Kotou Haga Lagalaga Te Kōkelekāsio

“Ke kotou haga fefakalotofīmālieʼaki pea mo kotou felagalagaʼaki.”—1 TES. 5:11.

 1. Koteā te ʼu tapuakina ʼe tou maʼu mokā tou kau ki te kōkelekāsio Fakakilisitiano, pea koteā te ʼu fihifihia ʼe lagi kei feala pē ke hoko?

 ʼE KO he toe tapuakina mokā kotou liliu ʼo kau ki te kōkelekāsio Fakakilisitiano. ʼE kotou maʼu ai ia he ʼu felōgoi lelei mo Sehova. Ko takotou falala ʼaē ki tana Folafola ohagē ko he takitaki kiā koutou, ʼe ina puipui ai koutou mai te ʼu ikuʼaga kovi ʼo he faʼahiga maʼuli ʼe mole tuha mo he Kilisitiano. ʼE lahi tokotou ʼu kaumeʼa lelei, ʼe natou loto pē ki te meʼa ʼaē ʼe lelei kiā koutou. ʼEī, ʼe lahi te ʼu tapuakina. Kae tokolahi ʼi te kau Kilisitiano ʼe natou lolotoga tau mo te ʼu fihifihia kehekehe. ʼE lagi ʼaoga ki ʼihi iā nātou he tokoni ke natou mahino ki te ʼu meʼa loloto ʼa te Folafola ʼa te ʼAtua. Ko ʼihi ʼe māhahaki peʼe lotomamahi, peʼe natou utu ia te ʼu fua kovi ʼo he ʼu tonu neʼe natou fai kae ʼe mole lelei. Pea ʼe tou māʼuʼuli fuli ʼi te mālama ʼe mole tauhi ki te ʼAtua.

 2. Koteā te tokoni ʼaē ʼe tonu ke tou foaki ki totatou ʼu tehina mo tuagaʼane mokā natou tau mo he ʼu fihifihia, pea koteā tona tupuʼaga?

² ʼE mole he tahi iā tātou ʼe ina fia sio ki hona tehina peʼe ko hona tuagaʼane ʼe mamahi peʼe tau mo hona ʼu fihifihia. Neʼe fakatatau e te ʼapositolo ko Paulo te kōkelekāsio ki he sino pea neʼe ina ʼui “kapau ʼe ʼi ai he kogaʼi sino ʼe mamahi, mo te tahi ʼu kogaʼi sino ʼe mamahi mo ia.”  (1 Ko. 12:12, 26) ʼI te ʼu ʼaluʼaga ʼaia, ʼe tonu ke tou tokoni mālohi ki totatou ʼu tehina mo tuagaʼane. ʼE lahi te ʼu fakamatala Fakatohi-tapu ʼo ʼuhiga mo te ʼu tehina mo te ʼu tuagaʼane ʼi te kōkelekāsio neʼe natou tokoni ki ʼihi ke natou fakatokatoka tonatou ʼu fihifihia. ʼI tatatou vakavakaʼi ia te ʼu fakamatala ʼaia, kotou fakakaukau age muʼa peʼe feafeaʼi hakotou foaki he tokoni fēia. ʼE feafeaʼi hakotou tokoni ʼi te faʼahi fakalaumālie ki tokotou ʼu tehina mo tuagaʼane, ʼo kotou lagalaga ai te kōkelekāsio ʼa Sehova?

‘Neʼe Nā ʼAve Ia Ia’

3, 4. Neʼe tokoniʼi feafeaʼi e Akila mo Pilisika ia Apolose?

