Kotou Fakaʼapaʼapa Ki Te Nofo ʼOhoana Heʼe Ko He Meʼa ʼOfa Mai Te ʼAtua

“Koia ʼe mavae anai te tagata mai tana tamai pea mo tana faʼē, pea ʼe tonu anai ke pipiki ki tona ʼohoana, pea ʼe tonu anai ke nā liliu ko he kakano e tahi.”—SEN. 2:24.

 1. He koʼē ʼe tuha mo Sehova ke tou fakaʼapaʼapa age kiā te ia?

 ʼE MAHINO ia, ʼe tuha mo Sehova ʼAtua, ʼaē neʼe ina Fakatuʼu te ʼohoana ke tou fakaʼapaʼapa age kiā te ia. Mai tona ʼaluʼaga ʼaē ko ia totatou Tupuʼaga, mo totatou Tuʼi ʼAliki, pea mo tatatou Tamai ʼaē ʼe ʼi selō, koia ʼaē ʼe ʼui tonu ai ʼo ʼuhiga mo ia ʼe ko Ia ʼAē ʼe Ina Foaki “te meʼa ʼofa lelei fuli pea mo te mōlaga haohaoa fuli.” (Sake 1:17; Fakh. 4:11) ʼE ko hana fakahā ʼaia ʼo tona ʼofa lahi ʼaē kiā tātou. (1 Soa. 4:8) Ko meʼa fuli pē ʼe ina akoʼi mai, ko meʼa fuli pē ʼe ina kole mai ke tou fai, pea ko meʼa fuli pē ʼe ina foaki mai kiā tātou, neʼe ina fai ʼaki pē te manatu ʼaē ke tou maʼuli fīmālie pea ke fua lelei kiā tātou.—Isa. 48:17.

 2. Koteā te ʼu fakatotonu ʼaē neʼe foaki e Sehova ki te ʼuluaki taumātuʼa?

² ʼE fakahā mai ʼi te Tohi-Tapu ko te ʼohoana ʼe kau ʼi te ʼu meʼa ʼofa “lelei” ʼaē neʼe foaki mai e te ʼAtua. (Lute 1:9; 2:12) ʼI tana fakatapuʼi te ʼuluaki ʼohoana, neʼe foaki e Sehova ki te taumātuʼa ʼaē ko Atama mo Eva he ʼu fakatotonu maʼuhiga ke nā maʼuli fiafia ai. (Lau ia Mateo 19:4-6.) Kanapau lā neʼe nā fakalogo ki te takitaki ʼa te ʼAtua, pea ʼe nā maʼuli fiafia anai ʼo heʼegata. Kae neʼe mole nā aga fakapotopoto, ʼi tanā mole fakalogo ki te fakatotonu ʼa te ʼAtua pea neʼe fua kovi ai kiā nāua.—Sen. 3:6-13, 16-19, 23.

3, 4. (a) ʼE fakahā feafeaʼi e te tokolahi iā ʼaho nei ia tanatou mole fakaʼapaʼapa ʼaē ki te nofo ʼohoana pea mo Sehova ʼAtua? (b) Koteā te ʼu faʼifaʼitaki ʼe tou vakaʼi anai ʼi te ʼalatike ʼaenī?

³ Ohagē ko te ʼuluaki taumātuʼa ʼaia, tokolahi te hahaʼi iā ʼaho nei ʼe natou fai he ʼu tonu ʼo ʼuhiga mo te ʼohoana kae ʼe mole natou tokagaʼi te takitaki ʼaē ʼa Sehova. Ko ʼihi ʼe natou maʼuli feʼauʼaki, pea ko ʼihi ʼe natou faigaʼi ke hagē te ʼohoana ko te meʼa ʼaē ʼe natou loto kiai. (Loma 1:24-32; 2 Tim. 3:1-5) ʼE mole natou fakaʼuhigaʼi te ʼohoana ʼe ko he meʼa ʼofa ia mai te ʼAtua, pea ʼi tanatou mole fakaʼapaʼapa ki te meʼa ʼofa ʼaia, ʼe mole natou toe fakaʼapaʼapa kiā Ia ʼAē Neʼe Ina Foaki mai te meʼa ʼofa ʼaia, ia Sehova ʼAtua.

