Ko Te ʼu Meʼa Neʼe Hā ʼo ʼUhiga Mo Te Potu Fakalaumālie

ʼE MOLE kotou sio anai ki he laumālie tatau aipē peʼe kotou sio fakaleleiʼi pea mo fualoa ia te lagi. ʼE kotou fakalogo, kae ʼe mole kotou logo anai ki he tahi. Kae ʼe feala ke kotou ʼiloʼi papau ko te ʼu ʼāselo ʼe māʼuʼuli moʼoni. ʼE natou popoto ʼaupitō mo mālolohi pea ʼe kehekehe tonatou ʼu higoa pea mo tonatou ʼu ʼuluagaaga. Ko ʼihi ʼe natou fia tokoni mai kiā tātou, kae ko ʼihi ʼe natou fia fakamamahiʼi ia tātou. Ko nātou fuli ʼaia ʼe natou tokagaʼi tātou.

Ko te ʼAtua moʼoni ʼe ko te Laumālie. (Soane 4:24) ʼAki tona huafa makehe, ʼe fakakeheʼi ai ia ia mai te ʼu ʼatua loi. Ko tona huafa ʼe ko Sehova. (Pesalemo 83:18) Neʼe tohi fēnei e te tagata fai Pesalemo: “Ko Sehova ʼe lahi pea ʼe tonu ke vikiʼi tuʼumaʼu ia ia. ʼE fakatupu manavasiʼi ia ʼi te ʼu ʼatua fuli ʼaē. Heʼe ko te ʼu ʼatua fuli ʼo te ʼu hahaʼi ko he ʼu ʼatua ʼe vaʼiganoa, kae ko Sehova ia ʼaē neʼe ina fakatupu te lagi. Ko te ʼalikisia pea mo te taulekaleka ʼe ʼi ʼona muʼa, te mālohi pea mo te matalelei ʼe ʼi tona sagatualio.”—Pesalemo 96:4-6.

Te ʼu Meʼa Neʼe Hā ʼo ʼUhiga Mo Te ʼAtua Moʼoni

ʼE ʼui fēnei mai ʼi te Tohi-Tapu: “ ʼE mole heʼeki ʼi ai he tagata kua sio ki te ʼAtua.” (Soane 1:18) ʼE mole tou lava mahino ki tona agaaga pea mo tona taulekaleka, ohagē ko he tahi neʼe tupu ake ʼe kivi ʼe mole feala hana mahino ki te ʼu lanu. Kae ohagē pē ko he tagata faiako lelei ʼe ina fakamahino he ʼu manatu faigataʼa ki te kau ako, ʼaki he ʼu kupu ʼe feala ke natou mahino kiai, ʼo toe fēia mo te ʼAtua, ʼi tana folafola, ia te Tohi-Tapu, ʼe ina fakamahino mai he ʼu meʼa ʼe mole feala ke tou mahino kiai ʼaki he ʼu meʼa ʼe tou lava sio kiai. ʼAki te ʼu meʼa ʼaē neʼe hā ki te hahaʼi agatonu ʼo te temi muʼa, ʼe tokoni mai Sehova kiā tātou ke tou mahino peʼe feafeaʼi te agaaga ʼo te maʼuli ʼi te lagi pea mo tatatou ʼu felōgoi mo nātou ʼaē ʼe māʼuʼuli ʼi ai.

Ohagē lā, ko te meʼa neʼe hā ki te polofetā ko Esekiele, ʼe fakatatau te kolōlia ʼo Sehova ki he afi, mo he mālama gigila, mo he safile pea mo he nuanua. ʼI te tahi meʼa neʼe hā ki te ʼapositolo ko Soane, ʼe sio kiā Sehova neʼe heka ʼi tona hekaʼaga fakahau pea ʼe ina ʼui ko te ʼAtua “ ʼe tatau tona agaaga mo he maka sāsipa pea mo he maka maʼugataʼa ʼe lanu kula, . . . [ʼe] takatakai ia te hekaʼaga fakahau, e te nuanua ʼe tatau tona agaaga mo he emelote.” Ko te ʼu fakamatala ʼaia ʼe fakahā mai ai ko te ʼafio ʼa Sehova ʼe makehe pea mo fakaofoofo tona matalelei, mo fakafīmālie pea mo tokalelei.—Fakahā 4:2, 3; Esekiele 1:26-28.