³ ʼI te temi ʼaē neʼe maʼuli ai ia Apolose ʼi Efesi, neʼe kua liliu ia ko te tagata fakamafola evaselio faʼafai. ʼE ʼui fēnei ʼi te tohi ʼo Gāue: “Pea ʼi tona vela ʼi te laumālie, neʼe palalau ia pea mo akonaki totonu ki te ʼu meʼa ʼaē ʼo ʼuhiga mo Sesu, kae neʼe gata pē tana mahino ki te papitema ʼo Soane.” Neʼe mole ʼiloʼi e Apolose ia te papitema ʼaē ʼe fai “ ʼi te huafa ʼo te Tamai pea mo te ʼAlo pea mo te laumālie māʼoniʼoni,” ko tona fakaʼuhiga ʼi muʼa ʼo te Penikositē ʼo te taʼu 33 ʼo totatou temi, neʼe lagi ko te ʼu tisipulo ʼa Soane Patita ʼaē neʼe natou fai fakamafola age kiā ia peʼe ko te ʼu tisipulo ʼa Sesu. Logolā te faʼafai ʼaē ʼa Apolose ʼi tana fai fakamafola, kae neʼe kei ʼi ai te ʼu faʼahi maʼuhiga neʼe mole heʼeki mahino lelei ia kiai. Neʼe tokoni feafeaʼi age leva tana fakakaugā ʼaē mo tona ʼu tehina mo tuagaʼane?—Gāue 1:4, 5; 18:25; Mat. 28:19.

⁴ Ko te taumātuʼa Kilisitiano ko Akila mo Pilisika neʼe nā logo ki te fai fakamafola lototoʼa ʼaē ʼa Apolose, neʼe nā ʼave ia ia, pea neʼe nā akoʼi ki ai te tahi age ʼu puani. (Lau ia Gāue 18:24-26.) Neʼe ko he fakatuʼutuʼu ʼofa ʼaia neʼe nā fai. ʼE mahino ia, neʼe fai e Akila mo Pilisika ia te faʼahi ʼaia ʼaki he aga fakaʼeteʼete pea ʼaki hanā fia tokoni kiā ia, ʼo mole nā fai age he palalau ke hagē kiā ia ʼe nā valokiʼi tana fai fakamafola. Neʼe mole heʼeki mahino lelei pē ia ki te hisitolia ʼo te ʼuluaki kōkelekāsio Fakakilisitiano. Pea ʼe mahino ia ko Apolose neʼe loto fakafetaʼi ki tona ʼu kaumeʼa foʼou ʼaia ʼi tanā vaevae mo ia te ʼu manatu maʼuhiga ʼaia. ʼI tana kua mahino leva ki te ʼu puani ʼaia, ko Apolose neʼe “tokoni lahi” ki tona ʼu tehina ʼi Akaia pea neʼe ina fai te fakamafola lahi.—Gāue 18:27, 28.

 5. Koteā te tokoni ʼofa ʼe fai e te kau fai fakamafola e lauʼi afe, pea koteā tona ʼu fua?

⁵ Tokolahi ʼi te kōkelekāsio iā ʼaho nei, ʼe natou fakafetaʼi lahi kiā nātou ʼaē neʼe tokoni age ke natou mahino ki te Tohi-Tapu. Neʼe maʼu ai mo te ʼu fekaumeʼaʼaki tologa ʼi te kau ako pea mo nātou ʼaē ʼe natou fai tanatou ako. ʼE lahi te ʼu ʼaluʼaga, ko te tokoni ki te hahaʼi ke natou mahino ki te moʼoni, ʼe fakamaʼua ke fai he ʼu fakatuʼutuʼu mo nātou ʼaia lolotoga he ʼu māhina. Kae ko te kau fai fakamafola ʼe natou lotolelei ke natou fai te ʼu sākilifisio ʼaia heʼe mahino kiā nātou ʼe ko he gāue ʼe maʼuhiga ʼaupitō ki te maʼuli ʼo te hahaʼi. (Soa. 17:3) Pea ʼe ko he meʼa fakafiafia te sio ki te mahino ʼa te hahaʼi ki te moʼoni, mo natou maʼuliʼi, pea mo fakaʼaogaʼi tonatou maʼuli moʼo fai te finegalo ʼo Sehova!

“Neʼe Lau Tona Lelei e Te ʼu Tehina”

6, 7. (a) He koʼē neʼe filifili e Paulo ia Timoteo ke kaugā gāue mo ia? (b) Ko te ʼu faʼahi fea neʼe tokoniʼi Timoteo ke tuputupu ai?

