Tou Maʼu He Fīmālie ʼi Te ʼu Gāue Fakalaumālie

“Kotou toʼo kiā koutou taku ʼakau ʼamo . . . , pea ʼe kotou maʼu anai he fīmālie ki ʼokotou nefesi.”—MAT. 11:29.

 1. Koteā ʼaē neʼe fakatuʼutuʼu e te ʼAtua ʼi te Moʼuga ʼo Sinai, pea koteā tona tupuʼaga?

 ʼI TE temi ʼaē neʼe fai ai ia te fuakava ʼo te Lao ʼi te Moʼuga ʼo Sinai, neʼe kau kiai ia te fakatuʼutuʼu ʼo te Sāpato ʼi te vāhaʼa fuli. ʼAki tana tagata fakahoko palalau ko Moisese, neʼe fakatotonu fēnei e Sehova ki te puleʼaga ʼo Iselaele: “Iā ʼaho e ono ʼe tonu ke kotou fai takotou gāue; kae ʼi te fitu ʼaho ʼe tonu ke kotou tuku takotou gāue, ke mālōlō tau vītulo pea mo tau ʼāsino pea ke mānava te tama ʼo tau fafine kaugana pea mo te matāpule ʼaē ʼe nofo mo koe.” (Eke. 23:12) ʼEī, ʼi tana manatuʼi ia nātou ʼaē neʼe fakalogo ki te Lao, neʼe fai e Sehova ia te fakatuʼutuʼu ʼofa ʼaē ke ʼi ai he ʼaho ke mālōlō ai tana hahaʼi, ke feala hanatou “mānava.”

 2. Neʼe fua lelei feafeaʼi ki te kau Iselaele tanatou mulimuli ki te Sāpato?

² Ko te Sāpato neʼe ko he ʼaho pē koa ke mālōlō ai te kau Iselaele? Kailoa, neʼe ko he koga maʼuhiga ʼo tanatou tauhi ʼaē kiā Sehova. Ko te mulimuli ʼa te ʼu pule fāmili ki te Sāpato, neʼe natou maʼu ai te temi moʼo akoʼi tonatou fāmili ke natou “taupau te ala ʼo Sehova moʼo fai te faitotonu.” (Sen. 18:19) Neʼe toe feala ai ke fakatahitahi te fāmili pea mo he ʼu kaumeʼa moʼo metitāsio ki te ʼu gāue ʼa Sehova pea mo natou fakatahitahi fakafiafia. (Isa. 58:13, 14) Ko te meʼa ʼaē ʼe maʼuhiga age, neʼe fakatā e te Sāpato te temi ʼaē kā hoko mai ai ia te fīmālie moʼoni ʼi te ʼAfio ʼa Kilisito Iā Taʼu e Afe. (Loma 8:21) Kae ʼe feafeaʼi iā ʼaho nei? Ko te kau Kilisitiano moʼoni, ʼaē ʼe natou fia ʼiloʼi ia te ʼu ala ʼo Sehova, ʼe natou lava maʼu ʼifea te fīmālie ʼaia pea mo natou maʼu feafeaʼi?

