatatou logotahi, heʼe kua vave aʼu te mālama ʼitaʼita ʼaenī ki tona fakaʼosi. Ko te maʼuliʼi ʼo te ʼu pelesepeto ʼaē ʼi te Folafola ʼa te ʼAtua ʼe tokoni mai anai ke tou fai he ʼu palalau ʼe lelei, kae mole ko he ʼu palalau kovi. ʼE lahi age anai tatatou ʼu felōgoi tokalelei ʼi te kōkelekāsio pea ʼi totatou fāmili, pea ʼaki tatatou faʼifaʼitaki ʼe ko he fakamoʼoni lelei ʼaia ki te hahaʼi ʼo ʼuhiga mo totatou “ ʼAtua fiafia” ko Sehova.—1 Tim. 1:11.

ʼE Feala Koa Hakotou Fakamahino?

• He koʼē ʼe maʼuhiga ke kotou filifili he temi faigamālie ke kotou palalau ai ki te ʼu fihifihia?

• He koʼē ʼe tonu ke ‘fepalalauʼaki lelei’ tuʼumaʼu te fāmili?

• Koteā ʼaē ʼe feala ke tokoni mai ke ʼaua naʼa tou fai he ʼu palalau fakalotomamahi?

• Koteā ʼaē kā tokoni mai ke tou loto fakamolemole?

[ʼU fehuʼi ʼo te ako]

[Paki ʼo te pasina 25]

Kotou fakafīmālie tokotou loto, pea kotou maʼu leva he temi faigamālie moʼo palalau

[Paki ʼo te pasina 26]

ʼE tonu ki te tagata ke palalau lelei tuʼumaʼu pē ki tona ʼohoana