Tou Faʼafai ʼi Te Tauhi Moʼoni

“Ko te taʼukai ʼe lahi, kae ʼe tokosiʼi te kau gāue.”—MAT. 9:37.

 1. Kiā koutou lā, ʼe feafeaʼi he tahi ʼe tonu ke ina fai he gāue ʼe maʼuhiga?

 ʼI MUʼA ʼo te ʼosi ʼo te ʼaho, ʼe ʼi ai te pepa ʼe tonu ke foimo vakaʼi. Koteā ʼaē ʼe kotou fai? ʼE kotou tohi ʼi te pepa ʼaia: “KE FOIMO VAKAʼI!” ʼE kotou ʼolo ki hakotou fakatuʼutuʼu mo he tahi, kae kua kotou tauhala. Koteā ʼaē ʼe kotou fai? ʼE kotou TULIKAKI! ʼE moʼoni, kā ʼe ʼi ai he meʼa ʼe tonu ke kotou fai pea mo kua nounou te temi, ʼe kotou loto hoha anai. Kua tā vave tokotou mafu pea ʼe kotou fakahoko fakavilivili atu aipē takotou gāue ʼaia. Ko te fakaʼuhiga lā ʼaia ʼo he gāue ʼe maʼuhiga pea ʼe tonu ke tulikaki.

 2. Koteā te gāue ʼaē ʼe maʼuhiga age ki te kau Kilisitiano moʼoni iā ʼaho nei?

² Maʼa te kau Kilisitiano moʼoni iā ʼaho nei, ʼe mole he tahi age gāue ʼe maʼuhiga age ʼi te fakamafola ʼo te logo lelei ʼo te Puleʼaga, pea mo te fai ʼo he ʼu tisipulo ʼi te ʼu hahaʼi ʼo te ʼu fenua fuli pē. (Mat. 24:14; 28:19, 20) ʼI tana talanoa ki te ʼu palalau ʼaē neʼe fai e Sesu, neʼe tohi e te tisipulo ko Maleko ko te gāue ʼaia ʼe tonu ke “ ʼuluaki” fai, ko tona fakaʼuhiga ke fai ʼi muʼa ʼo te hoko mai ʼo te fakaʼosi. (Mko. 13:10) ʼE moʼoni, ʼe tonu ke fēia. Neʼe ʼui fēnei e Sesu: “Ko te taʼukai ʼe lahi, kae ʼe tokosiʼi te kau gāue.” Neʼe mole feala ke fakatuatuai te tānaki ʼo te taʼukai; neʼe tonu ke tānaki ʼi muʼa ʼo te ʼosi ʼo te taʼukai.—Mat. 9:37.

 3. Koteā ʼaē neʼe fai e te tokolahi moʼo tali ki te maʼuhiga ʼaē ke fakahoko te gāue fai fakamafola?

³ Mai tona ʼaluʼaga ʼaē ʼe maʼuhiga ʼaupitō kiā tātou te gāue fai fakamafola, koia ʼe tonu ai ke lahi tatatou fakaʼaogaʼi kiai ia totatou temi, mo totatou mālohi pea mo tou tōkakaga tāfito kiai, ʼo tahi mulimuli pē ki totatou ʼu fealagia. Tokolahi te ʼu tehina mo tuagaʼane neʼe natou fai te faʼahi ʼaia. Ko ʼihi neʼe natou fakafaigafua ia tonatou maʼuli ke feala hanatou kau ki te minisitelio temi kātoa, ʼo natou pioniē peʼe natou misionea, peʼe natou gāue ʼi he Petele. ʼE natou maʼumaʼua ʼaupitō. Neʼe lagi lahi te ʼu sākilifisio neʼe natou fai, pea lahi mo te ʼu fihifihia neʼe felāveʼi mo nātou. Kae neʼe tapuakiʼi ʼaupitō nātou e Sehova. ʼE tou fiafia kiā nātou ʼaia. (Lau ia Luka 18:28-30.) Ko ʼihi, logolā ʼe mole feala ke natou kau ki te gāue fai fakamafola temi kātoa, kae ʼo mulimuli pē ki tonatou ʼu fealagia, ʼe lahi te temi ʼaē ʼe natou fakaʼaogaʼi ki te gāue ʼaia ʼe ina haofaki te maʼuli ʼo te hahaʼi, ʼo kau kiai mo tanatou tokoni ʼaē ki tanatou fānau ke haofaki mo nātou.—Teu. 6:6, 7.