ʼE Tou Maʼu He Fīmālie ʼAki Tatatou Fakatahi Fakakilisitiano

 3. Neʼe feafeaʼi te fetokoniʼaki ʼa te ʼu ʼuluaki Kilisitiano, pea neʼe koteā tona ʼu fua?

³ Neʼe ʼui e te ʼapositolo ko Paulo ʼo ʼuhiga mo te kōkelekāsio Fakakilisitiano ʼe ko “he pou pea mo te tokoni ʼo te moʼoni.” (1 Tim. 3:15) Ko te ʼu ʼuluaki Kilisitiano neʼe natou maʼu ia he tokoni lahi ʼaki tanatou fefakalotomālohiʼaki pea mo felagalagaʼaki ʼi te ʼofa. (Efe. 4:11, 12, 16) ʼI tana nofo ʼi Efesi, neʼe lotomālohi ia Paulo ʼi te ʼolo age ʼa te hahaʼi ʼo te kōkelekāsio ʼo Kolonito ʼo fakasiosio ia ia. Kotou tokagaʼi tona malave kiā Paulo, ʼi tana ʼui fēnei: “ ʼE au fiafia ʼi te ʼomai ʼa Setefanasi mo Folotunatusi pea mo Akaikusi, . . . koteʼuhi neʼe natou fakalotomālohiʼi toku loto.” (1 Ko. 16:17, 18) ʼO toe fēia, ʼi te ʼalu ʼa Tito ki Kolonito moʼo tauhi te ʼu tehina ʼi ai, neʼe toe faitohi age ia Paulo ki te kōkelekāsio, ʼo ina ʼui fēnei: “Neʼe fīmālie tona ʼatamai ʼaki ia koutou fuli.” (2 Ko. 7:13) ʼO toe fēia iā ʼaho nei, ko te kau Fakamoʼoni ʼa Sehova ʼe natou maʼu ia he toe fīmālie lahi ʼi te ʼu tehina mo tuagaʼane fakalotomālohi.

 4. ʼE tou maʼu feafeaʼi ia te fīmālie ʼi te ʼu fono ʼo te kōkelekāsio?

⁴ Kua kotou ʼiloʼi te toe fiafia lahi ʼaē ʼe tou maʼu mai te ʼu fono ʼo te kōkelekāsio. ʼI te ʼu fono ʼaia ʼe tou “fefakalotomālohiʼaki . . . ʼo tahi lotomālohi ʼi te tui ʼa he tahi kehe.” (Loma 1:12) Ko totatou ʼu tehina mo tuagaʼane ʼe mole ko he ʼu hahaʼi ʼe tou feʼiloʼiʼaki fēia pē mo nātou. ʼE ko he ʼu kaumeʼa moʼoni, ko he ʼu hahaʼi ʼe tou ʼoʼofa ai pea mo tou fakaʼapaʼapa kiā nātou. ʼE lahi tatatou fiafia pea mo tatatou fīmālie mokā tou fakatahi tuʼumaʼu mo nātou ʼi tatatou ʼu fono.—Film. 7.

 5. ʼE tou lava fefakalotofīmālieʼaki feafeaʼi ʼi te ʼu fakatahi lalahi?

⁵ Ko te tahi fakatuʼutuʼu ʼaē ʼe tou maʼu mai ai te fīmālie, ʼe ko tatatou ʼu fakatahi lalahi ʼaē ʼe fai ʼi te taʼu fuli. ʼI te ʼu fakatahi lalahi ʼaia, ʼe mole gata pē te foaki mai ʼaē ia te ʼu vai ʼo te moʼoni mai te Folafola ʼa te ʼAtua, ia te Tohi-Tapu, kae ʼe toe feala ʼi te ʼu fakatahi ʼaia ke tou “fakafālahi” ʼi tatatou ʼu fakakaumeʼa mo niʼihi. (2 Ko. 6:12, 13) Kae ʼe feafeaʼi mo kapau ʼe tou umiuminoa pea mo faigataʼa kiā tātou hatatou fai palalau mo te hahaʼi? Ko he faʼahi ke tou lava feʼiloʼiʼaki ai mo totatou ʼu tehina mo tuagaʼane ʼe ko hatatou tokoni ki te ʼu gāue ʼi te fakatahi. ʼI  tana ʼosi tokoni ʼi te fakatahi fakamālamanei, neʼe ʼui fēnei e te tuagaʼane: “Neʼe mole au ʼiloʼi he tahi, gata pē ko toku fāmili pea mo ʼihi ʼu kaumeʼa. Kae ʼi taku tokoni ʼaē ki te fakamaʼa, neʼe au felāveʼi ai mo te ʼu tehina mo te ʼu tuagaʼane ʼe tokolahi. Neʼe ko he toe temi fakafiafia lahi!”

