Kotou Sisio Ki Te Huafa ʼi Te Mafa

SAINT-MORITZ. Neʼe kua kotou logo koa ki te higoa ʼaia? ʼE lagi neʼe kua kotou logo pē kiai, ʼuhi heʼe ko te koga meʼa mālōlō ʼiloa ʼo te mafa ʼo Engadine ʼi Suisi. Kae ko Saint-Moritz ko he koga meʼa talu mai fualoa neʼe leleiʼia e te hahaʼi tona matalelei, ʼaē ʼe tuʼu ʼi te Potu Sautē-ʼEsitē ʼo Suisi ʼo ovi ki te tuʼakoi ʼo Italia, pea ʼe tuʼu te mafa ʼaia ʼi te lotolotoiga ʼo te ʼatu ʼu moʼuga ʼe higoa Les Alpes pea ʼe nive tonatou ʼu tumutumu. ʼE toe tuʼu ai foki mo te Parc National Suisse (ko te lotoʼā) ko he koga meʼa taulekaleka pea lahi ai te vao ʼakau kehekehe pea mo te faga manu, pea ko he ʼaluʼaga ʼe vikiʼi ai totatou Tupuʼaga Lahi, ʼaē ko Sehova. (Pes. 148:7-10) Kae ʼe toe vikiʼi aipē foki ia Sehova ʼaki te ʼu meʼa neʼe fai ʼi te agaʼi fenua ʼa te hahaʼi ʼaē neʼe māʼuʼuli ʼi te 17 sēkulō.

ʼE lagi kotou tokagaʼi te ʼatu ʼapi ʼaē ʼe tuʼulaki ʼi te mafa ʼaia, pea ko he faʼahiga fai ʼe mole kita māhani kiai. ʼE kei feala pē hakita sio ki te huafa ʼo te ʼAtua ʼe tohi ʼi te muʼa ʼapi, ohagē lā ʼi te fuga matapā lahi. ʼI te ʼu sēkulō kua hili atu neʼe ko he aga māhani  ʼa te hahaʼi ia te teuteuʼi ʼo te ʼu muʼa fale ʼaki ni ʼu mataʼi tohi neʼe pena, pe neʼe tohi ʼi te simā pe neʼe togi ʼi te maka. ʼI henī, ʼe kotou sio ki he pāki ʼo he ʼapi ʼi te kolo ko Bever. ʼE fēnei te fakaliliu ʼo te ʼu mataʼi tohi: “Neʼe laga te ʼapi ʼi te taʼu 1715. Ko Sehova ʼe ko te kamataʼaga, pea ko Sehova ʼe ko te fakaʼosi. Ko meʼa fuli pē ʼe lava fakahoko e te ʼAtua, pea ʼe mole he meʼa ʼe lava fakahoko ʼi tuʼa ʼo te ʼAtua.” Eī ko te mataʼi tohi ʼāfea ʼaia, ʼe tohi tuʼa lua ai te huafa ʼo te ʼAtua.

ʼE feala hakotou toe sio ki te tahi mataʼi tohi ʼāfea ʼi te kiʼi kolo ʼo Madulain. ʼE tohi fēnei ai: “Pesalemo 127. Kapau ʼe mole ko Sehova ʼaē ʼe ina laga ia te fale, pea ʼe ʼalunoa te gāue kinakina ʼaē neʼe fai e tona ʼu tufuga. Lucius Rumedius. ʼI te taʼu 1654.”

He koʼē ʼe tohi fakahāhā fēia te huafa ʼo te ʼAtua ʼi te mafa ʼaia? Kā tou toe liliu ki te temi ʼaē neʼe kamata fakatuʼu ai te Lotu Polotesitā, pea ko te Tohi-Tapu neʼe tā ki te lea neʼe palalauʼi e te hahaʼi ʼo Suisi ʼe ko te Romanche, pea ko he lea ʼe haʼu mai te Fakalatina neʼe palalauʼi ʼi Engadine. ʼI tona fakahagatonu, neʼe ko te ʼuluaki tohi ʼaia ʼaē neʼe fakaliliu ki te lea ʼaia. Koia, ʼaki te ʼu meʼa ʼaē neʼe natou lau ʼi te Tohi-Tapu, neʼe haga ai leva te hahaʼi tokolahi ʼo tohi ʼi tonatou ʼu muʼa ʼapi ia tonatou ʼu higoa totonu pea mo natou toe tohi ai mo te ʼu vaega Tohi-Tapu ʼe tuʼu ai te huafa ʼo te ʼAtua.

Koia lā ʼaē ʼo aʼu mai pē ki totatou temi, ʼe kei tala aipē e te ʼu mataʼi tohi ʼaia te huafa ʼo Sehova pea mo vikiʼi ia ia, logolā kua hili nei kiai te ʼu sēkulō ki te temi ʼaē neʼe ʼuluaki tohi ai ʼi te ʼu ʼapi ʼaia. Ko te hahaʼi ʼaē ʼe ʼomai ʼo mamata ia te koga meʼa ʼaia pea mo te hahaʼi pē ʼaē ʼe māʼuʼuli ʼi te mafa ʼaia, ʼe fai atu anai he fakatalitali lelei kiā koutou fuli ʼaia, ke lahi age takotou ʼiloʼi ʼaē ʼo ʼuhiga mo te ʼAtua fakatalakitupua ko Sehova, ʼaki takotou ʼaʼahi te tahi fale ʼe tuʼu ai ia tona huafa, ʼe ko te Fale ʼo Te Puleʼaga ʼa te kau Fakamoʼoni ʼa Sehova ʼi Bever.

[Haʼuʼaga ʼo te paki pasina 14]

© Stähli Rolf A/age fotostock