Pea ko te meʼa ʼaē neʼe hā ki te polofetā ko Taniela ʼo ʼuhiga mo Sehova, neʼe sio ai ki te “toko hogofulu afe tuʼa hogofulu afe [kau ʼāselo] neʼe tutuʼu ʼi muʼa ʼo [te] ʼafioʼaga [ʼo Sehova].” (Taniela 7:10) ʼI meʼa fakaofoofo leva! Ko te sio ki he ʼāselo e tahi, māʼiapē lā ʼi he meʼa neʼe hā ʼe fakaofoofo  kae ʼe feafeaʼi age lā te sio ki te ʼu lauʼi miliate kau ʼāselo haohaoa!

ʼE teitei tuʼa 400 te talanoa ʼi te Tohi-Tapu ki te kau ʼāselo, pea iā nātou ʼaia ʼe i ai te ʼu selafimi pea mo te ʼu kelupimi. Ko te ʼu kupu Fakakeleka pea mo Fakahepeleo ʼaē neʼe fakaliliu ʼaki te kupu “ ʼāselo” ʼi te Tohi-Tapu, ʼe fakaʼuhiga ki te kupu “ ʼave logo.” Koia, ʼe feala ke fefakafelōgoiʼaki te kau ʼāselo pea ʼi te temi muʼa neʼe natou felōgoi mo te tagata. Ko te kau ʼāselo ʼe mole ko he ʼu hahaʼi neʼe māʼuʼuli ʼi te kele ʼi te temi muʼa. Neʼe fakatupu e Sehova te ʼu laumālie ʼaia fualoa ʼi muʼa atu ʼo te fakatupu ʼo te tagata.—Sopo 38:4-7.

ʼI te meʼa ʼaē neʼe hā kiā Taniela, ko te ʼu ʼāselo ʼe tokolahi neʼe fakamāʼopoʼopo ke natou sisio ki he meʼa fakaofoofo neʼe hoko. Neʼe sio leva Taniela ki “te tahi ʼe hagē ko he foha ʼo he tagata,” ʼe fakaovi ki te hekaʼaga fakahau ʼo Sehova ke foaki age “te pule, pea mo te fakaʼaliʼaliki, pea mo te puleʼaga, koteʼuhi ke tauhi kiā te ia te hahaʼi, pea mo te ʼu fenua, pea mo te ʼu faʼahiga lea kehekehe.” (Taniela 7:13, 14) Ko te ‘foha ʼo te tagata’ ʼe maʼuhiga tona tuʼulaga ʼi te potu fakalaumālie, ʼe ko Sesu Kilisito ʼaē kua fakatuʼuake, ʼaē ʼe foaki age te pule ki te kele kātoa. Kua vave fetogi e tana pule ia te ʼu puleʼaga fakatagata fuli pea mo ina pulihi te mahaki, te mamahi, te aga kovi, te masiva pea mo te mate.—Taniela 2:44.

ʼE mahino papau ia ko te fakanofo hau ʼo Sesu neʼe hoko ai ia he toe fiafia lahi ʼa te kau ʼāselo agatonu ʼe tokolahi, ʼaē ʼe natou loto ke maʼuli lelei ia te mālamanei. Kae meʼa fakaʼofaʼofa foki he mole ko te ʼu laumālie fuli ʼaē ʼe natou loto ki te faʼahi ʼaia.