 6. Koteā ʼaē ʼe feala ke kotou fai ke kotou maʼu he fīmālie ʼi tokotou temi mālōlō?

⁶ Neʼe ko te agamāhani ʼa te kau Iselaele tanatou fagona ki Selusalemi moʼo tauhi ʼi te ʼu lafeti e tolu neʼe fai ʼi te taʼu fuli. (Eke. 34:23) Neʼe tonu ai ke natou tuku tanatou ʼu gāueʼaga pea mo tonatou ʼu fale koloa pea mo fagona lolotoga ni ʼu ʼaho ʼi te ʼu ala efuʼia. Kae ko tanatou hake ʼaē ki te fale lotu neʼe hoko ai ia te “toe fiafia lahi” ʼi te foaki ʼaē e nātou neʼe kau kiai ia ‘he fakavikiviki kiā Sehova.’ (2 Fkma. 30:21) Tokolahi te ʼu kaugana ʼa Sehova iā ʼaho nei ʼe natou fiafia lahi ʼi tanatou ʼolo mo tonatou fāmili ʼo mamata ki te Petele, te ʼu pilo gāue ʼa te kau Fakamoʼoni ʼa Sehova ʼaē ʼe tuʼu ovi ki tonatou ʼu kolo. ʼE feala koa ʼi tokotou temi mālōlō ke kotou fai ia te faʼahi ʼaia?

 7. (a) ʼE lava fua lelei feafeaʼi ia te ʼu kiʼi fakafiafia? (b) Koteā ʼaē ʼe tonu ke tou fai ke tou leleiʼia ai te ʼu kiʼi fakafiafia pea mo fakalotomālohi?

⁷ Ko tatatou fakatahitahi mo totatou fāmili pea mo he ʼu kaumeʼa ki he ʼu kiʼi fakafiafia, ʼe tou toe lava maʼu ai he fakalotomālohi. Neʼe tali fēnei e te Hau poto ko Salomone: “ ʼE mole he meʼa ʼe lelei age ki te tagata ʼi te meʼa ʼaenī: ke kai pea ke ʼinu pea mo ina fakasio ki tona nefesi te meʼa ʼaē ʼe lelei ʼuhi ko tana gāue kinakina.” (Tnk. 2:24) Ko te ʼu kiʼi fakafiafia ʼaia ʼe mole natou fakafīmālie pē ia te nefesi kae ʼe ina toe fakamālohiʼi totatou ʼofa ki totatou ʼu tehina ʼi tatatou feʼiloʼiʼaki lelei age ʼaē mo nātou. Ke feala hatatou manatuʼi fualoa ia te ʼu kiʼi fakafiafia ʼaia pea mo fakalotomālohi, ʼe lelei ke mole hahaʼi pea ke leʼoleʼo lelei, tāfito lā mokā ʼe fakaʼaogaʼi ai te kava.

ʼE Tou Maʼu He Fīmālie ʼAki Te Minisitelio

8, 9. (a) Kotou fakahā te kehekehe ʼo te logo ʼaē neʼe tala e Sesu pea mo ʼaē ʼa te ʼu sekelipa pea mo te kau Faliseo. (b) ʼE fua lelei feafeaʼi kiā tātou tatatou tala ia te ʼu moʼoni ʼaē ʼe tuʼu ʼi te Tohi-Tapu?

⁸ Ko Sesu neʼe faʼafai ʼi te minisitelio, pea neʼe ina fakalotomālohiʼi tana ʼu tisipulo ke natou fai fēia mo nātou. Neʼe hā lelei ia te faʼahi ʼaia ʼi tana ʼu palalau ʼaenī: “Ko te taʼukai ʼe lahi, kae ʼe tokosiʼi te kau gāue. Kotou faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.” (Mat. 9:37, 38) Ko te logo ʼaē neʼe akoʼi e Sesu neʼe fakalotofīmālie moʼoni; neʼe ko he “logo lelei.” (Mat. 4:23; 24:14) Neʼe kehe ʼaupitō ia mo te ʼu lēkula mamafa ʼaē neʼe fakamaʼua e te kau Faliseo ki te hahaʼi ke natou mulimuli kiai.—Lau ia Mateo 23:4, 23, 24.

