“Ko Te Temi Faigamālie ʼAupitō ʼAenī”

“Koʼenī! Ko te temi faigamālie ʼaupitō ʼaenī. Koʼenī! Ko te temi ʼaenī ʼo te haofaki.”—2 KO. 6:2.

 1. He koʼē ʼe ʼaoga ke tou ʼiloʼi peʼe ko te gāue fea ʼaē ʼe tonu ke tou fai ʼi te temi fuli pē?

 “KIĀ meʼa fuli ʼe ʼi ai tona temi kua fakakatofa, ʼeī, he temi kiā meʼa fuli ʼi te lalo lagi.” (Tnk. 3:1) Neʼe faitohi ia Salomone ki te maʼuhiga ʼaē ke tou ʼiloʼi lelei te temi faigamālie ʼaē ke tou fakahoko ai he fakatuʼutuʼu ʼe ʼaoga, lagi ʼe ko te gāue kele, peʼe ko te faifolau, he laga ʼo he matani gāue peʼe ko te felōgoi mo te hahaʼi. Kae ʼe toe ʼaoga pē foki ke tou ʼiloʼi peʼe ko te gāue fea ʼaē ʼe maʼuhiga age ke tou fai ʼi te temi fuli pē. Ko tona fakaʼuhiga, ʼe tonu ke tou fakatuʼutuʼu te ʼu gāue ʼaē ʼe tonu ke tou fakamuʼamuʼa.

 2. ʼE tou ʼiloʼi feafeaʼi, ko Sesu ʼi tana fai fakamafola, neʼe mahino lelei ki te temi ʼaē neʼe maʼuli ai?

² ʼI tana ʼi te kele, neʼe mahino lelei ia Sesu ki te  temi ʼaē neʼe maʼuli ai pea mo te ʼu gāue ʼaē neʼe tonu ke ina fakahoko. ʼI tana ʼiloʼi lelei ʼaē pe koteā te ʼu gāue ʼaē neʼe tonu ke ina fakamuʼamuʼa ʼi tona maʼuli, neʼe mahino ai kiā ia ʼe kua hoko mai te temi ʼaē ke fakahoko ai te ʼatu ʼu lea fakapolofetā ʼo ʼuhiga mo te Mēsia, ʼaē neʼe natou fakatalitali kiai talu mai fualoa. (1 Pet. 1:11; Fakh. 19:10) Ko te gāue ʼaē neʼe tonu ke ina fai, neʼe ko te fakaʼilo ki te hahaʼi ko ia te Mēsia ʼaē neʼe fakapapauʼi mai. Neʼe tonu ke ina fakamafola te ʼu moʼoni ʼo ʼuhiga mo te Puleʼaga, pea mo tānaki ia nātou ʼaē kā kaugā hau mo ia ʼi te Puleʼaga ʼi te kā haʼu. Pea neʼe tonu ke ina fakatuʼu te tafitoʼaga ʼo te kōkelekāsio Fakakilisitiano, ʼaē kā ina fakahoko atu anai ʼo aʼu ki te ʼu potu taupotu ʼo te kele, ia te gāue fai fakamafola pea mo te fai ʼo ni ʼu tisipulo.—Mko. 1:15.

 3. Ko te mahino lelei ʼa Sesu ki te temi ʼaē neʼe maʼuli ai, neʼe malave feafeaʼi ki tana fakahoko ʼo tana ʼu gāue?

³ Ko te mahino lelei ʼaē ʼa Sesu ki tona temi, neʼe uga ai ia ia ke faʼafai ʼi tana fakahoko ia te finegalo ʼo tana Tamai. Neʼe ina ʼui fēnei ki tana ʼu tisipulo: “ ʼIo ko te taʼukai ʼe lahi, kae tokosiʼi te kau gāue. Koia ke kotou kole ki te Pule ʼo te taʼukai ke ina fekauʼi mai he kau gāue ki tana taʼukai.” (Luka 10:2; Mala. 4:5, 6) Neʼe ʼuluaki fili e Sesu te toko 12 mai tana kau tisipulo pea ki muli age te toko 70, mo ina tuku kiā nātou he ʼu fakamahino, pea mo ina fekauʼi nātou ke natou fakamafola te logo fakafiafia ʼaenī: “Kua fakaovi mai te puleʼaga ʼo selō.” Pea ʼo ʼuhiga mo Sesu, ʼe tou lau fēnei: “ ʼI te ʼosi tuku e Sesu tana ʼu fakamahino ki tana toko hogofulu-mā-lua tisipulo, neʼe mavae ʼi ai ʼo faiakonaki pea mo fai fakamafola ʼi tonatou ʼu kolo.”—Mat. 10:5-7; 11:1; Luka 10:1.

