Koteā ʼAē ʼe Fai e Te ʼAtua?

“He koʼē koa, Ê Sehova, ʼe ke tuʼu mamaʼo? He koʼē koa ʼe ke nono ʼi te ʼu temi ʼo te mamahi?” a—PESALEMO 10:1.

KĀ TOU vakaʼi te ʼu kupu tāfito ʼi te nusipepa, pea ʼe fakamoʼoni ai ʼe tou māʼuʼuli ʼi “te ʼu temi ʼo te mamahi.” Pea kā hoko he tuʼutāmaki ʼi he loto fale, peʼe ko he fakapō, he fakaʼī, peʼe ko te mate ʼo he tahi neʼe tou ʼoʼofa ai, ʼe lagi tou fai ia te ʼu fehuʼi ʼaenī: “ ʼE sio mai koa ia te ʼAtua? ʼE tokaga mai koa? ʼE maʼuli moʼoni koa ia?”

Kae neʼe mole heʼeki kotou manatu koa, ko te ʼu meʼa ʼaē ʼe tou fakatalitali ke fai e te ʼAtua ʼe lagi feala ke fakatafito ki he manatu ʼe hala? Tou toʼo he faʼifaʼitaki. Ohagē lā ko he kiʼi tamasiʼi ʼe lotomamahi heʼe kua ʼalu ia tana tamai ʼo gāue. ʼE fia sio ia ki tana tamai pea kua loto lā ia ke liliu mai ki fale. Maʼa te tamasiʼi, kua hagē neʼe liʼakina ia ia. ʼI te ʼaho kātoa, ʼe ina fai tuʼumaʼu pē ia te fehuʼi ʼaenī: “ ʼE ʼifea koa ia Papa?”

ʼE tou mahino fuli pē, ʼe manatu hala te tamasiʼi. ʼI te temi ʼaē ʼe puli ai tana tamai, ʼe lolotoga gāue ia moʼo taupau ia te maʼuli fakasino ʼo tona fāmili kātoa. ʼE feala koa mo tātou ke tou toe manatu hala mokā ʼe tou kalaga peʼe “ ʼe ʼifea koa te ʼAtua”?

Ohagē lā, ʼe lagi loto e ʼihi ke foimo fakahoko lā e te ʼAtua ia tana tautea kiā nātou ʼaē ʼe agakovi. Kae ki ʼihi ia, ʼe hagē kiā nātou ko te ʼAtua ʼe ko he tahi ʼe ina foaki pē ia he ʼu meʼa ʼofa, ohagē ko he gāue, peʼe ko he ʼohoana, peʼe ko he paʼaga ʼi he gaoʼi loteli.

Koia ʼi te ʼu manatu ʼaia e lua, kapau ʼe mole foimo fakatuʼu e te ʼAtua ia te faitotonu pea kapau ʼe mole ina foaki mai ia te ʼu meʼa ʼaē ʼe tou kole age, pea ʼe ʼui leva ia ʼe mole tokaga ki totatou ʼu mamahi peʼe ki te ʼu meʼa ʼaē ʼe ʼaoga kiā tātou. Kae ʼe hala ʼaupitō te taʼi manatu ʼaia! ʼI tona fakahagatonu, ko Sehova ʼAtua ʼe lolotoga gāue ʼi te temi nei moʼo foaki ki te mālamanei kātoa ia te ʼu meʼa ʼaē ʼe ʼaoga kiā nātou, tatau aipē peʼe mole ina fai ʼo mulimuli ki te meʼa ʼaē ʼe loto kiai ia te tokolahi.

Koia, koteā ʼaē ʼe lolotoga fai nei e te ʼAtua? Moʼo tali ki te fehuʼi ʼaia, ʼe tonu ke tou toe vakaʼi ia te kamataʼaga ʼo te hisitolia fakatagata, ʼi te temi ʼaē neʼe maumauʼi ai te ʼu felōgoi ʼa te mālamanei pea mo te ʼAtua, kae neʼe feala pē tona fakatokatoka.