⁹ ʼI tatatou fakamafola ia te logo ʼo te Puleʼaga ki te hahaʼi, ʼe tou fakafīmālieʼi tonatou loto pea ʼe tou toe fakatuputupu tatatou mahino pea mo tatatou fakafetaʼi ki te ʼu moʼoni ʼaē ʼe tuʼu ʼi te Tohi-Tapu. Neʼe ʼui tonu ai e te tagata fai pesalemo: “Kotou vikiviki kiā Sah, heʼe lelei ke fai he ʼu hiva maʼa totatou ʼAtua; heʼe mālie ia.” (Pes. 147:1) ʼE feala koa hakotou fakatuputupu ia tokotou fiafia ʼaki takotou palalau ʼo ʼuhiga mo Sehova ki tokotou ʼu tatau?

10. ʼE fakalogo koa te fua lelei ʼo tatatou minisitelio ki te tali ʼaē e te hahaʼi tatatou logo? Kotou fakamahino.

¹⁰ ʼE mahino ia ʼi ʼihi telituale, ko te hahaʼi ʼe natou tali lelei ia te logo ʼi ʼihi age telituale. (Lau ia Gāue 18:1, 5-8.) Kapau ʼe kotou nonofo ʼi he koga meʼa ʼe mole faʼa tali lelei ia te logo ʼo te Puleʼaga, kotou faiga ke kotou tokagaʼi tāfito ia te lelei ʼaē ʼe kotou fai ʼi te minisitelio. Kotou manatuʼi ko takotou haga tala ia te huafa ʼo Sehova ʼe mole vaʼiganoa ia. (1 Ko. 15:58) Tahi ʼaē meʼa, ʼe mole fakalogo ia te fua lelei ʼo tatatou minisitelio ki te tali ʼaē e te hahaʼi ia te logo lelei. ʼE feala ke tou tui papau ʼe tokaga anai ia Sehova ke foaki ki te hahaʼi loto faitotonu ia te fealagia ke natou logo ki te Puleʼaga.—Soa. 6:44.

ʼE Tou Maʼu He Fīmālie ʼAki Te Tauhi Fakafāmili

11. Ko te maʼua fea ʼaē neʼe foaki e Sehova ki te ʼu mātuʼa, pea ʼe lava feafeaʼi hanatou fakahoko ia te maʼua ʼaia?

¹¹ Ko te ʼu mātuʼa ʼaē ʼe natou manavasiʼi ki te ʼAtua, ʼe ko tonatou maʼua te akoʼi ʼo tanatou fānau ʼo ʼuhiga mo Sehova pea mo tona ʼu ala. (Teu. 11:18, 19) ʼU mātuʼa, ʼe kotou fakatuʼutuʼu koa he temi ke kotou akoʼi ai takotou fānau ʼo ʼuhiga mo tatatou Tamai ʼofa ʼaē ʼi selō? Moʼo tokoni atu ke kotou fakahoko ia te maʼua maʼuhiga ʼaia pea mo kotou tōkakaga ki te ʼu meʼa ʼaē ʼe ʼaoga ki tokotou fāmili, neʼe foaki atu e Sehova he ʼu tuʼuga meʼa kai fakalaumālie ʼe fakalotofīmālie ʼaki te ʼu tohi, mo te ʼu nusipepa, mo te ʼu ʼata viteo pea mo te ʼu fakamatala ʼaē neʼe puke.

12, 13. (a) ʼE feafeaʼi he lava fua lelei ki te ʼu fāmili ia te Tauhi Fakafāmili? (b) ʼE lava ʼiloʼi papau feafeaʼi e te ʼu mātuʼa ʼe maʼu e tonatou fāmili he fīmālie ʼaki te tauhi fakafāmili?