⁶ ʼI te temi ʼaē neʼe ʼaʼahi ai e te ʼu ʼapositolo ko  Paulo pea mo Silasi te kolo ko Lisitala ʼi te lua folau fakamisionea, neʼe nā maʼu atu te tūpulaga ko Timoteo, lagi neʼe kei tamasiʼi peʼe kua taʼu 20 tupu. “Neʼe lau tona lelei e te ʼu tehina ʼo Lisitala pea mo Ikoniome.” Ko te faʼē ʼa Timoteo ia Enise, pea mo tana kui ko Loise neʼe kua nā liliu ko te ʼu fafine Kilisitiano, kae ko tana tamai neʼe mole tauhi ia kiā Sehova. (2 Tim. 1:5) Neʼe lagi feʼiloʼiʼaki Paulo mo te kiʼi fāmili ʼaia ʼi tana ʼuluaki ʼalu ʼaē ki te potu ʼaia ʼi te ʼu taʼu ki muʼa atu. Pea ʼi tana toe liliu leva ʼaenī, neʼe tokagaʼi tāfito e te ʼapositolo ia Timoteo, koteʼuhi neʼe ko he tūpulaga neʼe mole hagē ko te tahi age ʼu tūpulaga. Koia, neʼe fakagafua e te kolesi pule ke lagolago ia Timoteo ki te gāue fakamisionea ʼa Paulo.—Lau ia Gāue 16:1-3.

⁷ Neʼe lahi te ʼu ako neʼe maʼu e Timoteo mai tona kaumeʼa matuʼa ʼaia. Kae ʼi te lahi ʼaupitō ʼo tana tuputupu fakalaumālie, ki muli age neʼe feala ke fekauʼi e Paulo ia Timoteo, ʼaki he loto falala, ke ʼalu ʼo ʼaʼahi te ʼu kōkelekāsio pea ke ina fakafofoga ia ia. Lolotoga taʼu e 15 peʼe laka atu, neʼe kaugā gāue ia Timoteo mo Paulo, ko te tama ʼaē neʼe mole faʼa poto lelei pea mo lagi aga ufiufi, neʼe tuputupu ʼo aʼu ki tana liliu ko he taupau feʼaluʼaki.—Filp. 2:19-22; 1 Tim. 1:3.

8, 9. Koteā te fakalotomālohi ʼe lava foaki e te kōkelekāsio ki te kau tūpulaga? Kotou tuku mai he faʼifaʼitaki.

⁸ Tokolahi te ʼu talavou pea mo te ʼu finemui ʼi te kōkelekāsio iā ʼaho nei, ʼe lahi ʼaupitō tonatou ʼu fealagia. Kapau ʼe fakalotomālohiʼi nātou pea mo tokoni age honatou ʼu kaumeʼa ʼe natou tuku he faʼifaʼitaki lelei ʼi tanatou tauhi ʼaē kiā Sehova, ʼe feala ki te kau tūpulaga ʼaia ke natou fakahoko tanatou ʼu fakatuʼutuʼu pea mo fakahoko he ʼu maʼua e lahi age ʼi te hahaʼi ʼa Sehova. Kotou fakasiosio ʼi tokotou kōkelekāsio! ʼE kotou sio ai koa ki he ʼu tūpulaga ʼe feala ke natou hagē ko Timoteo? ʼAki takotou tokoni pea mo takotou ʼu fakalotomālohi kiā nātou ʼaia, ʼe feala hanatou liliu ʼo pioniē, Petelite, misionea, peʼe taupau feʼaluʼaki. Koteā ʼaē ʼe feala ke kotou fai moʼo tokoni kiā nātou ke natou fakahoko tanatou ʼu fakatuʼutuʼu ʼaia?

