“Ko Ai ʼAē Kua Ina Lava ʼIloʼi Te Manatu ʼa Sehova?”

“ ‘Ko ai ʼaē kua ina lava ʼiloʼi te manatu ʼa Sehova, moʼona akoʼi?’ Kae kiā tātou, ʼe tou maʼu te manatu ʼa Kilisito.”—1 KO. 2:16.

1, 2. (a) Koteā ia te faigataʼaʼia ʼe tau mo te hahaʼi tokolahi? (b) Koteā ʼaē ʼe tonu ke mole galo kiā tātou ʼo ʼuhiga mo tatatou ʼu manatu pea mo ʼaē ʼa Sehova?

 NEʼE lagi ko he meʼa faigataʼa kiā koutou hakotou mahino peʼe feafeaʼi te fakakaukau ʼa he tahi? Lagi mole heʼeki faʼa fualoa takotou kua ʼohoana, pea ʼe kotou logoʼi ʼe mole heʼeki feala hakotou mahino kātoa ki te faʼahiga fakakaukau ʼaē ʼo tokotou ʼohoana. ʼE mahino ia, ko te hahaʼi tagata pea mo te hahaʼi fafine, ʼe mole tatau ia tanatou ʼu manatu pea mo tanatou ʼu faʼahiga palalau. Pea ʼi ʼihi agaʼi fenua, logolā ko te lea pē e tahi kae ʼe palalau te hahaʼi tagata pea mo te hahaʼi fafine ki tanatou lea takitahi. ʼO hilifaki mai kiai, ko te kehekehe ʼaē ʼo te ʼu agaʼi fenua pea mo te ʼu lea ʼe fakatupu ai he ʼu faʼahiga fakakaukau pea mo he ʼu aga ʼe kehekehe. Kae kapau ʼe lahi age takotou mahino ʼaē ki te ʼuluagaaga ʼo te hahaʼi, pea ʼe toe lahi age anai mo takotou mahino ʼaē ki tanatou faʼahiga fakakaukau.

² Koia, ʼe mole tonu ai ke tou punamaʼuli ki te kehekehe ʼo tatatou manatu pea mo ʼaē ʼa Sehova. Neʼe fakakikite fēnei e Sehova ki te kau Iselaele, ʼaki tana polofetā ko Isaia: “Ko takotou ʼu manatu ʼe mole ko taku ʼu manatu, pea ko toku ʼu ala ʼe mole ko tokotou ʼu ala.” Moʼo fakamahino ia te faʼahi ʼaia, neʼe ʼui fēnei e Sehova: “Ohagē pē ko te māʼoluga ʼo te lagi ʼi te kele, ʼe toe fēia aipē mo toku ʼu ala ʼe māʼoluga age ia ʼi tokotou ʼu ala, pea mo taku ʼu manatu ʼi takotou ʼu manatu.”—Isa. 55:8, 9.

 3. Koteā te ʼu faʼahi e lua ʼe feala ai ke tou fai ke tou “kaumeʼa mo Sehova”?

³ Kae ko tona fakaʼuhiga koa ʼe mole tonu ke tou kumi ke tou ʼiloʼi peʼe feafeaʼi te faʼahiga fakakaukau ʼaē ʼa Sehova? Kailoa ia, ʼe tou lava fai pē ia te faʼahi ʼaia, heʼe logolā tatatou mole mahino kātoa anai ʼi he temi ki te ʼu manatu fuli ʼaē ʼa Sehova, kae ʼi te Tohi-Tapu ʼe fakalotomālohiʼi tātou ke tou “kaumeʼa mo Sehova.” (Lau ia Pesalemo 25:14; Tāʼaga Lea 3:32.) Ko te faʼahi ʼaē ʼe feala ke tou fai ke tou fakaovi ai kiā Sehova, ʼe ko hatatou fia kumi pea mo ʼiloʼi ia tana ʼu gāue ohagē ko tona fakahā mai ʼi tana Folafola, te Tohi-Tapu. (Pes. 28:5) Ko te tahi faʼahi ʼe feala ke tou fai, ʼe ko hatatou kumi ke tou ʼiloʼi ia “te manatu ʼa Kilisito,” ia ia ʼaē ko “te pāki ʼo te ʼAtua fakapulipuli.” (1 Ko. 2:16; Kol. 1:15) Kā tou toʼo he temi ke tou ako ia te ʼu fakamatala ʼo te Tohi-Tapu pea mo metitāsioʼi, ʼe tou kamata mahino ai ki te ʼu kalitātē ʼo Sehova pea mo tana faʼahiga fakakaukau.