Te ʼu Fua Kovi ʼo Te Agahala

Kotou fakakaukauʼi age muʼa, ia he ʼapi neʼe tuku maumau talu mai ni ʼu taʼu. Kua maumau ia te ʼato, mo tō kehekehe ia te ʼu matapā, pea kua maumauʼi ia tuʼa. Neʼe ʼi ai te temi neʼe matalelei ai te ʼapi ʼaia, kae kua kovi ʼi te temi nei. ʼI te lahi ʼaupitō ʼo te ʼu meʼa ʼaē ʼe maʼua ke toe faʼu, koia ʼe toe lahi anai mo te ʼu gāue ʼaē kā fakahoko kiai; pea ko te toe gāue ʼaia ʼe mole ʼosi pē anai ʼi he ʼaho e tahi.

ʼI te temi leva ʼaenī, tou vakaʼi ia te ʼu fua kovi ʼaē neʼe hoko ki te mālamanei kua hili nei kiai taʼu e 6 000, ʼi te temi ʼaē neʼe kākāʼi ai ia Atama mo Eva e te laumālie ko Satana ke nā talagataʼa ki te ʼAtua. ʼI muʼa ʼo te hoko ʼo te faʼahi ʼaia, ko te ʼuluaki taumātuʼa  neʼe nā haohaoa pea mo nā maʼu ia te ʼamanaki ʼaē ke nā māʼuʼuli ʼo heʼegata fakatahi pea mo te ʼu fānau ʼaē ʼo tonā hōloga. (Senesi 1:28) Kae ʼi tanā agahala, neʼe kua hagē pē ia neʼe nā maumauʼi ia te foʼi fāmili fakamālamanei ʼaē neʼe mole heʼeki tutupu ake.

ʼAua naʼa tou meʼa noaʼi ia te ʼu fua kovi ʼo te agatuʼu ʼaia. ʼE ʼui fēnei ʼi te Tohi-Tapu: “ ʼAki pē te tagata e tahi [ia Atama] neʼe hū te agahala ki te mālamanei, pea ʼaki te agahala te mate.” (Loma 5:12) ʼO mole gata ʼaki pē ia te mate, kae ʼaki te agahala, neʼe tou toe tokakovi ai mo totatou Tupuʼaga, pea ko te agahala neʼe toe fakatupu kovi ki totatou sino, mo totatou ʼatamai, pea mo totatou loto. Koia ʼaē ʼe tatau ai ia totatou ʼaluʼaga pea mo he ʼapi kua maumau. Neʼe moʼoni ia te ʼu palalau ʼaē neʼe fai e te tagata agatonu ko Sopo ʼo ʼuhiga mo totatou ʼaluʼaga, ʼi tana ʼui ʼaē ko te tagata “ ʼe siʼisiʼi tona ʼu ʼaho pea kua lahi tona ʼu mamahi.”—Sopo 14:1, Bible de Crampon.

Kae neʼe liʼaki koa e te ʼAtua ia te mālamanei ʼi te ʼosi agahala ʼaē ʼa Atama mo Eva? Kailoa ia! ʼI tona fakahagatonu, talu mai te temi ʼaia ʼo aʼu mai ki te temi nei, ʼe kei gāue tatatou Tamai ʼaē ʼe ʼi selō maʼa te hahaʼi ʼo te mālamanei. Ke tou mahino lelei age ki te ʼu meʼa ʼaē ʼe ina fai maʼa tātou, tou vakaʼi age muʼa faʼahi e tolu ʼe tonu ke fakahoko ke feala ke toe gaohi he ʼapi, pea mo tona pikipikiga mo te ʼu meʼa ʼaē neʼe fai e te ʼAtua ke toe maʼu e te hahaʼi ʼo te mālamanei ia te ʼu ʼaluʼaga ʼaē neʼe maʼu ʼi te kamataʼaga.

1 Ko te tagata ʼo te ʼapi, ʼi tana ʼosi vakaʼi tona ʼu faʼahi ʼaē kua maumau, pea ʼe maʼua ke ina fai he tonu: peʼe ina toe gaohi peʼe ina holoʼi te ʼapi.