⁹ Ko Martin, ʼaē neʼe kau ki te fāmili ʼo te Petele lolotoga taʼu e 20, ʼe ina manatuʼi ʼaki he loto fakafetaʼi te tokaga ʼa te taupau feʼaluʼaki kiā ia kua hili nei kiai taʼu e 30 ʼi tanā gāue toko lua ʼi te fai fakamafola. Neʼe fakamatala fakafiafia e te taupau tana selevisi ʼaē ʼi te Petele ʼi te temi ʼaē neʼe kei tūpulaga ai. Neʼe ina fakalotomālohiʼi ia Martin ke ina vakavakaʼi peʼe feala hana lagolago ki te kautahi ʼa Sehova. Kiā Martin, ko tanā fai palalau ʼaia neʼe maʼuhiga ʼaupitō ki te ʼu tonu ʼaē neʼe ina fai ki ʼamuli. ʼAki hakotou fai palalau mo te ʼu kaumeʼa tūpulaga ki he ʼu fakatuʼutuʼu Fakateokalatike, ʼe kotou lava foaki anai kiā nātou ia te meʼa ʼaē ʼe lelei.

“Kotou Fai He ʼu Palalau Fakafīmālie Ki Te Kau Nefesi Lotovaivai”

10. Koteā ʼaē neʼe logoʼi e Epafolotito ʼi tona loto, pea koteā tona tupuʼaga?

¹⁰ Neʼe loaloaga pea mo kinakina te fagona ʼaē neʼe fai e Epafolotito mai Filipe ki Loma moʼo ʼaʼahi te ʼapositolo ko Paulo, ʼaē neʼe pilisoniʼi ʼuhi ko tana tui. Neʼe gāue ia ohagē ko he tahi neʼe ina fakafofoga ia te kau Filipe. Neʼe mole haʼu pē ia moʼo foaki age tonatou ʼu meʼa ʼofa ki te ʼapositolo, kae neʼe toe fakatuʼutuʼu ke nofo mo Paulo, ʼo tokoni ʼi he faʼahiga meʼa pē ʼe ina lavaʼi moʼo lagolago kiā Paulo ʼi tona ʼaluʼaga faigataʼa. Kae ʼi Loma, neʼe mahaki leva ia Epafolotito ʼo “teitei mate.” ʼI tana logoʼi ʼaē neʼe hagē mole ina lava fakahoko tana gāue, neʼe lotovaivai ai Epafolotito.—Filp. 2:25-27.

11. (a) He koʼē ʼe mole tonu ke tou punamaʼuli mo kapau ko ʼihi ʼi te kōkelekāsio ʼe natou lotovaivai? (b) Koteā te tokoni neʼe fai e Paulo ʼo ʼuhiga mo te ʼaluʼaga ʼo Epafolotito?

¹¹ ʼE lahi te ʼu ʼaluʼaga kehekehe ʼe feala ai ke lotomamahi te hahaʼi iā ʼaho nei. Ko te ʼu tānaki mai te Organisation mondiale de la santé (Kautahi Fakamālamanei Ki Te Maʼuli Haohaoa), mai te tokotahi ʼi te toko nima ʼo te hahaʼi ʼe feala ʼi tona maʼuli ke ina maʼu te mahaki ʼaē ko te lotovaivai. ʼE mole hao te hahaʼi ʼa Sehova mai te faʼahi ʼaia. Ko te ʼu fihifihia moʼo taupau te maʼuli fakafāmili, peʼe ko te mahaki, te lotovaivai tupu mai te ʼu vaivaiʼaga, peʼe ko he tahi age ʼu tupuʼaga ʼaē ʼe feala ke liliu ai he tahi ʼo lotovaivai. Koteā ʼaē neʼe feala ke fai e te hahaʼi ʼo Filipe moʼo tokoni kiā Epafolotito? Neʼe ʼui fēnei e Paulo: “Kotou foaki age foki kiā te ia te tali kāiga māhani ʼaē ʼi te ʼAliki ʼaki he fiafia kātoa; pea kotou haga fakamaʼuhigaʼi  te taʼi faʼahiga tagata ʼaia, he neʼe teitei mate ʼuhi ko te gāue ʼa te ʼAliki, ʼo ina meʼa noaʼi tona nefesi moʼo fakahoko kātoa te gāue ʼaē neʼe mole kotou lavaʼi maʼa ʼaku.”—Filp. 2:29, 30.