Kotou Tōkakaga Ki Te Aga ʼAē ʼe Kovi

4, 5. (a) Koteā te aga ʼaē ʼe kovi ʼe tonu ke tou tōkakaga kiai? Kotou fakamahino. (b) Koteā te faʼahiga manatu kovi neʼe maʼu e te kau Iselaele?

⁴ Kā tou metitāsioʼi ia te ʼu gāue ʼaē ʼa Sehova, tou tōkakaga naʼa tou valokiʼi te ʼAtua ʼaki pē tatatou ʼu manatu fakatagata. ʼE talanoa ki te taʼi aga ʼaia ʼi te ʼu palalau ʼaē neʼe fai e Sehova iā Pesalemo 50:21: “ ʼI tau manatu ʼe au hagē anai ko koe.” ʼE hagē pē ko tona ʼui fēnei e te tagata sivi Tohi-Tapu kua hili nei kiai taʼu e 175: “ ʼE vave pē te hahaʼi ʼi tanatou valoki ʼaē ia te ʼAtua, pea mo ʼui ʼaē ʼe tonu ki te ʼAtua ke ina muliʼi ia te ʼu lao ʼaē ʼe natou fakalogo kiai.”

⁵ Tou tōkakaga naʼa tou faʼufaʼu tatatou mahino ki te ʼuluagaaga ʼo Sehova ke hagē pē ko tatatou ʼu lēkula pea mo te ʼu meʼa ʼaē ʼe tou loto kiai. He koʼē ʼe maʼuhiga ke ʼaua naʼa tou fai te faʼahi ʼaia? ʼI tatatou ako ia te Tohi-Tapu, ʼe hagē ia kiā tātou ko ʼihi faʼahiga fai ʼa te ʼAtua ʼe mole ʼalutahi ia mo tatatou faʼahiga faitotonu ʼaē ʼe fakatuʼakoi heʼe tou agahala. Neʼe maʼu e te kau Iselaele ʼo te temi muʼa ia te taʼi manatu ʼaia pea neʼe tupu ai leva ia tanatou mahino hala ki te ʼu gāue  ʼaē neʼe fai e Sehova maʼa nātou. Kotou tokagaʼi pe koteā ʼaē neʼe ʼui e Sehova kiā nātou: “ ʼE mahino papau ia, ʼe kotou ʼui anai: ‘Ko te ala ʼo Sehova ʼe mole hako lelei.’ Fakalelei age, kae kotou fagono, Ê ʼapi ʼo Iselaele. ʼE ko toku ala koa ʼaē ʼe mole hako lelei? ʼE mole koa lā ko ʼokotou ala ʼaē ʼe mole hako lelei?”—Esk. 18:25.

