ʼE Kotou Lagolago Koa Ki Te Lagalaga ʼo Takotou ʼu Fono Fakakilisitiano?

“Kā kotou fakatahitahi, . . . ke fai ia meʼa fuli moʼo fakalagalaga.”—1 KO. 14:26.

 1. ʼI te manatu ʼaē iā 1 Kolonito kāpite 14, koteā te tupuʼaga tāfito ʼo te fai ʼo te ʼu fono Fakakilisitiano?

 ‘NEʼE ko he fono fakalotomālohi ʼaupitō!’ Neʼe kua kotou logoʼi koa ʼi tokotou loto he ʼu manatu fēia mokā hili he fono ʼi te Fale ʼo Te Puleʼaga? ʼE lagi kotou ʼio anai kiai! ʼE mahino ia, ko te ʼu fono ʼo te kōkelekāsio ʼe ko he temi fakalotomālohi, pea ʼe ko he faʼahi ia ʼe mole tou punamaʼuli kiai. Ohagē pē ko te temi ʼo te ʼu ʼuluaki Kilisitiano, ʼi te temi nei ʼe fakatuʼutuʼu tāfito tatatou ʼu fono moʼo fakalotomālohiʼi ia te nofoʼaki kātoa ʼi te faʼahi fakalaumālie. Kotou fakatokagaʼi age muʼa, te haga ʼa te ʼapositolo ko Paulo ʼi tana tohi ki te kau Kolonito ʼo fakamaʼuhigaʼi te tupuʼaga tāfito ʼo te fai ʼo te ʼu fono Fakakilisitiano. ʼI te kāpite 14, ʼe ina ʼui liuliuga ai ko te ʼu koga fuli ʼo te fono ʼo te kōkelekāsio ʼe tonu ke natou fakahoko ia te fakatuʼutuʼu pē e tahi—ko “te lagalaga ʼo te kōkelekāsio.”—Lau ia 1 Kolonito 14:3, 12, 26. a

 2. (a) Koteā ʼaē ʼe feala ai ke liliu he ʼu fono ʼo fakalotomālohi ki te nofoʼaki? (b) Ko te fehuʼi fea ʼaē kā tou tali anai kiai?

² ʼE tou ʼiloʼi ko he ʼu fono ʼe fakalotomālohi ʼuhi ko te fua ʼaia ʼo te tokoni ʼa te laumālie māʼoniʼoni ʼo te ʼAtua. Koia ʼaē ʼe tou kamata ai te ʼu fono fuli ʼo te kōkelekāsio ʼaki he faikole fakamālotoloto kiā Sehova, ʼe tou kole ai ki tatatou Tamai ʼaē ʼe ʼi selō ke ina tapuakina tatatou ʼu fono ʼaki tona laumālie māʼoniʼoni. Kae ʼe tou toe ʼiloʼi foki ʼe feala ki te kōkelekāsio kātoa ke kau ki te lagalaga ʼo te polokalama ʼo te ʼu fono. Koia, koteā ʼihi faʼahi ʼe feala ke tou fai takitokotahi ke liliu moʼoni, ʼo fakafīmālie pea mo fakalotomālohi tuʼumaʼu pē ʼi te faʼahi fakalaumālie, ia te ʼu fono ʼaē ʼe fai ʼi te vāhaʼa fuli ʼi te Fale ʼo Te Puleʼaga?

 3. Koteā ʼaē ʼe maʼuhiga ai ia tatatou ʼu fono Fakakilisitiano?

³ Moʼo tali kiai, ʼe tou vakaʼi anai he ʼu faʼahi ʼo tatatou ʼu fono ʼe ʼaoga ke manatuʼi e nātou ʼaē ʼe natou takitaki te ʼu fono ʼaia. ʼE tou toe vakaʼi anai peʼe feafeaʼi ki te kōkelekāsio kātoa hana lagolago ki te ʼu fono ke liliu ko he ʼu temi ʼe fakalotomālohi ki te nofoʼaki kātoa. ʼE ʼaoga ʼaupitō ia te ʼalatike ʼaenī kiā tātou, koteʼuhi ko tatatou ʼu fono ʼe ko he ʼu fakatahitahi fakataputapu. Koia, ko tatatou kau ki te ʼu fono pea mo fai hatatou ʼu tali, ʼe ko he ʼu faʼahi maʼuhiga ʼo tatatou tauhi ʼaē kiā Sehova.—Pes. 26:12; 111:1; Isa. 66:22, 23.

