Ko Ai ʼAē ʼe Tonu Ke Tou Felōgoi Mo Ia ʼi Te Potu Fakalaumālie?

KO TE ʼAtua Māfimāfi neʼe ina foaki ʼihi gāue ki ʼihi ʼāselo. Ohagē lā, neʼe ina tuku kiā Sesu Kilisito ke ina puleʼi te kele, pea mo fakanofo he ʼu ʼāselo agatonu ke natou tokoni ki te fakamafola ʼo te logo lelei. (Fakahā 14:6) Kae ʼe mole tatau ia mo te faikole. Neʼe mole ina tuku age ki te kau ʼāselo te tuʼulaga ʼaē ke fakalogo ki tatatou ʼu faikole. Ko tatatou ʼu faikole ʼe ʼalu fakahagatonu pē ki te ʼAtua.

Ko Sehova “ ʼaē ʼe fagono ki te faikole.” (Pesalemo 65:2) ʼE fagono ki tatatou ʼu faikole, pea ʼe ina tali mai. ʼO ʼuhiga mo te faikole, neʼe faitohi fēnei ia te ʼapositolo ko Soane ki te ʼu kaugā gāue ʼa Sehova: “Tatau aipē peʼe koteā he meʼa ʼe tou kole ʼo mulimuli ki tona finegalo, kae ʼe fagono ia [te ʼAtua] kiā tātou. Tahi ʼaē meʼa, kapau ʼe tou ʼiloʼi ʼe fagono ia ki te meʼa ʼaē ʼe tou kole age, pea ʼe tou ʼiloʼi ai ʼe tou maʼu anai te ʼu meʼa ʼaē ʼe tou kole, he neʼe tou kole age kiā te ia te ʼu meʼa ʼaia.”—1 Soane 5:14, 15.

Ko te kau ʼāselo agatonu, ʼe mole natou loto ke tou pāui age kiā nātou peʼe tou faikole age kiā nātou. ʼE natou mahino pea ʼe natou lagolago ki te fakatuʼutuʼu ʼa te ʼAtua ʼo ʼuhiga mo te faikole, ʼaē ʼi ʼihi temi ʼe fakaʼaogaʼi ai ia nātou ʼi te ʼu gāue ʼaia ʼa te ʼAtua. ʼO feafeaʼi? ʼI te temi ʼaē neʼe faikole ai te polofetā ko Taniela kiā Sehova ʼo ʼuhiga mo te fakaʼauha ʼo Selusalemi, neʼe tali e Sehova  ki te faikole ʼa Taniela ʼo ina fekauʼi ifo te ʼāselo ko Kapeliele ke ina tala he logo fakalotomālohi.—Taniela 9:3, 20-22.

ʼE Feala Koa Ke Tou Felōgoi Mo Te Kau Mate?

ʼE tonu koa ke tou faiga ke tou felōgoi mo nātou ʼaē kua mamate? ʼE lahi te ʼu fakamatala ʼa te hahaʼi ʼe natou ʼui neʼe natou fai palalau mo te ʼu laumālie ʼo te kau mate. Ohagē lā ʼi Ilelani ko te fafine neʼe felōgoi mo te fafine faifakalauʼakau neʼe ina ʼui age ʼi te pō ʼi muʼa ʼo tanā fetaulaki, neʼe fai palalau mo Fred ko te ʼohoana ʼo te fafine ʼaia. Kae ko Fred neʼe kua mate ia ʼi he ʼu vāhaʼa pē ki muʼa atu. Ko te fafine faifakalauʼakau ʼaia neʼe hoko atu tana fakamatala te ʼu palalau ʼaē neʼe ʼui age e “Fred,” te ʼu meʼa neʼe tui kiai tona ʼohoana ʼe ko ia pē ia ʼe ina ʼiloʼi. ʼE feala noa pē ke tui te fafine ko Fred neʼe maʼuli ʼi he mālama fakalaumālie pea mo faiga ke nā felōgoi ʼaki te tagata faifakalauʼakau. Kae ko te manatu ʼaia, ʼe mole ʼalutahi mo te meʼa ʼaē ʼe ʼui mai ʼi te Tohi-Tapu ʼo ʼuhiga mo te ʼaluʼaga ʼo te kau mate.—Vakaʼi ia te fakamatala ʼaē ʼe ʼātakai ʼaē ʼe tuʼu ʼi te lalo pāsina.