 6. Koteā te faʼahi ʼaē neʼe tonu ke mahino kiai ia Sopo, pea koteā tona ʼaoga kiā tātou ia te meʼa ʼaē neʼe hoko kiā ia?

⁶ Ko te puleʼaki ʼe lava tokoni mai ke ʼaua naʼa tou valokiʼi ia Sehova ʼaki tatatou ʼu manatu fakatagata, ʼe ko hatatou tali ia te manatu ʼaē ʼe mole tou ʼiloʼi kātoa ia meʼa fuli pea ʼi ʼihi temi ʼe tou faihala ʼaupitō. Neʼe ʼaoga kiā Sopo ke mahino ki te faʼahi ʼaia. Lolotoga te temi ʼaē neʼe fakamamahiʼi ai ia Sopo, neʼe ina tauʼi tona lotovaivai pea neʼe kua manatu fau pē ia ki tona ʼu mamahi. Neʼe kua puli ia ia te ʼu faʼahi ʼaē neʼe maʼuhiga tāfito age. Kae ko Sehova ʼaki tona ʼofa neʼe tokoni ki ai ke ʼaua naʼa gata pē tana sio ʼi te ʼu mamahi ʼaē ʼe hoko kiā ia. ʼAki te ʼu fehuʼi kehekehe e 70 ʼaē neʼe ina fai age kiā Sopo pea neʼe mole lava tali kiai, neʼe fakahā lelei age e Sehova ia te tuʼakoi ʼo te ʼu meʼa ʼaē ʼe mahino kiai Sopo. Neʼe agavaivai ia Sopo, ʼo ina fetogi tana faʼahiga manatu.—Lau ia Sopo 42:1-6.

Tou Maʼu “Te Manatu ʼa Kilisito”

 7. He koʼē ko tatatou vakaʼi ia te ʼu gāue ʼaē neʼe fai e Sesu, ʼe tokoni mai anai ke tou ʼiloʼi peʼe feafeaʼi te faʼahiga fakakaukau ʼa Sehova?

⁷ Neʼe faʼifaʼitakiʼi fakalelei e Sesu ia tana Tamai ʼi tana ʼu palalau pea mo tana ʼu gāue fuli. (Soa. 14:9) Koia, ko te vakaʼi ʼo te ʼu gāue ʼaē neʼe fai e Sesu, ʼe tokoni mai anai ke tou ʼiloʼi peʼe feafeaʼi te faʼahiga fakakaukau ʼa Sehova. (Loma 15:5; Filp. 2:5) Koia, tou vakaʼi age muʼa ia te ʼu fakamatala ʼo te ʼu Evaselio e lua.

8, 9. Ohagē ko tona fakamatala iā Soane 6:1-5, koteā te fihifihia ʼaē neʼe hoko ʼo tupu ʼaki ai ia te fai ʼaē e Sesu ia tana fehuʼi ʼaē kiā Filipo, pea he koʼē neʼe fai e Sesu te fehuʼi ʼaia?

⁸ Kotou fakakaukauʼi age muʼa ia te meʼa ʼaenī neʼe hoko, ʼi muʼa pē ʼo te ʼaho ʼo te Pāsikate ʼo te taʼu 32 ʼo totatou temi. Neʼe mole heʼeki faʼa fualoa ia te liliu mai ʼa te ʼu ʼapositolo ʼa Sesu mai tanatou fai fakamafola fakaofoofo ʼi Kalilea. ʼI tanatou kua gaʼegagaʼe ʼuhi ko te toe gāue lahi ʼaia neʼe natou fai, neʼe ʼave leva e Sesu ia nātou ki te koga meʼa lāvaki ʼe tuʼu ʼi te kauvai ʼo te potu noleto ʼo te Tai ʼo Kalilea. Kae neʼe muliʼi nātou e te hahaʼi tokolahi ki te koga meʼa ʼaia. ʼI te kua ʼosi fakamālōlō e Sesu ia te hahaʼi tokolahi ʼaia pea mo akoʼi age kiā nātou ia te ʼu meʼa ʼe lahi ʼaupitō, neʼe hoko leva te fihifihia. ʼE maʼu feafeaʼi anai e te hahaʼi tokolahi ʼaia hanatou meʼa kai ʼi te koga meʼa lāvaki ʼaia? ʼI tana mahino ki te ʼaluʼaga ʼaia, neʼe fehuʼi fēnei age e Sesu kiā Filipo ʼaē neʼe tupu ʼi te kolo ʼaia: “Kofea ʼaē kā tou ʼolo anai kiai ʼo totogi mai ai he ʼu pane ke feala te kakai ʼa nātou ʼaenī?”—Soa. 6:1-5.