 4. Ko te ʼaluʼaga fea ʼaē neʼe faʼifaʼitakiʼi ai e Paulo ia Sesu Kilisito?

⁴ Ko Sesu neʼe ko he faʼifaʼitaki lelei ki tana kau tisipulo fuli ʼo ʼuhiga mo te faʼafai pea mo te pipiki kātoa ʼaē ki te ʼAtua. Neʼe ko te faʼahi ʼaia ʼaē neʼe talanoa tāfito kiai te ʼapositolo ko Paulo, ʼi tana uga fēnei tona ʼu tehina: “Ke kotou faʼifaʼitaki kiā te au, ohagē pē ko taku faʼifaʼitakiʼi ʼaē ia Kilisito.” (1 Ko. 11:1) Ko te ʼaluʼaga fea ʼaē neʼe faʼifaʼitakiʼi ai e Paulo ia Kilisito? Neʼe faʼifaʼitakiʼi e Paulo ia Kilisito, tāfito ʼi tana faiga mālohi ʼi tana fakamafola te logo lelei. ʼI te ʼu tohi ʼaē neʼe fai e Paulo ki te ʼu kōkelekāsio, ʼe tou maʼu te ʼu taʼi kupusiga palalau ʼaenī: “Kotou faʼafai ʼi takotou ʼu gāue,” “kotou gāue ohagē he ʼu kaugana kiā Sehova,” “ke lahi tuʼumaʼu takotou ʼu gāue ʼi te ʼAliki,” pea “ko he meʼa pē ʼe kotou fai, kotou gāue ʼaki tokotou nefesi kātoa, ohagē ʼe kotou gāue maʼa Sehova.” (Loma 12:11; 1 Ko. 15:58; Kol. 3:23) Neʼe mole toe galo ʼi he temi iā Paulo ia tana felāveʼi ʼaē mo te ʼAliki ko Sesu Kilisito ʼi te ala ʼo Tamaso, pea mo te ʼu palalau ʼaenī ʼa Sesu ʼaē neʼe tonu ke fakahoko age e te tisipulo ko Ananiasi kiā ia: “Ko te tagata ʼaia ʼe ko he ʼipu kua au filifili ke ina ʼave toku huafa ki te ʼu puleʼaga, ʼo fēia ki te ʼu hau pea mo te ʼu foha ʼo Iselaele.”—Gāue 9:15; Loma 1:1, 5; Kal. 1:16.

“Te Temi Faigamālie ʼAupitō”

 5. Koteā ʼaē neʼe ina uga ai ia Paulo ke faʼafai ʼi tana fakahoko tana minisitelio?

⁵ Kā tou lau ia te tohi ʼo Gāue, ʼe tou tokagaʼi lelei ai te lototoʼa pea mo te faʼafai ʼaē neʼe maʼu e Paulo ʼi tana fakahoko tana minisitelio. (Gāue 13:9, 10; 17:16, 17; 18:5) Neʼe mahino ia Paulo ki te maʼuhiga ʼo te temi ʼaē neʼe maʼuli ai. Neʼe ina ʼui fēnei: “Koʼenī! Ko te temi faigamālie ʼaupitō ʼaenī. Koʼenī! Ko te temi ʼaenī ʼo te haofaki.” (2 Ko. 6:2) ʼI te taʼu 537 ʼi muʼa ʼo totatou temi, neʼe ko te temi faigamālie ʼaia ki te kau Iselaele ʼaē neʼe ʼaunofo ʼi Papiloni ke natou toe liliu ki tonatou fenua. (Isa. 49:8, 9) Kae koteā ʼaē neʼe fia talanoa kiai ia Paulo ʼi henī? Ko te ʼu vaega ki muʼa atu pea ki muli mai, ʼe tokoni mai anai ke tou mahino pe koteā ʼaē neʼe manatu kiai ia Paulo.