⁴ ʼI ʼihi temi, māʼiapē lā mo ʼihi ʼi te hahaʼi ʼa te ʼAtua, ʼe mole kei natou maʼu te fakasiosio poto ʼo ʼuhiga mo te manatu ʼaē ʼa Sehova ki te ʼohoana. Ko ʼihi taumātuʼa Kilisitiano ʼe natou fakatotonu ke natou tahi nonofo, peʼe ke natou māvete kae mole hona ʼu tupuʼaga Fakatohi-tapu. ʼE tou lava tekeʼi feafeaʼi te ʼu faʼahi ʼaia? Ko te tokoni ʼa te ʼAtua ʼaē iā Senesi 2:24, ʼe ina lava takitaki feafeaʼi te ʼu Kilisitiano ʼohoana ke natou fakamālohi ia tonatou maʼuli fakataumātuʼa? Pea ʼe lava tokoni feafeaʼi te manatu fakatohi-tapu ʼaia kiā nātou ʼaē ʼe natou fia ʼohoana ke natou teuteu kiai? Tou vakaʼi age muʼa te ʼu faʼifaʼitaki ʼo te ʼu fāmili e tolu ʼo te temi muʼa neʼe natou maʼuli fiafia, pea ʼe hā ʼaki mai ai te maʼuhiga ʼaē ʼo te fakaʼapaʼapa kiā Sehova ke feala ai ki te nofo ʼohoana ke tologa.

Ke Kotou Nonofo Agatonu

5, 6. Ko te ʼaluʼaga fea ʼaē neʼe feala ai ke fakatupu faigataʼa ki te maʼuli fakataumātuʼa ʼo Sakalia pea mo Elisapeta, pea neʼe tapuakiʼi feafeaʼi tanā nofo agatonu?

⁵ ʼI te ʼu faʼahi fuli pē ʼo te maʼuli ʼo Sakalia pea mo Elisapeta neʼe nā agatonu aipē. Ko nāua taumātuʼa neʼe ko te ʼu kaugana agatonu ʼa Sehova. Neʼe agatonu ia Sakalia ʼi tana fakahoko lelei ʼaē ia tana ʼu gāue fakapelepitelō, pea neʼe nā faiga taumātuʼa ke nā maʼuliʼi fakalelei te Lao ʼa te ʼAtua. ʼE mahino papau ia, neʼe lahi ʼaupitō te ʼu faʼahi ʼaē ke nā loto fakafetaʼi ai. Kae kanapau lā neʼe kotou ʼolo ki tonā ʼapi ʼaē ʼi Suta, pea ʼe vave pē anai ia takotou fakatokagaʼi te mole ʼi ai ʼaē ʼo hanā fānau. Neʼe paʼa ia Elisapeta, pea ko nāua toko lua neʼe kua nā mātutuʼa.—Luka 1:5-7.

⁶ ʼI te temi ʼo te kau Iselaele, neʼe maʼuhiga ʼaupitō ki te ʼu fāmili te maʼu fānau, pea ʼi te agamāhani neʼe kaugamālie te ʼu fāmili. (1 Sam. 1:2, 6, 10; Pes. 128: 3, 4) Ko he tagata Iselaele ʼi te temi ʼaia, neʼe feala ke aga fakakākā ʼo māvete mo tona ʼohoana mo kapau neʼe mole fānaunau. Kae neʼe nofo agatonu pē Sakalia kiā Elisapeta. Neʼe mole ina kumi ia he takuʼaki ke tupuʼaki ai hanā māvete, ʼo toe fēia aipē mo tona ʼohoana. Logolā tanā lotomamahi ʼaē ʼi tanā mole maʼu fānau, kae neʼe nā hoko atu pē ia tanā tauhi fakatahi agatonu ʼaē kiā Sehova. Ko Sehova ʼaki te temi, neʼe ina tapuakiʼi ʼaupitō ia nāua ʼaki tana foaki fakamilakulo age ia tanā tamasiʼi tagata ʼi tonā temi matuʼa.—Luka 1:8-14.

