ʼE Kotou Fēhihiʼa Koa Ki Te Maumauʼi ʼo Te Lao?
ʼE Kotou Fēhihiʼa Koa Ki Te Maumauʼi ʼo Te Lao?
“Neʼe fehiʼa [Sesu] ki te maumauʼi ʼo te lao.”—HEP. 1:9.
1. Koteā ʼaē neʼe akoʼi e Sesu ʼo ʼuhiga mo te ʼofa?
MOʼO fakahā lelei ia te maʼuhiga ʼo te ʼofa neʼe ʼui fēnei e Sesu ki tana ʼu tisipulo: “ ʼE au foaki atu kiā koutou te fakatotonu foʼou, ke kotou feʼofaʼofani; ohagē ko taku ʼofa ʼaē kiā koutou, ke toe fēia foki mo koutou, ke kotou feʼofaʼofani. ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe kotou femaʼuʼaki te ʼofa.” (Soa. 13:34, 35) Neʼe fai e Sesu ia te fakatotonu ʼaenī ki tana ʼu tisipulo ke natou fefakahāʼaki iā nātou te ʼofa fakasākilifisio. ʼAki te taʼi ʼofa ʼaia ʼe ʼiloʼi ai anai nātou ko tana ʼu tisipulo moʼoni. Neʼe toe fakalotomālohiʼi fēnei nātou e Sesu: “Ke kotou haga ʼoʼofa ki ʼokotou fili pea mo hūfaki ia nātou ʼe natou fakatagaʼi koutou.”—Mat. 5:44.
2. Koteā ʼaē ʼe tonu ke fēhihiʼa kiai te kau ʼapositolo ʼa Kilisito?
2 Koia, ʼo mole gata ʼaki pē ʼi tana akoʼi ʼaē ki tana ʼu tisipulo ia te ʼofa, kae neʼe ina toe akoʼi age kiā nātou te ʼu meʼa ʼaē ʼe tonu ke natou fēhihiʼa kiai. Pea ki te faʼahi ʼaia, neʼe ʼui fēnei e Sesu: “Neʼe ke manako ki te faitotonu kae neʼe ke fehiʼa ki te maumauʼi ʼo te lao [te agakovi].” (Hep. 1:9; Pes. 45:7) ʼE hā mai, ʼe mole gata pē ʼi takita fakatuputupu ʼaē iā tātou te manako ki te faitotonu kae ʼe toe tonu foki ke tou toe fēhihiʼa ki te agahala peʼe ki te maumauʼi ʼo te lao. ʼE tou fakatokagaʼi neʼe ʼui fakalelei fēnei e te ʼapositolo ko Soane: “Ko te tagata fuapē ʼe ina fai te agahala, ʼe ina toe maumauʼi foki mo te lao, koia ko te agahala ʼe ko te maumauʼi o te lao.”—1 Soa. 3:4.
3. ʼO ʼuhiga mo te fehiʼa ki te maumauʼi ʼo te lao, ko te ʼu ʼaluʼaga fea ʼo tokita maʼuli ʼe talanoa anai kiai ʼi te ʼalatike ʼaenī?
3 Koia ʼi totatou ʼuhiga Kilisitiano, ʼe tonu ke tou fai te fehuʼi ʼaenī kiā tātou totonu pē: ‛ ʼE au fehiʼa koa ki te maumauʼi ʼo te lao?’ Tou vakaʼi age muʼa peʼe feafeaʼi hatatou fakahā ia tatatou fēhihiʼa ki te meʼa ʼaē ʼe kovi ʼi te ʼu ʼaluʼaga ʼaenī e fā ʼo totatou maʼuli: (1) tatatou manatu ʼo ʼuhiga mo te fakaʼaogaʼi fakavale ʼo te kava, (2) tatatou manatu ʼo ʼuhiga mo te ʼu meʼa faifakalauʼakau, (3) tatatou manatu ki te ʼu aga heʼe haohaoa, pea (4) tatatou manatu ʼo ʼuhiga mo nātou ʼaē ʼe natou manako ki te maumauʼi ʼo te lao.
