Kau Tūpulaga, Kotou Tekeʼi Te Fakaneke ʼa ʼIhi Tamaliki

“Kotou fai . . . takotou ʼu palalau . . . ke konakonaʼi ʼaki te māsima, ke kotou ʼiloʼi te tali ʼaē ʼe tonu ke kotou fai ki te hahaʼi takitokotahi.”—KOL. 4:6.

1, 2. Koteā ʼaē ʼe logoʼi e te kau tūpulaga e tokolahi ʼo ʼuhiga mo tanatou makehe ʼaē mai ʼihi tūpulaga, pea koteā tona tupuʼaga?

 ʼE MAHINO ia, neʼe mole gata pē ʼi takotou logo ʼaē ki te fakaneke ʼo ʼihi, kae neʼe kua toe hoko pē foki kiā koutou te faʼahi ʼaia. ʼI he temi pē, lagi neʼe uga koutou e he tahi ke kotou fai he meʼa ʼe kotou ʼiloʼi ʼe kovi. ʼE kotou feafeaʼi ʼi te temi pē ʼaia? ʼE ʼui fēnei e Christopher ʼaē e taʼu 14: “ ʼI ʼihi temi ʼe au loto ʼosi au ke au puli peʼe ke au hagē ko toku ʼu kaugā ako, fēia ke mole au makehe ai iā nātou.”

² ʼE mālohi ʼaupitō koa tokotou fakaneke ʼaē e tokotou ʼu kaugā ako? Kapau koia, koteā tona tupuʼaga? ʼE lagi tupu koa ko takotou loto ʼaē ke natou tali koutou? ʼE ko he fakaʼamu ia ʼe mole kovi. ʼI tona fakahagatonu, ʼe toe fēia pē lā mo te hahaʼi lalahi, ʼe natou loto ke tali nātou e ʼihi. ʼE mole he tahi, peʼe tūpulaga peʼe matuʼa, ʼe ina loto ke meʼa noaʼi ia ia. ʼE moʼoni, ʼe mole vikiʼi tuʼumaʼu anai koutou ʼi takotou fai te meʼa ʼaē ʼe totonu. Māʼiapē lā mo Sesu neʼe hoko kiā ia te ʼu faʼahi fēia, kae neʼe ina fai tuʼumaʼu pē te meʼa ʼaē ʼe lelei. Ko ʼihi neʼe natou muli iā te ia pea liliu ko tana ʼu tisipulo, kae ko ʼihi neʼe natou fehiʼa ki te ʼAlo ʼo te ʼAtua pea mo natou “meʼa noaʼi ia ia.”—Isa. 53:3.

Te Mālohi ʼo Te Fakaneke ʼo Koutou Ke Kotou Hagē Ko ʼIhi

 3. He koʼē ʼe mole ko he aga ʼe lelei mokā ʼe kotou muliʼi te ʼu lēkula ʼo tokotou ʼu kaugā ako?

³ ʼI ʼihi temi, lagi ʼe kotou fia muliʼi te ʼu lēkula ʼo tokotou ʼu kaugā ako ʼuhi pē ke mole natou fēhihiʼa kiā koutou. ʼE ko he aga ia ʼe mole lelei. ʼE mole tonu ki te kau Kilisitiano ke natou hagē “ko he ʼu kiʼi tamaliki ʼe fetafeaʼaki ʼi te ʼu fuga vai.” (Efe. 4:14) Ko te kihiʼi tamaliki ʼe faigafua pē tonatou fakaneke e ʼihi. Kae ʼi takotou kua tūpulaga, ʼe kotou liliu anai ʼi he ʼaho ko ni hahaʼi lalahi. Koia, kapau ʼe kotou tui ʼe fua lelei kiā koutou te ʼu lēkula ʼa Sehova, ʼe tonu ke kotou maʼuliʼi te ʼu akonaki ʼaē ʼe kotou tui kiai. (Teu. 10:12, 13) Kā mole kotou fai te faʼahi ʼaia, pea ʼe hagē anai ʼe mole kotou puleʼi tokotou maʼuli. Ko te meʼa ʼaē ʼe hoko mo kapau ʼe kotou mulimuli ki te fakaneke ʼo koutou e tokotou ʼu kaugā ako, ʼe ko nātou ʼaē ʼe natou taki faʼifaʼitaliha koutou.—Lau ia 2 Petelo 2:19.