Ko He Fono Moʼo Ako Te Tohi-Tapu

4, 5. Koteā ʼaē ʼe fakatuʼutuʼu tāfito kiai te Ako ʼo Te Tule Leʼo?

⁴ Ko tātou fuli ʼe tou loto ke tou maʼu ia te ʼu lelei fuli ʼo tatatou ako ʼaē ʼo Te Tule Leʼo ʼi te vāhaʼa fuli. Koia, ke tou mahino lelei ki te tupuʼaga tāfito ʼo te fai ʼaē ʼo te fono ʼaia, tou vakaʼi age muʼa he ʼu fetogi neʼe fai ʼi Te Tule Leʼo pea mo te ʼu ʼalatike ako.

⁵ Tou kamata vakaʼi age muʼa te ʼuluaki nūmelo ʼo Te Tule Leʼo Fakafalani ʼo te ʼaho 15 ʼo Sānualio 2008, neʼe ʼi ai te faʼahi makehe neʼe tā ʼi te ʼuluaki pāsina. Neʼe kotou fakatokagaʼi koa te faʼahi ʼaia? Kotou vakaʼi fakalelei ia te pāki ʼo te takafi  ʼo te nusipepa ʼaē ʼe kotou toʼo. ʼI lalo ʼo te pāki ʼo te tule leʼo, ʼe kotou sio ai anai ki te tahi pāki, ko te Tohi-Tapu ʼe tuku ava. Neʼe fai te pāki ʼaia moʼo fakahā, pe koʼē ʼe tou ako Te Tule Leʼo. Ko te nusipepa ʼaia, ʼe tokoni mai ki tatatou ako ia te Tohi-Tapu. ʼEī, ʼi te fono ʼaē ʼe tou ako ai ʼi te vāhaʼa fuli Te Tule Leʼo, ʼe “fakamatalatala” ai te Folafola ʼa te ʼAtua, pea ohagē pē ko te temi muʼa ʼo Nehemia, ʼe toe ‘fakahā aipē te fakaʼuhiga’ ʼo te Folafola.—Neh. 8:8; Isa. 54:13.

 6. (a) Ko te fetogi fea ʼaē neʼe fai ʼo ʼuhiga mo te Ako ʼo Te Tule Leʼo? (b) Koteā ʼaē ʼe tonu ke tou manatuʼi ʼo ʼuhiga mo te ʼu vaega ʼaē ke “lau”?

⁶ Neʼe fai te fetogi ʼo ʼuhiga mo te Ako ʼo Te Tule Leʼo, heʼe ko te Tohi-Tapu ʼaē ʼe tou akoʼi tāfito. ʼE lahi te ʼu vaega Tohi-Tapu ʼi te ʼu ʼalatike ako neʼe fakaʼiloga ʼaki te kupu ʼaē ke “lau.” ʼE fakalotomālohiʼi ia tātou fuli ke tou mulimuli ki te lau ʼo te ʼu vaega Tohi-Tapu ʼaia ʼi te fono, ʼo tou fakaʼaogaʼi tatatou Tohi-Tapu. (Gāue 17:11) Koteā tona tupuʼaga? Kā tou sio tonu ki te tokoni ʼa te ʼAtua ʼi tatatou Tohi-Tapu, pea ʼe malave mālohi age ki ʼotatou loto. (Hep. 4:12) Koia, ʼi muʼa ʼo te lau leʼo lahi ʼo te ʼu vaega ʼaia, ʼe tonu ki te tehina ʼaē ʼe ina takitaki te fono ke ina tuku he temi feʼauga ki te nofoʼaki ke natou kumi ia te ʼu vaega ʼaia pea mo muliʼi te ʼu vaega ʼaē ʼe lau.