Hili pē ia te agatuʼu ʼaē ʼi Eteni, ko Sehova ʼAtua neʼe ina tala ifo ia tana fakatuʼutuʼu ʼaē ke toe maʼu e te hahaʼi ʼo te mālamanei ia te ʼu ʼaluʼaga ʼaē neʼe maʼu ʼi te kamataʼaga. Neʼe ina ʼui fēnei ki te laumālie fakapulipuli ʼaē neʼe ina fakatupu ia te agatuʼu: “ ʼE au tuku anai he fehiʼa iā te koe pea mo te fafine, ʼi tou hako pea mo tona hako. ʼE ina maumauʼi anai koe ʼi tou ʼulu pea ʼe ke maumauʼi anai ia ia ʼi tona muliʼi vaʼe.”—Senesi 3:15.

ʼAki te ʼu palalau ʼaia, neʼe fakapapau ai e Sehova ʼe ina fakaʼauha anai ia ia ʼaē neʼe ina fakatupu te agatuʼu ʼi Eteni. (Loma 16:20; Fakahā 12:9) Tahi ʼaē meʼa, neʼe fakakikite e Sehova ko te “hako” ʼaē kā haʼu ʼe ina totogi anai ia te mālamanei mai te agahala. b (1 Soane 3:8) Ko te ʼu fakapapau ʼaia, ʼe fakahā ʼaki ai ia te moʼoni maʼuhiga ʼaenī: ko te ʼAtua ʼe ina toe fakatokatoka anai te ʼu meʼa ʼaē neʼe ina fakatupu, kae mole ina haga anai ia ʼo maumauʼi. Kae ʼe fakamaʼua anai ia he temi loaloaga ki te fakatokatoka ʼaia.

2 Ko te tagata ʼaē ʼe ina tohi te ʼu pāki ʼo te ʼu fale, ʼe ina tohi fakatomuʼa te ʼu gāue ʼaē ki te toe gaohi ʼo te ʼapi.

Ko Sehova ʼAtua neʼe ina foaki ki te kau Iselaele ia he ʼu lao pea neʼe ina fakatuʼutuʼu ke laga he fale lotu ke natou tauhi ai kiā te ia. ʼE ʼui fēnei ʼi te Tohi-Tapu: “Ko te ʼu meʼa ʼaia ʼe ko te ʼata ʼo te ʼu meʼa ʼaē kā hoko mai.” (Kolose 2:17) Ohagē ko te ʼu pepa ʼa te tagata ʼe ina tohi te ʼu pāki ʼo he fale, ko te ʼu fakatuʼutuʼu ʼaia neʼe ko he fakatā pe ia ʼo he meʼa neʼe lahi age.

 Ohagē lā, ko te kau Iselaele neʼe natou sākilifisioʼi te ʼu manu, ke feala he fakamolemole ʼo tanatou ʼu agahala. (Levitike 17:11) Ko te faʼahi ʼaia neʼe ina fakatā ia te sākilifisio ʼe lahi age ʼaē kā foaki anai hili kiai ni ʼu sēkulō, pea ko te sākilifisio ʼaia kā ina haofaki moʼoni anai ia te mālamanei kātoa. c Ko te faʼufaʼu ʼo te tapenakulo pea mo te fale lotu ʼaē neʼe tauhi ai te kau Iselaele, neʼe ko he fakatā ʼo te ʼu faʼahi kehekehe ʼaē kā fakahoko anai e te Mēsia, mai tona mate fakasākilifisio ʼo aʼu ki te temi ʼaē kā hake ai anai ki selō.—Vakaʼi ia te  pāsina 7.

3 ʼE filifili ia he tagata laga fale ʼe ina mulimuli anai ki te ʼu meʼa ʼaē neʼe tohi pea mo ina toe gaohi ia te ʼapi.