4, 5. (a) Neʼe muliʼi feafeaʼi e Alone tona fakaneke ʼaē e te kau Iselaele, pea koteā te ʼu ako ʼe feala ke kotou maʼu mai te faʼahi ʼaia? (b) Koteā te ʼu fakahala ʼe lagi fakaʼaogaʼi anai e tokotou ʼu kaugā ako ʼi tanatou faiga ʼaē ke natou fakaneke koutou ki he meʼa ʼe kovi?

⁴ ʼI te tahi ʼaluʼaga, ko Alone te tehina ʼo Moisese neʼe ina muliʼi tona fakaneke ʼaē e te kau Iselaele. ʼI te temi ʼaē neʼe natou uga ai ia ia ke ina faʼu honatou ʼatua, neʼe ina fai te faʼahi ʼaia. Kae ko Alone neʼe mole ko he tagata ia neʼe fula. Heʼe ʼi muʼa atu, neʼe ko ia ʼaē mo Moisese neʼe nā palalau kiā Falaone, te tagata mālohi ʼaupitō ʼo Esipito. ʼI te temi ʼaia neʼe palalau ia Alone ʼaki he lototoʼa, ʼo ina tala age kiā ia te logo ʼa te ʼAtua. Kae ʼi te temi leva ʼaē neʼe fakaneke ai ia ia e tona ʼu tehina Iselaele, neʼe ina muliʼi tona fakaneke ʼaia. ʼI toe mālohi leva ʼo te fakaneke ʼaē ʼe feala ke hoko! Neʼe faigafua age kiā Alone te tekeʼi ʼaē ʼo te fakafeagai ʼa te hau ʼo Esipito, ʼi te tekeʼi ʼaē ʼo te fakaneke ʼo tona ʼu tehina Iselaele.—Eke. 7:1, 2; 32:1-4.

⁵ Ohagē ko tona fakahā mai ʼi te faʼifaʼitaki ʼo Alone, ʼe mole ko nātou pē ʼaē ʼe tūpulaga ʼe tau mo te fakaneke, peʼe gata pē kiā nātou ʼaē ʼe natou fia fai te meʼa ʼaē ʼe kovi. Ko te fakaneke ʼe feala ke toe malave kiā nātou ʼaē ʼe natou fia fai te meʼa ʼaē ʼe lelei, ʼo kau ai mo koutou. ʼE lagi faiga tokotou ʼu kaugā ako ke natou fakakinauʼi koutou ke kotou fai te meʼa ʼaē ʼe kovi, ʼo natou lau atu ʼe kotou fula ʼi he fai ʼo he meʼa peʼe natou tukugākoviʼi koutou,  peʼe lea kovi atu kiā koutou. Tatau aipē peʼe feafeaʼi te agaaga ʼo te fakaneke ʼaē ʼe fai atu kiā koutou, kae ʼe faigataʼa tuʼumaʼu pē tona tekeʼi. Kae ʼaki takotou falala ki te ʼu akonaki ʼaē ʼe kotou tui kiai, ʼe feala ai hakotou tekeʼi te fakaneke.

“Kotou Sivisivi Tuʼumaʼu Peʼe Feafeaʼi Tokotou ʼUhiga Totonu”

6, 7. (a) He koʼē ʼe maʼuhiga ke kotou tui papau ki takotou ʼu akonaki, pea ʼe feafeaʼi hakotou fakatuputupu iā koutou te faʼahi ʼaia? (b) Koteā te ʼu fehuʼi ʼe feala ke kotou fai kiā koutou totonu pē, moʼo fakamālohiʼi takotou tui papau ʼaē ki takotou ʼu akonaki?