 ¹² Tahi ʼaē meʼa, ko te kalasi ʼa te tagata kaugana agatonu mo poto neʼe ina fai he ʼu fakatuʼutuʼu ke lava fai ia te Tauhi Fakafāmili ʼi te afiafi. ʼE ko he afiafi ʼi te vāhaʼa fuli ʼe fai ai te ako fakafāmili. ʼAki te fakatuʼutuʼu ʼaia, neʼe tokagaʼi e te tokolahi tanatou logotahi lelei pea mo feʼofaniʼaki lahi pea toe mālohi ai mo tanatou ʼu felōgoi ʼaē mo Sehova. Kae ʼe lava ʼiloʼi papau feafeaʼi e te ʼu mātuʼa ʼe maʼu e tonatou fāmili he fakafīmālie moʼoni ʼi te faʼahi fakalaumālie ʼaki te tauhi fakafāmili?

¹³ Ko te afiafi ʼaē ʼe fai ai te Tauhi Fakafāmili, ʼe mole tonu ke liliu ko he ʼaluʼaga ʼe fakapiko ki te fāmili peʼe mole natou fiafia ai. Tou manatuʼi, ʼe tou tauhi ki “te ʼAtua fiafia,” pea ʼe ina loto ke tou fiafia ʼi tatatou tauhi. (1 Tim. 1:11; Filp. 4:4) Ko tatatou maʼu ia he afiafi ke tou fai palalau ai ki te ʼu koloa fakalaumālie ʼi te Tohi-Tapu, ʼe ko he toe tapuakina lahi. ʼE feala ki te ʼu mātuʼa ke natou fetogi tanatou faʼahiga faiako, ʼo natou fakakaukauʼi he ʼu ʼaluʼaga ʼe kehe age ʼi tona fai māhani. Ohagē lā, ko te ʼu mātuʼa neʼe nā tuku tanā tama taʼu 10 ko Brandon, ke ina fai he fakamatala ki te kupu tāfito “He Koʼē Neʼe Fakaʼaogaʼi e Sehova Ia Te Gata Moʼo Fakatā Ia Satana?” Neʼe ʼalutahi ia te kupu ʼaia mo Brandon he neʼe ina leleiʼia ia te ʼu gata, pea neʼe ina feʼekeʼaki pe koʼē neʼe fakatatau kiā Satana. Ko ʼihi fāmili, ʼi ʼihi temi ʼe natou fai te ʼu kiʼi gaoʼi Fakatohi-tapu, ʼo natou tahi faʼifaʼitakiʼi te agaaga peʼe ko te maʼuli ʼo he tagata peʼe ko he fafine ʼi te Tohi-Tapu, peʼe natou tahi lau tana koga tohi Fakatohi-tapu, peʼe natou faʼifaʼitakiʼi he ʼaluʼaga neʼe hoko. Ko te faʼahiga fai ʼaia ʼe fakafiafia pea ʼe feala ki takotou fānau ke fia kau kiai, ke feala ke malave te ʼu pelesepeto ʼa te Tohi-Tapu ki tonatou loto. a

Kotou Tekeʼi Te ʼu Faʼahi ʼAē ʼe Feala Ke Kotou Mafasia Ai

14, 15. (a) He koʼē neʼe tuputupu ia te hoha pea mo te mole maʼu ʼo te fīmālie ʼi te ʼu ʼaho fakamuli? (b) Koteā te tahi atu faigataʼaʼia ʼe tou toe tau mo ia?

