Kua Puli Koa Kiā Tātou Te Fakaʼuhiga ʼo Te Agahala?

MOLE heʼeki faʼa fualoa, neʼe logo tuʼumaʼu pē te hahaʼi lotu ki te akonaki ʼaē ʼe fai e te ʼu pātele mai muʼa, ʼo fakatokaga ʼo ʼuhiga mo te ʼu aga ʼaē neʼe higoaʼi ko te “ ʼu agahala mamafa e fitu”—te holi kovi, mo te kai fakavale, mo te kai kovi, mo te piko, mo te ʼita, mo te mānumānu pea mo te fialahi. Neʼe tautau fakamatala e te pātele ia te ʼu fua kovi ʼo te agahala pea mo ina uga te nofoʼaki ke natou fakahemala. ʼE ʼui fēnei e te tagata faitohi: “ ʼI te temi nei, ʼe mole kei talanoa ʼi te ʼu akonaki fakalotu ki te ʼu fua kovi ʼo te agahala kae ʼe natou palalau tāfito ki he ʼu faʼahi ‘ ʼe logo lelei’ ki te hahaʼi.”

Ko ʼihi hahaʼi faitohi ʼi te ʼu sulunale neʼe natou tokagaʼi ia te fetogi ʼaia. Koʼenī ʼihi palalau ʼi te ʼu palalau ʼaē neʼe tohi ʼi te ʼu sulunale:

▪ “ ʼE mole kei tou logo ki te palalau ʼo ʼuhiga mo te ʼu agaaga ʼāfea ʼo te agahala, mo te fakahemala pea mo te haofaki heʼe ko he ʼu meʼa ia kua ʼāfea, pea ʼe lahi age te fai ʼo he ʼu akonaki ʼe fia logo kiai te hahaʼi, ʼe uga nātou ke natou fakamaʼuhigaʼi ia nātou totonu pea mo manatu pē kiā nātou totonu.”—Star Beacon, Ashtabula, Ohio.

▪ “Kua hagē ia ʼe mole kei tuʼania te hahaʼi ki te agahala.”—Newsweek.

▪ “ ʼE mole kei tou fai ia te fehuʼi ʼaenī: ‘Koteā ʼaē ʼe fakamaʼua mai e te ʼAtua ke au fai,’ kae ʼe ko te fehuʼi ʼaenī ʼaē kua tou fai: ‘Koteā ʼaē ʼe feala ke fai e te ʼAtua maʼa ʼaku?’ ”—Chicago Sun-Times.

ʼI he sōsiete ʼe lanu kehekehe pea mo lahi age te ʼu aga ʼaē kua fakagafua, ʼe mole kei fia fakamāuʼi e te hahaʼi ia te ʼu aga. ʼE ʼui ʼe mole ko he aga fakaʼapaʼapa te fakamāuʼi te aga ʼa te hahaʼi. Kua hagē ia ʼe ko he agahala mamafa mokā tou fakamāuʼi ia te aga ʼa he tahi age. Koia, koʼenī te manatu ʼaē ʼe mafola: ‘Ko te meʼa ʼaē ʼe ke tui kiai ʼe feala ke tokoni atu kiā koe, kae ʼe mole ke fakamālohiʼi anai he tahi age ke manatu ohagē ko koe. Iā ʼaho nei, ʼe fakatuʼutuʼu e te hahaʼi tonatou maʼuli ʼo mulimuli ki te ʼu lēkula kehekehe ʼo te ʼu aga ʼaē ʼe tonu ke fai. ʼE mole ʼi ai he tahi ʼe feala ke ina ʼui ko ia tokotahi pē ʼaē ʼe ina ʼiloʼi ia te meʼa ʼaē ʼe lelei. Ko te ʼu aga ʼaē ʼe fai e te hahaʼi ʼe lelei pē ohagē pē ko te ʼu aga ʼaē ʼe kotou mulimuli kiai.’

Ko te faʼahiga manatu ʼaia neʼe ina fetogi ia te faʼahiga palalau ʼa te hahaʼi. Iā ʼaho nei, ko te kupu “agahala” ʼe mole kei fakaʼuhiga ia ki he meʼa ʼe kovi. Maʼa te hahaʼi tokolahi, kua fakahuahuaʼi ia. ʼE mole kei ʼui ʼo ʼuhiga mo he tokolua “ ʼe nā māʼuʼuli ʼi te agahala,” kae ʼe ʼui pē ia “ ʼe nā māʼuʼuli fakatahi.” ʼE mole kei ʼui ʼe nā “tono,” kae ʼe ʼui ia “ ʼe hala ki tuʼa.” ʼE mole kei ʼui ia “ ʼe nā fai tagata,” kae ʼe lelei age te ʼui “ko he tahi age faʼahiga maʼuli.”

ʼE mahino kua fetogi maʼa te hahaʼi te fakaʼuhiga ʼo te meʼa ʼaē ʼe “fai māhani” pea mo te meʼa ʼaē ʼe tonu ke fakatūʼā heʼe ko he “agahala.” Kae he koʼē kua fetogi ia te ʼu aga? Kua feafeaʼi te mahino ʼa te hahaʼi ki te agahala? Pea ʼe maʼuhiga koa takotou manatu ʼo ʼuhiga mo te faʼahi ʼaia?