⁶ Moʼo tauʼi te fakaneke ʼaē ʼo tokotou ʼu kaugā ako, ʼe tonu muʼa ke kotou tui papau ʼe totonu te ʼu akonaki pea mo te ʼu lēkula ʼaē ʼe kotou tui kiai. (Lau ia 2 Kolonito 13:5.) Ko takotou tui papau ʼaia ʼe feala anai ke tokoni atu ke kotou lototoʼa, logolā ʼe lagi kotou aga ufiufi. (2 Tim. 1:7, 8) Kae māʼiapē lā mo kapau ʼe lototoʼa he tahi, ʼe lagi feala ke faigataʼa hana lagolago kātoa ki he meʼa ʼe lotolotolua kiai. Koia he koʼē ʼe mole kotou vakavakaʼi e koutou totonu peʼe moʼoni te ʼu meʼa ʼaē neʼe kotou ako ʼi te Tohi-Tapu? Kotou kamata ʼaki te ʼu akonaki Fakatohi-tapu tāfito. Ohagē lā, ʼe kotou tui ki te ʼAtua pea neʼe kotou logo ʼe fakahā e ʼihi pe koʼē ʼe natou tui ko te ʼAtua ʼe maʼuli moʼoni. Koia kotou fai te fehuʼi ʼaenī kiā koutou totonu pē: ‘He koʼē ʼe au tui papau ʼe maʼuli moʼoni te ʼAtua?’ ʼE fai tāfito te fehuʼi ʼaenī moʼo fakamālohiʼi ʼo takotou tui kae mole ke kotou lotolotolua ai. ʼO toe fēia aipē, kotou fai te ʼu fehuʼi ʼaenī kiā koutou totonu pē: ‘ ʼE au ʼiloʼi feafeaʼi ko te Tohi-Tapu ʼe haʼu moʼoni mai te ʼAtua?’ (2 Tim. 3:16) ‘He koʼē ʼe au tui papau ʼe tou māʼuʼuli nei ʼi “te ʼu ʼaho fakamuli”?’ (2 Tim. 3:1-5) ‘Koteā ʼaē ʼe au tui ai ʼe fua lelei kiā au te ʼu lēkula ʼa te ʼAtua?’—Isa. 48:17, 18.

⁷ ʼE lagi kotou lotolotolua anai ʼi te fai ʼo te ʼu fehuʼi ʼaia kiā koutou totonu pē, heʼe kotou tuʼania naʼa mole kotou maʼu anai tona ʼu tali. Kae ʼe hagē pē anai ko hakotou lotolotolua ʼi takotou mole vakaʼi takotou moʼi penisini ʼi takotou motokā, ʼi takotou mataku ʼaē naʼa kua “ago”! Kapau mole kei ʼi ai he moʼi penisini ʼi takotou motokā, pea ʼe tonu ke kotou fai he puleʼaki kiai. ʼO toe fēia pē, ʼe lelei age hakotou mahino peʼe ko te ʼu faʼahi fea ʼaē ʼe kotou lotolotolua ai pea ke kotou fakamālohiʼi te ʼu faʼahi ʼaia.—Gāue 17:11.

 8. Kotou fakamahino peʼe lava fakamālohiʼi feafeaʼi ia takotou falala ʼaē ʼe fakapotopoto te fakatotonu ʼa te ʼAtua, ke kotou fakamamaʼo mai te fai folonikāsio.