⁹ He koʼē neʼe fai e Sesu ia te fehuʼi ʼaia kiā Filipo? Neʼe tuʼaniaʼi koa e Sesu ʼo ʼuhiga mo te meʼa ʼaē ʼe tonu ke fai? Kailoa ia. Neʼe koteā te fakaʼuhiga moʼoni ʼo te manatu ʼa Sesu? ʼE fakamahino fēnei e te ʼapositolo ko Soane, ʼaē mo ia pē foki neʼe nofo ʼi ai: “Neʼe . . . ʼui [e Sesu] te faʼahi ʼaia moʼo  ʼahiʼahiʼi ʼo [Filipo], he neʼe ʼiloʼi ia e ia totonu te meʼa ʼaē kā ina fai.” (Soa. 6:6) Neʼe ʼahiʼahiʼi e Sesu ia te tui ʼa tana ʼu tisipulo. ʼI tana fai ia te fehuʼi ʼaia, neʼe loto e Sesu ke natou fakakaukauʼi peʼe feafeaʼi te fafaga ʼo te toe hahaʼi tokolahi ʼaia pea neʼe ko he faigamālie ʼaia ke natou fakahā ai ia tanatou tui ʼaē ki te lava fai e Sesu ʼo he milakulo. Kae ʼi te temi ʼaia neʼe mole natou maʼu ia te tui ʼaē ʼe feala ke ina fai he milakulo pea neʼe natou fakahā lelei ʼi te lakaga ʼaia ia tanatou mole mahino kātoa ki te ʼu meʼa ʼaē neʼe hoko. (Lau ia Soane 6:7-9.) Neʼe fakahā age ai leva e Sesu ia tana lava fai ʼaē ʼo he gāue neʼe mole natou ʼamaʼamanaki pē lā kiai. Neʼe ina fafaga fakamilakulo ia te ʼu toko lauʼi afe hahaʼi ʼaia neʼe fia kakai.—Soa. 6:10-13.

10-12. (a) He koʼē neʼe mole foimo tali e Sesu ia te kole ʼaē neʼe fai age e te fafine Keleka? Kotou fakamahino. (b) Koteā ʼaē kā tou vakaʼi ʼi te temi ʼaenī?

¹⁰ Ko te fakamatala ʼaia ʼe feala ke tokoni mai ke tou mahino pe koteā ʼaē neʼe manatu kiai ia Sesu ʼi te tahi age ʼaluʼaga. Hili pē te kiʼi temi ki tana fafaga ʼaē ia te toe hahaʼi tokolahi ʼaia, pea ʼolo ia Sesu mo tana ʼu ʼapositolo ki te potu noleto, ʼo natou fakalaka ʼi te ʼu tuʼakoi ʼo Iselaele ki te ʼu tafaʼaki ʼo Tile pea mo Sitoni. ʼI tanatou aʼu atu kiai, neʼe natou felāveʼi mo te fafine Keleka neʼe ina kolekole age kiā Sesu ke ina fakamālōlō tana taʼahine. ʼI te kamata, neʼe mole tokagaʼi e Sesu ia te fafine. Kae ʼi tana kolekole fakakinau age, neʼe ʼui fēnei age leva e Sesu kiā ia: “Tuku muʼa ke mākokona te fānau, heʼe mole lelei ke toʼo te pane ʼa te ʼu kiʼi tamaliki ʼo laku ki te ʼu kiʼi kulī.”—Mko. 7:24-27.