Kotou Maʼu He Manatu Fakapotopoto ʼo ʼUhiga Mo Te Kava
4. He koʼē neʼe palalau fakahagatonu ia Sesu ʼi te temi ʼaē neʼe ina fai ai te fakatokaga ʼo ʼuhiga mo te ʼinu fakavale ʼo te kava?
4 ʼI ʼihi temi neʼe ʼinu e Sesu tana kiʼi moʼi vino, he neʼe mahino kiā ia ʼe ko he meʼa ʼofa mai te ʼAtua. (Pes. 104:14, 15) Kae neʼe mole ʼi ai he lakaga neʼe ina fakaʼaogaʼi kovi ai te meʼa ʼofa ʼaia ʼo ina ʼinu fakavale te kava. (Taag. 23:29-33) Koia ʼaē neʼe palalau fakahagatonu ai ia Sesu ʼi te temi ʼaē neʼe ina fai te tokoni ʼo ʼuhiga mo te fakaʼaogaʼi fakavale ʼo te kava. (Lau ia Luka 21:34.) Ko he tahi ʼe ina ʼinu fakavale te kava, ʼe feala ke ina fai he tahi age ʼu agahala mamafa. Koia lā ʼaē neʼe tohi fēnei ai e te ʼapositolo ko Paulo: “ ʼAua naʼa kotou kōnahihia ʼi te vino, ʼaē ʼe maʼu ai te aga fakalialia; kae ke kotou haga fakafonu ia koutou ʼaki te laumālie.” (Efe. 5:18) Neʼe ina toe tokoniʼi mo te kau finemātuʼa ʼaē ʼo te kōkelekāsio ke ʼaua naʼa natou “pōpula ki te ʼinu kava.”—Tito 2:3.
5. Ko te ʼu fehuʼi fea ʼaē ʼe lava fai e nātou ʼaē ʼe natou fakatuʼutuʼu ke natou ʼinu hanatou moʼi kava?
5 Kapau ʼe kotou fakatotonu ke kotou ʼinu hakotou moʼi kava, ʼe lelei ke kotou toe fai te ʼu fehuʼi ʼaenī kiā kotou totonu pē: ‘ ʼE au maʼu koa te manatu ʼa Sesu ʼo ʼuhiga mo te tokaga ʼaē ki te ʼinu kava fakavale? Kapau ʼe tonu ke au tokoniʼi niʼihi ʼo ʼuhiga mo te faʼahi ʼaia, ʼe au lava palalau fakahagatonu age koa kiā nātou? ʼE au ʼinu koa moʼo galoʼi toku ʼu fihifihia peʼe ke puli ai toku loto hoha? ʼE lahi koa taku ʼinu kava ʼaē ʼi te vāhaʼa fuli? ʼE au feafeaʼi mokā ʼui mai e he tahi ʼe lahi fau taku ʼinu kava? ʼE au maʼu koa he ʼu takuʼaga mokā fakatonutonuʼi au ki te faʼahi ʼaia peʼe au ʼita?’ Kapau ʼe tou pōpula ki te kava, pea ʼe fakatupu kovi anai ki tatatou lava fakakaukauʼi fakalelei ʼo he ʼu meʼa pea mo te fai ʼo he ʼu tonu fakapotopoto. ʼE tōkakaga te ʼu tisipulo ʼa Kilisito ʼo puipui fakalelei ia tonatou ʼu fealagia fakakaukau.—Taag. 3:21, 22.
Kotou Tekeʼi Te ʼu Meʼa Faifakalauʼakau
6, 7. (a) Neʼe feafeaʼi koa te aga ʼa Sesu kiā Satana pea mo te kau temonio? (b) He koʼē koa kua mafola aupitō iā aho nei ia te ʼu meʼa faifakalauʼakau?