⁸ Kotou vakaʼi age muʼa te faʼifaʼitaki ʼaenī. ʼE fakalotomālohiʼi koutou ʼi te Tohi-Tapu ke kotou “hola mai te fai folonikāsio.” Kotou fai te fehuʼi ʼaenī kiā koutou totonu pē: ‘He koʼē ʼe ko haku aga fakapotopoto ke au muliʼi te fakatotonu ʼaenī?’ Kotou fakakaukauʼi age muʼa te ʼu tupuʼaga fuli ʼaē ʼe fai ai e tokotou ʼu kaugā ako ia te taʼi aga ʼaia. Kotou toe fakakaukauʼi age muʼa mo te ʼu tupuʼaga kehekehe ʼaē ko he tahi ʼe fai folonikāsio “ ʼe agahala ia ki tona sino totonu.” (1 Ko. 6:18) Kotou vakavakaʼi te ʼu tali ʼaē neʼe kua kotou maʼu, pea kotou fai te ʼu fehuʼi ʼaenī kiā koutou totonu pē: ‘Ko te aga fea ʼaē ʼe lelei ke au muliʼi? ʼE ʼi ai anai koa hona fua lelei kiā au ʼo taku fai he aga heʼeʼaoga?’ Ke toe loloto age takotou fakakaukau, kotou fai te ʼu fehuʼi ʼaenī kiā koutou totonu pē: ‘ ʼE feafeaʼi anai toku loto mo kapau ʼe au fai he aga heʼeʼaoga?’ ʼE lagi ʼi te moʼi temi pē ʼaia ʼe leleiʼia ai koutou e tokotou ʼu kaugā ako, kae ʼe kotou feafeaʼi anai ki muli age mokā kotou nonofo mo takotou ʼu mātuʼa peʼe ko tokotou ʼu tehina Kilisitiano ʼi te Fale ʼo Te Puleʼaga? ʼE feafeaʼi anai tokotou loto ʼi te temi ʼaē ʼe kotou fia faikole ai ki te ʼAtua? Ke leleiʼia koutou e tokotou ʼu kaugā ako, ʼe kotou tali anai koa ke kotou fai he aga ʼe fakafeagai ki te ʼAtua?

9, 10. Kā kotou falala ki te ʼu pelesepeto Fakatohi-tapu, pea ʼe lava tokoni feafeaʼi atu anai ke lahi age takotou falala mokā ʼe kotou nonofo mo tokotou ʼu kaugā ako?

⁹ Kapau ʼe kei kotou tūpulaga, ʼe ko te temi ʼaia ʼo tokotou maʼuli ʼe gāue lahi ai tokotou “ ʼatamai.” (Lau ia Loma 12:1, 2.) Kotou fakaʼaogaʼi te temi ʼaia ʼo tokotou maʼuli moʼo fakakaukauʼi fakalelei, pe koʼē ko takotou liliu ʼaē ko he Fakamoʼoni ʼa Sehova ʼe maʼuhiga kiā koutou. ʼE tokoni atu anai te taʼi metitāsio ʼaia ke lahi age takotou falala ʼaē ki te ʼu pelesepeto Fakatohi-tapu. Pea kā kotou tau mo he fakaneke ʼo tokotou ʼu kaugā ako, ʼe feala ai anai hakotou foimo tauʼi, ʼo kotou falala ʼe kotou fai te meʼa ʼaē ʼe lelei. ʼE kotou hagē anai ko te tuagaʼane Kilisitiano kei finemui, ʼaē ʼe ina ʼui fēnei: “Kā au tekeʼi toku ʼu fakaneke ʼaē e toku ʼu kaugā ako, ʼe natou ʼiloʼi ai te ʼu meʼa ʼaē ʼe au tui kiai. ʼE mole ko haku kau pē ki ‘he lotu.’ ʼE pipiki tāfito kiai taku ʼu manatu, taku ʼu fakatuʼutuʼu, te ʼu aga ʼaē ʼe tonu ke au fai, pea mo toku maʼuli kātoa.”