Kua Lahi Age Te Temi Moʼo Fakahā Ia Tatatou Tui

 7. Koteā te faigamālie ʼe tou maʼu ʼi te temi ʼaē ʼe tou ako ai Te Tule Leʼo?

⁷ Ko te tahi fetogi neʼe fai ʼi te ʼu ʼalatike ako ʼo Te Tule Leʼo, neʼe ko tona loaloaga. ʼI te ʼu taʼu ʼaenī kua hili, kua nounou age te ʼu ʼalatike. Koia, lolotoga te Ako ʼo Te Tule Leʼo, mole kei loaloaga te temi ʼaē ki te lau ʼo te ʼu palakalafe, pea kua lahi age mo te temi ʼaē ke fai ai he ʼu tali. Kua feala ai ke kaugamālie ia nātou ʼaē ʼe natou maʼu te faigamālie ke natou fakahā ia tanatou tui ʼi muʼa ʼo te kaugamālie ʼaki hanatou tali ki te ʼu fehuʼi, peʼe natou fakamahino te ʼaoga ʼo he vaega ki totatou maʼuli, peʼe natou fai he kiʼi fakamatala moʼo fakahā te ʼaoga ʼaē ke muliʼi te ʼu pelesepeto Fakatohi-tapu, peʼe ko he tahi age faʼahiga tali. ʼE toe maʼu foki mo te temi ke talanoa ai ki te ʼu kiʼi pāki ʼaē ʼe tuʼu ʼi te ʼalatike ako.—Lau ia Pesalemo 22:22; 35:18; 40:9.

8, 9. Ko te faʼahi fea ʼaē ʼe tonu ke manatuʼi e te tehina takitaki ʼo Te Tule Leʼo?

⁸ Kae ʼe hoki lahi pē anai te temi moʼo fai te ʼu tali ʼaia mo kapau ʼe nounou te ʼu tali ʼaē ʼe fai, pea mo kapau ko te tehina ʼaē ʼe ina takitaki, ʼe mole lahi fau anai te ʼu puani ʼaē kā ina fakamahinohino lolotoga Te Tule Leʼo. Koteā ʼaē kā tokoni anai ki te tehina takitaki ʼo Te Tule Leʼo ke ina fakafuafua lelei ia te temi ʼaē ki tana ʼu fakamahinohino pea mo te ʼu tali ʼa te nofoʼaki, ke liliu te fono ʼaia ko he temi fakalotomālohi ki te nofoʼaki kātoa?

⁹ Moʼo tali kiai, tou vakaʼi ia he faʼifaʼitaki. Ko he Tule Leʼo ʼe lelei tona takitaki ʼe hagē pē anai ko he foʼi teu ʼe matalelei. ʼE faʼufaʼu he foʼi teu ʼaki he ʼu fisiʼi teu kehekehe, pea ʼe toe fēia pē ʼi te Ako ʼo Te Tule Leʼo ʼaē ʼe fai ai te ʼu tuʼuga tali kehekehe. Ohagē pē ko te kehekehe ʼaē ʼo te ʼu fisiʼi teu ʼo he foʼi teu, ʼi tonatou lalahi pea mo tonatou lanu, ʼe toe fēia mo te ʼu tali ʼaē ʼe fai lolotoga te fono, ʼe tahi ʼalu pē tona faʼahiga tali pea mo tona loaloaga. Kae ʼe feafeaʼi ki te tehina ʼaē ʼe ina takitaki te fono ʼaia? Ko tana ʼu kiʼi fakamahinohino ʼaē ʼe ina fai lolotoga Te Tule Leʼo ʼe hagē pē ia ko te ʼu kiʼi lauʼakau fuluʼi hega ʼaē ʼe hilifaki atu ki he foʼi teu. ʼE mole tapuke leva ke feafeaʼi; kae ʼe natou fakamataleleiʼi te foʼi teu. ʼO toe fēia mo te tehina ʼaē ʼe ina takitaki te fono, ʼe tonu ke ina manatuʼi ke mole lahi fau tana ʼu fakamahino, kae ke ina fakakātoa pē ia te ʼu tali fakavikiviki ʼaē ʼe fai e te kōkelekāsio. ʼIo, kā fakatahiʼi lelei ia te ʼu tali fuli ʼaē ʼe fai e te kōkelekāsio pea mo te ʼu kiʼi fakamahinohino ʼaoga ʼaē ʼe fai e te tehina takitaki, pea ʼe hagē pē anai te fono ko he foʼi teu matalelei, ʼe leleiʼia anai e te nofoʼaki kātoa.

