ʼE Fia ʼIloʼi e Te Kau Lautohi . . .

Koteā Koa Ia Te Fale ʼo Te Puleʼaga?

▪ Ko te Fale ʼo Te Puleʼaga ʼe ko he fale ʼe fakaʼaogaʼi e te kau Fakamoʼoni ʼa Sehova ki tanatou ʼu gāue fakalotu. Ko te ʼu Fale ʼo Te Puleʼaga e lauʼi hogofulu afe ʼaē ʼe fakaʼaogaʼi ʼi te mālamanei kātoa. ʼI te vāhaʼa fuli, ko kōkelekāsio e 105 000 tupu ʼa te kau Fakamoʼoni ʼa Sehova ʼe natou fakatahitahi ki te ʼu Fale ʼo Te Puleʼaga ʼaia.

Ko te ʼu Fale fuli ʼo Te Puleʼaga ʼe fai ai te ʼu polokalama ako fakalaumālie pea mo te ʼu lautohi Fakatohi-tapu. ʼI te ʼu fale fono ʼaia ʼe ʼi ai te faʼahi ʼe fakaʼaogaʼi ko he faiakonakiʼaga ki te ʼu fono. ʼI te agamāhani ʼe fakafuafua he ʼu hekaʼaga e 100 peʼe 300 maʼa te hahaʼi. ʼI te Fale ʼo Te Puleʼaga ʼe tou mai ai he koga fale e tahi peʼe laka atu ki te ako Fakateokalatike, te pilo pea mo te kiʼi tānakiʼaga ʼo te ʼu tohi Fakatohi-tapu pea mo te ʼu tohi ʼe feala ke fakaʼaogaʼi e ʼihi ʼi te kōkelekāsio mokā fai hanatou ʼu kumi.

Koia, ʼi te Fale ʼo Te Puleʼaga, e mole tou maʼu anai he ʼu fakatātā ohagē ko te ʼu lotu ʼo te Keletiate. ʼE mole ʼi ai he ʼu ʼaletale, he ʼu pāki peʼe ko he ʼu koluse. Koteā tona tupuʼaga? ʼI te manatu ʼa te kau Fakamoʼoni ʼa Sehova, ko te fakaʼaogaʼi ʼo te ʼu meʼa ʼaia ʼe ko he fakafeagai ki te fakatotonu ʼaē ʼe haʼu mai te Tohi-Tapu ke tou “hola mai te tauhi tamapua.” (1 Kolonito 10:14; Soane 4:24) ʼE lahi te ʼu ʼēkelesia pea mo te ʼu fale lotu neʼe lahi te kinakina ki tonatou laga he neʼe faʼu ke matalelei ʼaupitō. Kae ʼe kehekehe ia mo te ʼu Fale ʼo Te Puleʼaga ʼaē neʼe mole kinakina fau tona laga he neʼe fakatuʼu tāfito ke faigafua ki tona fakaʼaogaʼi. Ko te meʼa ʼaē ʼe maʼuhiga tāfito ʼe ko te ako ʼo te Tohi-Tapu ʼaē ʼe fai ʼi te Fale ʼo Te Puleʼaga kae ʼe mole ko te fale ʼaē ʼe fakamaʼuhigaʼi.

He koʼē neʼe fakahigoaʼi te fale ʼaia ʼe ko te Fale ʼo Te Puleʼaga? Ko te ʼu fono ʼaē ʼe fai ʼi te Fale ʼo Te Puleʼaga ʼe fakatafito ki te ʼu akonaki Fakatohi-tapu pea ko te kupu tāfito ʼo te logo lelei ʼe ko te “puleʼaga ʼo te ʼAtua,” ʼe ko te kupu tāfito ʼaia o te minisitelio ʼa Sesu. (Luka 4:43) Koia, ko te higoa ʼaē neʼe foaki kiai, ko te Fale ʼo Te Puleʼaga ʼi te ʼu taʼu 1930, ʼe ʼalutahi mo te ʼu gāue ʼaē neʼe fakatuʼutuʼu kiai—ia te lagolago ki te tauhi moʼoni pea ko te kupu tāfito ʼaia ʼo te fakamafola ʼo te “logo lelei . . . ʼo te puleʼaga.” (Mateo 24:14) Koia, ko te ʼu Fale ʼo Te Puleʼaga ʼe mole fakaʼaogaʼi ki he ʼu faʼahi fakasōsiale peʼe ki he ʼu gāue faifakatau koloa. Ko te laga ʼo te ʼu fale, pea mo te ʼu meʼa gāue ʼaē neʼe totogi pea mo te falā ʼaē ʼe fakaʼaogaʼi kiai, neʼe fai fuli ʼaki pē te ʼu meʼa ʼofa. ʼE mole fai ʼi te fale fono ia he tae falā. Kae ʼi te Fale ʼo Te Puleʼaga, ʼe maʼu ai te ʼu kiʼi puha, pea ko nātou ʼaē ʼe fia foaki hanatou meʼa ʼofa ʼe natou ʼave ʼo tuku kiai.

ʼI te mālamanei kātoa, ʼe fakaʼaogaʼi ia te ʼu Fale ʼo Te Puleʼaga ki te fakatuʼutuʼu pē e tahi, kae ko tona faʼahiga laga ʼe tahi ʼalu pē ia. Tona lahi pea mo tona agaaga, ʼe mulimuli pē ki te ʼu faʼahiga laga fale ʼo te fenua pea mo tona ʼu meʼa gāue. Pea ʼe toe laga te ʼu fale ʼaia ʼo mulimuli pē ki te ʼaluʼaga ʼo te fenua peʼe momoko peʼe vevela, ʼo toe fakalogo pē foki ki te ʼaluʼaga fakapaʼaga ʼo te kau Fakamoʼoni ʼa Sehova ʼo te ʼu fenua ʼaia. Ko ʼihi fale neʼe laga ʼaki te ʼu piliki, te ʼu papa pea mo te maka. Ko ʼihi Fale ʼo Te Puleʼaga neʼe tuʼu avaava, ko tona ʼu kaupā neʼe fai ʼaki te ʼu kofe pea mo ʼato ʼaki te lau.

ʼE fakatalitali lelei tuʼumaʼu pē ia te hahaʼi ʼaē ʼe ʼomai ki te ʼu fono ʼaē ʼe fai ʼi te Fale ʼo Te Puleʼaga. (Hepeleo 10:25) Koia, ʼi te vāhaʼa fuli ʼe fai ia te akonaki ki te kaugamālie, pea ko tona kupu tāfito ʼe fakatafito ki te Tohi-Tapu, ʼaē ʼe ʼaoga ki te kōkelekāsio peʼe ki te hahaʼi ʼaē ʼe foʼofoʼou mai. He koʼē ʼe mole kotou ʼolo ki he ʼu fono ʼe fai ʼi te Fale ʼo Te Puleʼaga ʼo tokotou kolo?

[Paki ʼo te pasina 17]

Malawi, Afelika

[Paki ʼo te pasina 17]

Pilitānia