¹⁰ ʼE moʼoni, ʼe tonu ke kotou faiga mālohi ʼo  nofo agatonu ki te meʼa ʼaē ʼe kotou ʼiloʼi ʼe totonu. (Luka 13:24) Pea ʼe lagi kotou feʼekeʼaki peʼe ʼi ai anai he ʼu fua ʼo takotou faiga mālohi ʼaia. Kae kotou manatuʼi te faʼahi ʼaenī: Kapau ʼe hagē ʼe kotou fia faifakalelei peʼe kotou ufiufi ʼo ʼuhiga mo te ʼu meʼa ʼaē ʼe kotou tui kiai, pea ʼe fakatokagaʼi anai e ʼihi te faʼahi ʼaia, pea ʼe lagi natou fakaʼāsili age anai tanatou ʼu fakaneke ʼaē ʼo koutou. Kae kapau ʼe kotou palalau ʼaki he tui papau, pea ʼe lagi kotou punamaʼuli anai ʼi tanatou foimo tuku atu aipē tanatou ʼu fakaneke ʼaē kiā koutou.—Vakaʼi ia Luka 4:12, 13.

‘Kotou Metitāsio ʼi Muʼa ʼo Takotou Tali’

11. He koʼē ʼe ʼaoga ke kotou teuteuʼi fakatomuʼa te fakaneke ʼaē ʼo tokotou ʼu kaugā ako?

¹¹ Ko te tahi faʼahi maʼuhiga moʼo tekeʼi te fakaneke ʼaē ʼo tokotou ʼu kaugā ako, ke kotou nofo teuteu. (Lau ia Tāʼaga Lea 15:28.) Ko te fakaʼuhiga ʼo te nofo teuteu ʼaia, ke kotou fakakaukauʼi fakatomuʼa te ʼu ʼaluʼaga ʼaē ʼe lagi feala ke hoko. ʼI ʼihi temi, ʼe feala ke tokoni atu te faʼahi ʼaia ke mole hoko he toe fihifihia lahi. Ohagē lā ʼe kotou sio mai mamaʼo ki tokotou ʼu kaugā ako ʼe natou lolotoga suluka. ʼE feala anai koa ke natou foaki atu hakotou foʼi suluka? ʼI takatou fakakaukauʼi fakatomuʼa te fihifihia ʼaē ʼe feala ke hoko, koteā ʼaē ʼe feala ke kotou fai? ʼE ʼui fēnei iā Tāʼaga Lea 22:3: “ ʼE fakapotopoto ia ia ʼaē neʼe sio ki te malaʼia, pea nono.” ʼI takotou ʼofeʼi kehe tokotou fagona, ʼe feala ai ke kotou tekeʼi hakotou fetaulaki mo nātou. ʼE mole fakaʼuhiga ia ʼe kotou fula ʼi te temi ʼaia, kae ʼe ko he puleʼaki fakapotopoto.

12. ʼE feafeaʼi hakotou lava tekeʼi he fakaneke ʼe fai fakahagatonu atu?

¹² ʼE feafeaʼi leva hakotou tekeʼi he fakaneke ʼe fai fakahagatonu atu? Ohagē lā, ʼe punamaʼuli hokotou kaugā ako ki takotou aga, ʼo ina fehuʼi fēnei atu: “Heʼeki ke moe koa lā koe mo he tahi?” Ko te puleʼaki kiai, ke kotou muliʼi te tokoni ʼaē iā Kolose 4:6: “Kotou fai ke lelei tuʼumaʼu takotou ʼu palalau pea ke konakonaʼi ʼaki te māsima, ke kotou ʼiloʼi te tali ʼaē ʼe tonu ke kotou fai ki te hahaʼi takitokotahi.” Ohagē ko tona fakahā mai ʼi te vaega ʼaenī, ʼe kotou fakaʼalutahi anai takotou tali mo te ʼaluʼaga ʼaē ʼe lolotoga hoko. ʼE lagi mole ʼaoga anai ke kotou lau age he vaega loaloaga ʼi te Tohi-Tapu. Lagi ʼe lelei pē hakotou tali fakanounou age kae ke hā lelei ai takotou tui papau ki te ʼu akonaki Fakatohi-tapu. Ohagē lā, ki te tali ʼaē ki te fehuʼi peʼe kua kotou momoe mo he tahi, ʼe feala pē ke kotou ʼui fēnei age: “Kailoa” peʼe “Ko he faʼahi ia ʼe mole ke kau koe kiai.”

