ʼE ʼi Ai Te ʼu Laumālie ʼe Natou Māʼuʼuli ʼi Te Potu Fakalaumālie​—Kae ʼe Ko Ai Koa Ia Nātou?

ʼI Eulopa, ko te finematuʼa ʼe hū ki te ʼēkelesia, mo tona lōsalio, pea mo tuʼu tuli ʼaki he aga fakaʼapaʼapa iā muʼa ʼo te fakatātā ʼo Malia. ʼI Afelika, ko he fāmili ʼe natou liligi te moʼi gin (ko te kava mālohi) ʼo ovi ki te falemaka ʼo tonatou kāiga neʼe fakaʼapaʼapaʼi. ʼI Amelika, ko te tagata kei tūpulaga ʼe sēsuniō pea mo metitāsio, ʼi tana fia felōgoi mo he ʼāselo ʼaē ʼi tana manatu ʼe ko tona ʼāselo tauhi. ʼI Asia, ko te pātele ʼe ina tutu te ʼu meʼa neʼe fai ʼaki te pepa ʼe lanu kehekehe moʼo mōlaga ki te ʼu laumālie ʼo te ʼu kui.

KOTEĀ te faʼahi ʼe tatau ai te ʼu hahaʼi ʼaenī neʼe kua tou ʼosi palalau ki ai? ʼE natou tui fuli ʼe ʼi ai te ʼu laumālie ʼe natou māʼuʼuli ʼi te potu fakalaumālie, ʼe feala hanatou felōgoi mo te hahaʼi pea ʼe feala ke natou malave ʼaupitō ki te maʼuli ʼo te tagata. ʼE moʼoni, ʼe mole mata foʼou te tui ki te faʼahi ʼaia pea mole tou punamaʼuli kiai. Ko te faʼahi ʼaē ʼe tou punamaʼuli kiai ʼe ko tanatou mole manatu tahi ʼo ʼuhiga mo nātou ʼaē ʼe māʼuʼuli ʼi te potu fakalaumālie.

ʼE tauhi te kau Mahometa ki te ʼAtua pē e tahi, ia Allah. a Ko te hahaʼi ʼo te Keletiate ʼe natou ʼui ko te ʼAtua ko he Tahitolu, ʼe ʼAtua te Tamai, ʼe ʼAtua te ʼAlo pea ʼe ʼAtua te Laumālie Māʼoniʼoni. Ko te kau Inituisi ʼe natou tui ki te ʼu ʼatua ʼe lauʼi afe pea mo te ʼu ʼatua fafine. Ko ʼihi hahaʼi ʼe natou ʼui ʼe nonofo te ʼu laumālie ʼi ʼihi manu, ʼi te ʼu fuʼu ʼakau, ʼi te ʼu maka pea mo te ʼu vaitafe. Pea ko ʼihi leva ʼe natou mulimuli ki te ʼu manatu ʼo he ʼu tohi, mo he ʼu ʼata, pea mo he ʼu polokalama televisio ʼo ʼuhiga mo te ʼu ʼāselo, mo te ʼu temonio, te ʼu laumālie kovi pea mo te ʼu meʼa fakamataku, mo te ʼu ʼatua pea mo te ʼu ʼatua fafine.

ʼE lahi te kehekehe pea mo te fakafeagai ʼo te ʼu manatu ʼo ʼuhiga mo te ʼu ʼatua. Pea ʼe toe lahi foki te kehekehe pea mo te fakafeagai ʼo te ʼu manatu ʼo ʼuhiga mo tatatou felōgoi mo nātou. Koia ʼi tona fakahagatonu ʼe mole feala ke tou ʼui ko te ʼu fakafelōgoi fuli mo te ʼu laumālie ʼe lelei. Tou fakakaukauʼi age muʼa ia te faʼahi ʼaenī: ʼI muʼa ʼo hatatou fai telefoni ki he tahi ʼe tonu ke tou ʼiloʼi peʼe tou fai telefoni kiā ai, pea ʼe tonu ke tou falala ʼe maʼuli moʼoni ia ia ʼaē ʼe tou fai telefoni ki ai pea ʼe ina tali mai anai ki tatatou fai telefoni age. Ko hatatou faiga ke tou felōgoi mo he tahi ʼe mole maʼuli moʼoni ʼe vaʼiganoa. Kae, ko te meʼa ʼaē ʼe kovi age ko te fakafelōgoi mo he tahi ʼe kākā ʼe fakatupu tuʼutāmaki.

Kae ko ai koa ʼaē ʼe maʼuli moʼoni ʼi te potu fakalaumālie? Ko te Tohi-Tapu ʼe mole ina tali mai pē ki te fehuʼi ʼaia kae ʼe ina toe fakamahino mai pe ko ai ʼaē ʼe tou felōgoi mo nātou pea feafeaʼi tanatou tali mai. ʼE fakalotomālohiʼi koutou ke hoko atu takotou lau te ʼu ʼalatike ʼaē kā hoa mai. ʼE lagi kotou punamaʼuli anai ʼi te ʼu manatu ʼaē kā fakahā mai ʼi te Tohi-Tapu.

[Nota]