6, 7. Koteā te pilivilēsio lahi ʼaē neʼe foaki age ki te kau Kilisitiano fakanofo ʼo te temi ʼaenī, pea ko ai ʼaē ʼe lolotoga gāue fakatahi mo te kau fakanofo?

 ⁶ ʼI muʼa atu, neʼe palalau ia Paulo ʼo ʼuhiga mo te pilivilēsio lahi ʼaē neʼe foaki kiā ia pea mo tona ʼu tehina fakanofo. (Lau ia 2 Kolonito 5:18-20.) Neʼe ina fakamahino neʼe pāui nātou e te ʼAtua ki he fakatuʼutuʼu makehe, ke natou fakahoko “te minisitelio ʼo te fakatokatoka,” ke natou kolekole ki te hahaʼi ke natou “fakatokatoka mo te ʼAtua.” Ko tona fakaʼuhiga, ke natou toe kaumeʼa peʼe ke natou toe felōgoi lelei mo te ʼAtua.

⁷ Talu mai te agatuʼu ʼaē neʼe hoko ʼi Eteni, ko te mālamanei kātoa kua mamaʼo iā Sehova. (Loma 3:10, 23) ʼI te kua mamaʼo ʼaia ʼa te mālamanei kātoa mai te ʼAtua, kua nonofo ai te hahaʼi ʼi te fakapōʼuli fakalaumālie, ʼaē ʼe ina taki te mālamanei ki te mamahi pea mo te mate. Neʼe tohi fēnei e Paulo: “[ʼE] tou ʼiloʼi, ʼo aʼu mai ki te temi ʼaenī, ko te ʼu meʼa fuli ʼaē neʼe fakatupu, ʼe natou lāuga tuʼumaʼu fakatahi pea mo mamahi fakatahi.” (Loma 8:22) Kae neʼe fai e te ʼAtua te ʼu fakatuʼutuʼu moʼo uga, peʼe ʼi tona fakahagatonu, moʼo “kolekole” ki te hahaʼi ke natou toe liliu mai, peʼe ke natou fakatokatoka mo ia. Neʼe ko te minisitelio ʼaia ʼaē neʼe foaki ʼi te temi ʼaia kiā Paulo pea mo tona ʼu tehina Kilisitiano fakanofo. Ko “te temi faigamālie” ʼaia neʼe feala ke liliu ko he “temi . . . ʼo te haofaki” kiā nātou ʼaē neʼe tui kiā Sesu. Ko te kau Kilisitiano fakanofo fuli pea mo tanatou ʼu kaugā gāue, ia te “tahi ʼu ovi,” ʼaē ʼe lolotoga gāue fakatahi mo nātou, ʼe natou haga fakaafe te hahaʼi ke natou maʼu te ʼu lelei mai “te temi faigamālie” ʼaia.—Soa. 10:16.

 8. He koʼē ʼe fakaofoofo te pāui ʼaē ki te hahaʼi ke natou fakatokatoka mo te ʼAtua?

⁸ ʼE fakaofoofo te pāui ʼaē ki te hahaʼi ke natou fakatokatoka mo te ʼAtua, heʼe logolā neʼe ko te tagata ʼaē neʼe tupu ai ia tana tokakovi ʼaē mo te ʼAtua, ʼuhi ko te agatuʼu ʼaē neʼe hoko ʼi Eteni, kae neʼe ko te ʼAtua totonu ʼaē neʼe ina ʼuluaki fai te fakatuʼutuʼu ʼaē moʼo fakatokatoka te tokakovi ʼaia. (1 Soa. 4:10, 19) Koteā ʼaē neʼe ina fai? ʼE foaki mai e Paulo te tali ki te fehuʼi ʼaia: “Ko te ʼAtua ʼaki ia Kilisito neʼe ina fakatokatoka te mālamanei mo ia, ʼo mole ina tokagaʼi tanatou ʼu hala, pea neʼe ina foaki mai kiā tātou te folafola ʼo te fakatokatoka.”—2 Ko. 5:19; Isa. 55:6.