13. He koʼē ʼe maʼuhiga ke kotou maʼu te fakasiosio poto moʼo tali ki he palalau kovi ʼe fai atu e hokotou kaugā ako?

¹³ Neʼe tautau fai e Sesu he tali ʼe nounou, he neʼe fua lelei age ia ʼi he fai ʼo he ʼu tuʼuga palalau. ʼI tona fakahagatonu, ʼi te temi ʼaē neʼe fakafehufehuʼi ai ia ia e Helote, neʼe mole gū ia Sesu. (Luka 23:8, 9) ʼI te agamāhani, ko te nofo fakalogologo ʼe ko he faʼahi ʼe lelei moʼo tauʼi he ʼu fehuʼi ʼe mole fakaʼapaʼapa. (Taag. 26:4; Tnk. 3:1, 7) ʼI te tahi age faʼahi, ʼe lagi kotou fakatokagaʼi te fia ʼiloʼi moʼoni ʼaē e he tahi neʼe punamaʼuli ki hakotou aga ʼo ʼuhiga lā mo te ʼu felāveʼi fakasino, logolā ʼi te kamata neʼe palalau kovi atu. (1 Pet. 4:4) ʼO ʼuhiga mo te faʼahi ʼaia, ʼe lagi lelei anai ke kotou foaki age he ʼu fakamahino ʼe lahi age ʼo ʼuhiga mo takotou ʼu akonaki Fakatohi-tapu. Kapau koia, ʼaua naʼa kotou mātataku ʼi te fakahā age ʼo te faʼahi ʼaia. Ke kotou “nonofo teuteu tuʼumaʼu moʼo tali” kiā nātou ʼaē ʼe faifehuʼi atu.—1 Pet. 3:15.

14. ʼI ʼihi ʼaluʼaga, ʼaki he aga fakaʼeteʼete ʼe feafeaʼi hakotou liufaki age ki hokotou kaugā ako hana fakaneke ia koutou?

¹⁴ ʼI ʼihi ʼaluʼaga, ʼe feala ke kotou liufaki age ki tokotou ʼu kaugā ako ia te fakaneke ʼaē ʼe natou fai atu kiā koutou. Kae ʼe tonu ke kotou fai te faʼahi ʼaia ʼaki he aga fakaʼeteʼete. Ohagē lā, kapau ʼe fakaneke koutou e hokotou kaugā ako ke kotou suluka, ʼe feala ke kotou ʼui fēnei age: “Kailoa mālo” pea mo toe ʼui age: “ ʼE ke suluka lā koe, neʼe au manatu au ʼe ke poto age koe!” ʼE kotou fakatokagaʼi pe neʼe feafeaʼi te liufaki ʼo te fakaneke? ʼE kotou uga ai tokotou kaugā ako ke ina fakakaukauʼi pe koʼē ʼe suluka, kae mole ko koutou ʼaē ʼe fakamahino age pe koʼē ʼe mole kotou suluka. a

15. Ko te temi fea ʼaē ʼe lelei ai ke kotou mavae ai mai tokotou ʼu kaugā ako ʼaē ʼe natou fia fakaneke koutou, pea koteā tona tupuʼaga?