6 ʼI tana kei maʼuli ʼaē ʼi te kele, neʼe fakafeagai mālohi ia Sesu kiā Satana pea mo te kau temonio. Neʼe fakafisi ki te ʼu fakahala ʼaē neʼe fai fakahagatonu age e Satana moʼo maumauʼi ia tana agatonu. (Luka 4:1-13) Neʼe toe mahino lelei ia Sesu ki te ʼu puleʼaki kākā ʼaē neʼe fai age e Satana moʼo fakahehē ia tana fakakaukau pea mo tana aga, pea neʼe ina tekeʼi ia tana ʼu kākā fuli ʼaia. (Mat. 16:21-23) Neʼe tokoni ia Sesu ki te hahaʼi ʼaē ʼe fia ʼāteaina mai te takitaki agakovi ʼa te kau temonio.—Mko. 5:2, 8, 12-15; 9:20, 25-27.
7 ʼI te ʼosi fakanofo hau ʼaē ʼo Sesu ʼi te taʼu 1914, neʼe ina fakamaʼa te lagi mai te ʼu fakahala ʼa Satana pea mo tana kau temonio. Koia ʼaē ʼi te temi nei kua ʼāsili age te haga ʼa Satana ʼo “fakahēʼi ia te kele kātoa.” (Fakh. 12:9, 10) Pea ʼe mole tou punamaʼuli ʼi te kua mafola ʼi te kele ʼo te ʼu meʼa faifakalauʼakau pea mo lahilahi ake tona fakaʼaogaʼi. Koteā te ʼu puleʼaki ʼe tou lava fai moʼo puipui ʼo tātou totonu mai te ʼu ʼaluʼaga ʼaia?
8. Kotēa te faʼahiga sivisivi ʼaē ʼe tonu ke kita fai kiā kita takitokotahi ʼo ʼuhiga mo takita filifili ʼaē ʼo te ʼu fakafiafia ke kita kau kiai?
8 ʼE fakatokagaʼi fakalelei mai ʼi te Tohi-Tapu ke tou fakamamaʼo mai te ʼu meʼa kovi ʼaē ʼe pipiki ki te ʼu meʼa faifakalauʼakau. (Lau ia Teutalonome 18:10-12.) Iā ʼaho nei, ko Satana pea mo te kau temonio ʼe natou fakahalaʼi te fakakaukau ʼa te hahaʼi ʼaki he ʼu ʼata, ʼaki he ʼu tohi pea ʼaki he ʼu meʼa gaoʼi viteo ʼe lagolago ki te ʼu meʼa faifakalauʼakau. Koia kā kita filifili he ʼu fakafiafia ke kita kau kiai, ʼe tonu anai ke kita fai takitokotahi ia te ʼu fehuʼi ʼaenī: ‘ ʼI te ʼu māhina ʼaenī kua hili, neʼe au filifili koa ke au fakafiafia ʼaki haku sioʼi ʼo he ʼu ʼata peʼe ko he ʼu polokalama ʼi te televisio ʼe fakahāhā ai he ʼu meʼa faifakalauʼakau, peʼe ko he ʼu gaoʼi viteo, peʼe ko he ʼu tohi, peʼe ko he ʼu ʼata ʼe fai ai te ʼu aga ʼaia? ʼE au mahino koa ki te maʼuhiga ʼaē ke mole au tali te ʼu meʼa faifakalauʼakau, peʼe au meʼa noaʼi koa tona ʼu fua kovi? ʼE au tokagaʼi koa peʼe koteā anai te manatu ʼa Sehova ʼo ʼuhiga mo te ʼu fakafiafia ʼaē ʼe au filifili ke au kau kiai? Kapau ʼe au fakagafua ki te ʼu taʼi fakahala ʼaia ʼa Satana ke malave kiā au, ʼe haga anai koa ia toku ʼofa ʼaē kiā Sehova pea mo tana ʼu pelesepeto faitotonu ʼo uga iā au ke au foimo fai he puleʼaki pea ke au tekeʼi te ʼu fakahala ʼaia?’—Gaue 19:19, 20.
Kotou Manatuʼi Te Fakatokaga ʼAē Neʼe Fai ʼe Sesu ʼo ʼUhiga Mo Te ʼu Aga Heʼeʼaoga
9. ʼE feafeaʼi ki he tahi hana fakatuputupu ʼi tona loto ia te manako ʼaē ki te maumauʼi ʼo te lao?