 4. He koʼē ʼe feala ki ʼihi ke mole kei natou taupau maʼu ʼi tonatou ʼatamai ia te maʼuhiga ʼo te temi?

⁴ Ohagē ko te faʼahi neʼe kua tou talanoa kiai, ʼe fakapipiki māhani te foimo fai ʼo he gāue ki he temi kua fakatuʼakoi, ki he ʼaho kua fakatuʼutuʼu kiai, ki he temi ke fakaʼosi ai. ʼE tou māʼuʼuli nei ʼi te temi fakaʼosi, pea ʼe lahi te ʼu fakamoʼoni kiai, ʼi te Tohi-Tapu pea mo te hisitolia ʼo te tagata. (Mat. 24:3, 33; 2 Tim. 3:1-5) Kae ʼe mole he tahi ʼe ina ʼiloʼi te temi totonu ʼaē kā hoko mai ai anai te fakaʼosi. ʼI tana foaki te ʼu agaaga ʼo “te fakaʼiloga” ʼaē kā hā ai “te fakaʼosi ʼo te tuʼu ʼo te ʼu faʼahiga meʼa ʼaenī,” neʼe ʼui fakahagatonu fēnei e Sesu: “Pea ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼāselo ʼo te lagi pe ko te ʼAlo, kae gata pē ki te Tamai.” (Mat. 24:36) Koia, ʼe lagi feala ai ki ʼihi ke faigataʼa hanatou taupau tuʼumaʼu pē ʼi tonatou ʼatamai te maʼuhiga ʼaē ʼo te temi, tāfito lā mokā kua fualoa tanatou mahino ki te maʼuhiga ʼo te temi. (Taag. 13:12) ʼE kotou manatu fēia koa ʼi ʼihi temi? Koteā ʼaē ʼe feala ke tokoni mai kiā tātou, ke lahi age tatatou mahino ki te maʼuhiga ʼo te gāue ʼaē ʼe loto e Sehova ʼAtua pea mo Sesu Kilisito ke tou fai iā ʼaho nei, peʼe ke tou taupau maʼu ʼi totatou ʼatamai?

Tou Fakatokagaʼi Age Muʼa Ia Totatou Faʼifaʼitakiʼaga, Ia Sesu

 5. Ko te ʼu ʼaluʼaga fea ʼaē neʼe fakahā ai e Sesu ʼe maʼuhiga kiā te ia tana minisitelio?

⁵ Iā nātou fuli ʼaē neʼe natou fakahā ʼi tanatou selevisi ʼaē ki te ʼAtua ʼe maʼuhiga kiā nātou te gāue ʼaia, ʼe mahino ia ʼe ko Sesu Kilisito te  faʼifaʼitaki lelei ʼo ʼuhiga mo te faʼahi ʼaia. Ko te tupuʼaga ʼo te maʼuhiga ʼaē kiā te ia ʼo tana gāue, he neʼe lahi tana ʼu gāue neʼe tonu ke ina fakahoko iā taʼu pē e tolu vaelua. Kae neʼe mole he tahi neʼe lahi age tana ʼu gāue, ʼi te ʼu gāue ʼaē neʼe fai e Sesu ʼi te tauhi moʼoni. Neʼe ina fakahā te huafa ʼo tana Tamai pea mo tana fakatuʼutuʼu, mo fakamafola te logo lelei ʼo te Puleʼaga, mo ina tala te mālualoi pea mo te ʼu akonaki hala ʼa te kau takitaki lotu, pea mo lagolago ki te pule faʼitaliha ʼa Sehova ʼo aʼu pē lā ki tona mate. Neʼe gāue kinakina ʼi tana feʼaluʼaki ʼi te fenua—ʼo faiakonaki, ʼo tokoni pea mo fakamālōlō te hahaʼi. (Mat. 9:35) Neʼe mole heʼeki he tahi neʼe ina fai he ʼu toe gāue fēia ʼi he temi nounou. Neʼe faiga mālohi Sesu ʼi te ʼu gāue ʼaē neʼe ina fakahoko.—Soa. 18:37.