¹⁴ Ko te hoha pea mo te mole fīmālie ʼe tuputupu  ʼi te ʼu ʼaho fakamuli ʼo te tuʼu agakovi ʼaenī. Ko te mole maʼu ʼo he gāue pea mo ʼihi faigataʼa fakaekonomika ʼe hoko ki te ʼu hahaʼi e lauʼi miliona. Māʼia mo nātou ʼaē ʼe gāue, ʼe hagē kiā nātou ko te falā ʼaē ʼe natou maʼu moʼo taupau tonatou loto fale, ʼe ʼai ki he taga kofu kua pūpū, ʼo mole lahi te ʼu lelei ʼaē ʼe maʼu e tonatou fāmili. (Vakaʼi ia Asea 1:4-6.) Ko te hahaʼi politike pea mo te tahi atu ʼu takitaki ʼe hagē ʼe mole natou lava pulihi ia te agamālohi pea mo te tahi ʼu aga ʼe kovi. Tokolahi te hahaʼi ʼe natou lotovaivai ʼuhi pē ko tonatou ʼu vaivaiʼaga.—Pes. 38:4.

¹⁵ ʼE mole hao te ʼu Kilisitiano moʼoni mai te ʼu fihifihia pea mo te ʼu fakaneke ʼo te tuʼu ʼa Satana. (1 Soa. 5:19) ʼI ʼihi lakaga, neʼe toe tau mo te ʼu tisipulo ʼa Kilisito mo te tahi atu faigataʼaʼia, ʼuhi ko tanatou faiga ʼaē ke natou nonofo agatonu kiā Sehova. Neʼe ʼui fēnei e Sesu: “Kapau neʼe natou fakatagaʼi au, pea ʼe natou fakatagaʼi anai mo koutou.” (Soa. 15:20) Kae māʼia pē lā mo te temi ʼaē ʼe ‘fakatagaʼi ai tātou,’ ʼe mole ‘liʼakina tātou.’ (2 Ko. 4:9) Koteā tona tupuʼaga?

16. Koteā ʼaē ʼe feala ke tokoni mai ke tou taupau ai ia tatatou fiafia?

¹⁶ Neʼe ʼui fēnei e Sesu: “Kotou ʼomai kiā te au, ia koutou fuli ʼaē ʼe kinakina pea mo mafasia, pea ʼe au fakafīmālie anai koutou.” (Mat. 11:28) ʼI tatatou tui kātoa ki te totogi ʼaē neʼe foaki e Kilisito, kua hagē pē neʼe kua tou tuku ia tātou totonu ki te ʼu nima ʼo Sehova. ʼI tatatou fai ia te faʼahi ʼaia, ʼe tou maʼu ai ia “te mālohi ʼaē ʼe fakalaka ʼi te mālohi māhani.” (2 Ko. 4:7) Ko “te tokoni,” ʼaē ko te laumālie māʼoniʼoni ʼo te ʼAtua, ʼe lahi tana fakamālohiʼi ia tatatou tui ke tou lava kātakiʼi ia te ʼu faigataʼaʼia pea mo te ʼu mamahi ʼaē ʼe hoko mai, pea mo tou toe taupau mo tatatou fiafia.—Soa. 14:26; Sake 1:2-4.

17, 18. (a) Ko te manatu fea ʼaē ʼe tonu ke tou tōkakaga kiai? (b) Koteā ʼaē ʼe feala ke hoko mokā tou fakamaʼuhigaʼi fau ia te ʼu fakafiafia?

¹⁷ Ko te kau Kilisitiano moʼoni iā ʼaho nei ʼe tonu ke natou tōkakaga ke mole malave kiā nātou ia te manatu ʼo te mālamanei ʼo ʼuhiga mo te ʼu fakafiafia kovi. (Lau ia Efesi 2:2-5.) Kapau ʼe mole tou tōkakaga, ʼe feala ke tou tō ki “te holi ʼo te kakano, te holi ʼo te ʼu mata pea mo te fakahāhā ʼo tota ʼu koloa.” (1 Soa. 2:16) Peʼe lagi feala ke tou manatu hala, ʼe tou maʼu anai ia te fīmālie mo kapau ʼe tou fakahoko te ʼu holi ʼo te kakano. (Loma 8:6) Ohagē lā, ko ʼihi hahaʼi ʼe natou toloke mo ʼinu kava, peʼe natou sioʼi he ʼu pāki ʼo he ʼu felāveʼi fakasino heʼeʼaoga, peʼe natou fai he ʼu faigaoʼi fakamataku, peʼe ko ʼihi aga kehekehe ʼe kovi moʼo fakafiafiaʼi ʼo nātou totonu pē. ʼE fai e Satana te ʼu ‘aga fakakākā’ ke ʼui ai e te hahaʼi ʼe natou maʼu anai he fīmālie ʼaki te ʼu gāue ʼaē ʼe natou fakafiafia te kakano.—Efe. 6:11.

