He Koʼē Koa ʼe Fai e Te Hahaʼi Te ʼu Aga ʼAē ʼe Kovi?

ʼE ʼI AI te puani ʼe tokosiʼi te hahaʼi ʼe natou fakafihiʼi anai: ʼE mole he tahi iā tātou ʼe haohaoa, koia ʼaē ʼe tou lakahala ai pea mo tou fai ai te ʼu meʼa ʼaē ʼe tou fakahemala ai ki ʼamuli. Kae ʼe ko te tupuʼaga koa ʼaia ʼo te mafola ʼo te ʼu aga ʼaē ʼe kovi ʼaē ʼe lalahi pea mo liliki ʼe tou sio pea mo logo tonu kiai ʼi te teitei ʼaho fuli pē, peʼe ʼi te ʼu tala logo?

Logolā te mole haohaoa ʼa te tagata, kae teitei ko te hahaʼi fuli, ʼe natou fakamoʼoni ʼe ʼi ai te ʼu tuʼakoi ʼe mole tonu ke tou fakalaka ai ʼo ʼuhiga mo te ʼu aga ʼaē ʼe tonu ke fai, pea ʼe lava teteke e te tagata te ʼu aga ʼaē ʼe kovi. ʼE toe hahaʼi foki mo nātou ʼaē ʼe natou fakamoʼoni ʼe kehekehe te fai ʼo he ʼu palalau ʼe mole moʼoni kae neʼe mole kita fakatuʼutuʼu kiai pea mo te fasituʼu ʼaki he loto kātoa, ʼo fēia pē mo te tuʼutāmaki neʼe mate ai he tahi, pea mo he faifakapō neʼe fakakaukauʼi fakatomuʼa. ʼI te agamāhani ʼe fai te ʼu faifakapō e te hahaʼi ʼaē ʼi ʼotatou tafaʼaki pea ʼe mole hagē mai ko ni ʼu hahaʼi ʼe agakovi. He koʼē koa ʼe fai e te hahaʼi te ʼu aga ʼaē ʼe kovi?

 ʼE fakamahino lelei mai ʼi te Tohi-Tapu te faʼahi ʼaia. ʼE ina fakahā lelei mai te ʼu tupuʼaga tāfito ʼo te fai e te hahaʼi te ʼu aga ʼe natou ʼiloʼi pē ʼe kovi. Tou vakaʼi age muʼa te ʼu fakamahino ʼaia.

▪ “Ko te gaohi koviʼi ʼe feala ke ina fakaliliu te tagata ʼaē ʼe poto ke vale.”—TAGATA TĀNAKI 7:7.

ʼE fakamoʼoni ʼi te Tohi-Tapu ʼi ʼihi temi ʼe logoʼi e te hahaʼi ʼe fakaneke nātou e he faʼahiga ʼaluʼaga ke natou fai he aga ʼi te agamāhani ʼe mole natou fai anai. ʼE ʼi ai ʼihi ʼe natou fai ni ʼu agamālohi ʼi tanatou faiga ʼaē ki he ʼu puleʼaki ʼo ʼuhiga mo he ʼu kinakina pea mo he ʼu aga heʼe faitotonu. ʼE ʼui fēnei ʼi te tohi Urban Terrorism, “ko te tupuʼaga tāfito ʼaē ʼe fai ai e he tahi he agamālohi, ʼe tupu ko tana loto fītaʼa moʼoni ʼo ʼuhiga mo te ʼu mālohi fakaekonomika, fakasōsiale pea mo fakapolitike ʼaē ʼe hagē mai ʼe mole feala hona fetogi.”

▪ “Ko te manako ki te paʼaga ʼe ko te aka ʼaia ʼo te ʼu meʼa kovi fuli.”—1 TIMOTEO 6:10.

ʼE ʼui e te hahaʼi, māʼia mo te hahaʼi agalelei ʼe natou maumauʼi te lao ʼo te fakapotopoto pea mo te aga ʼaē ʼe tonu ke fai, mo kapau ʼe foaki age hanatou falā lahi. ʼE hagē mai ʼihi hahaʼi ʼe natou agalelei mokā māui mālie tonatou maʼuli, kae ʼe fetogi leva tonatou ʼuluagaaga mokā ʼi ai he paʼaga, ʼo natou liliu leva nātou ko he ʼu hahaʼi ʼe aga fakalialia pea mo aga ʼitaʼita. Kotou fakakaukauʼi age muʼa ia te ʼu aga kovi ʼaē ʼe fai ʼuhi pē ko te mānumānu—ko te fai ʼo he ʼu palalau fakamatakutaku ke feala ke foaki age he falā, ko te kākā ʼi te ʼu tohi maʼua, ko te kaihaʼa ʼo he tahi, pea ʼo kaku ai pē lā mo he faifakapō.

▪ “Koteʼuhi neʼe mole fakahoko fakavilivili ia te tautea ki he gāue ʼe kovi, koia ʼaē kua lotomālohi ai te loto ʼo te ʼu foha ʼo te tagata ke natou fai ia te meʼa ʼaē ʼe kovi.”—TAGATA TĀNAKI 8:11.