 6. Koteā ʼaē neʼe tokaga tāfito kiai ia Sesu ʼi tona maʼuli?

⁶ Koteā ʼaē neʼe ina uga ai ia Sesu ke gāue mālohi ʼi tana minisitelio? ʼO fakatafito ki te ʼu lea fakapolofetā ʼa Taniela, neʼe feala ai ke ʼiloʼi e Sesu peʼe ko temi ʼe fia ʼe tonu ai ke ina fakahoko ia tana gāue ʼo mulimuli ki te kaletalio ʼa Sehova. (Tan. 9:27) Koia, ohagē pē ko tona kua ʼosi fakakikite, ko tana minisitelio ʼi te kele neʼe tonu ke fakaʼosi “ ʼi te vaelua ʼo te vāhaʼa,” peʼe ko te hili ʼo te ʼu taʼu e tolu vaelua. Hili pē te kiʼi temi nounou ki tana hū fakaofoofo ʼaē ki Selusalemi ʼi te fasigā taʼu mātala ʼo te taʼu 33 ʼo totatou temi, neʼe ʼui fēnei e Sesu: “Kua [hoko mai] te hola ʼaē ʼe tonu ai ke fakakolōliaʼi te Foha ʼo te tagata.” (Soa. 12:23) Logolā neʼe ʼiloʼi e Sesu kua ovi mai tona temi mate, kae neʼe mole ko te faʼahi ʼaia ʼaē neʼe maʼuhiga tāfito kiā ia ʼi tona maʼuli, pea neʼe mole ko te tupuʼaga tāfito ʼaia ʼo tana gāue mālohi. Kae neʼe tokaga tāfito ia ʼo fakaʼaogaʼi te ʼu faigamālie fuli moʼo fakahoko te finegalo ʼo tana Tamai, pea mo fakahā ia tona ʼofa ʼaē ki te hahaʼi ʼo tona temi. Ko tona ʼofa ʼaē neʼe ina uga ai ia ia ke ina fakamāʼopoʼopo tana ʼu tisipulo pea mo akoʼi nātou, ʼo ina fekauʼi ai nātou ke natou ʼolo ʼo fai fakamafola. Neʼe ina fai te faʼahi ʼaia, ke natou hoko atu te gāue ʼaē neʼe ina kamata pea ke lahi age te ʼu gāue ʼaē kā natou fai ʼi te ʼu gāue ʼaē neʼe ina fai.—Lau ia Soane 14:12.

7, 8. Neʼe malave feafeaʼi ki te kau tisipulo te kapu ʼaē e Sesu mai te fale lotu te kau faifakatau koloa, pea he koʼē neʼe fai e Sesu te faʼahi ʼaia?