“Tou Momoli Tuʼumaʼu Ki Te ʼAtua He Sākilifisio Fakavikiviki”

10. Neʼe fakaʼuhiga feafeaʼi e te ʼu ʼuluaki Kilisitiano ia te ʼu fono ʼo te kōkelekāsio?

¹⁰ Ko te fakamatalatala ʼaē ʼa Paulo ʼo ʼuhiga mo te ʼu fono ʼa te kau Kilisitiano ʼaē iā 1 Kolonito 14:26-33, ʼe tou mahino lelei ai pe neʼe takitaki  feafeaʼi te ʼu fakatahitahi ʼaia ʼi te ʼuluaki sēkulō. Moʼo fakamahinohino te ʼu vaega ʼaia, ʼe ʼui fēnei e te tagata fai sivi Tohi-Tapu: “Ko te faʼahi ʼaē neʼe maʼuhiga ʼaupitō ʼi te ʼu fakatahi ʼa te ʼuluaki ʼēkelesia, neʼe lagi ko te ʼiloʼi ʼaē e te hahaʼi fuli neʼe kau kiai ia tanatou maʼu ia te pilivilēsio pea mo te maʼua ʼaē ke natou foaki he meʼa ʼi te fono. Neʼe mole he tagata neʼe haʼu ki te fono ʼaki pē te manatu ʼaē ke haʼu ʼo fakalogo; kae neʼe haʼu ia ke logo ki te ʼu akonaki pea ke ina foaki mo ia he meʼa ʼi te fono ʼaia.” ʼIo, maʼa te ʼu ʼuluaki Kilisitiano ko te ʼu fono ʼo te kōkelekāsio neʼe ko he ʼu temi faigamālie moʼo fakahā ai tanatou tui.—Loma 10:10.

11. (a) Koteā ʼaē ʼe lagolago ʼaupitō ki te lagalaga ʼo te kōkelekāsio, pea koteā tona tupuʼaga? (b) Koteā te ʼu tokoni ʼaē ʼe tonu ke tou muliʼi ke lelei age tatatou ʼu tali ʼaē ʼi te ʼu fono? (Vakaʼi te nota ʼi te lalo pāsina.)

¹¹ Ko te fakahā ʼaē ʼo tatatou tui ʼi te ʼu fono, ʼe lagolago ʼaupitō ki “te lagalaga ʼo te kōkelekāsio.” ʼE mahino ia, tatau aipē peʼe ko taʼu e fia kua kotou kau ki te ʼu fono, kae ʼe kotou ʼio anai ki te ʼui ʼaē ʼe ko he meʼa fakafiafia hata fakalogo ki he ʼu tali ʼe fai e hota tehina mo tuagaʼane. ʼE fakamalave loto mokā fai e hota tehina agatonu kua matuʼa ia hana tali fakamālotoloto; ʼe kita lotomālohi ʼi he palalau lelei ʼe fai e he tagata ʼāfea lotoʼofa ʼi tana tali; pea ʼe tou toe leleiʼia mokā fai e he fānau  hana tali e ia tokotahi, ʼe ina fakahā ai ia tona ʼofa moʼoni ʼaē kiā Sehova. ʼIo, ʼaki tatatou ʼu tali, ko tātou fuli ʼe tou kau ki te lagalaga ʼaē ʼo tatatou ʼu fono Fakakilisitiano. b

12. (a) Koteā ʼaē ʼe kotou lava ako mai te ʼu faʼifaʼitaki ʼa Moisese pea mo Selemia? (b) Koteā te maʼuhiga ʼo te faikole ke feala ai hakotou tali ʼi te ʼu fono?