 7. Koteā te tahi age ʼaluʼaga neʼe fakahā ai e Elisapeta ia tana agatonu ʼaē ki tona ʼohoana?

⁷ Kae ʼi te tahi age ʼaluʼaga, ʼe tāu ke vikiʼi ia Elisapeta ʼo ʼuhiga mo tana agatonu. ʼI te temi ʼaē neʼe tupu ai ia tana tama ko Soane, ko Sakalia neʼe fakalogologo he neʼe mole kei lava palalau, koteʼuhi neʼe lotolotolua ia ki te logo ʼaē neʼe fakahā age e te ʼāselo ʼa te ʼAtua. Kae ʼe mole tou faʼa ʼiloʼi lelei pe neʼe feafeaʼi te fakahā age ʼaē e Sakalia ki tona ʼohoana, ko te ʼāselo ʼa Sehova neʼe ina ʼui age ke ina fakahigoaʼi tanā tama ko “Soane.” Ko tonā ʼu vāhaʼa fale pea mo tonā ʼu kāiga neʼe natou fia fakahigoaʼi te tama ki te higoa ʼo tana tamai. Kae ko Elisapeta neʼe agatonu ʼo lagolago ki te fakatonutonu ʼaē neʼe kua foaki age e tona ʼohoana. Neʼe ina ʼui fēnei: “Kailoa, kae ʼe higoa anai ia ko Soane.”—Luka 1:59-63.

8, 9. (a) ʼE fakamālohi feafeaʼi te maʼuli fakataumātuʼa mokā nā feagatonuʼaki? (b) Koteā he tahi age ʼu ʼaluʼaga ʼe feala ai ke fakahā e te tagata ʼohoana pea mo te fafine ʼohoana ia tanā feagatonuʼaki?

⁸ Ohagē ko Sakalia pea mo Elisapeta, ʼe tau nei te ʼu taumātuʼa mo te ʼu fihifihia ʼe fakatupu lotomamahi pea mo ʼihi age pē ʼu faigataʼaʼia. Kā mole feagatonuʼaki he taumātuʼa, pea ʼe mole tologa anai tonā ʼohoana. Kapau ko he tahi iā nāua ʼe faiʼakau, mo sio ki he ʼu pāki ʼe fai ai he ʼu felāveʼi fakasino heʼeʼaoga, pea mo tono, pea mo ina fai he tahi age ʼu aga ʼe fakatupu kovi ki tonā maʼuli fiafia fakataumātuʼa, ʼe feala ai ke puli te falala ʼo tona ʼohoana ʼaē kiā ia, ʼo fēia mo tona ʼofa. Ko te faiʼakau, mo te ʼu pāki ʼaē ʼe hā ai te ʼu felāveʼi fakasino heʼeʼaoga, mo te tono pea mo te tahi atu ʼu aga ʼe fua kovi ki te fiafia ʼo te nofo ʼohoana, ʼe feala ke maumau ai te fefalalaʼaki ʼa he taumātuʼa, ʼo mole feala ke toe fakatokatoka. Pea kā puli pē te falala ʼi te maʼuli ʼo he taumātuʼa, pea ʼe toe puli māmālie aipē mo tanā feʼofaniʼaki. ʼE hagē pē te agatonu ko he ʼā ʼe ina puipui tokita loto fale ʼi he ʼu hahaʼi ʼe mole tou leleiʼia pea mo he ʼu aga fakakākā, ke feala ai kiā nātou ʼaē ʼo tokita loto fale ke natou maʼuli fīmālie. Koia, kā feagatonuʼaki he taumātuʼa, pea ʼe feala hanā maʼuli fakatahi ʼi te fīmālie pea mo nā fai palalau faʼifaʼitaliha, ʼo tuputupu ai tanā feʼofaniʼaki. ʼEī, ʼe maʼuhiga ʼaupitō te agatonu ʼi te nofo ʼohoana.

⁹ Neʼe ʼui fēnei e Sehova kiā Atama: “ ʼE mavae anai te tagata mai tana tamai pea mo tana faʼē, pea ʼe tonu anai ke pipiki ki tona ʼohoana.” (Sen. 2:24) Koteā tona fakaʼuhiga? ʼE tonu anai ke nā fai he ʼu fetogi ʼo ʼuhiga mo tana ʼu felōgoi ʼāfea ʼaē mo tonā ʼu kaumeʼa pea mo tonā ʼu fāmili. ʼE tonu kiā nāua toko lua ke nā ʼuluaki foaki muʼa tonā temi pea mo tanā tokaga ki tonā maʼuli fakataumātuʼa. ʼE mole kei feala hanā fakamuʼamuʼa ia tonā ʼu kaumeʼa peʼe ko tonā ʼu fāmili, ʼo nā meʼa noaʼi ai anai ia tonā kiʼi fāmili; pea ʼe mole tonu anai ki te taumātuʼa ke nā tuku tanā ʼu mātuʼa ke natou fai he ʼu tonu maʼa nāua ʼi tonā maʼuli peʼe ke natou fakatokatoka honā ʼu tokakovi. ʼI te temi ʼaenī kua nā ʼohoana ai, kua liliu te taumātuʼa ko te kakano e tahi. ʼE ko te fakatotonu ʼaia ʼa te ʼAtua.