12. Koteā ʼaē ʼe ina lava fakalotofīmālie ia nātou ʼaē ʼe lotovaivai?

¹² ʼE tonu ke tou toe fakalotomālohiʼi te ʼu tehina ʼaē ʼe lotovaivai peʼe lotomamahi. ʼE lagi feala ke tou fai he ʼu palalau fakalotomālohi ʼo ʼuhiga mo tanatou tauhi ʼaē kiā Sehova. Neʼe lagi natou fai he ʼu fetogi lahi ʼi tonatou maʼuli ke natou liliu ko he ʼu Kilisitiano peʼe ke natou tauhi temi kātoa. ʼE tou mahino ki te maʼuhiga ʼo tanatou ʼu faiga ʼaia, pea ʼe tou lava fakalotomālohiʼi nātou ke natou tui ʼe toe manatu fēia mo Sehova. Kapau ko te vaivai matuʼa peʼe ko te mahaki, ʼe ina tāʼofi he ʼu Kilisitiano agatonu ke natou fai te ʼu meʼa fuli ʼaē neʼe natou lava fai ki muʼa atu, kae kei tuha pē mo nātou ke tou fakaʼapaʼapa kiā nātou ʼuhi ko te ʼu taʼu gāue ʼaē neʼe natou fakahoko. Pe koteā pē tona tupuʼaga, kae koʼenī te tokoni ʼa Sehova ki tana hahaʼi agatonu fuli: “Kotou fai he ʼu palalau fakafīmālie ki te kau nefesi lotovaivai, mo kotou lagolago kiā nātou ʼe vaivavai, pea mo kotou kātaki fualoa ki te hahaʼi fuapē.”—1 Tes. 5:14.

“Ke Kotou Fakamolemole Kiā Te Ia ʼAki He Loto Kātoa Pea Mo Fakalotofīmālieʼi”

13, 14. (a) Koteā te fakatuʼutuʼu maʼuhiga neʼe fai e te kōkelekāsio ʼo Kolonito, pea koteā tona tupuʼaga? (b) Koteā te ʼu fua lelei neʼe maʼu ʼi te fakamavae ʼo te tagata ʼaē neʼe agahala?

¹³ ʼI te kōkelekāsio Fakakilisitiano ʼo Kolonito ʼo te ʼuluaki sēkulō neʼe maʼu ai te tagata fai folonikāsio kae neʼe mole fakahemala ki tana aga ʼaia. Neʼe fakatupu kovi tana aga ki te ʼuhiga maʼa ʼo te kōkelekāsio pea māʼia mo te hahaʼi ʼo te mālama neʼe ko he aga fakaufiufi ʼaia. Koia, neʼe fakatotonu ai e Paulo ke toʼo mai ki tuʼa ia te tagata ʼaia, mai te lotolotoiga ʼo te kōkelekāsio.—1 Ko. 5:1, 7, 11-13.

¹⁴ Neʼe ʼi ai te fua lelei ʼo te fakatonutonuʼi ʼaia. Neʼe puipui ai te kōkelekāsio mai te fakahala, pea neʼe feala ai ki te tagata agahala ke mahino ki tana agahala pea ke fakahemala fakamālotoloto. Mai tona ʼaluʼaga ʼaē neʼe fakahā e te tagata tana fakahemala moʼoni ʼaki te ʼu gāue lelei neʼe ina fai, koia neʼe fakahā ai e Paulo ʼi tana lua tohi ʼaē ki te kōkelekāsio ʼaia, ʼe tonu ke toe fakahū te tagata ki te kōkelekāsio. Kae neʼe mole gata aipē, neʼe toe fakatotonu e Paulo ki te kōkelekāsio ke “fakamolemole ki te [tagata agahala ʼaia kae neʼe fakahemala] ʼaki he loto kātoa pea mo fakalotofīmālieʼi, ke ʼaua naʼa taʼomia te taʼi tagata ʼaia ʼi he faʼahiga agaaga pē ʼuhi ko tona lotomamahi ʼaupitō.”—Lau ia 2 Kolonito 2:5-8.

15. ʼE tonu ke tou feafeaʼi ki te kau agahala ʼaē kua fakahemala, pea kua toe fakahū ki te kōkelekāsio?

