Koteā ʼAē ʼe Mātataku Kiai Te Hahaʼi Tokolahi?

“ ʼE mole tonu pē ke kotou tui ki te ʼAtua ke kotou mahino ai ʼe hoko mai anai ia he tuʼutāmaki kiā tātou.”—STEPHEN O’LEARY, KO TE POLOFESEA ʼI TE UNIVELESITE ʼO TE POTU SAUTĒ ʼO CALIFORNIE. a

ʼE KOTOU manatu tahi koa mo te ʼu palalau ʼaia? ʼI te ʼu ʼalatike ʼaenī, ʼe fakahāhā ai anai he ʼu tupuʼaga ʼo te mataku ʼa te hahaʼi ki te kā haʼu. Kae ʼe toe fakahā ai anai pe koʼē ʼe feala ke kotou falala ʼe mole molehi anai ʼi he ʼaho ia te maʼuli ʼi te kele. ʼE ʼi ai te ʼu tupuʼaga lelei ke tou falala aipē ki te kā haʼu, logolā ia te ʼu meʼa fakamataku ʼaenī ʼe hoko.

Kei mālohi pē te manatu ʼaē ki he tau fakanukeleʼea. ʼI te taʼu 2007, neʼe fai ia te fakatokaga ʼaenī ʼi te nusipepa (Bulletin of the Atomic Scientists): “Talu mai te temi ʼaē neʼe lī ifo ai ia te ʼu ʼuluaki pulu fakanukeleʼea ki Hiroshima pea mo Nagasaki, kua lahi ia te ʼu tonu fakatupu tuʼutāmaki fēia neʼe feala ke fai e te mālamanei.” Koteā te tupuʼaga ʼo te tuʼania ʼaia ʼi te mālamanei? ʼE ʼui ʼi te nusipepa ʼaia, ʼi te taʼu 2007 neʼe kei ʼi ai pē te ʼu mahafu fakanukeleʼea e 27 000 pea ko mahafu e 2 000 ʼi te ʼu mahafu ʼaia neʼe “kua feala ke fakapaʼulu ʼi he ʼu kiʼi minuta pē.” Māʼiapē lā mo kapau neʼe fakapaʼulu he ʼu mahafu ʼe mole faʼa lahi ʼi te ʼu mahafu ʼaia, ʼe ko he toe maumau lahi anai ʼe hoko!

Talu mai te taʼu ʼaia, kua siʼisiʼi ifo koa te manatu fakamataku ʼaē naʼa hoko he tau fakanukeleʼea? ʼE ʼui ʼi te tohi (SIPRI Yearbook 2009, b c) ko te ʼu fenua e nima ʼaē ʼe natou maʼu te ʼu mahafu fakanukeleʼea mālohi ʼaupitō, ʼaē ko Amelika, mo Falani, mo Lusia, mo Pilitānia pea mo Siaina, ko nātou fuli ʼaia ʼe natou “lolotoga fai te ʼu fakatuʼutuʼu ʼo te ʼu faʼahiga faʼu foʼou ʼo tanatou ʼu mahafu fakanukeleʼea peʼe natou tala ʼe ko he faʼahi kā natou fakahoko.” Kae ʼe ʼui ʼi te tohi ʼaia ʼe mole gata pē ki te ʼu fenua ʼaia ʼe natou maʼu tanatou ʼu mahafu fakanukeleʼea. Ko te hahaʼi faikumi ʼe natou fakafuafua ʼe ko te ʼu fenua ko Initia, mo Pakisitane, mo Iselaele ʼe natou tahi maʼu fuli te ʼu pulu fakanukeleʼea e 60 ki te 80. ʼE natou toe ʼui, ʼi te mālamanei ko mahafu fakanukeleʼea e 8 392 kua tokalelei, ʼo fakatalitali pē ke fakapaʼulu!