9 Neʼe lagolago ia Sesu ki te lēkula ʼa Sehova ʼo ʼuhiga mo te ʼu felāveʼi fakasino. Neʼe ina ʼui fēnei: “Neʼe mole heʼeki kotou lau ko ia ʼaē neʼe ina fakatupu ia nāua, ʼi te kamataʼaga neʼe ina fakatupu ia nāua e tagata pea mo fafine, pea neʼe ina ʼui fēnei: ‘Koia ko te tagata ʼe mavae anai mai tana tamai pea mo tana faʼē pea ʼe pipiki anai ki tona ʼohoana, pea ʼe nā liliu anai ko te kakano pē e tahi’? ʼO mole kei nā toko lua ai, kae ko te kakano pē e tahi. Koia, ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata.” (Mat. 19:4-6) Neʼe ʼiloʼi e Sesu ko te ʼu meʼa ʼaē ʼe sio kiai totatou ʼu mata ʼe feala ke malave ki totatou loto. Koia,ʼi tana ʼakonaki ʼi te Moʼuga, neʼe ina ʼui fēnei: “Neʼe kotou fagono neʼe ʼui fēnei: ‘ ʼAua naʼa ke tono.’ Kae au tala atu au kiā koutou, ko ʼaē ʼe ina haga sioʼi he fafine ʼo tupu ai hana holi ki ai, ʼe kua tono ia mo ia ʼi tona loto.” (Mat. 5:27, 28) Ko nātou ʼaē ʼe natou meʼa noaʼi te fakatokaga ʼaenī ʼa Sesu, ʼi tona fakahagatonu ʼe natou fakatuputupu ʼi ʼonatou loto ia te manako ʼaē ki te maumaʼi ʼo te lao.
10. Kotou tuku mai he faʼifaʼitaki ʼe fakahā ai, ʼe feala ki he tahi ke ʼāteaina mai te sioʼi ʼaē ʼo he ʼu pāki ʼe fakahāhā ai he ʼu felāveʼi fakasino heʼeʼaoga?
10 ʼE uga e Satana te hahaʼi ke natou fai te ʼu felāveʼi fakasino heʼeʼaoga ʼaki te sioʼi ʼo he ʼu pāki ʼe fai ai ni ʼu felāveʼi fakasino heʼeʼaoga. ʼE lahi ʼaupitō te ʼu ʼaluʼaga fēia ʼi te tuʼu ʼo te ʼu faʼahiga meʼa ʼaenī. Ko nātou ʼaē ʼe natou sioʼi te ʼu pāki heʼeʼaoga ʼaia ʼe faigataʼa kia nātou ki ʼamuli hanatou galoʼi te ʼu aga heʼeʼaoga ʼaia neʼe natou sisio kiai. ʼE feala pē foki ke natou manako ki te fai ʼo te ʼu aga heʼeʼaoga ʼaia. Kotou fakatokagaʼi te ʼaluaga neʼe hoko ki te tahi Kilisitiano. Neʼe ina ʼui fēnei: “Neʼe au sioʼi fakafufū te ʼu pāki ʼe fai ai te ʼu felāveʼi fakasino heʼeʼaoga. Neʼe au fakatuputupu ʼi toku loto te ʼu faʼahiga manatu heʼeʼaoga neʼe mole ʼalutahi mo te maʼuli ʼaē ʼi te tauhi kiā Sehova. Neʼe au ʼiloʼi neʼe ko he aga ʼe kovi kae ʼi taku manatu neʼe kei leleiʼia pē taku tauhi e te ʼAtua.” Koteā ʼaē neʼe tupu ai te fetogi ʼo te manatu ʼa te tehina ʼaia? Neʼe ina ʼui fēnei: “Logolā neʼe ko he ʼaluʼaga neʼe faigataʼa aupitō ke au fai ʼi toku maʼuli, kae neʼe au fakatotonu ke au fakahā toku fihifihia ʼaia ki te ʼu tagata ʼafea.” Ki muli age neʼe feala ki te tehina ʼaia ke ʼāteaina mai tana agamāhani heʼeʼaoga ʼaia. Neʼe ʼina ʼui fakahagatonu fēnei: “ ʼI taku kua ʼosi fakamaʼa toku maʼuli mai te agahala ʼaia, neʼe au logoʼi ai leva neʼe kua au maʼu moʼoni hoku leʼo ʼo loto ʼe maʼa.” Ko nātou ʼaē ʼe natou fēhihiʼa ki te maumauʼi ʼo te lao, ʼe tonu ke natou fakamāmāhani ʼo fēhihiʼa ki te sioʼi ʼo te ʼu pāki ʼaē ʼe fai ai te ʼu felāveʼi fakasino heʼeʼaoga.