Te ʼu Fili ʼo Te ʼAtua Pea Mo Te Tagata

ʼI te kamata pē ʼo te hisitolia ʼo te tagata, ko te tahi ʼāselo, ʼi tana holi ʼaē ke ʼatolasioʼi, neʼe  fakafeagai kiā Sehova pea neʼe liliu ai ko Satana, ko tona fakaʼuhiga ko he “Tahi ʼe Fakafeagai.” Ko Satana ko te laumālie ʼe agakovi ʼaupitō pea neʼe fakafeagai ʼosi kiā Sehova ʼaē ko te laumālie ʼe ʼofa ʼaupitō. Ko te tahi ʼu ʼāselo neʼe natou lagolago ki te agatuʼu ʼaē ʼa Satana. ʼE fakahigoaʼi ia nātou ʼi te Tohi-Tapu ko te ʼu temonio. Ohagē ko Satana, ko te ʼu temonio neʼe natou liliu ko te ʼu fili ʼe natou fiafia ʼi te fakamamahiʼi ʼo te mālamanei. ʼE lahi te ʼu mamahi ʼaē ʼe hoko ʼi te kele, mo te heʼe faitotonu, mo te mahaki, mo te masiva; pea mo te ʼu tau ʼe ko te ʼu fua ʼo tanatou ʼu fakaneke.

Logolā te mole kei talanoa kiā Satana ʼi te ʼatu ʼu lotu ʼo te Keletiate kae ʼi te Tohi-Tapu ʼi te tohi ʼo Sopo ʼe fakahā mai peʼe ko te faʼahiga laumālie feafeaʼi pea mo te ʼu manatu ʼaē ʼe maʼu e te ʼāselo agatuʼu ʼaia. ʼE ʼui fēnei: “Ko ia neʼe hoko mai leva te ʼaho ʼaē neʼe hū ai te ʼu foha ʼo te ʼAtua moʼoni ke natou tutuʼu iā muʼa ʼo Sehova, pea neʼe hū ai foki mo Satana iā nātou.” ʼI te fai palalau ʼaē neʼe hoko, neʼe laukovi ia Satana ki te tagata ko Sopo ʼo ina ʼui neʼe tauhi ki te ʼAtua ʼuhi pē ko te ʼu lelei ʼaē neʼe ina maʼu. Moʼo fakamoʼoni ki tana laukovi ʼaia, neʼe fakatagaʼi lahi e Satana ia Sopo, ʼo ina matehi tana faga manu pea mo tana fānau fuli e toko hogofulu. ʼOsi ʼaia pea neʼe ina fakatupu iā Sopo ia te ʼu foʼi polo fakalialia ʼi tona sino kātoa. Neʼe mole he ʼu fua ʼo te ʼu fakahala fuli ʼaia ʼa Satana.—Sopo 1:6-9; 2:7.

ʼE ʼi ai te ʼu tupuʼaga lelei ki te fakagafua e Sehova ke maʼuli fualoa ia Satana, kae ʼe mole ina tuku anai ke hoko atu ʼo talu ai. Kua vave te fakaʼauha ʼo te Tēvolo. Kua kamata ia tona fakaʼauha pea ʼe fakamatala ʼi te tohi ʼo Fakahā, te tahi meʼa maʼuhiga neʼe hoko ʼi te potu fakalaumālie ʼaē neʼe mole tou lava sio kiai. ʼE tou lau fēnei: “Neʼe hoko te tau ʼi te lagi: ko Mikaele [ko Sesu Kilisito ʼaē kua fakatuʼuake] mo tana kau ʼāselo neʼe natou tauʼi te talakone [ia Satana], pea neʼe tau te talakone mo tana kau ʼāselo, kae neʼe mole mālo ia, pea neʼe mole kei ʼi ai honatou nofoʼaga ʼi te lagi. Koia neʼe lī ifo ki lalo ia te talakone lahi, te gata olisinale, ia ia ʼaē ʼe fakahigoaʼi ko te Tēvolo pea mo Satana, ia ia ʼaē ʼe ina fakahēʼi ia te kele kātoa neʼe lī ifo ki te kele, pea mo tana kau ʼāselo neʼe lī fakatahi ifo mo ia.”—Fakahā 12:7-9.

