Te Faikole

 1 Koteā Tona Tupuʼaga?

TE FAIKOLE. ʼE tahitahiga te ʼu manatu ʼi te Tohi-tapu ʼe fia tokagaʼi e te hahaʼi pea mo natou fia mahino kiai. Kotou vakaʼi age muʼa te ʼu fehuʼi ʼe fitu ʼaē ʼe fai māhani e te hahaʼi ʼo ʼuhiga mo te faikole; pea tou vakaʼi fakatahi leva te ʼu tali ʼaē ʼe foaki mai ʼi te Tohi-Tapu. Neʼe tā te ʼu ʼalatike ʼaenī ke tokoni atu ki takotou faikole, ke feala ai leva hakotou faikole peʼe ke liliu takotou ʼu faikole ʼo lelei age.

ʼI TE mālamanei, ʼi te ʼu agaʼi fenua fuli pea mo te ʼu lotu fuli, ko te hahaʼi ʼe natou faikole. ʼE natou faikole takitokotahi; ʼe natou faikole ʼi te kaugamālie. ʼE natou faikole ʼi te ʼu ʼēkelesia, ʼi te ʼu sinakoka, ʼi te ʼu fale faikole ʼa te kau Mahometa, ʼi te ʼu koga meʼa taputapu. ʼE lagi natou fakaʼaogaʼi he ʼu meʼa fāliki, ke natou tulolo ʼo faikole ai, peʼe ko he ʼu lōsalio, peʼe ko he ʼu meʼa takafuafua moʼo lau ʼo he ʼu kole, peʼe ko he ʼu fakatātā, peʼe ko he ʼu tohi faikole, peʼe ko he ʼu faikole neʼe natou tohi ʼi he ʼu kiʼi papa pea mo natou tautau.

Ko te faikole ʼe ina fakakeheʼi ia te tagata mai te tahi age ʼu meʼa maʼuli fuli ʼaē ʼi te kele. ʼE moʼoni, ʼe lahi te ʼu faʼahi ʼaē ʼe tou tatau ai mo te manu. Ohagē ko te manu, ʼe tonu ke tou kakai, ke tou mānava, pea mo ʼiʼinu. Ohagē ko te manu, ʼe tou tutupu ake, tou māʼuʼuli pea mo tou mamate. (Tagata Tānaki 3:19) Kae ʼe gata pē ki te tagata ʼe faikole. Koteā tona tupuʼaga?

Lagi ko tona tali fakanounou kiai ʼe ko te ʼaoga kiā tātou ke tou faikole, heʼe ʼi te agamāhani, ko te hahaʼi ʼe natou fakaʼaogaʼi te faikole ke feala ai hanatou felōgoi mo te potu fakalaumālie, he faʼahi kiā nātou ʼe māʼoniʼoni peʼe taputapu, pea mo heʼegata. ʼE fakahā mai ʼi te Tohi-Tapu neʼe faʼu tātou ʼaki te fakaʼamu ʼaē ki te ʼu meʼa ʼaia. (Tagata Tānaki 3:11) ʼI te tahi temi neʼe ʼui fēnei e Sesu Kilisito: “Fiafia ia nātou ʼaē ʼe natou ʼiloʼi tonatou masiva fakalaumālie.”—Mateo 5:3.

ʼE feala ke tou tokagaʼi ia te “masiva fakalaumālie” ʼaia ʼa te hahaʼi ʼaki te lahi ʼo te ʼu fale faikole pea mo te ʼu monimo, mo te lahi ʼo te ʼu hola ʼaē ʼe natou fakaʼaogaʼi ki te faikole. ʼE moʼoni, ko ʼihi hahaʼi ʼe natou falala pē kiā nātou totonu peʼe ki ʼihi moʼo fakafīmālieʼi tonatou maʼuli fakalaumālie. Kae ʼi takotou manatu, ʼe feala koa lā ki te tagata ke tokoni fakalelei mai kae lahi tona ʼu tuʼakoi? ʼE tou vaivai gafua, mo nounou totatou maʼuli, pea ʼe mole tou mālama kiā meʼa fuli. ʼE ko he tahi pē ʼe poto age, ʼe mālohi age, ʼe faʼa kātaki age iā tātou, ʼe feala ke ina foaki mai ia te ʼu meʼa ʼaē ʼe ʼaoga kiā tātou. Pea koteā lā te ʼu meʼa ʼaē ʼe ʼaoga kiā tātou ʼi te faʼahi fakalaumālie, ʼaē ʼe ina uga ai tātou ke tou faikole?

Kotou tokagaʼi age muʼa te faʼahi ʼaenī: ʼE lagi neʼe kua kotou fakaʼamu ke takitaki koutou, ke kotou maʼu te poto, peʼe ke kotou maʼu te ʼu tali ki ʼakotou fehuʼi ʼaē ʼe mole tali kiai e te poto fakatagata. ʼE lagi neʼe kua kotou logoʼi te ʼaoga ʼaē ke fakafīmālieʼi koutou he neʼe mate he tahi neʼe kotou ʼoʼofa ai, peʼe kotou logoʼi te ʼaoga ʼaē ke tokoni atu ʼo ʼuhiga mo he tonu ʼe kotou fai, peʼe ko te ʼaoga ʼaē ke fakamolemole atu mokā ʼe vevele tokotou leʼo ʼo loto.

Ohagē ko tona fakahā ʼi te Tohi-Tapu, ko te ʼu tupuʼaga fuli lā ʼaia ʼe tonu ai ke tou faikole. Ko te Tohi-Tapu ʼe ko te tohi pē ʼaia ʼe tahi ʼe tou falala kiai ʼo ʼuhiga mo te faʼahi ʼaia, pea ʼe lahi ai tatatou maʼu ia te ʼu faikole ʼa te ʼu tagata pea mo te ʼu fafine agatonu e tokolahi. Neʼe natou faikole ke fakafīmālieʼi nātou, ke takitaki nātou, ke fakamolemole age kiā nātou, pea ke natou maʼu he ʼu tali ki tanatou ʼu fehuʼi faigataʼa.—Pesalemo 23:3; 71:21; Taniela 9:4, 5, 19; Hapakuke 1:3.

Ko te ʼu faʼahiga faikole ʼaia, logolā tonatou kehekehe, kae ʼe ʼi ai te faʼahi ʼe natou tatau ai. Neʼe maʼu e te hahaʼi faikole agatonu ʼaia ia te faʼahi ʼe maʼuhiga ke fua lelei ai tanatou ʼu faikole, pea ko te faʼahi ʼaia mole kei tokagaʼi peʼe meʼa noaʼi ʼi te mālamanei. Ko te hahaʼi agatonu ʼaia neʼe natou ʼiloʼi peʼe ko ai ʼaē neʼe tonu ke natou faikole ki ai.