Kotou Akoʼi Takotou Fānau

Te ʼu Tagata ʼAē Neʼe Natou Tohi ʼo ʼUhiga Mo Sesu

ʼE KOTOU leleiʼia koa hatatou lau fakatahi he ʼu fakamatala ʼo ʼuhiga mo Sesu?— a Ko ʼihi hahaʼi ʼe natou punamaʼuli ʼi te mole maʼu ʼi te Tohi-Tapu ia he tohi neʼe tohi e Sesu. Kae ko te ʼu tagata faitohi ʼo te Tohi-Tapu e toko valu, neʼe lahi te ʼu fakamatala ʼaē neʼe natou fai ʼo ʼuhiga mo ia. Ko te ʼu tagata ʼaia neʼe natou māʼuʼuli fuli ʼi te temi ʼo Sesu, pea ʼe natou fakahā mai tana ʼu faiakonaki. ʼE kotou ʼiloʼi koa te ʼu higoa ʼo te ʼu tagata ʼaia e toko valu?— Ko Mateo, mo Maleko, mo Luka pea mo Soane. Ko te tahi age ʼu tagata e toko fā, ko Petelo, mo Sake, mo Suta pea mo Paulo. Koteā ʼaē ʼe kotou ʼiloʼi ʼo ʼuhiga mo te ʼu tagata faitohi ʼaia?—

Tou ʼuluaki talanoa muʼa ʼo ʼuhiga mo te ʼu tagata faitohi e toko tolu ʼaē neʼe toe kau ʼi te ʼu ʼapositolo e toko 12 ʼa Sesu. ʼE kotou ʼiloʼi koa tonatou ʼu higoa?— Ko Petelo, mo Soane pea mo Mateo. Ko tohi e lua neʼe fai e Petelo ki tona ʼu tehina Kilisitiano. Neʼe ina fakamatala kiā nātou te ʼu gāue pea mo te ʼu palalau neʼe ina ʼiloʼi neʼe fai e Sesu. Kotou toʼo ʼi takotou Tohi-Tapu iā 2 Petelo 1:16-18, pea kotou lau te fakamatala ʼaē neʼe fai e Petelo ʼo ʼuhiga mo te ʼu meʼa ʼaē neʼe logo kiai, ʼi te palalau ʼaē ʼa Sehova ʼAtua kiā Sesu mai te lagi.—Mateo 17:5.

Ko te ʼapositolo ko Soane neʼe ina fai ia tohi e nima ʼi te Tohi-Tapu. Neʼe nofo iā tafa ʼo Sesu ʼi te taumafa fakaʼosi ʼaē neʼe kai fakatahi ai te ʼu tisipulo mo tonatou Pule. Neʼe toe nofo Soane mo Sesu ʼi Tana mate. (Soane 13:23-26; 19:26) Neʼe tohi e Soane te fakamatala e tahi ʼi te ʼu fakamatala e fā ʼaē ʼi te Tohi-Tapu ʼo te maʼuli ʼo Sesu, ʼaē ʼe fakahigoa ko te ʼu Evaselio. Neʼe ina toe tohi mo te tohi ʼo te Fakahā ʼaē neʼe foaki age e Sesu, pea mo te ʼu tohi e tolu ʼi te Tohi-Tapu ʼaē ʼe fakahigoa kiā ia. (Fakahā 1:1) Ko te tolu tagata faitohi ʼo te Tohi-Tapu ʼaē neʼe liliu ko he ʼapositolo ʼa Sesu neʼe ko Mateo. Neʼe ko te tagata tānaki tukuhau.

Ko te tahi age ʼu tagata faitohi e lua ʼo te Tohi-Tapu neʼe nā ʼiloʼi ia Sesu ʼi hona ʼaluʼaga makehe. Neʼe ko tona ʼu tehina veliveli, neʼe ko te ʼu fānau ʼa Sosefo mo Malia. (Mateo 13:55) ʼI te kamata fai fakamafola ʼa Sesu, neʼe mole nā liliu ko he ʼu tisipulo ʼa Sesu. Neʼe nā manatu neʼe kua ʼulu vale ia Sesu ʼuhi ko tana faʼafai ʼi tana fai fakamafola. (Maleko 3:21) Neʼe ko ai tona ʼu tehina ʼaia?— Ko te tahi ko Sake. Ko ia ʼaē neʼe ina tohi ia te tohi ʼo Sake ʼi te Tohi-Tapu. Pea neʼe ʼi ai mo Sutasi, ʼaē ʼe toe higoa ko Suta. Neʼe ina tohi ia te tohi ʼo Suta ʼi te Tohi-Tapu.—Suta 1.