⁷ ʼI te maʼuli ʼo Sesu, neʼe hoko te faʼahi neʼe hā lelei ai ia tana faʼafai. Neʼe hoko te faʼahi ʼaia ʼi te kamataʼaga pē ʼo tana minisitelio, ʼi te temi ʼo te Pāsikate ʼo te taʼu 30 ʼo totatou temi. Neʼe ʼomai Sesu pea mo tana ʼu tisipulo ki Selusalemi pea neʼe natou sio ʼi te fale lotu ki “te hahaʼi ʼaē ʼe natou fakatau te ʼu vītulo, te ʼu ovi mo te ʼu lupe, pea mo te kau fetogi paʼaga ʼi tonatou ʼu hekaʼaga.” Koteā ʼaē neʼe fai e Sesu, pea neʼe malave feafeaʼi te faʼahi ʼaia ki tana ʼu tisipulo?—Lau ia Soane 2:13-17.

⁸ ʼAki te meʼa ʼaē neʼe fai pea mo ʼui e Sesu ʼi te temi ʼaia, neʼe manatuʼi ai e tana ʼu tisipulo te ʼu palalau fakakikite ʼaenī neʼe tohi e Tavite ʼi tana tahi pesalemo: “Ko te faʼafai ʼaē ki tou fale, neʼe ina mofi au.” (Pes. 69:9) He koʼē neʼe manatuʼi e te kau tisipulo te ʼu palalau ʼaia? Koteʼuhi neʼe gata pē ki he tahi neʼe uga e te taʼi faʼafai ʼaia, ke feala hana fai he meʼa fēia, ʼo tupu ʼaki ai hona tuʼutāmakiʼia. Ko te ʼu pule takitaki ʼo te fale lotu: te kau pelepitelō, mo te kau sekelipa pea mo ʼihi atu, neʼe natou lagolago ki te ʼu faifakatau kākā ʼaē neʼe fai ʼi te fale lotu. Neʼe liliu ia Sesu ko he fili ʼo te kau takitaki lotu ʼo te temi ʼaia, ʼi tana tala ʼaē ʼi muʼa ʼo te kaugamālie ia tanatou kākā pea mo tana kapu ʼaē mai te fale lotu te kau faifakatau koloa. Ohagē ko te manatu tonu ʼaē neʼe maʼu e te kau tisipulo, neʼe hā lelei ʼi te lakaga ʼaia tana ‘faʼafai ʼaē ki te fale ʼo te ʼAtua,’ peʼe ko tana faʼafai ʼaē ki te tauhi moʼoni. Kae koteā koa te fakaʼuhiga ʼo te faʼafai? ʼE kehe koa ia mo te fai fakatevili ʼo he gāue?

Tou Fakatatau Te Fai Fakatevili ʼo He Gāue Pea Mo Te Faʼafai ʼi He Gāue

 9. ʼE fakaʼuhiga feafeaʼi he tahi ʼe faʼafai?

⁹ Ko he tahi ʼe faʼafai ʼe ko he tahi ʼe ina fakahoko fakamālotoloto hana gāue. ʼE mahino ia, ʼe feala ke tou ʼui neʼe fēia te fakahoko ʼaē e Sesu ʼo tana minisitelio. Koia, ʼe fakaliliu fēnei ʼi te Tohi-Tapu Bible en français courant: “Ko te ʼofa ʼaē ʼe au maʼu ki tou fale, ʼe vela iā au ohagē ko he afi.” ʼE lelei ke tou tokagaʼi, ʼi ʼihi lea ʼo te Potu Asia ko te kupu “faʼafai” ʼe natou fakaliliu fēnei: “Ko he loto ʼe vela.” ʼE mole tou punamaʼuli ai ki te manatuʼi ʼaē e te kau tisipulo te ʼu palalau ʼa Tavite, ʼi te temi ʼaē neʼe natou sisio ai ki te meʼa ʼaē neʼe fai e Sesu ʼi te fale lotu. Kae koteā ʼaē neʼe tupu ai te vela  ʼo te loto ʼo Sesu, ʼo uga ai ia ia ke gāue mālohi ʼi tana minisitelio?