ʼE fakahā ʼi te vaega ʼaenī, ko te agamāhani ʼa te tagata, ko te manatu ʼaē ʼe feala hakita hao mai he tūʼa mokā ko nātou ʼaē ʼe nonofo mo he tuʼulaga ʼe mole natou nonofo tōkakaga. ʼE hoko moʼoni te faʼahi ʼaia ki te hahaʼi ʼaē ʼe natou fakalele gaholo tanatou motokā ʼi te ala lahi, mo nātou ʼe kākā ʼi te ʼu sivi, mo nātou ʼe natou kaihaʼa te paʼaga ʼo te puleʼaga, pea mo ʼihi atu aga ʼe kovi age. Kā mole ʼi ai he leʼoleʼo ʼe fai ʼaki te lao, peʼe mokā mole tuʼania te hahaʼi naʼa maʼutokā nātou, ko te hahaʼi ʼaē ʼi te agamāhani ʼe natou mulimuli lelei ki te lao, ʼe hagē leva ia kua natou lotomālohi ke natou fai he aga ʼi te agamāhani ʼe mole natou fai anai. ʼE tohi fēnei ʼi te nusipepa Arguments and Facts, “ko te hahaʼi ʼaē ʼi te agamāhani ʼe natou agalelei, ʼe natou fia fai te ʼu aga ʼe kovi age ʼuhi pē ko te faigafua noa pē ki te hahaʼi agakovi hanatou hao mai honatou fakatuʼā.”

▪ “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi ʼo ia totonu. Pea ko te holi, kā fakatupu, pea ʼe ina fānauʼi te agahala.”—SAKE 1:14, 15.

Ko te hahaʼi fuli pē ʼe feala ke natou maʼu he ʼu fakakaukau ʼe kovi. ʼI te ʼaho fuli, ʼe mole lauʼia te hoko mai kiā tātou te ʼu fakaneke pea mo te ʼu faifakahala ke tou fai te aga ʼaē ʼe kovi. ʼI te temi muʼa, neʼe ʼui fēnei ki te kau Kilisitiano: “ ʼE mole he fakahala kua hoko kiā koutou ka mole heʼeki hoko ki he tagata.” (1 Kolonito 10:13) Kae ʼe fakalogo pē te ʼikuʼaga ʼo totatou maʼuli ki te meʼa ʼaē kua tou filifili ke kita fai—peʼe tou tekeʼi fakavilivili te ʼu fakakaukau kovi ʼaia peʼe tou haga taupau pea mo tuku ke tuputupu. ʼE fakatokagaʼi mai ʼi te vaega ʼaia ʼo te tohi ʼa Sake, kā kita tuku he holi ʼe  kovi ke “fakatupu,” pea ʼe ʼiku papau ia ki he ʼu aga ʼe kovi.

▪ “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kiā ia.”—TĀʼAGA LEA 13:20.

Ke ʼaua naʼa tou meʼa noaʼi te faʼahi ʼaenī: ko tatatou ʼu fakakaugā ʼe feala ke malave ki totatou maʼuli, ki te faʼahi ʼaē ʼe lelei peʼe ki te faʼahi ʼaē ʼe kovi. Ko te meʼa ʼaē ʼe tautau hoko, ko te hahaʼi ʼe natou fai te meʼa ʼaē neʼe mole natou ʼamanaki kiai—pea ʼe hoko te ʼu faʼahi fuli ʼaia ʼuhi pē ko te ʼu fakakaugā, peʼe ohagē ko tona ʼui e te tokolahi, ʼuhi pē he neʼe natou tō mo te fakakaugā kovi, ʼo iku ai ki tona ʼu fua kovi. ʼI te Tohi-Tapu, ko te kupu “ko te kau vale” ʼe mole fakaʼuhiga kiā nātou ʼaē ʼe mole ʼatamai, kae ʼe fakaʼuhiga ia kiā nātou ʼaē ʼe natou manukiʼi te tokoni poto ʼaē ʼe maʼu ʼi te Folafola ʼa te ʼAtua. Peʼe tou tūpulaga peʼe kua tou matuʼa, kae kapau ʼe mole tou filifili fakapotopoto totatou ʼu kaumeʼa pea mo nātou ʼaē ʼe tou fakatahi ki ai, ʼo tou kumikumi ki te ʼu pelesepeto lelei ʼa te Tohi-Tapu, ko te meʼa ʼaē kā hoko anai kiā tātou ʼe ko te “fua kovi.”

ʼE fakamahino ʼi te ʼu vaega ʼaenī pea mo te tahi ʼu vaega peʼe koʼē ko te hahaʼi—ʼaē ʼe lagi ko he ʼu hahaʼi ohagē pe ko te hahaʼi fuli—ʼe natou fai te aga ʼaē ʼe kovi, peʼe ko he ʼu aga ʼe fakamataku ʼosi. Logolā ʼe ʼaoga ke tou mahino ki te ʼu mālohi ʼaē ʼe natou fakaneke te hahaʼi ke natou fai he ʼu aga fakalialia, kae ʼe ʼi ai koa he ʼamanaki ke lelei age te maʼuli ʼi te kā haʼu? ʼEī, heʼe mole fakamahino mai pē ʼi te Tohi-Tapu pe koʼē ʼe fai e te hahaʼi te ʼu aga ʼaē ʼe kovi, kae ʼe ina toe fakapapau mai ʼe fakagata anai te ʼu taʼi aga ʼaia. Koteā te ʼu fakapapau ʼaia? ʼE ʼi ai moʼoni anai koa he ʼaho ʼe fakagata ai anai te ʼu aga kovi fuli? ʼE tou maʼu tona ʼu tali ʼi te ʼalatike ʼaē kā hoa mai.