Ko Sesu neʼe ko te Mēsia ʼaē neʼe fakapapauʼi mai, ʼaē kā ina mulimuli anai ki te talatisio ʼo te ʼu fai sākilifisio ʼa te kau Iselaele ʼo ina foaki anai tona maʼuli totonu moʼo fakamaʼuli ʼo te mālamanei. Koia lā ʼaē neʼe fakahigoaʼi ai e Soane Patita ia Sesu ko “te ʼAkeno ʼa te ʼAtua ʼaē ʼe ina toʼo te agahala ʼo te mālamanei.” (Soane 1:29) Neʼe tali e Sesu ʼaki he lotolelei ia te gāue ʼaia. Neʼe ina ʼui fēnei: “Neʼe au hifo mai te lagi mole ko he fai ʼo toku finegalo, kae ko te fai ʼo te finegalo ʼo ia ʼaē neʼe ina fekauʼi mai au.”—Soane 6:38.

Ko te finegalo ʼo te ʼAtua ʼo ʼuhiga mo Sesu neʼe mole gata pē ki tana “foaki tona nefesi moʼo totogi ʼaki ʼo te tokolahi,” kae neʼe toe tonu ke fai e Sesu ia he fuakava mo tana ʼu tisipulo ki he Puleʼaga. (Mateo 20:28; Luka 22:29, 30) ʼE ko te Puleʼaga ʼaia ʼaē kā fakaʼaogaʼi anai e te ʼAtua moʼo fakahoko ia tona finegalo ki te mālamanei. Ko te logo ʼo ʼuhiga mo te Puleʼaga ʼo te ʼAtua ʼe higoa ko te “logo lelei,” heʼe ina fakahā ko te ʼAtua kua ina fakatuʼu ia he puleʼaga ʼi selō moʼo takitaki ia te kele!—Mateo 24:14; Taniela 2:44. d

ʼE Hoko Atu Ia Te Fakatokatoka

ʼI muʼa ʼo tana toe hake ki selō, neʼe fakatotonu fēnei e Sesu ki tana ʼu tisipulo: “Kotou fai ni ʼu tisipulo ʼi te hahaʼi ʼo te ʼu fenua fuli pē, ʼo papitemaʼi ia nātou ʼi te huafa ʼo te Tamai pea mo te ʼAlo pea mo te laumālie māʼoniʼoni . . . Pea koʼenī, ʼe au nofo mo koutou ʼi te ʼaho fuli pē, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.”—Mateo 28:19, 20.

Koia ko te fakatokatoka ʼo te mālamanei ʼe mole gata anai ʼaki ia te mate ʼo Sesu. ʼE hoko atu pē anai ʼo aʼu ki “te fakaʼosi ʼo te tuʼu ʼaenī,” te temi ʼaē kā kamata takitaki ai anai e te Puleʼaga ʼo te ʼAtua ia totatou kele. Kua hoko mai ia te temi ʼaia. ʼE tou ʼiloʼi ia te faʼahi ʼaia heʼe ko te fakaʼiloga ʼaē neʼe fakakikite e Sesu ʼo ʼuhiga mo “te fakaʼosi ʼo te tuʼu ʼaenī” ʼe lolotoga hoko nei. e—Mateo 24:3-14; Luka 21:7-11; 2 Timoteo 3:1-5.

Iā ʼaho nei, iā fenua e 236, ko te kau Fakamoʼoni ʼa Sehova ʼe natou fakalogo ki te fakatotonu ʼa Sesu ʼaē ke fakamafola ia te logo lelei ʼo te Puleʼaga ʼo te ʼAtua. ʼI tona fakahagatonu, ko te nusipepa ʼaenī ʼe kotou lau neʼe fai moʼo tokoni atu ke kotou ʼiloʼi he tahi ʼu manatu ʼo ʼuhiga mo te Puleʼaga ʼaia pea mo te ʼu gāue kā ina fakahoko anai. ʼI te pāsina 2 ʼo te ʼu Tule Leʼo fuli, ʼe kotou maʼu ai anai ia te ʼu palalau ʼaenī: “Ko te . . . nusipepa ʼaenī . . . ʼe ina fakafīmālieʼi te loto ʼo te hahaʼi ʼaki te logo lelei ʼaē ko te Puleʼaga ʼo te ʼAtua, ʼaē ko te puleʼaga moʼoni ʼi selō, kua ina vave pulihi anai ia te agakovi fuli pē pea mo ina fakaliliu anai ia te kele ko he palatiso. ʼE ina toe fakalotomālohiʼi tana kau lautohi ke natou tui kiā Sesu Kilisito, ʼaē neʼe mate ke feala ai hatatou maʼu ia te maʼuli heʼegata pea kua ʼafio nei ʼi tona ʼuhiga Hau ʼo te Puleʼaga ʼo te ʼAtua.”