¹¹ He koʼē ʼi te kamata neʼe mole tali e Sesu ia te kole tokoni ʼa te fafine? Neʼe ʼahiʼahiʼi koa e Sesu ia te fafine, ohagē ko tana fai ʼaē kiā Filipo, moʼo sivisivi peʼe feafeaʼi anai ia tana aga, ʼo ina foaki ai ki te fafine ia he faigamālie ke ina fakahā ia tana tui? ʼE mole fakahā mai ʼi te Tohi-Tapu pe neʼe feafeaʼi te leʼo ʼo Sesu ʼi tana palalau ʼaē ki te fafine, kae neʼe mole lotovaivai ai te fafine. ʼI te fakaʼaogaʼi ʼaē e Sesu ia te kupusiga palalau “kiʼi kulī,” neʼe ko hana palalau fakatātā agalelei ʼaia. Koia neʼe lagi hagē ia Sesu ko he tamai peʼe ko he faʼē ʼe ina fia foaki he meʼa ʼe loto kiai hana tamasiʼi, kae mole ina foimo fakahā ia tana tali ʼo te faʼahi ʼaia, heʼe ina fia ʼahiʼahiʼi muʼa ia tana tamasiʼi, peʼe loto moʼoni ki te faʼahi ʼaē ʼe ina kole age. Tatau aipē peʼe koteā te tupuʼaga ʼo te fai ʼaē e Sesu ʼo te ʼu palalau ʼaia, kae ʼi te kua fakahā lelei age leva e te fafine ia tana tui, neʼe loto lelei ai e Sesu ke ina foaki age ia te meʼa ʼaē neʼe ina kole age ki ai.—Lau ia Maleko 7:28-30.

¹² ʼAki te ʼu fakamatala ʼaia e lua ʼo te ʼu Evaselio, ʼe tou mahino lelei ai ki “te manatu ʼa Kilisito.” Tou vakaʼi age ʼi te temi nei peʼe lava tokoni feafeaʼi mai te ʼu fakamatala ʼaia ke lelei age tatatou mahino ʼaē ki te manatu ʼa Sehova.

Te Felōgoi ʼa Sehova Mo Moisese

13. Koteā ʼaē ʼe ʼaoga ai kiā tātou ke tou ʼiloʼi peʼe feafeaʼi te faʼahiga fakakaukau ʼaē ʼa Sesu?

¹³ Kapau ʼe tou ʼiloʼi peʼe feafeaʼi te faʼahiga fakakaukau ʼaē ʼa Sesu, pea ʼe tokoni mai anai ke tou mahino ki te ʼu vaega Fakatohi-tapu ʼaē ʼe feala ke faigataʼa hatatou mahino kiai. Ohagē lā, kotou tokagaʼi ia te ʼu palalau ʼaē neʼe fai e Sehova kiā Moisese ʼi te ʼosi faʼu ʼaē e te kau Iselaele ia te pipi ʼaulo ʼo natou tauhi kiai. Neʼe ʼui fēnei e te ʼAtua: “Neʼe au sio ki te hahaʼi ʼaia pea koʼenī ia ʼe ko he hahaʼi ʼe kia fefeka. Koia ʼi te temi nei, tuku muʼa ke au fai, ke vela toku hauhau kiā nātou pea ke au fakaʼauha ia nātou, pea tuku ke au fai ke ke liliu ko he toe puleʼaga lahi.”—Eke. 32:9, 10.