¹⁸ ʼE moʼoni, ʼe mole kovi te kai, mo te ʼinu, pea mo te fakafiafia lelei mokā ʼe fai fakapotopoto. Kae ʼe mole tou tuku anai ia te ʼu meʼa ʼaia ke takimuʼa ʼi totatou maʼuli. ʼE maʼuhiga ia te fakapotopoto pea mo te loto lolomi, tāfito lā ʼi te ʼu temi ʼaenī ʼe tou māʼuʼuli ai. Kapau ʼe tou haga kumi he ʼu meʼa maʼa tātou pea ʼe feala ke tou mafasia ai, ʼo feala ai ke tou liliu ʼo “taunoā peʼe heʼe fua ʼo ʼuhiga mo te ʼatamai mālama totonu ʼo totatou ʼAliki ko Sesu Kilisito.”—2 Pet. 1:8.

19, 20. ʼE tou lava maʼu feafeaʼi ia te fīmālie moʼoni?

¹⁹ Kā ʼalutahi tatatou ʼu manatu mo te ʼu lēkula ʼa Sehova, ʼe mahino ai kiā tātou ko te ʼu fakafiafia fuli pē ʼaē ʼe foaki mai e te mālamanei ʼe fakatemi pē ia. Neʼe mahino kiai Moisese, pea ʼe tonu ke tou fēia mo tātou. (Hep. 11:25) Ko te fakafīmālie moʼoni, ʼaē ʼe ina foaki ia he fiafia moʼoni mo tologa, ʼe tou maʼu ʼaki tatatou fai ia te finegalo ʼo tatatou Tamai ʼaē ʼe ʼi selō.—Mat. 5:6.

²⁰ Tou haga maʼu ia te fīmālie ʼi te ʼu gāue fakalaumālie. ʼI tatatou fai fēia, ʼe tou “liʼaki [ai] te aga heʼe fakalotu pea mo te ʼu holi ʼo te mālama, . . . ʼo tou talitali ki te ʼamanaki fakafiafia pea mo te hā fakakolōlia ʼo te ʼAtua lahi pea mo totatou Fakamaʼuli ko Kilisito Sesu.” (Tito 2:12, 13) Koia tou fakatotonu ke tou nonofo ʼi lalo ʼo te ʼakau ʼamo ʼa Sesu, ʼo tou fakalogo ki tana pule mo tana takitaki. ʼI tatatou fai te faʼahi ʼaia, ʼe tou maʼu ai anai ia te fiafia pea mo te fīmālie moʼoni!

[Nota]

ʼE Kotou Tali Feafeaʼi Anai?

• ʼE lava maʼu feafeaʼi iā ʼaho nei e te hahaʼi ʼa Sehova ia te fīmālie?

• ʼE lava feafeaʼi ki te minisitelio hana fakafīmālieʼi tātou pea mo te hahaʼi ʼaē ʼe tou palalau ki ai?

• Koteā ʼaē ʼe feala ke fai e te ʼu pule fāmili ke natou ʼiloʼi papau ai peʼe maʼu e tonatou fāmili ia te fīmālie ʼaki te tauhi fakafāmili?

• Koteā te ʼu faʼahi ʼaē ʼe feala ke tou mafasia ai fakalaumālie?

[ʼU fehuʼi ʼo te ako]

[Paki ʼo te pasina 31]

ʼI tatatou toʼo ia te ʼakau ʼamo ʼa Sesu, ʼe lahi ai te ʼu faʼahi ʼe tou maʼu ai ia te fīmālie