ʼE Fia ʼIloʼi e Te Kau Lautohi . . .

Koteā Te Manatu ʼa Te Kau Fakamoʼoni ʼa Sehova ʼo ʼUhiga Mo Te Fefioʼaki ʼa Te ʼu Lotu?

▪ Ohagē ko tona ʼui ʼi te tohi (World Christian Encyclopedia), “ ʼi te mālamanei kātoa, ko lotu kehekehe e 10 000.” ʼUhi ko te fetauʼaki ʼa te ʼu lotu ʼo tupu ai te lahi ʼo te ʼu mamahi, ʼe fiafia te hahaʼi tauhi ʼi te manatu ʼaē ke fefioʼaki te ʼu lotu. ʼE natou manatu ʼe feala ai anai ke maʼu ia te tokalelei mo te logotahi ʼi he mālamanei ʼe maveuveu.

ʼE fakalotomālohiʼi tātou ʼi te Tohi-Tapu ke tou logotahi. Neʼe fakatatau e te ʼapositolo ko Paulo te kōkelekāsio Fakakilisitiano ki te sino, ko te ʼu koga kehekehe ʼo te sino “ ʼe faʼufaʼu tahi pea mo felōgoi tahi.” (Efesi 4:16) ʼO toe fēia pē, neʼe fakalotomālohiʼi e te ʼapositolo ko Petelo tona ʼu tehina “ke [natou] maʼu fuli he manatu e tahi.”—1 Petelo 3:8.

Ko te ʼu ʼuluaki Kilisitiano neʼe natou tō lotoa ʼi he mālamanei neʼe maʼu ai te ʼu agaʼi fenua pea mo te ʼu lotu kehekehe. Kae, ʼi te faitohi ʼa Paulo ʼo ʼuhiga mo te fefioʼaki ʼa te ʼu lotu kehekehe neʼe ina fehuʼi fēnei: “Ko te vahe fea ʼaē ʼe fakatahi ai te tagata tui mo ʼaē ʼe mole tui?” Koia, neʼe ina fakatokagaʼi age ki te kau Kilisitiano “ke [natou] mavae mai te lotolotoiga ʼo nātou.” (2 Kolonito 6:15, 17) ʼE ʼiloga lelei mai ʼi te ʼu palalau ʼa te ʼapositolo ko Paulo tana fakafeagai ki te fefioʼaki ʼa te ʼu lotu. He koʼē neʼe ina fai ia te ʼu palalau ʼaia?

Neʼe fakamahino e te ʼapositolo ko te tauhi fakatahi ʼa he Kilisitiano moʼoni pea mo he tahi ʼe mole ko he Kilisitiano moʼoni, ʼe mole nā felōgoi tahi anai ʼi te faʼahi fakalaumālie. (2 Kolonito 6:14) ʼE feala pē ke tuʼutāmaki ai te tui ʼa he Kilisitiano. Ko te tuʼania ʼa Paulo neʼe hagē ko he tamai ʼe ina ʼiloʼi ko te ʼu tamaliki ʼo te kolo ʼaē ʼe nofo ai ʼe natou fai te ʼu aga ʼe kovi. ʼI te tuʼania ʼo te tamai, ʼe ina fai he ʼu fakatuʼakoi fakapotopoto ki tana fānau ʼo ʼuhiga mo te ʼu tamaliki ʼaē ʼe tonu ke gaoʼi mo nātou. ʼE mole natou leleiʼia anai te ʼu fakatuʼutuʼu ʼaia. ʼI te ʼu ʼaluʼaga ʼaia, ʼi tanatou mole gaoʼi fakatahi mo te ʼu fānau ʼaia ʼe puipui anai tana fānau mai te ʼu aga ʼaē ʼe kovi. ʼO toe fēia pē, neʼe ʼiloʼi e Paulo ko te mole fefioʼaki ʼa te kau Kilisitiano mo te tahi ʼu lotu, ʼe puipui anai nātou mai tanatou ʼu aga ʼaē ʼe kovi.

ʼI tana fai ia te faʼahi ʼaia, neʼe faʼifaʼitakiʼi e Paulo ia Sesu. Logolā neʼe tuku e Sesu te faʼifaʼitaki lahi ʼo ʼuhiga mo te kumi ʼo te tokalelei mo te hahaʼi, kae neʼe mole ina fefioʼaki tana tauhi pea mo he tahi age ʼu lotu. Neʼe lahi te ʼu kiʼi magaʼi lotu ohagē ko te lotu ʼa te kau Faliseo pea mo te kau Satuseo lolotoga te gāue fakaminisitelio ʼa Sesu ʼi te kele. ʼI tona fakahagatonu, ko te ʼu kūtuga fakalotu ʼaia neʼe natou kau fakatahi moʼo fakafeagai kiā Sesu, mo natou fonofono tona mate. ʼI te tahi age faʼahi, ko Sesu neʼe ina akoʼi tana kau tisipulo “ke natou nofo tokaga . . . ki te akonaki ʼa te kau Faliseo pea mo te kau Satuseo.”—Mateo 16:12.

ʼE feafeaʼi iā ʼaho nei? ʼE kei tonu koa ke tou mulimuli ki te fakatokaga mai ʼi te Tohi-Tapu ʼo ʼuhiga mo te fefioʼaki ʼa te ʼu lotu? ʼEī. Koteʼuhi, ko te kehekehe ʼo te ʼu tui ʼe mole feala ke logotahi ohagē pē ko te mole feala ke fefioʼaki te lolo pea mo te vai. Ohagē lā, mokā ko he hahaʼi ʼe natou ʼomai mai he ʼu lotu kehekehe ke natou fakatahitahi ʼo faikole ki te tokalelei, ko ai te ʼatua ʼaē kā natou faikole ki ai? Ko te ʼAtua koa ʼo te Tahitolu ʼo te Keletiate? Ko Brahma koa te ʼatua ʼo te kau Putisi? Ko Puta koa peʼe ko he tahi age ʼatua?

Neʼe fakakikite e te polofetā ko Mikea “ ʼi te ʼu ʼaho fakaʼosi,” ko te hahaʼi mai te ʼatu ʼu puleʼaga fuli ʼe natou ʼui fēnei anai: “Kotou ʼomai, pea ke tou hake ki te moʼuga ʼo Sehova pea ki te ʼapi ʼo te ʼAtua ʼo Sakopo; pea ʼe ina akoʼi anai kiā tātou tona ʼu ala, pea ʼe tou fia haʼele anai ʼi tona ʼu ala foufou.” (Mikea 4:1-4) Ko tona ʼu fua lelei anai ko te maʼu ʼo te tokalelei pea mo te logotahi ʼi te mālamanei kātoa, ʼe mole ʼuhi ko te fefioʼaki ʼaē ʼo te ʼu lotu, kae ʼuhi ʼaē ko te hahaʼi fuli neʼe natou tali ia te tui moʼoni pē e tahi.

[Paki ʼo te pasina 23]

Te hahaʼi ʼo te ʼu lotu lalahi ʼo te mālamanei ʼi te fono ʼo te fefioʼaki ʼa te ʼu lotu, ʼi te taʼu 2008

[Haʼuʼaga ʼo te paki]

REUTERS/Andreas Manolis