14. Koteā ʼaē neʼe fai e Moisese ʼo ʼuhiga mo te ʼu palalau ʼaē ʼa Sehova?

¹⁴ ʼE toe ʼui fēnei ʼi te fakamatala: “Ko Moisese neʼe ina fakamalū ifo ia te fofoga ʼo Sehova tona ʼAtua pea mo ʼui māʼana: ‘He koʼē koa, Ê Sehova, ʼe vela anai tou hauhau ki tau hahaʼi, ʼaē neʼe ke fakahū ki tuʼa mai Esipito ʼaki he toe mālohi lahi pea mo he nima mālohi? He koʼē ʼe ʼui anai e te kau Esipito: “Neʼe ina fakamavae atu ia nātou ʼaki he fakatuʼutuʼu ʼe kovi, ke ina matehi nātou ʼi te ʼu moʼuga pea mo molehi ia nātou ʼi te fuga ʼo te kele”? Fakamaliu kehe tou hauhau pea ke ke fakahemala ki te kovi ʼaē ʼe ke fia fai ki tau hahaʼi. Manatuʼi ia Apalahamo, mo Isaake pea mo Iselaele tau ʼu kaugana, ʼaē neʼe ke fakapapau ʼe koe totonu kiā nātou, ʼi tau ʼui fēnei kiā nātou: “ ʼE au fakatuputupu anai tokotou hako ohagē ko te ʼu fetuʼu ʼo te ʼu lagi, pea ko te fenua kātoa ʼaenī neʼe au fakahā atu, ʼe au foaki anai ki tou hako, ke natou  nofoʼi moʼoni ki he ʼu temi ʼe mole ʼiloʼi hona gataʼaga.” ’ Pea neʼe fakahemala ai ia Sehova ki te kovi ʼaē neʼe ina ʼui kā ina fai ki tana hahaʼi.”—Eke. 32:11-14. a

15, 16. (a) Koteā te faigamālie neʼe maʼu e Moisese ʼi te ʼu palalau ʼaē neʼe fai e Sehova? (b) Koteā te fakaʼuhiga ʼo te ʼui ʼaē neʼe “fakahemala” ia Sehova?

¹⁵ Neʼe tāu koa ke fakatonutonuʼi e Moisese ia te manatu ʼaē ʼa Sehova? Kailoa ia! Logolā neʼe fakahā e Sehova ia te meʼa ʼaē neʼe ina fia fakahoko, kae neʼe mole ko tana fakamāu fakaʼosi ʼaia neʼe ina fakatotonu ke ina fai. ʼI tona fakahagatonu, neʼe haga ia Sehova ʼo ʼahiʼahiʼi ia Moisese, ohagē pē ko te meʼa ʼaē neʼe fai e Sesu ki muli age kiā Filipo pea mo te fafine Keleka. Neʼe ina tuku kiā Moisese he faigamālie ke ina fakahā ia tana manatu. b Neʼe fakanofo e Sehova ia Moisese ko he tagata fakafelōgoi ʼo Iselaele pea mo Ia totonu, pea neʼe fakaʼapaʼapa ia Sehova kiā Moisese ʼaē neʼe ina fakanofo ki te gāue ʼaia. ʼE ʼita anai koa Moisese? ʼE ina fakaʼaogaʼi anai koa ia te faigamālie ʼaia moʼo uga ia Sehova ke ina liʼaki ia Iselaele pea mo ina fakatupu ia he puleʼaga mālohi ʼaki ia te hōloga totonu ʼo Moisese?

¹⁶ Ko te tali ʼaē neʼe fai e Moisese neʼe hā ai ia tana tui pea mo tana falala ʼaē ki te faitotonu ʼa Sehova. Neʼe mole hā ai ia tana manatu pē ʼaē kiā ia totonu, kae neʼe tokaga tāfito ia ki te huafa ʼo Sehova. Neʼe mole loto ia ke laukoviʼi ia te huafa ʼo Sehova. Neʼe fakahā e Moisese ia tana mahino ʼaē ki “te manatu ʼa Sehova” ʼo ʼuhiga mo te faʼahi ʼaia. (1 Ko. 2:16) Neʼe koteā tona fua? Mai tona ʼaluʼaga ʼaē ko Sehova neʼe mole heʼeki ina fakatotonu ke ina fai he faʼahi fēia, koia ʼe ʼui ai ʼi te fakamatala ʼaē neʼe tohi ʼaki te laumālie māʼoniʼoni, ko Sehova neʼe “kamata fakahemala.” ʼI te lea Fakahepeleo, ko te kupusiga palalau ʼaia, ʼe feala pē ia ke fakaʼuhiga ko Sehova neʼe mole ina fakahoko ia te tautea ʼaē neʼe ina ʼui neʼe ina fia fakahoko ki te puleʼaga kātoa.