10. Koteā ʼaē kā tokoni anai ki he taumātuʼa ke nā nonofo agatonu?

¹⁰ Māʼiapē lā mo te ʼu loto fale ʼaē ʼe mole lotu tahi ai te taumātuʼa, kae kā ʼe maʼuliʼi ai te agatonu pea ʼe maʼu ai tona ʼu fua lelei. Ko te tuagaʼane mole kau tona ʼohoana ʼi te moʼoni, ʼe ina ʼui fēnei: “ ʼE au fakamālo kiā Sehova ʼi tana akoʼi au peʼe feafeaʼi haku fakalogo ki toku ʼohoana pea mo maʼu he fakaʼapaʼapa lahi kiā ia. Kua taʼu 47 tamā feʼofaʼaki pea mo tamā fefakaʼapaʼapaʼaki tuʼumaʼu pē, heʼe ko taku nofo agatonu.” (1 Ko. 7:10, 11; 1 Pet. 3:1, 2) Koia kotou tōkakaga ʼo taupau fakalelei tokotou maʼuli fakataumātuʼa ke liliu tokotou loto fale ko he ʼaluʼaga ʼe fakatupu fīmālie ki tokotou hoa. ʼAki takotou ʼu palalau pea mo takotou ʼu aga, kotou kumi he ʼu faʼahi ke tui papau ai ia tokotou ʼohoana ʼe ko ia pē ʼaē ʼe maʼuhiga tokotahi kiā koutou ʼi tokotou maʼuli. Pea ko he faʼahi ia ʼe fakalogo pē kiā koutou, ke ʼaua naʼa kotou tuku he tahi peʼe ko he meʼa ke ina pulihi takotou agatonu ʼaē ki tokotou ʼohoana. (Lau ia Tāʼaga Lea 5:15-20.) Ko Ron pea mo Jeannette, ʼaē kua taʼu 35 tanā māʼuʼuli fiafia fakatahi, ʼe nā ʼui fēnei: “ ʼI tamā agatonu ʼaē ʼo fakalogo ki te ʼu meʼa ʼaē ʼe fakamaʼua mai e te ʼAtua, ʼe mā maʼuli fiafia ʼi tomā maʼuli fakataumātuʼa.”

Ko Te Logotahi ʼe Ina Fakamālohi Te Nofo ʼOhoana

11, 12. Neʼe feafeaʼi te fetokoniʼaki ʼaē ʼa Akila pea mo Pilisika (a) ʼi tonā loto fale, (b) ʼi tanā gāue fakamālama, (c) ʼi tanā minisitelio Fakakilisitiano?

¹¹ Kā palalau te ʼapositolo ko Paulo ʼo ʼuhiga mo  tona ʼu kaumeʼa lelei ko Akila mo Pilisika, pea neʼe ina toʼo tuʼumaʼu pē tonā ʼu higoa ʼo nāua toko lua. Ko te taumātuʼa logotahi ʼaia, ʼe ko he faʼifaʼitaki lelei ʼe ʼalutahi mo te ʼui ʼaē ʼa te ʼAtua ʼe liliu anai te tagata pea mo te fafine ko “he kakano e tahi.” (Sen. 2:24) ʼI te temi fuli pē neʼe nā gāue fakatahi ai ʼi tonā loto fale, ʼi tanā gāue fakamālama, pea mo tanā minisitelio Fakakilisitiano. Ohagē lā, ʼi te ʼuluaki ʼalu ʼaē ʼa Paulo ki Kolonito, neʼe fakaafe ia ia e Akila pea mo Pilisika ke haʼu kiō nāua, pea ʼe mahino ia ki muli age neʼe lagi ko tonā ʼapi ʼaē neʼe liliu fakatemi ko te tauʼaga ʼo Paulo ki te fai ʼaē ʼo tana ʼu gāue. Ki muli age ʼi Efesi, neʼe fakaʼaogaʼi tonā ʼapi ke fai ai te ʼu fono ʼo te kōkelekāsio pea neʼe nā gāue fakatahi ki te tokoni kiā nātou ʼaē ʼe kei foʼofoʼou ke natou tuputupu ʼi te faʼahi fakalaumālie, ohagē lā ko Apolose. (Gāue 18:2, 18-26) Pea neʼe ʼolo leva te taumātuʼa faʼafai ʼaia ki Loma, pea ʼi te kolo ʼaia neʼe nā toe fakaʼaogaʼi aipē ia tonā ʼapi ke fai ai te ʼu fono ʼo te kōkelekāsio. Ki muli age, neʼe nā toe liliu ki Efesi, ʼo fakalotomālohiʼi te ʼu tehina.—Loma 16:3-5.