ʼE moʼoni, ʼi te temi ʼaenī ʼe kei lagi kotou logo ki he ʼu fai fakapō, peʼe ko he ʼu tuʼutāmaki fakanātulā, peʼe lagi neʼe hoko kiā koutou ia he ʼaluʼaga fakalotomamahi. Kae ʼaki takotou ako ia te Tohi-Tapu, pea ʼe kotou fakatui anai ko te ʼAtua neʼe mole ina liʼaki ia te hahaʼi ʼi te mālamanei. Kailoa ia, koteʼuhi “ ʼe mole mamaʼo ia iā tātou takitokotahi.” (Gāue 17:27) Pea ko tana fakapapau ʼaē ke ina toe fakatuʼu te ʼu meʼa ʼaē neʼe pulihi e tatatou ʼu mātuʼa ʼi te kamataʼaga, ʼe hoko anai.—Isaia 55:11.

[ʼU nota]

 [Paki ʼo te pasina 7]

 (Vakaʼi te nusipepa)

“Ko He Fakatātā ʼo Te Meʼa Moʼoni”​—Te Meʼa ʼAē Neʼe Fakatā e Te Tapenakulo

TE ʼALETALE

Te lotolelei ʼa te ʼAtua ke ina tali ia te sākilifisio ʼa Sesu. —HEPELEO 13:10-12.

TE PELEPITELŌ LAHI

Sesu.—HEPELEO 9:11.

1 ʼI te ʼAho ʼo Te ʼu Faifakalelei, neʼe momoli e te pelepitelō lahi ia he sākilifisio maʼa te ʼu agahala ʼa te hahaʼi.—LEVITIKE 16:15, 29-31.

1 ʼI te ʼaho 14 ʼo Nisani, ʼo te taʼu 33 ʼo totatou temi, neʼe sākilifisioʼi e Sesu tona maʼuli maʼa tātou.—HEPELEO 10:5-10; 1 SOANE 2:1, 2.

TE POTU TAPUTAPU

Te ʼaluʼaga ʼo Sesu ʼi tona ʼuhiga ʼalo ʼo te ʼAtua neʼe fakanofo ʼaki te laumālie.—MATEO 3:16, 17; LOMA 8:14-17; HEPELEO 5:4-6.

TE LITO

Te sino ʼo Sesu, ko te ʼā ʼaē neʼe ina vaheʼi ia te maʼuli ʼi te kele pea mo te maʼuli ʼi selō.—1 KOLONITO 15:44, 50; HEPELEO 6:19, 20; 10:19, 20.

2 Ko te pelepitelō lahi neʼe fakalaka ʼi te lito ʼaē ʼe ina vaheʼi ia te Potu Taputapu pea mo te Potu Taputapu ʼAupitō.

2 ʼI tona ʼosi fakatuʼuake, neʼe ‘fakalaka ia Sesu ki te tahi faʼahi ʼo te lito’ ʼi tana hake ʼaē ki selō ʼo “hū . . . maʼa tātou iā muʼa ʼo te ʼAtua.”—HEPELEO 9:24-28.

TE POTU TAPUTAPU ʼAUPITŌ

Selō.—HEPELEO 9:24.

3 ʼI tana kua ʼi te Potu Taputapu ʼAupitō, neʼe ʼafuhi e te pelepitelō lahi he moʼi toto ʼo te sākilifisio iā muʼa ʼo te ʼaleka ʼo te fuakava.—LEVITIKE 16:12-14.

3 ʼI tana momoli ia te maʼuhiga ʼo tona taʼataʼa ʼaē neʼe ina liligi, neʼe foaki ai e Sesu ia he fakamolemole ʼo tatatou ʼu agahala.—HEPELEO 9:12, 24; 1 PETELO 3:21, 22.