 9. Koteā ʼaē neʼe fai e Paulo moʼo fakahā tana loto fakafetaʼi ki te manavaʼofa ʼo te ʼAtua?

⁹ ʼI tana foaki te sākilifisio faitotogi, neʼe fakafealagia e Sehova kiā nātou ʼaē ʼe natou tui, ke fakamolemole tanatou ʼu hala pea ke natou toe kaumeʼa peʼe ke natou toe felōgoi lelei mo ia. Tahi ʼaē, neʼe ina fekauʼi tana hahaʼi ʼave logo ke natou uga te hahaʼi ʼi te potu fuli pē, ke natou tokalelei mo ia ʼi tanatou kei maʼu ʼaē ia te temi faigamālie kiai. (Lau ia 1 Timoteo 2:3-6.) ʼI te mahino ʼa Paulo ki te finegalo ʼo te ʼAtua pea mo te maʼuhiga ʼo te temi ʼaē neʼe maʼuli ai, neʼe gāue mālohi ʼi “te minisitelio ʼo te fakatokatoka.” Mole heʼeki fetogi te finegalo ʼo te ʼAtua. Kei ina loto pē ke fakatokatoka te mālamanei pea mo ia. Kei moʼoni pē te ʼu palalau ʼaenī ʼa Paulo: “Ko te temi faigamālie ʼaupitō ʼaenī,” pea “ko te temi ʼaenī ʼo te haofaki.” ʼI toe manavaʼofa pea mo agaʼofa lahi ʼo te ʼAtua ko Sehova!—Eke. 34:6, 7.

Ke Mole “ ʼAlu Noa Tana Fakatuʼutuʼu”

10. Koteā te fakaʼuhiga ʼo “te temi . . . ʼo te haofaki” maʼa te kau Kilisitiano fakanofo ʼo te temi muʼa pea iā ʼaho nei?

¹⁰ Ko nātou ʼuluaki ʼaē neʼe natou maʼu te ʼu lelei ʼo te ʼofa makehe ʼo te ʼAtua, neʼe ko nātou ʼaē neʼe “fakatahi . . . mo Kilisito.” (2 Ko. 5:17, 18) Maʼa te kau Kilisitiano fakanofo ʼaia, neʼe kamata “te temi . . . ʼo te haofaki” ʼi te Penikositē ʼo te taʼu 33 ʼo totatou temi. Talu mai te temi ʼaia, neʼe foaki age ki te kau fakanofo ia te gāue ʼaē ke natou kalagaʼi “te folafola ʼo te fakatokatoka.” Iā ʼaho nei, ʼe kei fakahoko pē e te toe ʼo te kau Kilisitiano fakanofo ia “te minisitelio ʼo te fakatokatoka.” ʼE natou ʼiloʼi ko te ʼu ʼāselo e toko fā ʼaē neʼe sio kiai ia te ʼapositolo ko Soane ʼi te meʼa fakakikite ʼaē neʼe hā, ʼe natou lolotoga “puke maʼu ia te ʼu matagi e fā ʼo te kele, ke mole havili he matagi ki te kele.” Koia “ko te temi ʼaenī ʼo te haofaki” pea “ko te temi faigamālie ʼaupitō ʼaenī.” (Fakh. 7:1-3) Koia lā ʼaē talu mai te kamata ʼo te 20 sēkulō, neʼe faʼafai te toe ʼo te kau fakanofo ʼi tanatou fakahoko te gāue ʼo “te minisitelio ʼo te fakatokatoka” ke aʼu ki te ʼu potu taupotu ʼo te kele.

11, 12. Neʼe fakahā feafeaʼi e te kau Kilisitiano fakanofo ʼi te kamata ʼo te 20 sēkulō, tanatou mahino ʼaē ki te maʼuhiga ʼo te temi? (Vakaʼi te pāki ʼi te pāsina 21.)