Ko te tahi ʼu tagata e lua ʼaē neʼe nā tohi ʼo ʼuhiga mo te maʼuli ʼo Sesu ʼe ko Maleko pea mo Luka. Ko te faʼē ʼa Maleko, ia Malia, neʼe ko tona foʼi ʼapi lahi ʼi Selusalemi, neʼe fakatahitahi kiai te ʼu ʼuluaki Kilisitiano, ʼo kau kiai ia Petelo. (Gāue 12:11, 12) ʼI ni ʼu taʼu ki muʼa atu, ʼi te pō ʼaē neʼe fai ai e Sesu te taumafa fakamuli ʼo te Pāsikate mo tana ʼu ʼapositolo, neʼe lagi mulimuli ia Maleko iā nātou ʼi tanatou ʼolo ʼaē ki te ʼōloto ʼo Setesemane. ʼI te puke ʼaē ʼo Sesu, neʼe puke e te ʼu sōlia ia Maleko, kae neʼe hola ia ʼo ina tuku tona kofu tuʼa.—Maleko 14:51, 52.

Ko Luka neʼe ko he tōketā neʼe lelei tana ako, pea ʼe hā mai neʼe liliu ko he tisipulo ʼi te kua ʼosi mate ʼaē ʼa Sesu. Neʼe ina kumikumi lelei ia te maʼuli ʼo Sesu pea neʼe ina tohi ia he  fakamatala ʼe mahino lelei pea mo totonu ʼo ʼuhiga mo te maʼuli ʼo Sesu. Ki muli age, neʼe liliu ia Luka ko he kaugā gāue feʼaluʼaki mo te ʼapositolo ko Paulo pea neʼe ina toe tohi ia te tohi ʼo Gāue ʼi te Tohi-Tapu.—Luka 1:1-3; Gāue 1:1.

Ko Paulo ko te valu tagata faitohi ʼo te Tohi-Tapu ʼaē neʼe ina tohi ʼo ʼuhiga mo Sesu. Neʼe akoʼi ia ia e Kamaliele, te tagata faiako ʼiloa ʼo te lao. ʼI tana lahilahi ake mo te kau Faliseo pea mo tanatou akoʼi ia ia, ko Paulo, ʼaē neʼe higoa ʼi te temi ʼaia ko Saulo, neʼe fehiʼa ki te ʼu tisipulo ʼa Sesu pea neʼe kau ki tonatou tāmateʼi. (Gāue 7:58–8:3; 22:1-5; 26:4, 5) ʼE kotou ʼiloʼi pe neʼe feafeaʼi te ʼiloʼi e Paulo ia te moʼoni ʼo ʼuhiga mo Sesu?—

ʼI te fagona ʼaē ʼa Paulo ki Tamaso moʼo puke te ʼu tisipulo ʼa Sesu, neʼe fokifā pē kua pulagia ʼi te mālama gigila mai te lagi. Neʼe logo ki te leʼo ʼe ina fehuʼi fēnei age: “Saulo, Saulo he koʼē ʼe ke fakatagaʼi au?” Neʼe ko Sesu ʼaē neʼe palalau! Neʼe ina ʼui age kiā Paulo ke ʼalu ki Tamaso. Pea neʼe taki e Sesu tana tisipulo ko Ananiasi ke palalau mo Paulo, pea neʼe liliu ia Paulo ko he tisipulo ʼa Sesu. (Gāue 9:1-18) Ko Paulo neʼe ina tohi ia tohi e 14 ʼo te Tohi-Tapu, ʼo kamata ʼaki te tohi ʼo Loma pea hoko atu ki te tohi ʼo Hepeleo.

Neʼe kua kotou kamata lau koa te ʼu tohi ʼi te Tohi-Tapu ʼo ʼuhiga mo Sesu peʼe ko he tahi ʼaē ʼe ina lau atu?— Ko he meʼa lelei ʼaupitō kā kotou fai anai ʼi tokotou maʼuli, ʼe ko hakotou kamata atu ʼi te temi nei ʼi takotou kei tūpulaga, ke kotou ʼiloʼi te ʼu fakamatala ʼaē ʼe tuʼu ʼi te Tohi-Tapu ʼo ʼuhiga mo Sesu.

[Nota]

TE ʼU FEHUʼI:

▪ Ko ai ʼi te ʼu ʼapositolo ʼa Sesu ʼaē neʼe liliu ko he ʼu tagata faitohi ʼo te Tohi-Tapu?

▪ Ko ai te ʼu tagata faitohi e lua ʼo te Tohi-Tapu ʼaē neʼe ko te ʼu tehina ʼo Sesu?

▪ He koʼē neʼe lagi ʼiloʼi e Maleko ia Sesu, kae he koʼē neʼe mole lagi ʼiloʼi ia ia e Luka?

▪ Neʼe liliu feafeaʼi ia Paulo ko he tisipulo ʼa Sesu?

[Paki ʼo te pasina 21]

Suta

Maleko

Petelo

Mateo

Paulo

Sake

Luka

Soane