Kae ʼe feafeaʼi hakita mahino ki te ʼu fakamatala ʼaenī? ʼI te ʼu kākā ʼaē ʼe fakaʼaogaʼi e te ʼu temonio moʼo fakahalaʼi te hahaʼi, ʼe kau ai tanatou faʼifaʼitakiʼi te kau mate ohagē ko te faʼahi neʼe hoko kiā Fred. Koteā tona tupuʼaga? Ke lītuʼa te hahaʼi ki te manatu ʼaē ʼe akoʼi mai ʼi Tohi-Tapu, pea ke vaivai tanatou tui pea mo tanatou falala ʼaē kiā Sehova. ʼE mahino papau ia, ko Satana pea mo te ʼu temonio ʼe natou fakahalaʼi te hahaʼi “ ʼaki te ʼu gāue mālohi fuli pea mo te ʼu fakaʼiloga pea mo te ʼu fakamelomelo loi pea ʼaki te ʼu faʼahiga kākā kehekehe ʼo te heʼe faitotonu maʼa nātou ʼaē kā fakaʼauha.”—2 Tesalonika 2:9, 10.

 ʼE hā lelei mai, ko te hahaʼi faifakalauʼakau pea mo nātou ʼaē ʼe ʼomai ʼo kumi tokoni kiā nātou, ʼe natou tui papau ʼe natou felōgoi mo te hahaʼi ʼaē kua mamate. Kapau ʼe felōgoi te hahaʼi faifakalauʼakau mo he tahi, ʼi tona fakahagatonu ʼe ko te kau laumālie ʼaē ʼe fakafeagai kiā Sehova. ʼO toe fēia pē, ʼe ʼi ai mo nātou ʼaē ʼe natou tui ʼe natou tauhi ki te ʼAtua kae ʼe natou faihala. Neʼe tohi e te ʼapositolo ko Paulo ʼaki te takitaki ʼa te ʼAtua te fakatokaga ʼaenī: “Ko te ʼu meʼa ʼaē ʼe sākilifisioʼi e te ʼu puleʼaga, ʼe natou sākilifisioʼi nātou ki te kau temonio kae ʼe mole ki te ʼAtua.”—1 Kolonito 10:20, 21.

ʼI tatatou ʼiloʼi papau ʼaē ʼe tou lava faikole ki te ʼAtua Māʼoluga ʼaē ʼe ʼofa pea mo tokaga kiā tātou, koteā ʼaē ʼe tou fia faikole ai ki he tahi kehe? Koia, ʼe fakapapau mai ʼi te Tohi-Tapu: “ ʼO ʼuhiga mo Sehova, ko tona ʼu mata ʼe taka ʼi te kele kātoa, ke ina fakahā tona mālohi kiā nātou ʼaē ʼe kātoa tonatou loto kiā te ia.”—2 Fakamatala 16:9.

[Fakamatala ʼo te pasina 9]

ʼI tatatou ʼiloʼi papau ʼaē ʼe feala ke tou faikole ki te Māʼoluga Tokotahi ʼaē ʼe ʼofa pea mo tokaga kiā tātou, he koʼē koa ʼe tou fia faikole ai ki he tahi kehe?

[Talanoa/Paki ʼo te pasina 8, 9]

Te Moʼoni Mo Te Loi

TE MOʼONI: KO SATANA ʼE MAʼULI MOʼONI

“Ko Satana totonu ʼe ina fakaliliu tuʼumaʼu pē ia ia ko he ʼāselo ʼo te mālama.”—2 Kolonito 11:14.

“Kotou nonofo ʼalaʼala, kotou nonofo tōkakaga. Ko tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.”—1 Petelo 5:8.

“Ko ʼaē ʼe ina maʼuliʼi te agahala ʼe haʼu mai te Tēvolo, heʼe ko te Tēvolo ʼe agahala talu mai te kamataʼaga.”—1 Soane 3:8.