¹² Ki muli age, ko Akila pea mo Pilisika neʼe nā toe kaugā gāue mo Paulo ki te faʼu ʼaē ʼo he ʼu falelā. ʼE nā toe gāue fakatahi aipē, ʼo nā fetokoniʼaki kae mole nā gāue fefakataupiepieʼaki peʼe nā fefihiʼaki. (Gāue 18:3) Kae ʼe mahino ia, neʼe ko te temi ʼaē neʼe nā gāue fakatahi ai ʼi te ʼu gāue Fakakilisitiano ʼaē neʼe tokoni ai ke mālohi ia tonā maʼuli fakataumātuʼa pea mo nā maʼuli fiafia ai. Peʼe ʼi Kolonito, peʼe ʼi Efesi, peʼe ʼi Loma, neʼe ʼiloʼi lelei nāua ʼe ko he “ ʼu kaugā gāue iā Kilisito Sesu.” (Loma 16:3) Neʼe nā gāue tahi ki te fakahaʼele ʼaē ki muʼa ʼo te fakamafola ʼo te Puleʼaga ʼi he potu pē neʼe nā gāue ai.

13, 14. (a) Ko te ʼu ʼaluʼaga fea ʼaē ʼe feala ai ke fakatupu kovi ki te logotahi ʼa he taumātuʼa? (b) Koteā te ʼu ʼaluʼaga ʼaē ʼe feala ai ki te taumātuʼa ke nā fakamālohi ai ia tanā ʼu felōgoi ohagē ko “he kakano e tahi”?

¹³ Koia, ʼe mālohi te maʼuli ʼo he taumātuʼa mokā ʼe nā felōgoi tahi ki te fai ʼaē ʼo tanā ʼu fakatuʼutuʼu pea mo tanā ʼu gāue. (Tnk. 4:9, 10) Meʼa fakaʼofaʼofa foki, heʼe kua tokolahi te ʼu taumātuʼa iā ʼaho nei ʼe mole kei lahi tonatou temi ʼaē ke natou gaohi meʼa fakatahi ai, heʼe kua lahi pē te fakaʼaogaʼi ʼo tonatou temi ki tanatou ʼu gāue fakamālama. Ko ʼihi ʼe natou gāue mamaʼo peʼe ko he tahi ʼi te taumātuʼa ʼe ʼalu tokotahi ʼo gāue ʼi he tahi age fenua, moʼo taupau te maʼuli ʼo tonatou loto fale. Māʼiapē lā mo tonatou ʼu loto fale totonu, ko ʼihi taumātuʼa ʼe mole natou fai palalau fakatahi, koteʼuhi ʼe natou fakaʼaogaʼi tonatou temi ki te televisio, ki te ʼu fakafiafia, ki te faigaoʼi, ki te ʼu gaoʼi viteo, peʼe ki te Neti. ʼE hoko koa te faʼahi ʼaia ʼi tokolua loto fale? Kapau koia, ʼe feala koa ke kolua fetogi takolua ʼu agamāhani, ke lahi age te temi ʼaē ʼe kolua gaohi meʼa fakatahi ai? He koʼē koa ʼe mole kolua teuteuʼi fakatahi te meʼa kai, mo fai fulu meʼa, peʼe kolua fai ʼōloto fakatahi? ʼE feala koa hakolua tokaga fakatahi ki takolua fānau pea mo tokaga ki takolua ʼu mātuʼa ʼaē kua vaivavai?