10. Koteā te fakaʼuhiga ʼo te kupu “faʼafai” ʼi te Tohi-Tapu?

¹⁰ Ko te kupu “faʼafai” ʼaē ʼe fakaʼaogaʼi e Tavite ʼi te Pesalemo, ʼe haʼu mai te kupu Fakahepeleo ʼe tautau fakaliliu ʼi ʼihi vaega ʼo te Tohi-Tapu ʼaki te kupu “maheka.” a ʼI ʼihi temi ʼe fakaliliu fēnei ʼi te Tohi-Tapu Traduction du monde nouveau: “Fakamaʼua he pipiki ʼāteaina pē.” (Lau ia Ekesote 20:5; 34:14; Sosue 24:19.) ʼE ʼui fēnei ʼi te tikisionalio Fakatohi-tapu ʼo ʼuhiga mo te kupu ʼaia: “ ʼI te agamāhani ʼe fakaʼaogaʼi ki te nofo ʼohoana. . . . Ohagē pē ko te maheka ʼaē ʼe fefakamaʼuʼaki e he tagata ʼohoana pea mo he fafine ʼohoana ʼi tonā maʼuli fakataumātuʼa, ʼe ko he fefakamaʼua mālohi ke nā fepipiki ʼāteaina pē, pea ʼe toe fēia mo te ʼAtua ʼe ina fakamaʼua te taʼi pipiki ʼāteaina ʼaia ki tana hahaʼi ʼaē ʼe tonu ke natou fakahā age kiā te ia.” Koia ko te fakaʼuhiga ʼo te faʼafai ʼi te Tohi-Tapu, ʼe mole gata pē ʼi hata fakahoko fakamālotoloto he gāue, ohagē ko te hahaʼi tokolahi ʼaē ʼe natou lagolago fakavale ki he faigaoʼi ʼe natou manako kiai. Neʼe faʼafai Tavite maʼa te ʼAtua, pe neʼe maheka, ko tona fakaʼuhiga ʼaē neʼe mole ina tali he fakafeagai peʼe ko he laukovi ki te ʼAtua, pea neʼe holi mālohi ia ke ina puipui he huafa ʼe lelei peʼe ke ina fakatonutonuʼi he aga ʼe kovi.

11. Koteā ʼaē neʼe tupu ai te gāue mālohi ʼa Sesu ʼi tana minisitelio?

¹¹ Neʼe mole faihala te ʼu tisipulo ʼa Sesu ʼi tanatou manatuʼi te ʼu palalau ʼa Tavite, ʼi te temi ʼaē neʼe natou sisio ai ki te aga ʼaē neʼe fai e Sesu ʼi te fale lotu. Ko te tupuʼaga ʼo te gāue mālohi ʼaē ʼa Sesu ʼi tana minisitelio, mole gata pē he neʼe nounou tona temi kae ʼuhi ʼaē he neʼe faʼafai ia pe neʼe maheka, ʼo ʼuhiga mo te huafa ʼo tana Tamai pea mo te tauhi maʼa. ʼI tana sio ʼaē ki te ʼu laukovi pea mo te ʼu pātapāta ʼaē neʼe fai ki te huafa ʼo te ʼAtua, koia neʼe matatonu ai ia tana faʼafai ʼi tana minisitelio, peʼe ko tana maheka pea mo ina fakatonutonuʼi ai te ʼu meʼa ʼaē neʼe hoko. ʼI te sio ʼa Sesu ki te hahaʼi fakaʼofaʼofa ʼaē neʼe fakamamahiʼi pea mo gaohi koviʼi e te kau takitaki lotu, neʼe tupu ai tana tokaga fakamālotoloto ʼaē ʼo fakafīmālie te hahaʼi, ʼo toe fēia mo tana tala mālohi iā muʼa ʼo te kaugamālie te ʼuhiga moʼoni ʼaē ʼo te kau takitaki lotu.—Mat. 9:36; 23:2, 4, 27, 28, 33.