¹² Kae kiā nātou ʼaē ʼe aga ufiufi mo umiuminoa, ʼe lagi feala ke mata faigataʼa ʼaupitō kiā nātou he fai ʼo hanatou ʼu tali. Kapau ʼe kotou fēia, ʼe lagi ʼaoga anai ke kotou manatuʼi ʼe mole ko koutou tokotahi pē ʼaē ʼe fēia. Neʼe ʼi ai pē foki mo te ʼu kaugana agatonu ʼa te ʼAtua ohagē lā ko Moisese pea mo Selemia neʼe mole nā falala ʼe nā lava palalau ʼi muʼa ʼo te kaugamālie. (Eke. 4:10; Sel. 1:6) Kae ohagē pē ko te tokoniʼi ʼaē e Sehova ia tana ʼu kaugana ʼaia ʼo te temi muʼa ke nā fakavikiviki ia ia ʼi muʼa ʼo te kaugamālie, ʼe toe tokoni atu pē anai te ʼAtua kiā koutou ke kotou fakahoko ia takotou ʼu sākilifisio fakavikiviki. (Lau ia Hepeleo 13:15.) ʼE feafeaʼi hakotou lava maʼu te tokoni ʼa Sehova moʼo tekeʼi takotou mataku ʼaē ʼi te tali ʼi te ʼu fono? ʼUluaki, kotou teuteuʼi lelei ia takotou fono. ʼOsi ʼaia, ʼi muʼa ʼo takotou ʼolo ki te fale fono, kotou fetapa kiā Sehova pea mo kolekole ki ai ke ina foaki atu te lototoʼa ke kotou lava fai hakotou tali ʼi te fono ʼaia. (Filp. 4:6) Pea kotou falala ʼe tali atu anai e Sehova ki takotou faikole, heʼe kotou lolotoga kole te faʼahi ʼe ‘ ʼalutahi mo tona finegalo.’—1 Soa. 5:14; Taag. 15:29.

ʼE Fai Tāfito Te ʼu Fono Moʼo ‘Fakalagalaga, Mo Fakalotomālohiʼi, Pea Mo Fakafīmālieʼi’ Ia Te Kōkelekāsio

13. (a) ʼE tonu ke malave feafeaʼi tatatou ʼu fono kiā nātou ʼaē ʼi te nofoʼaki? (b) Koteā te fehuʼi ʼaē ʼe maʼuhiga makehe age ki te kau tagata ʼāfea?

¹³ ʼE ʼui e Paulo ʼe fai tāfito te ʼu fono ʼo te kōkelekāsio moʼo ‘fakalagalaga, mo fakalotomālohiʼi pea mo fakafīmālieʼi’ ia te nofoʼaki. c (1 Ko. 14:3) Koteā ʼaē ʼe feala ke fai e te ʼu tagata ʼāfea iā ʼaho nei, ke liliu ai te ʼu koga kehekehe ʼo te fono ʼo fakalotomālohiʼi pea mo fakafīmālieʼi ia tonatou ʼu tehina mo tuagaʼane? Moʼo tali kiai, tou vakaʼi age muʼa te fono neʼe takitaki e Sesu ʼi tona kua ʼosi fakatuʼuake mai te mate.

14. (a) Koteā te ʼu meʼa ʼaē neʼe hoko ʼi muʼa ʼo te fono ʼaē neʼe fai e Sesu? (b) He koʼē neʼe feala ke loto fīmālie ia te kau ʼapositolo ʼi te temi ʼaē “neʼe fakaovi age ia Sesu pea neʼe lea [age] kiā nātou”?