¹⁴ Kae ko te meʼa ʼaē ʼe maʼuhiga ʼaupitō age, ko takolua kau fakatahi tuʼumaʼu ki te ʼu gāue ʼaē ʼe pipiki ki te tauhi kiā Sehova. Ko takolua fai palalau fakatahi ki te koga tohi ʼo te ʼaho pea mo fai fakatahi takolua tauhi fakafāmili, ʼe ko he ʼu faigamālie lelei ʼaia ke kolua maʼu aipē he ʼu manatu tatau ki tokolua fāmili pea ke kolua felōgoi tahi ki takolua ʼu fakatuʼutuʼu ʼaē ke kolua fai. Kolua toe gāue fakatahi ʼi te minisitelio. Pea kapau ko he meʼa ʼe feala, ʼe lelei hakolua toʼo fakatahi te selevisi pioniē, tatau aipē peʼe ko he māhina e tahi peʼe ko he taʼu kātoa, ʼo mulimuli pē ki tokolua ʼu fealagia. (Lau ia 1 Kolonito 15:58.) Ko te tuagaʼane neʼe pioniē mo tona ʼohoana, ʼe ina ʼui fēnei: “Ko te minisitelio neʼe ko he puleʼaki ke mā gāue fakatahi ai pea ke mā fai palalau faʼifaʼitaliha ai. Mai tona ʼaluʼaga ʼaē neʼe ko tamā fakatuʼutuʼu fakatahi ke mā tokoni ki te hahaʼi ʼi te faʼahi fakalaumālie, koia neʼe au logoʼi ai ʼi toku loto neʼe mā kaugā gāue fakatahi. Neʼe lelei age tamā felōgoi, heʼe moʼoni neʼe ko toku ʼohoana, kae neʼe toe liliu ia ko hoku kaumeʼa lelei.” Kā kolua gāue fakatahi ki te fai ʼaē ʼo hakolua ʼu gāue ʼe ʼaoga, ʼaki te temi ʼe kolua manatu tahi anai ki te ʼu meʼa ʼaē ʼe kolua leleiʼia, mo te ʼu meʼa ʼaē ʼe kolua fia fakamuʼamuʼa ʼi tokolua maʼuli, ʼo fēia ki takolua ʼu agamāhani ʼaē ke kolua fai. Pea ohagē pē anai ko Akila pea mo Pilisika, ʼe kolua liliu anai ko “he kakano e tahi” ʼi takolua ʼu manatu, ʼi te ʼu meʼa ʼaē ʼe kolua logoʼi ʼi ʼokolua loto, ʼo fēia ki takolua ʼu aga.

Kotou Fakamuʼamuʼa Te ʼAtua ʼi Tokotou Maʼuli Fakafāmili

15. Koteā ʼaē ʼe maʼuhiga ki te maʼuli ʼo he taumātuʼa ke nā maʼuli fiafia ai? Kotou fakamahino.

¹⁵ Neʼe ʼiloʼi e Sesu te maʼuhiga ʼaē ke fakamuʼamuʼa te ʼAtua ʼi te maʼuli fakataumātuʼa. Neʼe sio ia ki te haga ʼaē ʼa Sehova ʼo fakatapu te ʼuluaki ʼohoana. Neʼe ina fakatokagaʼi te fiafia lahi ʼaē neʼe maʼu e Atama mo Eva ʼi te temi ʼaē neʼe nā mulimuli ai ki te takitaki ʼa te ʼAtua, pea neʼe toe sio mata ki te ʼu mamahi ʼaē neʼe hoko kiā nāua ʼi tanā liʼaki ʼaē te takitaki ʼaia. Koia ʼi te temi ʼaē neʼe akoʼi ai e Sesu te  hahaʼi, neʼe ina toe foaki age kiā nātou te fakatotonu ʼa tana Tamai ʼaē ʼe tuʼu iā Senesi 2:24. Pea neʼe ina toe hilifaki kiai te manatu ʼaenī: “Ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata!” (Mat. 19:6) Koia ko te fakaʼapaʼapa lahi ʼaē ke fakahā kiā Sehova, ʼe kei maʼuhiga pē ki te maʼuli ʼo he taumātuʼa ke nā fiafia ai. Pea ki te faʼahi ʼaia, neʼe tuku mai te faʼifaʼitaki lelei e te ʼu mātuʼa fakakelekele ʼa Sesu, ko Sosefo mo Malia.