Tou Faʼafai ʼo ʼUhiga Mo Te Tauhi Moʼoni

12, 13. ʼI te temi nei, koteā ʼaē neʼe fai e te kau takitaki lotu ʼo te Keletiate ʼo ʼuhiga (a) mo te huafa ʼo te ʼAtua? (b) mo te Puleʼaga ʼo te ʼAtua?

¹² ʼE toe tatau te ʼaluʼaga ʼo te hahaʼi lotu ʼo te temi ʼaenī mo te hahaʼi ʼo te temi ʼaē ʼo Sesu, peʼe kovi age lā ia. Ohagē lā, kotou manatuʼi ko te ʼuluaki faʼahi ʼaē neʼe akoʼi e Sesu ke faikole kiai tana ʼu tisipulo, neʼe ko te huafa ʼo te ʼAtua, ʼo ina ʼui fēnei: “Ke tapuhā tou huafa.” (Mat. 6:9) ʼE tou sisio koa ki te kau takitaki lotu, tāfito lā te kau takitaki ʼo te Keletiate, ʼe natou akoʼi ki te hahaʼi ke natou ʼiloʼi te huafa ʼo te ʼAtua pea mo natou fakatapuhā kiai, peʼe ke natou fakamaʼuhigaʼi te huafa ʼaia? Kailoa ia, ʼe mole natou fakahā te moʼoni ʼo ʼuhiga mo te ʼAtua, kae ʼaki te ʼu taʼi akonaki hala ohagē  ko te Tahitolu, mo te maʼuli tuputupua ʼo te nefesi ʼo te tagata, pea mo te ʼifeli, neʼe liliu ai te ʼAtua kiā mata ʼo te hahaʼi ko he misitelio, ʼe faigataʼa hanatou mahino ki ai, ʼe agakovi, pea mo fiafia ia ʼi te fakamamahiʼi ʼo te hahaʼi. ʼE toe laukovi te kau takitaki lotu ki te ʼAtua ʼaki tanatou aga heʼeʼaoga pea mo tanatou mālualoi. (Lau ia Loma 2:21-24.) Tahi ʼaē, neʼe natou faiga mālohi ke natou fufū te huafa ʼo te ʼAtua, ʼo mole natou tohi ʼi tanatou ʼu Tohi-Tapu. Neʼe natou tāʼofi ai te hahaʼi ke mole natou fakaovi ki te ʼAtua pea ke mole natou felōgoi lelei mo ia.—Sake 4:7, 8.

¹³ Neʼe toe akoʼi e Sesu ki tana kau tisipulo ke natou faikole ʼo ʼuhiga mo te Puleʼaga ʼo te ʼAtua, ʼo ina ʼui fēnei: “Ke hoko mai tou puleʼaga. Ke fai tou finegalo ʼi te kele, ohagē ko selō.” (Mat. 6:10) Logolā te lau liuliuga tuʼumaʼu ʼo te faikole ʼaia e te kau takitaki lotu ʼo te Keletiate, kae ʼe natou uga te hahaʼi ke natou lagolago ki te ʼu kautahi fakapolitike pea mo ʼihi age kautahi fakatagata. Tahi ʼaē meʼa, ʼe natou manukinuki kiā nātou ʼaē ʼe natou faiga ke natou fakamafola te Puleʼaga ʼaia pea mo fakamoʼoni kiai. Koia tokolahi iā nātou ʼaē ʼe natou lau ko he kau Kilisitiano, ʼe mole natou talanoa ʼo ʼuhiga mo te Puleʼaga ʼo te ʼAtua, pea mole natou tui kiai.