11, 12. ʼE feafeaʼi hatatou lava fēhihiʼa ki te maumauʼi ʼo te lao mokā ʼe tonu ke tou filifili he ʼu musika ke tou fakalogo?
11 ʼE feala ki te musika pea mo te ʼu hiva ke malave aupitō ki tokita loto. Ko te musika ʼe ko he meʼa ʼofa mai te ʼAtua pea kua talu mai fualoa mo tona fakaʼaogai ʼi te tauhi moʼoni. (Eke. 15:20, 21; Efe. ) Kae ko te mālama agakovi ʼa Satana ʼe ina fakaʼaogaʼi te musika moʼo vikiʼi te ʼu aga heʼeʼaoga. ( 5:191 Soa. 5:19) ʼE feafeaʼi hakotou ʼiloʼi peʼe ʼulihi tokotou ʼatamai e te musika ʼaē ʼe kotou fakalogo kiai peʼe kailoa?
12 ʼE lagi lelei muʼa hakotou kamata fai te ʼu fehuʼi ʼaenī kiā koutou totonu pē: ‘ ’Ko te ʼu hiva ʼaē ʼe au fakalogo ʼe ina vikiʼi koa ia te faifakapō, mo te tono, mo te fai folonikāsio pea mo te fai fasituʼu? Kapau lā neʼe tonu ke au lau te ʼu kupu ʼo he ʼu hiva ki he tahi, ʼe mahino anai koa kiā ia ʼe au fehiʼa ki te maumauʼi ʼo te lao, peʼe manatu anai ia ʼe uli toku loto ʼuhi ko te ʼu hiva ʼaē ʼe au fakalogo?’ Kapau ʼe tou ʼui ʼe tou fēhihiʼa ki te maumauʼi ʼo te lao, pea ʼe tonu foki ke tou toe fēhihiʼa ki te ʼu musika ʼaē ʼe talanoa ai ki te ʼu aga ʼaia. Neʼe ʼui fēnei e Sesu: “Ko te meʼa ʼaē ʼe haʼu ki tuʼa mai te gutu ʼe haʼu ia mai te loto, pea ʼe ko te meʼa ʼaia ʼaē ʼe ina ʼulihi te tagata. Heʼe haʼu mai te loto te ʼu fakakaukau kovi, te ʼu fakapō, te ʼu tono, te ʼu folonikāsio, te ʼu kaihaʼa, te ʼu fakamoʼoni loi, te ʼu laukovi ki te ʼAtua.”—Mat. 15:18, 19; vakaʼi ia Sake 3:10, 11.
Kotou Maʼu Te Manatu ʼa Sesu ʼo ʼUhiga Mo Nātou ʼAē ʼe Natou Manako Ki Te Maumauʼi ʼo Te Lao