¹¹ Ohagē ko tona tā ʼi te tohi Les Témoins de  Jéhovah : Prédicateurs du Royaume de Dieu, ʼi te kamata ʼo te 20 sēkulō, ko “C. T. Russell pea mo tona ʼu kaugā gāue, neʼe natou tui papau neʼe natou māʼuʼuli ʼi te temi ʼo te taʼukai, pea neʼe ʼaoga ki te hahaʼi ke natou logo ki te moʼoni ʼaē ʼe ina haofaki te maʼuli.” Koteā ʼaē neʼe natou fai ʼo ʼuhiga mo te faʼahi ʼaia? ʼI tanatou mahino ʼaē neʼe natou māʼuʼuli ʼi te temi ʼo te taʼukai, he “temi faigamālie ʼaupitō,” ko te ʼu tehina ʼaia neʼe mole gata ʼaki pē ʼi tanatou fakaafe ʼaē ia te hahaʼi ke natou ʼomai ʼo fakalogo ia he ʼu akonaki fakalotu, ʼaē ko he faʼahi neʼe kua fai talu mai fualoa e te kau takitaki ʼo te Keletiate. Kae neʼe kamata fakaʼaogaʼi e te kau Kilisitiano fakanofo ia te tahi ʼu faʼahiga fai moʼo tala te logo lelei. Pea ʼi te ʼu faʼahiga fai ʼaia, neʼe natou fakaʼaogaʼi fakapotopoto ia te ʼu masini foʼou moʼo fakahaʼele ki muʼa tanatou gāue.

¹² Moʼo tala te logo lelei ʼo te Puleʼaga, ko te kiʼi kūtuga ʼaia ʼo te kau minisi faʼafai, neʼe natou fakaʼaogaʼi te ʼu kiʼi pepa lotu, te ʼu kaupepa lalahi, te ʼu nusipepa, pea mo te ʼu tohi. Neʼe natou toe teuteuʼi mo te ʼu akonaki pea mo te ʼu ʼalatike ke tā ʼi te ʼu sulunale e lauʼi afe. Neʼe natou tala te ʼu polokalama Fakatohi-tapu ʼi te ʼu lātio ʼaē ʼo tonatou fenua pea mo ʼaē ʼi te mālamanei. Neʼe natou fai te ʼu ʼata fakalogologo pea mo fakaʼasi te ʼu ʼata ʼaia, ʼaki te fakatagi ʼe logo ai ki tona ʼu palalau pea mo tona musika, ko he faʼahi neʼe heʼeki fai ʼi te ʼu fale fai ʼata. Neʼe koteā te ʼu fua ʼo tanatou ʼu gāue mālohi ʼaia? Iā ʼaho nei, ʼe kua fakatokatoka ia te toko fitu miliona tupu hahaʼi mo te ʼAtua pea mo kau mo nātou ki te tala ʼo te logo ʼaenī: “Kotou fakatokatoka mo te ʼAtua.” ʼE mahino ia, ko te ʼu ʼuluaki kaugana ʼaia ʼa Sehova neʼe ko he ʼu faʼifaʼitaki lelei ʼo ʼuhiga mo te fai mālohi ʼaē ʼo te ʼu gāue ʼo te Puleʼaga, logolā te mole lahi ʼaē ʼo tonatou ʼu fealagia ʼi te temi ʼaia pea mo tonatou tokosiʼi ki te fai ʼo te gāue.

13. Ko te fakatuʼutuʼu fea ʼa te ʼAtua ʼaē ʼe tonu ke maʼuhiga kiā tātou?

¹³ ʼE kei moʼoni pē te ʼu palalau ʼaenī neʼe fai e Paulo: “Ko te temi faigamālie ʼaupitō ʼaenī.” Ko tātou ʼaē kua tou maʼu ia te ʼofa makehe ʼo Sehova, ʼe tou loto fakafetaʼi he neʼe foaki mai kiā tātou te faigamālie ʼaē ke tou logo pea mo tali ia te logo ʼo ʼuhiga mo te fakatokatoka. Koia ʼaē ʼe mole tou fakaʼauʼauganoa ai, kae ʼe tou fakalogo kātoa ki te ʼu palalau ʼaenī neʼe fai ʼe Paulo: “ ʼE matou toe kole mamahi atu kiā koutou ke ʼaua naʼa kotou tali ia te ʼofa makehe ʼo te ʼAtua ʼo fakaʼalu noa.” (2 Ko. 6:1) Ko te fakatuʼutuʼu ʼo te ʼofa makehe ʼa te ʼAtua ke “fakatokatoka te mālamanei mo ia” ʼaki ia Kilisito.—2 Ko. 5:19.