Kotou tokagaʼi ʼe ʼui ʼo ʼuhiga mo Satana “ ʼe ina fakahēʼi ia te kele kātoa.” ʼE ina kākāʼi te hahaʼi ʼaki tana fakamafola te ʼu loi fakalotu ke natou fakafeagai ai kiā Sehova pea mo tana Folafola. Ohagē lā ko te loi ʼaē ʼe ʼui, mokā mate he tahi pea ʼe ʼalu ia ki te potu fakalaumālie. ʼE lahi te ʼu manatu kehekehe ʼo ʼuhiga mo te faʼahi ʼaia. Ohagē lā ʼi Afelika pea mo Asia, tokolahi ʼe natou tui ʼi te mate ʼo te hahaʼi ʼe natou ʼolo ki he mālama fakalaumālie ʼe nonofo ai tanatou ʼu kui. Ko te ʼu akonaki ʼo te pulekatolio pea mo te ʼifeli ʼe toe fakatafito ki te manatu ʼaē ʼe toe hoko atu te maʼuli ʼo he tahi ʼi tona ʼosi mate.

Kā Kua Mate He Tahi ʼe ʼAlu Koa Ki Selō?

Kae ʼe feafeaʼi ʼo ʼuhiga mo te akonaki ʼaē ʼe tui kiai ia te ʼu lauʼi miliona ʼi te mālamanei kātoa ʼaē ʼe ʼolo fuli te hahaʼi agalelei ki selō? ʼE moʼoni ko ʼihi hahaʼi agalelei ʼe natou ʼolo ki selō, kae ʼe fakatuʼakoi mokā tou fakatatau mo te ʼu lauʼi miliale hahaʼi ʼaē kua mamate. ʼE fakahā ʼi te Tohi-Tapu ʼe ko te toko 144 000 hahaʼi ʼaē ‛ ʼe totogi anai mai te kele’ pea ʼe natou gāue anai ohagē ko “he ʼu pelepitelō” pea mo “natou pule fakahau anai ki te kele.” (Fakahā 5:9, 10; 14:1, 3) ʼO fakatahi mo te Foha ʼo te tagata ia Sesu Kilisito, ʼe natou faʼufaʼu anai te puleʼaga ʼaē ʼe ʼi selō, te Puleʼaga ʼo te ʼAtua. Ko te puleʼaga ʼaia ʼe ina fakaʼauha anai ia Satana mo tana ʼu temonio pea mo ina fakaliliu anai te kele ko he palatiso. Tokolahi iā nātou ʼaē kua mamate ʼe toe fakatuʼuake anai ia nātou ʼi te temi kā haʼu ʼaki te ʼamanaki ke natou māʼuʼuli ʼo heʼegata ʼi te palatiso ʼaia ʼi te kele.—Luka 23:43.

Koia, moʼo fakanounou, ʼe tokolahi te ʼu laumālie ʼe natou māʼuʼuli ʼi te potu fakalaumālie. Ko ia ʼaē ʼe māʼoluga iā nātou ko Sehova ʼAtua, te Tupuʼaga ʼo te maʼuli. Ko te ʼu lauʼi miliate ʼāselo ʼe natou tauhi agatonu kiā te ia. Ko te tahi age ʼu ʼāselo, neʼe taki nātou ʼe Satana, ʼo fakafeagai kiā Sehova pea mo natou fakahalaʼi te hahaʼi. Tahi ʼaē meʼa, neʼe fakatuʼakoi pē te hahaʼi ʼaē neʼe “totogi” pe neʼe filifili mai te kele ke natou fakahoko he ʼu maʼua makehe ʼi te lagi. ʼAki takotou taupau maʼu te ʼu faʼahi ʼaenī, tou vakaʼi peʼe ko ai ʼaē ʼe feala ke kotou felōgoi mo nātou ʼi te potu fakalaumālie, pea ʼe tonu ke feafeaʼi tatatou felōgoi mo nātou.