Te Felōgoi ʼa Sehova Mo Apalahamo

17. Neʼe fakahā feafeaʼi e Sehova ia tana faʼa kātaki lahi ʼi tana tokagaʼi ʼaē ia te ʼu tuʼania ʼa Apalahamo?

¹⁷ Ko te tahi faʼifaʼitaki ʼe fakahā ai peʼe feafeaʼi te haga ʼa Sehova ʼo tuku ia he faigamālie ki tana ʼu kaugana ke natou fakahā ia tanatou tui pea mo tanatou falala, ʼe tou maʼu ʼi te ʼu kolekole ʼaē neʼe fai e Apalahamo ʼo ʼuhiga mo Sotoma. ʼI te fakamatala ʼaia, neʼe fakahā e Sehova he faʼa kātaki lahi ʼi tana haga ʼaē ʼo tuku ke fakafehufehuʼi tuʼa valu ia ia e Apalahamo. ʼI te tahi fehuʼi neʼe fai e Apalahamo, neʼe ina kolekole fēnei: “ ʼE mole ko he meʼa ʼe tāu mo koe ke ke fai te aga ʼaenī, ke ke matehi fakatahi te tagata faitotonu mo ia ʼaē ʼe agakovi, ke tatau ai te tagata agatonu mo te tagata agakovi. ʼE mole ko he meʼa ʼe tāu mo koe. Ko te Tuʼi Fakamāu ʼo te kele kātoa ʼe mole ina fai anai koa te meʼa ʼaē ʼe totonu?”—Sen. 18:22-33.

18. Koteā ʼaē ʼe feala ke tou ako mai te felōgoi ʼaē ʼa Sehova mo Apalahamo?

¹⁸ Koteā ʼaē ʼe feala ke tou ako mai te fakamatala ʼaia ʼo ʼuhiga mo te manatu ʼa Sehova? Neʼe ʼaoga koa kiā Sehova ke felōgoi mo Apalahamo ke feala ai hana fai ia he tonu ʼe lelei? Kailoa ia. ʼE mahino ia, neʼe feala pē ʼi te kamata, ke ʼui age e Sehova te ʼu tupuʼaga ʼo tana fai ia te tonu ʼaia. Kae ʼaki te ʼu fehuʼi ʼaē neʼe fai age e Apalahamo, neʼe tuku e Sehova he temi kiā Apalahamo ke mahino ai ki te tonu ʼaia pea ke mahino ki Tana manatu. Neʼe toe feala ai kiā Apalahamo ke mahino ki te loloto ʼo te manavaʼofa pea mo te faitotonu ʼa Sehova. ʼEī, neʼe  felōgoi ia Sehova mo Apalahamo ohagē ko hona kaumeʼa.—Isa. 41:8; Sake 2:23.

Te ʼu Ako ʼe Tou Lava Tāʼofi Mai Ai

19. ʼE tou lava faʼifaʼitakiʼi feafeaʼi ia Sopo?