14. Koteā te ʼu faigamālie ʼe foaki ki te hahaʼi ʼi te ʼu fenua kehekehe?

¹⁴ Tokolahi te hahaʼi ʼi te mālamanei, ʼaē ʼe fakakiviʼi nātou e Satana, ʼe kei natou mamaʼo pē mai te ʼAtua pea ʼe mole heʼeki natou mahino ki te fakatuʼutuʼu ʼo te ʼofa makehe ʼa te ʼAtua. (2 Ko. 4:3, 4; 1 Soa. 5:19) Kae ʼi te ʼāsili kovi ʼo te ʼu ʼaluʼaga ʼo te kele, neʼe tali ai e te hahaʼi tokolahi te fakamahino age ʼaē, ʼe hoko te agakovi pea mo te mamahi ʼi te kele, ʼuhi ko te mālamanei ʼe kua mamaʼo mai te ʼAtua. Māʼia mo te ʼu fenua ʼaē neʼe tokolahi ai te hahaʼi neʼe mole natou tali lelei tatatou gāue fai fakamafola, kua natou tali ʼi te temi nei te logo lelei pea mo natou fai he ʼu fakatuʼutuʼu moʼo fakatokatoka mo te ʼAtua. Koia, ʼe mole ko te temi koa lā ʼaenī ke tou gāue mālohi ai pea mo faʼafai, ke logo te hahaʼi ki te pāui ʼaenī: “Kotou fakatokatoka mo te ʼAtua”?

15. ʼE mole ko he logo fakaoloolo ʼaē ʼe tou fakamafola ki te hahaʼi ʼo te ʼu potu fuli, kae ʼi tatatou fai fakamafola koteā te faʼahi ʼe tou loto tāfito ke natou mahino kiai?

¹⁵ Ko tatatou gāue ʼe mole gata pē ʼi tatatou ʼui age ki te hahaʼi, kapau ʼe natou haga ki te ʼAtua, pea ʼe tokoni age anai kiā nātou ki te fakatokatoka ʼaē ʼo tonatou ʼu fihifihia pea mo natou māʼuʼuli fiafia age anai. ʼE ko te ʼu ʼaluʼaga lā ʼaia ʼe fia maʼu  e te hahaʼi tokolahi mokā natou ʼolo ʼo misa, pea ko te ʼu lotu ʼe natou fia foaki te ʼu faʼahi ʼaia ki te hahaʼi. (2 Tim. 4:3, 4) ʼE mole ko te faʼahi ʼaia ʼaē ʼe tou kumi ʼi tatatou gāue fai fakamafola. Koʼenī te logo lelei ʼaē ʼe tou fakamafola: ko Sehova, ʼi tona ʼofa, ʼe lotolelei ke ina fakamolemole tatatou ʼu hala ʼaki ia Kilisito. Koia, ʼe feala ki te hahaʼi ke natou fakaovi pea mo fakatokatoka mo te ʼAtua. (Loma 5:10; 8:32) Kae kua vave ʼosi pē ‘te temi faigamālie lelei.’

“Ke Kotou Vela ʼi Te Laumālie”

16. Koteā ʼaē neʼe tokoni ʼaupitō kiā Paulo ke lototoʼa pea mo faʼafai ʼi tana gāue?

¹⁶ Koia, koteā ʼaē ʼe feala ke tou fai ke lahi age ai ia tatatou faʼafai ʼi te tauhi moʼoni pea ke tou taupau te faʼahi ʼaia? Ko ʼihi ʼe lagi natou aga ufiufi peʼe mole natou gutu palalau, pea lagi faigataʼa kiā nātou hanatou fakahā te ʼu meʼa ʼaē ʼi ʼonatou loto. Kae ʼe lelei ke tou manatuʼi, ko te faʼafai ʼe mole gata ʼaki pē tatatou fakahā te ʼu meʼa ʼaē ʼi ʼotatou loto peʼe ko tatatou fiafia ʼaē ki he meʼa; pea ʼe mole fakalogo ia ki te ʼuluagaaga ʼo he tahi. Neʼe fakahā lelei e Paulo peʼe koteā ʼaē ʼe tonu ke tou fai ke lahi age tatatou faʼafai pea mo tou taupau maʼu tatatou faʼafai ʼaia, ʼi tana uga fēnei ʼo tona ʼu tehina Kilisitiano: “Ke kotou vela ʼi te laumālie.” (Loma 12:11) Neʼe lahi te tokoni ʼa te laumālie ʼo Sehova ki te ʼapositolo ke lototoʼa pea mo faʼa kātaki ʼi tana gāue fai fakamafola. Talu mai te temi ʼaē neʼe pāuiʼi ai ia ia e Sesu ʼo aʼu ki te temi ʼaē neʼe pilisoniʼi fakamuli ai pea mo tona mate fakamaletile ʼi Loma, ʼaē neʼe loaloaga iā taʼu e 30 tupu, neʼe mole vaivai te faʼafai ʼa Paulo. Neʼe falala tuʼumaʼu pē ia ki te ʼAtua. Pea ko te ʼAtua, ʼaki tona laumālie, neʼe ina foaki age kiā Paulo te mālohi ʼaē neʼe ʼaoga kiā ia. Neʼe ʼui fēnei e Paulo: “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.” (Filp. 4:13) ʼE lahi anai te ʼu lelei ʼe feala ke tou maʼu ʼi tatatou ako tana faʼifaʼitaki!