14. Neʼe fetogi feafeaʼi e te kau takitaki ʼo te Keletiate te Folafola ʼa te ʼAtua?

¹⁴ ʼI tana faikole ki te ʼAtua, neʼe ʼui fakalelei fēnei e Sesu: “Ko tau folafola ʼe moʼoni.” (Soa. 17:17) Pea ʼi tana kei maʼuli ʼaē ʼi te kele, neʼe fakahā e Sesu ʼe ina fakanofo anai “te tagata kaugana agatonu mo poto” ke ina foaki te meʼa kai fakalaumālie ki tana hahaʼi. (Mat. 24:45) Logolā te lau ʼaē e te kau takitaki ʼo te Keletiate ʼe natou akoʼi te Folafola ʼa te ʼAtua ki te hahaʼi, kae ʼe natou fakahoko agatonu koa te gāue ʼaē neʼe tuku age e te Pule kiā nātou? Kailoa ia, heʼe ʼi te agamāhani ʼe natou ʼui ko te ʼu fakamatala ʼaē ʼe tuʼu ʼi te Tohi-Tapu ʼe ko he ʼu fāgana ia. ʼE mole ʼui ki te kau takitaki ʼo te Keletiate ke natou foaki te meʼa kai fakalaumālie ki tanatou faga ovi, ke maʼu ai e te faga ovi he maʼuli fīmālie pea mo he mahino ki te Folafola ʼa te ʼAtua, kae neʼe natou fakaoloolo te hahaʼi tui ʼaki he ʼu filosofia fakatagata. ʼO hilifaki atu kiai, neʼe mole kei natou akoʼi ki te hahaʼi te ʼu lēkula ʼa te ʼAtua ʼo ʼuhiga mo te aga ʼaē ʼe tonu ke fai, kae natou fetogi ʼaki te ʼu aga ʼe ʼui ʼe ko te ʼu aga foʼou ʼe tonu ke fai, ʼi tanatou fia lelei ʼaē ki tanatou hahaʼi lotu.—2 Tim. 4:3, 4.

15. ʼE malave feafeaʼi kiā koutou te ʼu gāue fuli ʼaē neʼe fai e te kau takitaki lotu ʼi te huafa ʼo te ʼAtua?

¹⁵ Koia ʼaki te ʼu aga fuli ʼaia neʼe fai e te kau takitaki ʼo te Keletiate, ʼaē neʼe natou ʼui neʼe natou fai ʼi te huafa ʼo te ʼAtua ʼo te Tohi-Tapu, tokolahi te hahaʼi loto fakamālotoloto, neʼe natou lotomamahi peʼe mole kei natou tui ki te ʼAtua pea mo te Tohi-Tapu. Neʼe tō te hahaʼi loto fakamālotoloto ʼaia ki te hele ʼa Satana pea mo tona mālama agakovi ʼaenī. Kā kotou sisio pea mo logo ki te ʼu taʼi aga ʼaia ʼe hoko ʼi te ʼaho fuli, ʼe malave feafeaʼi kiā koutou? ʼI tokotou ʼuhiga kaugana ʼa Sehova, kā kotou sisio mo logo ki te ʼu laukovi pea  mo te ʼu pātapāta ʼaē ʼe fai ki te huafa ʼo te ʼAtua, ʼe mole uga ai koa koutou ke kotou fakatonutonuʼi te faʼahi ʼaia? Kā kotou sisio ki te kākāʼi pea mo te gaohi koviʼi ʼo te hahaʼi ʼaē ʼe loto fakamālotoloto pea mo aga fakahagatonu, ʼe mole uga ai koa koutou ke kotou fakafīmālieʼi te ʼu nefesi ʼaē ʼe taʼomia? ʼI te sio ʼaē ʼa Sesu ki te hahaʼi ʼo tona temi neʼe natou “ ʼāhua pea mo mavetevete, ohagē ko he faga ovi ʼe mole honatou tagata tauhi,” neʼe mole gata pē ʼi tona ʼofa mamahi ʼaē kiā nātou, kae neʼe ina ‘kamata akoʼi age kiā nātou te ʼu akonaki ʼe lahi.’ (Mat. 9:36; Mko. 6:34) ʼE lahi te ʼu tupuʼaga ʼe tou maʼu ke tou faʼafai ai ki te tauhi moʼoni, ohagē ko Sesu.