¹⁵ Koteā ʼaē ʼe tou lava ako mai te fakamatala ʼaenī? ʼE tou lotomamahi mokā ʼe tonu ke fakamavae he tahi ʼi te kōkelekāsio. Neʼe lagi natou fakalainoaʼi te huafa ʼo te ʼAtua pea mo ʼulihi te kōkelekāsio. Neʼe lagi natou agahala mai kiā tātou. Kae kā vakavakaʼi te faʼahi ʼaia e te ʼu  tagata ʼāfea, ʼo mulimuli ki te takitaki ʼa Sehova, pea natou fai te tonu ʼaē ke toe fakahū te tagata agahala ʼaia ki te kōkelekāsio, ʼe fakahā ai kua fakamolemole tana agahala e Sehova. (Mat. 18:17-20) ʼE mole tonu koa lā ke tou faʼifaʼitakiʼi ia te ʼAtua? ʼIo, kā tou aga fakafefeka pea kā mole tou loto fakamolemole, pea ʼe tou fakafeagai ai kiā Sehova. Moʼo lagolago ki te tokalelei pea mo te logotahi ʼo te kōkelekāsio ʼa te ʼAtua pea mo maʼu te ʼofa ʼo Sehova, ʼe mole tonu koa lā ke tou ‘fakahā totatou ʼofa’ ki te kau agahala ʼaē neʼe fakahemala moʼoni pea neʼe toe fakahū ki te kōkelekāsio?—Mat. 6:14, 15; Luka 15:7.

“ ʼE ʼAoga Ia Kiā Au”

16. He koʼē neʼe lotomamahi ia Paulo kiā Maleko?

¹⁶ Ko te tahi fakamatala ʼi te Tohi-Tapu, ʼe fakahā mai ʼe mole tonu ke tou maʼu he ʼu manatu kovi ʼo ʼuhiga mo nātou ʼaē neʼe natou fakalotomamahiʼi tātou. Ohagē ko Soane Maleko, ʼaē neʼe lotomamahi ki ai te ʼapositolo ko Paulo. ʼO feafeaʼi? ʼI te kamataʼaga ʼo te ʼuluaki folau fakamisionea ʼaē ʼa Paulo mo Palenapasi, neʼe kaugā ʼalu Maleko mo nāua. Kae ʼi te tahi temi ʼo tonatou fagona pea mole ʼiloʼi pe koteā ʼaē neʼe hoko, neʼe tuku e Soane Maleko tona ʼu kaugā fagona kae toe liliu ia ki tona ʼapi. Neʼe mamahi lahi te loto ʼo Paulo ki te tonu ʼaia neʼe fai e Maleko, koia ʼi te ʼu fakatuʼutuʼu ʼaē neʼe ina fai ki te lua fagona, neʼe hoko te fihi iā Paulo mo Palenapasi ʼo ʼuhiga mo Maleko peʼe tonu ke kaugā ʼalu mo nāua. Mai te meʼa ʼaē neʼe hoko ʼi te ʼuluaki folau, neʼe mole tali e Paulo ke ʼalu ia Maleko mo nāua.—Lau ia Gāue 13:1-5, 13; 15:37, 38.

17, 18. ʼE tou ʼiloʼi feafeaʼi neʼe fakatokatoka te fihifihia ʼaē neʼe hoko iā Paulo pea mo Maleko, pea koteā te ako ʼe tou lava maʼu mai ai?

¹⁷ ʼE hā mai, neʼe mole lotovaivai ia Maleko ʼi te mole tali ʼaē e Paulo ke ʼalu mo nāua, he neʼe hoko atu pē tana gāue fakamisionea ʼi te tahi telituale mo Palenapasi. (Gāue 15:39) Neʼe hā tana agatonu pea mo tau mo te falala, ʼi te ʼu palalau ʼaē neʼe tohi e Paulo ʼo ʼuhiga mo ia ʼi te ʼu taʼu ki muli age. Ko Paulo ʼaē kua pilisoni ʼi Loma, neʼe faitohi kiā Timoteo ke haʼu kiā te ia. ʼI te tohi pē ʼaia, neʼe ʼui fēnei e Paulo: “Toʼo ia Maleko pea ke haʼu mo ia, koteʼuhi ʼe ʼaoga ia kiā au ki te gāue.” (2 Tim. 4:11) ʼEī, neʼe ʼiloʼi e Paulo neʼe kua tuputupu ia Maleko ʼi te faʼahi fakalaumālie.