Ko te fetogi ʼo te agaaga ʼo te kele ʼe feala ke hoko ai he tuʼutāmaki. ʼE ʼui ʼi te nusipepa ʼaē neʼe kua tou  talanoa kiai ki muʼa atu, Bulletin of the Atomic Scientists, “ko te ʼu tuʼutāmaki ʼaē ʼe feala ke hoko ʼaki te ʼu fetogi ʼo te māfana ʼo te kele ʼe teitei tatau pē mo te ʼu tuʼutāmaki ʼaē ʼe feala ke hoko ʼaki te ʼu mahafu fakanukeleʼea.” Neʼe toe fai te ʼu fakatokaga fakatupu mataku fēia e te ʼu hahaʼi popoto fakaʼapaʼapaʼia, ohagē ko Stephen Hawking, ʼe ko te polofesea ʼiloa ʼi te Univelesite ʼo Cambridge, pea mo Martin Rees, Polofesea ʼo te Trinity College ʼi te Univilesite ʼo Cambridge. ʼI tanatou manatu, ko te faʼu fakavalevale ʼo te ʼu masini pea mo te ʼu fetogi ʼaē ʼe hoko ki te kele ʼuhi ko te ʼu gāue ʼa te tagata, ʼe natou fetogi ia te maʼuli ʼi te kele peʼe feala pē ke puli ai ia te mālamanei.

Ko hahaʼi e toko lauʼi miliona ʼe natou tuʼania ʼuhi ko te ʼu faifakakikite ʼo ʼuhiga mo te fakaʼosi. Kotou kumi ʼi te Neti ia te kupuʼi palalau ʼaenī: “Fakaʼosi ʼo te mālama” pea mo te taʼu “2012,” pea ʼe kotou maʼu ai anai ia te ʼu fakamatala ʼe fai ʼo ʼuhiga mo te fakaʼosi ʼaē kā hoko ʼi te taʼu ʼaia. Koteā tona tupuʼaga? Ko te kaletalio ʼāfea ʼa te hahaʼi Maya, ʼe higoa ko “te Lau Talu Mai Fualoa,” ʼe fakafuafua ʼe fakagata ʼi te taʼu 2012. Tokolahi te hahaʼi ʼe natou mātataku naʼa ko he fakaʼiloga ʼaia ʼo te fakaʼosi ʼo te mālamanei.

Tokolahi te hahaʼi lotu ʼe natou tui ʼe akoʼi ʼi te Tohi-Tapu ko totatou kele ʼe fakaʼauha anai. ʼE natou manatu ko te hahaʼi tui mo agatonu fuli pē, ʼe toʼo anai nātou ki selō, pea ko te toe ʼo te mālamanei ʼe tuku anai ke natou mamahi ʼi te kele kua maumau peʼe lī nātou ki te ʼifeli.

ʼI tona fakahagatonu, ʼe ʼui koa ʼi te Tohi-Tapu ko te kele ʼe maumauʼi kātoa anai peʼe fakaʼauha? Neʼe fai e te ʼapositolo ko Soane ia te fakatokaga ʼaenī: “ ʼAua naʼa kotou tui ki te folafola fuli ʼaē ʼe haʼu mai he laumālie, kae ke kotou ʼahiʼahiʼi te ʼu folafola ʼaē ʼe haʼu mai he laumālie ke kotou ʼiloʼi ai peʼe haʼu moʼoni mai te ʼAtua.” (1 Soane 4:1) ʼE fakalotomālohiʼi koutou ke ʼaua naʼa kotou hoko tui ki te ʼu meʼa ʼaē ʼe ʼui e te hahaʼi. He koʼē koa ʼe mole kotou ʼavahi ia he Tohi-Tapu pea mo kotou lau e koutou totonu, peʼe koteā ʼaē ʼe ʼui ai ʼo ʼuhiga mo te fakaʼosi ʼo te mālamanei? ʼE lagi kotou punamaʼuli anai ki te ʼu puani ʼaē kā kotou ʼiloʼi mai te Tohi-Tapu.

[ʼU nota]

[Haʼuʼaga ʼo te paki pasina 4]

Mushroom cloud: U.S. National Archives photo; hurricane photos: WHO/League of Red Cross and U.S. National Archives photo