16. Neʼe fakahā feafeaʼi e Sosefo pea mo Malia ia tanā fakamuʼamuʼa ʼaē te ʼAtua ʼi tonā maʼuli fakafāmili?

¹⁶ Ko Sosefo neʼe agalelei pea mo fakaʼapaʼapa kiā Malia. ʼI tana ʼiloʼi ʼaē neʼe kua faitama ia Malia, neʼe ina fakatuʼutuʼu ke ina fakahā ki ai he aga manavaʼofa, logolā te mole heʼeki fakamahino age kiā ia e te ʼāselo ʼa te ʼAtua te meʼa ʼaē neʼe hoko moʼoni kiā Malia. (Mat. 1:18-20) Ko nāua taumātuʼa neʼe nā fakalogo ki te lao ʼa Sesale pea neʼe nā mulimuli fakalelei ki te Lao ʼa Moisese. (Luka 2:1-5, 21, 22) Pea logolā neʼe ko te hahaʼi tagata pē ʼaē neʼe fakamaʼua ki ai ke natou kau ki te ʼu lafeti fakalotu lalahi ʼaē ʼi Selusalemi, kae ko Sosefo pea mo Malia neʼe nā kau kiai ʼi te taʼu fuli pē mo tonā kiʼi fāmili. (Teu. 16:16; Luka 2:41) ʼI te ʼu faʼahi ʼaia pea mo ʼihi age, neʼe faiga mālohi aipē te taumātuʼa aga fakalotu ʼaia ke nā fakafiafia ia Sehova pea ke nā fakahā tanā fakaʼapaʼapa lahi ʼaē ki te ʼu fakatuʼutuʼu fakalaumālie. Koia lā ʼaē ʼe mole kita punamaʼuli ai ki te haga ʼaē ʼa Sehova ʼo filifili ia nāua ke nā tauhi ia tona ʼAlo ʼi te kamataʼaga ʼo te maʼuli ʼo Sesu ʼaē ʼi te kele.

17, 18. (a) Ko te ʼu ʼaluʼaga fea ʼaē ʼe feala ai ke fakamuʼamuʼa e he taumātuʼa te ʼAtua ʼi tonā maʼuli fakafāmili? (b) Koteā anai tona ʼu fua lelei kiā nāua?

¹⁷ ʼE kotou toe fakamuʼamuʼa fēia koa mo koutou te ʼAtua ʼi tokotou maʼuli fakafāmili? Ohagē lā, kā kotou fai he ʼu tonu ʼe maʼuhiga, ʼe kotou ʼuluaki kumi koa te ʼu pelesepeto Fakatohi-tapu, mo kotou faikoleʼi te faʼahi ʼaia, pea mo kotou kumi tokoni leva ki te ʼu Kilisitiano kua fotufotuʼa ʼi te faʼahi fakalaumālie? Peʼe kotou faigaʼi koa ke kotou fakatokatoka pē ʼe koutou totonu ia tokotou ʼu fihifihia, ʼo mulimuli pē ki te meʼa ʼaē ʼe kotou loto kiai peʼe ko te ʼu meʼa ʼaē ʼe loto kiai ia tokotou ʼu fāmili pea mo tokotou ʼu kaumeʼa? ʼE kotou faiga koa ke kotou maʼuliʼi te ʼatu ʼu tokoni ʼaē neʼe tā e te tagata kaugana agatonu ʼo ʼuhiga mo te maʼuli fakataumātuʼa pea mo te maʼuli fakafāmili? Peʼe kotou mulimuli pē koa koutou ki te ʼu agaʼi fenua peʼe ki te ʼu tokoni ʼa te hahaʼi ʼo te mālama? ʼE kotou faikole fakatahi tuʼumaʼu koa pea mo ako fakatahi tuʼumaʼu? ʼE kotou fai fakatahi koa hakotou ʼu fakatuʼutuʼu fakalaumālie? ʼE kotou fai palalau fakatahi koa ki te ʼu meʼa ʼaē ʼe tonu ke kotou fakamuʼamuʼa ʼi tokotou maʼuli fakafāmili?

¹⁸ ʼO ʼuhiga mo tonā maʼuli fiafia fakataumātuʼa ʼaē talu mai taʼu e 50, ʼe ʼui fēnei e Ray: “Neʼe feala pē ia tamā fakatokatoka ia tomā ʼu fihifihia fuli, koteʼuhi neʼe mā pipiki pē kiā Sehova ohagē ko homā ‘maea ʼe kau tolu.’ ” (Lau ia Tagata Tānaki 4:12.) Pea neʼe toe maʼu te manatu ʼaia e Danny pea mo Trina, heʼe nā ʼui fēnei: “ ʼI tamā tauhi fakatahi ʼaē ki te ʼAtua, neʼe toe mālohi age ia tomā maʼuli fakataumātuʼa.” Kua teitei taʼu 34 ia tanā maʼuli fiafia ʼi tanā nofo ʼohoana. Kapau ʼe kotou fakamuʼamuʼa tuʼumaʼu ia Sehova ʼi tokotou maʼuli fakataumātuʼa, pea ʼe tokoni atu anai ke kotou fiafia pea mo lahi anai te ʼu tapuakina kā kotou maʼu ai.—Pes. 127:1.