13. Neʼe fakaʼuhiga feafeaʼi e Sesu ia nātou ʼaē ʼe maʼuli ʼi te agahala?
13 Neʼe ʼui e Sesu neʼe haʼu ʼo taki mai ki te fakahemala ia te kau agahala, peʼe ko te hahaʼi ʼaē ʼe natou maumaui te lao. (Luka 5:30-32) Kae neʼe feafeaʼi ia Sesu kiā nātou ʼaē neʼe maʼuli ʼi te agahala? Neʼe fai e Sesu te ʼu fakatokaga mālohi ke tou tōkakaga ki te ʼu fakahala ʼa te ʼu taʼi faʼahiga hahaʼi ʼaia. (Mat. 23:15, 23-26) Neʼe ina toe fakahā lelei: “ ʼE mole ko nātou ʼaē ʼe natou ʼui mai kiā te au: ‘ ʼAliki, ʼAliki,’ kā natou hū anai ki te puleʼaga ʼo selō, kae ko ʼaē ʼe ina fai te finegalo ʼo taku Tamai ʼaē ʼe ʼi selō. Tokolahi ʼe natou ʼui mai anai kiā te au ʼi te ʼaho ʼaia [te ʼaho ʼaē kā fakahoko ai e te ʼAtua tana fakamāu]: ‘ ʼAliki, ʼAliki, neʼe mole koa lā matou lea fakapolofetā ʼaki tou huafa, pea mo kapu te ʼu temonio ʼaki tou huafa, pea mo fai te ʼu gāue mālohi ʼaki tou huafa?’ Kae hoki au fakahā age anai leva kiā nātou: Neʼe heʼeki au ʼiloʼi au ia koutou! Kotou fakamamaʼo atu iā te au.” (Mat. 7:21-23) He koʼē ʼe fai te faifakamāu fēia kiā nātou? Heʼe ko te hahaʼi ʼaia neʼe natou fakalainoaʼi te ʼAtua pea mo natou fakalotomamahiʼi te hahaʼi ʼi tanatou maumauʼi te lao.
14. He koʼē ko te kau agahala ʼaē ʼe mole fakahemala ʼe fakamavae ia nātou ʼi te kōkelekāsio?
14 ʼE fakatotonu mai ʼi te Folafola ʼa te ʼAtua ko te kau agahala ʼaē ʼe mole fakahemala ʼe tonu ke fakamavae ia nātou ʼi te kōkelekāsio. (Lau ia 1 Kolonito 5:9-13.) ʼE maʼuhiga te fakatuʼutuʼu ʼaia kiā faʼahi ʼe tolu: (1) ke mole ʼulihi te huafa ʼo Sehova, (2) ke puipui te kōkelekāsio naʼa ʼulihi ʼi he ʼu aga heʼeʼaoga pea (3) ke tokoni ki ʼaē neʼe agahala ke fakahemala.
15. Kapau ʼe tou fia agatonu kiā Sehova, koteā te ʼu fehuʼi maʼuhiga ʼaē ʼe tonu ke tou fai kiā tātou totonu?
15 ʼE tou maʼu koa te faʼahiga manatu ʼa Sesu ʼo ʼuhiga mo nātou ʼaē ʼe natou maumauʼi te lao? ʼE ʼaoga ke tou fakakaukauʼi te ʼu fēhuʼi ʼaenī: ‘ ʼE au fia fakatahi tuʼumaʼu anai koa mo he tahi neʼe kua fakamavae pe neʼe ina filifili ke mavae ʼi te kōkelekāsio? ʼE feafeaʼi mo kapau ko hokita kāiga totonu ʼe mole kei maʼuli ʼi totatou loto fale?’ ʼE feala ki te taʼi ʼaluʼaga ʼaia ke fakatupu faigataʼa ki takita manako ʼaē ki te faitotonu pea mo takita agatonu ʼaē ki te ʼAtua.
16, 17. Koteā te faigataʼa neʼe tau mo te faʼē Kilisitiano? Pea koteā ʼaē neʼe tokoni kiā ia ke lagolago ki te fakatuʼutuʼu ʼaē ke fakamavae te kau agahala ʼaē ʼe mole fakahemala?
16 Tou vakaʼi age muʼa te meʼa neʼe hoko ki te tuagaʼane neʼe ko tana tama neʼe kua fotufotuʼa tagata pea ʼi te tahi temi neʼe ʼofa kiā Sehova. Kae ki muli age neʼe ina filifili ke maʼuli ʼi te agahala ʼo ina fai te ʼu aga heʼeʼaoga. Pea neʼe fakamavae ʼi te kōkelekāsio. Ko totatou tuagaʼane neʼe ʼofa kiā Sehova kae neʼe toe ʼofa foki ki tana tama pea neʼe faigataʼa aupitō kiā ia tana mulimuli ki te vaega Tohi-Tapu ʼaē ʼe fakatotonu ai ke mole toe felōgoi mo tana kiʼi tama.