16, 17. (a) Koteā ʼaē kā ina uga anai tātou ke tou gāue mālohi ʼi te minisitelio? (b) Koteā ʼaē kā tou vakaʼi anai ʼi te ʼalatike kā hoa mai?

¹⁶ Kapau ʼe tou faʼafai ʼi tatatou minisitelio, pea ʼe fakaʼuhiga makehe ai kiā tātou te ʼu palalau ʼa te ʼapositolo ko Paulo ʼaē ʼe tou maʼu iā 1 Timoteo 2:3, 4. (Lau.) ʼE mole gata pē tatatou gāue kinakina ʼi te minisitelio ʼi tatatou ʼiloʼi ʼaē ʼe tou lolotoga māʼuʼuli nei ʼi te ʼu ʼaho fakaʼosi, kae ʼe tou toe gāue kinakina heʼe tou mahino ʼe ko te finegalo ʼo te ʼAtua. ʼE loto e te ʼAtua ke maʼu e te hahaʼi te ʼatamai mālama ʼo te moʼoni, ke feala ai mo nātou ke natou ako ke natou tauhi kiā te ia pea ke tapuakina ai mo nātou. ʼE tou loto ke tou gāue mālohi ʼi te minisitelio, mole tupu tāfito heʼe kua nounou te temi, kae ʼuhi heʼe tou fia fakamaʼuhigaʼi te huafa ʼo te ʼAtua pea mo tokoni ki te hahaʼi ke natou ʼiloʼi tona finegalo. ʼE tou faʼafai ʼi te tauhi moʼoni.—1 Tim. 4:16.

¹⁷ ʼI totatou ʼuhiga hahaʼi ʼa Sehova, neʼe tapuakina tātou ʼaki te ʼatamai mālama ʼo te moʼoni ʼo ʼuhiga mo te fakatuʼutuʼu ʼa te ʼAtua ki te mālamanei pea mo te kele. ʼE feala ke tou tokoni ki te hahaʼi ke natou maʼu te fiafia pea mo he ʼamanaki ʼe moʼoni ki te kā haʼu. ʼE feala ke tou fakahā age kiā nātou, peʼe feafeaʼi hanatou hao mokā hoko mai anai te fakaʼauha ʼo te tuʼu ʼo te ʼu faʼahiga meʼa ʼa Satana. (2 Tes. 1:7-9) ʼE mole tou ʼiʼita anai peʼe tou lotovaivai heʼe matatuaiʼia kiā tātou te ʼaho ʼo Sehova, kae ʼe tou fiafia anai ʼi te kei toe ʼo he temi ke tou gāue mālohi ai ki te tauhi moʼoni. (Mik. 7:7; Hap. 2:3) Koteā ʼaē ʼe feala ke tou fai ke lahi age tatatou faʼafai? ʼE tou vakaʼi anai te faʼahi ʼaia ʼi te ʼalatike kā hoa mai.

[Nota]

ʼE Feala Koa Hakotou Fakamahino?

• Koteā ʼaē neʼe ina uga ai ia Sesu ke gāue mālohi ʼi tana minisitelio?

• Koteā te fakaʼuhiga ʼo te kupu “faʼafai” ʼi te Tohi-Tapu?

• Koteā ʼaē ʼe tou sisio kiai iā ʼaho nei ʼe ina uga tātou ke tou faʼafai ʼi te tauhi moʼoni?

[ʼU fehuʼi ʼo te ako]

[Paki ʼo te pasina 15]

Neʼe tokaga tāfito Sesu ʼo fakahoko ia te finegalo ʼo tana Tamai pea mo fakahā tona ʼofa ki te hahaʼi ʼo tona temi

[Paki ʼo te pasina 16]

ʼE lahi te ʼu tupuʼaga ʼe tou maʼu ke tou faʼafai ai ʼi te tauhi moʼoni