Tou Fakaʼapaʼapa Tuʼumaʼu Ki Te Meʼa ʼOfa ʼa Te ʼAtua

19. He koʼē neʼe foaki e te ʼAtua te meʼa ʼofa ʼaē ko te ʼohoana?

¹⁹ Maʼa te tokolahi iā ʼaho nei, ko te meʼa pē e tahi ʼe maʼuhiga kiā nātou, ke natou tahi maʼuli fiafia pē. Kae ʼe mole fēia te manatu ʼa te kaugana ʼa Sehova, heʼe ina ʼiloʼi neʼe fakatuʼu e te ʼAtua te ʼohoana ko he meʼa ʼofa moʼo fakahoko ia Tana fakatuʼutuʼu. (Sen. 1:26-28) Kanapau lā neʼe fakaʼapaʼapa ia Atama mo Eva ki te meʼa ʼofa ʼaia, kanaʼaualā ia kua liliu te kele kātoa ko he palatiso ʼe maʼuli ai he ʼu kaugana fiafia pea mo faitotonu ʼa te ʼAtua.

20, 21. (a) He koʼē koa ʼe tonu ke tou fakaʼuhiga te ʼohoana ʼe taputapu? (b) Koteā anai te meʼa ʼofa ʼaē kā tou vakaʼi ʼi te vāhaʼa kā haʼu?

²⁰ Kae ko te meʼa ʼaē ʼe maʼuhiga tāfito, heʼe ko te  ʼu kaugana ʼa te ʼAtua ʼe natou fakaʼuhiga te ʼohoana ko he fealagia ke natou fakakolōliaʼi ia Sehova. (Lau ia 1 Kolonito 10:31.) Ohagē ko te ʼu meʼa ʼaē neʼe kua tou ʼosi talanoa kiai, ko te nofo agatonu, mo te logotahi, pea mo te fakamuʼamuʼa ʼo te ʼAtua ʼi te maʼuli fakataumātuʼa, ʼe fakafiafia ai ia Sehova pea mo fakamālohi te maʼuli ʼo te taumātuʼa. Koia peʼe tou lolotoga teuteu ʼohoana, peʼe tou fakamālohi nei ia tatatou ʼu felōgoi fakataumātuʼa peʼe tou faiga nei ke tou haofaki totatou maʼuli fakataumātuʼa, kae ʼe tonu muʼa ke tou mahino ko te ʼohoana ʼe ko he fakatuʼutuʼu fakaʼatua pea mo taputapu. Kapau ʼe tou manatuʼi tuʼumaʼu te faʼahi ʼaia, pea ʼe uga ai anai tātou ke tou fai he ʼu tonu ʼe fakatafito ki te Folafola ʼa te ʼAtua ʼo ʼuhiga mo te nofo ʼohoana. Kā ʼe tou fai te faʼahi ʼaia, pea ʼe tou fakahā ai ʼe mole gata pē ia tatatou fakaʼapaʼapa ki te ʼohoana ʼaē ko he meʼa ʼofa fakaʼatua, kae ʼe tou toe fakaʼapaʼapa foki kiā Ia ʼAē Neʼe Ina Foaki mai te meʼa ʼofa ʼaia, ia Sehova ʼAtua.

²¹ ʼE moʼoni, ko te ʼohoana ʼe mole ko te gataʼaga pē ʼaia ʼo te meʼa ʼofa neʼe foaki mai e Sehova kiā tātou; pea ʼe mole ko he ʼaluʼaga pē ʼaia e tahi ke fakafiafia ai ia totatou maʼuli. ʼI tatatou ʼalatike ʼaē kā hoa mai, ʼe tou vakaʼi ai anai he tahi age meʼa ʼofa maʼuhiga neʼe foaki mai e te ʼAtua, te maʼuli fakaselipatea.

ʼE Kotou Tali Feafeaʼi Anai?

• ʼE feafeaʼi te maʼuli ʼo te kau Kilisitiano ʼaē kua ʼohoana mo kapau ʼe natou feʼagatonuʼaki?

• He koʼē ʼe mālohi anai te ʼu felōgoi fakataumātuʼa mokā ʼe nā gāue fakatahi ʼi te logotahi?

• Ko te ʼu ʼaluʼaga fea ʼaē ʼe feala ai ki te hahaʼi kua ʼohoana ke natou fakamuʼamuʼa te ʼAtua ʼi tonatou maʼuli?

• ʼE tou lava fakahā feafeaʼi te fakaʼapaʼapa ʼaē kiā Sehova, ia Ia ʼAē Neʼe Ina Fakatuʼu te ʼohoana?

[ʼU fehuʼi ʼo te ako]