17 Koteā ʼapē te tokoni neʼe feala ke kotou foaki age ki te tuagaʼane ʼaia mo kanapau lā neʼe ko koutou ʼaē neʼe fai tokoni age ki ai? Neʼe tokoni ia te tagata ʼāfea ki te tuagaʼane ke mahino kiā ia, ko Sehova ʼe mahino ki te mamahi ʼaē ʼe tau mo ia. Neʼe fakamahino age e te tehina ke ina metitāsioʼi te lotomamahi, ʼaē neʼe lagi maʼu e Sehova ʼi te temi ʼaē neʼe agatuʼu ai tona tahi ʼu foha ʼi selō. Neʼe fakamahino age e te tagata ʼāfea, logolā ko Sehova ʼe ina ʼiloʼi te mamahi ʼaē ʼe tau mo tātou ʼi te ʼu taʼi lakaga ʼaia, kae ʼe ina fakamaʼua mai ke fakamavea te kau agahala ʼaē ʼe mole fakahemala. Neʼe mulimuli te tuagaʼane ki te ʼu tokoni ʼaē neʼe foaki age e te tagata ʼāfea pea neʼe agatonu ʼo lagolago ki te fakatuʼutuʼu ʼaē ʼo ʼuhiga mo te fakamavea. * Ko te taʼi agatonu ʼaia ʼe fakafiafia ki te loto ʼo Sehova.—Taag. 27:11.
18, 19. (a) Koteā ʼaē ʼe tou fakamoʼoni kiai mokā ʼe tou motuhi tatatou ʼu felōgoi ʼaē mo he tahi neʼe ina maumauʼi te lao? (b) Koteā anai tona ʼu fua mokā ʼe tou agatonu ki te ʼAtua pea mo tana fakatuʼutuʼu ʼo ʼuhiga mo te fakamavae?
18 Kapau ʼe kotou tau mo he ʼaluʼaga fēia, ʼaua naʼa galo kiā koutou ʼe mahino ia Sehova ki te ʼu meʼa ʼaē ʼi tokotou loto. ʼI takotou motuhi takotou ʼu felōgoi ʼaē mo he tahi kua fakamavae peʼe ko he tahi neʼe mavae ʼi te kōkelekāsio, ʼe kotou fakahā ʼi takotou fai te aga ʼaia, ʼe kotou fehiʼa ki tana aga ʼaē neʼe tupu ʼaki ai ia tona fakamavae ʼaē ʼi te kōkelekāsio. Koia ʼe kotou toe fakahā ai ʼe kotou ʼofa kiā ia ʼaē neʼe agahala pea ʼe kotou loto ke fua lelei te fakatuʼutuʼu ʼaia ki ai. Ko takotou agatonu ʼaē kiā Sehova ʼe feala aipē anai ki he tahi neʼe fakatūʼā ke fakahemala pea ke toe liliu mai kiā Sehova.
19 Neʼe fakamavae te tahi ʼi te kōkelekāsio pea ki muli age neʼe toe fakahū ki te kōkelekāsio, neʼe ina ʼui fēnei: “ ʼE au fiafia heʼe ʼaki te toe ʼofa lahi ʼaē ʼo Sehova ki tana hahaʼi ʼe tokaga lelei ia ke ina taupau ke maʼa ia tana kautahi. ʼE lagi ko he fakatuʼutuʼu ʼe mata fefeka faʼu ki te hahaʼi ʼaē ʼe mole kau ki te kōkelekāsio, kae ʼe ko he fakatuʼutuʼu ʼofa ia ke fai pea mo ʼaoga ’tāfito.” ʼI takotou manatu, neʼe feala anai koa kiā ia ke ina maʼu te taʼi manatu ʼaia mo kanapau lā neʼe hoholo atu pē tana ʼu felōgoi lelei ʼaē mo te kōkelekāsio peʼe ko tona fāmili kae neʼe kua fakamavae ia ʼi te kōkelekāsio? Ko tatatou lagolago ʼaē ki te fakatuʼutuʼu Fakatohi-tapu ʼo ʼuhiga mo te fakamavae ʼo he tahi neʼe agahala, ʼe tou fakahā ai tatatou manako ʼaē ki te faitotonu pea ʼe tou fakamoʼoni ʼe ko Sehova ʼaē ʼe tonu ke ina fakatuʼu te ʼu lēkula ʼo ʼuhiga mo te aga ʼaē ʼe tonu ke fai.