“Koia ke kotou fakalogo ki te ʼAtua; kae ke kotou fakafeagai ki te Tēvolo, pea ʼe hola mamaʼo anai iā koutou.”—Sake 4:7.

“[Ko] te Tēvolo . . . ko he fakapō ia ʼi tana kamata, pea neʼe mole haga nofo ia ʼi te moʼoni, heʼe mole iā te ia te moʼoni. Kā ina tala te loi, pea ʼe palalau ia ʼo mulimuli pē ki te ʼu ʼuluagaaga ʼo ia totonu, heʼe gutuloi, pea ʼe ko te tamai ʼo te loi.”—Soane 8:44.

TE LOI: ʼI TE ʼOSI MATE ʼO TE HAHAʼI ʼE HOKO ATU KOA TONATOU MAʼULI ʼI HE POTU FAKALAUMĀLIE?

“ ʼI te kakava ʼo tou fofoga ʼe ke kai anai te pane, ʼo aʼu ki tau toe liliu ki te kele, he neʼe toʼo koe mai ai. Heʼe ke efu pea ʼe ke toe liliu anai ki te efu.”—Senesi 3:19.

“Ko te kau māʼuʼuli ʼe natou ʼiloʼi ʼe natou mamate anai; kae ko te kau mate, ʼe mole kei natou ʼiloʼi he meʼa.”—Tagata Tānaki 9:5.

“Ko meʼa fuli ʼe maʼu e tou nima ke ina fai, fai koe ʼaki tou mālohi, heʼe mole he gāue, he fakatuʼutuʼu, he mālama, he poto ʼi te Seole, te potu ʼaē ʼe ke ʼalu kiai.”—Tagata Tānaki 9:10.

“Ko tona laumālie ʼe mavae, pea ʼe toe liliu ia ki te kele; ʼi te ʼaho pē ʼaia ʼe mate ai tana ʼu fakakaukau.”—Pesalemo 146:4.

TE MOʼONI: ʼE TOKAGA MAI TE KAU ʼĀSELO AGATONU KIĀ TĀTOU

“ ʼE nofo te ʼāselo ʼa Sehova ʼo ʼātakai ia nātou ʼaē ʼe natou manavasiʼi kiā te ia, pea ʼe ina haofaki nātou.”—Pesalemo 34:7; 91:11.

“ ʼE mole koa lā ko nātou [ia te ʼu ʼāselo] fuli ko he ʼu laumālie moʼo tauhi ki te hahaʼi, neʼe fekauʼi nātou ke natou tauhi ki te hahaʼi ʼaē kā natou maʼu te haofaki?”—Hepeleo 1:14.

“Neʼe au sio ki te tahi ʼāselo ʼe lele ʼi te lotomālie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohagē ko he evaselio kiā nātou ʼaē ʼe nonofo ʼi te kele, pea mo te ʼu puleʼaga kehekehe, te telepī kehekehe, te lea kehekehe pea mo te hahaʼi kehekehe, ʼo ina ʼui leʼolahi: ‘Kotou manavasiʼi ki te ʼAtua pea mo kotou fakakolōlia kiā te ia.’ ”—Fakahā 14:6, 7.

TE LOI: ʼE TATAU IA SESU MO TE ʼATUA

“E au loto ke kotou ʼiloʼi ko te pule ʼo te tagata fuli pē, ko Kilisito; pea ko te pule ʼo te fafine, ko te tagata; pea ko te pule ʼo Kilisito, ko te ʼAtua.”—1 Kolonito 11:3.

“Kā fakalogo anai ia meʼa fuli kiā te ia, pea ko te ʼAlo ʼe toe fakalogo anai mo ia kiā Ia ʼaē neʼe ina tuku ia meʼa fuli kiā te ia ke liliu te ʼAtua ko meʼa fuapē maʼa te hahaʼi fuapē.”—1 Kolonito 15:28.

“ ʼE au tala moʼoni atu kiā koutou: Ko te ʼAlo ʼe mole feala ke ina fai he meʼa ʼi tona loto faʼitaliha, kae ʼe ina fai pē te meʼa ʼaē neʼe sio ʼe fai e te Tamai.”—Soane 5:19.