¹⁴ ʼUluaki, kotou fakatokagaʼi age muʼa te ʼu meʼa ʼaē neʼe hoko ʼi muʼa ʼo te fono ʼaia. ʼI muʼa atu pē ʼo te matehi ʼo Sesu, neʼe ‘liʼaki ia ia e te kau ʼapositolo kae natou feholaki,’ pea neʼe natou “mavetevete ai takitokotahi ki tona ʼapi” ohagē pē ko tona fakakikite. (Mko. 14:50; Soa. 16:32) ʼI tona kua ʼosi fakatuʼuake, neʼe fakaafe e Sesu ia tana kau ʼapositolo ʼaē neʼe kua lotovaivai ke natou māʼopoʼopo age ki te fono makehe. d Moʼo tali ki te fakaafe ʼaia, “neʼe ʼolo te toko hogofulu-mā-tahi tisipulo ki Kalilea, ki te moʼuga ʼaē neʼe ʼui age e Sesu ke natou felāveʼi kiai.” ʼI tanatou tau atu kiai, “neʼe fakaovi age ia Sesu pea neʼe lea [age] kiā nātou.” (Mat. 28:10, 16, 18) Kotou fakakaukauʼi age muʼa te fakaloto fīmālie ʼaē neʼe feala ke logoʼi e te kau ʼapositolo ʼi te temi ʼaē neʼe fai age e Sesu ia te fakaafe ʼaia kiā nātou! Koteā ʼaē neʼe talanoa kiai Sesu?

15. (a) Koteā ʼaē neʼe palalau kiai Sesu, pea ko te faʼahi fea ʼaē neʼe mole talanoa ia kiai? (b) Neʼe malave feafeaʼi te fono ʼaia ki te kau ʼapositolo?

¹⁵ Neʼe kamata e Sesu ʼaki tana palalau ʼaenī:  “Kua tuku mai kiā te au te pule kātoa.” ʼOsi ʼaia pea neʼe ina foaki age te fakatotonu ʼaenī: “Kotou ʼolo pea ke kotou fai ni ʼu tisipulo.” Ki muli age, neʼe ina foaki age leva ia te fakapapau fakalotomālohi ʼaenī: “ʼE au nofo mo koutou ʼi te ʼaho fuli pē.” (Mat. 28:18-20) Kae neʼe kotou fakatokagaʼi te faʼahi ʼaē neʼe mole fai e Sesu? Neʼe mole ina fakatonutonuʼi tana ʼu ʼapositolo; pea neʼe mole ina fakaʼaogaʼi te fono ʼaia moʼo fakavaivaiʼi tanatou ʼu faiga peʼe fakaʼāʼāsili age ia tonatou lotomamahi, ʼo talanoa ki te temi ʼaē neʼe vaivai ai tanatou tui. Neʼe mole fai e Sesu he ʼu palalau fēia, kae neʼe ina fakahā lelei age ia tona ʼofa ʼaē kiā nātou pea mo te ʼofa ʼaē ʼo tana Tamai kiā nātou, ʼo ina foaki age kiā nātou te toe gāue lahi. Neʼe malave feafeaʼi ki te kau ʼapositolo ia te palalau fēia age ʼaē ʼa Sesu kiā nātou? ʼI te lahi ʼaupitō ʼaē ʼo tonatou lotomālohi mai iā Sesu, pea mo loto fīmālie ai, hili pē te kiʼi temi ki te fono ʼaia, neʼe natou toe hoko atu ia tanatou “[faiako] pea mo tala te logo lelei ʼo ʼuhiga mo Kilisito, Sesu.”—Gāue 5:42.

16. ʼE muliʼi feafeaʼi e te ʼu tagata ʼāfea ʼo te temi ʼaenī ia te faʼifaʼitaki ʼa Sesu mokā natou takitaki te ʼu fono ke liliu ko he temi fakafīmālie ki te nofoʼaki?