17. ʼE lava feafeaʼi ke tou “vela ʼi te laumālie”?

¹⁷ Iā Loma 12:11, neʼe fakaʼaogaʼi e te ʼapositolo ko Paulo te kupu Fakakeleka ʼe fakaʼuhiga ki te kupu “pula.” (Kingdom Interlinear) Ke pula tuʼumaʼu te vai ʼi he kulo, ʼe tonu ke hili tuʼumaʼu ʼi te afi. ʼO toe fēia pē, ke tou “vela ʼi te laumālie,” ʼe ʼaoga ke tou maʼu tuʼumaʼu te laumālie ʼo te ʼAtua. Ke tou maʼu ia te laumālie ʼaia, ʼe tonu ke tou fakaʼaogaʼi ia meʼa fuli ʼaē neʼe teuteuʼi e Sehova ke feala ai hatatou mālolohi ʼi te faʼahi fakalaumālie. Ko tona fakaʼuhiga ʼaē ke tou fakahoko fakalelei ia tatatou tauhi fakafāmili pea mo tatatou tauhi ʼaē  ʼi te kōkelekāsio, ke tou fai tuʼumaʼu tatatou ako takitokotahi pea mo fakafāmili, ke tou faikole tuʼumaʼu, pea mo fakatahi tuʼumaʼu mo totatou ʼu tehina mo tuagaʼane Kilisitiano. ʼE tokoni mai anai te ʼu faʼahi fuli ʼaia ke tou maʼu “te afi” peʼe ko te mālohi, ke tou haga “vela [ai] ʼi te laumālie.”—Lau ia Gāue 4:20; 18:25.

18. ʼI totatou ʼuhiga Kilisitiano, koteā te fakatuʼutuʼu ʼaē ʼe tonu ke tou tōkakaga ʼāteaina pē kiai?

¹⁸ Ko he tahi kua papitema, ʼe ko he tahi ʼe tokaga ʼāteaina pē ki hana fakatuʼutuʼu pea ʼe faigataʼa hona fakaleluʼi mai ai peʼe fakalotovaivaiʼi ki tana fia fakahoko ʼaē ʼo tana fakatuʼutuʼu ʼaia. ʼI totatou ʼuhiga Kilisitiano, ʼe tou fakatuʼutuʼu ke tou fai ia meʼa fuli pē ʼaē ʼe loto e Sehova ke tou fai, ohagē pē ko tona fai e Sesu. (Hep. 10:7) Iā ʼaho nei, ko te finegalo ʼo Sehova ke fakatokatoka te hahaʼi tokolahi mo ia. Koia ohagē ko Sesu pea mo Paulo, tou faʼafai, ʼi te gāue ʼaia ʼaē ʼe maʼuhiga age, pea ʼe tonu ke fai iā ʼaho nei.

ʼE Kei Kotou Manatuʼi Koa?

• Koteā “te minisitelio ʼo te fakatokatoka” ʼaē neʼe foaki age kiā Paulo pea mo te tahi ʼu Kilisitiano fakanofo?

• Neʼe fakaʼaogaʼi lelei feafeaʼi e te toe ʼo te kau fakanofo ia “te temi faigamālie ʼaupitō”?

• ʼE lava feafeaʼi ki te kau minisi Kilisitiano ke natou “vela ʼi te laumālie”?

[ʼU fehuʼi ʼo te ako]

[Paki ʼo te pasina 18]

Neʼe mole toe galo ʼi he temi iā Paulo ia tana felāveʼi ʼaē mo te ʼAliki ko Sesu Kilisito