¹⁵ ʼE feafeaʼi mo kapau logolā takotou ʼu faiga, kae ʼe hoholo atu pē te ʼu fakaneke ʼaē ʼo tokotou ʼu kaugā ako? ʼO ʼuhiga mo te faʼahi ʼaia, ʼe lelei age pē hakotou mavae mai ai. Kapau ʼe kotou fakatuatuai  iā nātou, pea ʼe feala pē anai ke kotou fai he aga ʼe mole lelei. Koia, kotou mavae ʼosi mai ai. ʼE mole fakaʼuhiga leva takotou aga ʼaia neʼe mole kotou lava tauʼi te fakaneke. ʼI tona fakahagatonu, neʼe ko koutou ʼaē neʼe maʼu te ʼu puleʼaki ki te ʼaluʼaga ʼaē neʼe hoko. Neʼe mole ko tokotou ʼu kaugā ako ʼaē neʼe pule faʼifaʼitaliha kiā koutou, pea neʼe kotou fakafiafia te loto ʼo Sehova.—Taag. 27:11.

Kotou Fai ‘He ʼu Fakatuʼutuʼu ʼe Fua Manūʼia’

16. ʼE lava fakaneke feafeaʼi koutou e ʼihi tūpulaga ʼe natou lau ʼe natou Kilisitiano?

¹⁶ ʼI ʼihi temi, ʼe lagi ko ʼihi tūpulaga ʼaē ʼe natou lau ʼe natou kaugana kiā Sehova, ʼaē ʼe natou fakaneke koutou ki he ʼu fakafiafia ʼe mole lelei. Ohagē lā, ʼe feafeaʼi mokā kotou ʼolo atu ki he fakafiafia neʼe fakatuʼutuʼu e he tahi ʼe lau ʼe kaugana kiā Sehova, pea ʼe kotou fakatokagaʼi ai ʼe mole ʼi ai ni hahaʼi lalahi moʼona leʼoleʼo? Peʼe feafeaʼi age lā mo kapau ko he tūpulaga ʼe lau ko he Kilisitiano ʼe ina ʼaumai he ʼu foʼi kava ki te fakafiafia, kae mole heʼeki fakagafua atu e te lao kiā koutou pea mo ʼihi ʼi te fakafiafia ke kotou ʼinu kava? ʼE lahi te ʼu ʼaluʼaga ʼe feala ke hoko, ʼe ʼaoga ai anai ke kotou muliʼi tokotou leʼo ʼo loto ʼaē neʼe akoʼi e te Tohi-Tapu. ʼE ʼui fēnei e te finemui Kilisitiano: “Ko au mo toku kiʼi tehina neʼe mā tutuʼu ʼo ʼolo he neʼe lahi te ʼu tauvele ʼi te ʼata. Ko ʼihi neʼe natou nonofo ʼo sioʼi te ʼata. Neʼe vikiʼi māua e tamā ʼu mātuʼa ki te aga ʼaē neʼe mā fai. Kae ko nātou ʼaē neʼe nonofo ʼo sio ki te ʼata, neʼe natou ʼiʼita ki te aga ʼaē neʼe mā fai he neʼe hā ai te kovi ʼo tanatou aga.”

17. Kā kotou kau ki he fakafiafia, koteā te ʼu fakatuʼutuʼu ʼaē ʼe feala ke kotou fai ke kotou fakaʼapaʼapa ai ki te ʼu lēkula ʼa te ʼAtua?

¹⁷ Ohagē ko tona fakahā ʼi te fakamatala ʼaē neʼe hoki tou vakaʼi atu, ʼe lagi feala ke faikehe ki ʼihi ia takotou muliʼi ʼaē tokotou leʼo ʼo loto ʼaē neʼe akoʼi e te Tohi-Tapu. Kae kotou agatonu ki te meʼa ʼaē ʼe kotou ʼiloʼi ʼe totonu. Kotou teuteu fakatomuʼa. Kapau ʼe kotou ʼolo ki he fakafiafia, kotou fakakaukauʼi fakatomuʼa peʼe feafeaʼi anai hakotou mavae mai ai mokā ʼe hoko he ʼu ʼaluʼaga neʼe mole kotou ʼamanaki kiai. Ko ʼihi tūpulaga neʼe natou felōgoi mo tanatou ʼu mātuʼa, ke natou telefoni mai kiā nātou ke feala ai hanatou ʼomai tautonu ki fale. (Pes. 26:4, 5) Ko ‘he ʼu fakatuʼutuʼu fēia ʼe fua manūʼia.’—Taag. 21:5.