“Kotou Fehiʼa Ki Te Meʼa ʼAē ʼe Kovi”
20, 21. He koʼē ʼe maʼuhiga ke kita mahino ki te fehiʼa ʼaē ki te maumauʼi ʼo te lao?
20 ʼE fakatokaga fēnei e te ʼapositolo ko Petelo: “Kotou nonofo ʼalaʼa a, kotou nonofo tōkakaga.” Koteā tona tupuʼaga? Heʼe ko “tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.” (1 Pet. 5:8) ʼE ko koutou anai koa ʼaē kā ina kumi ke ina kai? ʼE fakalogo te faʼahi ʼaia kiā koutou peʼe feafeaʼi takotou mahino ʼaē ki te fehiʼa ki te maumauʼi ʼo te lao.
21 ʼE mole faigafua hakita fehiʼa ki te meʼa ʼaē ʼe kovi. Neʼe tou tutupu ake ʼi te agahala pea ʼe tou māʼuʼuli nei ʼi he mālama ʼe tokaga ki te fakafīmālieʼi ʼaē ʼo te ʼu holi ʼo te kakano. (1 Soa. 2:15-17) Kae ʼi tatatou mulimuli ki te faʼifaʼitaki ʼa Sesu Kilisito pea mo tou fakatuputupu totatou ʼofa ke lahi age kiā Sehova ʼAtua, ʼe feala ai ke tou fēhihiʼa ki te maumauʼi ʼo te lao. Tou fakatotonu ke tou “fehiʼa ki te meʼa ʼaē ʼe kovi,” ʼo tou falala kātoa ko Sehova ʼe ina “taupau . . . tana kau agatonu; mai te nima ʼo te kau agakovi, ʼe ina hāofaki ia nātou.”—Pes. 97:10.
[Nota]
^ Kotou toe vakaʼi mo Te Tule Leo Fakafalani ʼo te ʼaho 15 ʼo Sānualio 2007 ʼi te ʼu pāsina 17-20.
ʼE Kotou Tali Feafeaʼi Anai?
• Koteā ʼaē kā tokoni mai anai kiā tātou ke tou vakavakaʼi tatatou manatu ʼo ʼuhiga mo te kava?
• Koteā te ʼu puleʼaki moʼo puipui ʼo tātou ʼe feala ke tou fai moʼo tekeʼi te ʼu meʼa faifakalauʼakau?
• He koʼē ʼe fakatupu tuʼutamaki takita sioʼi he ʼu pāki ʼe fai ai he ʼu felāveʼi fakasino heʼeʼaoga?
• ʼE feafeaʼi hatatou fakahā tatatou fehiʼa ki te maumauʼi ʼo te lao ʼi te temi ʼaē ʼe fakamavae ai he tahi ʼi te kōkelekāsio kae neʼe tou ʼofa ai?
[ʼU fehuʼi ʼo te ako]
[Paki ʼo te pasina 29]
Kapau ʼe tou fakatuʼutuʼu ke tou ʼinu he moʼi kava, koteā ʼaē ʼe tonu ke tou tōkakaga kiai?
[Paki ʼo te pasina 30]
Kotou nonofo tōkakaga naʼa fakahalaʼi kotou e Satana ʼi te ʼu fakafiafia
[Paki ʼo te pasina 31]
Koteā ʼaē kā manako kiai he tahi mokā ʼe ina sioʼi he ʼu pāki ʼe fai ai he ʼu felāveʼi fakasino heʼeʼaoga?