¹⁶ ʼO mulimuli ki te faʼifaʼitaki ʼa Sesu, ko te ʼu tagata ʼāfea ʼo te temi ʼaenī, ʼe natou fakaʼaogaʼi te ʼu fono ko he ʼu faigamālie ʼaia moʼo fakahā fakalelei age ki tonatou ʼu tehina mo tuagaʼane ia te ʼofa ʼaupitō ʼaē ʼo Sehova ki tana hahaʼi. (Loma 8:38, 39) Koia, lolotoga te fono, ʼe talanoa tāfito ia te ʼu tagata ʼāfea ki te ʼu faʼahi ʼaē ʼe mālolohi ai ia tonatou ʼu tehina mo tuagaʼane, kae mole natou valoki ia tonatou ʼu puani vaivai. ʼE mole natou mahalohalo ʼo ʼuhiga mo te ʼu faiga ʼaē ʼo tonatou ʼu tehina mo tuagaʼane. Kae ʼi tanatou ʼu palalau, ʼe hā ai ia tanatou fakamaʼuhigaʼi ia te ʼofa ʼo tonatou ʼu tehina mo tuagaʼane ʼaē kiā Sehova pea mo tanatou fia fai ia te meʼa ʼaē ʼe lelei. (1 Tes. 4:1, 9-12) ʼIo, ʼi ʼihi temi ʼe lagi ʼaoga anai ke fakatonutonuʼi e te ʼu tagata ʼāfea ia te kōkelekāsio kātoa, kae kapau ʼe ko te tokosiʼi pē ʼaē ʼe tonu ke fakatonutonuʼi, pea ʼi te agamāhani ʼe natou fai te faʼahi ʼaia mokā natou ʼāteaina pē mo te ʼu tehina mo tuagaʼane ʼaia. (Kal. 6:1; 2 Tim. 2:24-26) Kā palalau te kau tagata ʼāfea ki te kōkelekāsio kātoa, pea ʼe natou tokaga tuʼumaʼu pē ke natou vikiʼi te nofoʼaki ʼi te temi fuli pē ʼaē ʼe ʼaoga ai ke fai te faʼahi ʼaia. (Isa. 32:2) ʼE natou tōkakaga ke lave lelei ia tanatou faʼahiga palalau, ke feala ʼi te fakaʼosi ʼo te fono ʼaia ke logoʼi e te nofoʼaki kātoa neʼe fakafīmālieʼi ia nātou pea mo fakalotomālohiʼi nātou lolotoga te fono.—Mat. 11:28; Gāue 15:32.

Ko He Koga Meʼa ʼe Fakalotofīmālie

17. (a) He koʼē kua maʼuhiga tāfito age ʼi totatou temi ke liliu tatatou ʼu fono ko he koga meʼa ʼe fakalotofīmālie? (b) Koteā ʼaē ʼe kotou lava fai ke feala ai ki tatatou ʼu fono ke liliu ko he faʼahi ʼe fakatupu lotomālohi? (Vakaʼi te fakamatala ʼaē ʼe ʼātakai “Te ʼu Faʼahi e Hogofulu ʼAē ʼe Feala Ai Ke Liliu Te ʼu Fono Ko He Faʼahi ʼe Fakalotomālohi Kiā Koutou Totonu Pea Mo ʼIhi.”)

¹⁷ ʼI te kua ʼāʼāsili age ia te kovi ʼo te mālama ʼa Satana, koia ʼe tonu ai ki tatatou ʼu fono ke liliu ko he koga meʼa ʼe fakalotofīmālie ki te nofoʼaki kātoa. (1 Tes. 5:11) Ko te tuagaʼane mo tona ʼohoana neʼe nā tau mo te faigataʼaʼia lahi kua hili nei kiai te ʼu taʼu, ʼe ina ʼui fēnei: “ʼI te temi ʼaē ʼe mā nonofo ai ʼi te Fale ʼo Te Puleʼaga neʼe hagē pē ʼe puke māua e te ʼu nima ʼofa ʼo Sehova. ʼI te ʼu hola ʼaē ʼe mā nonofo ai ʼi te fale fono, ʼo fakatahi ai mo tomā ʼu tehina mo tuagaʼane fakalaumālie, ʼe mā logoʼi ʼi te temi ʼaia kua feala ke mā tuku tamā kavega kiā Sehova, pea ʼe mā logoʼi ai ia te toe fīmālie lahi ʼi ʼomā loto.” (Pes. 55:22) ʼOfa pē kiā nātou fulifuli ʼaē ʼe kau ki tatatou ʼu fono, ke natou logoʼi he fakalotomālohi fēia pea mo he fakalotofīmālie. Ke hoko moʼoni ia te faʼahi ʼaia, tou tōkakaga ʼo lagolago ki tatatou ʼu fono Fakakilisitiano ke liliu ko he faʼahi ʼe fakatupu lotomālohi.

[ʼU nota]

ʼE Kotou Tali Feafeaʼi Anai?

• Koteā ʼaē ʼe maʼuhiga ai ia tatatou ʼu fono Fakakilisitiano?