‘Kotou Fakafiafia ʼi Tokotou Temi Tūpulaga’

18, 19. (a) He koʼē ʼe feala ke kotou tui papau ko Sehova ʼe loto ke kotou maʼuli fiafia? (b) ʼE feafeaʼi te loto ʼo te ʼAtua ʼo ʼuhiga mo nātou ʼaē ʼe natou tekeʼi te fakaneke ʼo tonatou ʼu kaugā ako?

¹⁸ Neʼe faʼu koutou e Sehova ʼaki te fealagia ʼaē ke kotou maʼuli fiafia, pea ʼe loto ia ke kotou fiafia. (Lau ia Tagata Tānaki 11:9.) Kotou manatuʼi ko te ʼu meʼa ʼaē ʼe fai e tokotou ʼu kaugā ako e tokolahi, ʼe ko he ʼu “fakafiafia fakatemi [pē ia] ʼo te agahala.” (Hep. 11:25) Ko te ʼAtua moʼoni ʼe ina loto ke kotou maʼu ia he meʼa ʼe maʼuhiga age. ʼE loto ia ke kotou fiafia ʼo heʼegata. Koia, kā fakahalaʼi koutou ke kotou fai he meʼa ʼe kotou ʼiloʼi ʼe kovi kiā mata ʼo te ʼAtua, kotou manatuʼi ko te meʼa ʼaē ʼe kole atu e Sehova ʼe fua lelei tuʼumaʼu pē ia kiā koutou ki muli age.

¹⁹ ʼI tokotou temi tūpulaga, ʼe tonu ke kotou mahino tatau aipē peʼe kotou maʼu te ʼofa ʼo tokotou ʼu kaugā ako, kae tokolahi iā nātou ʼi te ʼu taʼu ʼaē kā haʼu ʼe mahino ia, mole kei natou manatuʼi anai tokotou higoa. Kae kā kotou tekeʼi te fakaneke ʼaē ʼo tokotou ʼu kaugā ako, ʼe tokagaʼi e Sehova takatou aga ʼaia, pea ʼe mole ina galoʼi anai koutou ʼi he temi peʼe ko takotou agatonu. ʼE ina “ ʼavahi anai kiā koutou te ʼu matapā ʼo te lagi pea mo huaʼi moʼoni anai kiā koutou he tapuakina ʼo aʼu ki te mole toe ʼi ai ʼo he hoge.” (Mala. 3:10) Tahi ʼaē, ʼe ina foaki fakalahi atu anai tona laumālie māʼoniʼoni moʼo tokoniʼi ʼo koutou ʼi te ʼu faʼahi ʼaē ʼe kotou tōtō ai ʼi te temi nei. ʼEī, ʼe feala kiā Sehova ke tokoni atu kiā koutou ke kotou tekeʼi te fakaneke ʼaē ʼo tokotou ʼu kaugā ako!

[Nota]

ʼE Kei Kotou Manatuʼi Koa?

• ʼE feafeaʼi te mālohi ʼo te fakaneke ʼaē ʼo tokotou ʼu kaugā ako?

• Koteā ʼaē ʼe ʼaoga ai kiā koutou ke kotou tui papau moʼo tekeʼi te fakaneke ʼaē ʼo tokotou ʼu kaugā ako?

• ʼE feafeaʼi hakotou teuteu fakatomuʼa moʼo tekeʼi te ʼu fakaneke ʼaē ʼo tokotou ʼu kaugā ako?

• ʼE kotou ʼiloʼi feafeaʼi ʼe maʼuhiga kiā Sehova takatou agatonu?

[ʼU fehuʼi ʼo te ako]