¹⁹ Koteā te ʼu ako ʼe tou lava tāʼofi ʼo ʼuhiga mo “te manatu ʼa Sehova”? ʼE tonu ke tou tuku ia te Folafola ʼa te ʼAtua ke ina takitaki tātou ʼi tatatou faʼahiga mahino ʼaē ki te manatu ʼa Sehova. ʼE mole tonu ʼi he temi ke tou fakamaʼua kiā Sehova ke mulimuli ki tatatou faʼahiga mahino ʼaē ʼe mole kātoa, pea mo tou valokiʼi ia ia ʼaki pē tatatou sio fakatagata. Neʼe ʼui fēnei e Sopo: “[Ko te ʼAtua] ʼe mole ko he tagata ohagē ko au ke au tali age kiā te ia, ke mā ʼolo fakatahi ki te fakamāuʼaga.” (Sopo 9:32) Ohagē ko Sopo, kā tou kamata mahino ki te manatu ʼa Sehova, ʼe feala pē hatatou ʼui fēnei: “Koʼenī, te ʼu tafatafa ʼo tona ʼu ala, pea koteā te muhumuhu neʼe tou logo ʼo ʼuhiga mo ia! Kae ko ai anai kā mahino ki tona mana mālohi?”—Sopo 26:14.

20. Koteā ʼaē ʼe tonu ke tou fai mo kapau ʼe tou lau ia he koga Tohi-Tapu ʼe faigataʼa hatatou mahino kiai?

²⁰ ʼI tatatou lau ia te Tohi-Tapu, koteā ʼaē ʼe tonu ke tou fai mo kapau ʼe tou lau he koga tohi ʼe faigataʼa hatatou mahino kiai, tāfito ʼo ʼuhiga mo te manatu ʼa Sehova? Kapau neʼe kua tou fai he ʼu fekumi ki te faʼahi ʼaia, kae ʼe kei faigataʼa pē hatatou mahino kiai, pea ʼe feala ke tou fakaʼuhiga ia te faʼahi ʼaia ohagē ko he ʼahiʼahiʼi ʼo tatatou falala ʼaē kiā Sehova. Kotou manatuʼi, ʼi ʼihi temi kā fai atu he ʼu palalau, ʼe ko he faigamālie ʼaia ke tou fakahā ai ia tatatou tui ʼaē ki te ʼu kalitātē ʼo Sehova. Tou fakamoʼoni ʼaki he agavaivai, ʼe mole tou mahino kiā meʼa fuli ʼe ina fai. (Tnk. 11:5) ʼE tou manatu tahi anai mo te ʼu palalau ʼaenī neʼe fai e te ʼapositolo ko Paulo: “Siʼi loloto ʼo te koloaʼia pea mo te poto pea mo te ʼatamai mālama ʼo te ʼAtua! Ko ʼana fakamāu ʼe mole feala hona sivisivi pea mole feala ke maʼu tona ʼu ala! Heʼe ‘ko ai kua ina lava ʼiloʼi ia te manatu ʼa Sehova, peʼe kua liliu ko hana tagata fai tokoni?’ Peʼe ‘ko ai ʼaē neʼe ina ʼuluaki foaki, ke maʼua ai ke ina toe liufaki age?’ Heʼe ko ia, pea ʼaki iā te ia, pea maʼa te ia ʼaē neʼe faʼu ai meʼa fuli. Kiā te ia te kolōlia ki te heʼegata. Ameni.”—Loma 11:33-36.

[ʼU nota]

ʼE Kei Kotou Manatuʼi Koa?

• Koteā ʼaē kā tokoni mai ke ʼaua naʼa tou valokiʼi ia Sehova ʼaki pē tatatou ʼu manatu fakatagata?

• Ko tatatou mahino ki te ʼu gāue ʼaē neʼe fai e Sesu, ʼe lava tokoni feafeaʼi mai kiā tātou ke tou “kaumeʼa mo Sehova”?

• Koteā te ʼu ako neʼe kotou tāʼofi mai te ʼu felōgoi ʼaē ʼa Sehova mo Moisese pea mo Apalahamo?

[ʼU fehuʼi ʼo te ako]

[Paki ʼo te pasina 15]

Koteā ʼaē ʼe tou ako ʼo ʼuhiga mo te manatu ʼa Sehova ʼi tana felōgoi ʼaē mo Moisese pea mo Apalahamo?