• He koʼē ʼe lagolago ki “te lagalaga ʼo te kōkelekāsio” ia te ʼu tali ʼaē ʼe fai ʼi te ʼu fono?

• Koteā te ako ʼe tou tāʼofi mai te fono ʼaē neʼe takitaki e Sesu mo tana ʼu tisipulo?

[ʼU fehuʼi ʼo te ako]

[Talanoa/Paki ʼo te pasina 30, 31]

TE ʼU FAʼAHI E HOGOFULU ʼAĒ ʼE FEALA AI KE LILIU TE ʼU FONO KO HE FAʼAHI ʼE FAKALOTOMĀLOHI KIĀ KOUTOU TOTONU PEA MO ʼIHI

Kotou teuteu fakatomuʼa. Kā kotou teuteuʼi fakatomuʼa te ʼalatike ʼaē kā tou vakaʼi fakatahi ʼi te Fale ʼo Te Puleʼaga, pea ʼe lahi age anai ia takotou fakalogo lelei ʼaē ʼi te ʼu fono pea mo malave mālohi kiā koutou.

Kotou kau tuʼumaʼu ki te ʼu fono. Kā kaugamālie he fono, pea ʼe fakalotomālohi ʼaupitō ki te nofoʼaki, koia ʼaē ʼe maʼuhiga ai ke kotou kau ki te fono.

Kotou ʼomai tautonu ki te fono. Kapau kua kotou heheka ʼi muʼa ʼo te kamata ʼo te fono, pea ʼe kotou kau anai ki te hiva ʼo te kātiko pea mo te faikole ʼaē ʼi te kamata, ʼaē ko he ʼu koga ʼo tatatou tauhi ʼaē kiā Sehova.

Kotou ʼaumai ki te fono te ʼu tohi ʼaē kā fakaʼaogaʼi. Kapau ʼe kotou ʼaumai takotou Tohi-Tapu pea mo te ʼu tohi ʼaē kā fakaʼaogaʼi, pea ʼe lelei age anai ia takotou fakalogo ki te fono pea mo mahino lelei ki te ʼu puani ʼaē kā vakaʼi ai.

ʼAua naʼa fakaleluʼi koutou e he meʼa. Ohagē lā, hoki kotou fakaʼaogaʼi ia takotou kiʼi telefoni mokā kua ʼosi te fono, ke feala ai hakotou tōkakaga ʼāteaina pē ki te ʼu meʼa ʼaē ʼe maʼuhiga age.

Fai hakotou ʼu tali. Kā lahi te ʼu tali ʼaē ʼe fai, pea ʼe lahi age mo te fakalotomālohi pea mo te lagalaga ʼaē ʼo te nofoʼaki ʼuhi ko te ʼu tali ʼaē ʼe fakahā ʼaki te tui.

Ke nounou takotou ʼu tali. ʼE fakafealagia ai ki he tokolahi ke fai hanatou ʼu tali.

Fakahoko tokotou ʼu maʼua ʼaē neʼe foaki atu. Peʼe kotou kau ki te Ako ʼo Te Minisitelio Fakateokalatike, peʼe kotou fai hakotou faʼifaʼitaki ʼi te Fono Gāue, ʼe tonu ke kotou teuteu fakalelei kiai, mo akoako fakalelei, pea kotou faiga foki ke kotou fakahoko tokotou maʼua ʼaia.

Fakamālo kiā nātou neʼe fai tali pe neʼe natou fakahoko tonatou ʼu maʼua ʼi te fono. Fakahā age kiā nātou ʼaia neʼe kau ki te ʼu koga kehekehe ʼo te fono, pe neʼe natou fai tali, takotou leleiʼia ʼaupitō ʼaē ʼo tanatou ʼu faiga.

Te aga fakakaumeʼa. Ko he ʼu fakamālo fakamālotoloto pea mo he ʼu fai palalau fakalotomālohi ʼi muʼa ʼo te fono pea ʼi te hili ʼo te fono ʼe toe lagolago aipē ki te fiafia pea mo te lelei ʼo takita kau ʼaē ki te ʼu fono.