¹⁸ ʼE tou maʼu mo te ako mai te meʼa ʼaia. Neʼe fakatuputupu e Maleko ʼi tona maʼuli ia te ʼu kalitātē ʼo he tagata misionea lelei. Neʼe mole tūkia ia ʼi te mole tali ʼuluaki ʼaē e Paulo ke ʼalu mo nāua. Ko Paulo pea mo ia, neʼe ko te ʼu tagata fakalaumālie, pea neʼe mole nā tokakovi fualoa. Ki muli age neʼe fakamoʼoni ia Paulo ko Maleko neʼe ko he tokoni maʼuhiga kiā ia. Koia kā tekeʼi e te ʼu tehina te ʼu fihifihia pea mo situʼa kiai, pea ko te meʼa lelei ʼaē ʼe tonu ke natou fai ke natou hoko atu tanatou gāue pea mo haga tokoniʼi te hahaʼi ke natou tuputupu ʼi te faʼahi fakalaumālie. Ko te sioʼi ia te ʼu kalitātē ʼaē ʼi totatou ʼu tehina mo tuagaʼane, ʼe ina lagalagaʼi te kōkelekāsio.

Te Kōkelekāsio Pea Mo Koutou

19. Koteā te tokoni ʼaē ʼe feala ki te hahaʼi fuli ʼo te kōkelekāsio Fakakilisitiano ke natou fefoakiʼaki?

¹⁹ ʼI te ʼu “temi maʼuhiga ʼaupitō mo faigataʼa” ʼaenī, ʼe ʼaoga kiā koutou ia te tokoni ʼo tokotou ʼu tehina mo tuagaʼane ʼo te kōkelekāsio, ʼo toe fēia pē mo nātou. (2 Tim. 3:1) ʼE lagi mole ʼiloʼi tuʼumaʼu e te kau Kilisitiano takitokotahi ia te ʼu meʼa ʼaē ʼe tonu ke natou fai moʼo fakatokatoka te ʼu ʼaluʼaga ʼaē ʼe tau mo nātou, kae ko Sehova ʼe ina ʼiloʼi te ʼu meʼa ʼaē ʼe tonu ke fai. Pea ʼe feala ke ina fakaʼaogaʼi ni hahaʼi kehekehe ʼi te kōkelekāsio—ʼo kau ai mo koutou—moʼo tokoni ki niʼihi ke natou fai te aga ʼaē ʼe lelei. (Isa. 30:20, 21; 32:1, 2) Koia kotou faiga mālohi ke kotou muliʼi te tokoni ʼa te ʼapositolo ko Paulo! Ke kotou haga “fefakalotofīmālieʼaki pea mo kotou felagalagaʼaki, ohagē pē ko takotou fai.”—1 Tes. 5:11.

ʼE Kotou Tali Feafeaʼi Anai?

• He koʼē ʼe ʼaoga ke tou felagalagaʼaki ʼi te loto kōkelekāsio Fakakilisitiano?

• Koteā te ʼu fihifihia ʼaē ʼe kotou lava tokoni ki ʼihi ke natou tekeʼi?

• He koʼē ʼe ʼaoga ke tou maʼu te tokoni ʼa ʼihi ʼi tatatou kōkelekāsio?

[ʼU fehuʼi ʼo te ako]

[Paki ʼo te pasina 13]

Kā tau hotatou tehina mo he ʼaluʼaga faigataʼa, ʼe feala ke tou tokoni ki ai

[Paki ʼo te pasina 15]

Tokolahi te ʼu talavou pea mo te ʼu finemui ʼi te kōkelekāsio iā ʼaho nei, ʼe lahi ʼaupitō tonatou ʼu fealagia